ក្នុងឆមាសទី១ ឆ្នាំ២០២៦នេះ កម្ពុជានាំទំនិញចេញទៅទីផ្សារអន្តរជាតិមានតម្លៃប្រមាណ ១៧ ពាន់លានដុល្លារ កើនឡើង ១៩,៥ ភាគរយ ធៀបនឹងរយៈពេលដូចគ្នាកាលពីឆ្នាំមុន។ នេះបើយោងតាមរបាយការណ៍របស់អគ្គនាយកដ្ឋានគយនិងរដ្ឋាករកម្ពុជា កាលពីថ្មីៗនេះ។
ទន្ទឹមនេះ ទិន្នន័យអគ្គនាយកដ្ឋានគយនិងរដ្ឋាករកម្ពុជា បានបង្ហាញក៏ផងដែរថា កម្ពុជាបានទំនិញនាំចូលមកវិញមានតម្លៃជាង ១៩,៧៦ ពាន់លានដុល្លារ ក្នុងរយៈពេល ៦ ខែ ឆ្នាំ ២០២៦ កើនឡើង ២១,៤ ភាគរយ ធៀបនឹងរបយៈពេលដូចគ្នាកាលមុន។
ជារួម ការដោះដូរទំនិញរវាងកម្ពុជា និងដៃគូរពាណិជ្ជកម្មអន្តរជាតិសំខាន់សម្រេចបានទឹកប្រាក់ជាង ៣៦,៨៤ ពាន់ដុល្លារអាម៉េរិក កើនឡើងជាង២០ ភាគរយ បកើនពីចំនួនជាង ៣០ ពាន់លានដុល្លារអាម៉េរិក កាលពីឆ្នាំមុន។
មហាយក្សចិននៅតែជាដៃគូពាណិជ្ជកម្មដ៏ធំបំផុតរបស់កម្ពុជា ដោយមានទំហំពាណិជ្ជកម្មជាង ១១ ពាន់លានដុល្លារអាម៉េរិក កើនឡើង ២៥.៤ ភាគរយ ក្នុងនោះ ការនាំចេញទៅចិនកើនឡើង ២៥.៧ ភាគរយ និងការនាំចូលពីចិនកើនឡើង ២៥.៤ ភាគរយ។
សហរដ្ឋអាម៉េរិកបន្តជាទីផ្សារនាំចេញដ៏សំខាន់សម្រាប់កម្ពុជា ដោយមានការនាំចេញក្នុងទំហំទឹកប្រាក់ជាង ៧ពាន់លានដុល្លារកើនឡើង ២៩.៨ ភាគរយ។ ចំណែក ប្រទេសវៀតណាម ជប៉ុន និងថៃ ក៏បានបង្ហាញពីកំណើនទំហំពាណិជ្ជកម្មគួរឱ្យកត់សម្គាល់ផងដែរ។
របាយការណ៍ចុងក្រោយរបស់ធនាគារពិភពលោក បង្ហាញថា សេដ្ឋកិច្ចរបស់កម្ពុជាកំពុងបង្ហាញភាពធន់ ដោយមានការទ្រទ្រង់ពីការកើនឡើងនៃការវិនិយោគបរទេស និងការនាំចេញដ៏រឹងមាំ បើទុកជាការកើនឡើងនៃថ្លៃប្រេងឥន្ធនៈកំពុងដាក់សម្ពាធលើអាជីវកម្ម និងគ្រួសារកម្ពុជា ក៏ដោយ។
របាយការណ៍ បានឱ្យដឹងទៀតថា ការវិនិយោគផ្ទាល់ពីបរទេសបានឡើងដល់ ៥,១ ពាន់លានដុល្លារអាម៉េរិក នៅក្នុងឆ្នាំ២០២៥ ដោយជួយបង្កើតការងារផ្លូវការប្រមាណ ៤០០ ០០០ ការងារ ហើយតាមរយៈនេះវាបានផ្តល់ឱកាសការងារសំខាន់ៗច្រើន សម្រាប់កម្មករដែលប្តូរពីវិស័យកសិកម្ម និងសម្រាប់ពលករចំណាកស្រុកដែលបានត្រឡប់មកពីប្រទេសថៃវិញ។
ការនាំចេញទំនិញក៏នៅរឹងមាំផងដែរ ដោយកើនឡើងបាន ១៧,៧ ភាគរយ នៅក្នុងត្រីមាសទីមួយ ឆ្នាំ២០២៦។ កំណើនផលិតផលក្នុងស្រុកសរុបពិតប្រាកដត្រូវបានព្យាករថានឹងថយចុះមកត្រឹម ៣,៩ ភាគរយ នៅឆ្នាំ២០២៦ មុនពេលងើបឡើងវិញដល់ ៤,៩ ភាគរយ នៅឆ្នាំ២០២៧។
លោកស្រី Tania Meyer ប្រធានគ្រប់គ្រងធនាគារពិភពលោកប្រចាំកម្ពុជា មានប្រសាសន៍ថា៖«សេដ្ឋកិច្ចកម្ពុជាកំពុងប្រឹងទប់ខ្លួនបាននៅចំពោះមុខសភាពការណ៍ប៉ះទង្គិចច្រើនយ៉ាងក្នុងពេលដំណាលគ្នា ប៉ុន្តែនៅតែបង្ហាញនូវភាពធន់ទ្រាំ ដែលអាចរក្សាបានតាមរយៈវិធានការគោលនយោបាយដែលមានគោលដៅច្បាស់លាស់ ដើម្បីការពារការងារ និងជីវភាពរស់នៅរបស់ប្រជាពលរដ្ឋ»៕
Million Times 
