ជា វុទ្ធី Archives - Millions times

លោក ជា វុទ្ធី ស្នើសម្ព័ន្ធឧស្សាហកម្មកៅស៊ូវៀតណាមប្រចាំកម្ពជា បណ្ដាក់ទុនវិនិយោគបង្កើតតំបន់កសិ-ឧស្សាហកម្ម

Vin Chang — Fri, 04 Apr 2025 04:57:44 +0000

នាថ្ងៃ៣ មេសា ឆ្នាំ ២០២៥ ម្សិលមិញ លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានជួបពិភាក្សាការងារជាមួយគណៈប្រតិភូសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ដឹកនាំដោយលោក Trương Minh Trung អគ្គនាយករងទី១ក្រុមហ៊ុន Vietnam Rubber Group និងជាប្រធានគណៈកម្មាធិការអភិវឌ្ឍកៅស៊ូ ១០០ ០០០ ហិកតា នៅកម្ពុជា។

តាមដានជាមួយយើង៖ Million Times

លោក ជា វុទ្ធី បានកោតសរសើរចំពោះសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ដែលខិតខំជំរុញការអភិវឌ្ឍឧស្សាហកម្មកៅស៊ូនៅកម្ពុជានាពេលកន្លងមក និងបានចូលរួមក្នុងសកម្មភាពសង្គមមួយចំនួនផងដែរ។

ក្នុងឱកាសជួបគ្នា អគ្គលេខាធិការគណៈកម្មាធិការវិនិយោគកម្ពុជា បានលើកទឹកចិត្តឲ្យសម្ព័ន្ធឧស្សាហកម្មកៅស៊ូវៀតណាមប្រចាំកម្ពុជា ធ្វើការបណ្ដាក់ទុនវិនិយោគបង្កើតតំបន់កសិ-ឧស្សាហកម្មមួយ ដើម្បីប្រមូលផ្ដុំក្រុមហ៊ុនធ្វើការកែច្នៃជ័រកៅស៊ូ, ដើមកៅស៊ូ ឬកសិផលផ្សេងៗទៀតកំពុងមានសក្ដានុពល ដើម្បីផ្គត់ផ្គង់ដល់ឧស្សាហកម្មក្នុងស្រុក ដែលកំពុងមានតម្រូវការកើនឡើងពីមួយថ្ងៃទៅមួយថ្ងៃ។

ងាកមកលោក Trương Minh Trung ក្រោយស្ដាប់ក្រុមប្រឹក្សាអភិវឌ្ឍន៍កម្ពុជាចប់សព្វគ្រប់ ក៏បានបង្ហាញពីវឌ្ឍនភាពការងាររបស់សម្ព័ន្ធឧស្សាហកម្មកៅស៊ូវៀតណាមប្រចាំកម្ពុជាវិញម្ដង។ លោកបង្ហាញការចាប់អារម្មណ៍ពង្រីកការវិនិយោគក្នុងវិស័យផលិតថាមពលស្អាតនៅកម្ពុជា ដោយស្នើសុំការគាំទ្រពីក្រុមប្រឹក្សាអភិវឌ្ឍន៍កម្ពុជា។

អគ្គនាយករងទី១ក្រុមហ៊ុន Vietnam Rubber Group រូបនេះ ក៏ឯកភាពតាមសំណើលោក ជា វុទ្ធី ធ្វើការគិតគូរវិនិយោគបង្កើតតំបន់កសិ-ឧស្សាហកម្ម ដើម្បីធ្វើការកែច្នៃកសិផល៕

អត្ថបទ៖ មេរ៉ា, រូបភាព៖ ក្រុមប្រឹក្សាអភិវឌ្ឍន៍កម្ពុជា

The post លោក ជា វុទ្ធី ស្នើសម្ព័ន្ធឧស្សាហកម្មកៅស៊ូវៀតណាមប្រចាំកម្ពជា បណ្ដាក់ទុនវិនិយោគបង្កើតតំបន់កសិ-ឧស្សាហកម្ម appeared first on Millions times.

ហេដ្ឋារចនាសម្ព័ន្ធប្រកបដោយចក្ខុវិស័យនឹងបង្កើនការទាក់ទាញវិនិយោគិនសម្លឹងទៅវិនិយោគតាមបណ្ដាខេត្ត

Vin Chang — Tue, 01 Apr 2025 05:21:36 +0000

រាជរដ្ឋាភិបាលកម្ពុជា បានចំណាយថវិកាច្រើនវិនិយោគលើហេដ្ឋារចនាសម្ព័ន្ធ ជាពិសេសហេដ្ឋារចនាសម្ព័ន្ធតភ្ជាប់ពីរាជធានីភ្នំពេញទៅកាន់បណ្ដាខេត្តនានា ជាការវិនិយោគប្រកបដោយចក្ខុវិស័យ ដែលនឹងអាចទាក់ទាញទាំងវិនិយោគិនជាតិ និងអន្តរជាតិឱ្យសម្លឹងទៅវិនិយោគនៅតាមបណ្ដាខេត្តទាំងនោះបន្ថែមពីលើរាជធានីភ្នំពេញដែលជាមេដែករួចមកហើយ។

លោក ជា វុទ្ធី អគ្គលេខាធិការនៃគណៈកម្មាធិការវិនិយោគកម្ពុជា នៃក្រុមប្រឹក្សាអភិវឌ្ឍន៍កម្ពុជា CDC កាលពីថ្ងៃទី៣១ ខែមីនា ក្នុងពិធីសម្ពោធមជ្ឈមណ្ឌលរបស់ក្រុមហ៊ុន តេ ហ្សង ស៊ីប៉ី ជានស៊ី យ៉ានជីវ យ័ន បានលើកឡើងថា ហេដ្ឋារចនាសម្ព័ន្ធដែលមានលក្ខណៈល្អប្រសើរ នឹងចូលរួមចំណែកក្នុងការកាត់បន្ថយចំណាយធុរកិច្ច និងសន្សំសំចៃពេលវេលា ខណៈដែលរាជរដ្ឋាភិបាលបានវិនិយោគយ៉ាងច្រើនសន្ធាប់សន្ធាប់លើគម្រោងហេដ្ឋារចនាសម្ព័ន្ធចម្បង រួមមាន ការសាងសង់ផ្លូវល្បឿនលឿនជាពិសេសផ្លូវល្បឿនលឿនភ្នំពេញ-បាវិត ដែលគ្រោង នឹងបញ្ចប់ការសាងសង់នៅឆ្នាំ២០២៧ កំពង់ផែទឹកជ្រៅព្រែកជីកហ្វូណនតេជោ អាកាសយដ្ឋានអន្តរជាតិ និងមជ្ឈមណ្ឌលភស្តុភារកម្មជាដើម។

តាមដានជាមួយយើង៖ Million Times

លោកថា ហេដ្ឋារចនាសម្ព័ន្ធទាំងនេះ នឹងចូលរួមចំណែកដោយផ្ទាល់ ក្នុងការលើកកម្ពស់ការតភ្ជាប់ក្នុងតំបន់ ព្រមទាំងធានាលទ្ធភាពក្នុងការដឹកជញ្ជូនឆ្លងកាត់តាមច្រករបៀងសេដ្ឋកិច្ចសំខាន់ៗនៅក្នុងប្រទេសកម្ពុជា និងក្នុងតំបន់ប្រកបដោយប្រសិទ្ធភាពខ្ពស់។

លោកបន្ថែមថា ក្នុងគោលបំណងបង្កើតបរិយាកាសធុរកិច្ចដែលឆ្លើយតបទៅនឹងតម្រូវការក្ដីកង្វល់របស់វិនិយោគិន រាជរដ្ឋាភិបាលបានបង្កើតយន្តការនានាជាច្រើន។ តួយ៉ាងវេទិការាជរដ្ឋាភិបាល ផ្នែកឯកជនលើកទី១៩ កាលពីខែវិច្ឆិកា ឆ្នាំ២០២៣កន្លងទៅ បានដោះស្រាយបញ្ហាប្រឈម និងក្ដីកង្វល់ដែលធុរកិច្ច និងវិនិយោគិនជួបប្រទះក្នុងប្រតិបត្តិការរបស់ខ្លួននៅកម្ពុជា។

របាយការណ៍របស់ CDC បានឱ្យដឹងថា ក្នុងរយៈពេល៣ខែ ដើមឆ្នាំ២០២៥នេះ កម្ពុជាទទួលបានគម្រោងវិនិយោគចំនួន១៧២គម្រោង ដែលមានចំនួនលើសឆ្នាំ២០២១ទាំងមូល ដែលមានត្រឹមតែ ១៦៩គម្រោង ខណៈឆ្នាំ២០២៤កន្លងទៅ គម្រោងវិនិយោគទាំងអស់ដែលក្រុមប្រឹក្សាអភិវឌ្ឍន៍កម្ពុជាបានចុះបញ្ជីមានចំនួន៤១៤គម្រោងមានទឹកប្រាក់ប្រមាណជិត៧ពាន់លានដុល្លារអាមេរិក៕

អត្ថបទ៖ សាងតេជៈ រូបភាព៖ CDC

The post ហេដ្ឋារចនាសម្ព័ន្ធប្រកបដោយចក្ខុវិស័យនឹងបង្កើនការទាក់ទាញវិនិយោគិនសម្លឹងទៅវិនិយោគតាមបណ្ដាខេត្ត appeared first on Millions times.

មហាសេដ្ឋី ពុង ឃាវសែ បើកផ្លូវឲ្យក្រុមវិនិយោគិនចិន ជួប CDC ស្វែងរកការបណ្តាក់ទុនវិនិយោគនៅកម្ពុជា

Vin Chang — Wed, 19 Feb 2025 07:05:17 +0000

មហាសេដ្ឋីលំដាប់ជួរមុខកម្ពុជាលោក ពុង ឃាវសែ បានរៀបចំជំនួបស្វាគមន៍គណៈប្រតិភូក្រុមហ៊ុនចិនចំនួន១៨ មកពីទីក្រុងនីងប៉ ខេត្តចឺជាំង ប្រទេសចិន ដើម្បីពិភាក្សាការងារជាមួយគណៈកម្មាធិការវិនិយោគកម្ពុជានៃក្រុមប្រឹក្សាអភិវឌ្ឍន៍កម្ពុជា CDC ។

គណៈប្រតិភូក្រុមហ៊ុនចិនចំនួន១៨ មកពីទីក្រុងនីងប៉ តាមរយៈអ្នកឧកញ៉ា ពុង ខៀវសែ ប្រធានក្រុមប្រឹក្សាភិបាលធនាគារ កាណាឌីយ៉ា ភីអិលស៊ី បានជួបពិភាក្សាជាមួយលោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា កាលពីព្រឹកថ្ងៃទី១៧ ខែកុម្ភៈ ដែលបានដឹកនាំដោយលោកស្រី លូ ចឺឈីង (Lu Zhiqiong) អគ្គនាយកធនាគារនីងប៉ ដែលក្រុមហ៊ុនទាំងនោះវិនិយោគក្នុងវិស័យការកែច្នៃកៅស៊ូ ផលិតសម្ភារៈបរិក្ខារពេទ្យ សម្ភារៈឆ្លាតវៃប្រើប្រាស់ក្នុងផ្ទះ សម្លៀកបំពាក់ និងធនាគារ ។ល។

តាមដានជាមួយយើង៖ Million Times

លោកស្រី លូ ចឺឈីង បានសង្ឃឹមថា តាមរយៈជំនួបលើកនេះ នឹងធ្វើឲ្យក្រុមហ៊ុនមានចំណាប់អារម្មណ៍កាន់តែខ្លាំងក្នុងការគិតគូរមកបណ្តាក់ទុនវិនិយោគនៅកម្ពុជា។

លោក ជា វុទ្ធី បានវាយតម្លៃខ្ពស់ចំពោះការវិនិយោគរបស់ចិននៅក្នុងប្រទេសកម្ពុជាហើយក៏បានលើកទ្បើងពីសក្តានុពលក្នុងវិស័យឧស្សាហកម្ម,កម្មន្តសាល, ការកែច្នៃផលិតផល, ការបង្កើតតំបន់សេដ្ឋកិច្ចពិសេស និងវិស័យកសិកម្ម និងកសិ-ឧស្សាហកម្ម ជាពិសេសកម្ពុជាមានដំណាំយុទ្ធសាស្ត្រជាច្រើនរួមមានស្រូវ ដំទ្បូងមី និងស្វាយចន្ទីជាដើម ដែលទាមទារឱ្យមានការ វិនិយោគកែច្នៃក្នុងស្រុកដើម្បីបង្កើតតម្លៃបន្ថែម។

លោកក៏បានជំរុញឱ្យវិនិយោគិនធ្វើការគិតគូរក្នុងការបង្កើតខ្សែចង្វាក់ផលិតកម្មក្នុងវិស័យ កសិកម្ម ជាពិសេសការកែច្នៃស្វាយចន្ទីផងដែរ។

ទន្ទឹមនឹងនេះ លោកក៏បានប្រាប់គណៈប្រតិភូពីស្ថានភាពវិនិយោគនៅកម្ពុជា ច្បាប់ និងបទប្បញ្ញត្តិពាក់ព័ន្ធនឹងការ វិនិយោគដែលបើកចំហ មានតម្លាភាព និងអាចប៉ាន់ប្រមាណទុកជាមុនបាន ព្រមទាំងការលើកទឹកចិត្តនានា៕

អត្ថបទ៖ សាងតេជៈ រូបភាព៖ CDC

The post មហាសេដ្ឋី ពុង ឃាវសែ បើកផ្លូវឲ្យក្រុមវិនិយោគិនចិន ជួប CDC ស្វែងរកការបណ្តាក់ទុនវិនិយោគនៅកម្ពុជា appeared first on Millions times.

ក្រុមហ៊ុនវិនិយោគបរទេស ២ បន្ថែមទៀត មកស្វែងយល់ពីដំណាំស្វាយចន្ធីកម្ពុជា

Vin Chang — Thu, 13 Feb 2025 10:01:13 +0000

ក្រុមហ៊ុនវិនិយោគធំៗ២ របស់បរទេស បានមកស្វែងយល់ពីវិស័យកសិ-ឧស្សាហកម្ម ជាពិសេស ឧស្សាហកម្មស្វាយចន្ទីនៅកម្ពុជា ព្រមទាំងស្វែងយល់ពីសក្ដានុពលសេដ្ឋកិច្ចរបស់កម្ពុជាផងដែរ ដើម្បីអាចឈានដល់ការសម្រេចចិត្តទម្លាក់ទុនវិនិយោគណាមួយ។

តាមដានជាមួយយើង៖ Million Times

កាលពីថ្ងៃ១១ ខែកុម្ភៈ ឆ្នាំ ២០២៥ កន្លងទៅនៅទីស្ដីការក្រុមប្រឹក្សាអភិវឌ្ឍន៍កម្ពុជា លោក ជា វុទ្ធី អគ្គលេខាធិការគណៈកម្មាធិការវិនិយោគកម្ពុជា បានទទួលជួបលោក Daniel Spitzer ប្រធាន និងជានាយកប្រតិបត្តិក្រុមហ៊ុន Mountain Hazelnuts ព្រមទាំងលោក Andreas Groetschel អគ្គនាយកក្រុមហ៊ុន Kamya។

ក្រុមហ៊ុនបរទេសទាំង ២ មានចេតនារបស់ក្នុងការវិនិយោគលើវិស័យកសិ-ឧស្សាហកម្មស្វាយចន្ទី ដែលជាវិស័យកំពុងរីកចម្រើនរបស់ប្រទេសកម្ពុជា។

អគ្គលេខាធិការគណៈកម្មាធិការវិនិយោគកម្ពុជា បានអរគុណដល់វិនិយោគិនបរទេសទាំង ២ ក្រុម ដែលបានចាប់អារម្មណ៍បណ្ដាក់ទុនវិនិយោគ ក្នុងវិស័យស្វាយចន្ទីនៅកម្ពុជា។ លោកក៏បានប្រាប់ដល់លោក Daniel និង Andreas ពីការគាំទ្រ និងលើកទឹកចិត្តពីសំណាក់រាជរដ្ឋាភិបាល លើគម្រោងវិនិយោគវិស័យស្វាយចន្ធីនេះជាច្រើន។ ពិសេសគំនិតផ្ដួចផ្ដើមរបស់នាយករដ្ឋមន្ត្រី ហ៊ុន ម៉ាណែត ក្នុងការបង្កើតសួនឧស្សាហកម្មស្វាយចន្ទី ដែលនឹងជួយបង្កើនភាពអំណោយផលនៃបរិយាកាសធុរកិច្ច ក្នុងវិស័យអាទិភាពនេះនៅកម្ពុជា។

លោក ជា វុទ្ធី បានបង្ហាញពីខ្សែសង្វាក់តម្លៃនៃឧស្សាហកម្មស្វាយចន្ទី ដែលរាប់ចាប់តាំងពីផ្នែកខាងលើ (upstream) ហើយពាក់ព័ន្ធនឹងការប្រមូលទិញ ទីលានសម្ងួត និងឃ្លាំងស្តុកទុកគ្រាប់ស្វាយចន្ទី។ ដោយអគ្គលេខាធិការគណៈកម្មាធិការវិនិយោគកម្ពុជារូបនេះ ស្នើឲ្យក្រុមហ៊ុនមេត្តាពិនិត្យលទ្ធភាពចូលរួមវិនិយោគក្នុងផ្នែកណាមួយរបស់ខ្សែសង្វាក់តម្លៃ ព្រមទាំងបានលើកទឹកចិត្តឲ្យក្រុមហ៊ុនបន្តសិក្សាសមិទ្ធិលទ្ធភាពនៃការបណ្ដាក់ទុនវិនិយោគនៅកម្ពុជា។

គួរបញ្ជាក់ថា តាំងពីចុងឆ្នាំ ២០២៤ រហូតមកដល់ដើមឆ្នាំ ២០២៥ នេះ មានវិនិយោគិនរបស់បរទេសជាច្រើនបានចូលមកសិក្សាពីដំណាំស្វាយចន្ធីកម្ពុជា មានទាំងអឺរ៉ុប និងក្រុមហ៊ុនប្រទេសនៅអាស៊ី៕

អត្ថបទ៖ មេរ៉ា, រូបភាព៖ ក្រុមប្រឹក្សាអភិវឌ្ឍន៍កម្ពុជា និង ARDB TV

The post ក្រុមហ៊ុនវិនិយោគបរទេស ២ បន្ថែមទៀត មកស្វែងយល់ពីដំណាំស្វាយចន្ធីកម្ពុជា appeared first on Millions times.

ជា វុទ្ធី Archives - Millions times

លោក ជា វុទ្ធី ស្នើសម្ព័ន្ធឧស្សាហកម្មកៅស៊ូវៀតណាមប្រចាំកម្ពជា បណ្ដាក់ទុនវិនិយោគបង្កើតតំបន់កសិ-ឧស្សាហកម្ម

មហាសេដ្ឋី ពុង ឃាវសែ បើកផ្លូវឲ្យក្រុមវិនិយោគិនចិន ជួប CDC ស្វែងរកការបណ្តាក់ទុនវិនិយោគនៅកម្ពុជា

ក្រុមហ៊ុនវិនិយោគបរទេស ២ បន្ថែមទៀត មក​ស្វែងយល់ពី​​ដំណាំស្វាយចន្ធីកម្ពុជា

ក្រុមហ៊ុនវិនិយោគបរទេស ២ បន្ថែមទៀត មកស្វែងយល់ពីដំណាំស្វាយចន្ធីកម្ពុជា