ថេប្លេតម៉ាក «K Haitech» របស់អ្នកឧកញ៉ាវ័យក្មេង សំ សុខនឿន នឹងមានរោងចក្រដំឡើង ហើយលេចចេញជារូបរាងឡើង ក្នុងខណ្ឌជ្រោយចង្វារ រាជធានីភ្នំពេញ នាពេលខាងមុខនេះ។
Million Times 
បើតាមការឲ្យដឹងពីសំណាក់ប្រធានក្រុមប្រឹក្សាភិបាលក្រុមហ៊ុន KH Haitech អ្នកឧកញ៉ា សំ សុខនឿន បានឲ្យដឹងថា រោងចក្រដំឡើងថេប្លេតម៉ាក «K Haitech» មានទីតាំងស្ថិតនៅក្នុងខណ្ឌជ្រោយចង្វាររាជធានីភ្នំពេញនោះ ប្រើប្រាស់ទំហំដីរហូតទៅដល់ជាង ៥.៧ ហិកតាឯណោះ។
រោងចក្រ K Haitech ដែលកំពុងស្ថិតសាងសង់ នឹងបង្កើតការងារជូនប្រជាពលរដ្ឋបានច្រើន ដោយនាំយកជំនាញបែបទំនើបជូនពលរដ្ឋខ្មែរឲ្យមានចំណូលខ្ពស់ ដើម្បីចូលរួមចំណែកអភិវឌ្ឍន៍សេដ្ឋកិច្ច ឲ្យឈានទៅជាប្រទេសមានចំណូលខ្ពស់នៅឆ្នាំ ២០៥០ បាន។
នៅពេលរោងចក្រដំឡើងថេប្លេតម៉ាក «K Haitech» រួចរាល់ នឹងធ្វើឲ្យតំបន់ជ្រោយចង្វារ កាន់តែមានភាពមមាញឹក កំណើនសេដ្ឋកិច្ចតំបន់នោះក៏កើនផងដែរ។ ផលិតផលដែលនឹងផលិតឡើងក្នុងប្រទេសកម្ពុជាមួយនេះ ត្រូវបានរំពឹងទុកថា អាចផ្ដល់ជាជម្រើសបច្ចេកវិទ្យាមានតម្លៃសមរម្យ សម្រាប់សិស្ស និស្សិតសិក្សាស្រាវជ្រាវ និងប្រជាពលរដ្ឋទូទៅ។
តាមរយៈរូបភាពប្លង់ 3D សបញ្ជាក់ឲ្យឃើញពីសំណង់ដែលនឹងមានទាំងរចនាបថសម័យទំនើប ព្រមជាមួយទីតាំងធំទូលាយ និងស្របតាមបច្ចេកទេសស្តង់ដារត្រឹមត្រូវ ផ្ដល់ភាពងាយស្រួលក្នុងការចរាចរ។
គួរបញ្ជាក់ថារោងចក្រដំឡើងថេប្លេតម៉ាក «K Haitech» ដ៏ទំនើប និងផលិតសម្ភារៈបរិក្ខារចាំបាច់សម្រាប់ប្រើប្រាស់ក្នុងស្រុក ជួយឲ្យប្រជាជនកាន់តែមានភាពស៊ីវិល័យ ព្រមទាំងសម្រាលបន្ទុក ជំនួសកម្លាំងពលកម្មបានច្រើន នឹងរួចរាល់នៅចុងឆ្នាំ ២០២៦ ឬត្រីមាសទី១ នៃ ឆ្នាំ២០២៧៕
អត្ថបទ៖ ឆដា, រូបភាព៖ ផ្ដល់ឲ្យ
