តាមដានជាមួយយើង៖ Million Times

វិស័យ​ទឹក​ស្អាត​ក៏​ជា​កម្លាំងចលករ​ក្នុង​ការ​ជំរុញ​ការ​អភិវឌ្ឍ​សេដ្ឋកិច្ច-សង្គម ជា​ពិសេស​នៅ​តាម​តំបន់​ជនបទ តាមរយៈ​ការ​លើកកម្ពស់​ផលិតភាព ការ​បង្កើន​សកម្មភាព​សេដ្ឋកិច្ច និង​ការ​គាំទ្រ​ដល់​ដំណើរការ​ឧស្សាហូបនីយកម្ម ដែល​រួម​ចំណែក​ដល់​ការ​អភិវឌ្ឍ​សេដ្ឋកិច្ច​ជាតិ។ នេះ​ជា​ការ​ថ្លែង​ឲ្យ​ដឹង​​បន្ថែម​របស់​លោក ហែម វណ្ណឌី រដ្ឋមន្ត្រី​ក្រសួង​ឧស្សាហកម្ម វិទ្យាសាស្ត្រ បច្ចេកវិទ្យា និង​នវានុវត្តន៍ ក្នុង​ពិធី​ប្រកាស​ផ្ទេរ និង​តែងតាំង​មុខ​តំណែង​អគ្គនាយក​ថ្មី​នៃ​រដ្ឋាករ​ទឹក​ស្វយ័ត​ក្រុង​ភ្នំពេញ។

លោក ហែម វណ្ណឌី បានលើកឡើងថា ប្រមាណ ៣ ទសវត្សរ៍​កន្លងមក រដ្ឋាករ​ទឹក​ស្វយ័ត​ក្រុងភ្នំពេញ បាន​ប្រែ​ក្លាយ​ជា​សហគ្រាស​សាធារណៈ​ដ៏​ជោគជ័យ​មួយ​នៅ​កម្ពុជា ដែល​ត្រូវ​បាន​ទទួល​ស្គាល់​យ៉ាង​ទូលំទូលាយ ចំពោះ​ប្រព័ន្ធ​គ្រប់គ្រង​ប្រកប​ដោយ​ប្រសិទ្ធភាព និង​សមត្ថភាព​បច្ចេកទេស​ខ្ពស់។

បច្ចុប្បន្ន​រដ្ឋាករ​ទឹក​ស្វយ័ត​ក្រុងភ្នំពេញ មាន​សមត្ថភាព​ផលិត​ទឹក​ស្អាត​បាន​ជាង ១ លាន​ម៉ែត្រ​គូប​ក្នុងមួយថ្ងៃ មាន​បណ្ដាញ​ចែកចាយ​ទឹក​ស្អាត​ប្រវែង​សរុប ៥ ៦៤៦គីឡូម៉ែត្រ និង​ផ្គត់ផ្គង់​ទឹក​ស្អាត​ដល់​អតិថិជន​ជាង ៥៣ ម៉ឺន​តំណ នៅ​ក្នុង​រាជធានី​ភ្នំពេញ និង​តំបន់​ជុំវិញ។

រីឯ​គុណភាព​ទឹក​ស្អាត​របស់​រដ្ឋាករ​ទឹក​ស្វយ័ត​ក្រុង​ភ្នំពេញ បន្ត​រក្សា​ភាព​អនុលោម​តាម​ស្តង់ដារ​របស់​អង្គការ​សុខភាព​ពិភពលោក ទន្ទឹម​នឹង​នោះ អត្រា​ប្រមូល​ប្រាក់​ថ្លៃ​សេវា​ទឹក​ស្អាត​សម្រេច​បាន ៩៩,៩% ដែល​បង្ហាញ​ពី​ប្រសិទ្ធភាព​ប្រតិបត្តិការ​ខ្ពស់៕

អត្ថបទ៖ ឆដា, រូបភាព៖ ក្រសួងឧស្សាហកម្ម វបន

The post រដ្ឋាករទឹកស្វយ័តក្រុងភ្នំពេញមានសមត្ថភាពផលិតទឹកស្អាតបានជាង ១ លានម៉ែត្រគូប/ថ្ងៃ appeared first on Millions times.

តាមដានជាមួយយើង៖ Million Times

ក្នុងជំនួបនោះ គណៈប្រតិភូសាជីវកម្ម Marubeni បានពិភាក្សាអំពីគម្រោងវិនិយោគរបស់ក្រុមហ៊ុនក្នុងវិស័យទឹកស្អាតនៅកម្ពុជា ដោយផ្តោតលើការរួមចំណែកដល់គោលដៅអភិវឌ្ឍន៍ប្រកបដោយចីរភាព (SDG 6.1) ការសម្រេចបាននូវ​សាកលកម្ម និង​សមធម៌​ទឹកបរិភោគដែលមាន​សុវត្ថិភាព និង​ថ្លៃ​សមរម្យសម្រាប់ប្រជាជន​ទាំងអស់​ត្រឹម​ឆ្នាំ២០៣០។

តំណាងក្រុមហ៊ុន Marubeni ប្រាប់រដ្ឋមន្រ្តីឧស្សាហកម្មកម្ពុជាថា ក្រុមហ៊ុនបានបង្ហាញចំណាប់អារម្មណ៍ខ្ពស់ក្នុងការវិនិយោគលើផ្នែកហេដ្ឋារចនាសម្ព័ន្ធទឹកស្អាតនៅប្រទេសកម្ពុជា ដោយអនុវត្តគំរូអាជីវកម្មស្រដៀងគ្នា សម្រាប់ទាំងតំបន់ទីក្រុង និងការពង្រីកទៅតំបន់ជនបទ។

ជាការឆ្លើយតប លោក ហែម វណ្ណឌី បានស្វាគមន៍ចំពោះគំនិតផ្តួចផ្តើមនេះ ដោយលើកឡើងថា រាជរដ្ឋាភិបាលបើកចំហចំពោះ​ការវិនិយោគឯកជន និងផ្តោតលើដំណោះស្រាយយុទ្ធសាស្រ្ត ប្រកបដោយចីរភាព ជាជាងដំណោះស្រាយរយៈពេលខ្លី និងខ្នាតតូច។ លោកថ្លែងថា៖ “ការវិនិយោគក្នុងវិស័យទឹកស្អាត ទោះបីមិនផ្តល់ប្រាក់ចំណេញខ្ពស់ និងឆាប់រហ័ស គឺជាការវិនិយោគមួយដែលមានសុវត្ថិភាព ហើយសេវាសាធារណៈនេះមានសារៈសំខាន់ខ្លាំងសម្រាប់សង្គមជាតិ”។

លោកបន្ថែមថា តំបន់ជនបទនាពេលបច្ចុប្បន្នអាចនឹងមិនមែនជាតំបន់ជនបទរហូតទេ។ យើងរំពឹងថានឹងតភ្ជាប់បណ្តាញទឹកស្អាតកម្រិតគ្រួសារកាន់តែច្រើន ហើយយើងមានទឡ្ហីករណ៍ច្បាស់លាស់ក្នុងការពង្រីកតួនាទីរបស់រដ្ឋាករទឹក បន្ថែមពីការគ្របដណ្តប់តែនៅតំបន់ទីក្រុង។

លោករដ្ឋមន្ត្រីក៏បានលើកទឹកចិត្តក្រុមហ៊ុន Marubeni ឱ្យធ្វើផែនការរយៈពេលវែង ដោយគិតគូរអំពីកំណើនតម្រូវការសម្រាប់ការរស់នៅ និងសម្រាប់តំបន់អភិវឌ្ឍន៍ឧស្សាហកម្មនាពេលអនាគត ទន្ទឹមនឹងនោះ ស្វែងរកគំរូអាជីវកម្មដែលមានភាពបត់បែន រួមទាំងការលក់ដុំទឹកឱ្យរដ្ឋាករទឹក ដោយក្រុមហ៊ុនអាចវិនិយោគលើរោងចក្រប្រព្រឹត្តិកម្ម និងបណ្តាញចែកចាយ។

សូមជម្រាបថា Marubeni គឺជាក្រុមហ៊ុនវិនិយោគដ៏ធំបំផុតមួយរបស់ប្រទេសជប៉ុន ដែលមានប្រតិបត្តិការអាជីវកម្មចម្រុះ នៅទូទាំងពិភពលោក រួមទាំងវិស័យគ្រឿងចក្រ ថាមពល សារធាតុគីមី ចំណីអាហារ វាយនភ័ណ្ឌ លោហធាតុនិងរ៉ែ និងវិស័យផ្សេងទៀតជាច្រើន។ នៅក្នុងវិស័យផ្គត់ផ្គង់ទឹក Marubeni បានសហការជាមួយរដ្ឋាភិបាល និងក្រុមហ៊ុនឯកជនលើគម្រោងហេដ្ឋារចនាសម្ព័ន្ធធំៗ ដោយប្រើប្រាស់ជំនាញ បទពិសោធ និងបណ្តាញសកលរបស់ខ្លួន ក្នុងការផ្តល់ដំណោះស្រាយសម្រាប់បញ្ហាកង្វះទឹកស្អាត និងគុណភាព៕

The post ក្រុមហ៊ុនជប៉ុន Marubeni បង្ហាញគម្រោងវិនិយោគទឹកស្អាតនៅកម្ពុជា ទាំងតំបន់ទីក្រុង និងការពង្រីកទៅតំបន់ជនបទ appeared first on Millions times.

បើយោងតាមខ្លឹមសារនៃជំនួបរវាងលោក Laurent Strauch នាយកប្រតិបត្តិក្រុមហ៊ុន Smart Eden ជាមួយលោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ នៅថ្ងៃទី១ ខែមេសា ឆ្នាំ២០២៥។ លោក Strauch លើកឡើងថា Smart Eden គឺជាក្រុមហ៊ុនដែលចែកចាយផលិតផលដ៏ធំ បច្ចុប្បន្នមានបណ្តាញលក់ជាង ៦.០០០ ទីតាំងនៅទូទាំងប្រទេសបារាំង។

តាមដានជាមួយយើង៖ Million Times

លោកថ្លែងបញ្ជាក់ថា៖ «យើងមានបំណងពង្រីកការនាំចេញផលិតផលកម្ពុជា ពី ១០ ទៅ ១៥មុខ ក្នុងឆ្នាំ២០២៥នេះ ដែលរួមមានទាំងអង្ករ ម្រេច ស្ករត្នោត និងធ្យូងអនាម័យ។ យើងក៏គ្រោងផលិតបឺរពីគ្រាប់ស្វាយចន្ទី ដើម្បីនាំចេញទៅបារាំងផងដែរ»។ បន្ថែមពីលើនេះ Smart Eden បានវាយតម្លៃខ្ពស់ក្នុងការយកកម្ពុជាធ្វើជាទីតាំងយុទ្ធសាស្ត្រសម្រាប់តំបន់ ដើម្បីចែកចាយផលិតផលបារាំងដែលមានគុណភាព។

ឆ្លើយតបទៅនឹងបំណងរបស់ក្រុមហ៊ុនបារាំង Smart Eden លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា រាជរដ្ឋាភិបាលកម្ពុជាផ្តល់អាទិភាពខ្ពស់ដល់ការអភិវឌ្ឍវិស័យស្វាយចន្ទី ជាទំនិញយុទ្ធសាស្ត្រ។ យើងចង់ប្រែក្លាយកម្ពុជាទៅជាប្រទេសផ្គត់ផ្គង់ផលិតផលស្វាយចន្ទីធំបំផុតមួយសម្រាប់ពិភពលោក។

លោកបានបញ្ជាក់ថា ក្រសួងឧស្សាហកម្មគាំទ្រក្រុមហ៊ុន Smart Eden ក្នុងការផលិតបឺរពីគ្រាប់ស្វាយចន្ទី ហើយយើងលើកទឹកចិត្តក្រុមហ៊ុនឱ្យសិក្សាផលិតផលសក្តានុពលផ្សេងៗទៀតរបស់កម្ពុជា ដោយសហការជាមួយក្រុមការងារ របស់ក្រសួង និងដៃគូ ដូចជាសហគ្រិនខ្មែរជាដើម៕

អត្ថបទ៖ ពិសិដ្ឋ រូបភាព៖ ក្រសួងឧស្សាហកម្ម

The post ក្រុមហ៊ុនលំដាប់កំពូល Smart Eden នឹងពង្រីកការនាំផលិតផលកម្ពុជា ១៥មុខទៅកាន់ទីផ្សារបារាំង appeared first on Millions times.

លោក ហែម វណ្ណឌី បានលើកឡើងថា ការសម្រេចបានកំណើនល្អប្រសើរនេះ ស្របពេលកើនឡើងនៃចំនួនរោងចក្រឧស្សាហធុនធំក្នុងឆ្នាំ២០២៤ បើទោះបីជាមានរោងចក្រខ្លះ បានបិទដំណើរការក៏ដោយ។ លោកបានឲ្យដឹងថា នៅក្នុងឆ្នាំ២០២៤ មានរោងចក្រឧស្សាហកម្មធុនធំបើកថ្មីមានចំនួន៣២៦ ជាពិសេសនៅក្នុងឆមាសទី២ ដែលបានកើនឡើងជាគំហុក បន្ទាប់ពីមានការរើទីតាំងមួយចំនួនពីប្រទេសចិន ដោយទទួលបានទុនវិនិយោគប្រមាណ ២០ពាន់លានដុល្លារ​។

តាមដានជាមួយយើង៖ Million Times

នៅក្នុងជំនួបសវនាការជាមួយគណៈកម្មាធិការទី៩ នៃព្រឹទ្ធសភាកម្ពុជា កាលពីថ្ងៃទី៦ ខែកុម្ភៈ ឆ្នាំ២០២៥​ លោក ហែម វណ្ណឌី គូសបញ្ជាក់ថា គិតមកទល់ដំណាច់ឆ្នាំ២០២៤ រោងចក្រឧស្សាហធុនធំដែលកំពុងដំណើរការ មានចំនួន២ ៤២៥រោងចក្រ។ តែនេះយ៉ាងនេះក្តី កាលពីឆ្នាំ២០២៤កន្លងទៅក៏មានរោងចក្រចំនួន២៦បានបិទទ្វារផងដែរ ​ដូចជារោងចក្រផលិតបន្ទះសូឡាជាដើម។ ជាមួយគ្នានេះ​ តំបន់សេដ្ឋកិច្ចពិសេស​ក៏បានកើនឡើងចំនួន ៣០ និងសួនឧស្សាហកម្ម​កើនឡើងចំនួន ២០។ 

​ដោយឡែក ចំនួនផលិតកម្មទំនិញ ដែលបានផលិតក្នុងឆ្នាំ២០២៤ សម្រាប់ផ្គង់ផ្គង់ក្នុងស្រុក និងនាំចេញ ​មានចំនួនប្រមាណ ១៥ពាន់លានដុល្លារ។

លោកក៏បានកត់សម្គាល់បន្ថែមថា ​​វិស័យឧស្សាហកម្ម ក៏អាចនឹងរងផលប៉ះពាល់​នូវបញ្ហាមួយចំនួន នៅពេលដែលកម្ពុជាចាកចេញពីប្រទេសអភិវឌ្ឍន៍តិចតួចនៅឆ្នាំ២០២៩ ដែលនឹងធ្វើឱ្យកម្ពុជាបាត់បង់ប្រព័ន្ធអនុគ្រោះពន្ធ។ ​ដូច្នេះហើយវិស័យឧស្សាហកម្ម ​និងសិប្បកម្មនឹងជួបបញ្ហាប្រឈម ​ដូចជា ការកើនឡើងការប្រកួតប្រជែងជាមួយប្រទេសផ្សេង ការរិតបន្តឹងអនុលោមភាពច្បាប់ និងបទបញ្ញតិ្តនានា ការខ្វះខាតកម្លាំងពលកម្មជំនាញ បញ្ហាថ្លៃដឹកជញ្ជូន និងឡូជីស្ទិក ថ្លៃថាមពល ការវិវត្តនៃបច្ចេកវិទ្យាជឿនពេក ដែលតម្រូវឱ្យក្រសួងដាក់ចេញនូវទិសដៅការងារថ្មីក្នុងការដោះស្រាយ៕

អត្ថបទ៖ ផល កុសល រូបភាព៖ ក្រសួងឧស្សាហកម្ម

The post កម្ពុជា ព្យាករកំណើនវិស័យឧស្សាហកម្មនឹងកើនឡើងក្នុងរង្វង់ ៨.៦% ឆ្នាំ២០២៥ appeared first on Millions times.

ក្នុងវេទិកាទឹកស្អាតកម្ពុជា កាលចុងខែកក្កដាកន្លងទៅ ប្រតិបត្តិករទឹកស្អាតឯកជនបានអំពាវនាវឱ្យក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ជួយអន្តរាគមន៍លើបញ្ហាប្រឈមមួយចំនួន រួមទាំងស្វែងរកដំណោះ ស្រាយចំពោះការខូចខាតបណ្តាញចែកចែកទឹកស្អាតដែលបង្កដោយគម្រោងហេដ្ឋារចនាសម្ព័ន្ធ និងស្នើសុំការគាំទ្រប្រភពទឹកដែលមាននិរន្តរភាព។

តាមដានជាមួយយើង៖ Million Times

ពាក់ព័ន្ធសំណើរនេះ លោក ហែម វណ្ណឌី បានទទួលយកសំណើរបស់វិស័យឯកជន និងបានរំលេចពីតួនាទីសំខាន់របស់ សមាគមអ្នកផ្គត់ផ្គង់ទឹកស្អាតកម្ពុជា។ លោកបានជំរុញឱ្យរដ្ឋាករទឹកសាធារណៈ និងប្រតិបត្តិករទឹក ស្អាតឯកជន ទាំងអស់ បង្កើនកិច្ចខិតខំប្រឹងប្រែងរបស់ខ្លួន ជាពិសេសពង្រឹងសមត្ថភាព បច្ចេកទេស និងអនុលោមភាពដើម្បីលើកកម្ពស់គុណភាព និងលទ្ធភាពទទួលបានសេវាទឹកស្អាតទូទាំងប្រទេស។

លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ បានលើកឡើងថា រដ្ឋបានផ្តល់វិសាលភាពទូលំទូលាយដល់វិស័យឯកជនឱ្យចូលរួមផ្តល់សេវាទឹកស្អាតជូនប្រជាពលរដ្ឋនៅទូទាំងប្រទេស។  លោកបានសង្កត់ធ្ងន់លើសារៈសំខាន់នៃការផ្គត់ផ្គង់ទឹកស្អាតដែលអាចជឿទុកចិត្តបាន សម្រាប់តម្រូវការប្រចាំថ្ងៃគាំទ្រដល់សុខភាពសាធារណៈ និងសម្រាប់ទាក់ទាញការវិនិយោគ និងការ អភិវឌ្ឍឧស្សាហកម្ម

លោកបន្តថា បច្ចុប្បន្ន ក្រសួងឧស្សាហកម្ម កំពុងធ្វើការវាយ តម្លៃស្ថានភាពនៃការផ្គត់ផ្គង់ទឹកស្អាតនៅក្នុងក្របខណ្ឌទូទាំងប្រទេស និងកំពុងសហការជាមួយស្ថាប័នហិរញ្ញវត្ថុ ដើម្បីបង្កើនអាទិភាពហិរញ្ញប្បទានសម្រាប់វិស័យនេះ។ ក្នុងនោះ ធនាគារសហគ្រាសធុនតូច និងមធ្យមកម្ពុជា បានរាយការណ៍ថា ធនាគារបានកំណត់យកវិស័យទឹកស្អាតជាវិស័យអាទិភាពមួយ សម្រាប់ការផ្តល់ហិរញ្ញប្បទាន ហើយធនាគារក៏បាន អនុម័តកម្ចីដែលមានការប្រាក់ទាបប្រមាណ ១៤លានដុល្លាររួចហើយ ជូនដល់ប្រតិបត្តិករទឹកស្អាតឯកជន។

សូមជម្រាបថា សាជីវកម្មធានាឥណទានកម្ពុជាបានបញ្ជាក់ថាស្ថាប័ននេះបានធានាប្រាក់កម្ចីសរុបប្រមាណ ២០១លានដុល្លារអាមេរិក ដោយមួយផ្នែកបានគាំទ្រដល់វិស័យទឹកស្អាត។

អត្ថបទ៖ ផល កុសល រូបភាព៖ ក្រសួងឧស្សាហកម្ម

The post ប្រតិបត្តិករអំពាវនាវក្រសួងជួយដោះស្រាយការខូចខាតបណ្តាញចែកចែកទឹកស្អាតដោយសារកាយផ្លូវដាក់លូ appeared first on Millions times.

លោក ហែម វណ្ណឌី រដ្ឋមន្រ្តីក្រសួងឧស្សាហកម្ម និងវិទ្យាសាស្រ្តបច្ចេកវិទ្យា និងនវានុវត្តន៍ និងជាប្រធានគ.ស.អ.ស.ក បានលើកឡើងថា ការទទួលបានសេវាហិរញ្ញវត្ថុផ្លូវការនៅតែជាបញ្ហាប្រឈមសម្រាប់ម្ចាស់អាជីវកម្មក្រៅប្រព័ន្ធ ដោយសារកង្វះអនុលោមភាព។ 

តាមដានជាមួយយើង៖ Million Times

លោកបន្តថា គ.ស.អ.ស.ក កំពុងសហការជាមួយភាគីពាក់ព័ន្ធផ្សេងៗទៀត ក្នុងការបង្កើតផ្លេតហ្វមឌីជីថលមួយ សម្រាប់ចុះឈ្មោះទទួលស្គាល់អាជីវកម្មក្រៅប្រព័ន្ធ ដូច្នេះហើយលោករដ្ឋមន្រ្តីក៏បានស្នើឱ្យមានការគាំទ្រពី ធនាគារជាតិនៃកម្ពុជា ក្នុងការសិក្សាពីលទ្ធភាពដែលអាជីវកម្មក្រៅប្រព័ន្ធអាចទទួលបានហិរញ្ញប្បទាន ពីគ្រឹះស្ថានធនាគារនិងហិរញ្ញវត្ថុផ្លូវការ នៅពេលដែលពួកគេត្រូវបានទទួលស្គាល់ក្នុងផ្លេតហ្វមឌីជីថលនោះ។

សម្រាប់ផ្លេតហ្វមឌីជីថល ដែលលោក ហែម វណ្ណឌី បានលើកឡើង លោកស្រី ជា សិរី ទេសាភិបាលធនាគារជាតិនៃកម្ពុជា បានគាំទ្រឱ្យមានការសិក្សាលម្អិតបន្ថែមទៀតពីមន្រ្តីជំនាញ។ លោកស្រីបានបញ្ជាក់ថា ធនាគារជាតិនៃកម្ពុជា បានបំពេញការងារជាច្រើនស្របតាមយុទ្ធសាស្រ្តជាតិស្តីពីការអភិវឌ្ឍសេដ្ឋកិច្ចក្រៅប្រព័ន្ធ ដូចជា ការលើកកម្ពស់ចំណេះដឹងផ្នែកហិរញ្ញវត្ថុដល់ប្រជាពលរដ្ឋ តាមរយៈសកម្មភាពចុះដល់មូលដ្ឋាន ផ្សព្វផ្សាយជាសាធារណៈ និងបញ្ចូលមេរៀនហិរញ្ញវត្ថុទៅក្នុងកម្មវិធីសិក្សាចំណេះទូទៅ ជាដើម។ 

បន្ថែមលើនេះ ធនាគារជាតិនៃកម្ពុជា ក៏បានលើកទឹកចិត្តឱ្យអាជីវកម្មក្រៅប្រព័ន្ធបើកគណនីសន្សំនិងប្រើប្រាស់សេវាហិរញ្ញវត្ថុផ្លូវការ អភិវឌ្ឍប្រព័ន្ធទូទាត់ដែលងាយស្រួល ចំណាយតិច និងមានប្រសិទ្ធភាព ព្រមទាំងបង្កើនការប្រើប្រាស់សេវាហិរញ្ញវត្ថុរបស់ស្រ្តីផងដែរ។

សូមជម្រាបថា រាជរដ្ឋាភិបាលកម្ពុជា បានបង្កើតយុទ្ធសាស្ត្រជាតិស្តីពីការអភិវឌ្ឍសេដ្ឋកិច្ច ក្រៅប្រព័ន្ធក្នុងគោលបំណងលើកកម្ពស់ការគាំពារនិងការពង្រឹងសមត្ថភាព ផលិតភាព និង ភាពធន់ នៃសេដ្ឋកិច្ចក្រៅប្រព័ន្ធ ដែលដាក់ឲ្យអនុវត្តរយៈពេល ៥ឆ្នាំ ចាប់ពីឆ្នាំ២០២៣ដល់ឆ្នាំ២០២៨។

យុទ្ធសាស្ត្រជាតិនេះមានគោលបំណងលើកកម្ពស់ការគាំពារនិងការពង្រឹងសមត្ថភាព ផលិតភាព និងភាពធន់នៃសេដ្ឋកិច្ចក្រៅប្រព័ន្ធ ព្រមទាំងជំរុញនិងពន្លឿនការចូលរួមទៅ ក្នុងសេដ្ឋកិច្ចក្នុង ប្រព័ន្ធ ដើម្បីធានាឱ្យបាននូវភាពធន់ ភាពប៉ាន់ប្រមាណបាន និងភាពរីកចម្រើនទៅមុខនៃការ ធ្វើធុរកិច្ច ពាណិជ្ជកម្ម ការវិនិយោគ និងការប្រកបអាជីវកម្ម មុខរបរ និងការងារចិញ្ចឹមជីវិតនៅកម្ពុជា។

តាមរយៈការដាក់ចេញនូវយុទ្ធសាស្ត្រជាតិនេះរាជរដ្ឋាភិបាលមានជំនឿយ៉ាងមុតមាំថានឹងក្លាយជា ប្រទីប មួយយ៉ាងសំខាន់ដែលនឹងជួយបំភ្លឺនិងត្រួសត្រាយផ្លូវនៅលើគន្លងមួយដែលពោរពេញទៅ ដោយ ភាពស្មុគស្មាញក្នុងការអភិវឌ្ឍសេដ្ឋកិច្ចក្រៅប្រព័ន្ធ ព្រមទាំងនឹងក្លាយជាកត្តាលីករ ដែលនឹង ជួយជំរុញនិងលើកទឹកចិត្តឱ្យបង្កើនកិច្ចសហប្រតិបត្តិការរវាង ក្រសួង ស្ថាប័ន វិស័យឯកជន អង្គការ ជាតិ និងអន្តរជាតិ និងសមាគមនានា សំដៅឈានឆ្ពោះទៅរកការសម្រេចបាននូវការអភិវឌ្ឍ ប្រកបដោយចីរភាព បរិយាបន្ននិងភាពធន់ យ៉ាងពិតប្រាកដ ស្របតាមគោលការណ៍ «មិនបោះបង់ពល រដ្ឋខ្មែរណាម្នាក់»ទាំងក្នុងន័យអភិវឌ្ឍនិងការចូលរួមក្នុងដំណើរការនៃការអភិវឌ្ឍ៕

អត្ថបទ៖ សេដ្ឋានី រូបភាព៖ កើត ឆែ

The post ការទទួលបានសេវាហិរញ្ញវត្ថុផ្លូវការនៅតែជាបញ្ហាប្រឈមសម្រាប់ម្ចាស់អាជីវកម្មក្រៅប្រព័ន្ធ appeared first on Millions times.

ក្នុងពេលជួបគណៈប្រតិភូមកពី​សមាគម​អ្នកផ្គត់ផ្គង់​ទឹកស្អាតកម្ពុជា កាលពីថ្ងៃទី២៩ ខែឧសភា លោក ហែម វណ្ណឌី រដ្ឋមន្ត្រីក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានលើកឡើងថា ស្ថាប័នហិរញ្ញវត្ថុមួយចំនួនកំពុងផ្តល់អាទិភាព​ដល់​គម្រោង​ទឹកស្អាត ហើយពួកគេស្វាគមន៍សំណើឥណទានពីប្រតិបត្តិករ។ ការណ៍នេះលោកបានណែនាំឱ្យប្រតិបត្តិករទឹកស្អាតឯកជនទាំងអស់ អនុវត្តអាជីវកម្មក្នុងប្រព័ន្ធផ្លូវការ និងបង្កើនតម្លាភាព ដើម្បី​សម្រួល​ដល់ការទទួលបានហិរញ្ញវត្ថុ។

តាមដានជាមួយយើង៖ Million Times

លោកបានបន្ថែមថា ក្រសួងកំពុងតស៊ូមតិឱ្យមានការចែករំលែកទិន្នន័យ ដើម្បីធ្វើផែនការឱ្យបានកាន់តែប្រសើរ និងគិតគូរបញ្ចូលចំណាយជួសជុលបណ្តាញចែកចាយទឹកស្អាតទៅក្នុងគម្រោងអភិវឌ្ឍន៍ហេដ្ឋារចនាសម្ព័ន្ធ។ ជាមួយគ្នានេះ លោកបានសម្តែងការគាំទ្រចំពោះការរៀបចំ​ពិព័រណ៍​ទឹកស្អាតនាពេលខាងមុខ ហើយបានជំរុញឱ្យសមាគមប្រមូលរាល់បញ្ហាប្រឈម រួមទាំងបញ្ហាប្រភពទឹក និងឧបសគ្គក្នុងកិច្ចប្រតិបត្តិការ ដើម្បីក្រសួងរៀបចំសម្របសម្រួលស្វែងរកដំណោះស្រាយជាមួយក្រសួង​ស្ថាប័នពាក់ព័ន្ធ។

គួរកត់សម្គាល់ថា នាពេលថ្មីៗនេះ ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍ បានចេញសេចក្តីជូនដំណឹងពីការចុះវាយតម្លៃប្រតិបត្តិករទឹកស្អាតនៅទូទាំងប្រទេស ដើម្បីស្វែងយល់កាន់តែច្បាស់​អំពីតម្រូវការរបស់ពួកគេ និងរៀបចំអន្តរាគមន៍ឱ្យចំគោលដៅ។

ទន្ទឹមនឹងនេះ ក្រសួងក៏កំពុងពិចារណាធ្វើការកែសម្រួលជាយុទ្ធសាស្រ្តមួយចំនួន ដូចជាការរៀបចំគំរូអាជីវកម្មថ្មី ដែលប្រតិបត្តិករឯកជនផ្តោតការវិនិយោគលើការកសាងបណ្តាញចែកចាយ ជាជាងការបង្កើតប្រភពទឹក និងការសាងសង់រោងចក្រប្រព្រឹត្តិកម្ម, លទ្ធភាពកែសម្រួលតម្លៃទឹកស្អាតសម្រាប់វិស័យអាជីវកម្ម និង​ឧស្សា​ហកម្ម, និងការលើកទឹកចិត្តប្រតិបត្តិករតូចៗឱ្យរួមបញ្ចូលគ្នាដើម្បីបង្កើនប្រសិទ្ធភាពជាដើម៕

អត្ថបទ៖ សេដ្ឋានី រូបភាព៖ ក្រសួងឧស្សាហកម្ម

The post លោក ហែម វណ្ណឌី៖ ស្ថាប័នហិរញ្ញវត្ថុកំពុងរង់ចាំសំណើរប្រតិបត្តិករទឹកស្អាតដើម្បីផ្តល់ប្រាក់កម្ចី appeared first on Millions times.