សហព័ន្ធស្រូវអង្ករកម្ពុជា Archives - Millions times

ឆ្នាំ ២០២៥ កម្ពុជាទទួលបានចំណូលជាង ៦០០ លានដុល្លារ ពីការនាំចេញអង្ករជាង ៩៤ម៉ឺនតោន

Vin Chang — Tue, 06 Jan 2026 04:22:23 +0000

សហព័ន្ធស្រូវអង្ករកម្ពុជាបានបង្ហាញពីរបាយការណ៍នាំចេញអង្ករកាលពីឆ្នាំមុន ដោយរយៈពេល ១២ ខែនៃឆ្នាំ ២០២៥ កម្ពុជាទទួលបានចំណូលជាង ៦០០ លានដុល្លារ ពីការនាំចេញអង្ករ ៩៤០ ៣២១ តោន តាមរយៈក្រុមហ៊ុននាំចេញអង្ករ ៦៨ ទៅកាន់គោលដៅ ៧៥។

តាមដានជាមួយយើង៖ Million Times

ក្នុងចំណោមគោលដៅនាំចេញទាំង ៧៥ កម្ពុជាបាននាំចេញទៅកាន់បណ្ដាប្រទេសនៅក្នុងតំបន់អឺរ៉ុប ២៨ បានបរិមាណអង្ករចំនួន ៣៣៩ ៤១៧ តោន និងគិតជាទឹកប្រាក់ ២៥៨.២៨ លានដុល្លារ, ទៅកាន់ប្រទេសចិន និងហុងកុង ២៣១ ១២៥ តោន គិតជាទឹកប្រាក់ ១៣៨.៣៦ លានដុល្លារ, ទៅកាន់ប្រទេសក្នុងអាស៊ាន ៨ ប្រទេស បានបរិមាណ ២៧៣ ៦៥៧ តោន គិតជាទឹកប្រាក់ ១១៧.៦២ លានដុល្លារ ហើយទៅកាន់គោលដៅ ៣៧ ប្រទេសផ្សេងទៀតមាន អាហ្វ្រិក មជ្ឈិម បូព៌ា អាមេរិក កាណាដា អូស្ត្រាលី នូវែលហ្សេឡង់…បានចំនួន ៩៦ ១២២ តោន គិតជាទឹកប្រាក់ ៨៨.១៥ លានដុល្លារ។

ចំណែកប្រភេទអង្ករដែលបាននាំចេញមាន អង្ករក្រអូប ៦៤.០២%, ប្រភេទអង្ករសគ្រាប់វែង ១៣.៧១%, អង្ករចំហុយ ២%, អង្ករសរីរាង្គ ១.៣២%, អង្ករបាក់គ្រប់ប្រភេទ ១៨.៥៦% និងអង្ករផ្សេងៗចំនួន ០.៣៩%។

ការនាំចេញអង្ករក្នុងរយៈពេល១ឆ្នាំពេញនៃឆ្នាំ២០២៥ គឺមានការកើនឡើងប្រមាណជាង ៤៥% បើធៀបរយៈពេលដូចគ្នាក្នុងឆ្នាំ ២០២៤។ ជាមួយគ្នានេះដែរ កម្ពុជាក៏បាននាំចេញស្រូវ ៦ ៨៥៩ ៩៣០ តោនស្រូវសើម ដែលគិតជាទឹកប្រាក់ប្រមាណ ១៥៧៩.៨៦ លានដុល្លារ៕

អត្ថបទ៖ ឆដា, រូបភាព៖ ស.អ.ក

The post ឆ្នាំ ២០២៥ កម្ពុជាទទួលបានចំណូលជាង ៦០០ លានដុល្លារ ពីការនាំចេញអង្ករជាង ៩៤ម៉ឺនតោន appeared first on Millions times.

អង្ករផ្ការំដួលកម្ពុជា បានចូលក្នុងទីផ្សារអាមេរិកបោះដុំដ៏ធំ Costco

Vin Chang — Fri, 03 Oct 2025 04:05:28 +0000

កម្ពុជាបានចំណាយពេលជាង ១ ឆ្នាំ ក្រោយពីចុះអនុស្សរណៈយោគយល់រវាងសហព័ន្ធស្រូវអង្ករកម្ពុជា និងក្រុមហ៊ុន Otis McAllister របស់អាមេរិក ពេលនេះទទួលបានផ្លែផ្កាហើយ ដោយអង្ករកម្ពុជាបានឈានជើងចូលទៅក្នុងផ្សារ Costco ដ៏ធំ និងជាផ្សារបោះដុំលក់រាយធំប្រចាំអាមេរិក។

តាមដានជាមួយយើង៖ Million Times

MOU រវាងកម្ពុជា និងក្រុមហ៊ុន Otis McAllister បានធ្វើឡើងកាលពីថ្ងៃទី២៣ ខែកញ្ញា ឆ្នាំ ២០២៤ ក្នុងដំណើរទស្សនកិច្ចបើកទីផ្សារ ដែលគ្រានោះដឹកនាំដោយលោកឧបនាយករដ្ឋមន្ត្រី ស៊ុន ចាន់ថុល ដើម្បីជំរុញការនាំចូលអង្ករទៅកាន់ទីផ្សារ នៅក្នុងរយៈពេល ៥ ឆ្នាំ តាមលំដាប់លំដោយចាប់ពី ៥ ពាន់តោន នៅឆ្នាំទី១ រហូតដល់ ២ ម៉ឺនតោន សម្រាប់ឆ្នាំទី៥ ។

អង្ករកម្ពុជាថ្មីៗនេះ បានទៅដល់ទីផ្សារអាមេរិកហើយដែរ និងចាប់ផ្ដើមចែកចាយនៅក្នុងទីផ្សារ Costco តែម្ដង។ Costco គឺជាទីផ្សារដ៏ធំមួយរបស់អាមេរិក ហើយក្រុមហ៊ុនដែលឈរជើងនៅផ្សារនេះបាន លុះត្រាតែជាក្រុមហ៊ុនដែលគោរពបាននៅស្តង់ដារអន្តរជាតិ។

សម្រាប់ប្រភេទអង្ករកម្ពុជាដែលបាននាំចូលទៅកាន់ទីផ្សារ Costco ជាអង្ករផ្ការំដួល។ ចំណុចសំខាន់ដែលកម្ពុជាយើងអាចនាំចូលទៅកាន់ទីផ្សារអាមេរិកបាន លុះត្រាតែរោងម៉ាស៊ីនកិនស្រូវរបស់កម្ពុជាមានស្តង់ដារខ្ពស់បំផុត។ បច្ចុប្បន្ន យើងឃើញថា មានរោងម៉ាស៊ីនកិនស្រូវរបស់កម្ពុជាមួយចំនួនធំហើយ ដែលបានឈានទៅដល់ការអនុវត្តស្តង់ដារខ្ពស់បំផុតនេះ»។ នេះយោងតាមសម្ដី លោក លន់ យ៉េង អគ្គលេខាធិការសហព័ន្ធស្រូវអង្ករកម្ពុជា ប្រាប់ដល់សារព័ត៌មានកម្ពុជាថ្មី៕

អត្ថបទ៖ ឆដា, រូបភាព៖ អ៊ីនធឺណេត

The post អង្ករផ្ការំដួលកម្ពុជា បានចូលក្នុងទីផ្សារអាមេរិកបោះដុំដ៏ធំ Costco appeared first on Millions times.

១ខែដំបូងឆ្នាំ ២០២៥ កម្ពុជានាំអង្ករចេញជិត ៦ ម៉ឺនតោន បានចំណូល ៤៨ លានដុល្លារ

Vin Chang — Fri, 14 Feb 2025 09:35:13 +0000

ត្រឹមខែមករាឆ្នាំ ២០២៥ កម្ពុជានាំចេញអង្ករសម្រេចបានជិត ៦ម៉ឺនតោន និងទទួលបានចំណូល ៤៨ លានដុល្លារ។ នេះបើតាមរបាយការណ៍របស់សហព័ន្ធស្រូវអង្ករកម្ពុជាផ្ដល់ស្ថាប័ន Fresh News។

តាមដានជាមួយយើង៖ Million Times

ក្នុងរយៈពេល១ខែដំបូង នៃឆ្នាំ ២០២៥ កម្ពុជាបាននាំចេញអង្ករបាន ៥៩ ០៨៦ តោន សម្រេចបាន ៤៨.០៣ លានដុល្លារ តាមរយៈក្រុមហ៊ុននាំចេញអង្ករ ៣៩ និងនាំចេញទៅកាន់គោលដៅ ៤៥ គោលដៅ។

ការនាំចេញអង្ករចេញទៅក្រៅប្រទេសនោះ ក៏បាននាំទៅកាន់បណ្ដាប្រទេស នៅតំបន់អឺរ៉ុប ២៣ បរិមាណអង្ករ ៣៦ ៧១៤ តោន គិតជាទឹកប្រាក់ ២៩.៧៩ លានដុល្លារ និងនាំចេញទៅកាន់ ប្រទេសចិន និងហុងកុង ៣ ៧៧២ តោន ដែលគិតជាទឹកប្រាក់ ២.៥៦ លានដុល្លារ និងនាំទៅកាន់ប្រទេសតំបន់អាស៊ាន ៤ ប្រទេស ក្នុងបរិមាណ ៩ ៤១៣ តោន គិតជាទឹកប្រាក់ ៧.៣១ លាន ព្រមទាំងនាំទៅកាន់គោលដៅ ១៦ ប្រទេសផ្សេងទៀតមាន អាហ្វ្រិក, មជ្ឈិមបូព៌ា, អាមេរិក, កាណាដា, អូស្ត្រាលី, នូវែលហ្សេឡង់ បាន ៩ ១៨៧ តោន គិតជាទឹកប្រាក់ ៨.៣៧ លានដុល្លារ។

ក្នុងចំណោមប្រភេទអង្ករដែលបាននាំចេញរួមមានអង្ករក្រអូប ៩៣.០១%, ប្រភេទអង្ករស ធម្មតា.៩៣%, អង្ករចំហុយ ២.៣១%, អង្ករសរីរាង្គ ១.៤២% និងអង្ករផ្សេងៗ ០.៣៣% ។

សម្រាប់ផ្នែកស្រូវវិញ នៅខែមករា ឆ្នាំ២០២៥ កម្ពុជាបាននាំចេញស្រូវ ៦១៩ ៤៨៩ តោនជាស្រូវសើម ដែលគិតជាទំហំទឹកប្រាក់ប្រមាណ ១៣៩.៣៨ លានដុល្លារ៕

អត្ថបទ៖ មេរ៉ា, រូបភាព៖ សហព័ន្ធស្រូវអង្ករកម្ពុជា

The post ១ខែដំបូងឆ្នាំ ២០២៥ កម្ពុជានាំអង្ករចេញជិត ៦ ម៉ឺនតោន បានចំណូល ៤៨ លានដុល្លារ appeared first on Millions times.

សម្តេច ហ៊ុន ម៉ាណែត លើកទឹកចិត្តអ្នករកស៊ីផ្នែកស្រូវអង្ករបន្តនាំចេញផ្ទាល់ឱ្យទូលំទូលាយទៅកាន់ទីផ្សារអន្តរជាតិ

Vin Chang — Thu, 09 Jan 2025 01:30:00 +0000

ក្នុងជំនួបជាមួយក្រុមវិនិយោគិនរកស៊ីក្នុងវិស័យស្រូវអង្ករសម្ដេច ហ៊ុន ម៉ាណែត បានលើកទឹកចិត្តឱ្យបន្តជំរុញការនាំចេញផ្ទាល់ឱ្យកាន់តែទូលំទូលាយទៅកាន់ទីផ្សារអន្តរជាតិ។ សម្តេចបានសង្កត់ធ្ងន់ថា រាជរដ្ឋាភិបាលនៅតែផ្ដល់អាទិភាពលើដំណាំស្រូវ ដែលជាដំណាំយុទ្ធសាស្ត្រ យូរអង្វែងរបស់កម្ពុជា និងបានគូសបញ្ជាក់អំពីការដាក់ចេញគោលនយោបាយចាំបាច់ ដើម្បីគាំទ្រដំណាំស្រូវ និងធានាបាននូវភាពប្រកួតប្រជែង។

ក្នុងពេលអនុញ្ញាតឱ្យប្រតិភូសហព័ន្ធស្រូវអង្ករកម្ពុជា ចូលជួបពិភាក្សាការងារ នៅវិមានសន្ដិភាពនាព្រឹកថ្ងៃពុធ ខែមករានេះសម្តេច ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា វិស័យកសិកម្មបានដើរតួនាទីយ៉ាងសំខាន់ក្នុងការលើកកម្ពស់ជីវភាពរបស់ប្រជាពលរដ្ឋ និងការអភិវឌ្ឍសង្គម-សេដ្ឋកិច្ចកម្ពុជា។

តាមដានជាមួយយើង៖ Million Times

សម្ដេចបានសង្កត់ធ្ងន់ថា រាជរដ្ឋាភិបាលនៅតែផ្ដល់អាទិភាពលើដំណាំស្រូវ ដែលជាដំណាំយុទ្ធសាស្ត្រ យូរអង្វែងរបស់កម្ពុជា និងបានគូសបញ្ជាក់អំពីការដាក់ចេញគោលនយោបាយចាំបាច់ ដើម្បីគាំទ្រដំណាំស្រូវ និងធានាបាននូវភាពប្រកួតប្រជែងរបស់វិស័យស្រូវអង្ករកម្ពុជា តាមរយ:ការកសាងហេដ្ឋារចនាសម្ព័ន្ធតភ្ជាប់ ការសម្រួលការដឹកជញ្ជូន និងការកាត់បន្ថយថ្លៃដើមផលិតកម្ម ក៏ដូចជាជំរុញភាពម្ចាស់ការលើខ្សែច្រវាក់ផ្គត់ផ្គង់ក្នុងស្រុក និងការនាំចេញទៅកាន់ទីផ្សារអន្តរជាតិ។

អ្នកឧកញ៉ា ហ៊ុន ឡាក់ ប្រធានក្រុមប្រឹក្សាភិបាលគោលនយោបាយស្រូវអង្ករ នៃសហព័ន្ធស្រូវអង្ករកម្ពុជា បានលើកឡើងអំពីកិច្ចខិតខំប្រឹងប្រែង និងការយកចិត្តទុកដាក់លើគុណភាពស្រូវអង្ករកម្ពុជា, ការប្រមូលទិញស្រូវពីប្រជាកសិករ, ការរៀបចំសម្ងួត, ការស្ដុកទុក និងការនាំចេញស្រូវអង្ករទៅកាន់ទីផ្សារអន្តរជាតិ។

សម្ដេចនាយករដ្ឋមន្រ្តីបានវាយតម្លៃខ្ពស់ចំពោះសហព័ន្ធស្រូវអង្ករកម្ពុជា ដែលបានចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍវិស័យស្រូវ អង្ករ។

ក្នុងឱកាសនោះ សម្ដេចបានលើកទឹកចិត្តឱ្យសហព័ន្ធស្រូវអង្ករកម្ពុជា បន្តសហការឱ្យកាន់តែជិតស្និទ្ធិថែមទៀតជាមួយក្រសួង-ស្ថាប័នពាក់ព័ន្ធនៃរាជរដ្ឋាភិបាល ដើម្បីជំរុញការនាំចេញផ្ទាល់ឱ្យកាន់តែទូលំទូលាយទៅកាន់ទីផ្សារអន្តរជាតិ ជាមួយតម្លៃបន្ថែមខ្ពស់ ក៏ដូចជាការចូលរួមផ្តល់ការបណ្ដុះបណ្ដាលជំនាញបច្ចេកទេសដល់ប្រជាកសិករ សំដៅលើកកម្ពស់គុណភាពផលិតផល និងបង្កើនផលិតភាព ព្រមទាំងជំរុញការផ្សព្វផ្សាយអំពីការវិវឌ្ឍរីកចម្រើននៃផលិតកម្មស្រូវអង្ករកម្ពុជា ឱ្យបានទូលំទូលាយ៕

អត្ថបទ៖ សាងតេជៈ រូបភាព៖ ផេកនាយករដ្ឋមន្រ្តី

The post សម្តេច ហ៊ុន ម៉ាណែត លើកទឹកចិត្តអ្នករកស៊ីផ្នែកស្រូវអង្ករបន្តនាំចេញផ្ទាល់ឱ្យទូលំទូលាយទៅកាន់ទីផ្សារអន្តរជាតិ appeared first on Millions times.

មោទកភាពជាតិ! «ម្លិះអង្គរ» អង្ករក្រអូបកម្ពុជា ឈ្នះពានរង្វាន់អង្ករល្អដាច់គេលើពិភពលោក

Vin Chang — Thu, 07 Nov 2024 07:44:46 +0000

អង្ករក្រអូបប្រណីតកម្ពុជា បានឈ្នះពានរង្វាន់អង្ករល្អប្រណីតផ្តាច់គេលើពិភពលោក ដែលនេះជាលើកទី៦ របស់ម៉ាកអង្ករក្រអូបមួយប្រភេទមានឈ្មោះថា «ម្លិះអង្គរ»។

យោងតាមការបង្ហោះពីសហព័ន្ធស្រូវអង្ករកម្ពុជា បានឲ្យដឹងនៅថ្ងៃនេះថា ពូជអង្ករក្រអូបប្រណីតកម្ពុជា ពូជស្រូវផ្ការំដួលបានឈ្នះពានរង្វាន់អង្ករល្អប្រណីតផ្តាច់គេ លើពិភពលោកជាលើកទី៦ ក្នុងការប្រកួតអង្ករល្អផ្តាច់គេលើពិភពលោក (World Best Rice) នៅក្នុងកម្មវិធី «សន្និសីទស្រូវអង្ករពិភពលោកឆ្នាំ ២០២៤» នាទីក្រុងម៉ានីឡា ប្រទេសហ្វីលីពីន នៅថ្ងៃ ៧ ខែវិច្ឆិកា ឆ្នាំ ២០២៤ នេះ ដែលរៀបចំឡើងដោយវិទ្យាស្ថានគ្រាប់ធុញ្ញជាតិអន្តរជាតិ International Commodity Institute (ICI) និង The Rice Trader (TRT) របស់សហរដ្ឋអាមេរិក។

តាមដានជាមួយយើង៖ Million Times

សហព័ន្ធស្រូវអង្ករកម្ពុជា ក៏បានថ្លែងអបអរដល់ប្រជាកសិករខ្មែរ ដែលបានខិតខំធ្វើការងារបានយ៉ាងល្អក្នុងការដាំដុះ ព្រមទាំងអរគុណដល់រោងម៉ាស៊ីនកិនស្រូវដែលបានខិតខំសម្រិតសម្រាំង និង កិនកែច្នៃអង្ករបានយ៉ាងល្អ រហូតទទួលបានជ័យជំនះនេះជូនប្រទេសជាតិ។

សូមបញ្ជាក់ថា អង្ករម៉ាក “ម្លិះអង្គរ” ជាអង្ករដែលមានគុណភាព និងទុកចិត្តបានសម្រាប់ អង្ករក្រអូបប្រណីតកម្ពុជា។

គួរបញ្ជាក់ផងដែរថា ត្រឹមរយៈពេល ១០ ខែឆ្នាំ ២០២៤ នេះកម្ពុជាបាននាំចេញអង្ករចំនួន ៥០៧ ០២៩ តោន គិតជាទឹកប្រាក់បានចំនួន ៣៧៦.៦៣ លានដុល្លារសហរដ្ឋអាមេរិក៕

អត្ថបទ៖ សុរ៉ាវី រូបភាព៖ សហព័ន្ធស្រូវអង្ករកម្ពុជា

The post មោទកភាពជាតិ! «ម្លិះអង្គរ» អង្ករក្រអូបកម្ពុជា ឈ្នះពានរង្វាន់អង្ករល្អដាច់គេលើពិភពលោក appeared first on Millions times.