ភ្នំពេញ៖ ធនាគារជាតិនៃកម្ពុជា បានបដិសេធទាំងស្រុងចំពោះព័ត៌មានក្លែងក្លាយដែលត្រូវបានផ្សព្វផ្សាយតាមបណ្តាញសង្គម ពាក់ព័ន្ធនឹងការដាក់ឱ្យចរាចរក្រដាសប្រាក់រៀលប្រភេទថ្មី ដោយអមជាមួយរូបភាពឌីហ្សាញក្រដាសប្រាក់មិនពិតដែលបង្កើតឡើងដោយបច្ចេកវិទ្យា AI។
ធនាគារជាតិនៃកម្ពុជា បានឱ្យដឹងថា នាពេលថ្មីៗនេះ មានគណនី TikTok និងអាចមានគណនីបណ្តាញសង្គមផ្សេងទៀត បានផ្សព្វផ្សាយវីដេអូព័ត៌មានក្លែងក្លាយពាក់ព័ន្ធនឹងក្រដាសប្រាក់រៀលប្រភេទថ្មី។
ធនាគារជាតិនៃកម្ពុជា បានបញ្ជាក់ថា ខ្លួនសូមបដិសេធទាំងស្រុងចំពោះការផ្សព្វផ្សាយព័ត៌មានប្រឌិតទាំងនេះ និងថ្កោលទោសយ៉ាងធ្ងន់ធ្ងរចំពោះអ្នកប្រព្រឹត្តល្មើស។
ធនាគារជាតិនៃកម្ពុជា កំពុងសហការជាមួយអាជ្ញាធរមានសមត្ថកិច្ច ដើម្បីចាត់វិធានការលើករណីនេះ។
ទន្ទឹមនេះ ធនាគារជាតិនៃកម្ពុជា បានអំពាវនាវដល់សាធារណជនឱ្យចៀសវាងការចែករំលែកបន្តនូវព័ត៌មានក្លែងក្លាយទាំងនេះ ដែលអាចបង្កការយល់ច្រឡំដល់សាធារណជនផ្សេងទៀត។
ធនាគារជាតិនៃកម្ពុជា ក៏បានណែនាំឱ្យសាធារណជនប្រើប្រាស់ និងផ្ទៀងផ្ទាត់ព័ត៌មានពាក់ព័ន្ធនឹងធនាគារជាតិនៃកម្ពុជា តែពីប្រភពផ្លូវការរបស់ធនាគារជាតិនៃកម្ពុជាប៉ុណ្ណោះ ដើម្បីចៀសវាងការទទួល និងចែករំលែកព័ត៌មានមិនពិត។
ធនាគារជាតិនៃកម្ពុជា បានបញ្ជាក់បន្ថែមថា ខ្លួនបានផ្សព្វផ្សាយយ៉ាងទូលំទូលាយអំពីរាល់ប្រភេទក្រដាសប្រាក់ដែលកំពុងចរាចរ ដើម្បីឱ្យសាធារណជនអាចស្វែងរក និងផ្ទៀងផ្ទាត់ប្រភេទក្រដាសប្រាក់ដែលកំពុងស្ថិតក្នុងចរាចរណ៍បាន៕
អត្ថបទ៖ ប៊ី
Million Times 
