សាយ សំអាល់ Archives - Millions times

ធនាគារចិន នឹងផ្ដល់កម្ចីក្នុងអត្រាការប្រាក់ទាប ជួយស្រោចស្រង់វិស័យអចលនទ្រព្យកម្ពុជា

Vin Chang — Fri, 09 May 2025 04:39:14 +0000

នៅក្នុងកិច្ចប្រជុំក្រុមការងារក្រសួងរៀបចំដែនដី នគរូបនីយកម្ម និងសំណង់ និងវិស័យឯកជន ដែលមានការចូលរួមរបស់ធនាគារជាតិ សមាគមអ្នកអភិវឌ្ឍន៍លំនៅឋាន សមាគមធនាគារនៅកម្ពុជា សមាគមមីក្រូហិរញ្ញវត្ថុ សមាគមអ្នកសាងសង់កម្ពុជា ធនាគារចិន (Bank Of China) បានលើកនូវជម្រើសថ្មីជូនអ្នកអភិវឌ្ឍលំនៅឋាន និងអ្នកដែលបានទិញផ្ទះ និងមានបំណងទិញផ្ទះ ដោយធនាគារនឹងផ្តល់នូវអត្រាការប្រាក់ដែលមានភាពប្រកួតប្រជែងពី 6.2% ទៅ 6.5%។

តាមដានជាមួយយើង៖ Million Times

ក្រសួងរៀបចំដែនដី កាលពីថ្ងៃទី៨ ខែឧសភា ឆ្នាំ ២០២៥ បានឱ្យបើកកិច្ចប្រជុំពិភាក្សាលើការប្រើប្រាស់ឥណទានពីក្រៅប្រទេសដើម្បីស្ដារវិស័យអចលនទ្រព្យនៅកម្ពុជា ក្នុងគោលបំណងដើម្បីជូនដំណឹងទាក់ទិននឹងអត្រាការប្រាក់ដែលធនាគារចិនបានផ្តល់ជូន ដែលនេះជាកិច្ចការដ៏ល្អមួយសម្រាប់ធនាគារ និងមីក្រូហិរញ្ញវត្ថុនៅក្នុងប្រទេសកម្ពុជា។

ឧបនាយករដ្ឋមន្ត្រី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ បានថ្លែងថា កិច្ចប្រជុំនាពេលនេះធ្វើឡើងក្នុងគោលបំណងដើម្បីជូនដំណឹងទាក់ទិននឹងអត្រាការ ប្រាក់ ដែលធនាគារចិនបានផ្តល់ជូន ដែលនេះជាកិច្ចការដ៏ល្អមួយសម្រាប់ធនាគារ និងមីក្រូហិរញ្ញវត្ថុនៅក្នុងប្រទេសកម្ពុជា។ ការជួបជុំគ្នានាពេលនេះក៏ដើម្បីជជែកពិភាក្សា និងស្នើសុំឱ្យមានការយោគយល់គ្នាទៅវិញទៅមកអំពីការសម្រួលលើ ឧស្សាហកម្មកម្ចីប្រាក់ដើម្បីទិញផ្ទះ ដែលកត្តានេះនឹងជួយសម្រួលលើផល ប៉ះពាល់ដល់អាយុជីវិតប្រទេសជាតិ និងរាជរដ្ឋាភិបាលកម្ពុជា។

លោកគូសរំលេចថា បច្ចុប្បន្នក្រសួងរៀបចំដែនដី បានដោះស្រាយវិវាទបុរីអស់ជាច្រើនករណី ដើម្បីឱ្យប្រជាពលរដ្ឋជាអតិថិជនរបស់បុរីមានទំនុកចិត្តចំពោះរាជរដ្ឋាភិបាលកម្ពុជាដែលខិតខំរិះរកដំណោះស្រាយសមស្របរវាងពួកគាត់ និងម្ចាស់បុរី។ ជាមួយគ្នានេះ ក្រសួងក៏បានជួយដោះស្រាយសម្របសម្រួលលើអត្រាការប្រាក់ជាមួយបណ្ដាធនាគារ និងមីក្រូហិរញ្ញវត្ថុនានាក្នុងកម្ចីទិញផ្ទះសម្រាប់ប្រជាពលរដ្ឋដើម្បីឱ្យពួកគាត់មាន លទ្ធភាពទិញលំនៅឋានរស់នៅសមរម្យ និងជួយលើកស្ទួយការប្រើប្រាស់ប្រាក់រៀល និងរក្សាស្ថិរភាពប្រាក់រៀលផងដែរ។

លោក សាយ សំអាល់ បានបញ្ជាក់ថា ធនាគារចិនមានបំណងចង់ចូលរួមវិនិយោគក្នុងវិស័យប្រាក់កម្ចីដែលមាន អត្រាការប្រាក់ទាបសម្រាប់អតិថិជនក្នុងប្រទេសកម្ពុជា នេះគឺជាកត្តាល្អមួយសម្រាប់ប្រជាពលរដ្ឋដែលមានបំណងចង់ទិញលំនៅឋានសម្រាប់រស់នៅ ហើយមិនទាន់មានលទ្ធភាពគ្រប់គ្រាន់ អាចមានឱកាសទិញលំនៅឋានបានតាមរយៈប្រាក់កម្ចីដែលមានអត្រាការប្រាក់ទាបសមស្របតាមលទ្ធភាពដែលខ្លួនមាន ។នេះក៏ជាកត្តាល្អមួយដែលជំរុញឱ្យវិស័យអចលនទ្រព្យនៅក្នុងប្រទេសកម្ពុជា មានដំណើរការល្អឡើងវិញ ដោយសារប្រជាពលរដ្ឋមានលទ្ធភាពទិញផ្ទះហើយសំណង់លំនៅឋានដែលនៅសេសសល់នោះក៏អាចលក់អស់ និងមិនជាប់គាំង ផងដែរ ៕

អត្ថបទ៖ ពិសិដ្ឋ រូបភាព៖ ផេកលោក សាយ សំអាល់

The post ធនាគារចិន នឹងផ្ដល់កម្ចីក្នុងអត្រាការប្រាក់ទាប ជួយស្រោចស្រង់វិស័យអចលនទ្រព្យកម្ពុជា appeared first on Millions times.

សេដ្ឋីម្ចាស់គម្រោងបុរីធំៗ ចូលរួមសន្និបាតសមាគមអភិវឌ្ឍលំនៅឋានកម្ពុជា ដោយស្នើសុំរដ្ឋមន្ដ្រី សាយ សំអាល់ ជួយដោះស្រាយនូវបញ្ហាប្រឈម និងវិបត្តិកំពុងជួបប្រទះ

Vin Chang — Sat, 29 Mar 2025 11:54:01 +0000

សេដ្ឋីអចលនទ្រព្យនៅកម្ពុជាគ្រាក់ៗជាច្រើនរូបដែលវិនិយោគលើផ្នែកអភិវឌ្ឍន៍លំនៅឋាន ចូលរួមសន្និបាតបូកសរុបលទ្ធផលការងារឆ្នាំប្រចាំ២០២៤ និងលើកទិសដៅការងារសម្រាប់ឆ្នាំ២០២៥ សមាគមអភិវឌ្ឍលំនៅឋានកម្ពុជា កាលពីថ្ងៃទី២៨ ខែមីនា ឆ្នាំ២០២៥ ដឹកនាំដោយលោកអ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា។

តាមដានជាមួយយើង៖ Million Times

លោកអ្នកឧកញ៉ា អ្នកឧកញ៉ា ឧកញ៉ាទាំងអស់នោះ សុទ្ធតែកំពុងអភិវឌ្ឍន៍លំនៅឋានលើគម្រោងយក្សៗ ហើយក៏ជាពាណិជ្ជករដែលមានក្រុមហ៊ុននៅក្នុងដៃជាច្រើនផងដែរ។ សន្និបាតនេះ ក៏មានការចូលរួមបិទពីឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី និងនគរូបនីយកម្ម និងសំណង់ នៅរសៀលថ្ងៃទី២៨ ខែមីនា ឆ្នាំ២០២៥។

ពិធីនេះមានការចូលរួមពីលោកអ្នកឧកញ៉ា អ្នកឧកញ៉ា ឧកញ៉ា ថ្នាក់ដឹកនាំ ទីប្រឹក្សា និងសមាជិក សមាជិកាសមាគមនអ្នកអភិវឌ្ឍន៍លំនៅឋានកម្ពុជា ក្នុងនោះសង្កេតឃើញវត្តមានថ្នាក់ដឹកនាំបុរីធំៗបានចូលរួមក្រៅពីបុរីលោកអ្នកឧកញ៉ា លី ហួរ ម្ចាស់បុរី វិមានភ្នំពេញ កីមានវត្តមាន៖ ឧកញ៉ា លាង ហួង ម្ចាស់បុរី ជីបម៉ុង, អ្នកឧកញ៉ា ថៃ ជាហួត ម្ចាស់បុរី ប៉េង ហួត, អ្នកឧកញ៉ា គឹម សុខអេង ម្ចាស់បុរី KK The Resistance 598 , អ្នកឧកញ៉ា ប៊ុន ហៃ ម្ចាស់បុរី ភ្នំពេញថ្មី, អ្នកឧកញ៉ា តល លន ម្ចាស់បុរី លនស៊ីធី, អ្នកឧកញ៉ា លាង សាំង ម្ចាស់បុរី ហាយធិច, អ្នកឧកញ៉ា លី សាយឃាង ម្ចាស់បុរី ចតុមុខស៊ីធី ជាដើម។

ក្នុងឱកាសនោះ លោកអ្នកឧកញ៉ា លី ហួរ បានលើកពីផលប៉ះពាល់ ក៏ដូចជាបញ្ហាប្រឈម និងឧបសគ្គមួយចំនួនដោយសារបញ្ហាវិបត្តិសេដ្ឋកិច្ចធ្លាក់ចុះជាសកល តាំងពីកត្តារីករាលដាលជំងឺឆ្លងកូវីដ១៩ និងសង្គ្រាមរុំារៃរវាងប្រទេសរុស្ស៊ី-អ៊ុយក្រែន សង្គ្រាមរវាងក្រុមហាម៉ាស-ប៉ាឡេស្ទីន ព្រមទាំងមានការបែងចែកប្លុកសេដ្ឋកិច្ចតំបន់ផងដែរ និងបញ្ហាផ្សេងៗទៀត ដែលជះឥទ្ធិផលដល់សេដ្ឋកិច្ចកម្ពុជាទាំងមូលផងដែរ ជាពិសេសធ្វើឲ្យប៉ះពាល់ដល់វិស័យអចលនទ្រព្យ ធ្វើឲ្យវិស័យនេះទាំងមូលស្ទើរតែធ្លាក់ដល់សូន្យ។

ទន្ទឹមគ្នានេះ លោកអ្នកឧកញ៉ាក៏បានស្នើសុំឧបនាយករដ្ឋមន្ដ្រី សាយ សំអាល់ ដែលជាស្ថាប័នអាណាព្យាលបាលផ្ទាល់ ជួយសម្របសម្រួលដោះស្រាយនូវបញ្ហាប្រឈម និងវិបត្តិវិស័យអចលនទ្រព្យកំពុងជួបប្រទះនេះ។

ជាការឆ្លើយតបលោកសាយ សំអាល់ បានបង្ហាញនូវគន្លឹះប្រកបដោយសុវត្ថិភាព និងយុទ្ធសាស្ដ្ររួម សម្រាប់ដើរទៅមុខទាំងអស់គ្នា ដោយពួតដៃគ្នាឈរលើវិថីមួយដ៏ត្រឹមត្រូវ ដើម្បីកុំឱ្យមានការលំបាក និងខាតបង់ថវិកា។

ទន្ទឹមនឹងនោះ លោកឧបនាយករដ្ឋមន្ដ្រីបានគូសបញ្ជាក់ថា៖ «រាជរដ្ឋាភិបាលយើង គឺបានខិតខំប្រឹងប្រែង ធ្វើយ៉ាងណាបង្កលក្ខណៈឱ្យប្រជាពលរដ្ឋយើងមានជីវភាពល្អប្រសើរ កាលណាពលរដ្ឋយើងមានភាពធូរធារ នោះនឹងជះឥទ្ធពលល្អផងដែរដល់វិស័យអចលនទ្រព្យ»។

ក្នុងឱកាសនោះ លោកក៏បានលើកយកនូវអនុសាសន៍គន្លឹះមួយចំនួនទៀត ដោយផ្អែកលើកទិន្ន័យវិទ្យាសាស្ដ្រ និងកិច្ចការងារដែលក្រសួងកំពុងប្រឹងប្រែងធ្វើ ដើម្បីរក្សានិរន្ដន៍ភាព នូវឧស្សាហកម្មអចនទ្រព្យ ដែលសំដៅទៅលើលំនៅឋាន និងគ្រឿងបង្គុំសំណង់ ឬឧស្សាហកម្មសំណង់៕

អត្ថបទ៖ សាងតេជៈ រូបភាព៖ HDAC

The post សេដ្ឋីម្ចាស់គម្រោងបុរីធំៗ ចូលរួមសន្និបាតសមាគមអភិវឌ្ឍលំនៅឋានកម្ពុជា ដោយស្នើសុំរដ្ឋមន្ដ្រី សាយ សំអាល់ ជួយដោះស្រាយនូវបញ្ហាប្រឈម និងវិបត្តិកំពុងជួបប្រទះ appeared first on Millions times.

ធនាគារជាតិ និងក្រសួងរៀបចំដែនដី ឯកភាពប្រែក្លាយដីឱ្យទៅជាធនាគារដី ជួយជំរុញកំណើនសេដ្ឋកិច្ចជាតិ

Vin Chang — Tue, 25 Mar 2025 02:12:58 +0000

ធនាគារជាតិនៃកម្ពុជា បានឯកភាពក្នុងការធ្វើកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ក្នុងកម្រិតសមស្របណាមួយដើម្បីជំរុញសេដ្ឋកិច្ចជាតិ ឱ្យដំណើរការបានល្អ។ ការឯកភាពនេះ ធ្វើឡើងក្នុងកិច្ចប្រជុំរវាងឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ និងលោកស្រី ជា សិរី ទេសាភិបាល ធនាគារជាតិនៃកម្ពុជា នាថ្ងៃទី២៤ ខែមីនា ឆ្នាំ២០២៥។

លោក សាយ សំអាល់ បានលើកឡើងថា សម្ដេច ហ៊ុន ម៉ាណែត នាយករដ្ឋមន្ត្រីតែងតែបានលើកឡើងថា «យើងទាំងអស់គ្នាត្រូវរៀបចំផ្ទះសម្បែងរបស់យើងឱ្យបានរៀបរយ ហើយមិនមានពេលវេលាណាដែលអំណោយផលដូចពេលនេះទេ ក្នុងការរៀបចំផ្ទះសម្បែងរបស់យើងឱ្យបានត្រឹមត្រូវ និងមានរបៀបរៀបរយ»។

តាមដានជាមួយយើង៖ Million Times

លោកក៏បានបង្ហាញនូវការកត់សម្គាល់ថា ជាទូទៅប្រាក់ដុល្លារ និងប្រាក់រៀល អាចដំណើរការនៅក្នុងលំហូរសេដ្ឋកិច្ចកម្ពុជានាពេលបច្ចុប្បន្ន ដែលនេះគឺជារឿងដ៏ល្អមួយសម្រាប់កម្ពុជាដែលបានដើរលើផ្លូវដ៏ត្រឹមត្រូវតាំងពីឆ្នាំ១៩៧៩ មក ។ ការសម្រួលអត្រាការប្រាក់នឹងជួយបន្ធូរដល់បំណុលឯកជន ដែលអាចឈានទៅបន្ធូរដល់បំណុលសាធារណៈផងដែរ។

ជាសំណើដល់ធនាគារជាតិនៃកម្ពុជា លោក សាយ សំអាល់ លើកឡើងថា តើធនាគារជាតិនៃកម្ពុជាអាចមានការឯកភាពសហការជាមួយក្រសួងរៀបចំដែនដីកម្រិតណាក្នុងវិស័យដីធ្លី ដើម្បីប្រែក្លាយដីឱ្យទៅជាធនាគារដី ដែលអាចជួយជំរុញកំណើនសេដ្ឋកិច្ចជាតិបានយ៉ាងល្អ។

ជាការឆ្លើយតបលោកស្រី ជា សិរី បានលើកឡើងអំពីស្ថានភាពវិស័យធនាគារ និងទំនាក់ទំនងជាមួយវិស័យសំណង់ និងអចលនទ្រព្យនៅកម្ពុជា ក្នុងនោះលោកស្រីបានផ្តាំផ្ញើដល់អ្នកដែលទទួលបានបណ្ណកម្មសិទ្ធិដីធ្លីពីរាជរដ្ឋាភិបាលហើយនោះត្រូវថែរក្សាទុកជាកេរមរតក និងសូមកុំយកទៅលក់ ឬដាក់បញ្ចាំនៅធនាគារភ្លាមៗ ហើយត្រូវប្រើប្រាស់បណ្ណកម្មសិទ្ធិនេះប្រកបដោយការទទួលខុសត្រូវ។

លោកស្រីបញ្ជាក់ថា ទំនាក់ទំនងរវាងអចលនទ្រព្យ និងធនាគារ គឺមានភាពស្អិតរមួត តាមរយៈការដាក់ទ្រព្យបញ្ចាំដើម្បីបានប្រាក់កម្ចី ហើយការឡើង ឬចុះនៃតម្លៃអចលនទ្រព្យក៏មានផលប៉ះពាល់ដល់ធនាគារដែរ ។ ជាមួយនេះ លោកស្រីក៏បានឯកភាពក្នុងការធ្វើកិច្ចសហការជាមួយក្រសួងរៀបចំដែនដី នគរូបនីយកម្ម និងសំណង់ ក្នុងកម្រិតសមស្របណាមួយដើម្បីជំរុញឱ្យសេដ្ឋកិច្ចជាតិដំណើរការល្អផងដែរ។

ក្នុងជំនួបនេះដែរ ថ្នាក់ដឹកនាំស្ថាប័នទាំងពីរបានពិភាក្សាអំពីស្ថានភាពវិស័យធនាគារ និងទំនាក់ទំនងជាមួយវិស័យសំណង់ និងអចលនទ្រព្យ និងការប្រើប្រាស់បច្ចេកវិទ្យាប្លុកឆេនតាមរយៈប្រព័ន្ធបាគង ដើម្បីសម្រួលដល់ការផ្ទេរបណ្ណកម្មសិទ្ធិ ក៏ដូចជាការដាក់បន្ទុក និងការដោះបន្ទុកអចលនទ្រព្យក្នុងវិស័យធនាគារ ក្នុងគោលបំណងសម្រួលដល់ការគ្រប់គ្រង និងការប្រើប្រាស់បណ្ណអចលនទ្រព្យឱ្យមានប្រសិទ្ធភាព និងតម្លាភាព ស្របតាមគោលនយោបាយរបស់រាជរដ្ឋាភិបាលក្នុងការអភិវឌ្ឍសេដ្ឋកិច្ចនិងសង្គមឌីជីថល។

ដើម្បីពង្រឹងកិច្ចសហការនេះ ភាគីទាំងពីរក៏បានឯកភាពក្នុងការរៀបចំក្រុមការងារសម្រាប់សិក្សាលើការធ្វើសន្ធានកម្មប្រព័ន្ធបាគងជាមួយប្រព័ន្ធគ្រប់គ្រងទិន្នន័យរបស់ក្រសួងរៀបចំដែនដី នគរូបនីយកម្ម និងសំណង់ និងសិក្សាបន្ថែមលើក្របខ័ណ្ឌច្បាប់និងបទប្បញ្ញត្តិពាក់ព័ន្ធនានា៕

អត្ថបទ៖ ពិសិដ្ឋ រូបភាព៖ Page NBC

The post ធនាគារជាតិ និងក្រសួងរៀបចំដែនដី ឯកភាពប្រែក្លាយដីឱ្យទៅជាធនាគារដី ជួយជំរុញកំណើនសេដ្ឋកិច្ចជាតិ appeared first on Millions times.

ខេត្តព្រះសីហនុ រំពឹងទាក់ទាញភ្ញៀវទេសចរ និងវិនិយោគិនកាន់តែច្រើន ពេលសង់រួចរាល់រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង”

Vin Chang — Tue, 11 Mar 2025 06:45:23 +0000

រដ្ឋបាលខេត្តព្រះសីហនុ រៀបចំរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” ដើម្បីទាក់ទាញភ្ញៀវទេសចរ និងអ្នកវិនិយោគិនកាន់តែច្រើនបន្ថែមទៀត ជាមួយនឹងការរៀបចំកន្លែងអង្គុយលម្តែ កន្លែងលេងកីឡា ឡានម្ហូបដែលមានស្តង់ដាអន្តរជាតិ សម្រាប់សាធារណជន និងទេសច។

នៅព្រឹកថ្ងៃទី១១ ខែមីនា ឆ្នាំ២០២៥ លោក សាយ សំអាល់ឧបនាយករដ្ឋមន្ត្រី រដ្ឋមន្ត្រីក្រសួងដែនដីនគរូបនីយកម្ម និងសំណង់ ជាប្រធានគណៈកម្មាធិការជាតិគ្រប់គ្រងអភិវឌ្ឍតំបន់ឆ្នេរសមុទ្រកម្ពុជា បានចូលរួមក្នុងពិធីបើកការដ្ឋានសាងសង់រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់”ឆ្នេរព្រែកត្រែង” ស្ថិតនៅភូមិ៣ សង្កាត់លេខ១ ក្រុងព្រះសីហនុ ខេត្តព្រះសីហនុ។

តាមដានជាមួយយើង៖ Million Times

គម្រោងអភិវឌ្ឍរមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” ជាគម្រោងស្ថារលើកកម្ពស់សោភ័ណភាពឆ្នេរព្រែកត្រែង រួមមាន៖

១. រៀបចំកែលម្អ និងការពារឆ្នេរខ្សាច់សរធម្មជាតិប្រណិតកម្រិតខ្ពស់សម្រាប់សាធារណជននិងទេសចរ

២. រៀបចំតំបន់សុវត្ថិភាពសម្រាប់លេងទឹកសមុទ្រកម្សាន្ត និងរៀបចំប៉មឆ្នាំសមុទ្រសម្រាប់ការពារសុវត្ថិភាព

៣. រៀបចំសួនច្បារសាធារណៈ ដាំដើមឈើបណ្តាញបៃតង និងកន្លែងពិកនិកកម្សាន្ត នៅលើដីចំណីឆ្នេរសមុទ្រសម្រាប់សាធារណជន និងទេសចរ

៤. រៀបចំផ្លូវថ្មើរជើងដោយមានផ្លូវសម្រាប់ជនមានពិការភាពនៅលើដីចំណីឆ្នេរសមុទ្រស្របតាមបណ្តោយឆ្នេរសមុទ្រ

៥. រៀបចំកន្លែងអង្គុយលម្តែ កន្លែងលេងកីឡា ឡានម្ហូបដែលមានស្តង់ដាអន្តរជាតិ សម្រាប់សាធារណជន និងទេសចរ

៦. រៀបចំបន្ទប់ទឹកសាធារណៈដោយមានបន្ទប់ទឹកសម្រាប់ជនមានពិការភាព

៧. ជួសជុលកែលម្អកញ្ចុះចាស់ៗដែលមានស្រាប់សម្រាប់សាធារណជន និងទេសចរ

៨. រៀបចំតម្លើងឆត្រប្រក់ស្បូវសម្រាប់សាធារណជន និងទេសចរ

៩. រៀបចំចំណតរថយន្ត និងចំណតយានយន្តសាធារណៈនៅក្នុងតំបន់រណប

១០. រៀបចំប្រព័ន្ធលូរំដោះទឹកភ្លៀង ប្រព័ន្ធលូទឹកកខ្វក់ និងប្រព័ន្ធអាងប្រព្រឹត្តកម្មទឹកកខ្វក់ ស្របតាមបទដ្ឋានបច្ចេកទេសបរិស្ថាន ជាឆ្នេរសមុទ្រដែលស្អាតបំផុតលើសកលលោក

១១. រៀបចំប្រព័ន្ធគ្រប់គ្រងសំណល់រឹង និងបន្ទប់ស្តុកសំរាមស្របតាមបទដ្ឋានបច្ចេកទេសបរិស្ថាន ជាឆ្នេរសមុទ្រដែលស្អាតបំផុតលើសកលលោក។

ទន្ទឹមគ្នានេះ រដ្ឋបាលខេត្តព្រះសីហនុ បានដាក់ក្តីរំពឹងថា នៅពេលសាងសង់រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” រួចរាល់ ខេត្តព្រះសីហនុ និងកាន់តែមានការទាក់ទាញភ្ញៀវទេសចរ និងអ្នកវិនិយោគិនកាន់តែច្រើនបន្ថែមទៀតមកលេងកម្សាន្តនៅខេត្តព្រះសីហនុ៕

អត្ថបទ៖ សាងតេជៈ រូបភាព៖ រដ្ឋបាលខេត្តព្រះសីហនុ

The post ខេត្តព្រះសីហនុ រំពឹងទាក់ទាញភ្ញៀវទេសចរ និងវិនិយោគិនកាន់តែច្រើន ពេលសង់រួចរាល់រមណីយដ្ឋានឆ្នេរខ្សាច់កម្សាន្តសាធារណៈកម្រិតខ្ពស់ “ឆ្នេរព្រែកត្រែង” appeared first on Millions times.

លោក សាយ សំអាល់ អំពាវនាវអ្នកអភិវឌ្ឍន៍លំនៅឋាន អនុវត្តតាមថ្នាក់ដឹកនាំ ធ្វើឲ្យប្រជាជនខ្មែរមានផ្ទះរស់នៅសមរម្យ

Vin Chang — Tue, 18 Feb 2025 08:38:36 +0000

លោក សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អំពាវនាវដល់អ្នកអភិវឌ្ឍន៍លំនៅឋាន រួមគ្នាអនុវត្តអនុសាសន៍ថ្នាក់ដឹកនាំប្រទេសសម្ដេច ហ៊ុន ម៉ាណែត នាយករដ្ឋមន្ត្រីកម្ពុជា ធ្វើយ៉ាងណាឲ្យប្រជាជនខ្មែរ មានផ្ទះសម្បែងរស់នៅសមរម្យ។

តាមដានជាមួយយើង៖ Million Times

រដ្ឋមន្ត្រីក្រសួងដែនដី នគរូបនីយកម្ម និងសំណង់ បានលើកឡើងរឿងនេះ នៅក្នុងពិធីបិទសន្និបាតសមាគមអ្នកវិនិយោគ អ្នកសាងសង់ និងស្ថាបត្យករកម្ពុជា (សវសសក) និងការចុះអនុស្សរណៈ និងជំនួបធុរកិច្ច កាលពីថ្ងៃ១៧ ខែកុម្ភៈ ឆ្នាំ ២០២៥ នៅសណ្ឋាគារ ហ៉ីម៉ាវ៉ារី។

លោក សាយ សំអាល់ បានបញ្ជាក់បន្តទៀតថា «បើយើង ៣ ឬ៤នាក់ យើងជាដៃគូយុទ្ធសាស្ត្រគ្រប់ជ្រុងជ្រោយ ជួយគ្នាទៅវិញទៅមក ហើយជួយ Formulate policy (បង្កើតគោលនយោបាយ)។ ខ្ញុំ អនុវត្តគោលនយោបាយ របស់សម្ដេចធិបតី។ សម្ដេចធិបតី មានប្រសាសន៍ថា ឥឡូវធ្វើម៉េចឲ្យប្រជាជនខ្មែរគ្រប់រូប មានផ្ទះសម្បែងនៅស្រួលបួល ជីវភាពសមរម្យ។

រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ អបអរសាទរ ដែលសមាគម សវសសក បានប្ដូរអនុស្សរណៈនៃការយោគយល់គ្នា ជាមួយសមាគមអតីតនិស្សិតខ្មែរផ្នែកវិស្វកម្ម និងស្ថាបត្យកម្មពីចិន, សមាគមអតីតនិស្សិតខ្មែរមកពីសិង្ហបុរី, សភាមុខរបរ និងមីក្រូសហគ្រាសកម្ពុជា, សមាគមអភិវឌ្ឍឧស្សាហកម្មរ៉ូបូតកម្ពុជា និងសហគមន៍ INNEX។

គួរបញ្ជាក់ផងដែរថា អនុស្សរណៈនៃការយោគយល់គ្នាទាំង ៦ស្ថាប័ន ត្រូវបានបង្កើតឡើងក្នុងគោលបំណង៖

– សហការ និងគាំទ្រគ្នាលើការរៀបចំវគ្គបណ្ដុះបណ្ដាល សិក្ខាសាលាអប់រំ កម្មវិធីពិព័រណ៍ ការប្រកួតប្រជែងស្នាដៃ ការងារសង្គម មនុស្សធម៌ និងសប្បុរសធម៌
– គាំទ្រគ្នាលើការផ្សារភ្ជាប់អ្នកវិនិយោគ និងអ្នកអភិវឌ្ឍទាំងក្នុង និងក្រៅប្រទេស ដោយធ្វើការជាមួយគ្នា
– ការទទួលសិស្សនិស្សិតចុះកម្មសិក្សាផ្ទាល់ដល់រោងចក្រ សហគ្រាស ក្រុមហ៊ុន ព្រមទាំងផ្ដល់ឱកាសហាត់ការ និងការងារ
– ផ្ដល់ឱកាសអាជីវកម្ម និងគម្រោងពាក់ព័ន្ធឲ្យគ្នាទៅវិញទៅមក
– ជួយប្រឹក្សាយោបល់គ្នាទៅវិញទៅមក លើជំនាញវិជ្ជាជីវៈរបស់សមាគម៕

អត្ថបទ៖ មេរ៉ា, រូបភាព៖ ក្រសួងរៀបចំដែនដី នគរូបនីយកម្ម និងសំណង់ និង cpp

The post លោក សាយ សំអាល់ អំពាវនាវអ្នកអភិវឌ្ឍន៍លំនៅឋាន អនុវត្តតាមថ្នាក់ដឹកនាំ ធ្វើឲ្យប្រជាជនខ្មែរមានផ្ទះរស់នៅសមរម្យ appeared first on Millions times.

កម្ពុជា កំពុងសិក្សាជម្រើសនៃការប្រើប្រាស់ឧស្សាហកម្មគ្រឿងបង្គុំសំណង់

Vin Chang — Mon, 27 Jan 2025 08:49:30 +0000

ក្រសួងរៀបចំដែនដី នគរូបនីយកម្ម និងសំណង់ បានឱ្យដឹងថា កម្ពុជាបានឈានមកដល់ចំណុចមួយ អនុញ្ញាតឱ្យកម្ពុជាមានជម្រើសក្នុងការប្រើប្រាស់គ្រឿងបង្គុំសំណង់។

នៅថ្ងៃទី២៧ ខែមករា ឆ្នាំ០២៥នេះ តាមរយៈសិក្ខាសាលាពិគ្រោះយោបល់ពាក់ព័ន្ធនឹងហានិភ័យនៃការប្រើប្រាស់សារធាតុអាសបេស្តុស (Asbestos) ក្នុងវិស័យសំណង់ ក្រសួងរៀបចំដែនដីបានលើកយកប្រធានបទ៖ «សារធាតុអាសបេស្តុស (Asbestos) » មកជជែកពិភាក្សា ដើម្បីបន្ថែមការយល់ដឹងកាន់តែច្បាស់អំពីអត្ថប្រយោជន៍ និងផលប៉ះពាល់របស់សារធាតុនេះ ដែលជាធាតុផ្សំនៅក្នុងសម្ភារសំណង់សំខាន់ៗជាច្រើន ដូចជា សម្ភារដំបូល សម្ភារធ្វើពីអ៉ីសូឡង់ សម្ភារធ្វើពីកម្រាល ផលិតផលការពារភ្លើង និងធន់នឹងកម្តៅ វាយនភ័ណ្ឌ និងសម្ភារផ្សេងៗទៀត ក្នុងចំណោមគ្រឿងបង្គុំសំណង់ជាច្រើននៅកម្ពុជា។

តាមដានជាមួយយើង៖ Million Times

ក្រសួងរៀបចំដែនដីបន្តឲ្យដឹងថា តាមរយៈការសិក្សា អាសបេស្តូស (Asbestos) មានផលប៉ះពាល់ធ្ងន់ធ្ងរដល់សុខភាពសាធារណៈ ពិសេស សុខភាពផ្លូវដង្ហើម សួត ជាដើម នៅពេលដែលមានការបំបែកទ្រង់ទ្រាយដូចជាការកាត់ ពុះជ្រៀក រុះរើ ការពុកផុយ។

ក្នុងសិក្ខាសាលានាព្រឹកថ្ងៃចន្ទនេះ ឧបនាយករដ្ឋមន្រ្តី សាយ សំអាល់ រដ្ឋមន្រ្តីក្រសួងរៀបចំដែនដី នគរូបនីយកម្ម និងសំណង់ មានប្រសាសន៍ថា «យើងបានមើលឃើញថាបណ្តាប្រទេសជាច្រើនបានចាត់វិធានការទប់ស្កាត់ការប្រើប្រាស់សារធាតុនេះទាំងស្រុង ដូចជាប្រទេសអូស្ត្រាលី ប្រេស៊ីល កាណាដា អេហ្ស៊ីប ជប៉ុន កូរ៉េ ន័រវ៉េ សិង្ហបុរី ជាដើម ក្នុងនោះ ក៏នៅមានបណ្តាប្រទេសមួយចំនួនកំពុងបន្តប្រើប្រាស់សារធាតុនេះ ដោយប្រើប្រាស់យន្តការ បទប្បញ្ញត្តិ និងបទដ្ឋានក្នុងការគ្រប់គ្រងការប្រើប្រាស់ ដែលយើងអាចធ្វើការសិក្សាដកយកបទពិសោធន៍បាន»។

លោកបន្តថា តាមរយៈសិក្ខាសាលាពិគ្រោះយោបល់ក្នុងថ្ងៃនេះ គឺយើងនឹងដកស្រង់បទពិសោធន៍ពីបណ្តាប្រទេសនានា ដើម្បីពិគ្រោះយោបល់ ពិភាក្សា វែកញែកបញ្ហាប្រឈមទាំងអស់ឱ្យបានល្អិតល្អន់ ដើម្បីផ្តល់ជម្រើសជូនប្រជាជនកម្ពុជា និងឈានដល់ការឯកភាពជារួមមួយ ថាគួរនៅបន្តប្រើអាសបេស្តុស (Asbestos) នេះតទៅទៀត ឬក៏ត្រូវកម្រិតលក្ខខណ្ឌនៃការប្រើប្រាស់បែបណា ឬក៏បង្កើនការប្រុងប្រយ័ត្នខ្ពស់ចំពោះការបន្តប្រើប្រាស់ ស្របតាមបទដ្ឋានគ្រប់គ្រងប្រកបដោយភាពម្ចាស់ការ ដែលបុព្វហេតុជារួមគឺ ដើម្បីជាឧត្តមប្រយោជន៍ដល់ឧស្សហកម្មគ្រឿងបង្គុំសំណង់របស់យើង ក៏ដូចជាប្រជាជនកម្ពុជាគ្រប់ៗរូប។

ស្របពេលដែលការនាំចូលសម្ភារសំណង់មានការកើនឡើងគួរឱ្យកត់សម្គាល់ ការនាំចូលដែក និងដែកថែម នៅក្នុងរយៈពេល១១ខែឆ្នាំ២០២៤ ក៏មានការកើនឡើងខ្ពស់ផងដែរ រហូតដល់ជាង ៦៥% និងមានទំហំទឹកប្រាក់ប្រមាណជាង ២៩២លានដុល្លារ។ នេះបើតាមស្ថិតិពាណិជ្ជកម្មរបស់ក្រសួងពាណិជ្ជកម្ម៕

អត្ថបទ៖ សាងតេជៈ រូបភាព៖ ក្រសួងរៀបចំដែនដី

The post កម្ពុជា កំពុងសិក្សាជម្រើសនៃការប្រើប្រាស់ឧស្សាហកម្មគ្រឿងបង្គុំសំណង់ appeared first on Millions times.

លោក សាយ សំអាល់ ធ្វើឲ្យពលរដ្ឋមានស្នាមញញឹមទទួលយុទ្ធសាស្រ្តដោះស្រាយផលប៉ះពាល់ពីគម្រោងរៀបកែចំឆ្នេរសមុទ្ររាម

Vin Chang — Wed, 22 Jan 2025 06:43:00 +0000

លោក សាយ សំអាល់ ឧបនាយករដ្ឋមន្រី្ដ រដ្ឋមន្រ្ដីក្រសួងរៀបចំដែនដី នគរូនីយកម្ម និងសំណង់ និងជាប្រធានក្រុមការងាររាជរដ្ឋាភិបាលចុះមូលដ្ឋានខេត្តព្រះសីហនុ នៅថ្ងៃទី២១ ខែមករា ឆ្នាំ២០២៥ បានប្រគល់ផ្ទះល្វែងពាណិជ្ជកម្មចំនួន៤២ល្វែង កម្ពស់១ជាន់កន្លះ នៅភូមិអុង ឃុំរាម ស្រុកព្រៃនប់ ខេត្តព្រះសីហនុ ជូនគ្រួសារទ័ពដែលទទួលបានការដោះស្រាយផលប៉ះពាល់ពីការអនុវត្តគម្រោងរៀបកែចំលម្អឆ្នេរសមុទ្ររាម។

ក្រោយទទួលបានលំនៅឋាននៅថ្ងៃនេះ ប្រជាពលរដ្ឋបានសម្តែងនូវក្តីរីករាយខ្លាំងជាមួយនឹងស្នាមញញឹមពិតដែលរាជរដ្ឋាភិបាលផ្តល់ការដោះស្រាយជូនពួកគាត់។ លោក សាយ សំអាល់ បានថ្លែងថា ស្នាមញញឹមនេះ គឺផ្តើមចេញពីវប្បធម៌សន្ទនា ការរកក្តីសង្ឃឹមថ្មី និងបំណងប្រាថ្នារួម ដែលធ្វើឲ្យយើងបានសម្រេចនូវសមិទ្ធផល ២ ជូនអ្នករាម ខេត្តព្រះសីហនុ។

តាមដានជាមួយយើង៖ Million Times

លោកថ្លែងថា «ឆ្នេរសមុទ្ររាម គឺជាកន្លែងដែលប្រជាជនកម្ពុជាពីគ្រប់ទិសទីចូលចិត្តមកកំសាន្ត និងលំហែ តាមរយៈខ្យល់អាកាសល្អ ទេសភាពស្អាត ម្ហូបអាហារឆ្ងាញ់ និងបដិសណ្ឋារកិច្ចល្អ។ ទោះជាយ៉ាងណាក៏ដោយ កន្លែងនេះ កាលពីមុន មានការសង់តូបនៅលើឆ្នេរខ្សាច់ ដែលមិនមានរបៀបរៀបរយ និងពិបាកនៅក្នុងការរស់នៅ»។

បើតាមលោក សាយ សំអាល់ ក្រុមការងារថ្នាក់ជាតិ និងប្រជាជននៅតំបន់ឆ្នេរនេះ បានពិគ្រោះយោបល់និងឈរលើជំហររួមថា យើងមានលទ្ធភាពទាំងរក្សាឆ្នេរជាសួនសាធារណៈសម្រាប់ឧត្តមប្រយោជន៍ប្រជាជនទូទាំងប្រទេសផង និងអាចរៀបចំជាលំនៅឋានសមរម្យឲ្យបងប្អូន ដែលជាយុទ្ធជននៃកងទ័ពជើងទឹកផងដែរ។

ដោយមានការឯកភាព ស្រុះស្រួលគ្នាខាងលើ ជម្រើសនេះ លោកថា យើងបានរៀបចំចេញជាភូមិឋានក្សេមមក្សាន្ត ហើយខ្ញុំបានមកប្រគល់ប័ណ្ណកម្មសិទ្ធសម្គាល់ម្ចាស់អចលនវត្ថុទាំងអស់ជូនបងប្អូនដែលខ្លះជាអតីត និងបងប្អូនខ្លះទៀតកំពុងបម្រើការជាកងទ័ពជើងទឹក ដោយអារម្មណ៍រីករាយ និងភាតរភាព៕

អត្ថបទ៖ សាងតេជៈ រូបភាព៖ ផេកលោក សាយ សំអាល់

The post លោក សាយ សំអាល់ ធ្វើឲ្យពលរដ្ឋមានស្នាមញញឹមទទួលយុទ្ធសាស្រ្តដោះស្រាយផលប៉ះពាល់ពីគម្រោងរៀបកែចំឆ្នេរសមុទ្ររាម appeared first on Millions times.

លោក សាយ សំអាល់ សម្រេចឲ្យរៀបចំការចុះបញ្ជីដី និងសិក្សាសក្តានុពលតំបន់ឆ្នេរសមុទ្រទាំងអស់ជារបៀងសេដ្ឋកិច្ចរួម

Vin Chang — Tue, 07 Jan 2025 13:48:55 +0000

ឧបនាយករដ្ឋមន្ត្រី សាយ សំអាល់ សម្រេចឲ្យរៀបចំការចុះបញ្ជីដី ព្រមទាំងសិក្សាសក្តានុពលតំបន់ឆ្នេរសមុទ្រទាំងអស់ជារបៀងសេដ្ឋកិច្ចរួម ដោយសារខេត្តទាំង ៤ដែលជាប់មាត់សមុទ្រ រួមមាន កោះកុង ព្រះសីហនុ កំពត និងកែប ឆ្នេរនៅតាមបណ្តាខេត្តនីមួយៗសុទ្ធតែមានសក្តានុពលរៀងៗខ្លួន។

ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានដឹកនាំកិច្ចប្រជុំគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ដែលមានការចូលរួមពីលោក លី យ៉ុងផាត់ សមាជិកព្រឹទ្ធសភា រដ្ឋមន្ត្រីក្រសួងបរិស្ថាន តំណាងក្រសួង-ស្ថាប័ន និងតំណាងរដ្ឋបាលបណ្តាខេត្តតាមបណ្តោយឆ្នេរសមុទ្រ កាលពីថ្ងៃទី៦ ខែមករា ឆ្នាំ២០២៥ ដែលជាផែនការជំរុញការអភិវឌ្ឍខេត្តជាប់មាត់សមុទ្រ ដេីម្បីកំណេីនសេដ្ឋកិច្ច និងលេីកកម្ពស់ជីវភាពប្រជាពលរដ្ឋ។

តាមដានជាមួយយើង៖ Million Times

ក្រសួងរៀបចំដែនដីនគរូបនីយកម្មបានឲ្យដឹងថា កិច្ចប្រជុំនេះ ធ្វើឡើងពិនិត្យសក្តានុពលធនធាននៅក្នុងតំបន់ឆ្នេរសមុទ្រកម្ពុជាជារួម សំដៅគិតគូរដល់ការរៀបចំផែនការឯកភាព សម្រាប់បន្តអភិវឌ្ឍ និងអភិរក្សឱ្យសមស្របទៅនឹងសក្តានុពល និងលក្ខខណ្ឌដែលអំណោយផល ឈានទៅលើកកម្ពស់វិស័យទេសចរណ៍ វិនិយោគ និងពាណិជ្ជកម្ម ដើម្បីបន្តរក្សាសក្តានុពលតំបន់នេះ ជារបៀង សេដ្ឋកិច្ចសំខាន់របស់ប្រទេសជាតិ ដែលបានបង្កើតឱកាសការងារ ស្រូបយកចំណូលយ៉ាងច្រើនផ្តល់ជូនប្រជាជន។

នៅក្នុងកិច្ចប្រជុំនេះ ឧបនាយករដ្ឋមន្ត្រី សាយ សំអាល់ បានសម្រេចប្រគល់ភារកិច្ចឲ្យលេខាធិការដ្ឋានគណៈកម្មាធិការជាតិគ្រប់គ្រង និងអភិវឌ្ឍតំបន់ឆ្នេរសមុទ្រកម្ពុជា ដើម្បីរៀបចំការចុះបញ្ជីដី ព្រមទាំងសិក្សាសក្តានុពលតំបន់ឆ្នេរសមុទ្រទាំងអស់ជារបៀងសេដ្ឋកិច្ចរួម។

លោកបានលើកឡើងថា ស្របពេលដែលផ្លូវជាតិលេខ៤៨ និងផ្លូវជាតិលេខ១០ នឹងបញ្ចប់ការសាងសង់នាពេលឆាប់ៗនេះ ក្រសួងរៀបចំដែនដី នគរូបនីយកម្ម និងសំណង់ បានដាក់សំណើជូនទៅរាជរដ្ឋាភិបាលរួចហើយ ដើម្បីរៀបចំផ្លូវជិះកង់ ដែលហេដ្ឋារចនាសម្ព័ន្ធទាំងនេះ នឹងជំរុញឱ្យមានការផ្សារភ្ជាប់សហគមន៍នេសាទជាច្រើនទីតាំងលាតសន្ធឹងពីទឹកដីខេត្តកោះកុងរហូតដល់ខេត្តកែប ឱ្យក្លាយជាគោលដៅទេសចរណ៍ ក្នុងស្រុកថ្មីៗ ជាពិសេសសម្រាប់អ្នកទេសចរក្នុងស្រុក ដែលនឹងផ្តល់ជាឱកាសការងារ និងប្រាក់ចំណូលបន្ថែមជាច្រើនជូនដល់ប្រជាជនកម្ពុជា៕

អត្ថបទ៖ សាងតេជៈ រូបភាព៖ ក្រសួងរៀបចំដែនដី

The post លោក សាយ សំអាល់ សម្រេចឲ្យរៀបចំការចុះបញ្ជីដី និងសិក្សាសក្តានុពលតំបន់ឆ្នេរសមុទ្រទាំងអស់ជារបៀងសេដ្ឋកិច្ចរួម appeared first on Millions times.

លោក សាយ សំអាល់ ពិនិត្យលទ្ធផលវាយតម្លៃសំណង់អគារអង្គរមានជ័យ ដែលមានសភាពចាស់ទ្រុឌទ្រាម

Vin Chang — Tue, 24 Dec 2024 11:49:36 +0000

ឧបនាយករដ្ឋមន្ត្រី សាយ សំអាល់ រដ្ឋមន្ត្រីក្រសួងរៀបចំដែនដីនគរូបនីយកម្ម និងសំណង់ នៅថ្ងៃអង្គារ ទី២៣ ខែធ្នូ បានដឹកនាំកិច្ចប្រជុំពិនិត្យទៅលើករណីលទ្ធផលនៃការចុះពិនិត្យសិក្សា និងវាយតម្លៃសំណង់អគារអតីតសណ្ឋាគារអង្គរមានជ័យ ដែលមានសភាពចាស់ទ្រុឌទ្រាម ក្បែរអគារវីងថៅវ័រ របស់អ្នកឧកញ៉ា គិត ម៉េង។

ឧបនាយករដ្ឋមន្ត្រី សាយ សំអាល់ ថ្លែងថា ការយកចិត្តទុកដាក់ដោះស្រាយបញ្ហាពាក់ព័ន្ធនឹងសំណង់មិនរៀបរយ ឬសំណង់ទ្រុឌទ្រោម គឺជាកិច្ចការចាំបាច់ និងជាកិច្ចការមនុស្សធម៌ដែលទាមទារ ឱ្យមានជ្រោមជ្រែង និងមានការចូលរួម។

តាមដានជាមួយយើង៖ Million Times

លោកថ្លែងបន្តថា រាជរដ្ឋាភិបាលកម្ពុជា បានគាំទ្រឱ្យមានយន្តការក្នុងការដោះស្រាយ គឺផ្តល់ជូនប្រជាពលរដ្ឋនូវព័ត៌មានជាក់លាក់តាមរយៈការពន្យល់ជាបច្ចេកទេស ព្រមជាមួយការគិតគូរឱ្យមានការរៀបចំលំនៅឋានសមរម្យ ដែលក្រសួងរៀបចំដែនដី នគរូបនីយកម្ម និងសំណង់ នឹងដឹកនាំធ្វើជាជំហានៗ ដើម្បីបញ្ជៀសសង្គមកម្ពុជាឱ្យចាកចេញផុតពីប្រភពនៃការកកើតភាពជ្រុលនិយម រើសអើងក្នុងសង្គមជាតិ ដើម្បីជំរុញឱ្យប្រទេសជាតិ អាចឈានឆ្ពោះទៅមុខបានដោយភាពរីកចម្រើនស្របតាមចក្ខុវិស័យរបស់ប្រមុខរាជរដ្ឋាភិបាល។

ឧបនាយករដ្ឋមន្ត្រី សាយ សំអាល់ បានស្នើឱ្យមន្រ្តីពាក់ព័ន្ធយកករណីអគារអតីតសណ្ឋាគារអង្គរមានជ័យ គឺជាការដកបទពិសោធន៍ សម្រាប់ដោះស្រាយករណីផ្សេងៗទៀត នៅក្នុងរាជធានីភ្នំពេញ ក៏ដូចជាតាមបណ្តាក្រុង ខេត្តនានា ដូចជា ក្រុងបាត់ដំបង ខេត្តព្រះសីហនុ ជាអាទិ៍។

អគារអង្គរជ័យមានកម្ពស់៦ជាន់ ស្ថិតនៅកាច់ជ្រុងមហាវិថីកម្ពុជាក្រោម និងមុនីវង្ស មានអាយុកាលជាង ៧០ឆ្នាំ និងមានប្រជាពលរដ្ឋសរុបចំនួន ៦៦គ្រួសារ។ កន្លងទៅក្រសួងរៀបចំដែនដីចាប់ផ្តើមជួបប្រជាពលរដ្ឋរស់នៅអគារចាស់នេះ ដើម្បីរកដំណោះស្រាយ ក្រោយឃើញថា អគារនោះមានសភាពទ្រុឌទ្រោម និងពុកផុយ។

កាលពីថ្ងៃទី ១៩ ខែកញ្ញា លោក សាយ សំអាល់ បានបង្ហោះសារអមដោយរូបថតលើទំព័រហ្វេសប៊ុករបស់លោកដោយសរសេរយ៉ាងដូច្នេះថា ក្រុមការងារក្រសួងរៀបចំដែនដី បានជួបពិភាក្សាជាមួយបងប្អូនប្រជាជនដែលស្នាក់នៅអគារអង្គរមានជ័យ។ ពួកគាត់បានឯកភាព ទទួលយកដំណោះស្រាយគោលនយោបាយ ចាកចេញពីអគារអង្គរមានជ័យដើម្បីសុវត្ថិភាពរបស់ក្រុមគ្រួសារ។

កាលពីខែសីហា ឆ្នាំ២០២០ អភិបាលរាជធានីភ្នំពេញ លោក ឃួង ស្រេង បានជួបជាមួយប្រជាពលរដ្ឋរស់នៅអគារអង្គរជ័យប្រមាណជា ១០០នាក់ ដើម្បីពិភាក្សារកដំណោះស្រាយ។ លោកអភិបាលក្រុងលើកឡើងថា ដើម្បីរក្សាការពារអាយុជីវិត ប្រជាពលរដ្ឋមិនអាចរស់នៅក្នុងអគារនោះបានទៀតទេ។ លោកអះអាងថា នឹងរក្សាសិទ្ធិ និងកម្មសិទ្ធិទាំងអស់របស់ប្រជាពលរដ្ឋ៕

អត្ថបទ៖ សាងតេជៈ រូបភាព៖ ក្រសួងរៀបចំដែនដី

The post លោក សាយ សំអាល់ ពិនិត្យលទ្ធផលវាយតម្លៃសំណង់អគារអង្គរមានជ័យ ដែលមានសភាពចាស់ទ្រុឌទ្រាម appeared first on Millions times.

ក្រសួងរៀបចំដែនដី នគរូបនីយកម្ម និងសំណង់ ជួបប្រជុំជាមួយធនាគារធំៗក្នុងស្រុក ហើយសម្រេចឯកភាព ៣ ចំណុច

Vin Chang — Fri, 20 Dec 2024 09:58:44 +0000

នៅថ្ងៃ ១៩ ខែធ្នូ ឆ្នាំ ២០២៤ ម្សិលមិញនេះ ក្រសួងរៀបចំដែនដី នគរូបនីយកម្ម និងសំណង់ ដឹកនាំដោយលោក សាយ សំអាល់ បានជួបពិភាក្សាការងារជាមួយប្រមុខធនាគារធំៗក្នុងស្រុក បំណងស្វែងរកការឯកភាព លើគោលការណ៍មួយចំនួន។

តាមដានជាមួយយើង៖ Million Times

ក្រសួងរៀបចំដែនដី នគរូបនីយកម្ម និងសំណង់ បានរៀបចំកិច្ចប្រជុំនេះ ដើម្បីបានជួបពិគ្រោះពិភាក្សាការងារសំខាន់ៗទាក់ទងវិស័យអលចនទ្រព្យនៅកម្ពុជា ហើយពាក់ព័ន្ធជាស្ថាប័នហិរញ្ញវត្ថុ។ វត្តមាននៅក្នុងកិច្ចប្រជុំនោះដូចជា អ្នកតំណាងធនាគារជាតិនៃកម្ពុជា, ធនាគារអេស៊ីលីដា, ABA, PPCB, J Trust, RHB, First Commercial Bank, FTB, Agri-Bank, SBI LY HOUR Bank, និងប្រធានសមាគមអ្នកអភិវឌ្ឍន៍លំនៅឋានកម្ពុជា ក្នុងគោលបំណងស្វែងរកការឯកភាពលើគោលការណ៍មួយចំនួន ដើម្បីដោះស្រាយបញ្ហាប្រឈមនៃវិស័យលំនៅឋាន និងអចលនទ្រព្យ ដែលកំពុងមាន ជាពិសេសជួយសម្រួលបន្ទុកហិរញ្ញវត្ថុ ដែលជាកាតព្វកិច្ចក្នុងការទិញ-លក់លំនៅឋាន របស់បងប្អូនប្រជាពលរដ្ឋ។

ជាលទ្ធផល តំណាងធនាគារ និងស្ថាប័នហិរញ្ញវត្ថុ ដែលបានចូលរួមក្នុងកិច្ចពិភាក្សា បានគាំទ្រលើគោលការណ៍ និងឯកភាពដូចប៉ុន្មានចំណុចខាងក្រោម៖

១. គាំទ្រគំនិតផ្ដួចផ្ដើម ក្នុងការបន្ធូរបន្ថយការប្រាក់លើកម្ចី សម្រាប់ការអភិវឌ្ឍលំនៅឋាន និងទិញអចលនទ្រព្យ មកត្រឹម ៨% ក្នុងមួយឆ្នាំ ដែលអត្រាការប្រាក់ថ្មីនេះ នឹងផ្ដល់ឲ្យអតិថិជន ទិញលំនៅឋាននូវលទ្ធភាពអនុវត្តកាតព្វកិច្ចសងត្រឡប់ កាន់តែមានភាពងាយស្រួល ដែលនឹងផ្ដល់ឲ្យអតិថិជនក៏ដូចជា ស្ថាប័នហិរញ្ញវត្ថុ បន្តដំណើរការទូទាត់កាន់តែមានសុវត្ថិភាព និងងាយស្រួល។

២. កម្ចីដែលមានការប្រាក់ទាបលើវិស័យអចលនទ្រព្យ នឹងកាត់បន្ថយវិវាទដែលកើតឡើង ដោយសារ អតិថិជនគ្មានលទ្ធភាពបំពេញកាតព្វកិច្ច ហើយការអនុវត្តគោលការណ៍ នឹងឈានទៅបញ្ចប់វិវាទបុរី ក៏ដូចជាការបើកទំព័រថ្មី សម្រាប់ការងើបឡើងវិស័យអចលនទ្រព្យ និងការទិញលក់លំនៅឋាន។

៣. ភាគីទាំងអស់បានឯកភាពថា នឹងបន្តជួបពិភាក្សាលម្អិតលើគោលការណ៍នេះ នៅក្នុងកិច្ចប្រជុំរបស់ក្នុងក្របខ័ណ្ឌក្រុមការងារផ្នែកសំណង់ និងអចលនទ្រព្យ “ឌ” វេទិការាជរដ្ឋាភិបាល-ផ្នែកឯកជន នាពេលខាងមុខ ហើយចំពោះគ្រឹះស្ថានហិរញ្ញវត្ថុណាដែលមានលទ្ធភាពអនុវត្តបាន នឹងចាប់ផ្ដើមអនុវត្តគោលការណ៍ថ្មីនេះជាបណ្ដើរៗ។

កិច្ចប្រជុំពិគ្រោះយោបល់នេះ មានសារសំខាន់ក្នុងការកំណត់យន្តការ សម្រួលដល់ដំណើរការ និងសុវត្ថិភាព របស់ឧស្សាហកម្មអចលនទ្រព្យ ដែលជាប្រភពផ្ដល់ឱកាសការងារ និងកម្រៃជូនប្រជាជនបានច្រើន ពិសេសសម្របសម្រួលរកដំណោះស្រាយជាក់ស្ដែង សម្រាប់ប្រជាជនមានលំនៅឋានសមរម្យ ជីវភាពល្អប្រសើរ បន្តរក្សាបរិយាកាសគ្មានវិវាទនៅក្នុងសង្គម ធានាដល់ដំណើរការឧស្សាហកម្មអចលនទ្រព្យ, ឧស្សាហកម្មប្រាក់កម្ចី, និងឧស្សាហកម្មធនាគារ និងហិរញ្ញវត្ថុ នៅប្រទេសកម្ពុជា ជារួម៕

អត្ថបទ៖ មេរ៉ា, រូបភាព៖ ក្រសួងរៀបចំដែនដី នគរូបនីយកម្ម និងសំណង់

The post ក្រសួងរៀបចំដែនដី នគរូបនីយកម្ម និងសំណង់ ជួបប្រជុំជាមួយធនាគារធំៗក្នុងស្រុក ហើយសម្រេចឯកភាព ៣ ចំណុច appeared first on Millions times.

សាយ សំអាល់ Archives - Millions times

ធនាគារ​ចិន នឹងផ្ដល់​កម្ចីក្នុងអត្រាការប្រាក់ទាប​ ជួយស្រោចស្រង់វិស័យអចលនទ្រព្យកម្ពុជា

កម្ពុជា កំពុងសិក្សាជម្រើសនៃការប្រើប្រាស់ឧស្សាហកម្មគ្រឿងបង្គុំសំណង់

លោក សាយ សំអាល់ ពិនិត្យលទ្ធផលវាយតម្លៃសំណង់អគារអង្គរមានជ័យ ដែលមានសភាពចាស់ទ្រុឌទ្រាម

ក្រសួងរៀបចំដែនដី នគរូបនីយកម្ម និងសំណង់ ជួបប្រជុំជាមួយធនាគារធំៗក្នុងស្រុក ហើយសម្រេចឯកភាព ៣ ចំណុច

ធនាគារចិន នឹងផ្ដល់កម្ចីក្នុងអត្រាការប្រាក់ទាប ជួយស្រោចស្រង់វិស័យអចលនទ្រព្យកម្ពុជា