អគ្គនាយកដ្ឋានគយនិងរដ្ឋាករកម្ពុជា Archives - Millions times

រដ្ឋាភិបាលកម្ពុជា សម្រេចលុបកម្រៃស្កេនកុងតឺន័រ ចាប់ពីខែឧសភានេះ

Vin Chang — Wed, 29 Apr 2026 06:59:01 +0000

អគ្គនាយកនៃអគ្គនាយកដ្ឋានគយ និងរដ្ឋាករ លោក គុណ ញឹម បានបញ្ជាក់ថា ការលុបបំផុតកម្រៃស្កេនកុងតឺន័រ ដើម្បីជួយសម្រួលផ្នែកពាណិជ្ជកម្មក្នុងការកាត់បន្ថយបន្ទុកថ្លៃដឹកជញ្ជូន (ឡូជីស្ទីក)។

តាមដានជាមួយយើង៖ Million Times

លោក គុណ ញឹម បានលើកឡើងក្នុងសិក្ខាសាលា ស្ដីពី ការផ្សព្វផ្សាយវិធានការមុតស្រួច ក្នុងការបង្ការ និងបង្ក្រាបអំពើរត់គេចពន្ធ និងការពង្រឹងអភិបាលកិច្ច នៅអគ្គនាយកដ្ឋានគយ កាលពីព្រឹកថ្ងៃ ២៨ ខែមេសា ឆ្នាំ ២០២៩ ដែលការណ៍នេះធ្វើឡើងក្នុងគោលដៅ ដើម្បីកាត់បន្ថយបន្ទុកចំណាយ ក្នុងវិស័យដឹកជញ្ជូន ក៏ដូចជាថ្លៃដើមនៃការធ្វើពាណិជ្ជកម្មរបស់កម្ពុជា។

អគ្គនាយកនៃអគ្គនាយកដ្ឋានគយ និងរដ្ឋាករ បានបន្ថែមថា រាជរដ្ឋាភិបាល សម្រេចអនុវត្តចាប់ពីថ្ងៃ ១ ខែឧសភា ឆ្នាំ ២០២៦ នេះតទៅ ក្នុងការលុបបំបាត់កម្រៃស្កេនកុងតឺន័រទាំងស្រុងតែម្ដង។ នេះជាផ្នែកមួយ នៃកិច្ចសម្រួលពាណិជ្ជកម្ម និងរួមចំណែកក្នុងការកាត់បន្ថយបន្ទុកថ្លៃភស្តុភារកម្ម។

ដើម្បីសម្រាលបន្ទុករបស់ធុរជន និងប្រជាពលរដ្ឋ ក្នុងស្ថានការណ៍កើនឡើងខ្ពស់ នៃតម្លៃប្រេងឥន្ធនៈជាសកល។ ក្នុងនោះក៏មានការកែសម្រួលអត្រាពន្ធ និងអាករ ដែលអនុវត្តចាប់ពីថ្ងៃ ១ ខែមេសា ឆ្នាំ ២០២៦ មក។ វិធានការនេះផ្ដោតសំខាន់ចំពោះការបញ្ចុះពន្ធគយលើយានយន្តអគ្គិសនី, អាគុយ, បរិក្ខារសូឡា, និងចង្ក្រានអគ្គិសនី ដែលជាសម្ភារៈប្រើប្រាស់ចាំបាច់ប្រចាំថ្ងៃរបស់ប្រជាពលរដ្ឋ។

ជាមួយគ្នានេះផងដែរ រាជរដ្ឋាភិបាលកម្ពុជា ក៏សម្រេចបន្ធូរបន្ថយបន្ទុកពន្ធ និងអាករនាំចូលប្រេង និងឧស្ម័នឥន្ធនៈ ដើម្បីជួយបញ្ចុះតម្លៃ និងធានានិរន្តរភាពនៃការផ្គត់ផ្គង់។

អគ្គនាយកនៃអគ្គនាយកដ្ឋានគយ និងរដ្ឋាករ បានអះអាងថាការដាក់ចេញវិធានមុតស្រួចទាំងនេះ ធ្វើឡើងក្នុងគោលដៅកែលំអ និងបង្កជាបរិយាកាសស្មើភាពគ្នាក្នុងការវិនិយោគ និងធ្វើពាណិជ្ជកម្ម នៅកម្ពុជា គឺបង្ការ និងបង្ក្រាបអំពើរត់គេចពន្ធ និងការពង្រឹងអភិបាលកិច្ច របស់អគ្គនាយកដ្ឋានគយ ដែលមានលក្ខណៈម៉ឺងម៉ាត់ និងប្រាកដនិយម ជាផ្នែកមួយនៃការកែទម្រង់ស៊ីជម្រៅរបស់រដ្ឋាភិបាល។

គួរបញ្ជាក់ផងដែរថា កាលឆ្នាំ ២០២៥ គយប្រមូលចំណូលចូលជាតិបាន ៣ ១៨១ លានដុល្លារ គឺលើសផែនការដល់ ២១ ភាគរយ កំណត់ដោយច្បាប់ ស្ដីពីហិរញ្ញវត្ថុសម្រាប់ការគ្រប់គ្រងឆ្នាំ២០២៥៕

អត្ថបទ៖ ឆដា, រូបភាព៖អគ្គនាយកដ្ឋានគយនិងរដ្ឋាករកម្ពុជា និង STPM

The post រដ្ឋាភិបាលកម្ពុជា សម្រេចលុបកម្រៃស្កេនកុងតឺន័រ ចាប់ពីខែឧសភានេះ appeared first on Millions times.

ចាប់ពីដើមឆ្នាំក្រោយទៅរាជរដ្ឋាភិបាល បញ្ចុះពន្ធគយ និងអាករពិសេសលើមុខទំនិញទាំងនេះ

Vin Chang — Wed, 24 Dec 2025 03:14:13 +0000

អគ្គនាយកដ្ឋានគយ និងរដ្ឋាករកម្ពុជា ចេញសេចក្ដីជូនដំណឹងស្ដីពីការកែសម្រួលអត្រាពន្ធគយ និងអាករពិសេស លើមុខទំនិញមួយចំនួន ដែលនឹងចូលជាធរមានចាប់ពីថ្ងៃ ១ ខែមករា ឆ្នាំ ២០២៦ តទៅ។

តាមដានជាមួយយើង៖ Million Times

ក្នុងនោះមុខទំនិញសំខាន់ៗដែលនាំចូល ហើយត្រូវបានកែសម្រួលអត្រាពន្ធគយ និងអាករពិសេសមានដូចជា៖

១. បញ្ចុះអត្រាពន្ធនាំចូលពី ១៥% និង ៧% មក ០% ទំនិញកូនបក្សីរស់, កុំព្យូទ័រ និងបរិក្ខារ, អង់តែន និងបរិក្ខារ និងឧបករណ៍ប្រើក្នុងមន្ទីរពិសោធន៍ និងគ្រឿងបន្លាស់

២. បញ្ចុះអត្រាពន្ធនាំចូលពី ១៥% មក ៧% លើមុខទំនិញ បន្ទះសំឡីកែវ, ម៉ាស៊ីនក្រឡុក និងម៉ាស៊ីនគាបទឹកផ្លែឈើ, ឆ្នាំងដាំបាយអគ្គិសនី, ម៉ាស៊ីនសំលៀងថ្ម, សំឡីអនាម័យ និងខោទឹកនោម

៣. បញ្ចុះអត្រាពន្ធនាំចូលពី ៣៥% មក ៧% លើមុខទំនិញថ្នាំលាបការពារសំណឹកលើតួនាវា

៤. បញ្ចុះអត្រាពន្ធនាំចូលពី ៣៥% មក ១៥% លើមុខទំនិញឡអគ្គិសនីសម្រាប់ដុត ឬអាំង និងរថយន្តដឹកអ្នកដំណើរប្រភេទលីម៉ូហ្សីន

៥. បញ្ចុះអត្រាអាករពិសេសពី ១០% មក ០% លើមុខទំនិញម៉ូទ័រសម្រាប់យានយន្តអគ្គិសនី, ម៉ាស៊ីនបូមធូលី និងឧបករណ៍ចាក់សំឡេង

៦. បញ្ចុះអត្រាអាករពិសេសពី ១០% មក ៥% លើមុខទំនិញអាគុយយានយន្តអគ្គិសនី

អត្ថបទ៖ ឆដា, រូបភាព៖ អគ្គនាយកដ្ឋានគយនិងរដ្ឋាករកម្ពុជា និងអ៊ីនធឺណេត

The post ចាប់ពីដើមឆ្នាំក្រោយទៅរាជរដ្ឋាភិបាល បញ្ចុះពន្ធគយ និងអាករពិសេសលើមុខទំនិញទាំងនេះ appeared first on Millions times.

៤ ចំណុចក្រុមហ៊ុនចង់នាំចូលសាច់បង្កក ត្រូវស្នើសុំពីអគ្គនាយកដ្ឋានគយ ឬអគ្គនាយកដ្ឋានសុខភាពសត្វ

Vin Chang — Tue, 19 Nov 2024 07:32:28 +0000

ថ្មីៗនេះអគ្គនាយកដ្ឋានសុខភាពសត្វ និងផលិតកម្មសត្វយន្តការ បានចេញសេចក្ដីណែនាំដល់ក្រុមហ៊ុនចង់នាំចូលសាច់បង្កក ត្រូវស្នើសុំពីអគ្គនាយកដ្ឋានគយ ឬអគ្គនាយកដ្ឋានសុខភាពសត្វ ដោយតម្រូវមានលក្ខណៈសម្បត្តិចាំបាច់ ៤។

តាមដានជាមួយយើង៖ Million Times

សេចក្ដីជូនដំណឹងស្ដីពីយន្តការ និងលក្ខណៈវិនិច្ឆ័យនៃការផ្ដល់គុណវុឌ្ឍិលើការនាំចូលមុខទំនិញ “សាច់បង្កក” រវាងអគ្គនាយកដ្ឋានសុខភាពសត្វ និងផលិតកម្មសត្វ និងអគ្គនាយកដ្ឋានគយ និងរដ្ឋាករកម្ពុជា មានដូចខាងក្រោម៖

១. មានកម្មវត្ថុអាជីវកម្មសមស្របដូចជា «នាំចូលសាច់បង្កក ឬមានកម្មវត្ថុអាជីវកម្មពាក់ព័ន្ធនឹងការនាំចូលសាច់»

២. មានប្រភពផ្គត់ផ្គង់សាច់បង្កកពីក្រៅប្រទេសច្បាស់លាស់

៣. ត្រូវមានឃ្លាំងរក្សាគុណភាពសាច់បង្កក ស្របតាមលក្ខណៈបច្ចេកទេសត្រឹមត្រូវ និង

៤. ត្រូវធានាអះអាងជាលាយលក្ខណ៍អក្សរថា «នឹងប្រើប្រាស់មធ្យោបាយដឹកជញ្ជូន និងចែកចាយសាច់បង្កក ដែលមានលក្ខណៈបច្ចេកទេសសមស្រប»៕

អត្ថបទ៖ មេរ៉ា,រូបភាព៖ អគ្គនាយកដ្ឋានសុខភាពសត្វ និងផលិតកម្មសត្វ និងអគ្គនាយកដ្ឋានគយ និងរដ្ឋាករកម្ពុជា

The post ៤ ចំណុចក្រុមហ៊ុនចង់នាំចូលសាច់បង្កក ត្រូវស្នើសុំពីអគ្គនាយកដ្ឋានគយ ឬអគ្គនាយកដ្ឋានសុខភាពសត្វ appeared first on Millions times.