នាំចេញអង្ករ Archives - Millions times

ទូតចិន៖ ចិនរីករាយនាំចូលផលិតផលកសិកម្ម មានគុណភាពពីកម្ពុជាបន្ថែមទៀត

Virak វីរៈ — Tue, 07 Apr 2026 06:23:40 +0000

លោក វ៉ាង វិនពីន ឯកអគ្គរដ្ឋទូតចិនប្រចាំកម្ពុជា បានលើកឡើងថា ប្រទេសចិន រីករាយក្នុងការនាំចូលផលិតផលកសិកម្ម ដែលមានគុណភាពខ្ពស់បន្ថែមទៀតពីប្រទេសកម្ពុជា។ ការលើកឡើងនេះ ស្របពេលដែលកម្ពុជាបាននាំចេញអង្ករជិត ៩ម៉ឺនតោនទៅចិន ក្នុងត្រីមាសទី១ ឆ្នាំ២០២៦នេះ។

តាមដានជាមួយយើង៖ Million Times

តាមរយៈហ្វេសប៊ុករបស់ខ្លួន កាលពីថ្ងៃទី៦ ខែមេសា ឯកអគ្គរដ្ឋទូតចិន បានបង្ហោះថា រយៈពេល ៣ខែ ដើមឆ្នាំ២០២៦ កម្ពុជាបាននាំចេញអង្ករចំនួន ៨.៩ម៉ឺនតោន ទៅកាន់ប្រទេសចិន កើនឡើង ១៤១% បើធៀបនឹងរយៈពេលដូចគ្នាកាលពីឆ្នាំមុន តម្លៃនាំចេញលើសពី ៥៦.៣៨លានដុល្លារ។

ឧកញ៉ា សុង សារ៉ន អគ្គនាយកក្រុមហ៊ុន Amru Rice បានលើកឡើងថា ចិន ជាប្រទេសឈានមុខគេលើការនាំចូលអង្ករកម្ពុជា និងប្រទេសផលិតផ្សេងទៀត។ លោក ក៏បានជំរុញឱ្យខិតខំដោយវៃឆ្លាត ក្នុងការប្រជែងទីផ្សារជាមួយប្រទេសផ្សេងទៀត។

សហព័ន្ធស្រូវអង្ករកម្ពុជា បានឱ្យដឹងថា ប្រទេសកម្ពុជា បាននាំចេញអង្ករជាង ៣៦ម៉ឺនតោន ក្នុងរយៈពេល ៣ខែដើម ឆ្នាំ២០២៦នេះ ដែលគិតជាទឹកប្រមាណ ២០៧លានដុល្លារ។

ក្នុងនោះ នាំចេញតាមរយៈក្រុមហ៊ុននាំចេញអង្ករចំនួន ៥៨ក្រុមហ៊ុន ទៅកាន់គោលដៅចំនួន ៥៦ ដោយក្នុងនោះទៅកាន់បណ្តាប្រទេសក្នុងតំបន់អឺរ៉ុបចំនួន ៣១, ទៅកាន់ប្រទេសចិន និងហុងកុង, ទៅកាន់ប្រទេសក្នុងតំបន់អាស៊ានចំនួន ៥។

ក្រៅពីនោះទៀត ក៏បាននាំចេញទៅកាន់គោលដៅ ១៨ប្រទេសផ្សេងទៀតដែរដូចជា៖ អាហ្វ្រិក មជ្ឈឹម បូព៌ា អាមេរិក កាណាដា អូស្ត្រាលី ញ៉ូហ្សេឡេន ជាដើម៕

អត្ថបទ៖ វីរៈ រូបភាព៖ ទូតចិន

The post ទូតចិន៖ ចិនរីករាយនាំចូលផលិតផលកសិកម្ម មានគុណភាពពីកម្ពុជាបន្ថែមទៀត appeared first on Millions times.

អង្ករប្រណិតកម្ពុជាចំនួនពីរទូកុងតឺន័រ ត្រូវបាននាំចេញទៅកាន់ទីផ្សារប្រទេសអូស្ត្រាលី

Virak វីរៈ — Sat, 07 Mar 2026 04:37:54 +0000

អង្ករប្រណិតកម្ពុជាចំនួនពីរទូកុងតឺន័រ ត្រូវបាននាំចេញទៅកាន់ទីផ្សារប្រទេសអូស្ត្រាលី ដែលបង្ហាញអំពីទំនាក់ទំនងពាណិជ្ជកម្ម និងការវិនិយោគទ្វេភាគីរវាងអូស្ត្រាលី និងកម្ពុជាកំពុងកើនឡើង។

តាមដានជាមួយយើង៖ Million Times

ស្ថានទូតអូស្ត្រាលីប្រចាំកម្ពុជា បានឱ្យដឹងនៅថ្ងៃទី៦ ខែមីនាថា លោកឯកអគ្គរដ្ឋទូត Derek Yip បានចូលរួមអបអរកិច្ចព្រមព្រៀងពាណិជ្ជកម្មថ្មីមួយ រវាងក្រុមហ៊ុន អេមរុរ៉ាយស៍ និងក្រុមហ៊ុន Green Group របស់ប្រទេសអូស្ត្រាលី ដោយចូលរួមជាមួយឧកញ៉ា សុង សារ៉ន សហស្ថាបនិក និងជាអគ្គនាយកក្រុមហ៊ុនអេមរុរ៉ាយស៍ ដើម្បីជាតំណាងក្នុងការបញ្ជូនអង្ករប្រណិតកម្ពុជាចំនួនពីរទូកុងតឺន័រ ឆ្ពោះទៅកាន់ប្រទេសអូស្ត្រាលី។

ប្រភពដដែល បានឱ្យដឹងបន្តថា ដោយមានការគាំទ្រពីអូស្ត្រាលី ក្រុមហ៊ុនអេមរុរ៉ាយស៍ និងកសិ-ពាណិជ្ជកម្មកម្ពុជា អាចពង្រីក និងទទួលបានទីផ្សារនាំចេញថ្មី។

ជាមួយគ្នានេះ អូស្ត្រាលី-កម្ពុជា កំពុងពង្រីកពាណិជ្ជកម្មទ្វេភាគី បង្កើតការងារកាន់តែច្រើន និងជំរុញកំណើនសេដ្ឋកិច្ចប្រកបដោយនិរន្តរភាព ព្រមទាំងបង្កើតទំនាក់ទំនងសេដ្ឋកិច្ចឱ្យកាន់តែច្រើនរវាងប្រទេសទាំងពីរ ដែលអាចពង្រីកបន្ថែមទៀតនាពេលអនាគត។

ក្រុមហ៊ុនអេមរុរ៉ាយស៍ បានថ្លែងអំណរគុណឯកអគ្គរដ្ឋទូតអូស្ត្រាលី និងគណប្រតិភូដែលបានចុះទៅទសន្សកិច្ចនៅរោងចក្រកិនកែឆ្នៃអង្ករ អេមរុរ៉ាយស៍ សាខាភ្នំពេញ និងចូលរួមជាភ្ញៀវកិត្តិយសក្នុងការនាំអង្ករទៅទីផ្សារអូស្ត្រាលី។

បើតាមស្ថានទូតអូស្ត្រាលីប្រចាំកម្ពុជា ពាណិជ្ជកម្មរវាងកម្ពុជា និងអូស្ត្រាលី បានកើនដល់ ១,២ ពាន់លានដុល្លារ ក្នុងឆ្នាំ២០២៥ ដោយមានប្រមាណ ៨៥០លានដុល្លារ បានមកពីការនាំចេញរបស់កម្ពុជា៕

អត្ថបទ៖ វីរៈ រូបភាព៖ ស្ថានទូតអូស្ត្រាលី

The post អង្ករប្រណិតកម្ពុជាចំនួនពីរទូកុងតឺន័រ ត្រូវបាននាំចេញទៅកាន់ទីផ្សារប្រទេសអូស្ត្រាលី appeared first on Millions times.

អង្ករខ្មែររបស់ក្រុមហ៊ុន វិរៈ ប៊ុនថាំ នឹងទៅដល់ប្រទេសកាណាដាក្នុងពេលឆាប់ៗនេះ

Virak វីរៈ — Sat, 24 Jan 2026 12:51:09 +0000

នាពេលឆាប់ៗខាងមុខនេះ អង្ករខ្មែររបស់ក្រុមហ៊ុន វិរៈ ប៊ុនថាំ នឹងមានលក់នៅប្រទេសកាណាដា។ នេះបើតាមឱ្យដឹងពីលោក គឹម ច័ន្ទភិរម្យ កុងស៊ុលកិត្តិយសប្រចាំទីក្រុងម៉ុងរ៉េអាល់ ខេត្តកេប៊ិច ប្រទេសកាណាដា នៅថ្ងៃទី២៤ ខែមករា ឆ្នាំ២០២៦នេះ។

តាមដានជាមួយយើង៖ Million Times

លោកកុងស៊ុលរូបនេះ បានឱ្យដឹងថា អង្ករខ្មែររបស់ក្រុមហ៊ុន វិរៈ ប៊ុនថាំ នឹងទៅដល់ប្រទេសកាណាដាក្នុងពេលឆាប់ៗនេះ ដោយលោកបានជួបពិភាក្សាជាមួយអ្នកឧកញ៉ា សួរ វីរៈ អគ្គនាយកក្រុមហ៊ុន Vireak Buntham International នៅទីរាជធានីភ្នំពេញ ទាក់ទងនឹងទីផ្សារ និងការនាំចេញអង្ករពីប្រទេសកម្ពុជាទៅកាន់ប្រទេសកាណាដា។

លោក គឹម ច័ន្ទភិរម្យ បានលើកសរសើរក្រុមហ៊ុន វិរៈ ប៊ុនថាំ ថាជាក្រុមហ៊ុនដំបូងបំផុតដែលហ៊ានទិញស្រូវពីកសិករចំនួន ៣០ ០០០តោន ក្នុងតម្លៃ ៩៥០រៀល ព្រោះចង់ជួយកសិករ ដោយលោកបន្ថែមថា ទិញអង្ករពីក្រុមហ៊ុន វិរៈ ប៊ុនថាំ ស្មើនឹងជួយទិញស្រូវដោយផ្ទាល់ពីប្រជាកសិករខ្មែរ។

ជាមួយគ្នានេះ លោកកុងស៊ុលកិត្តិយសប្រចាំទីក្រុងម៉ុងរ៉េអាល់រូបនេះ ក៏បានអំពាវនាវដល់ប្រជាពលរដ្ឋខ្មែររស់នៅប្រទេសកាណាដា ចូលរួមគាំទ្រផលិតផលខ្មែរពិតៗ ដែលនឹងទៅដល់ប្រទេសកាណាដាក្នុងពេលឆាប់ៗនេះ។

គួរឱ្យដឹងដែរថា បន្ទាប់ពីបានចូលរួមក្នុងបេសកកម្មទាក់ទាញ និងជំរុញវិនិយោគទៅកាន់សហរដ្ឋអាមេរិក និងកាណាដា កាលពីថ្ងៃទី២៧ ខែតុលា ដល់ថ្ងៃទី៥ ខែវិច្ឆិកា ឆ្នាំ២០២៥កន្លងទៅ ក្រោមការដឹកនាំរបស់ឯកឧត្តម ស៊ុន ចាន់ថុល ឧបនាយករដ្ឋមន្ត្រី អនុប្រធានទី១ ក្រុមប្រឹក្សាអភិវឌ្ឍន៍កម្ពុជា អ្នកឧកញ៉ា សួរ វីរៈ អគ្គនាយកក្រុមហ៊ុន វិរៈ ប៊ុនថាំ អេចប្រេស បានបង្ហើបឱ្យដឹងថា តាមរយៈបេសកកម្មនេះ អ្នកឧកញ៉ា បានឈានដល់ការព្រមព្រៀងជាមួយដៃគូ ដោយគ្រោងនាំចេញអង្ករកម្ពុជាដើម្បីលក់សាកល្បងនៅតាមទីផ្សារក្នុងប្រទេសកាណាដា និងសហរដ្ឋអាមេរិក។

ក្នុងនោះ ក្រុមហ៊ុន វិរៈ ប៊ុនថាំ បានទទួលការព្រមព្រៀងឱ្យនាំចេញអង្ករទៅកាន់សហរដ្ឋអាមេរិកចំនួន ១០កុងតឺន័រ និងប្រទេសកាណាដា នឹងសាកល្បងនាំចេញទៅចំនួន ១ទូកុងតឺន័រ៕

អត្ថបទ៖ វីរៈ រូបភាព៖ ហ្វេសប៊ុកលោក គឹម ច័ន្ទភិរម្យ

The post អង្ករខ្មែររបស់ក្រុមហ៊ុន វិរៈ ប៊ុនថាំ នឹងទៅដល់ប្រទេសកាណាដាក្នុងពេលឆាប់ៗនេះ appeared first on Millions times.

ឆ្នាំ ២០២៥ កម្ពុជាទទួលបានចំណូលជាង ៦០០ លានដុល្លារ ពីការនាំចេញអង្ករជាង ៩៤ម៉ឺនតោន

Vin Chang — Tue, 06 Jan 2026 04:22:23 +0000

សហព័ន្ធស្រូវអង្ករកម្ពុជាបានបង្ហាញពីរបាយការណ៍នាំចេញអង្ករកាលពីឆ្នាំមុន ដោយរយៈពេល ១២ ខែនៃឆ្នាំ ២០២៥ កម្ពុជាទទួលបានចំណូលជាង ៦០០ លានដុល្លារ ពីការនាំចេញអង្ករ ៩៤០ ៣២១ តោន តាមរយៈក្រុមហ៊ុននាំចេញអង្ករ ៦៨ ទៅកាន់គោលដៅ ៧៥។

តាមដានជាមួយយើង៖ Million Times

ក្នុងចំណោមគោលដៅនាំចេញទាំង ៧៥ កម្ពុជាបាននាំចេញទៅកាន់បណ្ដាប្រទេសនៅក្នុងតំបន់អឺរ៉ុប ២៨ បានបរិមាណអង្ករចំនួន ៣៣៩ ៤១៧ តោន និងគិតជាទឹកប្រាក់ ២៥៨.២៨ លានដុល្លារ, ទៅកាន់ប្រទេសចិន និងហុងកុង ២៣១ ១២៥ តោន គិតជាទឹកប្រាក់ ១៣៨.៣៦ លានដុល្លារ, ទៅកាន់ប្រទេសក្នុងអាស៊ាន ៨ ប្រទេស បានបរិមាណ ២៧៣ ៦៥៧ តោន គិតជាទឹកប្រាក់ ១១៧.៦២ លានដុល្លារ ហើយទៅកាន់គោលដៅ ៣៧ ប្រទេសផ្សេងទៀតមាន អាហ្វ្រិក មជ្ឈិម បូព៌ា អាមេរិក កាណាដា អូស្ត្រាលី នូវែលហ្សេឡង់…បានចំនួន ៩៦ ១២២ តោន គិតជាទឹកប្រាក់ ៨៨.១៥ លានដុល្លារ។

ចំណែកប្រភេទអង្ករដែលបាននាំចេញមាន អង្ករក្រអូប ៦៤.០២%, ប្រភេទអង្ករសគ្រាប់វែង ១៣.៧១%, អង្ករចំហុយ ២%, អង្ករសរីរាង្គ ១.៣២%, អង្ករបាក់គ្រប់ប្រភេទ ១៨.៥៦% និងអង្ករផ្សេងៗចំនួន ០.៣៩%។

ការនាំចេញអង្ករក្នុងរយៈពេល១ឆ្នាំពេញនៃឆ្នាំ២០២៥ គឺមានការកើនឡើងប្រមាណជាង ៤៥% បើធៀបរយៈពេលដូចគ្នាក្នុងឆ្នាំ ២០២៤។ ជាមួយគ្នានេះដែរ កម្ពុជាក៏បាននាំចេញស្រូវ ៦ ៨៥៩ ៩៣០ តោនស្រូវសើម ដែលគិតជាទឹកប្រាក់ប្រមាណ ១៥៧៩.៨៦ លានដុល្លារ៕

អត្ថបទ៖ ឆដា, រូបភាព៖ ស.អ.ក

The post ឆ្នាំ ២០២៥ កម្ពុជាទទួលបានចំណូលជាង ៦០០ លានដុល្លារ ពីការនាំចេញអង្ករជាង ៩៤ម៉ឺនតោន appeared first on Millions times.

១ខែដំបូងឆ្នាំ ២០២៥ កម្ពុជានាំអង្ករចេញជិត ៦ ម៉ឺនតោន បានចំណូល ៤៨ លានដុល្លារ

Vin Chang — Fri, 14 Feb 2025 09:35:13 +0000

ត្រឹមខែមករាឆ្នាំ ២០២៥ កម្ពុជានាំចេញអង្ករសម្រេចបានជិត ៦ម៉ឺនតោន និងទទួលបានចំណូល ៤៨ លានដុល្លារ។ នេះបើតាមរបាយការណ៍របស់សហព័ន្ធស្រូវអង្ករកម្ពុជាផ្ដល់ស្ថាប័ន Fresh News។

តាមដានជាមួយយើង៖ Million Times

ក្នុងរយៈពេល១ខែដំបូង នៃឆ្នាំ ២០២៥ កម្ពុជាបាននាំចេញអង្ករបាន ៥៩ ០៨៦ តោន សម្រេចបាន ៤៨.០៣ លានដុល្លារ តាមរយៈក្រុមហ៊ុននាំចេញអង្ករ ៣៩ និងនាំចេញទៅកាន់គោលដៅ ៤៥ គោលដៅ។

ការនាំចេញអង្ករចេញទៅក្រៅប្រទេសនោះ ក៏បាននាំទៅកាន់បណ្ដាប្រទេស នៅតំបន់អឺរ៉ុប ២៣ បរិមាណអង្ករ ៣៦ ៧១៤ តោន គិតជាទឹកប្រាក់ ២៩.៧៩ លានដុល្លារ និងនាំចេញទៅកាន់ ប្រទេសចិន និងហុងកុង ៣ ៧៧២ តោន ដែលគិតជាទឹកប្រាក់ ២.៥៦ លានដុល្លារ និងនាំទៅកាន់ប្រទេសតំបន់អាស៊ាន ៤ ប្រទេស ក្នុងបរិមាណ ៩ ៤១៣ តោន គិតជាទឹកប្រាក់ ៧.៣១ លាន ព្រមទាំងនាំទៅកាន់គោលដៅ ១៦ ប្រទេសផ្សេងទៀតមាន អាហ្វ្រិក, មជ្ឈិមបូព៌ា, អាមេរិក, កាណាដា, អូស្ត្រាលី, នូវែលហ្សេឡង់ បាន ៩ ១៨៧ តោន គិតជាទឹកប្រាក់ ៨.៣៧ លានដុល្លារ។

ក្នុងចំណោមប្រភេទអង្ករដែលបាននាំចេញរួមមានអង្ករក្រអូប ៩៣.០១%, ប្រភេទអង្ករស ធម្មតា.៩៣%, អង្ករចំហុយ ២.៣១%, អង្ករសរីរាង្គ ១.៤២% និងអង្ករផ្សេងៗ ០.៣៣% ។

សម្រាប់ផ្នែកស្រូវវិញ នៅខែមករា ឆ្នាំ២០២៥ កម្ពុជាបាននាំចេញស្រូវ ៦១៩ ៤៨៩ តោនជាស្រូវសើម ដែលគិតជាទំហំទឹកប្រាក់ប្រមាណ ១៣៩.៣៨ លានដុល្លារ៕

អត្ថបទ៖ មេរ៉ា, រូបភាព៖ សហព័ន្ធស្រូវអង្ករកម្ពុជា

The post ១ខែដំបូងឆ្នាំ ២០២៥ កម្ពុជានាំអង្ករចេញជិត ៦ ម៉ឺនតោន បានចំណូល ៤៨ លានដុល្លារ appeared first on Millions times.

តម្លៃនាំចេញអង្ករបាក់៥% របស់វៀតណាម ធ្លាក់ដល់ចំណុចទាបបំផុតក្នុងរយៈពេល ៩ឆ្នាំ

ទីន Tin — Mon, 10 Feb 2025 10:46:34 +0000

នាថ្ងៃចន្ទ ទី១០ ខែកុម្ភៈ សមាគមន៍ចំណីអាហារវៀតណាមបានបញ្ចេញរបាយការណ៍ស្ដីពីការនាំចេញអង្ករបាក់៥% របស់ខ្លួន នៅក្នុងឆ្នាំ២០២៤ ដោយតម្លៃរបស់វាបានថយចុះ ៥,៩% មកនៅត្រឹម ៣៩៩ដុល្លារក្នុងមួយតោន ដែលជាស្ថិតិអាក្រក់បំផុតក្នុងរយៈពេល ៩ឆ្នាំចុងក្រោយ។

តាមដានជាមួយយើង៖ Million Times

អង្ករបាក់៥% របស់វៀតណាម មានតម្លៃធូរថ្លៃជាងគូប្រជែងគឺប្រទេសថៃ និងឥណ្ឌា ប្រហែល ៣២ដុល្លារ និង ១៤ដុល្លារក្នុងមួយតោន។ នេះបើតាមការចុះផ្សាយពីសារព័ត៌មាន VNExpress។

លោក Dinh Ngoc Tam នាយកប្រតិបត្តិរងនៃក្រុមហ៊ុននាំចេញអង្ករ Co May បាននិយាយថា តម្លៃនាំចេញអង្ករធ្លាក់ចុះបែបនេះ ដោយសារតែការកើនឡើងនៃការផ្គត់ផ្គង់សកល ដែលបណ្តាលមកពីការវិលត្រឡប់របស់ឥណ្ឌាចូលក្នុងទីផ្សារវិញ ជាមួយនឹងអង្ករបម្រុងយ៉ាងច្រើន។

ក្រុមហ៊ុនរកស៊ីក្នុងវិស័យមួយនេះ បានបង្ហាញក្ដីបារម្ភជាខ្លាំងជុំវិញបញ្ហាមួយនេះ ដោយពួកគេសន្និដ្ឋានថា តម្លៃនៃការនាំចេញអង្កររបស់វៀតណាម នឹងបន្តធ្លាក់ចុះថែមទៀត ដ្បិតបច្ចុប្បន្នគុណភាពអង្ករថៃ និងឥណ្ឌា ដែលជាគូប្រជែងធំបំផុតរបស់វៀតណាម ហាក់ត្រូវប៉ាន់ខ្លាំងជាងលើទីផ្សារពិភពលោក៕

អត្ថបទ៖ Luffy រូបភាព៖ VNExpress

The post តម្លៃនាំចេញអង្ករបាក់៥% របស់វៀតណាម ធ្លាក់ដល់ចំណុចទាបបំផុតក្នុងរយៈពេល ៩ឆ្នាំ appeared first on Millions times.

កន្លះខែដំបូងនៃដើមឆ្នាំ២០២៥ វៀតណាមនាំចេញអង្ករបានទឹកប្រាក់ជាង ១៦៥លានដុល្លារ

ទីន Tin — Fri, 31 Jan 2025 03:23:30 +0000

សមាគមចំណីអាហារវៀតណាម បានបង្ហាញទិន្នន័យនាំចេញអង្ករពីថ្ងៃទី០១ ដល់ថ្ងៃទី១៥ ខែមករា ដោយសម្រេចបានការនាំចេញ ២៦៨ ៧០០តោន សរុបជាទឹកប្រាក់ ១៦៥,៧លានដុល្លារ។

តាមដានជាមួយយើង៖ Million Times

តាមការចុះផ្សាយពីទីភ្នាក់ងារព័ត៌មាន VNExpress បានឲ្យដឹងថា រយៈពេលកន្លះខែដំបូងនៃដើមឆ្នាំ២០២៥ ការនាំចេញអង្ករមានកំណើន ៣៨,៧% ខណៈតម្លៃវិញកើនឡើង ២៣,២៨% បើធៀបនឹងរយៈពេលដូចគ្នាកាលពីឆ្នាំទៅ។

ទោះជាទទួលបានផលវិជ្ជមានតាំងពីដើមឆ្នាំ តែសមាគមចំណីអាហារវៀតណាមព្យាករថា ទីផ្សារអង្ករនៅឆ្នាំនេះ នឹងមានសភាពតានតឹង ក្រោយប្រទេសឥណ្ឌាប្រកាសបើកការនាំចេញអង្ករវិញ។ ពួកគេក៏បានព្យាករថា ការនាំចេញអង្ករក្នុងឆ្នាំនេះ ទំនងសម្រេចបានត្រឹម ៧,៥លានតោនប៉ុណ្ណោះ តិចជាងកាលពីឆ្នាំ២០២៤ ដែលបាននាំចេញរហូតដល់ជាង ៩លានតោន៕

អត្ថបទ៖ Luffy រូបភាព៖ VEN

The post កន្លះខែដំបូងនៃដើមឆ្នាំ២០២៥ វៀតណាមនាំចេញអង្ករបានទឹកប្រាក់ជាង ១៦៥លានដុល្លារ appeared first on Millions times.

សម្តេច ហ៊ុន ម៉ាណែត លើកទឹកចិត្តអ្នករកស៊ីផ្នែកស្រូវអង្ករបន្តនាំចេញផ្ទាល់ឱ្យទូលំទូលាយទៅកាន់ទីផ្សារអន្តរជាតិ

Vin Chang — Thu, 09 Jan 2025 01:30:00 +0000

ក្នុងជំនួបជាមួយក្រុមវិនិយោគិនរកស៊ីក្នុងវិស័យស្រូវអង្ករសម្ដេច ហ៊ុន ម៉ាណែត បានលើកទឹកចិត្តឱ្យបន្តជំរុញការនាំចេញផ្ទាល់ឱ្យកាន់តែទូលំទូលាយទៅកាន់ទីផ្សារអន្តរជាតិ។ សម្តេចបានសង្កត់ធ្ងន់ថា រាជរដ្ឋាភិបាលនៅតែផ្ដល់អាទិភាពលើដំណាំស្រូវ ដែលជាដំណាំយុទ្ធសាស្ត្រ យូរអង្វែងរបស់កម្ពុជា និងបានគូសបញ្ជាក់អំពីការដាក់ចេញគោលនយោបាយចាំបាច់ ដើម្បីគាំទ្រដំណាំស្រូវ និងធានាបាននូវភាពប្រកួតប្រជែង។

ក្នុងពេលអនុញ្ញាតឱ្យប្រតិភូសហព័ន្ធស្រូវអង្ករកម្ពុជា ចូលជួបពិភាក្សាការងារ នៅវិមានសន្ដិភាពនាព្រឹកថ្ងៃពុធ ខែមករានេះសម្តេច ហ៊ុន ម៉ាណែត នាយករដ្ឋមន្ត្រី បានគូសបញ្ជាក់ថា វិស័យកសិកម្មបានដើរតួនាទីយ៉ាងសំខាន់ក្នុងការលើកកម្ពស់ជីវភាពរបស់ប្រជាពលរដ្ឋ និងការអភិវឌ្ឍសង្គម-សេដ្ឋកិច្ចកម្ពុជា។

តាមដានជាមួយយើង៖ Million Times

សម្ដេចបានសង្កត់ធ្ងន់ថា រាជរដ្ឋាភិបាលនៅតែផ្ដល់អាទិភាពលើដំណាំស្រូវ ដែលជាដំណាំយុទ្ធសាស្ត្រ យូរអង្វែងរបស់កម្ពុជា និងបានគូសបញ្ជាក់អំពីការដាក់ចេញគោលនយោបាយចាំបាច់ ដើម្បីគាំទ្រដំណាំស្រូវ និងធានាបាននូវភាពប្រកួតប្រជែងរបស់វិស័យស្រូវអង្ករកម្ពុជា តាមរយ:ការកសាងហេដ្ឋារចនាសម្ព័ន្ធតភ្ជាប់ ការសម្រួលការដឹកជញ្ជូន និងការកាត់បន្ថយថ្លៃដើមផលិតកម្ម ក៏ដូចជាជំរុញភាពម្ចាស់ការលើខ្សែច្រវាក់ផ្គត់ផ្គង់ក្នុងស្រុក និងការនាំចេញទៅកាន់ទីផ្សារអន្តរជាតិ។

អ្នកឧកញ៉ា ហ៊ុន ឡាក់ ប្រធានក្រុមប្រឹក្សាភិបាលគោលនយោបាយស្រូវអង្ករ នៃសហព័ន្ធស្រូវអង្ករកម្ពុជា បានលើកឡើងអំពីកិច្ចខិតខំប្រឹងប្រែង និងការយកចិត្តទុកដាក់លើគុណភាពស្រូវអង្ករកម្ពុជា, ការប្រមូលទិញស្រូវពីប្រជាកសិករ, ការរៀបចំសម្ងួត, ការស្ដុកទុក និងការនាំចេញស្រូវអង្ករទៅកាន់ទីផ្សារអន្តរជាតិ។

សម្ដេចនាយករដ្ឋមន្រ្តីបានវាយតម្លៃខ្ពស់ចំពោះសហព័ន្ធស្រូវអង្ករកម្ពុជា ដែលបានចូលរួមចំណែកជាមួយរាជរដ្ឋាភិបាល ក្នុងការអភិវឌ្ឍវិស័យស្រូវ អង្ករ។

ក្នុងឱកាសនោះ សម្ដេចបានលើកទឹកចិត្តឱ្យសហព័ន្ធស្រូវអង្ករកម្ពុជា បន្តសហការឱ្យកាន់តែជិតស្និទ្ធិថែមទៀតជាមួយក្រសួង-ស្ថាប័នពាក់ព័ន្ធនៃរាជរដ្ឋាភិបាល ដើម្បីជំរុញការនាំចេញផ្ទាល់ឱ្យកាន់តែទូលំទូលាយទៅកាន់ទីផ្សារអន្តរជាតិ ជាមួយតម្លៃបន្ថែមខ្ពស់ ក៏ដូចជាការចូលរួមផ្តល់ការបណ្ដុះបណ្ដាលជំនាញបច្ចេកទេសដល់ប្រជាកសិករ សំដៅលើកកម្ពស់គុណភាពផលិតផល និងបង្កើនផលិតភាព ព្រមទាំងជំរុញការផ្សព្វផ្សាយអំពីការវិវឌ្ឍរីកចម្រើននៃផលិតកម្មស្រូវអង្ករកម្ពុជា ឱ្យបានទូលំទូលាយ៕

អត្ថបទ៖ សាងតេជៈ រូបភាព៖ ផេកនាយករដ្ឋមន្រ្តី

The post សម្តេច ហ៊ុន ម៉ាណែត លើកទឹកចិត្តអ្នករកស៊ីផ្នែកស្រូវអង្ករបន្តនាំចេញផ្ទាល់ឱ្យទូលំទូលាយទៅកាន់ទីផ្សារអន្តរជាតិ appeared first on Millions times.

ឥណ្ឋា បើកឲ្យនាំចេញអង្ករសឡើងវិញ ធ្វើឲ្យតម្លៃអង្ករវៀតណាម ថៃ បាគីស្ថាន និងមីយ៉ានម៉ាធ្លាក់ចុះ

Yoo Yoo — Wed, 30 Oct 2024 04:22:07 +0000

រដ្ឋាភិបាលបាននិយាយថា ប្រទេសឥណ្ឌាបានអនុញ្ញាតឱ្យនាំចេញអង្ករសឡើងវិញ ដើម្បីជួយកសិករ និងអ្នកនាំចេញអង្ករប្រភេទផ្សេងៗ នៅលើទីផ្សារពិភពលោក។

ដោយសារមានការព្យាករណ៍ពីទិន្នផលស្រូវកើនឡើង កសិករ និងអ្នកនាំចេញអង្ករនាពេលថ្មីៗនេះបានជំរុញឱ្យរដ្ឋាភិបាលឥណ្ឌា បើកឲ្យមានការនាំចេញអង្ករសឡើងវិញ បង្កើនការផ្គត់ផ្គង់អង្ករសកល ដោយបានកំណត់តម្លៃអប្បបរមាសម្រាប់ការនាំចេញអង្ករសចំនួន ៤៩០ដុល្លារក្នុងមួយតោន។ ការកំណត់នេះបានធ្វើឱ្យតម្លៃអង្ករស វៀតណាម ថៃ ប៉ាគីស្ថាន និងមីយ៉ានម៉ា ធ្លាក់ចុះ។

សារព័ត៌មាន Reuter បានចុះផ្សាយថា មន្ត្រីពាណិជ្ជកម្ម និងឧស្សាហកម្មបាននិយាយថា ការនាំចេញអង្ករកាន់តែខ្ពស់ពីប្រទេសឥណ្ឌា ដែលជាអ្នកនាំចេញអង្ករធំបំផុតរបស់ពិភពលោកនឹងជំរុញការផ្គត់ផ្គង់សកល និងធ្វើឱ្យតម្លៃអន្តរជាតិធ្លាក់ចុះ ដោយបង្ខំឱ្យប្រទេសនាំចេញសំខាន់ៗផ្សេងទៀត ដូចជា ប៉ាគីស្ថាន ថៃ និងវៀតណាម ធ្លាក់ចុះ។

តាមដានជាមួយយើង៖ Million Times

លោក Dev Garg អនុប្រធានសហព័ន្ធអ្នកនាំចេញអង្ករឥណ្ឌា បាននិយាយថា ដោយសារតែតម្លៃខ្ពស់នេះ កសិករ និងអ្នកនាំចេញរបស់ឥណ្ឌាត្រូវបានហាមឃាត់មិនឱ្យលក់ប្រភេទអង្ករដែលមានតម្លៃថោកនៅលើទីផ្សារពិភពលោក។ លោក Garg បន្តថា ជាមួយនឹងការសម្រេចចិត្តនេះ នឹងមិនមានការរឹតបន្តឹងពេកនោះទេ។

លោក B.V. Krishna Rao ប្រធានសមាគមអ្នកនាំចេញអង្ករបាននិយាយថា ការផ្គត់ផ្គង់របស់ឥណ្ឌានឹងមានភាពប្រកួតប្រជែងជាងមុន ដោយសារប្រទេសឥណ្ឌាអាចផ្គត់ផ្គង់អង្ករសចំនួន ៥% របស់ខ្លួនក្នុងតម្លៃប្រហែល ៤៦០ដុល្លារក្នុងមួយតោន។ ពាណិជ្ជករបាននិយាយថា ប្រទេសឥណ្ឌានឹងអាចផ្គត់ផ្គង់អង្ករសកើន ២៥% ដោយកន្លងមកបានត្រឹមតែ ៥% សម្រាប់នាំចេញទៅកាន់ប្រទេសអាហ្រ្វិកមួយចំនួន។

កាលពីថ្ងៃអង្គារ ប្រទេសឥណ្ឌាបានលុបចោលពន្ធនាំចេញលើអង្ករស ខណៈនៅឃ្លាំងបានកើនឡើង ហើយប្រទេសនេះគ្រោងនឹងផលិតដំណាំដែលមានលក្ខណៈធូរស្រាល បន្ទាប់ពីមានភ្លៀងធ្លាក់ខ្លាំង។ នៅពេលដែលអាកាសធាតុ El Nino ក្នុងឆ្នាំ២០២៣ បានបង្កើនការរំពឹងទុកនៃភ្លៀងមូសុង ឥណ្ឌាបានដាក់ការទប់ស្កាត់ផ្សេងៗលើការនាំចេញអង្ករ ហើយបន្តរហូតដល់ឆ្នាំ២០២៤ ដើម្បីរក្សាតម្លៃក្នុងស្រុកនៅមុនការបោះឆ្នោតជាតិខែមេសាដល់ខែមិថុនា៕

អត្ថបទ៖ សារ៉ាយ រូបភាព៖ Reuters

The post ឥណ្ឋា បើកឲ្យនាំចេញអង្ករសឡើងវិញ ធ្វើឲ្យតម្លៃអង្ករវៀតណាម ថៃ បាគីស្ថាន និងមីយ៉ានម៉ាធ្លាក់ចុះ appeared first on Millions times.

៥១ ក្រុមហ៊ុននាំចេញអង្ករទៅក្រៅប្រទេសទទួលបានទឹកប្រាក់ជាង ២៤៧លានដុល្លារ ត្រឹមពេល៦ខែ

ទីន Tin — Tue, 09 Jul 2024 10:00:57 +0000

ក្រុមហ៊ុនក្នុងស្រុកចំនួន ៥១ក្រុមហ៊ុននាំចេញអង្ករទៅបានចំនួន ៣៣៨ ៦៥៤ តោន ទទួលបានទឹកប្រាក់ជាង២៤៧ លានដុល្លារ ខណៈការនាំចេញស្រូវជាង ២.៥លានតោន ទទួលបានទឹកប្រាក់ជាង ៧២៧លានដុល្លារ។

យោងតាមរបាយការណ៍របស់សហព័ន្ធស្រូវអង្ករកម្ពុជា អង្ករបរិមាណជាង៣៣ម៉ឺនតោននេះ ត្រូវបាននាំចេញ តាមរយៈក្រុមហ៊ុន ចំនួន៥១ ក្រុមហ៊ុន ទៅកាន់គោលដៅចំនួន៦៣ ដែលក្នុងនោះនាំទៅកាន់បណ្តាប្រទេសនៅក្នុងតំបន់អឺរ៉ុបចំនួន២៦ មានចំនួន ១៥៦ ៧៨៩ តោន គិតជាទឹកប្រាក់ចំនួន ១២១.៣២ លានដុល្លារសហរដ្ឋអាមេរិក , ប្រទេសចិនរួមទាំងហុងកុង និងម៉ាកាវ មានចំនួន ៧៥ ៣៩៨ តោន គិតជាទឹកប្រាក់ចំនួន ៤៧.០១ លានដុល្លារសហរដ្ឋអាមេរិក ,ប្រទេសក្នុងអាស៊ាន រួមទាំងទីម័រខាងកើត ចំនួន ៧ប្រទេសបានបរិមាណ ចំនួន ៧៤ ៥៥៤ តោន គិតជាទឹកប្រាក់ចំនួន ៥១.៨៥ លានដុល្លារសហរដ្ឋអាមេរិក និងទៅកាន់គោលដៅ ២៧ប្រទេសផ្សេងទៀតមាន អាហ្វ្រិក មជ្ឈឹមបូព៌ា អាមេរិក កាណាដា អូស្ត្រាលី ញ៉ូហ្សេឡេន ។ល។ បានចំនួន ៣១ ៩១៣ តោន គិតជាទឹកប្រាក់ចំនួន ២៧.៤២ លានដុល្លារសហរដ្ឋអាមេរិក។

សហព័ន្ធស្រូវអង្ករកម្ពុជាបានបញ្ជាក់ថា ប្រភេទអង្ករដែលកម្ពុជាបាននាំចេញមានដូថជា អង្ករក្រអូបចំនួន ៧០.៦៣% ប្រភេទអង្ករស ធម្មតា ២៥.០៧% អង្ករចំហ៊ុយ ២.៥៧% អង្ករសរីរាង្គចំនួន ១.៤៨% និងអង្ករផ្សេងៗចំនួន ០.២៥%។

ដោយឡែកសម្រាប់ការនាំចេញស្រូវរបស់កម្ពុជាចំនួន ២,៥២៨,០១១តោន ទទួលបានទឹកប្រាក់ ប្រមាណជាង ៧២៧.៣៦ លានដុល្លារសហរដ្ឋអាមេរិក៕

អត្ថបទ៖ សេដ្ឋានី

រូបភាព៖ បណ្តាញសង្គម

The post ៥១ ក្រុមហ៊ុននាំចេញអង្ករទៅក្រៅប្រទេសទទួលបានទឹកប្រាក់ជាង ២៤៧លានដុល្លារ ត្រឹមពេល៦ខែ appeared first on Millions times.