សាងសង់ផ្ទះ Archives - Millions times

ពីនេះទៅមុខការធ្វើផ្ទះ មិនមែនគ្រាន់តែសង់ផ្ទះប៉ុណ្ណោះទេ ប៉ុន្តែត្រូវគិតគូរពីវប្បធម៌ ប្រពៃណី ទំនៀមទំលាប់ តម្លៃនៃគ្រួសារ

Virak វីរៈ — Thu, 19 Mar 2026 06:27:18 +0000

ឯកឧត្តម សាយ សំអាល់ ឧបនាយករដ្ឋមន្ត្រី រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ បានលើកឡើងថា ចាប់ពីនេះទៅមុខ ការធ្វើផ្ទះ មិនមែនគ្រាន់តែសង់ផ្ទះប៉ុណ្ណោះទេ តែត្រូវគិតគូរពីចំណុចមួយចំនួនទៀត។

តាមដានជាមួយយើង៖ Million Times

ការលើកឡើងនេះ បានធ្វើឡើងក្នុងវេទិកា ស្ដីពី ការពង្រឹងភាពជាដៃគូយុទ្ធសាស្រ្ដ ដើម្បីអភិវឌ្ឍទ្រនំសុភមង្គល ភូមិឋានក្សេមក្សាន្ដ និងបុរីជនបទសម្រាប់ប្រជាជនកម្ពុជា ដែលរៀបចំដោយក្រសួងរៀបចំដែនដី នគរូបនីយកម្ម និងសំណង់ និងអង្គការលំនៅឋានមនុស្សជាតិកម្ពុជា ក្រោមជំនួយរបស់ប្រទេសអូស្រ្តាលី កាលពីថ្ងៃទី១៨ ខែមីនា។

ក្នុងឱកាសនោះ ឯកឧត្តមឧបនាយករដ្ឋមន្ត្រី បានថ្លែងថា ទ្រនំសុភមង្គល ភូមិឋានក្សេមក្សាន្ដ និងបុរីជនបទ គឺជាទិសដៅការងារ ដែលក្រសួងរៀបចំដែនដី នគរូបនីយកម្ម និងសំណង់ បានដាក់ចេញជាត្រីវិស័យតម្រង់ទិសសង្គមជាតិទាំងមូល និងដើម្បីធ្វើឱ្យប្រជាជនកម្ពុជាគ្រប់រូប មានលំនៅឋានសមរម្យសម្រាប់រស់នៅ។

ឯកឧត្តម សាយ សំអាល់ បានបន្ថែមថា ពីនេះទៅមុខ ការធ្វើផ្ទះ មិនមែនគ្រាន់តែសង់ផ្ទះប៉ុណ្ណោះទេ ប៉ុន្តែត្រូវគិតគូរពីវប្បធម៌ ប្រពៃណី ទំនៀមទំលាប់ តម្លៃនៃគ្រួសារ និងគុណតម្លៃនៃជីវិត ដែលបង្កលក្ខណៈឱ្យក្រុមគ្រួសារ ឪពុកម្តាយ កូនចៅ និងជីដូនជីតា អាចរស់នៅជួបជុំជាទ្រនំសុភមង្គល។

ជាមួយគ្នានេះ ឯកឧត្តមឧបនាយករដ្ឋមន្ត្រី ក៏បានអំពាវនាវឱ្យគ្រប់ភាគីពាក់ព័ន្ធជួយគ្នា ដើម្បីឱ្យប្រជាជន អាចរក្សាប្រាក់ចំណូល បង្កើនប្រាក់សន្សំ និងបន្ថយបំណុលគ្រួសារ ដែលជាកត្តាធ្វើឱ្យលំនៅឋានរុងរឿងជាងមុន និងកកើតច្រើនជាងមុន៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ពីនេះទៅមុខការធ្វើផ្ទះ មិនមែនគ្រាន់តែសង់ផ្ទះប៉ុណ្ណោះទេ ប៉ុន្តែត្រូវគិតគូរពីវប្បធម៌ ប្រពៃណី ទំនៀមទំលាប់ តម្លៃនៃគ្រួសារ appeared first on Millions times.

អ្នកម៉ៅការសំណង់ នៅ ស៊ីនិត សរសើរអតិថិជនខ្លួន ស៊ូធ្វើការលំបាកលំបិន ហើយខ្ចីបុលគេបង្គ្រប់ធ្វើផ្ទះជូនអ្នកមានគុណ

Vin Chang — Mon, 10 Feb 2025 04:12:40 +0000

វិស្វករ នៅ ស៊ីនិត និងជាអ្នកម៉ៅការសំណង់ដ៏ល្បីឈ្មោះមួយរូប បានទម្លាយឲ្យដឹងពីការតស៊ូរបស់អតិថិជនខ្លួន ដែលសុខចិត្តមកធ្វើការយ៉ាងលំបាកលំបិននៅរាជធានីភ្នំពេញ និងខ្ចីបុលគេបន្ថែម ដើម្បីបង្គ្រប់ប្រាក់ ធ្វើផ្ទះជូនអ្នកមានគុណនៅស្រុកកំណើត។

តាមដានជាមួយយើង៖ Million Times

លោក នៅ ស៊ីនិត បានសរសើរពីភាពកតញ្ញូរបស់អតិថិជនខ្លួន ខិតខំធ្វើយ៉ាងណាឲ្យអ្នកមានគុណ បានសោយសុខនៅវ័យចាស់ជរា។ អ្នកម៉ៅការសំណង់រូបនេះ បានបង្ហោះរូបភាព និងពាក្យពេចន៍ចាក់ដោតវែងអន្លាយពីការចេះដឹងគុណរបស់កូនប្រុសស្រី ត្រូវជាអតិថិជនខ្លួនយ៉ាងដូច្នេះថា “កតញ្ញូណាស់បងប្រុសបងស្រី សុខចិត្តមកធ្វើការយ៉ាងលំបាកនៅភ្នំពេញ ហើយថែមទាំងខ្ចីលុយធនាគារធ្វើផ្ទះជូនអ្នកមានគុណ អោយបានផ្ទះថ្មផ្ទះវីឡាជូនឪពុកម្តាយដែលមនវ័យចាស់ជរានៅឯស្រុកកំណើតអោយពួកគាត់សប្បាយចិត្ត និងរីករាយបំផុត មើលតែមុខលោកតាទៅដឹងហើយថាគាត់សប្បាយចិត្ត និងរីករាយប៉ុនណា“។

ម៉ូដផ្ទះដែលវិស្វករ នៅ ស៊ីនិត ធ្វើជូនអតិថិជនមានតម្លៃតែ ២ ម៉ឺនដុល្លារប៉ុណ្ណោះ ម៉ៅដាច់ទាំងសម្ភារៈ និងកម្លាំងពលកម្ម មាន២ បន្ទប់គេង ១ បន្ទប់ទឹក បន្ទប់ទទួលភ្ញៀវ ហើយក៏អាចច្នៃដាក់ផ្ទះបាយខាងក្នុងក៏បានដែរ ប្រសិនបើអតិថិជនចង់បាន។ លោកបានបញ្ជាក់យ៉ាងច្បាស់ថា ទោះផ្ទះនេះតូចហើយមានតម្លៃទាបក៏ពិតមែន ប៉ុន្តែគុណភាពសំណង់ និងសម្ភារៈប្រើប្រាស់ គឺនៅតែស្តង់ដារតែមួយជាមួយវីឡាផ្សេងៗដែលបានសាងសង់កន្លងមក។

វិស្វករ ស៊ីនិត ក៏បានបន្ថែមយ៉ាងជឿជាក់ថា កូនដែលមានទឹកចិត្តកតញ្ញូចំពោះអ្នកមានគុណដូចនេះ តែងតែធ្វើការរកស៊ីរីកចម្រើន មានបានលឿនណាស់ ព្រោះខ្លួនលោកផ្ទាល់ក៏បាន និងកំពុងធ្វើរឿងនេះ ជូនអ្នកមានគុណរហូតមកដែរ។

ដូចនេះហើយវិស្វករដែលល្បីឈ្មោះសាងសង់អាគារ និងផ្ទះជាច្រើនមកហើយនោះ សំណូមពរឲ្យមហាជនទាំងឡាយកតញ្ញូចំពោះឪពុកម្ដាយ ទោះតូចក្ដីធំក្ដី បើចាំដល់ពេលមានលទ្ធភាព វាអាចនឹងហួសពេល ធ្វើឲ្យយើងមានវិប្បដិសារី ដែលមិនបានបំពេញភាពកតញ្ញូជូនពួកគាត់។

ជាចុងក្រោយវិស្វករ នៅ ស៊ីនិត បានបញ្ជាក់ថា ក្រុមហ៊ុនលោមទទួលម៉ៅមិនថាតម្លៃខ្ពស់ ឬទាបប៉ុនណាក៏ទទួលធ្វើសាងសង់ទាំងអស់ដែរ៕

អត្ថបទ៖ មេរ៉ា, រូបភាព, Panha Rith

The post អ្នកម៉ៅការសំណង់ នៅ ស៊ីនិត សរសើរអតិថិជនខ្លួន ស៊ូធ្វើការលំបាកលំបិន ហើយខ្ចីបុលគេបង្គ្រប់ធ្វើផ្ទះជូនអ្នកមានគុណ appeared first on Millions times.

ងាយណាមាន! ត្រឹម ៦ម៉ឺនជាងមិនឈឺក្បាលរង់ចាំទទួលផ្ទះកាន់សោចូលនៅវីឡា ២ជាន់វិស្វករល្បីឈ្មោះម្នាក់សាងសង់

Vin Chang — Sun, 29 Dec 2024 08:09:44 +0000

មនុស្សគ្រប់គ្នា តែងតែមានបំណងប្រាថ្នាចង់បានផ្ទះក្នុងក្ដីស្រមៃរបស់ខ្លួន ម្យ៉ាងបើមានលុយហើយមានផ្ទះស្អាតក្នុងក្តីស្រមៃដែលយើងស្រឡាញ់ពេញចិត្តទៀតជីវិតកាន់តែមានន័យ។

បើយើងងាកមកមើលវិស្វករល្បីឈ្មោះលោក នៅ ស៊ីនិត បច្ចុប្បន្នកំពុងសម្រេចក្តីស្រមៃជូនម្ចាស់ផ្ទះជាច្រើនគ្រួសារនៅទូទាំងប្រទេសកម្ពុជា។ វិស្វកររូបនេះនិយាយពិតធ្វើពិតជូនអតិថិជនច្រើនផ្ទះដែលផ្ដល់ជូននៅបែបផែនរស់នៅទាន់សម័យ។

តាមដានជាមួយយើង៖ Million Times

សម្រាប់លោកអ្នកដែលមានកញ្ចប់លុយ ៦ ៥០០០ដុល្លារមិនពិបាកឈឺក្បាលជាមួយជាង គ្រឿងសំណង់ និងការជ្រើសរើសម៉ូដផ្ទះតាមតម្រូវការ និងការពេញចិត្តរបស់យើង គឺវិស្វករលោក ស៊ីនិត សម្រេចក្តីស្រមៃជូនភ្លាម ពិសេសនោះទទួលបានការប្រឹក្សាជាមួយលោកផ្ទាល់តែម្តង។

ម៉ូដផ្ទះដែលយើងកំពុងមើលនេះជាប្រភេទវីឡា ២ជាន់តម្លៃ ៦ ៥០០០ដុល្លារ ម៉ៅដាច់ទាំងសំភារៈ និងកំលាំងពលកម្មមានបន្ទប់គេង៤ បន្ទប់ទឹក៣ ចង្ក្រានបាយ កន្លែងទទួលភ្ញៀវ និងចំណតឡាន។

សូមទំនាក់ទំនងប្រឹក្សា និងសាងសង់តាមរយៈលេខ 092711165/ 0975769114/ 0964422220 ទទួលសាងសង់25ខេត្តក្រុង ឬទំនាក់ទំនងមកកាន់ផេកផ្ទាល់៖ https://www.facebook.com/share/XukZUQ1xDHWrjVE7/?mibextid=wwXIfr

The post ងាយណាមាន! ត្រឹម ៦ម៉ឺនជាងមិនឈឺក្បាលរង់ចាំទទួលផ្ទះកាន់សោចូលនៅវីឡា ២ជាន់វិស្វករល្បីឈ្មោះម្នាក់សាងសង់ appeared first on Millions times.

រាល់ការប្រកបអាជីវកម្មពាក់ព័ន្ធនឹងវិស័យអចលនវត្ថុ ត្រូវមានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ

Virak វីរៈ — Fri, 12 Jul 2024 09:58:35 +0000

រាល់ការប្រកបអាជីវកម្មពាក់ព័ន្ធនឹងវិស័យអចលនវត្ថុ ត្រូវមានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ (ន.អ.ប.)។ នេះបើយោងតាមសេចក្ដីជូនដំណឹង ស្ដីពី កាតព្វកិច្ចស្នើសុំអាជ្ញាបណ្ណអាជីវកម្មអភិវឌ្ឍលំនៅឋាន អាជីវកម្មអភិវឌ្ឍអគារសហកម្មសិទ្ធិ អាជីវកម្មអភិវឌ្ឍដីឡូត៍ អាជីវកម្មផ្តល់សេវាកម្មអចលនវត្ថុ អាជីវកម្មបញ្ចាំ និងអាជីវកម្មប្រាតិភោគដោយអនុប្បទាន នៅថ្ងៃទី ១២ ខែកក្កដានេះ។

ការជូនដំណឹងបែបនេះ បន្ទាប់ពីមានមានគណនីហ្វេសប៊ុកចំនួន ៤ ដែលធ្វើអាជីវកម្មភ្នាក់ងារអចលនវត្ថុ និងគម្រោង Condoមួយកន្លែង ត្រូវបានបញ្ជាក់ថា បាននិងកំពុងធ្វើអាជីវកម្មដោយគ្មានអាជ្ញាបណ្ណ ពីនិយ័តករអាជីវកម្មអចលនវត្ថុនិងបញ្ចាំ (ន.អ.ប.) ឡើយ។

ន.អ.ប. បានបញ្ជាក់ថា រាល់ការប្រកបអាជីវកម្មអភិវឌ្ឍលំនៅឋាន អាជីវកម្មអភិវឌ្ឍអគារ សហកម្មសិទ្ធិ អាជីវកម្មអភិវឌ្ឍដីឡូត៍ អាជីវកម្មផ្តល់សេវាកម្មអចលនវត្ថុ អាជីវកម្មបញ្ចាំ និងអាជីវកម្មប្រាតិភោគ ដោយអនុប្បទាន ត្រូវមានអាជ្ញាបណ្ណពី ន.អ.ប.។

ប្រភពដដែល បានបញ្ជាក់ទៀតថា «ដូច្នេះ ការប្រកបអាជីវកម្មដោយគ្មានអាជ្ញាបណ្ណ គឺជាអំពើល្មើសដែលត្រូវចាត់វិធានការរដ្ឋបាល និងទោសទណ្ឌស្របតាមបទប្បញ្ញត្តិជាធរមាន»។

ដើម្បីទប់ស្កាត់នូវសកម្មភាពប្រកបអាជីវកម្មដោយគ្មានអាជ្ញាបណ្ណ ព្រមទាំងលើកទឹកចិត្តដល់ការធ្វើធុរកិច្ចប្រកបដោយសុចរិត និយ័តករអាជីវកម្មអចលនវត្ថុ និងបញ្ចាំ បានក្រើនរំលឹកដល់ម្ចាស់ក្រុមហ៊ុន/សហគ្រាស/គម្រោង ដែលប្រកប អាជីវកម្មគ្មានអាជ្ញាបណ្ណពី ន.អ.ប. ត្រូវមកបំពេញបែបបទ និងនីតិវិធីស្នើសុំអាជ្ញាបណ្ណនៅអគារ អ.ស.ហ. លេខ១ ៦៨F ជាន់ទី ៧ ផ្លូវ ៥៩៨ សង្កាត់ច្រាំងចំរេ១ ខណ្ឌឫស្សីកែវ រាជធានីភ្នំពេញ នៅរៀងរាល់ម៉ោងធ្វើការ ចាប់ពីថ្ងៃជូនដំណឹងនេះតទៅ៕

អត្ថបទ៖ វីរៈ រូបភាព៖ និយ័តករអាជីវកម្មអចលនវត្ថុ និងបញ្ចាំ

តាមដានជាមួយយើង៖ Million Times

The post រាល់ការប្រកបអាជីវកម្មពាក់ព័ន្ធនឹងវិស័យអចលនវត្ថុ ត្រូវមានអាជ្ញាបណ្ណពីនិយ័តករអាជីវកម្មអចលនវត្ថុ និងបញ្ចាំ appeared first on Millions times.

អ្នកជំនាញ ប្រាប់ពលរដ្ឋគួរសួរ ៤សំណួរទៅកាន់អ្នកម៉ៅការសង់ផ្ទះ ដើម្បីដឹងថាជ្រើសរើសត្រឹមត្រូវ ឬមិនត្រឹមត្រូវ

Virak វីរៈ — Mon, 24 Jun 2024 12:00:58 +0000

ជាច្រើនឆ្នាំមកហើយ ប្រជាពលរដ្ឋមួយចំនួន បានរអ៊ូរទាំអំពីពិបាកស្វែងរកអ្នកម៉ៅការសាងសង់ផ្ទះ របស់ពួកគាត់ឲ្យបានត្រឹមត្រូវ ដែលមិនមានការបោកប្រាស់ ហើយការសាងសង់រហូតដល់រួចរាល់ ព្រមទាំងសាងសង់ផ្ទះដែលមានគុណភាព និងសោភ័ណ្ឌល្អ។

ដោយមើលឃើញពីបញ្ហាលំបាកបែបនេះហើយ ទើបលោក នៅ ស៊ីនិត វិស្វករម៉ៅការសាងសង់ មានបទពិសោធន៍ប្រមាណជា ១០ឆ្នាំមកហើយនោះ បានចែករំលែកចំណេះដឹងខ្លះៗជូនប្រជាពលរដ្ឋ មុននឹងឲ្យអ្នកម៉ៅការសាងសង់ សង់ផ្ទះជូនគាត់។

តាមដានជាមួយយើង៖ Million Times

លោក នៅ ស៊ីនិត បានឲ្យដឹងថា ការមើលអ្នកម៉ៅការសំណង់ថា បោកប្រាស់ ឬមិនបោកប្រាស់ ល្អ ឬមិនល្អ គឺមិនមែនជារឿងពិបាកនោះទេ គ្រាន់តែពេលខ្លះប្រជាពលរដ្ឋមួយចំនួន ដែលមានតម្រូវការធ្វើផ្ទះ មិនបានគិតស៊ីជម្រៅរហូតដល់ចាញ់បោកគេម្ដង។ បើតាមលោក នៅ ស៊ីនិត មានសំណួរសំខាន់ៗចំនួន ៤ ដែលប្រជាពលរដ្ឋគួរសួរអ្នកម៉ៅការសំណង់ មុនពេលចាប់ឲ្យពួកគេសាងសង់។

សំណួរទី១. តើបុគ្គលជាអ្នកម៉ៅការសំណង់នោះ មានបទពិសោធន៍ធ្វើការងារលើការងារនេះប៉ុន្មានឆ្នាំហើយ?ប្រសិនបើបុគ្គលរូបនោះឆ្លើយថា មានបទពិសោធន៍ធ្វើ ១០ឆ្នាំ ឬ២០ឆ្នាំ អ្វីដែលយើងគួរមើលបន្តនោះ តើបុគ្គលរូបនោះមានជីវភាពធូរធាដែរឬអត់? បើមើលទៅបុគ្គលនោះ មិនមានជីវភាពធូរធាទេ គឺជាចំណុចដែលសង្ស័យហើយ ព្រោះថា ការងារម៉ៅការសំណង់នេះ នឹងអាចជួយឲ្យជីវភាពពួកគេធូរធាសមរម្យ។ ដូច្នេះ មិនគួរយកបុគ្គលបែបនេះមកឲ្យសាងសង់ផ្ទះរបស់ខ្លួនឡើយ។

សំណួរទី២. តើបុគ្គលអ្នកម៉ៅការសំណង់នោះ ជាមនុស្សស្មោះត្រង់ដែរឬទេ? យើងត្រូវយកបុគ្គលដែលស្មោះត្រង់មកសាងសង់ផ្ទះរបស់យើង បើគេមិនស្មោះត្រង់ទេ សូមកុំយកមកឲ្យសាងសង់ផ្ទះរបស់យើងអី ព្រោះគេនឹងអាចកិបកេងនូវផលប្រយោជន៍ របស់ម្ចាស់ផ្ទះមិនខានឡើយ។ យ៉ាងណាក៏ដោយ ការមើលទៅលើចំណុចស្មោះត្រង់នេះ គឺអាស្រ័យលើសមត្ថភាពរបស់មនុស្សម្នាក់ៗ។

សំណួរទី៣. តើបុគ្គលនោះមានសមត្ថភាព និងជំនាញច្បាស់លាស់ដែរឬទេ? នេះក៏ជាសំណួរសំខាន់មួយដែរ មុនពេលអនុញ្ញាតឲ្យបុគ្គលអ្នកម៉ៅការសំណង់រូបណា មកសាងសង់ផ្ទះរបស់យើង។ សំណួរនេះយើងចង់ដឹងថា បុគ្គលអ្នកម៉ៅការសំណង់រូបនោះ មានជំនាញច្បាស់លាស់ពិតប្រាកដដែរឬទេ ទៅបច្ចេកទេសសាងសង់ ពិសេសតើពួកគេមានជំនាញវិស្វករ និងស្ថាបត្យករដែរឬទេ? ហើយប្រសិនបើពួកគេពុំមានទេ មិនគួរឲ្យសាងសង់ផ្ទះរបស់យើងឡើយ ព្រោះនៅពេលសាងសង់រួច នឹងមិនមានគុណភាព និងសោភ័ណ្ឌភាពឡើយ។

សំណួរទី៤. តើបុគ្គលអ្នកម៉ៅការសំណង់នោះ មានកូនក្រុមដែរឬទេ? សំណួរនេះក៏កាន់តែសំខាន់ពីព្រោះការងារសាងសង់នេះ មិនមែនធ្វើតែម្នាក់ឯងនោះទេ ពោលគឺត្រូវមានកូនជាងជួយ ហើយកូនជាងនេះមិនមែនទាល់តែបានគម្រោងសាងសង់ទើបដើររកនោះទេ ត្រូវមានក្នុងដៃឲ្យហើយ។ ម្យ៉ាងទៀត កូនជាងទាំងនោះ ក៏ត្រូវជាកូនជាងល្អៗដែរ បើមិនដូច្នេះទេសាងសង់មិនទាន់រួចរាល់ផង នឹងអាចរត់ចោលការដ្ឋានមិនឡើយ។

លោក នៅ ស៊ីនិត វិស្វករម៉ៅការសាងសង់ បានបញ្ជាក់ថា សំណួរចំនួន ៤ខាងលើនេះ គឺពិតជាមានសារៈសំខាន់ សម្រាប់ប្រជាពលរដ្ឋមានតម្រូវការសាងសង់ផ្ទះ ហើយប្រសិនបើក្នុងចំណោម ៤នេះ អ្នកម៉ៅការសំណង់មិនមានគ្រប់គ្រាន់ទេ នោះការសាងសង់នឹងមានបញ្ហាមិនខានឡើយ។ ក្រៅពីសំណួរ ៤ខាងលើនេះ នូវមានចំណុចតូចៗផ្សេងទៀត តែវាមិនសំខាន់ដូច ៤សំណួរ ដែលរៀបរាប់ខាងលើនេះឡើយ។

យ៉ាងណាក៏ដោយ លោក នៅ ស៊ីនិត បានស្នើសុំការអធ្យាស្រ័យពីអ្នកម៉ៅការសំណង់នានា ប្រសិនបើការចែករំលែកចំណេះដឹងរបស់លោក មានការប៉ះពាល់ដល់ពួកគាត់។ ប៉ុន្តែដើម្បីប្រយោជន៍រួម ធ្វើឲ្យវិស័យសំណង់របស់ខ្មែរយើង រីកចម្រើន គឺមិនអាចខ្វះបានពីការរួមចំណែកតូចៗ របស់ពួកយើងម្នាក់ៗនោះទេ៕

អត្ថបទ៖ វីរៈ រូបភាព៖ លោក នៅ ស៊ីនិត

The post អ្នកជំនាញ ប្រាប់ពលរដ្ឋគួរសួរ ៤សំណួរទៅកាន់អ្នកម៉ៅការសង់ផ្ទះ ដើម្បីដឹងថាជ្រើសរើសត្រឹមត្រូវ ឬមិនត្រឹមត្រូវ appeared first on Millions times.