គ្រឹះស្ថានអង្គរបានបង្ហាញពីរបាយការណ៍ បានមកពីការលក់សំបុត្រចូលទស្សនារមណីយដ្ឋានអង្គរ នាពាក់កណ្ដាលឆ្នាំ ២០២៦ នេះ បានជាង១៨ លានដុល្លារ ធ្លាក់ចុះជិត ៣០ ភាគរយ បើធៀបទៅនឹង ៦ ខែដំបូងនៃ ឆ្នាំ ២០២៥។
Million Times 
ក្នុងរបាយការណ៍គ្រឹះស្ថានអង្គរចេញផ្សាយនៅថ្ងៃ ១ ខែកក្កដា ម្សិលមិញបានបញ្ជាក់ថា រយៈពេលពាក់កណ្ដាលឆ្នាំ ២០២៦ ចំនួនភ្ញៀវទេសចរបរទេសដែលបានចូលទស្សនារមណីយដ្ឋានអង្គរមានចំនួន ៣៨៧ ៧៧២ នាក់ បើធៀបរយៈពេលដូចគ្នាក្នុងឆ្នាំ ២០២៥ មានការធ្លាក់ចុះ ៣១,៦៩ ភាគរយ។
របាយការណ៍របស់គ្រឹះស្ថានអង្គរគិតចាប់ពីខែមករា ដល់ខែមិថុនា ២០២៦។ សម្រាប់ចំណូលដែលបានពីការលក់សំបុត្រ ចូលទស្សនារមណីយដ្ឋានអង្គរបាន ១៨ ៤៧២ ៤៦៩ ដុល្លារ ថយចុះ ២៩,៨១ ភាគរយ បើធៀបរយៈពេលដូចគ្នា ក្នុងឆ្នាំ ២០២៥។
ក្នុងនោះដែរគ្រឹះស្ថានអង្គរក៏បានស្រង់ស្ថិតិចំនួនភ្ញៀវបរទេសដែលបានចូលទស្សនានៅកោះកេរ , បេងមាលា , ភ្នំក្បាលស្ពាន និងកំពង់ផែចុងឃ្នៀស ព្រមទាំងចំណូលដែលទទួលបានផងដែរ។
នៅឆ្នាំ ២០២៥ គ្រឹះស្ថានបានបញ្ចេញរបាយការណ៍ថា កម្ពុជារកចំណូលបានជិត ៤៥ លានដុល្លារ ពីការលក់សំបុត្រចូលទស្សនារមណីយដ្ឋានអង្គរ ធ្លាក់ចុះ ៦,៥១% ប្រៀបធៀបនឹងឆ្នាំ ២០២៤៕
អត្ថបទ៖ ឆដា, រូបភាព៖ អ៊ីនធឺណេត
