ក្រុមហ៊ុនធានារ៉ាប់រង Archives - Millions times

ក្រុមហ៊ុនធានារ៉ាប់រង Phillip នឹងចូលរួមផ្តល់សេវាធានារ៉ាប់រងដល់អ្នកសេដ្ឋកិច្ចក្រៅប្រព័ន្ធ

Virak វីរៈ — Tue, 09 Dec 2025 03:50:52 +0000

ក្រុមហ៊ុនធានារ៉ាប់រង Phillip General Insurance នឹងចូលរួមផ្តល់អត្ថប្រយោជន៍ធានារ៉ាប់រង និងការអប់រំផ្នែកហិរញ្ញវត្ថុ សម្រាប់អ្នកសេដ្ឋកិច្ចក្រៅប្រព័ន្ធដោយឥតគិតថ្លៃ។ នេះបើតាមការបញ្ជាក់របស់លោក Jeffrey Chew នាយកប្រតិបត្តិរបស់ក្រុមហ៊ុន។

តាមដានជាមួយយើង៖ Million Times

ការបញ្ជាក់នេះ គឺនៅក្នុងជំនួបសម្តែងការគួរសមជាមួយឯកឧត្តមរដ្ឋមន្ត្រី ហែម វណ្ណឌី ប្រធានគណៈកម្មាធិការសម្របសម្រួលការអភិវឌ្ឍសេដ្ឋកិច្ចក្រៅប្រព័ន្ធ កាលពីថ្ងៃទី៨ ខែធ្នូ ឆ្នាំ២០២៥។

លោក Jeffrey Chew បានលើកឡើងថា «ក្រុមហ៊ុយល់ឃើញថា សេដ្ឋកិច្ចក្រៅប្រព័ន្ធមានសក្តានុពលសំខាន់សម្រាប់ការអភិវឌ្ឍសេដ្ឋកិច្ចកម្ពុជា។ យើងមានបំណងផ្តល់ការធានារ៉ាប់រង សេវាហិរញ្ញវត្ថុ និងចំណេះដឹងហិរញ្ញវត្ថុ ដើម្បីឱ្យអ្នកសេដ្ឋកិច្ចក្រៅប្រព័ន្ធទទួលបានការការពារកាន់តែប្រសើរ»។

ជាការឆ្លើយតប ឯកឧត្តម ហែម វណ្ណឌី បានស្វាគមន៍ចំពោះចំណាប់អារម្មណ៍គាំទ្ររបស់ក្រុមហ៊ុន ដោយលើកឡើងថា អ្នកសេដ្ឋកិច្ចក្រៅប្រព័ន្ធស្ថិតក្នុងចំណោមក្រុម ដែលងាយរងផលប៉ះពាល់នៅក្នុងសេដ្ឋកិច្ច។

ឯកឧត្ដម បានបន្ថែមថា ក្រុមហ៊ុនធានារ៉ាប់រង Phillip នឹងក្លាយជាក្រុមហ៊ុនឯកជនទីពីរ ដែលចូលរួមជាមួយរដ្ឋាភិបាលក្នុងការជំរុញការចុះឈ្មោះ និងផ្តល់អត្ថប្រយោជន៍ថ្មីៗបន្ថែមទៀត សម្រាប់អ្នកសេដ្ឋកិច្ចក្រៅប្រព័ន្ធ។

គួរឱ្យដឹងថា ក្រុមហ៊ុនធានារ៉ាប់រង Phillip គ្រោងនឹងចុះអនុស្សរណៈនៃការយោគយល់ ជាមួយក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ដែលជាស្ថាប័នបង្គោលរបស់រាជរដ្ឋាភិបាល សម្រាប់ការអភិវឌ្ឍសេដ្ឋកិច្ចក្រៅប្រព័ន្ធ។

ការចុះអនុស្សរណៈនៃការយោគយល់នេះ គឺផ្តល់សេវាគាំទ្រ ដែលមានដូចជាការធានារ៉ាប់រងម៉ូតូសម្រាប់ភាគីទីបី និងការផ្តល់សេវាធានារ៉ាប់រងគ្រោះថ្នាក់ផ្ទាល់ខ្លួនដោយឥតគិតថ្លៃ ព្រមទាំងការបណ្តុះបណ្តាលចំណេះដឹងផ្នែកហិរញ្ញវត្ថុ៕

អត្ថបទ៖ វីរៈ រូបភាព៖ ក្រសួងឧស្សាហកម្ម

The post ក្រុមហ៊ុនធានារ៉ាប់រង Phillip នឹងចូលរួមផ្តល់សេវាធានារ៉ាប់រងដល់អ្នកសេដ្ឋកិច្ចក្រៅប្រព័ន្ធ appeared first on Millions times.

ក្រុមហ៊ុនធានារ៉ាប់រង៤០ កំពុងធ្វើប្រតិបត្តិការអាជីវកម្ម ជាមួយទំហំបុព្វលាភដុលជាង ៣៧០លានដុល្លារ

Vin Chang — Sat, 08 Feb 2025 04:28:40 +0000

មានក្រុមហ៊ុនធានារ៉ាប់រងជាច្រើម កំពុងធ្វើប្រតិបត្តិការអាជីវកម្មនៅក្នុងប្រទេសកម្ពុជា ជាមួយនឹងទំហំបុព្វលាភដុលជាង ៣៧០ លានដុល្លារ។ នេះបើតាមការឲ្យដឹងពីលោក ប៊ូ ច័ន្ទភីរូ អគ្គនាយកនៃនិយ័តករធានារ៉ាប់រងកម្ពុជា នៅថ្ងៃ៧ ខែកុម្ភៈ ឆ្នាំ ២០២៥ កន្លងទៅថ្មីៗនេះ ពេលចូលរួមក្នុងអង្គសិក្ខាសាលាផ្សព្វផ្សាយស្ដីពី «ការធានារ៉ាប់រងជាកាតព្វកិច្ច» នៅមជ្ឈមណ្ឌលអភិវឌ្ឍធុរកិច្ច។

តាមដានជាមួយយើង៖ Million Times

លោក ប៊ូ ច័ន្ទភីរូ បានលើកឡើងក្នុងការចូលរួមសិក្ខាសាលានោះថា បច្ចុប្បន្នក្រុមហ៊ុនធានារ៉ាប់រង ៤០កំពុងធ្វើប្រតិបត្តិការអាជីវកម្មនៅកម្ពុជា ជាមួយនឹងទំហំបុព្វលាភដុលដល់ទៅជាង ៣៧០ លានដុល្លារ និងទ្រព្យសកម្មសរុបជាង ១.២ ប៊ីលានដុល្លារ។

ក្នុងចំណោមក្រុមហ៊ុនធានារ៉ាប់រងទាំង ៤០ ដែលកំពុងធ្វើប្រតិបត្តិការអាជីវកម្មមានផលិតផលសម្បូរបែបដូចជាធានារ៉ាប់រងអាយុជីវិត, ធានារ៉ាប់រងសុខភាព, ធានារ៉ាប់រងគ្រោះថ្នាក់បុគ្គល, ធានារ៉ាប់រងទ្រព្យសម្បត្តិ, ធានារ៉ាប់រងភារៈទទួលខុសត្រូវ,ធានារ៉ាប់រងយានយន្ត, ធានារ៉ាប់រងភារៈ ទទួល-ខុសត្រូវការដ្ឋាន រហូតដល់ធានារ៉ាប់រងខ្នាតតូច សម្រាប់ប្រជាពលរដ្ឋដែលមានចំណូលទាប។

កាលពីឆ្នាំ ២០២៤ ដោយសារជួបវិបត្តិសេដ្ឋកិច្ច ទំហំទីផ្សារនេះ បានរួមចំណែកក្នុងសេដ្ឋកិច្ចជាតិតែប្រមាណ ១.១៧% ប៉ុណ្ណោះ ដោយមនុស្សម្នាក់ប្រើប្រាស់សេវាធានារ៉ាប់រងប្រមាណជាង ២២ ដុល្លារ។

ទំហំទីផ្សារធានារ៉ាប់រងនៅកម្ពុជា មានកម្រិតទាបបើធៀបនឹងទីផ្សារនានាក្នុងតំបន់ ដែលបណ្តាលមកពីកត្តាមួយចំនួនរួមមាន កង្វះខាតការយល់ដឹង របស់សាធារណជនពីអត្ថប្រយោជន៍នៃការធានារ៉ាប់រង និងកង្វះការយល់ដឹងរបស់ស្ថាប័នមានសមត្ថកិច្ច អំពីការធានារ៉ាប់រងជាកាតព្វកិច្ច ដែលការណ៍នេះ បណ្តាលឲ្យកិច្ច-សហការអនុវត្តការធានារ៉ាប់រង ជាកាតព្វកិច្ចមិនទាន់សកម្ម និងមុតស្រួចដូចដែលបានកំណត់ដោយច្បាប់ជាធរមាន៕

អត្ថបទ៖ មេរ៉ា, រូបភាព៖ និយ័តករធានារ៉ាប់រងកម្ពុជា

The post ក្រុមហ៊ុនធានារ៉ាប់រង៤០ កំពុងធ្វើប្រតិបត្តិការអាជីវកម្ម ជាមួយទំហំបុព្វលាភដុលជាង ៣៧០លានដុល្លារ appeared first on Millions times.