ជារៀងរាល់ឆ្នាំ ក្រុមហ៊ុន ម៉ុង ឫទ្ធី គ្រុប បានប្រមូលទិញកសិផលសំខាន់ៗពីប្រជាកសិករ ក្នុងទំហំទឹកប្រាក់ប្រមាណជាង ៤០លានដុល្លារអាមេរិក ដោយកសិផលទាំងនោះត្រូវយកទៅកែច្នៃធ្វើជាចំណីសត្វ។ នេះបើតាមការឱ្យដឹងពីអ្នកឧកញ៉ា ម៉ុង ឬទ្ធី អគ្គនាយកក្រុមហ៊ុន ម៉ុង ឫទ្ធី គ្រុប។
Million Times 
តាមរយៈទំព័រហ្វេសប៊ុកផ្លូវការ នៅថ្ងៃទី៦ ខែវិច្ឆិកានេះ អ្នកឧកញ៉ា ម៉ុង ឬទ្ធី បានឱ្យដឹងថា តាំងនាមអ្នកឧកញ៉ា ជាអ្នកមានបទពិសោធធ្វើពាណិជ្ជកម្មលើវិស័យ កសិកម្ម កសិ-ឧស្សាហកម្ម អស់រយៈពេលជាង៣០ឆ្នាំកន្លមកហើយ រហូតមកដល់ពេលបច្ចុប្បន្ននេះ ក៏នៅតែបន្តប្រកបមុខរបរនេះដោយមិនបោះបង់ បើទោះបីជាត្រូវជួបឧបសគ្គតូចធំយ៉ាងណាក្ដី ចំពោះរឿងកសិផលឡើងថ្លៃចុះថ្លៃវាជារឿងធម្មតារបស់ពិភពលោកនេះទៅហើយ។
អ្នកឧកញ៉ា ម៉ុង ឬទ្ធី បានបន្ថែមថា «យើងមិនអាចស្តីបន្ទោសបង្អាប់បង្ខូចកេរ្ដិ៍ឈ្មោះអ្នកណាបានទេ បើចំពោះរាជរដ្ឋាភិបាល ចង់ឱ្យតែប្រជាជនលក់កសិផលបានតម្លៃថ្លៃទេ និយាយដោយឡែកជាបន្តបន្ទាប់រហូតមកដល់ពេលបច្ចុប្បន្ននេះ ខ្ញុំបានជួយប្រមូលទិញកសិផលដូចជាពោត ដំឡូងមី កន្ទក់ ចុងអង្ករ ពេលខ្លះជួយទិញស្រូវស្រាល យកមកិនជាសម្រូបពីកសិករយើង»។
អគ្គនាយកក្រុមហ៊ុន ម៉ុង ឫទ្ធី គ្រុប ដដែល បានបន្ថែមថា ក្រុមហ៊ុនរបស់ខ្លួន ត្រូវចំណាយប្រមាណជាង ៤០លានដុល្លារអាមេរិកជារៀងរាល់ឆ្នាំ ដើម្បីប្រមូលទិញកសិផលសំខាន់ៗពីប្រជាកសិករ សម្រាប់យកទៅចូលរោងចក្រកែច្នៃធ្វើជាចំណីសត្វ ដោយមានសាយឡូ និងឃ្លាំងសម្រាប់ស្តុកគ្រាប់ធញ្ញជាតិប្រមាណ១០០ ០០០សែនតោន។
ក្នុងសារបង្ហោះនៅលើបណ្ដាញសង្គមហ្វេសប៊ុក ដដែលនេះ អ្នកឧកញ៉ា ម៉ុង ឬទ្ធី មានចម្ងល់ជាខ្លាំងចំពោះអ្នកយកលុយជាច្រើន មកដាក់តម្រៀបថតបង្ហោះហ្វេសប៊ុកថា នឹងយកលុយនោះមកជួយទិញស្រូវពីកសិករ តើពួកគាត់ធ្លាប់មានបទពិសោធ និងបច្ចេទេស លើមុខរបរនេះដែរឬអត់ទេ? ហើយគាត់មានជាមូលដ្ឋានគ្រឹះ ដូចជាឡសម្ងួត សាយឡូ ឃ្លាំងស្តុក ម៉ាស៊ីនកិនស្រូវ និងមានទីផ្សារ នៅទីណា?
អត្ថបទ៖ វីរៈ រូបភាព៖ ហ្វេសប៊ុកអ្នកឧកញ៉ា ម៉ុង ឬទ្ធី