​ភ្នំពេញ​៖​ ​អ្នក​ប្រើប្រាស់​កម្មវិធី​ទូទាត់​ចល័ត​ ​Weixin​ ​Pay​ ​ឬ​ ​WeChat​ ​Pay​ ​របស់​ចិន ​អាច​ស្កេន ​KHQR​ ​ដើម្បី​ទូទាត់​ថ្លៃ​ទំនិញ​ ​និង​សេវាកម្ម​នៅ​កម្ពុជា​ ​បន្ទាប់ពី​កម្ពុជា​ ​និង​ចិន​បាន​ដាក់​ឱ្យ​ដំណើរការ​ជា​ផ្លូវការ​នូវ​ការ​ទូទាត់​ឆ្លង​ដែន​តាម​ ​QR​ ​Code​ ​ក្នុង​ដំណាក់កាល​ទី​១​ ​នៅ​ថ្ងៃ​ទី​១៨​ ​ខែ​សីហា ​ឆ្នាំ​២០២៦​។

​ពិធី​ដាក់​ឱ្យ​ដំណើរការ​នេះ​ធ្វើឡើង​នៅ​រាជធានី​ភ្នំពេញ​ ក្រោម​អធិបតីភាព​លោក​ជំទាវ​បណ្ឌិត​ ​ជា ​សិរី ​ទេសាភិបាល​ធនាគារ​ជាតិ​នៃ​កម្ពុជា​ ​និង​លោក​ ​Ben​ ​Yang​ ​នាយក​គ្រប់គ្រង​ ​Weixin​ ​Pay​ ​ប្រចាំ​តំបន់​អាស៊ី​អាគ្នេយ៍​ ​អាមេរិក​ខាង​ជើង​ និង​អាមេរិក​ឡាទីន​។

​ពិធី​នេះ​មាន​ការ​ចូលរួម​ពី​តំណាង​ស្ថានទូត​សាធារណរដ្ឋ​ប្រជាមានិត​ចិន​ប្រចាំ​កម្ពុជា​ ​ក្រសួង​ទេសចរណ៍​ សមាគម​ធនាគារ​នៅ​កម្ពុជា​ សមាគម​មីក្រូ​ហិរញ្ញវត្ថុ​កម្ពុជា​ សមាគម​សហព័ន្ធ​ហិរញ្ញវត្ថុ​ ​និង​បច្ចេកវិទ្យា​កម្ពុជា​ ​ក្រុមហ៊ុន​បណ្តាញ​ប័ណ្ណ​ទូទាត់​អន្តរជាតិ​ ​គ្រឹះស្ថាន​ធនាគារ​ ​និង​ហិរញ្ញវត្ថុ​ ​សមាគម​សណ្ឋាគារ​កម្ពុជា​ សមាគម​ភោជនីយដ្ឋាន​កម្ពុជា​ ​និង​ស្ថាប័ន​ពាក់ព័ន្ធ​ផ្សេង​ទៀត​ សរុប​ប្រមាណ​ ​១៨៥​ ​រូប​។

​តាម​ធនាគារ​ជាតិ​នៃ​កម្ពុជា​ ​ការ​ដាក់​ឱ្យ​ដំណើរការ​នេះ​នឹង​សម្រួល​ការ​ទូទាត់​រវាង​ប្រទេស​ទាំង​ពីរ ​ដោយ​អ្នក​ប្រើប្រាស់​ ​Weixin​ ​Pay​ ​អាច​ស្កេន ​KHQR​ ​ដែល​មាន​ស្រាប់​នៅ​តាម​ពាណិជ្ជករ ​និង​អាជីវកម្ម​នៅ​កម្ពុជា​ តាមរយៈ​បណ្តាញ​ប្រតិបត្តិការ​ទូទាត់​របស់​ ​Weixin​ ​Pay​។

​ប្រព័ន្ធ​ទូទាត់​ថ្មី​នេះ​ក៏​នឹង​ផ្តល់​ភាព​ងាយស្រួល​ដល់​ភ្ញៀវ​ទេសចរ​ចិន​ ​ក្នុង​ការ​ទូទាត់​ថ្លៃ​អាហារ​ ការ​ធ្វើដំណើរ​ និង​សេវាកម្ម​នៅ​តាម​កន្លែង​កម្សាន្ត​នានា​ទូទាំង​ប្រទេស​កម្ពុជា​ ​ដោយ​មិន​ចាំបាច់​ប្តូរ​រូបិយប័ណ្ណ ​ឬ​កាន់​សាច់ប្រាក់​ជា​ច្រើន​។

​លោក​ជំទាវ​បណ្ឌិត​ ​ជា ​សិរី ​បាន​មានប្រសាសន៍​ថា​ ​ការ​ដាក់​ឱ្យ​ដំណើរការ​ការ​ទូទាត់​ឆ្លង​ដែន​នេះ​ផ្តល់​នូវ​អត្ថប្រយោជន៍​ជា​យុទ្ធសាស្ត្រ​ចំនួន​ពីរ​ សម្រាប់​ភ្ញៀវ​ទេសចរ​បរទេស​ ​និង​សហគ្រាស​ក្នុង​ស្រុក​។

​លោក​ជំទាវ​បាន​បញ្ជាក់​ថា​ ​សម្រាប់​ភ្ញៀវ​ទេសចរ​បរទេស​ដែល​ប្រើប្រាស់​ ​Weixin​ ​Pay​ ​ជាពិសេស​ភ្ញៀវ​ទេសចរ​មកពី​ប្រទេស​ចិន​ ​ប្រព័ន្ធ​នេះ​នឹង​ផ្តល់​បទពិសោធន៍​ទូទាត់​ដែល​រហ័ស ​សុវត្ថិ​ភាព​ ​និង​ងាយស្រួល ​ដោយ​មិន​ចាំបាច់​ប្តូរ​រូបិយប័ណ្ណ​ ​កាន់​សាច់ប្រាក់​ផ្ទាល់​ ​ឬ​ប្រើប្រាស់​ប័ណ្ណ​ទូទាត់​។

​សម្រាប់​សហគ្រាស​ក្នុង​ស្រុក​ ​ចាប់​ពី​ម្ចាស់​អាជីវកម្ម​ ​និង​សហគ្រាស​ធំ​ៗ ​រហូតដល់​សហគ្រាស​ធុន​មីក្រូ ​តូច​ ​និង​មធ្យម​ ព្រមទាំង​ពាណិជ្ជក​រ ​នឹង​អាច​ទទួល​ការ​ទូទាត់​ពី​អតិថិជន​បរទេស​បាន​កាន់តែ​ច្រើន​ តាមរយៈ​ ​KHQR​ ​ដែល​មាន​ស្រាប់ ​ដោយ​មិន​ប្រឈម​នឹង​ការ​កាត់​កម្រៃ​ប្រតិបត្តិការ​បន្ថែម​។

​លោក​ ​Ben​ ​Yang​ ​បាន​ចាត់ទុក​ការ​ដាក់​ឱ្យ​ដំណើរការ​ជា​ផ្លូវការ​នេះ​ថា​ ​ជា​សមិទ្ធផល​សំខាន់​នៃ​ការ​ធ្វើអន្តរ​ប្រតិបត្តិការ​ទូទាត់​រាយ​ឆ្លង​ដែន​រវាង​ប្រទេស​ទាំង​ពីរ​។

​លោក​បាន​មានប្រសាសន៍​ថា​ ​ការ​ប្រើប្រាស់​ ​KHQR​ ​សម្រាប់​ការ​ទូទាត់​នឹង​រួមចំណែក​ពង្រីក​លទ្ធភាព​នៃ​ការ​ទូទាត់​ឱ្យ​កាន់តែ​មាន​សុវត្ថិ​ភាព​ ​និង​ប្រសិទ្ធភាព​ ជាពិសេស​ដោយ​ផ្តល់​លទ្ធភាព​ឱ្យ​ភ្ញៀវ​ទេសចរ​ចិន​អាច​ធ្វើ​ប្រតិបត្តិការ​ទូទាត់​បាន​យ៉ាង​ងាយស្រួល​ ក្នុង​បរិបទ​សេដ្ឋកិច្ច​ឌីជីថល​របស់​កម្ពុជា​។

​លោក​ ​Ben​ ​Yang​ ​បាន​បន្ថែម​ថា​ ​ការ​អភិវឌ្ឍ​ការ​ទូទាត់​ឆ្លង​ដែន​នេះ​ ​មិន​ត្រឹមតែ​ជា​ការ​អភិវឌ្ឍ​មុខងារ​សម្រាប់​សម្រួល​ការ​ទូទាត់​របស់​ភ្ញៀវ​ទេសចរ​ប៉ុណ្ណោះ​ទេ​ ​ប៉ុន្តែ​ថែមទាំង​ផ្តោត​លើ​ការ​លើកកម្ពស់​ការ​ប្រើប្រាស់​រូបិយវត្ថុ​ក្នុង​ស្រុក​សម្រាប់​ការ​ទូទាត់​ ​សង្គតិ​ភាព​នៃ​បទប្បញ្ញត្តិ​ ​និង​ការ​ធ្វើ​ឌីជីថល​ភាវូបនីយ​កម្ម​ជាមួយ​ពាណិជ្ជករ​ផងដែរ​។

​លោក​បាន​ថ្លែងអំណរគុណ​ដល់​ធនាគារ​ជាតិ​នៃ​កម្ពុជា​ ​ចំពោះ​ភាព​ជា​អ្នក​ដឹកនាំ​ ​និង​ចក្ខុវិស័យ​រយៈពេល​វែង​របស់​លោក​ជំទាវ​ទេសាភិបាល​ ​ហើយ​បញ្ជាក់​ពី​ការ​ប្តេជ្ញា​បន្ត​ជំរុញ​កិច្ច​សហប្រតិបត្តិការ​នេះ​ ​ជាពិសេស​ការ​ភ្ជាប់​ជាមួយ​ទស្សនវិស័យ​របស់​អាស៊ាន​ ​ក្នុង​ការ​ជំរុញ​ការ​ទូទាត់​រាយ​ឱ្យ​កាន់តែ​ប្រសើរឡើង​។

​ការ​ដាក់​ឱ្យ​ដំណើរការ​នេះ​ជា​ជំហាន​បន្ថែម​ក្នុង​ការ​ពង្រឹង​កិច្ច​សហប្រតិបត្តិការ​លើ​ប្រព័ន្ធ​ទូទាត់​រវាង​កម្ពុជា​ ​និង​ចិន​ ​និង​បង្ហាញ​ពី​ការ​រីកចម្រើន​នៃ​ការ​ធ្វើអន្តរ​ប្រតិបត្តិការ​ទូទាត់​ឌីជីថល​ឆ្លង​ដែន​រវាង​ប្រទេស​ទាំង​ពីរ​។ ​ការ​ភ្ជាប់​ ​KHQR​ ​ជាមួយ​ ​Weixin​ ​Pay​ ​ក៏​នឹង​ជួយ​បង្កើន​ភាព​ងាយស្រួល​សម្រាប់​ភ្ញៀវ​ទេសចរ​ចិន​ ​និង​ពង្រីក​ឱកាស​ទទួល​ការ​ទូទាត់​សម្រាប់​អាជីវករ​កម្ពុជា​តាមរយៈ​ប្រព័ន្ធ​ ​QR​ ​ដែល​មាន​ស្រាប់​៕

អត្ថបទ៖ ប៊ី