ពាក់ព័ន្ធនឹងការលើកឡើងថា ការព្យាករសេដ្ឋកិច្ចកម្ពុជាមានកំណើន តែប្រជាពលរដ្ឋជាអ្នកប្រកបមុខរបរនានា ជួបការលំបាកនេះ លោក ផាន ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ បានបញ្ជាក់ថា ដោយសារតែសកម្មភាពសេដ្ឋកិច្ចមានដំណើរការល្អ ទើបការព្យាករចេញជាលទ្ធផលវិជ្ជមាន។

លោកពន្យល់ថា ការព្យាករសេដ្ឋកិច្ចមានកំណើន ៥, ៦ ឬ ៧ភាគរយ នោះក៏ដោយសារតែផលិតកម្មក្នុងវិស័យមួយចំនួន មានការកើនឡើង។ ដូច្នេះនៅពេលសកម្មភាពផលិតកម្មកើនឡើង នោះនឹងបង្កើតឲ្យមានការងារច្រើនជាងមុន និងចំណូលក៏កើនជាងមុនដែរ។

តាមដានជាមួយយើង៖ Million Times

មន្ត្រីជាន់ខ្ពស់ក្រសួងសេដ្ឋកិច្ចរូបនេះ បានបន្ថែមថា ចំពោះស្ថានភាពបច្ចុប្បន្ន ដែលមានប្រជាពលរដ្ឋរអ៊ូថា ពិបាករកចំណូល គឺមិនមែនប្រជាពលរដ្ឋទាំងអស់លំបាកនោះទេ ដោយអ្នកខ្លះនៅតែអាចរកចំណូលបានគួរសម ជាពិសេសអ្នកធ្វើការនៅក្នុងវិស័យធនាគារ និងវិស័យមួយចំនួនទៀត។

លោក ផាន ផល្លា បានក្នុងសន្និសីទសារព័ត៌មានមួយថា «ប៉ុន្តែសួរថា ឥឡូវនេះ តើការកើនឡើងនេះ ហើយបងប្អូនថា អ្នកខ្លះនៅតែលំបាក កន្លែងនេះខ្ញុំសូមបញ្ជាក់ថា មិនមែនលំបាកទាំងអស់គ្នាទេ ឧទាហរណ៍ក្នុងវិស័យមួយចំនួន វិស័យធនាគារ វិស័យធនាគារជាវិស័យមួយដែលការរីកលូតលាស់ខ្លាំង ក្នុងរយៈពេល ២០ឆ្នាកន្លងមកនេះ ហើយបានផ្ដល់ការងារជាច្រើន មិនមែនត្រឹមតែផ្ដល់ការងារច្រើននោះទេ ប្រាក់ខែក៏ខ្ពស់ដែរក្នុងវិស័យធនាគារនេះ ហើយយើងសួរថា​ តើបងប្អូនក្នុងវិស័យធនាគារនេះលំបាកទេ? អត់ទេ គាត់មានការងារធ្វើ គាត់មានប្រាក់ខែ»។

យ៉ាងណាក៏ដោយ លោកថា សម្រាប់ធ្វើការងារក្នុងវិស័យផ្សេង ដូចជាវិស័យទេសចរណ៍ និងវិស័យឧស្សាហកម្មជាដើម អាចនៅកំពុងជួបការលំបាកខ្លះ។ លោកបន្ថែមទៀតថា «នៅពេលកូវីដបាត់ទៅវិញ លែងមានកូវីដ ទេសចរណ៍ចាប់ផ្ដើម ប៉ុន្តែយើងសួរថា តើវិស័យទេសចរណ៍ចាប់ផ្ដើម ចាប់ផ្ដើមបូកមុនកូវីដ ឬក៏ចាប់ផ្ដើមកំណើនដែលនៅក្នុងកម្រិតមួយទាបនៅឡើយ»។

លោករដ្ឋលេខាធិការក្រសួងសេដ្ឋកិច្ច បានបញ្ជាក់ថា ការព្យាករពីស្ថានភាពសេដ្ឋកិច្ច និងស្ថានភាពជាក់ស្តែង គឺមានភាពខុសគ្នាតិចតួចប៉ុណ្ណោះ ដោយលោកថា ការព្យាករសេដ្ឋកិច្ចកើន ក៏ដោយសារតែសកម្មភាពសេដ្ឋកិច្ចមានដំណើរការល្អ ដែលមានកំណើនការងារ និងមានចំណូល៕

អត្ថបទ៖ វីរៈ រូបភាព៖ បណ្ដាញសង្គម

The post មន្ត្រីក្រសួងសេដ្ឋកិច្ច ឆ្លើយតបចម្ងល់រឿងសេដ្ឋកិច្ចឡើង តែពលរដ្ឋពិបាករកចំណូល appeared first on Millions times.

នៅក្នុងបញ្ជីប្រទេសមានកំណើនសេដ្ឋកិច្ចជឿនក្នុងពិភពលោកឆ្នាំ២០២៤ បានឲ្យដឹងថា កម្ពុជា ស្ថិតក្នុងចំណោមប្រទេសដែលមានកំណើនសេដ្ឋកិច្ចជឿនលឿនបំផុតក្នុងឆ្នាំ២០២៤ ដោយកំណើននេះស្ថិតក្នុងអត្រា ៦,១%។ សន្ទុះនេះ ឈរនៅខ្ពស់ជាងហ្វីលីពីន និងវៀតណាម ដែលមានកំណើនសេដ្ឋកិច្ចត្រឹម ៥,៩% ដូចគ្នា។ 

តាមដានជាមួយយើង៖ Million Times

បើតាមទិន្នដដែល ទីក្រុងរដ្ឋបាលស្វយ័តពិសេសរបស់ចិន ម៉ាកាវ  ត្រូវបានព្យាករថានឹងមានកំណើនសេដ្ឋកិច្ចខ្ពស់ជាងគេក្នុងពិភពលោក ដោយអត្រាកំណើនមានរហូតដល់ ២៧,២% ខណៈអត្រាកំណើនសេដ្ឋកិច្ចជាមធ្យមរបស់ពិភពលោកស្ថិតត្រឹម ២,៩% ប៉ុណ្ណោះ។

ធនាគារពិភពលោក World Bank បានព្យាករណ៍ថា កម្ពុជានឹងមានទទួលបានកំណើនសេដ្ឋកិច្ច ៥.៨% នៅឆ្នាំ២០២៤ ពោលលើសឆ្នាំ២០២៣ដែលមានត្រឹម ៥.៤% ប៉ុណ្ណោះ។ Wold Bank បានគូសបញ្ជាក់ថា កម្ពុជាបានភ្ជាប់ខ្លួនយ៉ាងស៊ីជម្រៅទៅនឹងពាណិជ្ជកម្ម និងការវិនិយោគជាមួយប្រទសចិនតាមរយៈកិច្ចព្រមព្រៀងពាណិជ្ជកម្មសេរី និងការសម្រួលឲ្យមានលំហូរវិនិយោគដោយផ្ទាល់ពីចិនមកកម្ពុជា។

ធនាគារពិភពលោកបានបញ្ជាក់ថា សេដ្ឋកិច្ចកម្ពុជានឹងមានកំណើនខ្ពស់រហូតដល់ ៦.១% នៅឆ្នាំ ២០២៥ ដែលទទួលបាន គឺបានពីវិស័យប្រពៃណីដូចជាការនាំចេញសម្លៀកបំពាក់ វិស័យទេសចរណ៍ កសិកម្ម សំណង់ និងវិស័យអចលនទ្រព្យ។

សម្រាប់នាយករដ្ឋមន្រ្តី សម្តេច ហ៊ុន ម៉ាណែត សេដ្ឋកិច្ចកម្ពុជាបានស្ទុះងើបឡើងវិញជាមួយនឹងអត្រាកំណើន ៥.៦% ក្នុងឆ្នាំ២០២៣ និងបានព្យាករណ៍នឹងមានកំណើន ៦.៦% ក្នុងឆ្នាំ២០២៤ ហើយនឹងអាចត្រឡប់ទៅរកកំណើនដូចនៅមុនផ្ទុះជំងឺឆ្លងរាតត្បាតកូវីដ១៩ ពោលក្នុងរង្វង់ ៧% នៅឆ្នាំ ២០២៨ខាងមុខ។ 

ដោយឡែក របាយការណ៍របស់មូលនិធិរូបិយវត្ថុអន្ដរជាតិ IMF ចេញផ្សាយកាលពីចុងខែមករា ឆ្នាំ២០២៤ បានឲ្យដឹងថា សេដ្ឋកិច្ចកម្ពុជាអាចទទួលបានកំណើនកើនឡើង ៦.០% នៅក្នុងឆ្នាំ២០២៤។ តួលេខនេះគឺដូចគ្នាបិះបិទនឹងការព្យាករណ៍របស់ធនាគារអភិវឌ្ឍន៍អាស៊ី ADB កាលពីអំឡុងខែកក្កដា ឆ្នាំ២០២៣៕

អត្ថបទ៖ សេដ្ឋានី រូបភាព៖ កើត ឆែ

The post កម្ពុជា នាំមុខហ្វីលីពីន និងវៀតណាមជាប្រទេសមានកំណើនសេដ្ឋកិច្ចជឿនលឿនបំផុតក្នុងឆ្នាំ២០២៤ appeared first on Millions times.

ក្នុងពិធីជួបសំណេះសំណាល និងពិសាភោជនាហារសាមគ្គីជាមួយសហគ្រាសធុនតូច មធ្យម និងសិប្បកម្មកម្ពុជា នាល្ងាចថ្ងៃទី២៧ ខែមិថុនានេះ សម្ដេច ហ៊ុន ម៉ាណែត នាយករដ្ឋមន្រ្តី បានថ្លែងអះអាងថា មកដល់ពេលនេះសេដ្ឋកិច្ចរបស់ប្រទេសកម្ពុជាបានងើបឡើងវិញបណ្តើៗហើយ ខណៈកំណើនសក្ដានុពលរបស់កម្ពុជាកើនឡើងលឿនជាងគេបើធៀបជាមួយប្រទេសក្នុងតំបន់លើការទាក់ទាញវិនិយោគិនថ្មីមកបណ្ដាក់ទុននៅកម្ពុជា។

គួររំលឹកដែលថា ធនាគារជាតិនៃកម្ពុជា បានព្យាករកាលពីពាក់កណ្តាលខែឧសភាថា កំណើនសេដ្ឋកិច្ចកម្ពុជាក្នុងឆ្នាំ២០២៤នេះនឹងមានកំណើនក្នុងរង្វង់៦% ជាមួយនឹងកម្រិតអតិផរណាក្នុងរង្វង់ ២%។ តែធនាគារជាតិកម្ពុជាក៏បានបញ្ជាក់ថា ទោះបីកម្ពុជាហាក់មានសេដ្ឋកិច្ចស្ទុះងើបឡើងក៏ដោយក៏សេដ្ឋកិច្ចកម្ពុជានៅតែអាចប្រឈមនឹងហានិភ័យមួយចំនួន។

ធនាគារជាតិនៃកម្ពុជា គូសបញ្ជាក់ថា ការនាំចេញផលិតផលកាត់ដេរនិងមិនកាត់ដេរ វិស័យទេសចរណ៍ វិស័យដឹកជញ្ជូន និងទូរគមនាគមន៍គឺជាវិស័យគ្រឹះដែលទ្រទ្រង់សេដ្ឋកិច្ចកម្ពុជា ខណៈវិស័យកសិកម្មហាក់កំពុងកើនឡើងយឺត។ ទន្ទឹមគ្នានេះ ធនាគារជាតិក៏រំពឹងផងដែរពីការអនុវត្តលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយតំបន់ (RCEP) និងកិច្ចព្រមព្រៀងពាណិជ្ជកម្មសេរីទ្វេភាគី (FTA) ដែលនឹងរួមចំណែកទាក់ទាញលំហូរវិនិយោគ និងការនាំចេញរបស់កម្ពុជាទៅក្នុងតំបន់បន្ថែមទៀត៕

អត្ថបទ៖ សេដ្ឋានី រូបភាព៖ ក្រុមព័ត៌មានសម្តេចធិបតី

The post នាយករដ្ឋមន្រ្តីបានអះអាងថា សេដ្ឋកិច្ចកម្ពុជាបានងើបឡើងវិញបណ្តើៗហើយ appeared first on Millions times.

យោងតាមរបាយការណ៍បច្ចុប្បន្នភាពសេដ្ឋកិច្ចកម្ពុជារបស់ធនាគារពិភពលោក (World Bank) ដែលចេញផ្សាយនៅថ្ងៃទី ៦ ខែមិថុនានេះ បានឲ្យដឹងថា កំណើនសេដ្ឋកិច្ចកម្ពុជា ត្រូវបានគេរំពឹងថា នឹងប្រសើរឡើងបន្តិចពីកម្រិត ៥,៦% ក្នុងឆ្នាំ ២០២៣ ទៅ ៥,៨% នៅ ឆ្នាំ ២០២៤ ហើយនឹងអាចប្រសើរឡើងបន្ថែមទៀតនៅកម្រិត ៦.១% នៅឆ្នាំ ២០២៥ និង ៦.៤% នៅឆ្នាំ ២០២៦ ដោយសារការប្រសើរឡើងវិញលើការនាំចេញវិស័យកាត់ដេរ ទំនិញធ្វើដំណើរ និងស្បែកជើង រួម ទាំងការងើបឡើងវិញនៃការមកដល់របស់ភ្ញៀវទេសចរ។

យ៉ាងណាក៏ដោយ បើតាមលោកស្រី ម៉ារីយ៉ាម សាលីម ប្រធានគ្រប់គ្រងធនាគារពិភពលោកប្រចាំកម្ពុជា បានលើកឡើងថា ដើម្បីរក្សាកំណើនសេដ្ឋកិច្ចបន្ត កម្ពុជាត្រូវរក្សាស្ថិរភាពម៉ាក្រូហិរញ្ញវត្ថុ ដោយការស្តារឡើងវិញនូវលំហ សារពើពន្ធ និងការការពារវិស័យហិរញ្ញវត្ថុរបស់ខ្លួន។ លោកស្រីបន្តថា កម្ពុជា អាចពង្រឹងភាពប្រកួត ប្រជែងរបស់ខ្លួនតាមរយៈការកែលម្អបរិយាកាសធុរកិច្ច សម្រួលនីតិវិធីពាណិជ្ជកម្មនៅតាមព្រំដែន ធ្វើឲ្យការផ្គត់ផ្គង់ថាមពលកាន់តែអាចទុកចិត្តបាន និងពង្រឹងវិស័យអប់រំ។

ការមកដល់របស់ភ្ញៀវទេសចរអន្តរជាតិ មានការប្រសើរឡើងនៅក្នុងត្រីមាសទីមួយដែលឈានដល់កម្រិត ៨៤% នៃការមកដល់មុនពេលមានជំងឺរាតត្បាតកូវីដ-១៩។ ការនាំចេញសម្លៀកបំពាក់ ទំនិញធ្វើដំណើរ និងស្បែកជើង បានស្ទុះងើបឡើងវិញ ខណៈដែលការនាំចេញទំនិញមិនមែនសម្លៀកបំពាក់ ជាពិសេសទំនិញ កសិកម្ម នៅតែមានភាពធន់ល្អ។ សមាគមប្រជាជាតិអាស៊ីអាគ្នេយ៍ ឬអាស៊ាន បានក្លាយជាទីផ្សារនាំចេញធំទី ពីររបស់កម្ពុជាបន្ទាប់ពីសហរដ្ឋអាមេរិក។

ការកើនឡើងនៃការវិនិយោគពីបរទេសក្នុងវិស័យផលិតកម្ម និងកសិកម្ម ក៏បានរួមចំណែកដល់ការងើបឡើងវិញនេះផងដែរ។ អតិផរណាបានធ្លាក់ចុះដល់សូន្យក្នុងខែមីនា ដោយសារតម្លៃម្ហូបអាហារបានធ្លាក់ចុះ ខណៈដែលគណនីចរន្ត បានកត់ត្រានូវអតិរេកដែលមិនធ្លាប់មានពីមុនមកក្នុងឆ្នាំ ២០២៣ ដោយសារឱនភាពពាណិជ្ជកម្មរួមតូច និងការកើនឡើងនៃភ្ញៀវទេសចរ។

ទោះបីជាយ៉ាងណាក៏ដោយ ក៏សកម្មភាពក្នុងវិស័យសំណង់នៅតែមានតិចតួច ខណៈដែលទីផ្សារអចលនទ្រព្យនៅតែបន្តធ្លាក់ចុះ។ ជាលទ្ធផល កំណើនឥណទានក្នុងស្រុកបានធ្លាក់ចុះយ៉ាងខ្លាំង បណ្តាលឲ្យមានការកាត់បន្ថយការចំណាយឯកជន និងប៉ះពាល់ដល់ការប្រមូលចំណូលក្នុងស្រុក

នៅក្នុងរបាយការណ៍បច្ចុប្បន្នភាពសេដ្ឋកិច្ចវគ្គនេះ មានផ្នែកមួយផ្តោតពិសេសទៅលើការពិនិត្យមើលរបៀប ដែលកម្ពុជាអាចពង្រឹងប្រព័ន្ធអប់រំរបស់ខ្លួន ដើម្បីបង្កើនពលកម្មដែលមានជំនាញ និងបង្កើនផលិតភាព។ របាយការណ៍នេះបានផ្តល់អនុសាសន៍ដូចជា៖ បង្កើនការវិនិយោគលើការអប់រំកុមារតូច និងនៅបឋមសិក្សា លើកកម្ពស់ប្រសិទ្ធភាពគ្រូបង្រៀន និងធ្វើឲ្យការបែងចែកធនធានកាន់តែមានសមធម៌៕

អត្ថបទ៖ វីរៈ រូបភាព៖ បណ្ដាញសង្គម

The post ត្រីមាសទី ១​ សកម្មភាពសេដ្ឋកិច្ចកម្ពុជាបន្តកើនឡើង តែសកម្មភាពក្នុងវិស័យសំណង់នៅតែមានតិចតួច appeared first on Millions times.

ការព្យាករណ៍យ៉ាងដូច្នេះ គឺបន្ទាប់ពីលោកស្រី ជា សិរី ទេសាភិបាល ធនាគារជាតិនៃកម្ពុជា កាលពីព្រឹកថ្ងៃទី ១៣ ខែឧសភា ឆ្នាំ ២០២៤នេះ បានអនុញ្ញាតឲ្យក្រុមបេសកកម្មអង្គភាពស្រាវជ្រាវម៉ាក្រូសេដ្ឋកិច្ចអាស៊ាន+៣ (AMRO) ដឹកនាំដោយលោកបណ្ឌិត Hoe Ee Khor ប្រធានសេដ្ឋវិទូ ចូលជួបសម្តែងការគួរសម និងរាយការណ៍ជូនអំពីលទ្ធផលនៃការវាយតម្លៃបឋមលើស្ថានភាពសេដ្ឋកិច្ចកម្ពុជា។ ក្រុមបេសកកម្មនេះ បានមកបំពេញបេសកកម្មរយៈពេល២សប្តាហ៍កន្លងមកហើយ។

តាមដានជាមួយយើង៖ Million Times

នៅក្នុងជំនួបនេះ ក្រុមបេសកកម្មនៅតែបន្តមានសុទិដ្ឋិនិយម ចំពោះការងើបឡើងនៃសេដ្ឋកិច្ចកម្ពុជា ដោយបានព្យាករណ៍ថា កំណើននៅឆ្នាំ ២០២៤ នឹងមានកម្រិតខ្ពស់ជាងឆ្នាំ ២០២៣ ហើយបន្តងើបឡើងខ្ពស់មួយកម្រិតទៀតក្នុងឆ្នាំ ២០២៥ខាងមុខ។ ចំណែកឯអតិផរណា រំពឹងបន្តមានកម្រិតទាបត្រឹម ២,៥ភាគរយ នៅឆ្នាំ ២០២៤ និង ២០២៥។

ទោះយ៉ាងណា សេដ្ឋកិច្ចកម្ពុជា ក៏អាចប្រឈមនឹងហានិភ័យមួយចំនួន ដូចជាហានិភ័យនៃការថមថយនៃតម្រូវការខាងក្រៅ ប្រសិនបើសេដ្ឋកិច្ចនៃប្រទេសជាដៃគូពាណិជ្ជកម្ម មានកំណើនទាបជាងការរំពឹងទុក ការបែងចែកភូមិសាស្រ្តសេដ្ឋកិច្ច និងការប្រែប្រួលអាកាសធាតុ ជាដើម។

នៅក្នុងជំនួបដដែលនេះ លោកស្រីទេសាភិបាលធនាគារជាតិនៃកម្ពុជា បានថ្លែងអំណរគុណដល់ក្រុមបេសកកម្មដែលតែងតែជួយតាមដាន និងវាយតម្លៃស្ថានភាពសេដ្ឋកិច្ចកម្ពុជាជាប់ជាប្រចាំ។ លោកស្រីទេសាភិបាល រង់ចាំស្វាគមន៍របាយការណ៍លម្អិតរបស់ក្រុមបេសកកម្ម និងអនុសាសន៍គោលនយោបាយ ដែលនឹងក្លាយជាធាតុចូលដ៏សំខាន់ សម្រាប់ការរៀបចំគោលនយោបាយម៉ាក្រូសេដ្ឋកិច្ចកម្ពុជា។

ធនាគារអភិវឌ្ឍន៍អាស៊ី (ADB) និងធនាគារពិភពលោក (World Bank) បានព្យាករណ៍សេដ្ឋកិច្ចកម្ពុជាក្នុងឆ្នាំ ២០២៤នេះ នឹងមានការកើនឡើងក្នុងអត្រា ៥.៨ភាគរយ។ ចំណែកឯរដ្ឋាភិបាល បានព្យាករណ៍ថា សេដ្ឋកិច្ចកម្ពុជាឆ្នាំ ២០២៤នេះ នឹងមានកំណើន ៦.៦ភាគរយ៕

អត្ថបទ៖​ វីរៈ រូបភាព៖ ហ្វេសប៊ុកធនាគារជាតិនៃកម្ពុជា

The post ក្រុមស្រាវជ្រាវម៉ាក្រូសេដ្ឋកិច្ចអាស៊ាន+៣ ព្យាករណ៍ថា កំណើនសេដ្ឋកិច្ចកម្ពុជា ឆ្នាំ ២០២៤ នឹងមានកម្រិតខ្ពស់ជាងឆ្នាំ ២០២៣ appeared first on Millions times.

មូលនិធិរូបិយវត្ថុអន្តរជាតិ ហៅកាត់ IMF បានព្យាករទស្សនវិស័យសេដ្ឋកិច្ចដ៏រស់រវើករបស់កម្ពុជាថានឹងមានកំណើន ៦,១% នៅឆ្នាំ២០២៤ ធៀបនឹងចំនួន ៥,៦% កាលពីឆ្នាំឆ្នាំ២០២២ ខណៈកិច្ចខិតខំប្រឹងប្រែងថ្មីៗ ក្នុងការលើកកម្ពស់ភាពជាដៃគូពាណិជ្ជកម្មជាមួយចិន កូរ៉េខាងត្បូង និងសហភាពអឺរ៉ុប បានបន្តពង្រឹងនិទស្សន៍សេដ្ឋកិច្ចកម្ពុជា។ 

តាមដានជាមួយយើង៖ Million Times

ការ​ព្យាករ​ចុងក្រោយ​បំផុត​របស់ IMF កាលពី​ខែមករា បានឱ្យដឹងថា កំណើនសេដ្ឋកិច្ច​កម្ពុជា ស្ថិតក្នុង​អត្រា ៦,១ ​ភាគ​​រយ ខណៈ​អតិផរណា​នឹងមាន ៣ ​ភាគរយ​នៅ​ឆ្នាំនេះ​។ ការ​ព្យាករ​នេះ​គឺ​ស្របតាម​ការ​ព្យាករ​របស់​ស្ថាប័នហិរញ្ញវត្ថុ​អន្តរជាតិ​ផ្សេងទៀត ខណៈ​ធនាគារជាតិ​នៃ​កម្ពុជា​បាន​ព្យាករ​ក្នុង​កម្រិត ៦,៤​ ភាគរយ​។​

ទស្សនាវដ្តី fDi Intelligence កត់សម្គាល់ថា ការដកចេញការរឹតត្បិតការធ្វើដំណើរពីសំណាក់ប្រទេសចិន បានជំរុញឱ្យមានការងើបឡើងវិញយ៉ាងឆាប់រហ័សនៃវិស័យទេសចរណ៍នៅកម្ពុជា។ ការព្យាករដដែលបានបង្ហាញពីការងើបឡើងគួរឱ្យកត់សម្គាល់ លើការវិនិយោគផ្ទាល់ពីបរទេស លើវិស័យអចលនទ្រព្យ ដែលមានជាមធ្យម (CAPEX) ចំនួន ៣៩៣% ធៀបនឹងឆ្នាំមុន គួបផ្សំនឹងកំណើន ១១០% នៃគម្រោង FDI នៅឆ្នាំ២០២៤។ 

លោកស្រី ជា សិរី ​ទេសាភិបាល​ធនាគារជាតិ​នៃ​កម្ពុជា ​(NBC)​ បាន​លើក​ឡើង​កាលពីពេលកន្លងទៅថា សេដ្ឋកិច្ចកម្ពុជា​នៅតែ​ប្រឈម​នឹង​កត្តា​ខាងក្រៅ និង​ភាព​មិន​ច្បាស់លាស់​ជាច្រើន​រួមមាន ភាព​តានតឹង​ផ្នែក​ភូមិសាស្ត្រ​នយោបាយ និង​ហានិភ័យ​នៃ​ការបែងចែក​ភូមិសាស្ត្រ​នយោបាយ ដែល​នាំទៅរក​ការធ្លាក់ចុះ​លំហូរ​ពាណិជ្ជកម្ម​អន្តរជាតិ ការវិនិយោគ ទេសចរណ៍ និង​ភាពមិនច្បាស់លាស់​លើ​ទីផ្សារ​ហិរញ្ញវត្ថុ​អន្តរជាតិ​។ ការណ៍​នេះ លោកស្រីថា សេដ្ឋកិច្ចកម្ពុជា​ត្រូវបាន​ព្យាករ​ដោយ​សុទិដ្ឋិនិយម​ថា នឹង​កើនឡើង​ក្នុង​រង្វង់ ៦,៤​ ភាគរយ​នៅ​ឆ្នាំ ២០២៤​។​

​លោកស្រី​បាន​អះអាងថា ដើម្បី​គាំទ្រ​គោលនយោបាយ​របស់​រដ្ឋា​ភិ​បាល ក្នុងការ​ពង្រឹង​សម្ទុះ កំណើន និង​រក្សា​ស្ថិរ​ភាព​ម៉ាក្រូសេដ្ឋកិច្ច NBC នឹង​បន្ត​អនុវត្ត នយោបាយ​រូបិយវត្ថុ ប្រកបដោយ​ភាព​ប្រុងប្រយ័ត្ន ពង្រឹង​ការអភិវឌ្ឍ​ប្រព័ន្ធ​ធនាគារ លើកកម្ពស់​ប្រសិទ្ធភាព សុវត្ថិ​ភាព និង​សមាហរណកម្ម​ប្រព័ន្ធ​ទូទាត់ ព្រមទាំង​ដាក់ចេញ​នយោបាយ និង​វិធាន​ការគាំទ្រ​ចាំបាច់​នានា​ប្រកបដោយ​ភាព​បុ​រេ​សកម្ម ស្របតាម​ស្ថានភាព​សេដ្ឋកិច្ច និង​គោលនយោបាយ​របស់​រាជ​រដ្ឋាភិបាល​។

យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា កាលថ្ងៃទី៥ ខែមេសាកន្លងទៅ ឲ្យដឹងថា គិតត្រឹមត្រីមាសទី១ ឆ្នាំ២០២៤នេះ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តគម្រោងវិនិយោគចំនួន១០៦ ដែលមានទុនវិនិយោគសរុបប្រមាណ ២,២ពាន់លានដុល្លារ។

ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា គម្រោងដែលបានអនុម័តចំនួន១០៦ មានទុនវិនិយោគសរុបប្រមាណ២,២ពាន់លានដុល្លារអាម៉េរិក និងអាចបង្កើតការងារបានជាង ១០៧ពាន់កន្លែង។ គម្រោងវិនិយោគនេះ មានទីតាំងស្ថិតនៅ ក្រៅតំបន់សេដ្ឋកិច្ចពិសេសមានចំនួន៧៣គម្រោង ក្នុងនោះមានគម្រោងពង្រីកផលិតកម្មចំនួន ៣គម្រោង ដោយឡែកគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន៣៣គម្រោង ក្នុងនោះ មានគម្រោងពង្រីកផលិតកម្មចំនួន ៣គម្រោង។

គួរបញ្ជាក់ថា ក្នុងត្រីមាសទី១ ឆ្នាំ២០២៤នេះ ការវិនិយោគក្នុងស្រុកឈរនៅលំដាប់លេខរៀងទី១ រីឯការវិនិយោគមកពីប្រទេសចិនស្ថិតនៅលំដាប់លេខរៀងទី២ ដោយបានរួមចំណែកប្រមាណជាង ៩៣% នៃការវិនិយោគសរុប៕

អត្ថបទ៖ ផល កុសល

The post fDi Intelligence៖ កម្ពុជា ក្លាយជាគោលដៅលំដាប់ទី១ សម្រាប់ការវិនិយោគផ្ទាល់ពីបរទេសក្នុងឆ្នាំ២០២៤ appeared first on Millions times.

ក្នុងរបាយការណ៍វឌ្ឍនភាពម៉ាក្រូសេដ្ឋកិច្ច និងវិស័យធនាគារឆ្នាំ២០២៣ និងទស្សនវិស័យឆ្នាំ២០២៤ នាពេលកន្លងទៅ ធនាគារជាតិនៃកម្ពុជាលើកឡើងថា វិស័យសំណង់ និងអចលនទ្រព្យដែលបានទទួលរងឥទ្ធិពលពីវិបត្តិកន្លងមកត្រូវបានព្យារកថានឹងបន្តមានកំណើនទាប ដែលនឹងបន្តទទួលបានការគាំទ្រពីគម្រោងអភិវឌ្ឍន៍ហេដ្ឋារចនាសម្ព័ន្ធសាធារណៈ គួបផ្សំនឹងការងើបឡើងវិញសន្សឹមៗនៃតម្រូវការក្នុងស្រុកដែលផ្តោតលើលំនៅដ្ឋានតម្លៃសមរម្យ ក្នុងពេលដែលតម្រូវការសំណង់ប្រណីតដែលបម្រើដល់អនិវាសនជនត្រូវបានរំពឹងថានឹងបន្តមានភាពទន់ខ្សោយ។

ធនាគារជាតិនៃកម្ពុជាសង្កត់ធ្ងន់ថា៖ «ការកើនឡើងនៃឥណទានមិនដំណើរការ អាចបន្ថយកំណើនឥណទានសម្រាប់ការប្រើប្រាស់ និងការវិនិយោគ និងកំណើននៃវិស័យសំណង់ និងអចលនទ្រព្យអាចបន្តមានកម្រិតទាប និងអាចមានឥទ្ធិពលបន្តលើវិស័យផ្សេងទៀត ដូចជាវិស័យធនាគារ ជាដើម»។ 

តាមដានជាមួយយើង៖ Million Times

សម្រាប់អ្នកជំនាញក្នុងវិស័យនេះបានលើកឡើងថា វិស័យចលនទ្រព្យនៅកម្ពុជាឆ្នាំ២០២៤នេះ មានភាពវិជ្ជមានជាងឆ្នាំ២០២៣។ ក្នុងវេទិកាពិភាក្សា ស្ដីពី «ស្ថានភាពសេដ្ឋកិច្ច និងអចលនទ្រព្យនៅឆ្នាំ២០២៤» កាលពីដើមខែមីនាកន្លងទៅ លោក ស៊ន សៀប ប្រធានសមាគមអ្នកវាយតម្លៃ និងភ្នាក់ងារអចលនវត្ថុកម្ពុជា មានប្រសាសន៍ថា៖ «ឆ្នាំ២០២៤នេះ ក៏នៅតែលំបាក ប៉ុន្ដែខ្ញុំឃើញសញ្ញាធៀបជាមួយនឹងឆ្នាំ២០២៣ មានភាពវិជ្ជមានជាងមុន ប៉ុន្ដែដល់ពេលដែលយើងកំពុងតែលំបាកអីចឹង គឺយើងអាចមើលឃើញថា វាមិនឃើញកំណើនខុសគ្នាទេ»។

លោកបានបង្ហាញក្ដីរំពឹងថា វិស័យចលនទ្រព្យនៅកម្ពុជា នឹងត្រឡប់ទៅរកស្ថានភាពល្អឡើងវិញ នៅឆ្នាំ២០២៦ ឬឆ្នាំ២០២៧។

ពាក់ព័ន្ធនឹងវិស័យអចលនទ្រព្យកំពុងជួបបញ្ហាដែលកើតឡើងក្រោយមានវិបត្តិផ្ទួនៗគ្នានេះ អ្នកឧកញ៉ា លី ហួរ បានលើកឡើងថា បញ្ហាវិបត្តិសេដ្ឋកិច្ចធ្លាក់ចុះជាសកល កត្តារីករាលដាលជំងឺឆ្លងកូវីដ១៩ សង្គ្រាមរវាងប្រទេសរុស្ស៊ី-អ៊ុយក្រែន និងថ្មីៗមានសង្គ្រាមរវាងក្រុមហាម៉ាស-ប៉ាឡេស្ទីន ព្រមទាំងមានការបែងចែកប្លុកសេដ្ឋកិច្ចតំបន់ផងនោះធ្វើឲ្យប៉ះពាល់ដល់វិស័យអចលនទ្រព្យទាំងមូលស្ទើរតែធ្លាក់ដល់សូន្យ។

អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅដ្ឋានកម្ពុជា ក្នុងពិធីសន្និបាតបូកសរុបលទ្ធផលការងារប្រចាំឆ្នាំ២០២៣ និងលើកទិសដៅការងារឆ្នាំ២០២៤ របស់សមាគមអ្នកអភិវឌ្ឍន៍លំនៅឋានកម្ពុជា ពេលថ្មីៗនេះ បានថ្លែងគូសបញ្ជាក់ថា កត្តាទាំងនេះបានជះឥទ្ធិផលដល់សេដ្ឋកិច្ចកម្ពុជាទាំងមូលផងដែរ ជាពិសេសធ្វើឲ្យប៉ះពាល់ដល់វិស័យអចលនទ្រព្យ ធ្វើឲ្យវិស័យនេះទាំងមូលស្ទើរតែធ្លាក់ដល់សូន្យ។

អ្នកឧកញ៉ាបានសង្កត់ធ្ងន់ថា «បច្ចុប្បន្នគម្រោងបុរី ខុនដូ ការលក់មានការធ្លាក់ចុះជាគំហុក ឬលក់ពុំចេញតែម្ដង អតិថិជនពន្យាពេលបង់ប្រាក់ រហូតដល់អតិថិជនមួយចំនួនមិនមានលទ្ធភាព មិនបានបង់ប្រាក់ត្រឡប់មកក្រុមហ៊ុនវិញ ព្រមទាំងទាមទារឲ្យក្រុមហ៊ុនទិញផ្ទះត្រឡប់មកវិញ ធនាគារពាណិជ្ជក៏បានតម្លើងអត្រាការប្រាក់ និងរឹតបន្តឹងការផ្ដល់ឥណទានលំនៅឋានជូនអតិថិជន ផ្អាកផ្តល់ឥណទានលើការវិនិយោគលើវិស័យសំណង់ ក្រសួងស្ថានប័នរដ្ឋ ដែលពាក់ព័ន្ធមានការយឺតយ៉ាវក្នុងការផ្តល់សេវាកម្ម រឹតបន្តឹងលើការអនុវត្តផ្លូវច្បាប់ និងមានការផាកពិន័យជាប្រាក់ដល់ក្រុមហ៊ុនអភិវឌ្ឍន៍ផងដែរ ធ្វើឲ្យក្រុមហ៊ុនមួយចំនួនមានវិបត្តិហិរញ្ញវត្ថុយ៉ាងធ្ងន់ធ្ងរ ក្រុមហ៊ុនមួយចំនួនផ្អាកការសាងសង់ បិទគម្រោងទាំងមូល និងឈានទៅដល់ក្ស័យធនតែម្ដង»។

គួររំលឹកបន្តិចថា បើតាមរបាយការណ៍របស់សាលារាជធានីភ្នំពេញដែលចេញផ្សាយពេលកន្លងទៅបានឲ្យដឹងថា គិតត្រឹមឆ្នាំ ២០២៣ នៅរាជធានីភ្នំពេញ មានសំណង់បុរីចំនួន ៣១០កន្លែង អគារខ្ពស់ៗចាប់ពីប្រាំជាន់ឡើងទៅ មានចំនួន ១.៧៧៧អគារ និងនៅក្នុងឆ្នាំ ២០២៣ បានពិនិត្យលើឯកសារស្នើសុំលិខិតអនុញ្ញាតសាងសង់ក្នុងគម្រោងថ្មីចំនួន ៥៣៦គម្រោង លើផ្ទៃក្រឡាសំ ណង់សរុបជាង ២៦ម៉ឺនម៉ែត្រការ៉េ ដែលមានទំហំទុនវិនិយោគប៉ាន់ស្មានប្រមាណ ១៣២លានដុល្លាអាមេរិកបន្ថែមទៀត៕

អត្ថបទ៖ សេដ្ឋានី

The post វិស័យសំណង់នៅកម្ពុជាទទួលបានកំណើនទាប ធ្វើឲ្យក្រុមហ៊ុនមួយចំនួនមានវិបត្តិហិរញ្ញវត្ថុយ៉ាងធ្ងន់ធ្ងរ appeared first on Millions times.

លោកស្រី Jyotsana Varma នាយិកាប្រចាំប្រទេសកម្ពុជារបស់ ADB មានប្រសាសន៍ថា «ទោះបីជាមានបញ្ហាប្រឈមនៃសេដ្ឋកិច្ចពិភពលោកក៏ដោយ ក៏សេដ្ឋកិច្ចកម្ពុជាបានដំណើរការល្អក្នុងឆ្នាំ ២០២៣។ យើងរំពឹងថា កំណើនសេដ្ឋកិច្ចនឹងមានភាពកាន់តែប្រសើរក្នុងឆ្នាំ ២០២៤-២០២៥ ដោយសារវិស័យ កាត់ដេរ សម្លៀកបំពាក់ ស្បែកជើង និងទំនិញធ្វើដំណើរ (GFT) ទំនងជានឹងមានកំណើនខ្ពស់ ដោយផ្អែក លើសន្ទុះវិជ្ជមាន ដែលបានកើតឡើងក្នុងត្រីមាសចុងក្រោយនៃឆ្នាំ ២០២៣»។

បើតាមធនាគារអភិវឌ្ឍន៍អាស៊ី កំណើននេះ ត្រូវបានជំរុញដោយការស្ទុះឡើងវិញយ៉ាងខ្លាំងក្នុងវិស័យទេសចរណ៍ បើប្រៀបធៀបនឹងសមិទ្ធផល ដែល វិស័យនេះសម្រេចបានក្នុងឆ្នាំ២០២២ និងកំណើនដ៏រឹងមាំដែលវិស័យកម្មន្តសាលក្រៅពី GFT បន្តសម្រេច បាន។

របាយការណ៍ដដែលនេះ បានព្យាករពីកំណើនដែលនឹងមានជាបន្តទៀតសម្រាប់សេដ្ឋកិច្ចនៅឆ្នាំ ២០២៤-២០២៥ ដោយមានការគាំទ្រកាន់តែខ្លាំងពីផលិតកម្ម វិស័យកម្មន្តសាលសម្រាប់ការនាំចេញ។ អតិផរណា ជាមធ្យមប្រចាំឆ្នាំដែលមានការថយចុះមក ២,១% នៅក្នុងឆ្នាំ ២០២៣ ដោយសារមានការថយចុះនៃថ្លៃថាមពលអន្តរជាតិ ត្រូវបានព្យាករថានឹងបន្តនៅក្នុងរង្វង់ ២,០% នៅក្នុងពេល២ឆ្នាំខាងមុខនេះ៕

អត្ថបទ៖ ផល កុសល

The post ADB៖ សេដ្ឋកិច្ចកម្ពុជានឹងកើនឡើងក្នុងអត្រា ៥.៨%ក្នុងឆ្នាំ២០២៤ និង៦.០%ឆ្នាំ២០២៥ appeared first on Millions times.