តាមដានជាមួយយើង៖ Million Times

ការណែនាំនេះ ដោយសារឯកឧត្តមសង្កេតឃើញថា មានជនឆក់ឱកាសមួយក្តាប់តូចបានដំឡើងថ្លៃប្រេងឥន្ទនៈខុសពីការណែនាំរបស់ក្រសួងពាណិជ្ជកម្ម និងជនមួយចំនួនទៀតបានសម្រុកទៅទិញប្រេងឥន្ទនៈដើម្បីស្តុកទុក ដែលបានធ្វើឱ្យប៉ះពាល់ដល់ខ្សែច្រវ៉ាក់នៃការផ្គត់ផ្គង់ និងសណ្តាប់ធ្នាប់ល្អនៅក្នុងភូមិសាស្រ្តខេត្ត។

ឯកឧត្តម អភិបាលខេត្តកំពង់ធំ បានណែនាំឱ្យគណៈបញ្ជាការឯកភាពរដ្ឋបាលក្រុងស្រុកទាំង៩ មន្ទីររ៉ែនិងថាមពល និងមន្ទីរពាណិជ្ជកម្ម បន្តតាមដាននូវភាពមិនប្រក្រតីនេះ ដែលក្នុងនោះមានវិធានការចំនួន ២ ដែលត្រូវយកចិត្តទុកដាក់។ វិធានការទាំង ២នោះ រួមមាន៖

ទី១. ម្ចាស់ស្ថានីយទាំងអស់ ត្រូវបន្តបើកដំណើរការអាជីវកម្មចាក់ប្រេងជាធម្មតាជូនប្រជាពលរដ្ឋដែលមានយានជំនិះផ្សេងៗ និងចូលរួមទប់ស្កាត់ជនឆ្លៀតឱកាសទាំងឡាយណា ដែលមកជាវប្រេងក្នុងទ្រង់ទ្រាយធំ ក្នុងគោលបំណងយកទៅស្តុកទុក ដែលធ្វើឱ្យប៉ះពាល់ដល់ខ្សែច្រវ៉ាក់ នៃការផ្គត់ផ្គង់ប្រេងជាប្រក្រតីនៅក្នុងខេត្ត។

ទី២. យកចិត្តទុកដាក់លើតម្លៃប្រេងដែលកំណត់ដោយស្ថានីយមួយចំនួន ក្នុងករណីរកឃើញថា ស្ថានីយប្រេងឥន្ទនៈណាមួយ បានកំណត់តម្លៃខុសពីការណែនាំរបស់ក្រសួងពាណិជ្ជកម្ម ម្ចាស់ស្ថានីយប្រេងឥន្ទនៈ នោះនឹងត្រូវទទួលការព្រមាន និងអាចឈានទៅរកការបិទស្ថានីយប្រេងឥន្ទនៈនោះជាអចិន្ត្រៃយ៍ផងដែរ។

រដ្ឋបាលខេត្តកំពង់ធំ ក៏បានអំពាវនាវដល់ប្រជាពលរដ្ឋរក្សាសណ្តាប់ធ្នាប់របៀបរៀបរយល្អក្នុងសង្គម សាមគ្គីគ្នាក្នុងគ្រាលំបាក និងលុបបំបាត់ចោលនូវទម្លាប់ឆក់ឱកាសកេងចំណេញ ក្នុងកាលៈទេសៈដែលប្រទេសជាតិកំពុងជួបការលំបាក និងត្រូវជឿជាក់លើការដឹកនាំរបស់រាជរដ្ឋាភិបាល ចៀសវាងការតក់ស្លុត ឬការបារម្ភ ដែលអាចអនុញ្ញាតឱ្យជនឆ្លៀតឱកាសបង្កើតភាពវឹកវរ ធ្វើឱ្យបាត់សណ្តាប់ធ្នាប់ក្នុងសង្គមបាន៕

អត្ថបទ៖ វីរៈ រូបភាព៖ មន្ទីរពាណិជ្ជកម្មខេត្តកំពង់ធំ

The post អភិបាលខេត្តកំពង់ធំ ណែនាំឱ្យម្ចាស់ស្ថានីយ​ទប់ស្កាត់ការទិញប្រេងទ្រង់ទ្រាយធំយកទៅស្តុកទុក appeared first on Millions times.

តាមដានជាមួយយើង៖ Million Times

ឯកឧត្តម ថោ ជេដ្ឋា រដ្ឋមន្ត្រីក្រសួងធនធានទឹក និងឧតុនិយម នៅថ្ងៃទី៧ ខែកុម្ភៈ ឆ្នាំ២០២៦ នេះ បានអញ្ជើញចុះពិនិត្យជាក់ស្តែងវឌ្ឍនភាពការងារនៃគម្រោងអភិវឌ្ឍន៍សំណង់ស្ទាក់ទឹកកំពង់គោ ស្ថិតក្នុងភូមិកំពង់គោលើ ឃុំកំពង់គោ ស្រុកកំពង់ស្វាយ ខេត្តកំពង់ធំ។

ក្រសួងធនធានទឹក និងឧតុនិយម បានឱ្យដឹងថា គម្រោងអភិវឌ្ឍន៍សំណង់ស្ទាក់ទឹកកំពង់គោ មានវិសាលភាពគ្របដណ្ដប់លើក្រុង-ស្រុកចំនួន៥ នៃខេត្តកំពង់ធំ ដែលរួមមាន ក្រុងស្ទឹងសែន ស្រុកកំពង់ស្វាយ ស្រុកសន្ទុក ស្រុកប្រាសាទបល្ល័ង្គ និងស្រុកសណ្តាន់។

គម្រោងនេះ បានចាប់ផ្តើមការដ្ឋានក្នុងឆ្នាំ២០២៤ ហើយគ្រោងនឹងបញ្ចប់ក្នុងឆ្នាំ២០២៦ ហើយបើគិតមកត្រឹមថ្ងៃទី៧ ខែកុម្ភៈ ឆ្នាំ២០២៦នេះ វឌ្ឍនភាពការងារសម្រេចបានប្រមាណ ៨០%ហើយ។

ក្រសួងធនធានទឹក បានឱ្យដឹងបន្តថា គម្រោងអភិវឌ្ឍន៍សំណង់ស្ទាក់ទឹកកំពង់គោ ស្ថិតនៅលើដងស្ទឹងសែនផ្នែកខាងក្រោម ក្នុងខេត្តកំពង់ធំ គឺជាសំណង់ស្ទាក់ទឹកថ្មីមួយទៀត បន្ទាប់ពីសំណង់អាងទឹកដងកាំបិត និងសំណង់អាងទឹករក្សា ដែលស្ថិតនៅខ្សែទឹកផ្នែកខាងលើនៃដងស្ទឹងសែន ក្នុងខេត្តព្រះវិហារ។

គម្រោងនេះ​ មានសក្តានុពលស្ដុកទឹក ដើម្បីបម្រើឱ្យវិស័យកសិកម្ម ឧស្សាហកម្ម និងការប្រើប្រាស់ក្នុងជីវភាពរស់នៅប្រចាំថ្ងៃ ព្រមទាំងជួយបញ្ចៀសការជន់លិចតំបន់ទីប្រជុំជននានា ដែលស្ថិតតាមបណ្ដោយដងស្ទឹងសែនផ្នែកខាងក្រោមនារដូវវស្សា៕

អត្ថបទ៖ វីរៈ រូបភាព៖ ក្រសួងធនធានទឹក

The post គម្រោងអភិវឌ្ឍន៍សំណង់ស្ទាក់ទឹកកំពង់គោ សម្រេចការសាងសង់បានប្រមាណ ៨០%ហើយ appeared first on Millions times.

តាមដានជាមួយយើង៖ Million Times

ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្ដីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ នៅថ្ងៃទី១៥ ខែមករា ឆ្នាំ២០២៦នេះ បានអញ្ជើញជាអធិបតីក្នុងពិធីអបអរសាទរការវិនិយោគរបស់ក្រុមហ៊ុន Charles River Laboratories (CRL) ដើម្បីប្រកាសពីការចាប់ផ្តើមដំណាក់កាលថ្មីនៃការវិនិយោគ និងប្រតិបត្តិការរយៈពេលវែងនៅកម្ពុជា ស្ថិតនៅស្រុកកំពង់ស្វាយ ខេត្តកំពង់ធំ ដែលមានទឹកប្រាក់វិនិយោគរហូតដល់ ៥០០លានដុល្លារ។  

ឯកឧត្តម វង្សី វិស្សុត បានថ្លែងអំណរគុណចំពោះក្រុមហ៊ុន Charles River Laboratories – CRL ដែលបានសម្រេចចិត្តវិនិយោគក្នុងខេត្តកំពង់ធំ ដែលជាចំណុចកណ្តាល និងមានលក្ខណៈជាយុទ្ធសាស្រ្តនៅកម្ពុជា។

គម្រោងវិនិយោគចិញ្ចឹមស្វានេះ នឹងនាំមកនូវអត្ថប្រយោជន៍ជាច្រើនជូនប្រជាពលរដ្ឋក្នុងខេត្តកំពង់ធំ និងប្រទេសកម្ពុជាទាំងមូល តាមរយៈការបង្កើតការងារថ្មីសម្រាប់ប្រជាពលរដ្ឋក្នុងមូលដ្ឋាន, ការបណ្តុះបណ្តាលជំនាញ និងបច្ចេកទេស, ការបង្កើនប្រាក់ចំណូល និងការធ្វើពិពិធកម្មសេដ្ឋកិច្ចជនបទ, ការនាំចូលបច្ចេកវិទ្យាទំនើប និងចំណេះដឹងវិទ្យាសាស្ត្រ, ការផ្លាស់ប្តូរចំណេះដឹង និងបទពិសោធវិទ្យាសាស្ត្រ, ការកែលម្អស្តង់ដាសុខភាពសត្វ និងសុវត្ថិភាពជីវសាស្ត្រ និងជាពិសេសការពង្រឹងខ្សែច្រវាក់ផ្គត់ផ្គង់ និងឧស្សាហកម្មពាក់ព័ន្ធទៅក្នុងតំបន់ និងសកល ក្នុងវិស័យជីវសាស្រ្ត និងសុខាភិបាល ដែលផ្តល់ប្រយោជន៍យ៉ាងធំធេងសម្រាប់មនុស្សជាតិនៅលើពិភពលោក។ ដូចនេះគម្រោងវិនិយោគដ៏ធំនេះ គឺជាសមិទ្ធផលថ្មីមួយទៀតសម្រាប់ប្រជាពលរដ្ឋខេត្តកំពង់ធំ និយាយដោយឡែក និងនិយាយជារួមសម្រាប់ប្រជាជនកម្ពុជាទាំងមូល។

ឯកឧត្តម បានបន្តថា គម្រោងវិនិយោគរបស់ក្រុមហ៊ុន CRL នាពេលនេះ ក៏ដូចជាគម្រោងវិនិយោគផ្សេងៗទៀត ទាំងជាគម្រោងរបស់រដ្ឋ និងទាំងវិស័យឯកជន ដែលគម្រោងខ្លះបាននិងកំពុងអនុវត្ត ហើយគម្រោងខ្លះទៀតកំពុងស្ថិតក្នុងដំណាក់កាលរៀបចំ ដូចជា៖ សួនឧស្សាហកម្មចន្ទី, សួនកសិ-ឧស្សាហកម្ម និងការចិញ្ចឹមខ្យង់គុជ ព្រមទាំងគម្រោងអភិវឌ្ឍទេសចរណ៍ វារីវប្បកម្ម ឧស្សាហកម្មកែច្នៃស្រូវ កៅស៊ូ និងដំឡូងមីជាដើម គឺជាការបង្ហាញឱ្យឃើញថា ខេត្តកំពង់ធំកំពុងស្ថិតក្នុងចលនការវិជ្ជមាន ស្របតាមចក្ខុវិស័យរបស់ សម្ដេចធិបតី ហ៊ុន ម៉ាណែត គឺលែងឱ្យខេត្តកំពង់ធំ ជាខេត្តទៅហួស មកហួសទៀត ទាំងគម្រោងអភិវឌ្ឍន៍ ការវិនិយោគ ពាណិជ្ជកម្ម និងទេសចរណ៍៕

អត្ថបទ៖ វីរៈ រូបភាព៖ ទីស្ដីការគណៈរដ្ឋមន្ត្រី

The post ខេត្តកំពង់ធំ កំពុងទទួលបានគម្រោងវិនិយោគធំៗជាច្រើន រួមទាំងក្រុមហ៊ុនអាមេរិក CRL ដែលមានទុនវិនិយោគ ៥០០លានដុល្លារ appeared first on Millions times.

តាមដានជាមួយយើង៖ Million Times

ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តី​​ទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ កាលពីថ្ងៃទី២៦ ខែតុលា ឆ្នាំ២០២៥ បានដឹកនាំគណៈប្រតិភូចុះពិនិត្យគម្រោងវិនិយោគ​របស់ក្រុមហ៊ុនខាងលើនេះ ដែលជាគម្រោងតាមរបៀបសេដ្ឋកិច្ចចក្រា។

ក្រុមហ៊ុន អេ.វី.ស៊ី បានបោះទុន​វិនិយោគចំនួន ២៥ លាន​ដុល្លារ លើផ្ទៃដី ៥៧ហិកតា នៅឃុំពពក ស្រុកស្ទោង រួមមាន រោងចក្រ​កែច្នៃដំឡូងមី (ម្សៅដំឡូងមី និងដំឡូងមីចំណិត)។ ចំពោះកាកសំណល់ពីការកែច្នៃនេះ អាចផលិតជាជីសរីរាង្គ និងចំណីសត្វ ព្រមទាំងឧស្ម័នសម្រាប់សម្ងួត​ដំឡូងមីវិញ និងសម្រាប់ផលិតថាមពលអគ្គិសនីពី​ជីវម៉ាស ដោយរួមបញ្ចូលគ្នាជាមួយនឹងខ្សែច្រវាក់ផលិតកម្មគ្រាប់ឈើ និងរោងចក្របង្កកផ្លែឈើ។

គម្រោងវិនិយោគកសិ-ឧស្សាហកម្មចម្រុះ ដែលជាមជ្ឈមណ្ឌលកែច្នៃកសិផលសម្រាប់នាំចេញនេះ គ្រោងនឹងដំណើរការនៅខែមិថុនា ឆ្នាំ២០២៦ ខាងមុខនេះ។

ឯកឧត្ដម វង្សី វិស្សុត មានប្រសាសន៍ថា ការចុះមកដល់ទីតាំងគម្រោងសាងសង់រោងចក្រកែច្នៃកសិ-ឧស្សាហកម្មចម្រុះនាពលនេះ គឺក្នុងគោលបំណងជួយដោះស្រាយ​បញ្ហាប្រឈមនៅនឹងកន្លែង និងបញ្ហាពាក់ព័ន្ធផ្សេងៗទៀតរបស់អ្នកវិនិយោគ អ្នកផលិត សហគមន៍ និងប្រជាកសិករ ដើម្បីបង្កើនសមត្ថភាពផលិត តម្លៃបន្ថែម និងការប្រកួតប្រជែង ព្រមទាំង​លទ្ធភាពធ្វើឱ្យកាន់តែប្រសើរឡើងនូវការទាក់ទាញវិនិយោគ និងធុរកិច្ច ក្នុងមូលដ្ឋានខេត្តកំពង់ធំ។

ម្យ៉ាងទៀត ក៏ដើម្បីលើកកម្ពស់ជីវភាពប្រជាជន តាមរយៈការបង្កើតការងារ​ មុខរបរ និងប្រាក់ចំណូលបន្ថែមជូនពួកគាត់ ដែលនឹង​ចូលរួមចំណែកក្នុងការអភិវឌ្ឍសង្គម-សេដ្ឋកិច្ចជាតិ ស្របតាមទិសដៅ និងអនុសាសន៍ណែនាំដ៏ខ្ពង់ខ្ពស់បំផុតរបស់​សម្ដេចធិបតី ហ៊ុន​ ម៉ាណែត នាយករដ្ឋមន្រ្តី។

គួរឱ្យដឹងថា ខេត្តកំពង់ធំ គឺជាខេត្តមួយដែលមានសក្តានុពលខ្ពស់ ក្នុងវិស័យកសិកម្ម និងកសិ-ឧស្សាហកម្ម។ ជាក់ស្តែង បច្ចុប្បន្នខេត្តកំពង់ធំ មានផ្ទៃដីដំណាំដំឡូងមីប្រមាណជាង ៥៤ ០០០ ហិកតា ដោយទទួលបានទិន្នផល​ប្រមាណ ១,២លានតោន ក្នុង១ឆ្នាំ និងមានផ្ទៃដីដំណាំកៅស៊ូប្រមាណ ៧៣ ០០០ ហិកតាផងដែរ៕

អត្ថបទ៖ វីរៈ រូបភាព៖ បណ្ដាញសង្គមទីស្តីការគណៈរដ្ឋមន្រ្តី

The post គម្រោងវិនិយោគកសិ-ឧស្សាហកម្មចម្រុះមួយ នៅខេត្តកំពង់ធំ គ្រោងដំណើរការនៅពាក់កណ្ដាលឆ្នាំ២០២៦ appeared first on Millions times.

ការឱ្យដឹងរបស់ ឯកឧត្តម នួន ផារ័ត្ន នាឱកាសអញ្ជើញជាអធិបតីរួមជាមួយ ឯកឧត្តមបណ្ឌិត ប៉ូច ប៊ុណ្ណាក់ រដ្ឋលេខាធិការក្រសួងផែនការ អនុប្រធានអចិន្ត្រៃយ៍ នៃគណៈកម្មាធិការជាតិសម្រាប់ការចាកចេញរបស់កម្ពុជាពី LDC និងជាប្រធានលេខាធិការដ្ឋានគណៈកម្មាធិការជាតិ ក្នុងសិក្ខាសាលាផ្សព្វផ្សាយស្ដីពី បច្ចុប្បន្នភាពអំពីការប្រឈមផលប៉ះពាល់ និងដំណោះស្រាយពាក់ព័ន្ធដឹងការចាកចេញពី ចំណាត់ក្រុមប្រទេសអភិវឌ្ឍន៍តិចតួចតាមវិស័យ ដោយសហការរៀបចំដោយលេខាធិការដ្ឋាននៃគណៈកម្មាធិការជាតិសម្រាប់ការចាកចេញរបស់កម្ពុជាពីចំណាត់ក្រុមប្រទេសអភិវឌ្ឍន៍តិចតួចនិងមន្ទីរផែនការខេត្តកំពង់ធំ នៅភោជនីយដ្ឋាន ឡូវ គឹមសេង នាព្រឹកថ្ងៃទី២១ ខែតុលា ឆ្នាំ២០២៥។

តាមដានជាមួយយើង៖ Million Times

ក្នុងឱកាសនោះផងដែរ ឯកឧត្តម នួន ផារ័ត្ន បានថ្លែងថា មន្ទីរ និងអង្គភាពជំនាញតាមវិស័យនីមួយៗ ពិតជាមានតួនាទីសំខាន់ណាស់ ក្នុងការចូលរួមជំរុញការអភិវឌ្ឍរបស់ជាតិ ជាពិសេសក្នុងដំណើរឈានទៅរកប្រទេសមានចំណូលមធ្យមកម្រិតខ្ពស់ នាពេលខាងមុខ។

ជាមួយគ្នានេះ ឯកឧត្តម អភិបាលខេត្ត បានបន្ថែមថា ខេត្តកំពង់ធំ ជាខេត្តដែលពឹងផ្អែកលើវិស័យកសិកម្ម ដោយអាជ្ញាធរខេត្ត បានទិញយកមកវិញនូវស្ថានីយបូមទឹកមួយចំនួនធំ ដើម្បីផ្តល់ជូនសហគមន៍ជាអ្នកគ្រប់គ្រង អភិវឌ្ឍប្រព័ន្ធធារាសាស្ត្រ ប្រែក្លាយជាសហគមន៍កសិកម្មទំនើប ដោយទម្លាក់ថ្លៃទឹកសម្រាប់ប្រជាពលរដ្ឋ។

លើសពីនេះ នៅក្នុងការអភិវឌ្ឍវិស័យកសិ-ឧស្សាហកម្ម តាមរយៈការផ្តោតលើដំណាំស្វាយចន្ទី ដែលខេត្តកំពង់ធំ គឺជាស្នូលនៃគោលនយោបាយរបស់សម្តេចធិបតីនាយករដ្ឋមន្ត្រីនៃណព្រះរាជាណាចក្រកម្ពុជា ក្នុងការប្រែក្លាយកម្ពុជាទៅជាមជ្ឈមណ្ឌលកែច្នៃគ្រាប់ស្វាយចន្ទី។

បន្ថែមលើនេះ ខេត្តកំពង់ធំកំពុងប្រឹងប្រែងធ្វើពិពិធកម្មសេដ្ឋកិច្ចខេត្ត តាមរយៈគម្រោងវារីវប្បកម្មមួយ ដែលប្រែក្លាយផ្ទៃដីមួយផ្នែកណាមួយនោះ ទៅតំបន់វារីវប្បកម្ម និងតំបន់ហូបផ្លែផ្សេងទៀត ដែលអាចផ្តល់តម្លៃបន្ថែមខ្ពស់ជាងដំណាំស្រូវ សំដៅលើកកម្ពស់ជីវភាពរបស់បងប្អូនប្រជាពលរដ្ឋ៕

អត្ថបទ៖ ប៊ី

The post រដ្ឋបាលខេត្តកំពង់ធំ កំពុងធ្វើពិពិធកម្មសេដ្ឋកិច្ចខេត្ត តាមរយៈគម្រោងវារីវប្បកម្ម appeared first on Millions times.

ពិធីសម្ពោធជាផ្លូវការ “គម្រោងមន្ទីរពិសោធន៍នវានុវត្តន៍កំពង់ធំ (InnoLab Kampong Thom)” ត្រូវបានធ្វើឡើង ដោយរួមជាមួយនឹងការប្រកាសជាផ្លូវការនូវបេក្ខជនទាំង ២០ រូប ដែលជាសហគ្រិនក្នុងខេត្តកំពង់ធំ និងដែលត្រូវបានជ្រើសរើសដើម្បីផ្តល់ការបណ្តុះបណ្តាល និងបន្តធ្វើការប្រកួតប្រជែងក្នុងវគ្គបន្ត នៅក្នុងក្របខ័ណ្ឌគម្រោង កាលពីថ្ងៃទី ១១ ខែតុលា ឆ្នាំ ២០២៥  ក្រោមអធិបតីភាពរបស់ ឯកឧត្តម វង្សី វិស្សុត ឧបនាយករដ្ឋមន្រ្តីប្រចាំការ រដ្ឋមន្រ្តីទទួលបន្ទុកទីស្តីការគណៈរដ្ឋមន្រ្តី និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ ។

ឯកឧត្តមឧបនាយករដ្ឋមន្រ្តីប្រចាំការ វង្សី វិស្សុត បានថ្លែងថា មូលនិធិអភិវឌ្ឍន៍ជំនាញ សហគ្រិនខ្មែរ ក៏ដូចជាឧទ្យាននវានុវត្តន៍សង្គមអង្គរ និងរដ្ឋបាលខេត្តកំពង់ធំ ព្រមទាំងភាគីពាក់ព័ន្ធទាំងអស់ បានរួមចំណែកធ្វើឱ្យ «មន្ទីរពិសោធន៍នវានុវត្តន៍កំពង់ធំ (InnoLab Kampong Thom)» លេចចេញជារូបរាងឡើង ដែលមានគោលដៅប្រែក្លាយខេត្តកំពង់ធំទៅជាប្រព័ន្ធអេកូឡូស៊ីនវានុវត្តន៍មួយ ដែលជាទីតាំងសម្រាប់សហគ្រិន អ្នកច្នៃប្រឌិត អ្នកស្រាវជ្រាវ និងមន្ត្រីចាប់ពីថ្នាក់មូលដ្ឋាន តាមរយៈការបញ្ចូលនវានុវត្តភាពទៅក្នុងប្រព័ន្ធទីផ្សារ និងប្រព័ន្ធអភិបាលកិច្ចនៅកម្ពុជា និងបង្ហាញអំពីសក្ដានុពលដែលមានក្នុងស្រុក ដើម្បីអនុញ្ញាតឱ្យសហគមន៍បានចូលរួមចំណែកក្នុងការសម្រេចបាននូវវឌ្ឍនភាព ប្រកបដោយនវានុវត្តន៍ ចីរភាព និងនិរន្តរភាព ស្របតាមគោលនយោបាយរបស់រាជរដ្ឋាភិបាល។

តាមដានជាមួយយើង៖ Million Times

ឯកឧត្តម វង្សី វិស្សុត បានលើកឡើងថា រាជរដ្ឋាភិបាលកម្ពុជាបានដាក់ចេញយុទ្ធសាស្រ្តចតុកោណ ទាំង៤ ដំណាក់កាល និងយុទ្ធសាស្រ្តបញ្ចកោណ ដែលផ្តោតទៅការកសាងប្រព័ន្ធអេកូឡូស៊ី ដើម្បីគាំទ្រដល់ការអភិវឌ្ឍសហគ្រាសធុនតូច និងមធ្យម (SMEs) ម្ខាងដើម្បីបង្កើនកម្លាំងផលិត និងម្ខាងទៀតជួយដោះស្រាយបញ្ហាធំៗដែល SMEs កំពុងប្រឈម រួមមានបញ្ហាហិរញ្ញវត្ថុ បញ្ហាបច្ចេកវិទ្យានិងជំនាញ និងបញ្ហាការគ្រប់គ្រង។

ឯកឧត្តមឧបនាយករដ្ឋមន្ត្រីប្រចាំការ បានបន្តថា នៅក្នុងសេដ្ឋកិច្ចរបស់យើង គឺសម្បូរតែសហគ្រាសខ្នាតធំ និងខ្នាតតូច ក៏ប៉ុន្តែសហគ្រាសធុនមធ្យមឬកណ្តាល មិនសូវមានឡើយ ដែលធ្វើឱ្យការវិនិយោគផ្ទាល់ពីបរទេស មិនសូវមានការតភ្ជាប់មកសេដ្ឋកិច្ចក្នុងស្រុក។

ឯកឧត្តម វង្សី វិស្សុត បានគូសបញ្ជាក់ថា ក្នុងស្មារតីខាងលើនេះ រាជរដ្ឋាភិបាលបានខិតខំផ្គុំគោលនយោបាយជាច្រើន ទាំងគោលនយោបាយលើកទឹកចិត្តអ្នកវិនិយោគដែលផ្សារភ្ជាប់នឹង SMEs និងការកសាងសមត្ថភាព SMEs ដើម្បីផ្សារភ្ជាប់នឹងការវិនិយោគផ្ទាល់ពីបរទេស។ ជាក់ស្តែង រាជរដ្ឋាភិបាលក៏បានបង្កើត និងដាក់ឱ្យដំណើរការជាបន្តបន្ទាប់នូវមូលនិធិអភិវឌ្ឍន៍ជំនាញ, សហគ្រិនខ្មែរ, មជ្ឈមណ្ឌលបណ្តុះធុរកិច្ចថ្មី «តេជោ», មូលនិធិអភិវឌ្ឍន៍សហគ្រិនភាព, ធនាគារសហគ្រាសធុនតូច និងមធ្យម និងកម្មវិធីថ្នាលថ្នាក់ជាតិស្ដីពីធុរកិច្ចកម្ពុជា ថ្នាលផ្លាស់ប្ដូរទិន្នន័យកម្ពុជា (CamDX) និងប្រព័ន្ធចុះបញ្ជីអាជីវកម្មតាមថ្នាលបច្ចេកវិទ្យាព័ត៌មាន ព្រមទាំងការដាក់ឱ្យដំណើរការនូវគេហទំព័រព័ត៌មាន សម្រាប់សហគ្រាសធុនតូច និងមធ្យម (Khmer SME) ដើម្បីគាំទ្របន្ថែមដល់ការអភិវឌ្ឍប្រព័ន្ធអេកូឡូស៊ីសហគ្រិនភាព នៅកម្ពុជាទាំងមូល។

ឯកឧត្តមឧបនាយករដ្ឋមន្រ្តីប្រចាំការ បានបន្តថា ជារួម យើងបាននិងកំពុងសម្រេចបាននូវវឌ្ឍនភាពជាច្រើន ក៏ប៉ុន្តែក៏នៅមានភាពខ្វះចន្លោះខ្លះ ដែលទាមទារឱ្យយើងត្រូវបំពេញបន្ថែម ដូចជាគម្រោងមន្ទីរពិសោធន៍នវានុវត្តន៍កំពង់ធំ ដែលយើងសម្ពោធជាផ្លូវការនាពេលនេះ សំដៅធ្វើយ៉ាងណាឱ្យប្រព័ន្ធអេកូឡូស៊ីរបស់យើងមានភាពពេញលេញ និងគ្រប់ជ្រុងជ្រោយ ដើម្បីគាំទ្រដល់សហគ្រាសផលិត និងបញ្ហារៀបចំផលិតទៅដល់ទីផ្សារ ពិសេសនវានុវត្តន៍មានទាំងខាងផលិត ខាងសេវាកម្ម ទាំងខាងដំណើរការធុរកិច្ច ដើម្បីឱ្យមានថ្លៃថោក និងផលិតទៅមានគុណភាពល្អ។ ប៉ុន្តែដើម្បីមានវានុវត្តន៍ត្រូវមានកត្តាបី៖ ទី១.ការប្រើប្រាស់បច្ចេកវិទ្យាឌីជីថល ទី២.ការរៀបចំ និងការស្រាវជ្រាវម៉ូដែលធុរកិច្ច (Business Model) និង ទី៣.សហគ្រិនភាព។ កត្តាទាំងបីនេះបូកបញ្ចូលគ្នា បានចេញជានវានុវត្តន៍។

ឯកឧត្តម វង្សី វិស្សុត ក៏បានគូសរំលេចអំពីយុទ្ធសាស្រ្តនៃការអភិវឌ្ឍសេដ្ឋកិច្ច និងការលើកកម្ពស់ជីវភាពប្រជាជនខេត្តកំពង់ធំ ដោយផ្អែកទៅលើសក្តានុពលដ៏ច្រើនរបស់ខេត្តនេះ ដូចជាធនធានធម្មជាតិ, ធនធានវប្បធម៌ប្រវតិ្តសាស្រ្ត និងធនធានមនុស្ស ដែលសុទ្ធសឹងតែជាកត្តាជំរុញការអភិវឌ្ឍខេត្តកំពង់ធំឱ្យក្លាយទៅជាកម្លាំង និងជាជម្រកសេដ្ឋកិច្ចមួយដ៏ធំ សម្រាប់ប្រទេសជាតិទាំងមូល។

ឯកឧត្តមឧបនាយករដ្ឋមន្រ្តីប្រចាំការ បានបន្តថា បច្ចុប្បន្នខេត្តកំពង់ធំបានទាក់ទាញគម្រោងជាច្រើន ដូចជា គម្រោងវារីវប្បកម្ម គម្រោងចិញ្ចឹមគជ់ខ្យង គម្រោងសួនកសិឧស្សាហកម្មស្វាយចន្ទី គម្រោងកែច្នៃដំឡូងមី គម្រោងឧស្សាហកម្មវាយនភណ្ឌ និងគម្រោងអភិវឌ្ឍន៍វិស័យទេសចរណ៍ក្នុងក្រុងស្ទឹងសែន និងប្រាសាទសំបូរព្រៃគុក ជាដើម។ ក្រៅពីការទាក់ទាញវិនិយោគិន យើងក៏បានខំជំរុញឱ្យមានការវិនិយោគទៅលើហេដ្ឋារចនាសម្ព័ន្ធសំខាន់ៗផងដែរ ព្រោះថាការវិនិយោគក្ដី, ការធ្វើពាណិជ្ជកម្មក្តី បើគ្មានហេដ្ឋារចនាសម្ព័ន្ធ គឺគ្មាននរណាគេមកវិនិយោគទេ! ដូច្នេះ ហេដ្ឋារចនាសម្ព័ន្ធ គឺសំខាន់ណាស់។

ឯកឧត្តម វង្សី វិស្សុត បានលើកឡើងផងដែរថា គម្រោងមន្ទីរពិសោធន៍នវានុវត្តន៍កំពង់ធំ (InnoLab Kampong Thom) នឹងជួយសម្រួលដល់បេក្ខជនទាំង ២០ រូប ឱ្យទៅមុខ និងចូលដល់កម្រិតនវានុវត្តន៍ តាមរយៈការបណ្តុះបណ្តាល និងការផ្សារភ្ជាប់ទៅបណ្តាញទីផ្សារ ទៅក្នុងប្រព័ន្ធអេកូឡូស៊ី។ លទ្ធផលនេះនឹងឈានទៅដល់ការបង្កើតសហគ្រាសដែលមានសមត្ថភាពឱ្យបានកាន់តែច្រើនក្នុងខេត្តកំពង់ធំ ដែលយើងហៅថាមេទ័ពក្នុងវិស័យឯកជនក្នុងការផលិត ការផ្ដល់សេវា និងការកសាងការងាររបស់ប្រជាជននៅទីនេះ ដែលជាការបង្កើតទ្រព្យ និងការបង្កើតមូលដ្ឋានសេដ្ឋកិច្ចរបស់ខេត្តកំពង់ធំ ឱ្យក្លាយជាកម្លាំងសេដ្ឋកិច្ចក្នុងស្រុក។ ឯកឧត្តមមានជំនឿជឿជាក់ថា គម្រោងនេះនឹងបង្ហាញពីភាពជោគជ័យនៃម៉ូដែលធុរកិច្ច (Business Model) ដែលកន្លែងផ្សេងអាចយកធ្វើជាគំរូ និងអនុវត្តតាម។

ឯកឧត្តមឧបនាយករដ្ឋមន្រ្តីប្រចាំការ ក៏បានផ្តល់ការណែនាំឱ្យឧទ្យាននវានុវត្តន៍សង្គមអង្គរ (ASIP) គួរបង្កើតឱ្យមានយន្តការត្រួតពិនិត្យ និងវាយតម្លៃ (M&E) គម្រោង ហើយរដ្ឋបាលខេត្ត និងមន្ទីរពាក់ព័ន្ធត្រូវផ្ដល់កិច្ចសហការ គាំទ្រ និងសម្របសម្រួលនានា ដើម្បីធានាដល់ការអនុវត្តគម្រោងនេះប្រព្រឹត្តទៅដោយជោគជ័យ ព្រមទាំងបានលើកទឹកចិត្តដល់ SDF, KE និងដៃគូភាគីពាក់ព័ន្ធ ដោយរួមទាំងវិស័យឯកជន ដើម្បីគាំទ្រការអនុវត្ដគម្រោងមន្ទីរពិសោធន៍នវានុវត្ដន៍កំពង់ធំ បន្តចំនួន ២ឆ្នាំបន្ថែមទៀត និងនៅឆ្នាំបន្តបន្ទាប់ និងបន្ដកិច្ចគាំទ្រសកម្មភាពវគ្គបណ្តុះបណ្ដាលឱ្យឡើងដល់ចំនួន១០០សហគ្រាស នៅក្នុងឆ្នាំ២០២៨ ។

ជាថ្មីម្តងទៀត ឯកឧត្តមឧបនាយករដ្ឋមន្រ្តីប្រចាំការ បានលើកទឹកចិត្តដល់សហគ្រិនដែលជាប់ជ័យលាភីទាំង២០នាក់ ឱ្យបន្តពង្រីកអាជីវកម្មរបស់ខ្លួនឱ្យកាន់តែធំថែមទៀត ប្រឹងរៀនសូត្រ ប្រឹងរកស៊ី ហើយធ្វើការប្រកួតប្រជែងក្នុងអាជីវកម្ម ដោយយុត្តិធម៌ និងស្មើភាព ទាំងតម្លៃ និងស្តង់ដា ដើម្បីធ្វើពិពិធកម្មក្នុងស្រុកឱ្យកាន់តែរីកដុះដាលជាលំដាប់ សំដៅបង្កើនការផលិតក្នុងស្រុក ដើម្បីជំនួសឱ្យការនាំចូលផង និងបង្កើនការនាំចេញផងដែរ៕

អត្ថបទ៖ ប៊ី

The post InnoLab Kampong Thom នឹងជួយប្រែក្លាយខេត្តកំពង់ធំ ទៅជាប្រព័ន្ធអេកូឡូស៊ីនវានុវត្តន៍មួយ appeared first on Millions times.

សហគមន៍កសិកម្មទំនើបប្រាសាទសំបូររុងរឿង គឺជាសហគមន៍ទំនើបមួយ ក្នុងចំណោមសហគមន៍ទំនើបទាំង ៣ (សហគមន៍កសិកម្មទំនើបកំពង់ធំសាលាវិស័យ និងសហគមន៍កសិកម្មទំនើបទំរីងកំពង់ធំ) ដែលផ្តោតលើដំណាំស្វាយចន្ទី នៅក្នុងខេត្តកំពង់ធំ ដោយមានសមាជិកសរុបចំនួន ១៥៣គ្រួសារ និងមានផ្ទៃដីផលិតកម្ម ចំនួន ៦៤៤ហិកតា ដោយរំពឹងបរិមាណផលគ្រាប់ស្វាយចន្ទីសើមប្រមាណ ១០០០តោន។  

តាមដានជាមួយយើង៖ Million Times

ក្នុងឱកាសចុះជួបសំណេះសំណាលជាមួយប្រជាសហគមន៍ សម្តេច ហ៊ុន ម៉ាណែត បានកោតសរសើរដល់សហគមន៍ ក្នុងការរៀបចំផែនការបានយ៉ាងល្អ ដោយមានយុទ្ធសាស្ត្រក្នុងការលក់គ្រាប់ស្វាយចន្ទីសើម​ ៧០%​ និងគ្រាប់ស្វាយចន្ទីស្ងួត​ ៣០%​ ជាមួយនឹងការរៀបចំធ្វើផលិតកម្មកសិកម្មតាមកិច្ចសន្យាថ្លៃល្អជាងមុន ១០-១៥% ។ បន្ថែមពីនេះ សម្តេចនាយករដ្ឋមន្រ្តីក៏វាយតម្លៃខ្ពស់ដល់ការជួយសម្របសម្រួល និងជ្រោមជ្រែងរបស់ក្រសួងកសិកម្ម រុក្ខាប្រមាញ់ និងនេសាទ ក្នុងការអនុវត្តកម្មវិធីគោលនយោបាយអាទិភាពទី៦ របស់រាជរដ្ឋាភិបាល នីតិកាលទី៧ ក្នុងគោលដៅប្រែក្លាយការធ្វើកសិកម្មបែបគ្រួសារ ឱ្យទៅជាសហគ្រាសសេដ្ឋកិច្ចកសិកម្មដ៏រឹងមាំ មានសមាហរណកម្មខ្ពស់ មានសេដ្ឋកិច្ចមាត្រដ្ឋាន និងមានសមត្ថភាពប្រកួតប្រជែងទាំងបរិមាណ និងគុណភាព ។

បន្ថែមពីនេះទៀត សម្តេចបានគូសបញ្ជាក់ថា ការចងក្រងជាសហគមន៍កសិកម្មទំនើប ប្រជាកសិករ ក៏អាចទទួលបាននូវយន្តការគាំទ្រចំនួនពីរ ដូចជា៖ ១/. ក្រុមប្រឹក្សាគោលនយោបាយសហគមន៍កសិកម្ម និងទី២/. មូលនិធិអភិវឌ្ឍសហគមន៍កសិកម្ម។

សម្តេចនាយករដ្ឋមន្រ្តីបានថ្លែងកត់សម្គាល់ថា ជាលទ្ធផលដ៏វិជ្ជមានមួយក្នុងការកែប្រែការធ្វើកសិកម្មបែបគ្រួសារ មកក្លាយជាសហគ្រាសសេដ្ឋកិច្ចកសិកម្មរឹងមាំ។

រាជរដ្ឋាភិបាល តាមរយៈក្រសួងកសិកម្ម ជាសេនាធិការ បានរៀបចំបង្កើតជាសហគមន៍កសិកម្មទំនើបបានចំនួន ៩ មានដូចជា៖ សហគមន៍កសិកម្មទំនើបស្រូវនាងអំ, បន្លែសរសី, ទំរឹងកំពង់ធំ, ប្រាសាទសំបូររុងរឿង, កំពង់ធំសាលាវិស័យ, បន្លែផ្ទះសំណាញ់ត្រាំកក់, ស្រូវផ្ការំដួលខ្នារឆ្មារ, បន្លែកោះខ្សាច់ទន្លេ និង សហគមន៍កសិកម្មទំនើបម្រេចមេមត់ត្បូងឃ្មុំ ព្រមទាំងកំពុងសម្របសម្រួល និងជ្រោមជ្រែងក្នុងការបង្កើតសហគមន៍ថ្មីមួយទៀតក្នុងស្រុកកំពង់ស្វាយ និងក្រុងស្ទឹងសែន ដែលនឹងលេចជារូបរាងឆាប់ៗនាពេលខាងមុខ ហើយសហគមន៍ថ្មីនេះ គឺផ្តោតលើការដាំស្រូវសែនក្រអូប០១ ដែលជាដំណាំយុទ្ធសាស្ត្រមួយរបស់កម្ពុជា៕

អត្ថបទ៖ សាងតេជៈ រូបភាព៖ ផេកនាយករដ្ឋមន្រ្តី

The post សម្តេច ហ៊ុន ម៉ាណែត កោតសរសើរសហគមន៍នៅខេត្តកំពង់ធំ រៀបចំផែនការ និងយុទ្ធសាស្រ្តលក់គ្រាប់ស្វាយចន្ទី appeared first on Millions times.

លោក វង្សី វិស្សុត ប្រធានក្រុមការងាររាជរដ្ឋាភិបាលចុះមូលដ្ឋានខេត្តកំពង់ធំ បានលើកឡើងថា ការរៀបចំផែនការអភិវឌ្ឍន៍វិស័យទេសចរណ៍សម្រាប់ខេត្តកំពង់ធំ ពិតជាមានភាពចាំបាច់ណាស់ ដើម្បីបង្កើនតម្លៃបន្ថែម និងបន្ថែមសក្ដានុពលនៃការទាក់ទាញភ្ញៀវទេសចរ ទាំងក្នុងស្រុក និងបរទេស។ លោកថា ផែនការនេះនឹងជួយធ្វើឱ្យខេត្តកំពង់ធំលែងគ្រាន់តែជាកន្លែងភ្ញៀវឆ្លងកាត់ ឬទៅហួសមកហួសដូចមុន ពោលគឺខេត្តកំពង់ធំនឹងក្លាយជាខេត្តគោលដៅកម្សាន្តអន្តរខេត្តទី១ មុននឹងទេសចរទៅដល់ខេត្តសៀមរាប ឬខេត្តព្រះវិហារ ឬក៏ដល់ភ្នំពេញ ឬជាខ្សែច្រវាក់គោលដៅទេសចរណ៍មួយ តាមទិសពីភ្នំពេញទៅសៀមរាប-អង្គរ ឬពីសៀមរាប-ភ្នំពេញ ឬក៏ភ្ជាប់ទៅគោលដៅទេសចរណ៍ផ្សេងៗទៀត។

តាមដានជាមួយយើង៖ Million Times

ក្នុងកិច្ចប្រជុំពិគ្រោះយោបល់ស្ដីពីផែនការអភិវឌ្ឍន៍វិស័យទេសចរណ៍ខេត្តកំពង់ធំ កាលពីថ្ងៃទី២១ ខែមករា ឆ្នាំ២០២៥ លោក វង្សី វិស្សុត បានចង្អុលទិសដៅអាទិភាពរៀបចំផែនការអភិវឌ្ឍន៍វិស័យទេសចរណ៍ខេត្តកំពង់ធំ សម្រាប់អនុវត្តក្នុងរយៈពេល ៣ ឬ ៤ឆ្នាំ និងណែនាំឱ្យសិក្សារៀបចំផែនការអភិវឌ្ឍន៍តំបន់សំបូរព្រៃគុក ដោយត្រូវថ្ពក់ជាមួយសហគមន៍ និងតំបន់សក្តានុពលទេសចរណ៍ជុំវិញផ្សេងទៀត ឱ្យក្លាយជាផែនការអភិវឌ្ឍន៍ពហុទេសចរណ៍។ ជាមួយគ្នានេះ ធ្វើការសិក្សារៀបចំផែនការអភិវឌ្ឍន៍តំបន់ក្នុងក្រុងស្ទឹងសែន ឱ្យមានលក្ខណៈរស់រវើក និងកាន់តែទាក់ទាញបន្ថែម តាមរយៈការបង្កើតផលិតផលទេសចរណ៍ថ្មីៗបន្ថែមទៀត ដូចជា៖ ផ្សាររាត្រី និងការជិះទូកគយគន់ទេសភាពជាដើម។ល។ 

ក្រៅពីនេះ ត្រូវរៀបចំឡើងវិញតំបន់ភ្នំសន្ទុកឱ្យក្លាយជាគោលដៅទេសចរណ៍ដ៏ទាក់ទាញខាងផ្នែកសាសនា, តំបន់ព្រៃប្រស់, សួនទឹកបឹងសំរិទ្ធ, តំបន់ព្រៃលិចទឹកបឹងទន្លេសាប និងតំបន់សហគមន៍ចន្ទី ព្រមទាំងសកម្មភាពទាក់ទាញមួយចំនួនទៀត ដូចជាការរៀបចំវត្តគំរូ, មជ្ឈមណ្ឌលវិបស្សនា និងការដាំដើមឈើជាដើម។ ក៏ប៉ុន្តែការរៀបចំផលិតផលទេសចរណ៍ទាំងនេះ ក៏ត្រូវភ្ជាប់ការគិតគូរដល់ទិដ្ឋភាពទេសចរណ៍សុខភាព (wellness tourism) និងគុណតម្លៃនៃវប្បធម៌ប្រពៃណី ស្ថានភាពធម្មជាតិរបស់សហគមន៍មូលដ្ឋានផងដែរ។

លោកក៏បានប្រាប់ឲ្យក្រុមការងារ និងអាជ្ញាធរខេត្ត យកទៅគិតគូរបន្ទាន់ចំពោះមុខ ដូចជាការរៀបចំមុខម្ហូបដែលមានរសជាតិឆ្ងាញ់ និងមុខទំនិញដែលប្លែក (ក្រៅពីចន្ទី) តែជាលក្ខណៈសម្គាល់ពិសេសសម្រាប់ខេត្តកំពង់ធំ សម្រាប់បម្រើ និងលក់ជូនភ្ញៀវ និងអ្នកដំណើរទូទៅដែលឆ្លងកាត់ និងការបណ្តុះបណ្តាល។ ក៏ប៉ុន្តែត្រូវយកចិត្តទុកដាក់ខ្ពស់ទៅដល់បញ្ហាតម្លៃ ភាពស្អាត គុណភាព និងអនាម័យ ព្រមទាំងសេវា៕

អត្ថបទ៖ សាងតេជៈ រូបភាព៖ ផេកទីស្តីការគណៈរដ្ឋមន្រ្តី

The post ខេត្តកំពង់ធំលែងគ្រាន់តែជាកន្លែងភ្ញៀវឆ្លងកាត់ ឬទៅហួសមកហួសដូចមុន appeared first on Millions times.

ទីតាំងសំណង់ទំនប់កំពង់គោ មានចំងាយប្រមាណ ១៥គីឡូម៉ែត្រ ពីទីរួមខេត្តកំពង់ធំផ្នែកខាងក្រោមតាមបណ្តោយស្ទឹងសែន ស្ថិតនៅក្នុងភូមិកំពង់គោលើ ឃុំកំពង់គោ ស្រុកកំពង់ស្វាយ ខេត្តកំពង់ធំ។

តាមដានជាមួយយើង៖ Million Times

គម្រោងសាងសង់ប្រព័ន្ធធារាសាស្ត្រទំនប់កំពង់គោនេះ គ្របដណ្ដប់ក្នុងក្រុង-ស្រុកចំនួន៥ នៃខេត្តកំពង់ធំ ដែលរួមមាន ក្រុងស្ទឹងសែន ស្រុកកំពង់ស្វាយ ស្រុកសន្ទុក ស្រុកប្រាសាទបល្ល័ង្គ និងស្រុកសណ្តាន់ និងមានសក្តានុពលស្រោចស្រពលើផ្ទៃដីបង្កបង្កើនផល ប្រមាណ ៣០០ ០០០ ហិកតា រួមមានដំណាំស្រូវ និងដំណាំរួមផ្សំគ្រប់ប្រភេទ ព្រមទាំងបម្រើដល់ការប្រើប្រាស់ក្នុងជីវភាពរស់នៅប្រចាំថ្ងៃរបស់បងប្អូនប្រជាពលរដ្ឋ។

សូមបញ្ជាក់ថា ការងារសំខាន់ៗ នៃគម្រោងសាងសង់ប្រព័ន្ធធារាសាស្ត្រទំនប់កំពង់គោ រួមមាន សំណង់កាត់ស្ទឹងសែនប្រវែង ២៨០ម៉ែត្រ សំណង់សិល្បការ្យតូចធំចំនួន ១២០កន្លែង ស្តារស្ទឹងស្លាប់ ២៥គីឡូម៉ែត្រ សាងសង់ទំនប់សណ្តស្ទឹងសែន ៣០គីឡូម៉ែត្រ និងរៀបថ្មជើងទេរច្រាំងស្ទឹង ៥គីឡូម៉ែត្រ៕

អត្ថបទ៖ សេដ្ឋានី រូបភាព៖ ក្រសួងធនធានទឹក

The post ចាប់ផ្តើមសាងសង់ប្រព័ន្ធធារាសាស្ត្រទំនប់កំពង់គោដែលស្រោចស្រពលើផ្ទៃដីបង្កបង្កើនផលប្រមាណ ៣០ម៉ឺនហិកតា appeared first on Millions times.