អភិបាល នៃគណៈអភិបាលខេត្តកំពង់ស្ពឺ ឯកឧត្តមបណ្ឌិត ជាម ច័ន្ទសោភ័ណ បានជំរុញ និងលើកទឹកចិត្តដល់បងប្អូនប្រជាពលរដ្ឋឱ្យងាកមកប្រើប្រាស់រថយន្តដែលដើរដោយថាមពលកកើតឡើងវិញ ដើម្បីកាត់បន្ថយការចំណាយថ្លៃប្រេងសាំង លើកកម្ពស់បរិស្ថាន។
ឯកឧត្តមបណ្ឌិត ជាម ច័ន្ទសោភ័ណ បានជំរុញលើកទឹកចិត្តបែបនេះ ធ្វើឡើងក្នុងជំនួបជាមួយវិនិយោគិនវិស័យដំឡើងស្ថានីយថាមពលសាករថយន្តកាលពីព្រឹកថ្ងៃទី១៣ ខែកក្កដា ឆ្នាំ២០២៦ នៅសាលាខេត្តកំពង់ស្ពឺ។
ឯកឧត្តម បានលើកឡើងថា នយោបាយរបស់អង្គការសហប្រជាជាតិទទួលបន្ទុកផ្នែកបរិស្ថាន បាននិងកំពុងជំរុញចលនានៃការប្រើប្រាស់រថយន្តអគ្គិសនីជំនួសឱ្យរថយន្តដែលប្រើប្រាស់ប្រេងឥន្ធនៈ ព្រោះថា រថយន្តអគ្គិសនីបានចូលរួមចំណែកយ៉ាងសំខាន់ជួយដល់បរិស្ថានតាមរយៈការមិន បញ្ចេញផ្សែងពុលទៅក្នុងបរិយាកាសដូចរថយន្តប្រើប្រេងឥន្ធនៈ។ជាមួយនេះគោលនយោបាយបៃតងត្រូវបានរាជរដ្ឋាភិបាលកម្ពុជាដាក់ចេញ ដើម្បីជួយគាំពារផ្នែកបរិស្ថាននេះផងដែរ។
ឯកឧត្តមបន្តថា រាជរដ្ឋាភិបាលនីតិកាលទី៧នៃរដ្ឋសភា ក្រោមការដឹកនាំរបស់សម្តេចធិបតី ហ៊ុន ម៉ាណែត បានកំណត់វិស័យយានយន្តអគ្គិសនី ជាវិស័យដែលមានសក្ដានុពលខ្ពស់ក្នុងការចូលរួម មិនត្រឹមតែជួយដល់ការលើកកម្ពស់បរិស្ថានប៉ុណ្ណោះទេ តែវាបានធ្វើឱ្យប្រសើរឡើងនូវសុខុមាលភាពសាធារណៈ និង ជំរុញសន្ទុះនៃការធ្វើពិពិធកម្មមូលដ្ឋានសេដ្ឋកិច្ច និងពង្រឹងសន្តិសុខថាមពល។
មួយវិញទៀតការប្រើប្រាស់យានយន្តអគ្គិសនី គឺជាការចូលរួមចំណែកយ៉ាងសំខាន់ក្នុងការកាត់បន្ថយផលប៉ះពាល់ដែលបង្កឡើងពីការបំភាយឧស្ម័នកាបូនឌីអុកស៊ីដ(CO2)ចេញពីយាន យន្តប្រភេទប្រេងឥន្ធនៈ។
ហើយជាមួយគ្នានោះក្រសួងសាធារណការ ក៏បាននិងកំពុងខិតខំអនុវត្តស្របតាមទិសដៅនិងវិធានការចាំបាច់ដែលរាជរដ្ឋាភិបាលក្នុងការកំណត់ស្របតាមយុទ្ធសាស្រ្តអភិវឌ្ឍន៍រយៈពេលវែងប្រកបដោយអព្យាក្រឹត ដើម្បីជំរុញឱ្យសម្រេចនូវការប្រើប្រាស់រថយន្តអគ្គិសនីក្នុងអត្រា ៤០ ភាគរយ និងទោចក្រយានយន្តអគ្គិសនីក្នុងអត្រា ៧០ ភាគរយ នៅត្រឹមឆ្នាំ ២០៥០ ខាងមុខ។
ក្នុងជំនួបនោះដែរ ឯកឧត្តមបណ្ឌិត ជាម ច័ន្ទសោភ័ណ អភិបាលខេត្តកំពង់ស្ពឺ បានបញ្ជាក់បន្ថែមថា ដោយឈរលើគោលនយោបាយរបស់រាជរដ្ឋាភិបាលកម្ពុជា អាជ្ញាធរខេត្តកំពង់ស្ពឺបានលើកទឹកចិត្តនិងចូលរួមសម្របសម្រួលគ្រប់បែបយ៉ាង ដើម្បីឱ្យក្រុមហ៊ុនអាចមានលទ្ធភាពគ្រប់គ្រាន់ក្នុងការវិនិយោគលើវិស័យថាមពលដោយសាងសង់ស្ថានីយបញ្ចូលអគ្គិសនីល្បឿនលឿននៅតាមគោលដៅនានាទូទាំងខេត្តកំពង់ស្ពឺ ធ្វើយ៉ាងណាឱ្យខេត្តកំពង់ស្ពឺក្លាយជាខេត្តទំនើបនិងផ្ដល់ភាពងាយស្រួលដល់អ្នកប្រើប្រាស់រថយន្តអគ្គិសនី។
ក្នុងនោះ អភិបាលខេត្តក៏បានផ្ដាំផ្ញើដល់អ្នកវិនិយោគវិស័យថាមពលឱ្យគិតគូរឱ្យបានហ្មត់ចត់ចំពោះសុខសុវត្ថិភាពនិងបរិស្ថានរស់នៅរបស់ប្រជាពលរដ្ឋ ធ្វើយ៉ាងណាកុំឱ្យការសាងសង់ស្ថានីយបញ្ចូលថាមពលនេះបង្កការថ្នាំងថ្នាក់ដល់ទឹកចិត្តប្រជាពលរដ្ឋនៅតាមមូលដ្ឋាននោះឡើយ។
ឯកឧត្តម ផន រឹម អ្នកនាំពាក្យក្រសួងសាធារណការ និងដឹកជញ្ជូន បានថ្លែងបញ្ជាក់ថា គិតត្រឹមខែកុម្ភៈ ឆ្នាំ២០២៦កន្លងមកនេះ មានយានយន្តអគ្គិសនីបានចុះបញ្ជីសរុបចំនួន ១៤ ៥៣៤គ្រឿង ក្នុងនោះ ទោចក្រយានយន្ត៣ ៤៤៩គ្រឿង, ត្រីចក្រយានយន្ត ៧២២គ្រឿង និងរថយន្តចំនួន ១០ ៣៦៣គ្រឿង។
ឯកឧត្តម លោក ផន រឹម បានបញ្ជាក់ឱ្យដឹងថា ចាប់ពីឆ្នាំ២០១៨មក ការចុះបញ្ជីយានយន្តមានការកើនឡើងជាបន្តបន្ទាប់ ដែលការកើនឡើងនេះស្របទៅនឹងនិន្នាការ នៃការប្រើប្រាស់យានយន្តអគ្គិសនីនៅលើពិភពលោក និងតំបន់ផងដែរ។ បច្ចុប្បន្ន ការអភិវឌ្ឍយានយន្តអគ្គិសនី គឺជានិន្នាការសកល ដែលកំពុងកើនឡើងយ៉ាងលឿន។ សម្រាប់កម្ពុជាការចុះបញ្ជីយានយន្តអគ្គិសនីចាប់ផ្តើមក្នុងអំឡុងឆ្នាំ២០១៨ ដែលកាលនោះមានរថយន្តអគ្គិសនីតែ ១គ្រឿងគត់ ដែលបានចុះបញ្ជីនៅក្រសួងសាធារណការ និងដឹកជញ្ជូន។ ចាប់ពីពេលនោះមក ការចុះបញ្ជីយានយន្តអគ្គិសនីមានកំណើនជារៀងរាល់ឆ្នាំ ដូចនឹងនិន្នាការកំណើនយានយន្តអគ្គិសនីលើសកលលោកដែរ។
ឯកឧត្តម ផន រឹម បានបន្ថែមថា គិតត្រឹមខែកុម្ភៈ ឆ្នាំ២០២៦នេះ មានយានយន្តអគ្គិសនីចុះបញ្ជីសរុបចំនួន ១៤ ៥៣៤គ្រឿង ក្នុងនោះ៖ ទោចក្រយានយន្ត ៣ ៤៤៩គ្រឿង,ត្រីចក្រយានយន្ត ៧២២គ្រឿង និងរថយន្តចំនួន ១០ ៣៦៣គ្រឿង។ ខណៈពេញមួយខែកុម្ភៈ ឆ្នាំ២០២៦ មានយានយន្តអគ្គិសនីចុះបញ្ជីសរុប ១ ០៧៨គ្រឿង (រថយន្ត ៨៨៩គ្រឿង) ខណៈដែលពេញមួយខែមករា ឆ្នាំ២០២៦ មានយានយន្តអគ្គិសនីចុះបញ្ជីសរុប ៤៨៨គ្រឿង (រថយន្ត ៤០៩គ្រឿង) ខណៈដែលនិន្នាការនេះមានការកើនឡើងជាបន្តបន្ទាប់។ យានយន្ត គឺជាមធ្យោបាយចម្បងសម្រាប់ការធ្វើដំណើរប្រចាំថ្ងៃ និងការដឹកជញ្ជូនអ្នកដំណើរ និងទំនិញនៅទូទាំងប្រទេស។ ជាក់ស្ដែងអត្រានៃការប្រើប្រាស់យានយន្តកើនយ៉ាងខ្លាំង ជាពិសេសទោចក្រយានយន្ត និងរថយន្ត៕
អត្ថបទ៖ ប៊ី
Million Times 
