ប្រេងឥន្ធនៈ Archives - Millions times

អ្នកឧកញ៉ា សួរ វីរៈ កុម្ម៉ង់រថយន្តដឹកទំនិញប្រភេទអគ្គិសនី ៣០០គ្រឿងបន្ថែម ស្របពេលប្រេងឡើងថ្លៃ

Virak វីរៈ — Mon, 23 Mar 2026 11:48:45 +0000

ដោយសារតែប្រេងឥន្ធនៈបន្តឡើងថ្លៃ បន្ទាប់ពីទទួលរងឥទ្ធិពលសង្រ្គាមនៅមជ្ឈិមបូព៌ានោះ, អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈ ប៊ុនថាំ បានបញ្ជាទិញរថយន្តដឹកទំនិញប្រភេទអគ្គីសនីប្រមាណ ៣០០គ្រឿងបន្ថែមទៀត។

តាមដានជាមួយយើង៖ Million Times

តាមរយៈបណ្ដាញសង្គមហ្វេសប៊ុក នៅថ្ងៃទី២៣ ខែមីនានេះ អ្នកឧកញ៉ា សួរ វីរៈ បានឱ្យដឹងថា រថយន្តដឹកទំនិញអគ្គិសនីវីរ:ប៊ុនថាំចំនួន ៣០០គ្រឿងបន្ថែមទៀត នឹងមកដល់កម្ពុជាជាបន្តបន្ទាប់ ដើម្បីកាត់បន្ថយការប្រើប្រាស់ប្រេងមាស៊ូត ក្នុងបរិបទពិភពលោកកំពុងប្រឈមនឹងការខ្វះខាតប្រេង។

អគ្គនាយកក្រុមហ៊ុន វិរៈ ប៊ុនថាំ រូបនេះ រំពឹងថា នៅពេលប្រើប្រាស់រថយន្តប្រភេទអគ្គីសនីនេះ នឹងអាចកាត់បន្ថយការចំណាយ ថ្លៃដឹកជញ្ជួនរបស់អតិថិជនមករកភាពប្រក្រតីឡើងវិញ ដើម្បីធានាឱ្យបានស្ថេរភាពចំណូលរបស់ប្រជាជនកម្ពុជា ជាពិសេសក្នុងវិស័យកសិកម្មនៅកម្ពុជា។

ក្រុមហ៊ុន វិរៈ ប៊ុនថាំ កំពុងវិវត្តទៅផ្ដល់សេវាដឹកជញ្ជូនទំនិញ ដោយប្រើប្រាស់រថយន្តអគ្គីសនីវិញ ដែល អាចសន្សំសំចៃជាងការប្រើប្រាស់រថយន្តម៉ាស៊ីនប្រេងឥន្ធនៈ ហើយជួយកាត់បន្ថយការបំពុលបរិស្ថានដែរ។

ប្រសិនបើមកដល់ក្នុងឆ្នាំ ២០២៦នេះ នឹងនាំឱ្យក្រុមហ៊ុនវិរៈ ប៊ុនថាំ របស់អ្នកឧកញ៉ា សួរ វីរៈ មានរថយន្ដប្រើថាមពលអគ្គិសនីកើនដល់ ៥០០គ្រឿង។ ការប្រើរថយន្ដអគ្គិសនីនេះ គឺស្របពេលមានការបារម្ភពីការឡើងថ្លៃសេវាដឹកជញ្ជូន បន្ទាប់ពីប្រេងឥន្ធនៈមានការហក់ឡើងជាបន្តបន្ទាប់ ដោយសារវិបត្តិសង្រ្គាមនៅមជ្ឈិមបូព៌ា៕

អត្ថបទ៖ វីរៈ រូបភាព៖ អ្នកឧកញ៉ា សួរ វីរៈ

The post អ្នកឧកញ៉ា សួរ វីរៈ កុម្ម៉ង់រថយន្តដឹកទំនិញប្រភេទអគ្គិសនី ៣០០គ្រឿងបន្ថែម ស្របពេលប្រេងឡើងថ្លៃ appeared first on Millions times.

នាយករដ្ឋមន្ត្រី បង្ហាញពីវិធានការជួយសម្រួលការលំបាកពលរដ្ឋដោយសារប្រេងឡើងថ្លៃ

Virak វីរៈ — Sat, 21 Mar 2026 05:45:26 +0000

សម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា បានបង្ហាញអំពីវិធានការអន្តរាគមន៍របស់រាជរដ្ឋាភិបាល ក្នុងការជួយសម្រួលការលំបាករបស់ប្រជាពលរដ្ឋដោយសារប្រេងឥន្ធនៈឡើងថ្លៃ។

តាមដានជាមួយយើង៖ Million Times

តាមរយៈទំព័រហ្វេសប៊ុក នៅថ្ងៃទី២១ ខែមីនានេះ សម្ដេចនាយករដ្ឋមន្ត្រី បានសរសេរឱ្យដឹងថា ចាប់តាំងពីការប្រយុទ្ធគ្នានៅនៅមជ្ឈិមបូព៌ាបានផ្ទុះឡើង ដែលបង្កឱ្យមានការកើនឡើង នៃតម្លៃប្រេងឥន្ទន:ជាសាកលនេះ រាជរដ្ឋាភិបាលកម្ពុជា បានដាក់ចេញជាបន្តបន្ទាប់នូវវិធានការអន្តរាគមន៍បន្ទាន់ និងចាំបាច់មួយចំនួន ក្នុងគោលបំណងជួយសម្រួលដល់ជីវភាពរបស់ប្រជាពលរដ្ឋ និងបានអនុវត្តរួចហើយយរួមមាន៖

១/ បន្តបញ្ចុះចំនួន ៦,៥សេនដុល្លារ/លីត្រ

២/ បន្តបញ្ចុះ ១សេនដុល្លារ/លីត្របន្ថែមទៀត ក្នុងករណីថ្លៃប្រេងសាំងអន្តរជាតិឡើងលើសពី ៩០ដុល្លារ/បារ៉ែល និងប្រេងម៉ាស៊ូតអន្តរជាតិឡើងលើស ១០០ដុល្លារ/បារ៉ែល

៣/ ពន្ធគយ ០ (សូន្យ) គឺជាការមិនយកពន្ធគយលើការនាំចូល

ជាមួយគ្នានេះ ដោយផ្អែកតាមសភាពការណ៍ និងថ្លៃប្រេងឥន្ទន:បន្តកើនឡើងនៅទីផ្សារអន្តរជាតិ រាជរដ្ឋាភិបាល បានដាក់ចេញនូវវិធានការអន្តរាគមន៍បន្ថែម កាលពីថ្ងៃ២០ ខែមីនា ឆ្នាំ២០២៦ ដែលរួមមាន៖

១/ បញ្ចុះអាករបន្ថែមលើប្រេងសាំង និងប្រេងម៉ាស៊ូតមក ០ (សូន្យ) ដុល្លារ

២/ បញ្ចុះអាករពិសេសលើប្រេងម៉ាស៊ូត ពី ៤% មក ០% និង

៣/ បញ្ចុះអាករលើតម្លៃបន្ថែមប្រេងសាំង និងម៉ាស៊ូត ពី ១០% មក ៤% ដោយរាជរដ្ឋាភិបាលទទួលបន្ទុកជំនួស ចំនួន ៦%។

បន្ថែមលើនេះ សម្ដេចធិបតី ហ៊ុន ម៉ាណែត ក៏ណែនាំដល់ក្រសួង-ស្ថាប័ន ពាក់ព័ន្ធរបស់រាជរដ្ឋាភិបាល បន្តតាមដានលើការវិវត្តនៃសភាពការណ៍ ជាពិសេសស្ថានភាពប្រេងឥន្ធនៈនៅលើទីផ្សារ ដោយយកចិត្តទុកដាក់ ដើម្បីពិនិត្យលទ្ធភាពដាក់ចេញនូវវិធានការអន្តរាគមន៍បន្ថែម ក្នុងករណីចាំបាច់ឱ្យបានទាន់ពេលវេលា៕

អត្ថបទ៖ វីរៈ រូបភាព៖ បណ្ដាញសង្គម

The post នាយករដ្ឋមន្ត្រី បង្ហាញពីវិធានការជួយសម្រួលការលំបាកពលរដ្ឋដោយសារប្រេងឡើងថ្លៃ appeared first on Millions times.

លោក ទៀ ស្យាម៖ តើបងប្អូនដឹងទេថា ប្រេងនៅកម្ពុជា និងប្រេងនៅថៃ មិនដូចគ្នាទេ?

Virak វីរៈ — Mon, 16 Mar 2026 11:35:14 +0000

លោក ទៀ ស្យាម សហស្ថាបនិកក្រុមហ៊ុន ភីស ភេត្រូលៀម ខេមបូឌា ឯ.ក បានលើកឡើងពីការប្រើប្រាស់ប្រេងឥន្ធនៈនៅកម្ពុជា និងនៅថៃ ដែលមិនដូចគ្នាទេ។ តាមរយៈទំព័រហ្វេសប៊ុករបស់ខ្លួន នៅថ្ងៃទី១៦ ខែមីនានេះ លោក ទៀ ស្យាម បានឱ្យដឹងថា នៅកម្ពុជា ប្រេងដែលប្រើជាទូទៅមាន៖ ប្រេងសាំង 92, ប្រេងសាំង 95 និងប្រេងម៉ាស៊ូត (Diesel)។

តាមដានជាមួយយើង៖ Million Times

ប៉ុន្តែនៅប្រទេសថៃ ភាគច្រើនគេប្រើប្រេងប្រភេទផ្សេងដូចជា៖ Gasohol 91, Gasohol 95, E20, E85, Diesel B7 / B20 ដោយប្រេងប្រភេទទាំងនេះ ខុសពីប្រេងដែលប្រើនៅកម្ពុជា ហើយតម្លៃក៏ខុសគ្នាផងដែរ។ ដូច្នេះហើយ ពេលខ្លះបងប្អូនជាច្រើនឃើញថា ប្រេងនៅថៃមើលទៅថោកជាង។

សហស្ថាបនិកក្រុមហ៊ុន ភីស បានបន្តលើកឡើងពីមូលហេតុដែលធ្វើឱ្យប្រេងនៅថៃថោកជាងនៅកម្ពុជា ពីព្រោះប្រេងប្រភេទ Gasohol ឬ Diesel B7 / B20 មានការលាយជាមួយសារធាតុផ្សេងៗ ដូចជា៖ Ethanol (សម្រាប់ Gasohol), Biodiesel (សម្រាប់ Diesel)។ លោកថា Ethanol អាចផលិតពីដំណាំដូចជា អំពៅ ឬ ដំឡូងមី ដូច្នេះវាមានថ្លៃដើមថោកជាងប្រេងសាំងធម្មតា ហើយអាចធ្វើឱ្យតម្លៃលក់ទាបជាងបាន។

ជាមួយគ្នានេះ លោក ទៀ ស្យាម បានបន្ថែមថា មូលដ្ឋានប្រេងនៅតែដូចគ្នា ប៉ុន្តែព្រោះមានការលាយ ethanol ចូលអាចធ្វើឱ្យការប្រើប្រាស់ប្រេងច្រើនជាងបន្តិច, រថយន្តចាស់ៗខ្លះអាចត្រូវការកែប្រែប្រព័ន្ធប្រេង។ ប៉ុន្តែបច្ចុប្បន្ននេះ រថយន្តសម័យថ្មីភាគច្រើនអាចប្រើប្រេងប្រភេទនេះ បានរួចហើយ។

ហេតុអ្វីបានជាកម្ពុជាមិនប្រើប្រេងបែបនេះ? លោក ទៀ ស្យាម បានពន្យល់ថា ការប្រើប្រេងប្រភេទនេះត្រូវការរចនាសម្ព័ន្ធជាច្រើន ដូចជា៖ រោងចក្រចម្រាញ់ប្រេង, ការផលិត Ethanol ក្នុងប្រទេស និងប្រព័ន្ធលាយប្រេងក្នុងបរិមាណធំ។

លោក ទៀ ស្យាម បានលើកឡើងទៀតថា តាមពិត តម្លៃប្រេងនៅកម្ពុជា មិនមែនថ្លៃជាងប្រទេសផ្សេងៗទេ ប៉ុន្តែប្រទេសខ្លះប្រើវិធី លាយ ethanol ឬ biodiesel ដើម្បីកាត់បន្ថយថ្លៃដើម។ ហើយនេះជាមូលហេតុដែលធ្វើឱ្យតម្លៃប្រេងរបស់ពួកគេមើលទៅថោកជាង៕

អត្ថបទ៖ វីរៈ រូបភាព៖ លោក ទៀ ស្យាម

The post លោក ទៀ ស្យាម៖ តើបងប្អូនដឹងទេថា ប្រេងនៅកម្ពុជា និងប្រេងនៅថៃ មិនដូចគ្នាទេ? appeared first on Millions times.

ក្រុមហ៊ុន Peace Petroleum របស់លោក ទៀ ស្យាម និងលោក ទៀ វិចិត្រ បើកការដ្ឋានសាងសង់មណ្ឌលសន្និធិប្រេងឥន្ធនៈ តម្លៃ ៧.៥ លានដុល្លារ

Vin Chang — Wed, 11 Mar 2026 07:05:04 +0000

ក្រុមហ៊ុន Peace Petroleum របស់លោក ទៀ ស្យាម និងលោក ទៀ វិចិត្រ ជាសហស្ថាបនិក បានបើកការដ្ឋានសាងសង់មណ្ឌលសន្និធិប្រេងឥន្ធនៈ ដែលមានតម្លៃ ៧.៥ លានដុល្លារ ក្នុងឃុំទំនប់រលក ស្រុកស្ទឹងហាវ ខេត្តព្រះសីហនុ កាលពីថ្ងៃ ១០ ខែមីនា ឆ្នាំ ២០២៦។

តាមដានជាមួយយើង៖ Million Times

លោក ទៀ វិចិត្រ បានបញ្ជាក់ថា គម្រោងនេះគឺជាមោទនភាពមួយ សម្រាប់វិនិយោគិនក្នុងស្រុក ដែលមានគោលដៅពង្រឹងការផ្គត់ផ្គង់ថាមពលនៅកម្ពុជា។ មណ្ឌលសន្និធិប្រេងឥន្ធនៈនេះទុនវិនិយោគសរុបប្រមាណ ៧.៥ លានដុល្លារអាមេរិក។

គម្រោងនេះមិនត្រឹមតែបង្ហាញពីភាពជឿជាក់របស់វិនិយោគិនក្នុងស្រុកប៉ុណ្ណោះទេ ប៉ុន្តែថែមទាំងរួម ចំណែកយ៉ាងសំខាន់ជាមួយរាជរដ្ឋាភិបាលកម្ពុជាលើផ្នែក៖

ការបង្កើតការងារ៖ ផ្តល់ឱកាសការងារយ៉ាងច្រើនដល់ប្រជាពលរដ្ឋក្នុងមូលដ្ឋាន។
ការពង្រឹងសមត្ថភាព៖ បណ្ដុះបណ្ដាល និងបង្កើនជំនាញបច្ចេកទេសដល់បុគ្គលិក និងកម្មករខ្មែរ។
សន្តិសុខថាមពល៖ ធានាឲ្យបានស្ថិរភាពនៃការផ្គត់ផ្គង់ប្រេងឥន្ធនៈជូនដល់ទីផ្សារក្នុងប្រទេស។
បរិយាកាសវិនិយោគ៖ បង្កើនទំនុកចិត្ត និងទាក់ទាញវិនិយោគិនដទៃទៀតមកកាន់តំបន់មាត់សមុទ្រ។

គម្រោងមណ្ឌលសន្និធិប្រេងឥន្ធនៈរបស់ក្រុមហ៊ុន Peace Petroleum នេះ ត្រូវបានគេរំពឹងថានឹងក្លាយជាសរសៃឈាមសេដ្ឋកិច្ចដ៏សំខាន់មួយក្នុងការគាំទ្រដល់តម្រូវការប្រេងឥន្ធនៈដែលកំពុងមានការកើនឡើងឥតឈប់ឈរនៅប្រទេសកម្ពុជា៕

អត្ថបទ៖ ឆដា, រូបភាព៖ Tea Siam

The post ក្រុមហ៊ុន Peace Petroleum របស់លោក ទៀ ស្យាម និងលោក ទៀ វិចិត្រ បើកការដ្ឋានសាងសង់មណ្ឌលសន្និធិប្រេងឥន្ធនៈ តម្លៃ ៧.៥ លានដុល្លារ appeared first on Millions times.

លោក ចាន់ សុផល៖ អ្នកប្រើប្រេងសាំងអាចបន្ថយ ឬផ្អាកបាន ប៉ុន្ដែអ្នកប្រើម៉ាស៊ូតពិបាកកាត់បន្ថយ

Virak វីរៈ — Wed, 11 Mar 2026 06:03:23 +0000

លោក ចាន់ សុផល អ្នកវិភាគសេដ្ឋកិច្ច បានលើកឡើងនៅលើបណ្ដាញសង្គមថា អ្នកប្រើប្រេងសាំង អាចបន្ថយ ឬផ្អាកបាន ក៏ប៉ុន្ដែអ្នកប្រើម៉ាស៊ូតពិបាកកាត់បន្ថយ។ លោកថា បច្ចុប្បន្ន អ្នកត្រូវការទិញប្រេងម៉ាស៊ូត ដើម្បីបូមទឹកមួយចំនួន ឬចាក់គ្រឿងចក្រជួបការលំបាកមួយកម្រិតទៀត ដោយសារកន្លែងខ្លះគេមិនលក់ដាក់កានជ័រ។

តាមដានជាមួយយើង៖ Million Times

ការលើកឡើងនេះ ស្របពេលបច្ចុប្បន្នប្រេងម៉ាស៊ូតត្រូវក្នុងតម្លៃ ៦ ០៥០រៀល/លីត្រ រីឯប្រេងសាំងធម្មតាត្រូវលក់៥ ២០០រៀល/លីត្រ ដែលប្រែប្រួលទៅតាមទីផ្សារអន្តរជាតិ។

លោក ចាន់ សុផល បានលើកឡើងថា ហេតុអ្វីបានជាប្រេងម៉ាស៊ូតថ្លៃជាងសាំងក្នុងពេលមានវិបត្តិ? ហេតុអ្វីបានជាថ្លៃម៉ាស៊ូតនាំចូលមកខ្ពស់ជាងថ្លៃសាំង? ចម្លើយគឺមកពីតម្រូវការម៉ាស៊ូតពិបាកកាត់បន្ថយ ខណៈតម្រូវការសាំងអាចកាត់បន្ថយបាន ដោយលោកថា បើក្នុងមុខវិទ្យាសេដ្ឋកិច្ចគេហៅថា តម្រូវការមិនងាយប្រែប្រួលតាមថ្លៃ ដោយសារភាពចាំបាច់នៃទំនិញ (demand inelasticity)។

អ្នកជំនាញរូបនេះ បានបន្ថែមថា គេអាចកាត់បន្ថយការប្រើប្រាស់ឡានទេសចរណ៍បាន។ គេអាចផ្អាកជិះឡានមួយរយៈដោយជិះម៉ូតូ ជិះកង់ ឬជិះឡានក្រុង ក៏ប៉ុន្ដែការបូមទឹក ភ្ជួរដី ច្រូតស្រូវ ដឹកដំឡូង ដឹកស្វាយ ដឹកស្វាយចន្ទី ដឹកស្រូវ ដឹកអង្ករនាំចេញ ដឹកក្រណាត់ចូល ដឹកសម្លៀកបំពាក់នាំចេញ ដឹកប្រេងចែកចាយ ដឹកសម្ភារៈសំណង់ជាដើម សុទ្ធតែប្រើប្រាស់ប្រេងម៉ាស៊ូត និងបើកាត់បន្ថយនាំឱ្យមានការខាតបង់កាន់តែច្រើន ដូច្នេះហើយ តម្រូវការម៉ាស៊ូតមានភាពចាំបាច់ជាងសាំង ដែលនាំឱ្យប្រទេសជាច្រើនដណ្ដើមគ្នាទិញម៉ាស៊ូត។

លោក ចាន់ សុផល បានលើកឡើងថា ថ្លៃដឹកជញ្ជូនកើនឡើង នាំឱ្យថ្លៃទំនិញឧបភោគ បរិភោគ នឹងកើនឡើង រីឯអ្នកលក់ទំនិញនាំចេញ នឹងបានចំណូលតិចជាងមុន ហើយបើខ្វះម៉ាស៊ូតកាន់តែពិបាកខ្លាំង។

ត្រង់ចំណុចនេះ លោកបានផ្ដល់យោបល់ថា រដ្ឋាភិបាល គួរយកចិត្តទុកដាក់ឱ្យបានខ្លាំងចំពោះប្រេងម៉ាស៊ូតដែលជាយុទ្ធសាស្ត្រនេះ និងគួរមានការលើកទឹកចិត្តសម្រាប់ការទិញឡានដឹកទំនិញ ដោយប្រើឋាមពលអគ្គិសនីឱ្យបានឆាប់ជាទីបំផុត។ លោកថា បើខ្វះឋាមពលអគ្គិសនី រដ្ឋាភិបាល គួរបង្កើតគម្រោង ឬអនុញ្ញាតការប្រើប្រព័ន្ធសូឡាឱ្យបានច្រើន រួមទាំងប្រព័ន្ធសូឡាបូមទឹក៕

អត្ថបទ៖ វីរៈ រូបភាព៖ បណ្ដាញសង្គម

The post លោក ចាន់ សុផល៖ អ្នកប្រើប្រេងសាំងអាចបន្ថយ ឬផ្អាកបាន ប៉ុន្ដែអ្នកប្រើម៉ាស៊ូតពិបាកកាត់បន្ថយ appeared first on Millions times.

ក្រសួងពាណិជ្ជកម្ម៖ ប្រេងឥន្ធនៈត្រូវលក់ ផ្តល់អាទិភាពជូនសេវាសាធារណៈ និងកសិករ

Vin Chang — Tue, 10 Mar 2026 03:50:35 +0000

នៅព្រឹកនេះ ក្រសួងពាណិជ្ជកម្មបានគូសបញ្ជាក់ពីការលក់ប្រេងឥន្ធនៈត្រូវផ្ដល់អាទិភាពដល់សេវាសាធារណៈជាការចាំបាច់ និងកសិករ បុគ្គលពាក់ព័ន្ធក្នុងខ្សែច្រវាក់ផលិត កម្ម និងភស្តុភាកម្ម។ យោងតាមសេចក្ដីណែនាំស្ដីពីការពង្រឹងអនុលោមភាពក្នុងការទិញ-លក់ប្រេងឥន្ធនៈ។

តាមដានជាមួយយើង៖ Million Times

ក្នុងសេចក្ដីណែនាំស្ដីពីការពង្រឹងអនុលោមភាពក្នុងការទិញ-លក់ប្រេងឥន្ធនៈ នៅតាមបណ្ដាស្ថានីយ និងដេប៉ូរបស់ក្រសួងពាណិជ្ជកម្មនៅថ្ងៃ ៩ ខែមីនា ឆ្នាំ ២០២៦ បានលើកឡើងថា ដើម្បីធានាបានតម្លាភាពនៃការផ្គត់ផ្គង់ និងការទិញ-លក់ប្រេងឥន្ធនៈនៅតាមស្ថានីយ និងដេប៉ូ ក្រសួងពាណិជ្ជកម្ម ដោយធ្វើការណែនាំដល់ក្រុមហ៊ុនចែកចាយ និងផ្គត់ផ្គង់ប្រេងឥន្ធនៈនៅតាមបណ្ដារាជធានី-ខេត្ត ត្រូវធ្វើការណែនាំដល់ស្ថានីយ និងដេប៉ូ នៅក្នុងបណ្ដាញចែកចាយរបស់ខ្លួន ឲ្យអនុវត្តយ៉ាងម៉ឺងម៉ាត់ក្នុងការគ្រប់គ្រងការទិញ-លក់ប្រេងឥន្ធនៈបានត្រឹមត្រូវទៅតាមបទដ្ឋាន បច្ចេកទេស និងបទបញ្ជាផ្ទៃក្នុងរបស់ក្រុមហ៊ុន ។

ក្រសួងពាណិជ្ជកម្មបានគូសបញ្ជាក់ និងណែនាំឲ្យស្ថានីយ និងដេប៉ូ ផ្តល់អាទិភាពផ្គត់ផ្គង់ប្រេងឥន្ធនៈដល់រថយន្តសង្គ្រោះបន្ទាន់ រថយន្តពន្លត់អគ្គិភ័យ និងរថយន្តបម្រើសេវាសាធារណៈ ជាដើម ព្រមទាំដល់ប្រជាកសិករ និងបុគ្គលពាក់ព័ន្ធក្នុងខ្សែច្រវាក់ផលិតកម្ម និងភស្តុភារកម្ម។

គួរបញ្ជាក់ផងដែរថា ជាង១ សប្ដាហ៍មកនេះ តម្លៃប្រេងនៅលើពិភពលោកបានហក់ឡើងថ្លៃ ដោយសារសង្គ្រាមនៅអ៊ីរ៉ង់ ជាមួយអាមេរិក និងអ៊ីស្រាអែល។ តែនៅព្រឹកនេះតម្លៃប្រេងចុះក្រោម ៩០ ដុល្លារ/បារ៉ែល បន្ទាប់លោកប្រធានាធិបតីអាមេរិក ដូណាល់ ត្រាំ ប្រកាសថា សង្គ្រាមនៅអ៊ីរ៉ង់ជិតបញ្ចប់ហើយ៕

អត្ថបទ៖ ឆដា, រូបភាព៖ ក្រសួងពាណិជ្ជកម្ម

The post ក្រសួងពាណិជ្ជកម្ម៖ ប្រេងឥន្ធនៈត្រូវលក់ ផ្តល់អាទិភាពជូនសេវាសាធារណៈ និងកសិករ appeared first on Millions times.

អភិបាលខេត្តកំពង់ធំ ណែនាំឱ្យម្ចាស់ស្ថានីយទប់ស្កាត់ការទិញប្រេងទ្រង់ទ្រាយធំយកទៅស្តុកទុក

Virak វីរៈ — Sat, 07 Mar 2026 02:16:45 +0000

ឯកឧត្តម នួន ផារ័ត្ន អភិបាលខេត្តកំពង់ធំ បានណែនាំឱ្យម្ចាស់ស្ថានីយលក់ប្រេងឥន្ធនៈទាំងអស់ ត្រូវចូលរួមទប់ស្កាត់ជនឆ្លៀតឱកាស ទិញប្រេងឥន្ធនៈក្នុងទ្រង់ទ្រាយធំយកទៅស្តុកទុក ដែលអាចធ្វើឱ្យប៉ះពាល់ការផ្គត់ផ្គង់ក្នុងខេត្ត។

តាមដានជាមួយយើង៖ Million Times

ការណែនាំនេះ ដោយសារឯកឧត្តមសង្កេតឃើញថា មានជនឆក់ឱកាសមួយក្តាប់តូចបានដំឡើងថ្លៃប្រេងឥន្ទនៈខុសពីការណែនាំរបស់ក្រសួងពាណិជ្ជកម្ម និងជនមួយចំនួនទៀតបានសម្រុកទៅទិញប្រេងឥន្ទនៈដើម្បីស្តុកទុក ដែលបានធ្វើឱ្យប៉ះពាល់ដល់ខ្សែច្រវ៉ាក់នៃការផ្គត់ផ្គង់ និងសណ្តាប់ធ្នាប់ល្អនៅក្នុងភូមិសាស្រ្តខេត្ត។

ឯកឧត្តម អភិបាលខេត្តកំពង់ធំ បានណែនាំឱ្យគណៈបញ្ជាការឯកភាពរដ្ឋបាលក្រុងស្រុកទាំង៩ មន្ទីររ៉ែនិងថាមពល និងមន្ទីរពាណិជ្ជកម្ម បន្តតាមដាននូវភាពមិនប្រក្រតីនេះ ដែលក្នុងនោះមានវិធានការចំនួន ២ ដែលត្រូវយកចិត្តទុកដាក់។ វិធានការទាំង ២នោះ រួមមាន៖

ទី១. ម្ចាស់ស្ថានីយទាំងអស់ ត្រូវបន្តបើកដំណើរការអាជីវកម្មចាក់ប្រេងជាធម្មតាជូនប្រជាពលរដ្ឋដែលមានយានជំនិះផ្សេងៗ និងចូលរួមទប់ស្កាត់ជនឆ្លៀតឱកាសទាំងឡាយណា ដែលមកជាវប្រេងក្នុងទ្រង់ទ្រាយធំ ក្នុងគោលបំណងយកទៅស្តុកទុក ដែលធ្វើឱ្យប៉ះពាល់ដល់ខ្សែច្រវ៉ាក់ នៃការផ្គត់ផ្គង់ប្រេងជាប្រក្រតីនៅក្នុងខេត្ត។

ទី២. យកចិត្តទុកដាក់លើតម្លៃប្រេងដែលកំណត់ដោយស្ថានីយមួយចំនួន ក្នុងករណីរកឃើញថា ស្ថានីយប្រេងឥន្ទនៈណាមួយ បានកំណត់តម្លៃខុសពីការណែនាំរបស់ក្រសួងពាណិជ្ជកម្ម ម្ចាស់ស្ថានីយប្រេងឥន្ទនៈ នោះនឹងត្រូវទទួលការព្រមាន និងអាចឈានទៅរកការបិទស្ថានីយប្រេងឥន្ទនៈនោះជាអចិន្ត្រៃយ៍ផងដែរ។

រដ្ឋបាលខេត្តកំពង់ធំ ក៏បានអំពាវនាវដល់ប្រជាពលរដ្ឋរក្សាសណ្តាប់ធ្នាប់របៀបរៀបរយល្អក្នុងសង្គម សាមគ្គីគ្នាក្នុងគ្រាលំបាក និងលុបបំបាត់ចោលនូវទម្លាប់ឆក់ឱកាសកេងចំណេញ ក្នុងកាលៈទេសៈដែលប្រទេសជាតិកំពុងជួបការលំបាក និងត្រូវជឿជាក់លើការដឹកនាំរបស់រាជរដ្ឋាភិបាល ចៀសវាងការតក់ស្លុត ឬការបារម្ភ ដែលអាចអនុញ្ញាតឱ្យជនឆ្លៀតឱកាសបង្កើតភាពវឹកវរ ធ្វើឱ្យបាត់សណ្តាប់ធ្នាប់ក្នុងសង្គមបាន៕

អត្ថបទ៖ វីរៈ រូបភាព៖ មន្ទីរពាណិជ្ជកម្មខេត្តកំពង់ធំ

The post អភិបាលខេត្តកំពង់ធំ ណែនាំឱ្យម្ចាស់ស្ថានីយទប់ស្កាត់ការទិញប្រេងទ្រង់ទ្រាយធំយកទៅស្តុកទុក appeared first on Millions times.

ក្រសួងអំពាវនាវអ្នកប្រើប្រាស់ និងម្ចាស់ស្ថានីយអនុវត្តតាមស្តង់ដាបច្ចេកទេសលក់ និងស្តុកទុកប្រេង

Virak វីរៈ — Fri, 06 Mar 2026 12:14:44 +0000

ក្រសួងពាណិជ្ជកម្ម បានអំពាវនាវដល់អ្នកប្រើប្រាស់ និងម្ចាស់ស្ថានីយលក់ប្រេងឥន្ធនៈទាំងអស់ ត្រូវអនុវត្តតាមលក្ខណៈស្តង់ដាបច្ចេកទេសនៃការលក់ ការស្តុកទុកប្រេងឥន្ធនៈ។

តាមដានជាមួយយើង៖ Million Times

តាមរយៈសេចក្ដីជូនដំណឹងរបស់ក្រសួងពាណិជ្ជកម្ម នៅល្ងាចថ្ងៃទី៦ ខែមីនានេះ បានឱ្យដឹងថា ដើម្បីធានាបាននូវការគ្រប់គ្រងហានិភ័យនៃការទិញ-លក់ និងសន្តិសុខ-សុវត្ថិភាពរបស់អ្នកប្រើប្រាស់ ដែលអាចកើតឡើងពីការស្តុកប្រេងឥន្ធនៈ ដោយមិនសមស្របតាមលក្ខណៈស្តង់ដាបច្ចេកទេស ហើយធានាបាននូវនិរន្តរភាពនៃការផ្គត់ផ្គង់ប្រេងឥន្ធនៈនៅតាមស្ថានីយ ក្រសួងពាណិជ្ជកម្ម បានអំពាវនាវដល់អ្នកប្រើប្រាស់ និងម្ចាស់ស្ថានីយលក់ប្រេងឥន្ធនៈទាំងអស់ ត្រូវអនុវត្តតាមលក្ខណៈស្តង់ដាបច្ចេកទេសនៃការលក់ ការស្តុកទុក និងការអនុវត្តឱ្យល្អស្របតាមស្តង់ដា និងក្រមប្រតិបត្តិដែលស្ថានីយលក់ប្រេងឥន្ធនៈជាទូទៅបានអនុវត្ត និងគ្រប់គ្រងហានិភ័យល្អកន្លងមក។

ក្រសួងពាណិជ្ជកម្ម ក៏បានលើកទឹកចិត្តដល់ប្រជាពលរដ្ឋទាំងអស់ចូលរួមអនុវត្ត និងយោគយល់ចំពោះស្ថានីយលក់ប្រេងឥន្ធនៈ ដែលបានខិតខំប្រឹងប្រែងគ្រប់គ្រងហានិភ័យ និងចូលរួមសន្សំសំចៃក្នុងការប្រើប្រាស់ប្រេងឥន្ធនៈ ព្រមទាំងចៀសវាងការសម្រុកទិញប្រេងឥន្ធនៈស្តុកទុកលើសពីតម្រូវការចាំបាច់ ដែលអាចបង្កឱ្យមានហានិភ័យឆាបឆេះ និងប៉ះពាល់ដល់ទ្រព្យសម្បត្តិ និងការរស់នៅរបស់ប្រជាពលរដ្ឋនៅក្នុងមូលដ្ឋាន។

ក្រសួងពាណិជ្ជកម្ម បានបញ្ជាក់ថា មន្ត្រីជំនាញរបស់អគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង នៃក្រសួងពាណិជ្ជកម្ម និងមន្ទីរពាណិជ្ជកម្ម រួមទាំងមន្ទីររ៉ែ និងថាមពល រាជធានី-ខេត្ត បាននឹងកំពុងបន្តចុះតាមដាន-ត្រួតពិនិត្យការលក់ជាប្រចាំ ដើម្បីធានាការលក់និងជំរុញឱ្យស្ថានីយប្រេងឥន្ធនៈអនុវត្តឱ្យបានគត់មត់តាមលក្ខណៈស្តង់ដាបច្ចេកទេស និងបង្ការការឆ្លៀតឱកាសដំឡើងថ្លៃប្រេងឥន្ធនៈខុសប្រក្រតីជាដើម៕

អត្ថបទ៖ វីរៈ រូបភាព៖ បណ្ដាញសង្គម

The post ក្រសួងអំពាវនាវអ្នកប្រើប្រាស់ និងម្ចាស់ស្ថានីយអនុវត្តតាមស្តង់ដាបច្ចេកទេសលក់ និងស្តុកទុកប្រេង appeared first on Millions times.

ក្រុមហ៊ុនឥន្ធនៈនៅរដ្ឋញូវយ៉ក រងការផាកពិន័យ ៧៥ពាន់លានដុល្លារ ក្រោយអនុម័តច្បាប់ថ្មី

ទីន Tin — Fri, 27 Dec 2024 07:00:00 +0000

កាលពីថ្ងៃទី២៦ ខែធ្នូ អភិបាលក្រុងញូវយ៉ក លោក Kathy Hochul បានចុះហត្ថលេខាលើច្បាប់ថ្មី ដែលតម្រូវឲ្យក្រុមហ៊ុនរកស៊ីជួញដូរប្រេងឥន្ធនៈហ្វូស៊ីលទាំងអស់នៅរដ្ឋញូវយ៉ក ត្រូវបង់ប្រាក់ផាកពិន័យសរុប ៧៥ពាន់លានដុល្លារ ក្នុងរយៈពេល ២៥ឆ្នាំ។ នេះបើតាមការចុះផ្សាយពីសារព័ត៌មាន Reuters។

តាមដានជាមួយយើង៖ Million Times

ក្រោមច្បាប់ថ្មីស្ដីពីកត្តាបម្រែបម្រួលអាកាសធាតុ ត្រូវបានបង្កើតឡើងដើម្បីផ្លាស់ប្ដូរ និងសងថ្លៃខូចខាត ដែលក្រុមហ៊ុនរកស៊ីក្នុងវិស័យប្រេងឥន្ធនៈ បានធ្វើឲ្យប៉ះពាល់ដល់បរិស្ថាន។ ទឹកប្រាក់ដែលទទួលបានពីការផាកពិន័យទាំងនោះ នឹងត្រូវយកទៅប្រើប្រាស់ក្នុងការកាត់បន្ថយផលប៉ះពាល់នៃការប្រែប្រួលអាកាសធាតុ រួមទាំងការសម្រួលផ្លូវថ្នល់ ផ្លូវឆ្លងកាត់ ប្រព័ន្ធទឹក និងលូ អគារ និងហេដ្ឋារចនាសម្ព័ន្ធផ្សេងៗទៀត។

ក្រុមហ៊ុនប្រេងឥន្ធនៈទាំងនោះ នឹងត្រូវរងការផាកពិន័យខុសៗគ្នា ទៅតាមកម្រិតឧស្ម័នពុលដែលពួកគេបានបញ្ចេញចាប់ពី ១ពាន់លានតោនឡើងទៅ ចន្លោះពីឆ្នាំ២០០០ ដល់ឆ្នាំ២០១៨ ខណៈការទូទាត់ប្រាក់នឹងចាប់ផ្ដើមប្រមូលចូលមូលនិធិ Climate Superfund នាដើមឆ្នាំ២០២៨។

សមាជិកព្រឹទ្ធសភារដ្ឋញូវយ៉ក អ្នកស្រី Liz Krueger បាននិយាយថា ថ្លៃជួសជុល និងការសម្របខ្លួនជាមួយអាកាសធាតុនៅញូវយ៉ក បណ្ដាលមកពីការបញ្ចេញឧស្ម័នពុល នឹងមានចំនួនច្រើនជាង ៥០០ពាន់លានដុល្លារ គិតត្រឹមឆ្នាំ២០៥០។

លោកស្រីបន្ថែមថា វាគួរតែដល់ពេលហើយ ដែលក្រុមហ៊ុនរកស៊ីប្រេងឥន្ធនៈទាំងនោះគិតគូរពីផលប៉ះពាល់បរិស្ថាន ដែលបង្កឡើងពីពួកគេ ពោល ៣ឆ្នាំចុងក្រោយក្រុមហ៊ុនទាំងនោះ កើបលុយលើសពី ១ទ្រីលានដុល្លារ ពីប្រេងឥន្ធនៈ ស្របពេលកត្តាបម្រែបម្រួលអាកាសធាតុនៅញូវយ៉ក កាន់តែមានភាពអាក្រក់ទៅៗ៕

អត្ថបទ៖ Luffy រូបភាព៖ Bloomberg/NPR

The post ក្រុមហ៊ុនឥន្ធនៈនៅរដ្ឋញូវយ៉ក រងការផាកពិន័យ ៧៥ពាន់លានដុល្លារ ក្រោយអនុម័តច្បាប់ថ្មី appeared first on Millions times.

ក្រុមហ៊ុនជីករ៉ែធំបំផុតនៅចិន ត្រៀមចាយលុយ ២៤ពាន់លានដុល្លារ វិនិយោគលើគម្រោងកែច្នៃប្រេងឥន្ធនៈ

ទីន Tin — Fri, 11 Oct 2024 05:02:00 +0000

ក្រុមហ៊ុនជីករ៉ែធ្យូងថ្មធំបំផុតនៅចិន China Energy Investment Corp. បានប្រកាសកាលពីថ្ងៃទី១០ ខែតុលាថា ពួកគេកំពុងមានគម្រោងចំណាយប្រាក់ ១៧០ពាន់លានយ៉ន់ ឬប្រហែល ២៤ពាន់លានដុល្លារ លើគម្រោងកែច្នៃប្រេងឥន្ធនៈ ចេញពីធ្យូងថ្ម ដើម្បីផ្គត់ផ្គង់តម្រូវការក្នុងស្រុក។

តាមដានជាមួយយើង៖ Million Times

តាមរយៈការចុះផ្សាយពីគេហទំព័រ Bloomberg បានបង្ហាញថា ផែនការរបស់ក្រុមហ៊ុនចិននេះ គឺនឹងសាងសង់រោងចក្រចម្រាញ់ប្រេងមួយ នៅភាគពាយ័ព្យនៃខេត្ត Xinjiang ដែលអាចមានសមត្ថភាពចម្រាញ់ប្រេងឥន្ធនៈ ចេញពីធ្យូងថ្ម ខណៈថាមពលដែលត្រូវយកមកប្រើប្រាស់ក្នុងរោងចក្រ គឺធានាបានថា ជាថាមពលកកើតឡើងវិញទាំងស្រុង។

គួររំលឹកបន្តិចថា ប្រទេសចិន គឺជាអ្នកផលិតធ្យូងថ្មធំបំផុតលើលោក ដោយមានសមត្ថភាពផលិតបាន ៤,៧ពាន់លានតោនកាលពីឆ្នាំទៅ ក៏ប៉ុន្តែការប្រើប្រាស់ធ្យូងថ្ម ដើម្បីបង្កើតនូវថាមពលអគ្គិសនី បានធ្វើឲ្យប្រទេសមួយនេះជាប់ឈ្មោះជា អ្នកបញ្ចេញឧស្ម័នកាបូនឌីអុកស៊ីតច្រើនបំផុតលើលោកផងដែរ។

ដើម្បីដោះស្រាយបញ្ហាមួយនេះ រដ្ឋាភិបាលចិនបានដាក់ចេញនូវគោលនយោបាយ កាត់បន្ថយការបញ្ចេញឧស្ម័នពុល នៅឆ្នាំ២០២៦ ដោយអំពាវនាវឲ្យមានការចម្រាញ់ប្រេងចេញពីធ្យូងថ្ម និងប្រើប្រាស់ថាមពលកកើតឡើងវិញ ជំនួសឲ្យការដុតធ្យូងរាប់លានតោនក្នុងមួយឆ្នាំៗ។

ក្រោយការអំពាវនាវរបស់រដ្ឋាភិបាល ក្រុមហ៊ុនជីករ៉ែធំៗក្នុងស្រុកជាច្រើន ចាប់ផ្ដើមផែនការចម្រាញ់ប្រេងចេញពីធ្យូងថ្ម ដោយរោងចក្រនៅទីក្រុង Hami ក្នុងខេត្ត Xinjiang តែមួយអាចមានសមត្ថភាព ប្រើប្រាស់ធ្យូង ១៥២លានតោន ដើម្បីចម្រាញ់ចេញជាប្រេងឥន្ធនៈក្នុងមួយឆ្នាំៗ៕

The post ក្រុមហ៊ុនជីករ៉ែធំបំផុតនៅចិន ត្រៀមចាយលុយ ២៤ពាន់លានដុល្លារ វិនិយោគលើគម្រោងកែច្នៃប្រេងឥន្ធនៈ appeared first on Millions times.

ប្រេងឥន្ធនៈ Archives - Millions times

អ្នកឧកញ៉ា សួរ វីរៈ កុម្ម៉ង់រថយន្តដឹកទំនិញប្រភេទអគ្គិសនី ៣០០គ្រឿងបន្ថែម ស្របពេលប្រេងឡើងថ្លៃ

នាយករដ្ឋមន្ត្រី បង្ហាញពីវិធានការជួយសម្រួលការលំបាកពលរដ្ឋដោយសារប្រេងឡើងថ្លៃ

លោក ទៀ ស្យាម៖ តើបងប្អូនដឹងទេថា ប្រេងនៅកម្ពុជា និងប្រេងនៅថៃ មិនដូចគ្នាទេ?

លោក​ ចាន់ សុផល៖ អ្នក​ប្រើ​ប្រេងសាំង​អាច​បន្ថយ​ ឬ​ផ្អាក​បាន​ ​ប៉ុន្ដែ​អ្នក​ប្រើ​ម៉ាស៊ូត​ពិបាក​កាត់​បន្ថយ

ក្រសួងពាណិជ្ជកម្ម៖ ប្រេងឥន្ធនៈត្រូវលក់ ផ្តល់អាទិភាពជូនសេវាសាធារណៈ និងកសិករ

អភិបាលខេត្តកំពង់ធំ ណែនាំឱ្យម្ចាស់ស្ថានីយ​ទប់ស្កាត់ការទិញប្រេងទ្រង់ទ្រាយធំយកទៅស្តុកទុក

ក្រសួងអំពាវនាវអ្នកប្រើប្រាស់ និងម្ចាស់ស្ថានីយអនុវត្តតាមស្តង់ដាបច្ចេកទេសលក់ និងស្តុកទុកប្រេង

ក្រុមហ៊ុនឥន្ធនៈនៅរដ្ឋញូវយ៉ក រងការផាកពិន័យ ៧៥ពាន់លានដុល្លារ ក្រោយអនុម័តច្បាប់ថ្មី

ក្រុមហ៊ុនជីករ៉ែធំបំផុតនៅចិន ត្រៀមចាយលុយ ២៤ពាន់លានដុល្លារ វិនិយោគលើគម្រោងកែច្នៃប្រេងឥន្ធនៈ

លោក ចាន់ សុផល៖ អ្នកប្រើប្រេងសាំងអាចបន្ថយ ឬផ្អាកបាន ប៉ុន្ដែអ្នកប្រើម៉ាស៊ូតពិបាកកាត់បន្ថយ

អភិបាលខេត្តកំពង់ធំ ណែនាំឱ្យម្ចាស់ស្ថានីយទប់ស្កាត់ការទិញប្រេងទ្រង់ទ្រាយធំយកទៅស្តុកទុក