កាលថ្ងៃទី២១ ខែសីហា លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម បានលើកឡើងថា គិតមកដល់ពេលនេះគឺគម្រប់រយៈពេល ១ឆ្នាំ នៃការចូលកាន់តំណែងរបស់រាជរដ្ឋាភិបាល នីតិកាលទី៧ នៃរដ្ឋសភា ហើយដែលបានដាក់ឱ្យអនុវត្តនូវយុទ្ធសាស្ត្របញ្ចកោណ ដំណាក់កាលទី១ ដើម្បី កំណើន ការងារ សមធម៌ ប្រសិទ្ធភាព និងចីរភាព ព្រមទាំងបានកំណត់វិស័យអាទិភាពគន្លឹះចំនួន ៥គឺ៖ មនុស្យ ផ្លូវ ទឹក ភ្លើង និងបច្ចេកវិទ្យា។ 

តាមដានជាមួយយើង៖ Million Times

លោកបញ្ជាក់ឱ្យដឹងថា ក្រសួងធនធានទឹក បានកំណត់នូវចក្ខុវិស័យសម្រាប់ការដឹកនាំ និងបានដាក់ចេញនូវផែនការយុទ្ធសាស្ត្រត្រឹមត្រូវច្បាស់លាស់សម្រាប់អនុវត្ត ដោយបានកំណត់នូវអាទិភាពការងារ និងបានរៀបចំជាផែនការយុទ្ធសាស្ត្រ ផែនការសកម្មភាព និងមានវិធានការដោះស្រាយច្បាស់លាស់លើវិស័យធនធានទឹក និងឧតុនិយម ដើម្បីការពារ ថែរក្សាគ្រប់គ្រងដែនព្រៃលិចទឹក គ្រប់គ្រងធនធានទឹក និងអាងទន្លេ ធានាបាននូវសន្តិសុខទឹក សំដៅចូលរួមចំណែកក្នុងការទ្រទ្រង់និងអភិវឌ្ឍន៍សេដ្ឋកិច្ចជាតិលើគ្រប់វិស័យ ដើម្បីសម្រេចបាននូវចក្ខុវិស័យកម្ពុជាជាប្រទេសមានចំណូលមធ្យមកម្រិតខ្ពស់ ឆ្នាំ២០៣០ និងជាប្រទេសមានចំណូលខ្ពស់ឆ្នាំ២០៥០។

ទន្ទឹមនឹងនេះ លោករដ្ឋមន្ត្រីបានសង្កត់ធ្ងន់ពីការងារឆ្លើយតបភ្លាមៗ ចំពោះបញ្ហាទឹកជំនន់ទឹកភ្លៀង និងគ្រោះរាំងស្ងួតនៅតាមបណ្តាខេត្តមួយចំនួន ដោយបានសហការយ៉ាងល្អជាមួយស្ថាប័នពាក់ព័ន្ធ និងអាជ្ញាធរមូលដ្ឋានគ្រប់លំដាប់ថ្នាក់។ 

លោកបានគូសបញ្ជាក់ថា លទ្ធផលការងារដែលសម្រេចបានរយៈពេល ១ឆ្នាំនេះនឹងក្លាយជាកម្លាំងចលករជំរុញការលើកទឹកចិត្តដល់ថ្នាក់ដឹកនាំ និងមន្ត្រីរាជការរបស់ក្រសួងធនធានទឹក និងឧតុនិយម ព្រមទាំងក្រសួង-ស្ថាប័នពាក់ព័ន្ធនានា ក៏ដូចជាដៃគូអភិវឌ្ឍន៍ ដើម្បីបន្តអនុវត្តផែនការការងារ សំដៅរួមចំណែកដល់ការអនុវត្តឱ្យបានជោគជ័យនូវផែនការយុទ្ធសាស្ត្រអភិវឌ្ឍន៍លើវិស័យធនធានទឹក និងឧតុនិយម ក៏ដូចជាយុទ្ធសាស្ត្របញ្ចកោណដំណាក់កាលទី១ របស់រាជរដ្ឋាភិបាលនីតិកាលទី៧ នៃរដ្ឋសភា៕

អត្ថបទ៖ សេដ្ឋានី រូបភាព៖ ក្រសួងធនធានទឹក

The post មួយឆ្នាំពេញ ក្រសួងធនធានទឹកបង្កើនលទ្ធភាពនៃការផ្គត់ផ្គង់ទឹកស្រោចស្រពបានជាង ៣០០០០ហិកតា appeared first on Millions times.

ក្នុងកិច្ចប្រជុំអន្តរក្រសួងលើកដំបូងរបស់សមាជិកនៃគណៈកម្មាធិការជាតិគ្រប់គ្រងអាងទន្លេ កាលពីថ្ងៃចន្ទសប្តាហ៍នេះ លោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងជាប្រធានគណៈកម្មាធិការជាតិគ្រប់គ្រងអាងទន្លេ បានសង្កត់ធ្ងន់ថា ការងារគ្រប់គ្រងអាងទន្លេទាមទារឱ្យមានការចូលរួមពីអន្តរក្រសួង និងភាគីពាក់ព័ន្ធពីវិស័យផ្សេងៗ រួមទាំងទីភ្នាក់ងាររដ្ឋាភិបាលថ្នាក់ជាតិ និងថ្នាក់ក្រោមជាតិ សហគមន៍មូលដ្ឋាន អង្គការមិនមែនរដ្ឋាភិបាល វិស័យឯកជន និងដៃគូអភិវឌ្ឍន៍នានា ដើម្បីពិភាក្សា ធ្វើផែនការ ស្វែងរកដំណោះស្រាយ និងពង្រឹងយន្តការសម្របសម្រួលធានាដល់ការអនុវត្តគោលនយោបាយ និងកម្មវិធីប្រកបដោយប្រសិទ្ធភាព និងគ្រប់ជ្រុងជ្រោយ។

តាមដានជាមួយយើង៖ Million Times

សូមជម្រាបថា ផ្លូវទឹកនៅកម្ពុជាមាន សមុទ្រ ទន្លេ ស្ទឹង បឹង ព្រែក អូរ ដែលចែកចេញ ជា ៣៩អាងទន្លេ/ស្ទឹង និងមាន ៧តំបន់៖ ១- តំបន់មាត់សមុទ្រ ២-តំបន់ទន្លេបាសាក់ ៣-តំបន់ទន្លេសាប ៤-តំបនទន្លេភាគឦសាន ៥-តំបន់មេគង្គលើ ៦-តំបន់ភាគអាគ្នេយ៍ និង៧- តំបន់ដីសណ្តមេគង្គក្រោម។ អាងទន្លេទាំងអស់ត្រូវមានការគ្រប់គ្រងប្រព័ន្ធផ្លូវទឹក ដែលមានសត្តានុពលធនធានទឹកដ៏ធំធេងបម្រើលើការអភិវឌ្ឍសង្គមសេដ្ឋកិច្ច និងចិញ្ចឹមជីវិតរបស់សហគមន៍នៅក្នុងតំបន់។

បើតាមក្រសួងធនធានទឹក ការគ្រប់គ្រងប្រព័ន្ធផ្លូវទឹក សំដៅលើការត្រួតពិនិត្យរំហូរទឹក និងការគាំពារប្រព័ន្ធផ្លូវទឹកឱ្យមានតុល្យភាព ដើម្បីធានានូវសុខភាពផ្លូវទឹក ក្នុងគោលដៅបម្រើផលប្រយោជន៍សាធារណៈ។ សម្រាប់សុខភាពប្រព័ន្ធផ្លូវទឹកមានសារៈសំខាន់ណាស់ចំពោះបរិស្ថាន និងសុខុមាលភាពដល់ជីវិតរស់នៅរបស់មនុស្ស សត្វ និងរុក្ខជាតិ។

លើសពីនេះ ការគ្រប់គ្រងប្រព័ន្ធផ្លូវទឹកផ្តល់ជាប្រភពទឹកស្អាតសម្រាប់ប្រើប្រាស់ ជីវចម្រុះ ជលផល និងទីជម្រក សន្តិសុខស្បៀង សង្គមសេដ្ឋកិច្ច វប្បធម៌ និងទេសចរណ៍៕

អត្ថបទ៖ សេដ្ឋានី រូបភាព៖ ក្រសួងធនធានទឹក

The post ការគ្រប់គ្រងអាងទន្លេធានាបាននូវអត្ថប្រយោជន៍រួមដល់ប្រព័ន្ធអេកូឡូស៊ី និងសង្គម-សេដ្ឋកិច្ច appeared first on Millions times.

លោក ថោ ជេដ្ឋា រដ្ឋមន្រ្តីក្រសួងធនធានទឹក និងឧតុនិយម ក្នុងពេលចុះពិនិត្យប្រឡាយ៩៨ នាពេលកន្លងទៅបានថ្លែងថា៖ «បច្ចុប្បន្ន ប្រឡាយ ៩៨ នេះមាននាទីជាផ្លូវទឹកដឹកទំនិញ ទៅមកជាមួយប្រទេសវៀតណាម និងមានកំពង់ផែដឹកទំនិញរបស់ក្រុមហ៊ុន ជីបម៉ុង កំពង់ដំណេីរការដឹកគ្រឿងសំណង់មកពីប្រទេសវៀតណាម»។

តាមដានជាមួយយើង៖ Million Times

លោកបន្តថា ប្រឡាយ៩៨ មានប្រវែង ៤៦គីឡូម៉ែត្រ បានទទួលប្រភពទឹកពីស្ទឹងតាកែវ ហើយត្រូវបានជួសជុល និងស្តារឡើងវិញក្នុងឆ្នាំ១៩៩៦ ដោយកម្មវិធីប្រាសាក់២។ ប្រព័ន្ធប្រឡាយ៩៨ មានប្រឡាយរងចំនួន ៣០ខ្សែ ប្រវែង ១៣០គីឡូម៉ែត្រ ប្រព័ន្ធនេះគ្របដណ្តប់លើភូមិចំនួន៤៩ នៃឃុំចំនួន១២ ក្នុងស្រុកចំនួន៣ នៃខេត្តតាកែវ រួមមាន ស្រុកបុរីជលសារ ស្រុកកោះអណ្តែត និងស្រុកគិរីវង់ ព្រមទាំងមានសក្តានុពលស្រោចស្រពលើផ្ទៃដីបង្កបង្កើន ផលសរុប ១៥០០០ហិកតា ដោយបងប្អូនប្រជាកសិករអាចបង្កបង្កើនផលបាន៣ដងក្នុង១ឆ្នាំ។

បើតាមលោករដ្ឋមន្រ្តី ប្រឡាយ៩៨ តភ្ជាប់ទៅប្រឡាយមេព្រៃទន្លេ (តន់ហន់) ស្ថិតនៅក្នុងឃុំព្រៃទន្លេ ស្រុកបន្ទាយមាស ខេត្តកំពត ជាប្រព័ន្ធប្រឡាយមេព្រៃទន្លេមានលក្ខណៈជាប្រព័ន្ធធារាសាស្ត្រការពារទឹកប្រៃ ដែលមានទំនប់ប្រវែង ១០៤៨ម៉ែត្រ ប្រឡាយមេ ១ខ្សែ ប្រវែង ១២៣៦៣ម៉ែត្រ និងប្រឡាយរងចំនួន ២ខ្សែ ប្រវែង ២១២៥ម៉ែត្រ។

លោកបានបញ្ជាក់ថា ប្រឡាយទាំងពីរខ្សែខាងលើនេះ អាចភ្ជាប់ទៅដល់សមុទ្រក្នុងខេត្តកែបផងដែរ ប្រសិនបើធ្វេីការស្តារប្រឡាយឲ្យជ្រៅបន្ថែមទៀត ជាពិសេសត្រង់ចំណុចមួយចំនួន ដែលមានស្ថានដីខ្ពស់៕

អត្ថបទ៖ សេដ្ឋានី រូបភាព៖ ក្រសួងធនធានទឹក

The post ក្រុមហ៊ុនជីប ម៉ុង កំពុងប្រើប្រាស់ប្រឡាយ៩៨ ដឹកគ្រឿងសំណង់ពីវៀតណាម មកកម្ពុជា appeared first on Millions times.

ដើម្បីជំរុញការងារសាងសង់ រដ្ឋមន្រ្តីចំនួន២រូបបានពួតដៃគ្នាពិភាក្សាលម្អិតពាក់ព័ន្ធនឹងលក្ខណៈបច្ចេកទេសនៃគម្រោងព្រែកជីកហ្វូណនតេជោ គឺលោក ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម និងលោក ប៉េង ពោធិ៍នា រដ្ឋមន្ត្រីក្រសួងសាធារណការ និងដឹកជញ្ជូន កាលថ្ងៃទី៣១ ខែឧសភា ឆ្នាំ២០២៤។

តាមដានជាមួយយើង៖ Million Times

កិច្ចប្រជុំនេះដើម្បីពិនិត្យ និងពិភាក្សាលើការងារបច្ចេកទេស ព្រមទាំងពង្រឹងបន្ថែមនូវកិច្ចសហការរវាងក្រសួងទាំងពីរលើការងារបច្ចេកទេស ក្នុងការអនុវត្តគម្រោងព្រែកជីកហ្វូណនតេជោឱ្យទទួលបាននូវប្រសិទ្ធភាព បម្រើផលប្រយោជន៍របស់ប្រជាជន និងសង្គមជាតិ។

សូមជម្រាបថា ក្រុមហ៊ុនសាជីវកម្មប្រឹក្សាវិស្វកម្មអន្តរជាតិចិន CIECC បានសិក្សាអំពីភូមិសាស្រ្តនៃតម្រាយខ្សែផ្លូវទឹកធម្មជាតិរបស់គម្រោង ដែលជាតម្រាវផ្លូវទឹកបុរាណបានបន្សល់ទុកស្រាប់ និងធ្លាប់បានប្រើប្រាស់តាំងពីអាណាចក្រហ្វូណន លទ្ធផលនៃការសិក្សាលើគ្រប់បច្ចេកទេសពាក់ព័ន្ធរួមមាន ការរចនាប្លង់សាងសង់ផ្លូវទឹក វិភាគជលសាស្រ្ត បរិស្ថាន សេដ្ឋកិច្ចសង្គម វិស្វកម្មបូមស្តារព្រែកជីក និងគ្រប់ទិដ្ឋភាពជំនាញបច្ចេកទេសលើគ្រប់វិស័យដែលពាក់ព័ន្ធ។ 

តាមរយៈសន្ទះផ្លូវទឹកចំនួន ៣កន្លែង ដែលគ្រោងនឹងសាងសសង់ស្ថិតនៅខេត្តកណ្តាល ខេត្តតាកែវ និងខេត្តកែប អាចធានាបាននូវប្រសិទ្ធភាពក្នុងការទប់ស្កាត់ការជ្រៀតចូលនៃទឹកប្រៃទៅក្នុងបណ្តាញផ្លូវទឹកសាប និងអាចកំណត់បរិមាណនិងអត្រានៃរំហូរទឹកសាបដែលត្រូវហូរចេញទៅសមុទ្របានផងដែរ ដែលមិនអាចបង្ករឱ្យមានផលប៉ះពាល់លើផ្នែកបរិស្ថានឡើយ ប៉ុន្តែផ្ទុយទៅវិញគម្រោងនេះនឹងជួយរក្សាលំនឹងចីរភាពបរិស្ថាន ប្រព័ន្ធអេកូឡូស៊ី និងបង្កើតជម្រកចម្រុះគ្រប់ប្រភេទ កាត់បន្ថយទឹកជំនន់នៅខេត្ត នៅក្នុងប្រទេសកម្ពុជា និងអាចការពារមិនឱ្យមានទឹកជំនន់ពីប្រទេសកម្ពុជាហូរចូលប្រទេសវៀតណាម។ 

ក្រុមហ៊ុន CIECC បានបញ្ជាក់ថា តាមការសិក្សាយ៉ាងលម្អិតបច្ចុប្បន្នទឹកហូរពីទន្លេមេគង្គទៅសមុទ្រមានប្រមាណ ៨០០០ម៉ែត្រគូបក្នុងមួយវិនាទី(8000m3/s) ចំពោះទន្លេបាសាក់មានទំហំ ១៤០០ម៉ែត្រគូបក្នុងមួយវិនាទី(1400m3/s) ចំណែកគម្រោងព្រែកជីកហ្វូណននឹងប្រើប្រាស់ទឹកត្រឹមតែ ៥ម៉ែត្រគូបក្នុងមួយវិនាទី(5m3/s) តែប៉ុណ្ណោះ ឬប្រមាណ ០,០៥៣%៕

អត្ថបទ៖ ផល កុសល រូបភាព៖ ក្រសួងសាធារណការ

The post រដ្ឋមន្រ្តី២រូប កំពុងពួតដៃគ្នាពិនិត្យបច្ចេកទេសសាងសង់គម្រោងព្រែកជីកហ្វូណនតេជោ appeared first on Millions times.

លទ្ធផលកិច្ចប្រជុំអន្តរក្រសួងដែលដឹកនាំដោយរដ្ឋមន្ដ្រីក្រសួងកសិកម្ម រុក្ខាប្រមាញ់ និងនេសាទ, រដ្ឋមន្ដ្រីក្រសួងអភិវឌ្ឍន៍ជនបទ និងរដ្ឋមន្ដ្រីក្រសួងធនធានទឹក និងឧតុនិយម កាលថ្ងៃចន្ទ ទី៦ ខែឧសភានេះ បានព្រមព្រៀងគ្នាជាគោលការណ៍ និងបានដាក់ចេញនូវចំណុច សំខាន់ចំនួន ៤ រួមមាន៖ 

១. កំណត់គោលដៅយុទ្ធសាស្ត្រ  ដែលជាអាទិភាពរួមរបស់ក្រសួងទាំង ៣ ហើយដាក់ធនធានរួមគ្នា ដើម្បីសហការអនុវត្តឱ្យបានជោគជ័យ។ 

២.  ប្រឹក្សាយោបល់ជាមួយគ្នា តាមជំនាញ និងវិស័យរៀងៗខ្លួនឱ្យបានទៀងទាត់ និងជាប់លាប់ ដើម្បីបង្ការ និង ទម្លុះនូវភាពរាំងស្ទះទាំងឡាយ  ហើយឈានទៅសម្រេចបាននូវគោលដៅដែលបានកំណត់។ 

៣. ផ្សារភ្ជាប់គម្រោង និងកម្មវិធីគោលនយោបាយ ដែលពាក់ព័ន្ធនឹងសហគមន៍របស់ក្រសួងទាំង ៣ ដូចជាសហគមន៍កសិកម្មទំនើបរបស់ក្រសួងកសិកម្ម សហគមន៍ប្រើប្រាស់ទឹករបស់ក្រសួងធនធានទឹក និងគម្រោងភូមិគំរូរបស់ក្រសួងអភិវឌ្ឍន៍ជនបទ ធ្វើយ៉ាងណាជួយដល់ប្រជាពលរដ្ឋនៅតាមមូលដ្ឋានទទួលបានអត្ថប្រយោជន៍ជា អតិបរមា។ 

៤. ឯកភាពជាគោលការណ៍ បង្កើតក្រុមការងារអន្ដរក្រសួង ដើម្បីធ្វើការរួមគ្នាជាប់លាប់ និងដាក់ចេញនូវរបបប្រជុំទៀងទាត់រាល់៣ខែម្តង ដើម្បីតាមដានការងារដែលបានដាក់ចេញ និងកំណត់ផែនការងារបន្ត។ 

 សេចក្តីប្រកាសព័ត៌មានរួមគ្នា បញ្ជាក់ថា តាមរយៈកិច្ចសហប្រតិបត្តិការនេះ នឹងធ្វើឱ្យការងាររវាងក្រសួងទាំង ៣ មានភាពស៊ីចង្វាក់គ្នា ធ្វើការជាមួយគ្នាដោយតម្កល់ប្រយោជន៍ជាតិជាធំ ជួយលើកកម្ពស់ជីវភាពប្រជាជនឱ្យមានបាន មានផលចំណេញដល់កសិករ មានផ្លូវដង្ហើមសេដ្ឋកិច្ច មានប្រសិទ្ធភាពសេដ្ឋកិច្ចដល់ទីជនបទ៕

អត្ថបទ៖ ផល កុសល រូបភាព៖ ក្រសួងកសិកម្ម

The post រដ្ឋមន្ដ្រី៣រូប ប្តេជ្ញាធ្វើការដោយតម្កល់ប្រយោជន៍ជាតិជាធំលើកស្ទួយកសិកម្ម ធនធានទឹក និងអភិវឌ្ឍន៍ជនបទ  appeared first on Millions times.