ជា សិរី Archives - Millions times

ធនាគារជាតិ និងក្រសួងរៀបចំដែនដី ឯកភាពប្រែក្លាយដីឱ្យទៅជាធនាគារដី ជួយជំរុញកំណើនសេដ្ឋកិច្ចជាតិ

Vin Chang — Tue, 25 Mar 2025 02:12:58 +0000

ធនាគារជាតិនៃកម្ពុជា បានឯកភាពក្នុងការធ្វើកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ក្នុងកម្រិតសមស្របណាមួយដើម្បីជំរុញសេដ្ឋកិច្ចជាតិ ឱ្យដំណើរការបានល្អ។ ការឯកភាពនេះ ធ្វើឡើងក្នុងកិច្ចប្រជុំរវាងឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងលោកស្រី ជា សិរី ទេសាភិបាល ធនាគារជាតិនៃកម្ពុជា នាថ្ងៃទី២៤ ខែមីនា ឆ្នាំ២០២៥។

លោក សាយ សំអាល់ បានលើកឡើងថា សម្ដេច ហ៊ុន ម៉ាណែត នាយករដ្ឋមន្ត្រីតែងតែបានលើកឡើងថា «យើងទាំងអស់គ្នាត្រូវរៀបចំផ្ទះសម្បែងរបស់យើងឱ្យបានរៀបរយ ហើយមិនមានពេលវេលាណាដែលអំណោយផលដូចពេលនេះទេ ក្នុងការរៀបចំផ្ទះសម្បែងរបស់យើងឱ្យបានត្រឹមត្រូវ និងមានរបៀបរៀបរយ»។

តាមដានជាមួយយើង៖ Million Times

លោកក៏បានបង្ហាញនូវការកត់សម្គាល់ថា ជាទូទៅប្រាក់ដុល្លារ និងប្រាក់រៀល អាចដំណើរការនៅក្នុងលំហូរសេដ្ឋកិច្ចកម្ពុជានាពេលបច្ចុប្បន្ន ដែលនេះគឺជារឿងដ៏ល្អមួយសម្រាប់កម្ពុជាដែលបានដើរលើផ្លូវដ៏ត្រឹមត្រូវតាំងពីឆ្នាំ១៩៧៩ មក ។ ការសម្រួលអត្រាការប្រាក់នឹងជួយបន្ធូរដល់បំណុលឯកជន ដែលអាចឈានទៅបន្ធូរដល់បំណុលសាធារណៈផងដែរ។

ជាសំណើដល់ធនាគារជាតិនៃកម្ពុជា លោក សាយ សំអាល់ លើកឡើងថា តើធនាគារជាតិនៃកម្ពុជាអាចមានការឯកភាពសហការជាមួយក្រសួងរៀបចំដែនដីកម្រិតណាក្នុងវិស័យដីធ្លី ដើម្បីប្រែក្លាយដីឱ្យទៅជាធនាគារដី ដែលអាចជួយជំរុញកំណើនសេដ្ឋកិច្ចជាតិបានយ៉ាងល្អ។

ជាការឆ្លើយតបលោកស្រី ជា សិរី បានលើកឡើងអំពីស្ថានភាពវិស័យធនាគារ និងទំនាក់ទំនងជាមួយវិស័យសំណង់ និងអចលនទ្រព្យនៅកម្ពុជា ក្នុងនោះលោកស្រីបានផ្តាំផ្ញើដល់អ្នកដែលទទួលបានបណ្ណកម្មសិទ្ធិដីធ្លីពីរាជរដ្ឋាភិបាលហើយនោះត្រូវថែរក្សាទុកជាកេរមរតក និងសូមកុំយកទៅលក់ ឬដាក់បញ្ចាំនៅធនាគារភ្លាមៗ ហើយត្រូវប្រើប្រាស់បណ្ណកម្មសិទ្ធិនេះប្រកបដោយការទទួលខុសត្រូវ។

លោកស្រីបញ្ជាក់ថា ទំនាក់ទំនងរវាងអចលនទ្រព្យ និងធនាគារ គឺមានភាពស្អិតរមួត តាមរយៈការដាក់ទ្រព្យបញ្ចាំដើម្បីបានប្រាក់កម្ចី ហើយការឡើង ឬចុះនៃតម្លៃអចលនទ្រព្យក៏មានផលប៉ះពាល់ដល់ធនាគារដែរ ។ ជាមួយនេះ លោកស្រីក៏បានឯកភាពក្នុងការធ្វើកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ក្នុងកម្រិតសមស្របណាមួយដើម្បីជំរុញឱ្យសេដ្ឋកិច្ចជាតិដំណើរការល្អផងដែរ។

ក្នុងជំនួបនេះដែរ ថ្នាក់ដឹកនាំស្ថាប័នទាំងពីរបានពិភាក្សាអំពីស្ថានភាពវិស័យធនាគារ និងទំនាក់ទំនងជាមួយវិស័យសំណង់ និងអចលនទ្រព្យ និងការប្រើប្រាស់បច្ចេកវិទ្យាប្លុកឆេនតាមរយៈប្រព័ន្ធបាគង ដើម្បីសម្រួលដល់ការផ្ទេរបណ្ណកម្មសិទ្ធិ ក៏ដូចជាការដាក់បន្ទុក និងការដោះបន្ទុកអចលនទ្រព្យក្នុងវិស័យធនាគារ ក្នុងគោលបំណងសម្រួលដល់ការគ្រប់គ្រង និងការប្រើប្រាស់បណ្ណអចលនទ្រព្យឱ្យមានប្រសិទ្ធភាព និងតម្លាភាព ស្របតាមគោលនយោបាយរបស់រាជរដ្ឋាភិបាលក្នុងការអភិវឌ្ឍសេដ្ឋកិច្ចនិងសង្គមឌីជីថល។

ដើម្បីពង្រឹងកិច្ចសហការនេះ ភាគីទាំងពីរក៏បានឯកភាពក្នុងការរៀបចំក្រុមការងារសម្រាប់សិក្សាលើការធ្វើសន្ធានកម្មប្រព័ន្ធបាគងជាមួយប្រព័ន្ធគ្រប់គ្រងទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ និងសិក្សាបន្ថែមលើក្របខ័ណ្ឌច្បាប់និងបទប្បញ្ញត្តិពាក់ព័ន្ធនានា៕

អត្ថបទ៖ ពិសិដ្ឋ រូបភាព៖ Page NBC

The post ធនាគារជាតិ និងក្រសួងរៀបចំដែនដី ឯកភាពប្រែក្លាយដីឱ្យទៅជាធនាគារដី ជួយជំរុញកំណើនសេដ្ឋកិច្ចជាតិ appeared first on Millions times.

ធនាគារកណ្តាលម៉ាដាហ្គាស្កា សរសើរប្រព័ន្ធទូទាត់បាគងរបស់ធនាគារជាតិកម្ពុជា

Vin Chang — Wed, 19 Feb 2025 07:36:03 +0000

ធនាគារជាតិកម្ពុជា និងធនាគារកណ្ដាលនៃប្រទេសម៉ាដាហ្គាស្កា កាលពីល្ងាចថ្ងៃ១៨ ខែកុម្ភៈ ឆ្នាំ ២០២៥ បានចុះអនុស្សរណៈយោគយល់ (MOU) ដើម្បីផ្ដល់លទ្ធភាពដល់សមភាគីម៉ាដាហ្គាស្កា សិក្សាស្វែងយល់ពីប្រតិបត្តិការប្រព័ន្ធបាគង ការគ្រប់គ្រងទុនបម្រុងអន្តរជាតិ និងការអនុវត្តនយោបាយរូបិយវត្ថុកម្ពុជា។

តាមដានជាមួយយើង៖ Million Times

ការចុះអនុស្សរណៈយោគយល់ទ្វេភាគីនេះ ធ្វើឡើងដោយលោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា និងលោក Hon. Aivo H. Andrianarivelo ទេសាភិបាលធនាគារកណ្ដាលម៉ាដាហ្គាស្កា។ MOU រវាងធនាគារជាតិកម្ពុជា និងធនាគារកណ្ដាលនៃប្រទេសម៉ាដាហ្គាស្កា ធ្វើឡើងដើម្បីបង្កើតក្របខ័ណ្ឌកិច្ចសហប្រតិបត្តិការ រវាងធនាគារកណ្ដាលនៃប្រទេសទាំង ២ ដោយផ្ដោតលើគម្រោងសិក្សាស្រាវជ្រាវ គម្រោងតភ្ជាប់ និងនវានុវត្តន៍ហិរញ្ញវត្ថុ ជាពិសេសប្រព័ន្ធទូទាត់បាគង។

ទេសាភិបាលធនាគារកណ្ដាលម៉ាដាហ្គាស្កា បានសរសើរ និងវាយតម្លៃខ្ពស់ ចំពោះការអភិវឌ្ឍសេដ្ឋកិច្ច និងប្រព័ន្ធធនាគារកម្ពុជា ជាពិសេសប្រព័ន្ធទូទាត់បាគង ព្រមទាំងការគរពូនទុនបម្រុងអន្តរជាតិ។ លោក Hon. Aivo H. Andrianarivelo ក៏បានបង្ហាញសុទិដ្ឋិនិយម ចំពោះកិច្ចសហប្រតិបត្តិការជាមួយធនាគារជាតិនៃកម្ពុជា ដែលនឹងផ្ដល់អត្ថប្រយោជន៍ទៅវិញទៅមក ទាំងផ្នែកសេដ្ឋកិច្ច និងផ្នែកសង្គម។

ទេសាភិបាលធនាគារជាតិនៃកម្ពុជា ក៏បានផ្ដល់បដិសណ្ឋារកិច្ច និងបង្ហាញការស្វាគមន៍យ៉ាងកក់ក្ដៅដល់គណៈប្រតិភូធនាគារកណ្ដាលម៉ាដាហ្គាស្កា ដែលចាប់អារម្មណ៍សិក្សាស្វែងយល់ពីប្រព័ន្ធប្រតិបត្តិការធនាគារកណ្ដាលរបស់ធនាគារជាតិនៃកម្ពុជា ជាពិសេសប្រព័ន្ធទូទាត់បាគង។ លោកស្រីបណ្ឌិត ជា សិរី ក៏បានបង្ហាញការតាំងចិត្តថានឹងបង្កើនកិច្ចសហប្រតិបត្តិទ្វេភាគីកាន់តែប្រសើរថែមទៀត។

លើសពីនេះ បណ្ឌិត ជា សិរី ក៏បានប្រាប់ដល់សមភាគីម៉ាដាហ្គាស្កាផងដែរអំពីវឌ្ឍនភាពការងាររបស់ធនាគារជាតិនៃកម្ពុជា ដែលមានប្រទេសជាច្រើនបានមកសិក្សាស្វែងយល់ពីបទពិសោធន៍លើការអភិវឌ្ឍប្រព័ន្ធបាគង និងការតភ្ជាប់ប្រព័ន្ធទូទាត់ជាមួយប្រទេសនានាជាច្រើន ហើយរំពឹងថានឹងអាចតភ្ជាប់ប្រព័ន្ធទូទាត់ឆ្លងដែនជាមួយ ម៉ាដាហ្គាស្កា នាពេលខាងមុខ៕

អត្ថបទ៖ មេរ៉ា, រូបភាព៖ ធនាគារជាតិនៃកម្ពុជា

The post ធនាគារកណ្តាលម៉ាដាហ្គាស្កា សរសើរប្រព័ន្ធទូទាត់បាគងរបស់ធនាគារជាតិកម្ពុជា appeared first on Millions times.

ឥឡូវអ្នកខ្ចីពីបុរីក្នុងអាត្រាការប្រាក់ខ្ពស់ អាចផ្ទេរបំណុលទៅគ្រឹះស្ថានធនាគារវិញក្នុងអាត្រាការប្រាក់ទាប

Vin Chang — Sat, 04 Jan 2025 06:47:36 +0000

អគ្គទេសាភិបាលធនាគារជាតិនៃកម្ពុជាលោកជំទាវ ជា សិរី បានចូលរួមកិច្ចប្រជុំមួយ ដែលធ្វើឡើងនៅក្រសួងរៀបចំដែនដី នគរូបនីយកម្ម និងសំណង់ ក្នុងគោលបំណងជួយសម្របសម្រួលបំណុលរបស់អតិថិជនដែលទិញផ្ទះពីបុរី អាចផ្ទេរបំណុលទៅគ្រឹះស្ថានធនាគារវិញបាន។

តាមដានជាមួយយើង៖ Million Times

លោកជំទាវបណ្ឌិត ជា សិរី បានបញ្ជាក់ឲ្យដឹងថា ការចូលរួមប្រជុំនៅក្រសួងរៀបចំដែនដី នគរូបនីយកម្ម និងសំណង់ ជាមួយវិស័យអចលនទ្រព្យ ព្រមទាំងតំណាងគ្រឹះស្ថានធនាគារ និងហិរញ្ញវត្ថុ ក្រោមការដឹកនាំលោក សាយ សំអាល់ រដ្ឋមន្រ្តីក្រសួង រៀបចំដែនដី នគរូបនីយកម្ម និងសំណង់ សម្រេចបានផ្លែផ្កា និងជួយសម្រួលបានទាំងខាងកូនបំណុល និងម្ចាស់បំណុល។

កិច្ចប្រជុំនោះ មានគោលបំណង សម្របសម្រួលជាមួយភាគីពាក់ព័ន្ធ ឲ្យអតិថិជនដែលបានខ្ចីពីម្ចាស់បុរី ក្នុងអាត្រាការប្រាក់ខ្ពស់ អាចផ្ទេរបំណុល ទៅជាមួយគ្រឹះស្ថានធនាគារវិញក្នុងអាត្រាការប្រាក់មួយដែលទាបជាងខាងបុរី។ នោះមានន័យថា ធនាគារនឹងសងលុយទៅម្ចាស់បុរី ជំនួសអតិថិជន ប៉ុន្តែអតិថិជននៅតែបន្តសងបំណុលទៅឲ្យធនាគារវិញក្នុងលក្ខខ័ណធូរស្រាលជាងមុន។

នៅក្នុងកិច្ចសម្របសម្រួលនេះ នឹងជួយម្ចាស់បុរីដែលជាប់គាំងទុនបង្វិល បានលុយដុំមកវិញ ដើម្បីបន្តការអភិវឌ្ឍរបស់ពួកគាត់ ហើយក៏នឹងជួយអតិថិជនឲ្យទទួលបានឥណទានផ្ទះពីគ្រឹះស្ថានធនាគារ ដែលជាទូទៅមានការប្រាក់ទាបជាង និងមានរយៈពេលយូរជាងរហូតដល់ ២៥ ឆ្នាំ ឬ ៣០ឆ្នាំ។

ការប្រជុំដ៏សំខាន់ដែលមានទាំងអគ្គទេសាភិបាលធនាគារជាតិនៃកម្ពុជា ជា សិរី លោកអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា ខាងគណៈកម្មការប្រតិបត្តិនៃសមាគមអ្នកសាងសង់កម្ពុជា ផ្នែកអចលនទ្រព្យ និងផ្នែកពាក់ព័ន្ធជាច្រើនទៀត បានធ្វើឡើងកាលពីថ្ងៃ ៣ មករា ឆ្នាំ ២០២៥៕

អត្ថបទ៖ មេរ៉ា, រូបភាព៖ ក្រសួងរៀបចំដែនដី នគរូបនីយកម្ម និងសំណង់

The post ឥឡូវអ្នកខ្ចីពីបុរីក្នុងអាត្រាការប្រាក់ខ្ពស់ អាចផ្ទេរបំណុលទៅគ្រឹះស្ថានធនាគារវិញក្នុងអាត្រាការប្រាក់ទាប appeared first on Millions times.

លោកស្រី ជា សិរី៖ ឆ្នាំ២០២៥ ធនាគារកណ្តាលនៃប្រទេសកំពុងអភិវឌ្ឍន៍មានសម្ពាធកើតឡើងមកពីមុខព្រួញចំនួនពីរ

Vin Chang — Fri, 06 Dec 2024 08:17:38 +0000

លោក ជា សិរី ទេសាភិបាល ធនាគារជាតិនៃកម្ពុជា បានគូសបញ្ជាក់ពីសម្ពាធលើឯករាជ្យភាពរបស់ធនាគារកណ្តាល ក្នុងការអនុវត្តនិងដឹកនាំនយោបាយរូបិយវត្ថុ ពិសេសសម្រាប់ធនាគារកណ្តាលនៃប្រទេសកំពុងអភិវឌ្ឍន៍ ហើយសម្ពាធនេះបានកើតឡើងមកពីមុខព្រួញចំនួនពីរ។

ក្នុងសន្និសីទថ្នាក់ទេសាភិបាលធនាគារកណ្តាលនៃបណ្តាប្រទេសជាសមាជិកមជ្ឈមណ្ឌលស៊ាសិន លើកទី៦០ នាថ្ងៃទី៦ ខែធ្នូ ឆ្នាំ២០២៤ នៅទីក្រុងសេអ៊ូល ប្រទេសកូរ៉េ ដែលផ្តោតលើប្រធានបទសំខាន់ៗដែលកើតឡើងជុំវិញពិភពលោក។ សម្រាប់ឆ្នាំ២០២៤នេះ អង្គសន្និសីទបានពិភាក្សាអំពីជោគវាសនានៃសេដ្ឋកិច្ច និងទីផ្សារហិរញ្ញវត្ថុពិភពលោកក្នុងឆ្នាំ២០២៥ខាងមុខ ក៏ដូចជាផលប៉ះពាល់នៃការបែងចែកសេដ្ឋកិច្ចនៃប្រទេសក្នុងតំបន់អាស៊ីទៅជាតំបន់សេដ្ឋកិច្ចតាមសក្តានុពលផ្សេងៗគ្នា។

តាមដានជាមួយយើង៖ Million Times

នៅចំពោះមុខវាគ្មិន និងគណៈប្រតិភូមកពីធនាគារកណ្តាលនៃបណ្តាប្រទេសជាសមាជិកចំនួន ១៨ ផ្សេងទៀត លោកស្រី ជា សិរី ទេសាភិបាលធនាគារជាតិនៃកម្ពុជា បានលើកឡើងពីសម្ពាធលើឯករាជ្យភាពរបស់ធនាគារកណ្តាល ក្នុងការអនុវត្តនិងដឹកនាំនយោបាយរូបិយវត្ថុ ជាពិសេសធនាគារកណ្តាលនៃប្រទេសកំពុងអភិវឌ្ឍន៍ ហើយសម្ពាធនេះបានកើតឡើងមកពីមុខព្រួញចំនួនពីរ។

បើតាមការលើកឡើងរបស់លោកស្រី មុខព្រួញទី១ គឺការទប់ស្កាត់ការកើនឡើងនៃអតិផរណាដ៏ខ្ពស់ ដែលកើតឡើងដោយសារកត្តាអាក់ខានក្នុងការផ្គត់ផ្គង់ក្នុងបរិការណ៍នៃសង្រ្គាមនិងជម្លោះភូមិសាស្រ្តនយោបាយ។ ក្នុងមុខព្រួញនេះ ធនាគារកណ្តាលភាគច្រើនត្រូវបង្ខំចិត្តដំឡើងអត្រាការប្រាក់ ដើម្បីកាត់បន្ថយសម្ពាធអតិផរណា។ ជាផលវិបាក វិធានការនេះបានដាក់សម្ពាធបន្ថែមលើកំណើនសេដ្ឋកិច្ចកំពុងមានល្បឿនយឺតស្រាប់។

មុខព្រួញទី២ ធនាគារកណ្តាលក្នុងប្រទេសកំពុងលូតលាស់និងកំពុងអភិវឌ្ឍន៍ ត្រូវបង្ខំចិត្តកែសម្រួលនយោបាយរូបិយវត្ថុ ជាពិសេស អត្រាការប្រាក់គោល ឱ្យស្របតាមជំហរនយោបាយរូបិយវត្ថុរបស់ប្រទេសដែលមានសេដ្ឋកិច្ចជឿនលឿន ដូចជា សហរដ្ឋអាមេរិក ដើម្បីរក្សាស្ថិរភាពអត្រាប្តូរប្រាក់ បើទោះបីជាអតិផរណានៅប្រទេសទាំងនោះស្ថិតនៅកម្រិតទាបក្តី។ វិធានការសម្រួលនយោបាយរូបិយវត្ថុនេះនឹងដាក់សម្ពាធលើកិច្ចខំប្រឹងប្រែងដើម្បីជំរុញកំណើន។

ទន្ទឹមនេះ លោកស្រីក៏បានលើកឡើងពីអនុសាសន៍ជាគោលនយោបាយ សម្រាប់ជំរុញកំណើនក្នុងស្ថានភាពមិនច្បាស់លាស់នៃសេដ្ឋកិច្ចពិភពលោកនាពេលបច្ចុប្បន្ន តាមរយៈការលើកកម្ពស់ផលិតភាព ជាពិសេស ការចាប់យកបច្ចេកវិទ្យានិងនវានុវត្តន៍ ដូចជា បញ្ញាសិប្បនិម្មិត្ត (AI) និងការប្រែក្លាយទៅជាសេដ្ឋកិច្ចបៃតងជាដើម៕

អត្ថបទ៖ សាងតេជៈ រូបភាព៖ ធនាគារជាតិ

The post លោកស្រី ជា សិរី៖ ឆ្នាំ២០២៥ ធនាគារកណ្តាលនៃប្រទេសកំពុងអភិវឌ្ឍន៍មានសម្ពាធកើតឡើងមកពីមុខព្រួញចំនួនពីរ appeared first on Millions times.

Bloomberg ហៅលោកស្រី ជា សិរី ពន្យល់ការវិវឌ្ឍនៃស្ថានភាពសេដ្ឋកិច្ចសាកល កត្តាប្រឈម និងការគ្រប់គ្រងអតិផរណា

Vin Chang — Wed, 23 Oct 2024 04:48:26 +0000

ថ្នាក់ដឹកនាំកំពូលៗធនាគារជាតិនៃប្រទេសចំនួន ៤ ស្ថាប័នសារព័ត៌មានសេដ្ឋកិច្ច និងហិរញ្ញវត្ថុលំដាប់ពិភពលោក Bloomberg អញ្ជើញចូលរួមជាវាគ្មិនក្នុងកិច្ចពិភាក្សាស្តីពី “ក្តីសង្ឃឹមឆ្ពោះទៅរកកំណើនខ្ពស់ឡើងវិញ៖ ការជំរុញកំណើនសេដ្ឋកិច្ច ការគ្រប់គ្រងហានិភ័យ និងការរៀបចំគោលនយោបាយសម្រាប់អនាគត” ដែលជាកម្មវិធីពិភាក្សាដំបូងគេក្នុងវេទិកានិយ័តកម្មសាកលឆ្នាំ២០២៤ (Global Regulatory Forum 2024) កាលពីព្រឹកថ្ងៃទី២២ ខែតុលា ឆ្នាំ២០២៤ នៅទីក្រុងញូវយ៉ក សហរដ្ឋអាមេរិក។

មេដឹកនាំធនាគារនៃបណ្តាប្រទេសទាំង៤ ក្នុងនោះលោកស្រី ជា សិរី ទេសាភិបាលធនាគារជាតិនៃកម្ពុជា ក៏បានអញ្ជើញចូលរួមជាវាគ្មិនជាមួយវាគ្មិនជំនាញដែលជាថ្នាក់ដឹកនាំ-មន្ត្រីជាន់ខ្ពស់មកពីធនាគារកណ្តាល និងនិយ័តករទីផ្សារមូលធននៃប្រទេសផ្សេងៗ ក្នុងនោះរួមមាន៖ ធនាគារកណ្តាលប្រទេសអូទ្រីស, ធនាគារកណ្តាលបារាំង និងទីផ្សារមូលធនអារ៉ាប៊ីសាអូឌីត។

តាមដានជាមួយយើង៖ Million Times

ធនាគារជាតិនៃកម្ពុជា បានឲ្យដឹងថា កិច្ចពិភាក្សាបានផ្តោតលើប្រធានបទសំខាន់ៗជាច្រើនរួមមាន ការវិវឌ្ឍនៃស្ថានភាពសេដ្ឋកិច្ចសាកល និងកត្តាប្រឈម ការគ្រប់គ្រងអតិផរណា និងការរក្សាស្ថិរភាពហិរញ្ញវត្ថុជាដើម។ នាឱកាសនេះ លោកស្រី ជា សិរី បានចែករំលែកទស្សនាទានអំពីដំណើរវិវឌ្ឍន៍នៃសេដ្ឋកិច្ចធំៗនៅលើពិភពលោក និងកម្រិតឥទ្ធិពលនៃការវិវឌ្ឍនោះមកលើសេដ្ឋកិច្ចប្រទេសកម្ពុជា ព្រមទាំងលក្ខណៈអំណោយផលមួយចំនួនដែលអាចនឹងមានមកលើសេដ្ឋកិច្ចកម្ពុជានាពេលខាងមុខ។

មូលនិធិរូបិយវត្ថុអន្តរជាតិ IMF បានបង្កើនការប្រមើលមើលរបស់ខ្លួនអំពីសេដ្ឋកិច្ចពិភពលោកនៅឆ្នាំនេះ ដោយចែងថា មានការលូតលាស់សេដ្ឋកិច្ចប្រកបដោយភាពធន់នាំមុខដោយសហរដ្ឋអាមេរិក និងមានអតិផរណាទាបផងដែរ។ នៅទូទាំងពិភពលោក IMF យល់ថា អតិផរណានឹងចុះថយពី ៦,៨% ក្នុងឆ្នាំ ២០២៣ មកត្រឹម ៥,៨% នៅឆ្នាំ ២០២៤ និងចំនួន ៤,៤% ក្នុងឆ្នាំ ២០២៥។ នៅក្នុងបណ្តាប្រទេសមានសេដ្ឋកិច្ចលូតលាស់បំផុត ទីភ្នាក់ងារនេះរំពឹងថា អតិផរណានឹងចុះថយនៅឆ្នាំនេះត្រឹម ២,៦% និង ២% នៅឆ្នាំក្រោយដែលធនាគារកណ្តាលសហរដ្ឋអាមេរិក និងធនាគារកណ្ដាលឯទៀតៗបានកំណត់ថាជាគោលដៅ។

ការផ្សំគ្នារវាងការលូតលាស់ជាប់លាប់និងការចុះថយនៃអតិផរណានាំឱ្យមានកំណើនសេចក្តីសង្ឃឹមសម្រាប់អ្វីដែលហៅថា «ការធ្វើឱ្យអតិផរណាធ្លាក់ចុះដោយមិនមានវិបត្តិសេដ្ឋកិច្ច» ឬ soft landing ដែលជាការចុះថយល្បឿនសេដ្ឋកិច្ចគ្រប់គ្រាន់ល្មមដើម្បីទប់ទល់នឹងអតិផរណា ដោយមិនបណ្តាលឱ្យមានវិបត្តិសេដ្ឋកិច្ច៕

អត្ថបទ៖ សេដ្ឋានី រូបភាព៖ NBC

The post Bloomberg ហៅលោកស្រី ជា សិរី ពន្យល់ការវិវឌ្ឍនៃស្ថានភាពសេដ្ឋកិច្ចសាកល កត្តាប្រឈម និងការគ្រប់គ្រងអតិផរណា appeared first on Millions times.

គម្រោងទូទាត់ឆ្លងដែន QR Code រវាងធនាគារកម្ពុជា-ម៉ាឡេស៊ី ផ្តល់ឱកាសឲ្យពាណិជ្ជករជាង ៥លានទីតាំងបង្កើនអតិថិជន

Vin Chang — Thu, 19 Sep 2024 09:36:58 +0000

នៅថ្ងៃទី១៩ ខែកញ្ញា ឆ្នាំ២០២៤នេះ ធនាគារជាតិនៃកម្ពុជា និងធនាគារកណ្ដាលម៉ាឡេស៊ី បានសម្ពោធដាក់ឱ្យដំណើរការជាផ្លូវការនូវគម្រោងទូទាត់ឆ្លងដែនតាមឃ្យូអរកូតរវាងប្រទេសកម្ពុជា និងប្រទេសម៉ាឡេស៊ី ដែលនឹងអនុញ្ញាត្តឱ្យពាណិជ្ជករជាង ៥ លានទីតាំងនៅក្នុងប្រទេសទាំងពីរអាចទទួលបានអតិថិជនកាន់តែទូលំទូលាយ។

សេចក្តីប្រកាសព័ត៌មានរបស់ធនាគារជាតិនៃកម្ពុជា គម្រោងទូទាត់ឆ្លងដែនតាមឃ្យូអរកូត នឹងផ្តល់លទ្ធភាពឱ្យអ្នកប្រើប្រាស់ និងពាណិជ្ជករទទួលបាននូវបទពិសោធន៍ទូទាត់ប្រកបដោយប្រសិទ្ធភាព ងាយស្រួល សុវត្ថិភាព ឆាប់រហ័ស និងតម្លៃសមរម្យ។

តាមដានជាមួយយើង៖ Million Times

តាមរយៈគំនិតផ្តួចផ្តើមនៃការតភ្ជាប់ការទូទាត់តាមឃ្យូអរកូតនេះ នឹងអនុញ្ញាត្តឱ្យពាណិជ្ជករជាង ៥ លានទីតាំងនៅក្នុងប្រទេសកម្ពុជា និងម៉ាឡេស៊ី ដែលភាគច្រើនជាម្ចាស់អាជីវកម្មខ្នាតតូច អាចទទួលបានអតិថិជនកាន់តែទូលំទូលាយពីប្រទេសទាំងពីរ។

នៅក្នុងដំណាក់កាលទី១ នៃការតភ្ជាប់នេះប្រជាជនកម្ពុជាអាចធ្វើការទូទាត់ទំនិញ និងសេវានៅប្រទេសម៉ាឡេស៊ីបានដោយគ្រាន់តែធ្វើការស្កេនឃ្យូអរកូត (DuitNow QR Code) ដែលតាំងបង្ហាញដោយពាណិជ្ចករតាមរយៈការប្រើប្រាស់កម្មវិធីទូទាត់បាគង (Bakong app) និងកម្មវិធីធនាគារចល័តរបស់ធនាគារមេឃប៊ែង (M2U KH app)។

សម្រាប់ដំណាក់កាលបន្ទាប់ ប្រជាជនមកពីប្រទេសម៉ាឡេស៊ីនឹងអាចធ្វើការទូទាត់ទំនិញ និងសេវាទៅកាន់ពាណិជ្ជករនៅក្នុងប្រទេសកម្ពុជាដោយស្កេនខេអេចយ្យូអរកូត (KHQR Code) តាមរយៈការប្រើប្រាស់កម្មវិធីធនាគារចល័តរបស់គ្រឹះស្ថានធនាគារជាសមាជិក។

លោកស្រី ជា សិរី ទេសាភិបាលធនាគារជាតិនៃកម្ពុជា បានលើកឡើងថា ការតភ្ជាប់ការទូទាត់ឆ្លងដែនដែលត្រូវបានដាក់ឲ្យដំណើរការថ្ងៃនេះ គឺដោយសារកិច្ចសហប្រតិបត្តិការដ៏រឹងមាំពីគ្រប់ភាគីពាក់ព័ន្ធរបស់ទាំងប្រទេសទាំងពីរ ដែលរួមទាំងធនារគារជាតិនៃកម្ពុជា ជឫមួយក្រុមហ៊ុន Paynet ធនាគារមេឃប៊ែង ដែលជាធនាគារទំនាក់ទំនងរួមទាំងគ្រឹះស្ថានជឫសមាជិកពីប្រទេសទាំងពីរផងដែរ។

លោកស្រីបានបញ្ជាក់បន្ថែមថា គំនិតផ្តួចផ្តើមនៃការតភ្ជាប់ការទូទាត់តាមយ្យូអរកូតនេះ នឹងគាំទ្រដល់សកម្មភាពពាណិជ្ជកម្ម ជំរុញវិស័យទេសចរណ៍ និងកំណើនសេដ្ឋកិច្ចនៃប្រទេសទាំងពីរ។ ការទូទាត់ឆ្លងដែននេះ ដើរតួនាទីយ៉ាងសំខាន់ក្នុងការជំរុញសកម្មភាពពាណិជ្ជកម្ម និងបរិយាបន្នហិរញ្ញវត្ថុនៅក្នុងប្រទេសទាំងពីរដែលបង្ហាញពីជំហានដ៏សំខាន់មួយឆ្ពោះទៅរកការសម្រេចបាននូវចក្ខុវិស័យនៃសហគមន៍អាស៊ាន ក្នុងការតភ្ជាប់ប្រព័ន្ធទូទាត់រាយដែលមានភាពរហ័ស ប្រសិទ្ធភាព និងសុវត្ថិភាព៕

អត្ថបទ៖ សេដ្ឋានី រូបភាព៖ ធនាគារជាតិនៃកម្ពុជា

The post គម្រោងទូទាត់ឆ្លងដែន QR Code រវាងធនាគារកម្ពុជា-ម៉ាឡេស៊ី ផ្តល់ឱកាសឲ្យពាណិជ្ជករជាង ៥លានទីតាំងបង្កើនអតិថិជន appeared first on Millions times.

ធនាគារជាតិ ត្រៀមដាក់ KHQR ស្កែនទាំងប្រាក់រៀល និងដុល្លារឲ្យប្រើប្រាស់ឆាប់ៗ

Vin Chang — Tue, 17 Sep 2024 15:09:05 +0000

នាពេលឆាប់ៗខាងមុខនេះ ធនាគារទាំងអស់នៅកម្ពុជានឹងចេញ KHQR តែមួយប៉ុណ្ណោះ ដែលអាចស្កែនបានទាំងប្រាក់រៀល និងប្រាក់ដុល្លារ ហេតុនេះចំពោះអតិថិជនណាដែលមិនមានគណនីជាប្រាក់រៀលនោះទេធនាគារនឹងបង្កើតគណនីប្រាក់រៀល ដោយស្វ័យប្រវត្តិជូនដល់អតិថិជន។

លោកស្រី ជា សិរី ទេសាភិបាលធនាគារជាតិនៃកម្ពុជា បានឲ្យដឹងថា ប៉ុន្មានថ្ងៃនេះសាធារណជនប្រតិកម្មទៅកាន់ធនាគារដែលបើកគណនីប្រាក់រៀលដោយស្វ័យប្រវត្តិ និងមិនបានជូនដំណឹងដល់អ្នកប្រើប្រាស់ជាមុន ដោយសារតែឆាប់ៗខាងមុខនេះ ធនាគារជាតិនឹងអនុញ្ញាតឲ្យប្រើប្រាស់ KHQR តែមួយប៉ុណ្ណោះ ដោយអាចស្កែនបានទាំងប្រាក់រៀល និងប្រាក់ដុល្លារ ដើម្បីផ្ដល់ភាពងាយស្រួល ជំរុញការប្រើប្រាស់ប្រាក់រៀល។

លោកស្រីពន្យល់ថា ធនាគារជាតិនឹងបង្រួម QR Code តែមួយប៉ុណ្ណោះ ដោយមានតែប្រាក់រៀលតែមួយគត់ លែងមានម្ខាងជា QR Code ប្រាក់រៀល និងម្ខាងជា QR Code ប្រាក់ដុល្លារទៀតហើយ មានតែ QR Code ប្រាក់រៀលមួយប៉ុណ្ណោះ ប៉ុន្ដែអាចស្កេនទូទាត់ ប្រតិបត្តិការបានទាំងប្រាក់ដុល្លារ និងប្រាក់រៀល។

លោកស្រីថ្លែងបញ្ជាក់ថា «ហេតុអ្វីបានជាយើងតម្រូវឲ្យបង្កើតគណនីប្រាក់រៀល? ចំពោះគណនីប្រាក់រៀលនេះ គឺតម្រូវជាដាច់ខាតឲ្យអតិថិជនទាំងអស់មាន ទោះបីជាគណីប្រាក់រៀលនេះ មិនសូវមានសកម្មភាព ក្នុងការប្រើប្រាស់ក្ដីព្រោះថា ប្រសិនបើអតិថិជនមិនព្រមបើកគណនីប្រាក់រៀលនោះទេ មានតែគណនីប្រាក់ដុល្លារតែមួយនោះការទូទាត់ការប្រើប្រាស់ទាំងឡាយណាក៏ដោយ ទាំងប្រាក់ដុល្លារ និងប្រាក់រៀល គឺមិនអាចដំណើរការបានឡើយ មានន័យថា យើងអាចប្រតិបត្តិការបានលុះត្រាអ្នកប្រើប្រាស់មានគណនីជាប្រាក់រៀល និងប្រាក់ដុល្លារ»។

បើតាមលោកស្រីទេសាទភិបាល គោលបំណងសំខាន់ក្នុងការតម្រូវ និងបើកគណនីប្រាក់រៀល ជូនដល់សាធារណជននេះគឺ ជំរុញការប្រើប្រាស់ប្រាក់រៀល សម្រួលការទូទាត់ក្នុងស្រុក ក៏ដូចជាការទូទាត់ឆ្លងដែន បង្រួមការប្រើប្រាស់ QR Code ច្រើនលើកកម្ពស់វិស័យទេសចរណ៍ ផ្ដល់ភាពងាយស្រួល ដល់ទេសចរណ៍ក្នុងការទូទាត់ប្រាក់។

ធនាគារជាតិនៃកម្ពុជា បានចេញសេចក្ដីណែនាំដល់គ្រឹះស្ថានធនាគារទាំងអស់ឲ្យដឹងថា ចំពោះគណនីប្រាក់រៀលធនាគារជាតិនៃកម្ពុជា តម្រូវឲ្យបើកជូនដល់អតិថិជន ដែលមិនទាន់មានគណនីប្រាក់រៀលនេះ គឺមិនតម្រូវឲ្យមានការយកសេវាណាមួយពីអតិថិជន ដែលប្រើប្រាស់គណនីប្រាក់រៀលនោះឡើយ ទោះបីជាគណនីប្រាក់រៀលនេះ មិនសូវសកម្ម អសកម្ម ឬក៏អតិថិជនត្រូវបិទគណនីប្រាក់រៀលនេះចោលក៏ដោយ ក៏មិនតម្រូវឲ្យមានការគិត ឬកាត់កម្រៃនៃការប្រើប្រាស់ពីអតិថិជនឡើយ៕

អត្ថបទ៖ សេដ្ឋានី

The post ធនាគារជាតិ ត្រៀមដាក់ KHQR ស្កែនទាំងប្រាក់រៀល និងដុល្លារឲ្យប្រើប្រាស់ឆាប់ៗ appeared first on Millions times.

ការទទួលបានសេវាហិរញ្ញវត្ថុផ្លូវការនៅតែជាបញ្ហាប្រឈមសម្រាប់ម្ចាស់អាជីវកម្មក្រៅប្រព័ន្ធ

Vin Chang — Fri, 19 Jul 2024 01:17:50 +0000

ម្ចាស់អាជីវកម្មក្នុងសេដ្ឋកិច្ចក្រៅប្រព័ន្ធនៅតែជួបបញ្ហាប្រឈមក្នុងការទទួលបានសេវាហិរញ្ញវត្ថុផ្លូវការពីគ្រឹះស្ថានធនគារ និងហិរញ្ញវត្ថុ ដោយសារកង្វះអនុលោមភាព។ ដើម្បីដោះស្រាយបញ្ហាប្រឈមនិងឆ្លើយតបទៅនឹងបញ្ហាប្រឈមនិងភាពជាក់ស្ដែងទាំងនោះ គណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ (គ.ស.អ.ស.ក) បានស្នើឲ្យធនាគារជាតិនៃកម្ពុជា ចូលរួមអនុវត្តយុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ និងកិច្ចសហការគាំទ្រការលើកកម្ពស់ការប្រើប្រាស់សេវាធនាគារនិងហិរញ្ញវត្ថុផ្លូវការក្នុងសេដ្ឋកិច្ចក្រៅប្រព័ន្ធ។

លោក ហែម វណ្ណឌី រដ្ឋមន្រ្តីក្រសួងឧស្សាហកម្ម និងវិទ្យាសាស្រ្តបច្ចេកវិទ្យា និងនវានុវត្តន៍ និងជាប្រធានគ.ស.អ.ស.ក បានលើកឡើងថា ការទទួលបានសេវាហិរញ្ញវត្ថុផ្លូវការនៅតែជាបញ្ហាប្រឈមសម្រាប់ម្ចាស់អាជីវកម្មក្រៅប្រព័ន្ធ ដោយសារកង្វះអនុលោមភាព។

តាមដានជាមួយយើង៖ Million Times

លោកបន្តថា គ.ស.អ.ស.ក កំពុងសហការជាមួយភាគីពាក់ព័ន្ធផ្សេងៗទៀត ក្នុងការបង្កើតផ្លេតហ្វមឌីជីថលមួយ សម្រាប់ចុះឈ្មោះទទួលស្គាល់អាជីវកម្មក្រៅប្រព័ន្ធ ដូច្នេះហើយលោករដ្ឋមន្រ្តីក៏បានស្នើឱ្យមានការគាំទ្រពី ធនាគារជាតិនៃកម្ពុជា ក្នុងការសិក្សាពីលទ្ធភាពដែលអាជីវកម្មក្រៅប្រព័ន្ធអាចទទួលបានហិរញ្ញប្បទាន ពីគ្រឹះស្ថានធនាគារនិងហិរញ្ញវត្ថុផ្លូវការ នៅពេលដែលពួកគេត្រូវបានទទួលស្គាល់ក្នុងផ្លេតហ្វមឌីជីថលនោះ។

សម្រាប់ផ្លេតហ្វមឌីជីថល ដែលលោក ហែម វណ្ណឌី បានលើកឡើង លោកស្រី ជា សិរី ទេសាភិបាលធនាគារជាតិនៃកម្ពុជា បានគាំទ្រឱ្យមានការសិក្សាលម្អិតបន្ថែមទៀតពីមន្រ្តីជំនាញ។ លោកស្រីបានបញ្ជាក់ថា ធនាគារជាតិនៃកម្ពុជា បានបំពេញការងារជាច្រើនស្របតាមយុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ដូចជា ការលើកកម្ពស់ចំណេះដឹងផ្នែកហិរញ្ញវត្ថុដល់ប្រជាពលរដ្ឋ តាមរយៈសកម្មភាពចុះដល់មូលដ្ឋាន ផ្សព្វផ្សាយជាសាធារណៈ និងបញ្ចូលមេរៀនហិរញ្ញវត្ថុទៅក្នុងកម្មវិធីសិក្សាចំណេះទូទៅ ជាដើម។

បន្ថែមលើនេះ ធនាគារជាតិនៃកម្ពុជា ក៏បានលើកទឹកចិត្តឱ្យអាជីវកម្មក្រៅប្រព័ន្ធបើកគណនីសន្សំនិងប្រើប្រាស់សេវាហិរញ្ញវត្ថុផ្លូវការ អភិវឌ្ឍប្រព័ន្ធទូទាត់ដែលងាយស្រួល ចំណាយតិច និងមានប្រសិទ្ធភាព ព្រមទាំងបង្កើនការប្រើប្រាស់សេវាហិរញ្ញវត្ថុរបស់ស្រ្តីផងដែរ។

សូមជម្រាបថា រាជរដ្ឋាភិបាលកម្ពុជា បានបង្កើតយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ច ក្រៅប្រព័ន្ធក្នុងគោលបំណងលើកកម្ពស់ការគាំពារនិងការពង្រឹងសមត្ថភាព ផលិតភាព និង ភាពធន់ នៃសេដ្ឋកិច្ចក្រៅប្រព័ន្ធ ដែលដាក់ឲ្យអនុវត្តរយៈពេល ៥ឆ្នាំ ចាប់ពីឆ្នាំ២០២៣ដល់ឆ្នាំ២០២៨។

យុទ្ធសាស្ត្រជាតិនេះមានគោលបំណងលើកកម្ពស់ការគាំពារនិងការពង្រឹងសមត្ថភាព ផលិតភាព និងភាពធន់នៃសេដ្ឋកិច្ចក្រៅប្រព័ន្ធ ព្រមទាំងជំរុញនិងពន្លឿនការចូលរួមទៅ ក្នុងសេដ្ឋកិច្ចក្នុង ប្រព័ន្ធ ដើម្បីធានាឱ្យបាននូវភាពធន់ ភាពប៉ាន់ប្រមាណបាន និងភាពរីកចម្រើនទៅមុខនៃការ ធ្វើធុរកិច្ច ពាណិជ្ជកម្ម ការវិនិយោគ និងការប្រកបអាជីវកម្ម មុខរបរ និងការងារចិញ្ចឹមជីវិតនៅកម្ពុជា។

តាមរយៈការដាក់ចេញនូវយុទ្ធសាស្ត្រជាតិនេះរាជរដ្ឋាភិបាលមានជំនឿយ៉ាងមុតមាំថានឹងក្លាយជា ប្រទីប មួយយ៉ាងសំខាន់ដែលនឹងជួយបំភ្លឺនិងត្រួសត្រាយផ្លូវនៅលើគន្លងមួយដែលពោរពេញទៅ ដោយ ភាពស្មុគស្មាញក្នុងការអភិវឌ្ឍសេដ្ឋកិច្ចក្រៅប្រព័ន្ធ ព្រមទាំងនឹងក្លាយជាកត្តាលីករ ដែលនឹង ជួយជំរុញនិងលើកទឹកចិត្តឱ្យបង្កើនកិច្ចសហប្រតិបត្តិការរវាង ក្រសួង ស្ថាប័ន វិស័យឯកជន អង្គការ ជាតិ និងអន្តរជាតិ និងសមាគមនានា សំដៅឈានឆ្ពោះទៅរកការសម្រេចបាននូវការអភិវឌ្ឍ ប្រកបដោយចីរភាព បរិយាបន្ននិងភាពធន់ យ៉ាងពិតប្រាកដ ស្របតាមគោលការណ៍ «មិនបោះបង់ពល រដ្ឋខ្មែរណាម្នាក់»ទាំងក្នុងន័យអភិវឌ្ឍនិងការចូលរួមក្នុងដំណើរការនៃការអភិវឌ្ឍ៕

អត្ថបទ៖ សេដ្ឋានី រូបភាព៖ កើត ឆែ

The post ការទទួលបានសេវាហិរញ្ញវត្ថុផ្លូវការនៅតែជាបញ្ហាប្រឈមសម្រាប់ម្ចាស់អាជីវកម្មក្រៅប្រព័ន្ធ appeared first on Millions times.

fDi Intelligence៖ កម្ពុជា ក្លាយជាគោលដៅលំដាប់ទី១ សម្រាប់ការវិនិយោគផ្ទាល់ពីបរទេសក្នុងឆ្នាំ២០២៤

Vin Chang — Fri, 19 Apr 2024 07:32:11 +0000

ប្រទេសកម្ពុជានឹងក្លាយជាគោលដៅលំដាប់ទី១ សម្រាប់ការវិនិយោគផ្ទាល់ពីបរទេស (FDI) ក្នុងឆ្នាំ២០២៤ នេះ ដោយនាំមុខក្រុមប្រទេសដែលជាទីផ្សារកំពុងរីកលូតលាស់ ៩ ផ្សេងទៀត ដូចជា ហ៊្វីលីពីន កេនយ៉ា អ៊ីរ៉ាក់ ណាមីបៀ កាហ្សាក់ស្ថាន អាហ្សឺបៃហ្សង់ ម៉ារ៉ុក ស៊ែប និងឥណ្ឌា។ នេះបើយោងតាមការព្យាកររបស់ទស្សនាវដ្តី fDi Intelligence ពេលថ្មីៗនេះ។

មូលនិធិរូបិយវត្ថុអន្តរជាតិ ហៅកាត់ IMF បានព្យាករទស្សនវិស័យសេដ្ឋកិច្ចដ៏រស់រវើករបស់កម្ពុជាថានឹងមានកំណើន ៦,១% នៅឆ្នាំ២០២៤ ធៀបនឹងចំនួន ៥,៦% កាលពីឆ្នាំឆ្នាំ២០២២ ខណៈកិច្ចខិតខំប្រឹងប្រែងថ្មីៗ ក្នុងការលើកកម្ពស់ភាពជាដៃគូពាណិជ្ជកម្មជាមួយចិន កូរ៉េខាងត្បូង និងសហភាពអឺរ៉ុប បានបន្តពង្រឹងនិទស្សន៍សេដ្ឋកិច្ចកម្ពុជា។

តាមដានជាមួយយើង៖ Million Times

ការព្យាករចុងក្រោយបំផុតរបស់ IMF កាលពីខែមករា បានឱ្យដឹងថា កំណើនសេដ្ឋកិច្ចកម្ពុជា ស្ថិតក្នុងអត្រា ៦,១ ភាគរយ ខណៈអតិផរណានឹងមាន ៣ ភាគរយនៅឆ្នាំនេះ។ ការព្យាករនេះគឺស្របតាមការព្យាកររបស់ស្ថាប័នហិរញ្ញវត្ថុអន្តរជាតិផ្សេងទៀត ខណៈធនាគារជាតិនៃកម្ពុជាបានព្យាករក្នុងកម្រិត ៦,៤ ភាគរយ។

ទស្សនាវដ្តី fDi Intelligence កត់សម្គាល់ថា ការដកចេញការរឹតត្បិតការធ្វើដំណើរពីសំណាក់ប្រទេសចិន បានជំរុញឱ្យមានការងើបឡើងវិញយ៉ាងឆាប់រហ័សនៃវិស័យទេសចរណ៍នៅកម្ពុជា។ ការព្យាករដដែលបានបង្ហាញពីការងើបឡើងគួរឱ្យកត់សម្គាល់ លើការវិនិយោគផ្ទាល់ពីបរទេស លើវិស័យអចលនទ្រព្យ ដែលមានជាមធ្យម (CAPEX) ចំនួន ៣៩៣% ធៀបនឹងឆ្នាំមុន គួបផ្សំនឹងកំណើន ១១០% នៃគម្រោង FDI នៅឆ្នាំ២០២៤។

លោកស្រី ជា សិរី ទេសាភិបាលធនាគារជាតិនៃកម្ពុជា (NBC) បានលើកឡើងកាលពីពេលកន្លងទៅថា សេដ្ឋកិច្ចកម្ពុជានៅតែប្រឈមនឹងកត្តាខាងក្រៅ និងភាពមិនច្បាស់លាស់ជាច្រើនរួមមាន ភាពតានតឹងផ្នែកភូមិសាស្ត្រនយោបាយ និងហានិភ័យនៃការបែងចែកភូមិសាស្ត្រនយោបាយ ដែលនាំទៅរកការធ្លាក់ចុះលំហូរពាណិជ្ជកម្មអន្តរជាតិ ការវិនិយោគ ទេសចរណ៍ និងភាពមិនច្បាស់លាស់លើទីផ្សារហិរញ្ញវត្ថុអន្តរជាតិ។ ការណ៍នេះ លោកស្រីថា សេដ្ឋកិច្ចកម្ពុជាត្រូវបានព្យាករដោយសុទិដ្ឋិនិយមថា នឹងកើនឡើងក្នុងរង្វង់ ៦,៤ ភាគរយនៅឆ្នាំ ២០២៤។

លោកស្រីបានអះអាងថា ដើម្បីគាំទ្រគោលនយោបាយរបស់រដ្ឋាភិបាល ក្នុងការពង្រឹងសម្ទុះ កំណើន និងរក្សាស្ថិរភាពម៉ាក្រូសេដ្ឋកិច្ច NBC នឹងបន្តអនុវត្ត នយោបាយរូបិយវត្ថុ ប្រកបដោយភាពប្រុងប្រយ័ត្ន ពង្រឹងការអភិវឌ្ឍប្រព័ន្ធធនាគារ លើកកម្ពស់ប្រសិទ្ធភាព សុវត្ថិភាព និងសមាហរណកម្មប្រព័ន្ធទូទាត់ ព្រមទាំងដាក់ចេញនយោបាយ និងវិធានការគាំទ្រចាំបាច់នានាប្រកបដោយភាពបុរេសកម្ម ស្របតាមស្ថានភាពសេដ្ឋកិច្ច និងគោលនយោបាយរបស់រាជរដ្ឋាភិបាល។

យោងតាមសេចក្ដីប្រកាសព័ត៌មានរបស់ក្រុមប្រឹក្សាអភិវឌ្ឍន៍កម្ពុជា កាលថ្ងៃទី៥ ខែមេសាកន្លងទៅ ឲ្យដឹងថា គិតត្រឹមត្រីមាសទី១ ឆ្នាំ២០២៤នេះ ក្រុមប្រឹក្សាអភិវឌ្ឍន៍កម្ពុជា (CDC) បានសម្រេចអនុម័តគម្រោងវិនិយោគចំនួន១០៦ ដែលមានទុនវិនិយោគសរុបប្រមាណ ២,២ពាន់លានដុល្លារ។

ក្រុមប្រឹក្សាអភិវឌ្ឍន៍កម្ពុជា បានបញ្ជាក់ថា គម្រោងដែលបានអនុម័តចំនួន១០៦ មានទុនវិនិយោគសរុបប្រមាណ២,២ពាន់លានដុល្លារអាម៉េរិក និងអាចបង្កើតការងារបានជាង ១០៧ពាន់កន្លែង។ គម្រោងវិនិយោគនេះ មានទីតាំងស្ថិតនៅ ក្រៅតំបន់សេដ្ឋកិច្ចពិសេសមានចំនួន៧៣គម្រោង ក្នុងនោះមានគម្រោងពង្រីកផលិតកម្មចំនួន ៣គម្រោង ដោយឡែកគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមានចំនួន៣៣គម្រោង ក្នុងនោះ មានគម្រោងពង្រីកផលិតកម្មចំនួន ៣គម្រោង។

គួរបញ្ជាក់ថា ក្នុងត្រីមាសទី១ ឆ្នាំ២០២៤នេះ ការវិនិយោគក្នុងស្រុកឈរនៅលំដាប់លេខរៀងទី១ រីឯការវិនិយោគមកពីប្រទេសចិនស្ថិតនៅលំដាប់លេខរៀងទី២ ដោយបានរួមចំណែកប្រមាណជាង ៩៣% នៃការវិនិយោគសរុប៕

អត្ថបទ៖ ផល កុសល

The post fDi Intelligence៖ កម្ពុជា ក្លាយជាគោលដៅលំដាប់ទី១ សម្រាប់ការវិនិយោគផ្ទាល់ពីបរទេសក្នុងឆ្នាំ២០២៤ appeared first on Millions times.

ជា សិរី Archives - Millions times

ធនាគារកណ្តាលម៉ាដាហ្គាស្កា សរសើរប្រព័ន្ធទូទាត់បាគងរបស់ធនាគារជាតិកម្ពុជា

លោកស្រី ជា សិរី៖ ឆ្នាំ២០២៥ ធនាគារកណ្តាលនៃប្រទេសកំពុងអភិវឌ្ឍន៍មានសម្ពាធកើតឡើងមកពីមុខព្រួញចំនួនពីរ

Bloomberg​ ហៅលោកស្រី ជា សិរី​ ពន្យល់ការវិវឌ្ឍនៃស្ថានភាពសេដ្ឋកិច្ចសាកល កត្តាប្រឈម និងការគ្រប់គ្រងអតិផរណា

គម្រោងទូទាត់ឆ្លងដែន QR Code រវាងធនាគារកម្ពុជា-ម៉ាឡេស៊ី ផ្តល់ឱកាស​ឲ្យពាណិជ្ជករជាង ៥លានទីតាំងបង្កើនអតិថិជន

ធនាគារជាតិ ត្រៀមដាក់ KHQR ស្កែនទាំងប្រាក់រៀល និងដុល្លារឲ្យប្រើប្រាស់ឆាប់ៗ

ការទទួលបានសេវាហិរញ្ញវត្ថុផ្លូវការនៅតែជាបញ្ហាប្រឈមសម្រាប់ម្ចាស់អាជីវកម្មក្រៅប្រព័ន្ធ

fDi Intelligence៖ កម្ពុជា ក្លាយជាគោលដៅលំដាប់ទី១ សម្រាប់ការវិនិយោគផ្ទាល់ពីបរទេសក្នុងឆ្នាំ២០២៤

Bloomberg ហៅលោកស្រី ជា សិរី ពន្យល់ការវិវឌ្ឍនៃស្ថានភាពសេដ្ឋកិច្ចសាកល កត្តាប្រឈម និងការគ្រប់គ្រងអតិផរណា

គម្រោងទូទាត់ឆ្លងដែន QR Code រវាងធនាគារកម្ពុជា-ម៉ាឡេស៊ី ផ្តល់ឱកាសឲ្យពាណិជ្ជករជាង ៥លានទីតាំងបង្កើនអតិថិជន