គំរូកង់បីខ្មែរ ដំឡើងដោយកូនអ្នកខេត្តបន្ទាយមានជ័យ បានរៀបចំរួចរាល់ហើយ ដែលជាប្រភេទកង់បី Plugin Hybrid System។ នេះបើតាមការឱ្យដឹងពីលោក ឈួន រតនា អ្នកដំឡើងកង់បីខ្មែរ ប្រាប់ Million Times នៅថ្ងៃទី ១២ ខែតុលានេះ។

លោក ឈួន រតនា ប្រាប់ថា មកដល់ពេលនេះ គំរូកង់បីខ្មែរ​របស់លោក ត្រូវបានរៀបចំដំឡើងរួចរាល់ហើយ។ សម្រាប់អ្នកដែលចាប់អារម្មណ៍ចង់កម្ម៉ង់ទិញ អាចទៅមើលបាន។ លោកថា បច្ចុប្បន្នរូបលោកនៅបន្តរង់ចាំខាងធនាគារចុះសិក្សា ដើម្បីអាចឱ្យលោកមានទុនសម្រាប់ការដំឡើងកង់បីខ្មែរ បន្ថែម។

កូនអ្នកខេត្តបន្ទាយមានជ័យរូបនេះ កំពុងកៀរគរទុនវិនិយោគបន្ថែម ដើម្បីបង្កើតជារោងចក្រខ្នាតតូចមួយ សម្រាប់ការដំឡើងកង់បីខ្មែរនេះ ដែលអាចខ្ចីលុយធនាគារ ឬក៏អាចវិនិយោគជាភាគហ៊ុន។  

លោក ឈួន រតនា កាលពីខែឧសភាកន្លងទៅនេះ បានបង្ហោះអំពីការរៀបចំដំឡើងកង់បីខ្មែរ ដែលជាប្រភេទកង់បី Plugin Hybrid System។ លក្ខណៈពិសេសរបស់កង់បីខ្មែ រួមមាន៖

-សាកថ្មប្រើសូឡា

-សាកភ្លើងតាមផ្ទះបាន

-មិនបាច់ប្តូរប្រេងបាត

-ប្រពន្ធ័ហ្រាំងជំនួយដោយម៉ូទ័រ

-សាកម្តងរត់បាន៣០០km

-មានម៉ាស៊ីនសម្រាប់សាកបើចង់ទៅឆ្ងាយជាង៣០០km

-អាគុយប្រភេទ Life Po៤ ប្រើបាន២០ឆ្នាំ

-App សម្រាប់ហៅមិនគិតសេវា

-បើកកាត់ទឹកបានជំរៅ០.៨m។

អ្នកដំឡើងកង់បីខ្មែររូបនេះ បានឱ្យដឹងដែរថា មានប្រជាពលរដ្ឋជាច្រើនបានឆាតទៅលោក ដោយបង្ហាញការគាំទ្រចំពោះការដំឡើងកង់បីខ្មែរនេះ ហើយក៏ចាប់អារម្មណ៍កម្ម៉ង់ទិញជាច្រើននាក់ ផងដែរ៕

អត្ថបទ៖​ វីរៈ រូបភាព៖ លោក ឈួន រតនា