ក្រសួងពាណិជ្ជកម្មកម្ពុជា និងសភាពាណិជ្ជកម្ម និងឧស្សាហកម្មបារាំងប្រចាំកម្ពុជា (CCIFC) បានចុះហត្ថលេខាលើអនុស្សរណៈនៃការយោគយល់គ្នា (MoU) ដើម្បីសហការរៀបចំ «វេទិកាធុរកិច្ចកម្ពុជា-បារាំង លើកទី៣» ដែលគ្រោងធ្វើឡើងនៅខែវិច្ឆិកា ឆ្នាំ២០២៦។
Million Times 
កាលពីថ្ងៃ ៣ ខែកញ្ញា ឆ្នាំ២០២៦ ម្សិលមិញ នៅទីស្ដីការក្រសួងពាណិជ្ជកម្ម រដ្ឋមន្ត្រីក្រសួងពាណិជ្ជកម្ម លោកស្រី ចម និម្មល លោក ទិត សីច័ន្ទលី អគ្គនាយកនៃអគ្គនាយកដ្ឋានគោលនយោបាយ និងជំរុញពាណិជ្ជកម្ម និងលោក Julien Bert អនុប្រធានសភាពាណិជ្ជកម្ម និងឧស្សាហកម្មបារាំងប្រចាំកម្ពុជា (CCIFC) បានចុះហត្ថលេខាលើអនុស្សរណៈនៃការយោគយល់គ្នា (MOU) ដើម្បីសហការរៀបចំវេទិកាធុរកិច្ចកម្ពុជា-បារាំង លើកទី៣ ដែលគ្រោងនឹងប្រព្រឹត្តទៅនៅថ្ងៃ ១៦-១៧ ខែវិច្ឆិកា ឆ្នាំ២០២៦ នៅរាជធានីភ្នំពេញ។
ការចុះហត្ថលេខាលើ MOU នេះ ក៏មានការចូលរួមពីថ្នាក់ដឹកនាំ និងមន្ត្រីរាជការនៃក្រសួងពាណិជ្ជកម្ម តំណាងសភាពាណិជ្ជកម្មនិងឧស្សាហកម្មកម្មបារាំងប្រចាំកម្ពុជា (CCIFC), ទីប្រឹក្សាពាណិជ្ជកម្មក្រៅប្រទេសនៃប្រទេសបារាំង ប្រចាំកម្ពុជា (CCEF), ស្ថានទូតបារាំងប្រចាំកម្ពុជា និងបណ្ដាក្រុមហ៊ុន ដែលជាដៃគូឧបត្ថម្ភផងដែរ។
វេទិកាធុរកិច្ចកម្ពុជា-បារាំង ដើរតួនាទីជាវេទិកាដ៏សំខាន់មួយក្នុងការបន្តពង្រឹងទំនាក់ទំនងសេដ្ឋកិច្ច និងពាណិជ្ជកម្មរវាងកម្ពុជា និងបារាំង លើកកម្ពស់ភាពជាដៃគូយុទ្ធសាស្ត្រ ព្រមទាំងបង្កើតឱកាស សម្រាប់ក្រុមហ៊ុន សហគ្រាស និងវិនិយោគិន ដែលកំពុងប្រតិបត្តិការនៅក្នុងទីផ្សារកម្ពុជា និងតំបន់។
កិច្ចសហការជិតស្និទ្ធនេះ ត្រូវបានរំពឹងថានឹងជួយសម្រួលដល់ការដោះស្រាយបញ្ហាប្រឈមនានារបស់ក្រុមហ៊ុនបារាំង ដែលកំពុងប្រតិបត្តិការនៅកម្ពុជា ព្រមទាំងជួយពង្រីកបណ្ដាញទំនាក់ទំនងធុរកិច្ច និងទាក់ទាញក្រុមហ៊ុនបារាំងថ្មីៗបន្ថែមទៀតមកបណ្ដាក់ទុន និងទាញយកកាលានុវត្តភាពពាណិជ្ជកម្មនៅកម្ពុជា។ លើសពីនេះ កិច្ចសហប្រតិបត្តិការនឹងរួមចំណែកទាក់ទាញបច្ចេកវិទ្យា ចំណេះដឹង និងស្តង់ដារប្រតិបត្តិការកម្រិតខ្ពស់ មកពង្រឹងសមត្ថភាព និងការប្រកួតប្រជែងរបស់វិស័យឯកជនកម្ពុជាផងដែរ។
គួរបញ្ជាក់ផងដែរថា កម្ពុជា នឹងធ្វើជាម្ចាស់ផ្ទះ នៃកិច្ចប្រជុំកំពូលហ្វ្រង់កូហ្វូនី លើក ២០ នៅខែវិច្ឆិកា ឆ្នាំ២០២៦ ខាងមុខនេះ។ ព្រឹត្តិការណ៍ជាប្រវត្តិសាស្ត្រដ៏សំខាន់នេះ នឹងមានការចូលរួមពីប្រមុខដឹកនាំ និងតំណាងរដ្ឋជាសមាជិកនៃអង្គការអន្តរជាតិហ្វ្រង់កូហ្វូនី (OIF) ព្រមទាំងស្ថាប័នដៃគូនានាជាច្រើន។ តាមការគ្រោងទុក ប្រធានាធិបតីបារាំង លោក អេម៉ានូអែល ម៉ាក្រុង ក៏នឹងចូលរួមក្នុងកិច្ចប្រជុំកំពូលនេះផងដែរ៕
អត្ថបទ៖ ឆដា, រូបភាព៖ ក្រសួងពាណិជ្ជកម្ម Ministry of Commerce
