តាមដានជាមួយយើង៖ Million Times

ក្នុងជំនួបពិភាក្សាការងារនៅព្រឹកថ្ងៃពុធនេះ សម្តេច ហ៊ុន សែន បានចាត់ទុក​ដំណើរ​ទស្សន​កិច្ច​របស់​លោក Lawrence Wong នៅ​កម្ពុជានាពេលនេះ ជាផ្នែកដ៏សំខាន់ នៃការជំរុញទំនាក់ទំនងរវាងកម្ពុជា និង​សិង្ហបុរី​ឲ្យ​កាន់​តែ​ល្អប្រសើរ​រីកចម្រើនបន្ថែមទៀត។

ក្នុង​ឱកាសនោះ សម្ដេចបានលើកឡើង​អំពី​ការ​ពង្រីក​ទំនាក់​ទំនង​រវាង​ប្រទេស​ទាំង​ពីរ​បន្ថែម​ទៀត​ ជាពិសេសតាមរយៈវិស័យពាណិជ្ជកម្ម សេដ្ឋកិច្ច និងវិស័យ​ទេសចរណ៍​ប្រទេស​ទាំង​ពីរ​ផង​ដែរ​។ សម្ដេចចង់ឱ្យមានជើងហោះហើរ កាន់តែច្រើនបន្ថែមទៀត ពីសិង្ហបុរីមកកាន់កម្ពុជា ជា​ពិសេស​នៅ​ពេល​ដែល​កម្ពុជា​ដាក់​ឱ្យ​ដំណើរ​ការ​ព្រលាន​យន្ត​ហោះ​អន្តរជាតិ​តេជោ​ថ្មី​នា​ពេល​ឆាប់​ខាងមុខ។

ក្នុងចំណោមបណ្តាប្រទេសសមាជិកអាស៊ានទាំងអស់ មានប្រទេសចំនួន៥ ដែលជាដៃ​គូ​ពាណិជ្ជកម្មកំពូលរបស់កម្ពុជា រួមមាន៖ វៀតណាម ថៃ សិង្ហបុរី ម៉ាឡេស៊ី និងឥណ្ឌូនេស៊ី។ ដោយឡែក ប្រទេសសិង្ហបុរី នាំចូលទំនិញពីកម្ពុជាក្នុងទំហំទឹកប្រាក់ចំនួន ២៦១​លានដុល្លារ នៅឆ្នាំ២០២៤។

តាមរយៈរបាយការណ៍របស់រដ្ឋលេខាធិការដ្ឋានអាកាសចរណ៍ស៊ីវិល (SSCA) បានបង្ហាញពីនិន្នាការវិជ្ជមានបន្ថែមទៀត ក្នុងរយៈពេល ៤ខែ ចុងក្រោយនេះ មានជើងហោះហើរចេញ-ចូល​(ទ្វេទិស)​ឆ្លងកាត់ប្រទេសកម្ពុជា​មានជាង ២.២ ម៉ឺនជើង ពោលគឺកើន​ឡើង ១៧​% បើ​ធៀប​នឹង​រយៈ​ពេល​ដូចគ្នា​ក្នុង​ឆ្នាំ២០២៤។

តាមរបាយការណ៍ដដែល ប្រទេសចំនួន៦ ​ក្នុងចំណោមប្រទេសទាំង ១២ ដែលមានចំនួនជើងហោះហើរ និងចំនួនអ្នកដំណើរតាមផ្លូវអាកាសចេញ-ចូល​កម្ពុជាច្រើនជាងគេ គឺ​​ប្រទេសថៃ ចិន​​ វៀតណាម ​សិង្ហបុរី ម៉ាឡេស៊ី និងប្រទេស​កូរ៉េ៕

The post សម្តេច ហ៊ុន សែន ប្រាប់នាយករដ្ឋមន្រ្តីសឹង្ហបុរី ឲ្យជំរុញពាណិជ្ជកម្ម សេដ្ឋកិច្ច និងទេសចរណ៍​ប្រទេស​ទាំង​ពីរ appeared first on Millions times.

ក្នុងសន្និសីទសារព័ត៌មាន ស្ដីពី លទ្ធផលទស្សនកិច្ចផ្លូវការរបស់សម្តេចធិបតី ហ៊ុន ម៉ាណែត នាយករដ្ឋមន្រ្តីនៃកម្ពុជា នៅប្រទេសសិង្ហបុរី នាយប់ថ្ងៃទី ១៩ ខែមិថុនានេះ លោក ហ្សង់ ហ្វ្រង់ស្វ័រតាន់ រដ្ឋមន្រ្តីប្រតិភូអមនាយករដ្ឋមន្រ្តី បានថ្លែងថា ជាការពិត សិង្ហបុរីជាប្រទេសមួយដែលជោគជ័យលើវិស័យសេដ្ឋកិច្ច។ សព្វថ្ងៃប្រាក់ចំណូលប្រចាំឆ្នាំរបស់ប្រជាជនសិង្ហបុរីម្នាក់ៗ សឹងតែខ្ពស់ជាងគេនៅលើពិភពលោក ដោយខ្ពស់ជាងប្រាក់ចំណូលប្រចាំរបស់ប្រជាជនអាមេរិក ប្រជាជនអង់គ្លេស និងប្រជាជនបារាំងម្នាក់ៗ។

តាមដានជាមួយយើង៖ Million Times

លោកបន្តថា ភាពជោគជ័យរបស់សិង្ហបុរី មិនមែនធ្វើតម្រាប់តាមប្រទេសណាមួយទាំងស្រុងនោះឡើយ ដោយលោក លី ក្វាន់យូ អតីតនាយករដ្ឋមន្ត្រីដំបូងរបស់សិង្ហបុរី បានបង្កើតនូវគំរូអភិវឌ្ឍមួយដែលជារបស់សិង្ហបុរីសុទ្ធសាធ ទាំងការគ្រប់គ្រង និងទាំងការអភិវឌ្ឍសេដ្ឋកិច្ច។

ពាក់ព័ន្ធនឹងភាពជោគជ័យរបស់សិង្ហបុរីនេះ គឺកម្ពុជាចាប់អារម្មណ៍ ហើយក៏ចង់រៀនសូត្រអំពីគំរូអភិវឌ្ឍរបស់ប្រទេសនេះ។ ប៉ុន្តែកម្ពុជាគ្មានបំណងធ្វើតាមសិង្ហបុរី ១០០ភាគរយនោះទេ ពីព្រោះកម្ពុជាជាកម្ពុជា ហើយសិង្ហបុរីជាសិង្ហបុរី ប្រជាជនកម្ពុជាជាប្រជាជនកម្ពុជា ប្រជាជនសិង្ហបុរីជាប្រជាជនសិង្ហបុរី។ ម្យ៉ាងទៀត វប្បធម៌ ប្រវត្តិសាស្រ្ដ និងផ្នត់គំនិតរវាងប្រជាជនសិង្ហបុរី និងប្រជាជនកម្ពុជា មិនដូចគ្នានោះឡើយ។

លោករដ្ឋមន្រ្តីប្រតិភូអមនាយករដ្ឋមន្រ្តី បានបញ្ជក់ថា «យើងអាចសិក្សាយកចំណុចខ្លាំងមកអនុវត្ត ប៉ុន្តែត្រូវ​ជៀសវាង ហើយនេះគឺជាការមួយដែលសម្ដេចធិបតី​ ធ្លាប់លើកឡើងយ៉ាងច្បាស់ យើងត្រូវជៀសវាងយកគំរូតាមប្រទេសណាមួយ ១០០ភាគរយ ឬ ២០០ភាគរយ យកចំណុចខ្លាំងមកសិក្សា ហើយអនុវត្តតាម»។

លោក ហ្សង់ ហ្វ្រង់ស្វ័រតាន់ បានលើកឡើងដែរថា មេរៀនមួយទៀតដែលសំខាន់ អាចរៀនសូត្រពីសិង្ហបុរីបាននោះ គឺសន្តិភាព និងស្ថេរភាពនយោបាយ គឺជាកត្តាគន្លឹះសម្រាប់ការអភិវឌ្ឍសេដ្ឋកិច្ច។ តាំងពីឆ្នាំ ១៩៦៥មក សិង្ហបុរីជាប្រទេសមួយមិនដែលស្គាល់សង្រ្គាម ហើយសូម្បីតែអស្ថេរភាពនយោបាយ ក៏សិង្ហបុរីមិនដែលស្គាល់ និងមិនដែលជួបប្រទះ។

មន្ត្រីជាន់ខ្ពស់រូបនេះដដែល បានគូសបញ្ជាក់ថា បើកម្ពុជាចង់រៀនពីសិង្ហបុរី ចូរនាំគ្នារក្សាសន្តិភាព ស្ថេរភាពនយោបាយ និងឲ្យតម្លៃដល់សណ្ដាប់ធ្នាប់សង្គម ព្រមទាំងប្រឹងប្រែងអភិវឌ្ឍន៍សេដ្ឋកិច្ច។ បើធ្វើដូច្នេះបានជារៀងរហូត កម្ពុជាប្រាកដជាស្គាល់ភាពរុងរឿងមិនខាន៕

អត្ថបទ៖ វីរៈ​ រូបភាព៖​ ក្រុមព័ត៌មានសម្ដេចធិបតី

The post កម្ពុជា អាចសិក្សាពីចំណុចខ្លាំងរបស់សិង្ហបុរី តែគ្មានបំណងធ្វើតាម ១០០ភាគរយទេ appeared first on Millions times.

ការអះអាងខាងលើនេះ ស្របពេលដែលលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា (គ.វ.ក.) នៅថ្ងៃទី ១៨ ខែមិថុនានេះ បានទទួលជួបពិភាក្សាការងារជាមួយលោក Kow Juan Tiang នាយកប្រតិបត្តិសហគ្រាសសិង្ហបុរី (Enterprise Singapore-ESG) ដែលជាស្ថាប័នរដ្ឋទទួលបន្ទុកកិច្ចអភិវឌ្ឍន៍សហគ្រាស ដើម្បីពង្រឹង និងពង្រីកកិច្ចសហប្រតិបត្តិការជំរុញវិនិយោគទ្វេទិសរវាងកម្ពុជា និងសិង្ហបុរី។

តាមដានជាមួយយើង៖ Million Times

ក្នុងជំនួបនេះ លោកអគ្គលេខាធិការ បានបញ្ជាក់អំពីលទ្ធភាពធ្វើការរួមគ្នាជាមួយសហគ្រាសសិង្ហបុរី ដើម្បីជំរុញកិច្ចសហប្រតិបត្តិការវិនិយោគ សំដៅបញ្ជ្រាបការយល់ដឹងពីកាលានុវត្តភាព និងសក្ដានុពលវិនិយោគលើវិស័យអាទិភាពរបស់កម្ពុជា មានជាអាទិ៍៖ វិស័យយានយន្ដ និងអេឡិចត្រូនិច, ឡូជីស្ទីក, និងការកែច្នៃផលិតផលកសិកម្មសម្រាប់ទីផ្សារក្នុងស្រុក និងបម្រើការនាំចេញ រាប់បញ្ចូលទាំងការកែច្នៃកៅស៊ូ ស្វាយចន្ទី និងដំឡូងមី ជាដើម។

នៅក្នុងជំនួបនេះដែរ លោក Kow Juan Tiang នាយកប្រតិបត្តិសហគ្រាសសិង្ហបុរី បានបញ្ជាក់អំពីកិច្ចខិតខំប្រឹងប្រែងរបស់សហគ្រាសសិង្ហបុរី ក្នុងការពង្រីកមូលដ្ឋានវិនិយោគរបស់ក្រុមហ៊ុនសិង្ហបុរី លើការដ្ឋានចាស់ក្នុងគោលនយោបាយថ្មី ដែលកម្ពុជាគឺជាផ្នែកមួយសម្រាប់ក្រុមហ៊ុនសិង្ហបុរី ដាក់ការផ្តោតដោយយកចិត្តទុកដាក់ខ្ពស់បំផុត។

បន្ថែមលើនេះ នាយកប្រតិបត្តិសហគ្រាសសិង្ហបុរី ក៏បានសង្កត់ធ្ងន់លើការបន្តរួមគ្នាពង្រឹងកិច្ចសហប្រតិបត្តិការវិនិយោគ សំដៅជំរុញឲ្យក្រុមហ៊ុនក្នុងស្រុករបស់ខ្លួន សម្លឹងមើលលទ្ធភាពក្នុងការបណ្ដាក់ទុនវិនិយោគនៅកម្ពុជា ក្នុងការកែច្នៃផលិតផលកសិកម្ម, កសិ-ចំណីអាហារ, និងការសាងសង់ហេដ្ឋារចនាសម្ព័ន្ធ។

កាលពីខែឧសភា ឆ្នាំ ២០២៤កន្លងទៅនេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ២៥ ដែលមានទុនវិនិយោគជាង ២៤៦លានដុល្លារ។ ចំពោះគម្រោងវិនិយោគនេះ ប្រទេសចិនឈរនៅលំដាប់លេខរៀងទី ១ ដោយបានរួមចំណែកជិត ៥០ភាគរយ នៃទុនវិនិយោគសរុប។ ចំណែកឯការវិនិយោគក្នុងស្រុកគ្របដណ្ដប់ជិត ៣១ភាគរយឈរនៅលេខរៀងទី ២ ហើយប្រទេសសិង្ហបុរីឈរនៅលេខរៀងទី ៣ ដោយបានរួមចំណែកជាង ១០ភាគរយ នៃទុនវិនិយោគសរុប៕

អត្ថបទ៖ វីរៈ រូបភាព៖ ក្រុមប្រឹក្សាអភិវឌ្ឍន៍កម្ពុជា

The post ស្ថាប័នអភិវឌ្ឍន៍សហគ្រាសសិង្ហបុរី នឹងជំរុញក្រុមហ៊ុនក្នុងស្រុករបស់ខ្លួនដាក់ទុនវិនិយោគនៅកម្ពុជា appeared first on Millions times.

សេចក្ដីប្រកាសព័ត៌មានរបស់ក្រសួងការបរទេសកម្ពុជា បានឲ្យដឹងថា អមដំណើរសម្តេចនាយករដ្ឋមន្ត្រី រួមមាន៖ លោក សុខ ចិន្តាសោភា រដ្ឋមន្ត្រីការបរទេស និងសហប្រតិបត្តិការអន្តរជាតិ ព្រមទាំងរដ្ឋមន្ត្រី មន្ត្រីសំខាន់ៗនៃរាជរដ្ឋាភិបាល និងតំណាងពីសភាពាណិជ្ជកម្មកម្ពុជា។

បើតាមក្រសួងការបរទេស សម្តេចនាយករដ្ឋមន្ត្រី នឹងមានជំនួបទ្វេភាគីជាមួយលោក ឡរ៉េន វ៉ុង នាយករដ្ឋមន្ត្រីសិង្ហបុរី ដែលក្នុងឱកាសនោះថ្នាក់ដឹកនាំទាំងពីរ នឹងផ្លាស់ប្តូរទស្សនៈគ្នាអំពីមធ្យោបាយនានា ក្នុងការធ្វើឲ្យកាន់តែស៊ីជម្រៅនូវទំនាក់ទំនងទ្វេភាគី និងពង្រីកកិច្ចសហប្រតិបត្តិការលើវិស័យជាច្រើន ខណៈដែលប្រទេសទាំងពីរនឹងប្រារព្ធខួបអនុស្សាវរីយ៍លើកទី ៦០ នៃការបង្កើតទំនាក់ទំនងការទូតនៅឆ្នាំក្រោយ។

បន្ថែមទៀតនោះនាយករដ្ឋមន្ត្រីទាំងពីរ ក៏រំពឹងថា នឹងពិភាក្សាលើបញ្ហាតំបន់ និងអន្តរជាតិ ដែលជាផលប្រយោជន៍ និងក្តីបារម្ភរួម។ បន្ទាប់ពីជំនួបពិភាក្សានោះ នឹងមានការចុះហត្ថលេខាលើឯកសារកិច្ចសហប្រតិបត្តិការមួយចំនួន ហើយគម្រោងច្រករបៀងតម្លាភាពហិរញ្ញវត្ថុ នឹងត្រូវដាក់ឲ្យដំណើរការជាផ្លូវការ។

បើតាមក្រសួងការបរទេសដដែល ក្នុងឱកាសនៃទស្សនកិច្ចនេះ សម្តេចនឹងជួបសម្តែងការគួរសមដោយឡែកពីគ្នាជាមួយលោក ថាមេន ស្ពានមូហ្គារ៉ាត់ណាម ប្រធានាធិបតីសិង្ហបុរី និងលោក លី សៀនឡុង ទេសរដ្ឋមន្ត្រីសិង្ហបុរី ផងដែរ។

ក្រៅពីនេះទៀត សម្តេចនឹងចូលរួមក្នុងវេទិកាធុរកិច្ចកម្ពុជា-សិង្ហបុរី ដែលមានការចូលរួមពីតំណាងរដ្ឋាភិបាល និងភាគីពាក់ព័ន្ធនានា។ សម្តេចក៏នឹងទស្សនាវិទ្យាស្ថានពហុបច្ចេកទេសណានយ៉ាង និងមជ្ឈមណ្ឌលនវានុវត្តន៍ សម្រាប់ឧបករណ៍អេឡិចត្រូនិក និងអ៊ុនធឺណិត (Electronics and Internet of Things) ព្រមទាំងទស្សនាអាគារហេដ្ឋារចនាសម្ព័ន្ធរបស់ក្រុមហ៊ុន Keppel (Keppel’s Infrastructure@Changi)៕

អត្ថបទ៖ វីរៈ រូបភាព៖ ក្រសួងការបរទេស

The post សម្ដេច ហ៊ុន ម៉ាណែត នឹងបំពេញទស្សនកិច្ចនៅសិង្ហបុរី ដើម្បីពង្រីកកិច្ចសហការលើវិស័យជាច្រើន appeared first on Millions times.