ក្រសួងទេសចរណ៍ ជំរុញឱ្យអ្នកផលិតមាតិកាចូលរួមផ្សព្វផ្សាយ ផ្សារទេសចរណ៍ខ្មែរ “ភូមិខ្មែរអ្នកធ្វើ” ដើម្បីបង្ហាញពីភាពទាក់ទាញ និងបង្កើនការចាប់អារម្មណ៍លើគម្រោងផ្សារនេះ ឱ្យបានកាន់តែច្រើន។  

កាលពីថ្ងៃទី ១៩ ខែតុលា ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងលោកជំទាវ បានអញ្ជើញទស្សនា “ភូមិខ្មែរអ្នកធ្វើ” ផ្សារទេសចរណ៍ខ្មែរ ដែលជាផ្សារទេសចរណ៍ខ្មែរ បង្កើតឡើងក្នុងគោលបំណងជួយជំរុញសក្ដានុពលទេសចរណ៍ដ៏សម្បូរបែប និងការអភិវឌ្ឍផលិតផលទេសចរណ៍។

ឯកឧត្ដមរដ្ឋមន្ត្រីទេសចរណ៍ និងលោកជំទាវ អញ្ជើញទៅទស្សនានេះ មានការអញ្ជើញទទួលបដិសណ្ឋារកិច្ចយ៉ាងកក់ក្តៅពីលោកអ្នកឧកញ៉ា លាង ឃុន សហស្ថាបនិក និងជាប្រធានក្រុមប្រឹក្សាភិបាលក្រុមហ៊ុននិងលោកជំទាវ, អ្នកឧកញ៉ា លាង ម៉េង សហស្ថាបនិក និងជាប្រធានក្រុមអគ្គនាយកក្រុមហ៊ុន និងលោកជំទាវ, អ្នកឧកញ៉ា លាង ហួង (ហេនរី) អគ្គនាយកពហុពាណិជ្ជកម្មក្រុមហ៊ុនជីបម៉ុង និងលោកជំទាវ ព្រមទាំងអ្នកឧកញ៉ា ឧកញ៉ា និងលោកជំទាវសហស្ថាបនិកក្រុមហ៊ុន ជីប ម៉ុង គ្រុប និងបណ្តាអគ្គនាយកក្រុមហ៊ុន ជីប ម៉ុង គ្រុប ជាច្រើនរូបទៀតផងដែរ។

បើតាមក្រសួងទេសចរណ៍ បានឱ្យដឹងថា ផ្សារទេសចរណ៍ខ្មែរ “ភូមិខ្មែរអ្នកធ្វើ” នេះ ប្រមូលផ្ដុំផលិតផលក្នុងស្រុក សុទ្ធសឹងតែស្នាដៃរបស់ប្រជាពលរដ្ឋខ្មែរនៅតាមមូលដ្ឋាន ដូចជាបន្លែ ផ្លែឈើ សម្ភារៈប្រើប្រាស់ វត្ថអនុស្សាវរីយ៍ ម្ហូបអាហារប្រចាំតំបន់ សេវាកម្មផ្សេងៗ នឹងមកប្រមូលផ្ដុំនៅក្នុងផ្សារទំនើប ជីប ម៉ុង ២៧១ មេហ្កាម៉ល។

“ភូមិខ្មែរអ្នកធ្វើ” មិនត្រឹមតែជាផ្សារលក់ផលិតផល ប៉ុន្តែក៏រួមបញ្ចូលជាមួយនឹងស្ថាបត្យកម្ម ​រចនាបទខ្មែរ សិល្បៈ វប្បធម៌ ប្រពៃណីដែលជាអត្តសញ្ញាណជាតិខ្មែរ។

ក្រសួងទេសចរណ៍ បានលើកឡើងថា ក្នុងន័យនេះ ដើម្បីបង្ហាញពីភាពទាក់ទាញ និងបង្កើនការចាប់អារម្មណ៍ គម្រោង”ភូមិខ្មែរអ្នកធ្វើ” ឱ្យកាន់តែទូលំទូលាយ សូមអញ្ជើញបងប្អូនក្រុមអ្នកផលិតមាតិកាទេសចរណ៍កម្ពុជា(Influencers) KOL ទាំងអស់ចូលរួមផ្សព្វផ្សាយ ផ្សារទេសចរណ៍ខ្មែរ “ភូមិខ្មែរអ្នកធ្វើ” ទៅកាន់សាធារណជន ភ្ញៀវទេសចរជាតិ-អន្តរជាតិ ចូលរួមឱ្យកាន់តែច្រើន៕

អត្ថបទ៖ វីរៈ រូបភាព៖ ក្រសួងទេសចរណ៍