ក្នុងឆមាសទី១ ឆ្នាំ២០២៦ កុងតឺន័រ ដែលឆ្លងកាត់កំពង់ផែស្វយ័តភ្នំពេញមានប្រមាណជិត ៣៤ ម៉ឺន ធីអ៊ីយូ (TEU) កើនឡើងជាង ៣០% បើធៀបពេលដូចគ្នាកាលឆ្នាំមុន។ នេះបើយោងតាមសេចក្ដីប្រកាសព័ត៌មានរបស់ ក. ស. ភ. ដែលជាអង្គភាពចុះបញ្ជីនៅផ្សារមូលបត្រកម្ពុជា ចេញផ្សាយថ្ងៃ ៧ ខែកក្កដា ម្សិលមិញ។
Million Times 
កំពង់ផែស្វយ័តភ្នំពេញ បានទទួលនាវាដឹកទំនិញឆ្លងកាត់ ១ ៨៩១ គ្រឿង មានការកើនឡើង ៦,៦៦% បើធៀបនឹងរយៈពេលដូចគ្នាកាលពីឆ្នាំ ២០២៥។ សម្រាប់កុងតឺន័រឆ្លងកាត់មាន៣៣៩ ៦០៦ ធីអ៊ីយូ កើន ៣១,៥៦%, និងបរិមាណទំនិញ-ប្រេងឥន្ទនៈ ឆ្លងកាត់ ២ ៨៩៧ ០០០ តោន កើន ១០,០១%។
រីឯនាវាដឹកអ្នកដំណើរ មាន ២០៩ គ្រឿង កើន ៨,២៩% និងអ្នកដំណើរ ឆ្លងកាត់ ២១ ៤២៦ នាក់ កើនឡើង ៦,៦៧%។ ដោយឡែកសម្រាប់ខែមិថុនា ឆ្នាំ ២០២៦ នាវាចូលចតមាន ៣០៩ គ្រឿង កើន ៤,៧៥% បើធៀបខែមិថុនា ឆ្នាំមុន, កុងតឺន័រ ៦៣ ៤៥៥ ធីអ៊ីយូ កើន ២១,៨៣%, ទំនិញប្រេងឥន្ធនៈឆ្លងកាត់ ៤៨៩ ៤១៣ តោន កើន ៦,៧២%, នាវាដឹកអ្នកដំណើរ ៩គ្រឿង ចំនួននៅដដែល និងអ្នកដំណើរមាន ៥០១ នាក់ កើន ២៨,១៣%។
យោងតាមការចុះផ្សាយរបស់ភ្នំពេញប៉ុស្ដិ៍ ប្រធានសមាគមពាណិជ្ជករដឹកជញ្ជូន ខ្សែច្រវាក់ផ្គត់ផ្គង់ និងភ្នាក់ងារជើងសានៅកម្ពុជា លោក ជា ចាន់ដារ៉ា បានបញ្ជាក់ថា កំណើនចរាចរណ៍ទំនិញ និងកុងតឺន័រឆ្លងកាត់ គឺមានន័យថាសកម្មភាពសេដ្ឋកិច្ចកម្ពុជាកំពុងមានដំណើរការល្អ បើទោះបីសេដ្ឋកិច្ចពិភពលោកកំពុងបន្តជួបនឹងបញ្ហាប្រឈមជាច្រើនក៏ដោយ។ កំពង់ផែភ្នំពេញនឹងកាន់តែមានភាពមមាញឹកបន្ថែមទៀត នៅពេលគម្រោងព្រែកជីកហ្វូណនតេជោដែលតភ្ជាប់រវាងទន្លេបាសាក់ ទៅកាន់កំពង់ផែសមុទ្របើកដំណើរការ។
លោក ចាន់ដារ៉ា ប្រភេទទំនិញដែលគេដឹកជញ្ជូនតាមរយៈកំពង់ផែភ្នំពេញ មានភាគច្រើនជាផលិតផលវាយនភណ្ឌ និងផលិតផលកសិកម្ម៕
អត្ថបទ៖ ឆដា, រូបភាព៖ កំពង់ផែស្វយ័តភ្នំពេញ
