ក្រសួងពាណិជ្ជកម្ម Archives - Millions times

ក្នុងត្រីមាសទី១ ឆ្នាំ ២០២៦ ពាណិជ្ជកម្មកម្ពុជា-សិង្ហបុរី កើនជិត ២០០%

Vin Chang — Fri, 10 Apr 2026 08:40:55 +0000

ពាណិជ្ជកម្មកម្ពុជា-សិង្ហបុរី កើនជិត ២០០% ក្នុងត្រីមាសទី១ នៃឆ្នាំ ២០២៦ ទំហំទឹកប្រាក់ប្រមាណ ៥៥៥ លានដុល្លារ ខណៈរដ្ឋមន្ត្រីពាណិជ្ជកម្មកម្ពុជា លោកស្រី ចម និម្មល បំពេញទស្សនកិច្ចពង្រឹងទំនាក់ទំនងពាណិជ្ជកម្មនៅសិង្ហបុរី។

តាមដានជាមួយយើង៖ Million Times

របាយការណ៍បានបង្ហាញថា ចាប់ពីខែមករា-មីនា ឆ្នាំ ២០២៦ កម្ពុជា បាននាំចូលពីសិង្ហបុរី មានតម្លៃរហូតដល់ ៥៣៧ លានដុល្លារ កើនឡើង ២០៥,៩% ខណៈការនាំចេញពីកម្ពុជា ទៅសិង្ហបុរី មានត្រឹមតែ ១៨ លានដុល្លារ កើនឡើង ២៤,២% ប៉ុណ្ណោះ បើធៀបនឹងរយៈពេលដូចគ្នាកាលពីឆ្នាំមុន។ ក្នុងនោះ ការនាំចូលភាគច្រើន ជាប្រេងឥន្ធនៈ។

រដ្ឋមន្ត្រីក្រសួងពាណិជ្ជកម្ម កំពុងបំពេញទស្សនកិច្ចនៅប្រទេសសិង្ហបុរី ដើម្បីពង្រឹងកិច្ចសហប្រតិបត្តិការពាណិជ្ជកម្មរវាងប្រទេសទាំង ២ បន្ថែម។ ជាក់ស្ដែង នៅថ្ងៃ១០ ខែមេសា ឆ្នាំ ២០២៦ លោកស្រី ចម និម្មល រដ្ឋមន្ត្រីក្រសួងពាណិជ្ជកម្មកម្ពុជា និងលោកស្រី Grace Fu រដ្ឋមន្ត្រីក្រសួងបរិស្ថាន និងចីរភាព និងជារដ្ឋមន្ត្រីទទួលបន្ទុកទំនាក់ទំនងពាណិជ្ជកម្ម នៃសាធារណរដ្ឋសិង្ហបុរី បានចុះអនុស្សរណៈនៃកិច្ចសហប្រតិបត្តិការស្តីពីសន្តិសុខស្បៀង។

អនុស្សរណៈនេះបង្ហាញពីការប្តេជ្ញាចិត្តរួម ក្នុងការធានាស្ថិរភាព តម្លាភាព និងប្រសិទ្ធភាពនៃខ្សែច្រវាក់ផ្គត់ផ្គង់ស្បៀង ដែលនឹងបើកផ្លូវឲ្យការនាំចេញអង្ករកម្ពុជាទៅទីផ្សារសិង្ហបុរីមានការកើនឡើង។ ព្រមទាំងគាំទ្រយុទ្ធសាស្ត្ររក្សាស្ថិរភាពប្រភពស្បៀងអាហាររបស់សិង្ហបុរី និងបង្កើតឱកាសថ្មីៗ ប្រកបដោយចីរភាពសម្រាប់វិស័យកសិកម្មកម្ពុជា។

តាមរយៈកិច្ចព្រមព្រៀងនេះ គេរំពឹងថា នឹងជួយបង្កើនការនាំចេញរបស់កម្ពុជា ទៅសិង្ហបុរី និងបន្ថយគម្លាតឳនភាពពាណិជ្ជកម្មរវាងប្រទេសទាំង ២ ផងដែរ៕

អត្ថបទ៖ ឆដា, រូបភាព៖ Cham Nimul

The post ក្នុងត្រីមាសទី១ ឆ្នាំ ២០២៦ ពាណិជ្ជកម្មកម្ពុជា-សិង្ហបុរី កើនជិត ២០០% appeared first on Millions times.

សិង្ហបុរីចាត់ទុកកម្ពុជា ជាដៃគូយុទ្ធសាស្ត្រក្នុងការធ្វើពិពិធកម្មប្រភពផ្គត់ផ្គង់កសិ-ចំណីអាហារ

Vin Chang — Thu, 09 Apr 2026 04:56:05 +0000

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្មអញ្ជើញទទួលទានអាហារការងារពេលល្ងាច ដែលរៀបចំដោយលោក Gan Kim Yong ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម និងឧស្សាហកម្ម នៃសាធារណរដ្ឋសិង្ហបុរី។

តាមដានជាមួយយើង៖ Million Times

នាតុអាហារ ដែលពិភាក្សាពីការងារដែរនោះ សិង្ហបុរី ចាប់អារម្មណ៍នាំចូលផលិតផលអាហារពីកម្ពុជាបន្ថែមទៀត លោក Gan Kim Yong ឧបនាយករដ្ឋមន្ត្រី និងជារដ្ឋមន្ត្រីក្រសួងពាណិជ្ជកម្ម និងឧស្សាហកម្ម នៃសាធារណរដ្ឋសិង្ហបុរី បានអះអាងថាប្រទេសរបស់លោកចាប់អារម្មណ៍នាំចូលផលិតផលអាហារពីកម្ពុជាបន្ថែមទៀត។

ក្នុងឱកាសនោះ ភាគីទាំងពីរបានវាយតម្លៃខ្ពស់លើវឌ្ឍនភាពដ៏ល្អលើវិស័យពាណិជ្ជកម្មដែលមានកំណើនគួរឲ្យកត់សម្គាល់ និងបានពិភាក្សាផ្លាស់ប្ដូរយោបល់គ្នាលើកាលានុវត្តភាពសម្រាប់ការនាំចេញ ក្នុងគោលដៅជំរុញកំណើនពាណិជ្ជកម្ម កម្ពុជា-សិង្ហបុរី ឲ្យកាន់តែរីកចម្រើនបន្ថែមទៀត។

ដោយឡែក លោក Gan Kim Yong អះអាងថាប្រទេសរបស់លោកចាប់អារម្មណ៍នាំចូលផលិតផលអាហារពីកម្ពុជាបន្ថែមទៀត លើការនាំចូលដែលមានស្រាប់ទៅហើយ។ លើសពីនេះ ប្រទេសទាំងពីរ ក៏នឹងបន្តចរចាកិច្ចព្រមព្រៀងក្របខ័ណ្ឌសេដ្ឋកិច្ចឌីជីថលអាស៊ានផងដែរ ដែលកិច្ចព្រមព្រៀងនេះនឹងជួយបង្កើនសេដ្ឋកិច្ចឌីជីថលក្នុងតំបន់ដល់ ២ ទ្រីលានដុល្លារនៅឆ្នាំ ២០៣០ ខាងមុខ៕

អត្ថបទ៖ ឆដា, រូបភាព៖ Cham Nimul

The post សិង្ហបុរីចាត់ទុកកម្ពុជា ជាដៃគូយុទ្ធសាស្ត្រក្នុងការធ្វើពិពិធកម្មប្រភពផ្គត់ផ្គង់កសិ-ចំណីអាហារ appeared first on Millions times.

ឆ្នាំ ២០២០-២០២៥ ដំណាំដំឡូងមី មានការកើនឡើងយ៉ាងខ្លាំង

Vin Chang — Mon, 30 Mar 2026 09:27:54 +0000

ព្រឹត្តិបត្រពាណិជ្ជកម្ម (iTrade Bulletin) បានចេញផ្សាយកាលពីចុងសប្ដាហ៍មុនថា ផលិតផលដំឡូងមីនៅកម្ពុជាបានកើនឡើងជាបន្តបន្ទាប់ ជាពិសេសចាប់តាំងពីឆ្នាំ ២០២០ មកមានផ្ទៃដីដាំដុះកើនពី ៦៦៣ ៩២៩ ហិកតា ក្នុងឆ្នាំ ២០២០ មកដល់ ៧៧៤ ៨៤៣ ហិកតាក្នុងឆ្នាំ ២០២៥។

តាមដានជាមួយយើង៖ Million Times

ចំណែកបរិមាណទិន្នផលកើនពី ១២,៦៨ លានតោន ទៅដល់ ១៥,៩៥ លានតោន។ ដំឡូងមីដាំដុះនៅកម្ពុជា គឺជាពូជដែលមានជាតិម្សៅច្រើន ងាយដាំ ធន់ជំងឺ និងផ្ដល់ទិន្នផលខ្ពស់។ ជាមធ្យមដំឡូងមីនៅកម្ពុជាផ្ដល់ផល ២០ តោនក្នុងផ្ទៃដី ១ ហិកតា។ ផ្ទៃដីដាំដុះដំឡូងមីភាគច្រើននៅក្នុងខេត្តបាត់ដំបង បន្ទាយមានជ័យ ពោធិ៍សាត់ ប៉ៃលិន សៀមរាប ឧត្តរមានជ័យ ព្រះវិហារ កំពង់ធំ ស្ទឹងត្រែង ក្រចេះ និងត្បូងឃ្មុំ។

បច្ចុប្បន្ននៅកម្ពុជាមានរោងចក្រកែច្នៃដំឡូងមី ១៦ និងក្រុមហ៊ុននាំចេញទៅទីផ្សារអន្តរជាតិលើសពី ២០ ក្រុមហ៊ុន។ គិតចន្លោះពីឆ្នាំ ២០២០ ដល់ ២០២៥ គឺការនាំចេញដំឡូងមីកម្ពុជាទៅទីផ្សារអន្តរជាតិបានកើនឡើងប្រហែល ២០០% ដោយក្នុងនោះការនាំចេញដំឡូងមីស្រស់/ស្ងួត កើន ២១៦% ចំណែកម្សៅដំឡូងមី កើន ៧៤%។

កម្ពុជាស្ថិតក្នុងលំដាប់ទី១ ជាប្រទេសនាំចេញដំឡូងមីស្រស់ និងស្ងួត ក្នុងទំហំទឹកប្រាក់ប្រមាណ ៦៩០ លានដុល្លារ ដែលស្មើនឹង ៣៤,៧% នៃចំណែកទីផ្សារពិភពលោក។ ជាមួយគ្នានេះ កម្ពុជាស្ថិតក្នុងលំដាប់ទី៤ ក្នុងចំណោមប្រទេសនាំចេញម្សៅដំឡូងមី ក្នុងទឹកប្រាក់ប្រមាណ ២៨ លានដុល្លារ ដែលស្មើនឹង ០,៩% នៃចំណែកទីផ្សារពិភពលោក។ទីផ្សារសំខាន់ៗទទួលទិញដំឡូងមីស្រស់ និងស្ងួតរបស់កម្ពុជា រួមមានវៀតណាម ថៃ ហុងកុង និងម៉ាឡេស៊ី។ ចំណែកម្សៅដំឡូងមី មានចិន វៀតណាម អាមេរិក ហុល្លង់ កាណាដា សិង្ហបុរី និងអ៊ីតាលី។

ក្នុងព្រឹត្តិបត្រពាណិជ្ជកម្មបានបន្ថែមទៀតថា នៅឆ្នាំ ២០៣០ កម្ពុជានឹងអាចប្រមូលប្រាក់ពីការនាំចេញដំឡូងមី បាន ១,២ ពាន់លានដុល្លារ និងម្សៅដំឡូងមី មាន ២៦ លានដុល្លារ។ ដំឡូងមីត្រូវបានគេយកទៅប្រើប្រាស់ផលិតផលអាហារជាច្រើនប្រភេទ ចំណែកកាកសំណល់វាក៏ត្រូវបានយកទៅកែច្នៃជាចំណីសត្វ ជីសរីរាង្គ ថាមពលជីវឧស្ម័ន(Biogas) និងផលិតផលជីវបច្ចេកវិទ្យាមួយចំនួន៕

អត្ថបទ៖ ឆដា, រូបភាព៖ ក្រសួងពាណិជ្ជកម្ម

The post ឆ្នាំ ២០២០-២០២៥ ដំណាំដំឡូងមី មានការកើនឡើងយ៉ាងខ្លាំង appeared first on Millions times.

លោកស្រី ចម និម្មល អនុញ្ញាតគណៈប្រតិភូសមាគមវាយនភណ្ឌ ចូលជួបពិភាក្សាការងារ

Vin Chang — Tue, 17 Mar 2026 08:42:48 +0000

នាព្រឹកថ្ងៃអង្គារ ទី១៧ ខែមីនា ឆ្នាំ២០២៦ នៅទីស្ដីការក្រសួងពាណិជ្ជកម្ម លោកជំទាវ ចម និម្មល រដ្ឋមន្រ្តីក្រសួងពាណិជ្ជកម្ម បានអនុញ្ញាតជូនគណៈប្រតិភូសមាគមវាយនភណ្ឌ សម្លៀកបំពាក់ ស្បែកជើង និងផលិតផលធ្វើដំណើរនៅកម្ពុជា (TAFTAC) ដឹកនាំដោយលោក Enjoy Ho ប្រធានសមាគមថ្មី ចូលជួបសម្តែងការគួរសម និងពិភាក្សាការងារ។

តាមដានជាមួយយើង៖ Million Times

ជាកិច្ចចាប់ផ្តើម លោកជំទាវរដ្ឋមន្រ្តី បានសម្តែងការស្វាគមន៍យ៉ាងកក់ក្តៅចំពោះគណៈប្រតិភូ និងអបអរសាទរចំពោះលោក Enjoy Ho ដែលត្រូវបានជ្រើសតាំងជាប្រធានសមាគមថ្មី ព្រមទាំងអនុប្រធាន និងសមាជិកនៃក្រុមប្រឹក្សាភិបាលរបស់សមាគម។

ក្នុងជំនួបនេះ ភាគីទាំងពីរ បានចែករំលែកព័ត៌មានគ្នាទៅវិញទៅមក ក្នុងគោលបំណងស្វែងរកដំណោះស្រាយលើបញ្ហាប្រឈមនានា ពាក់ព័ន្ធនឹងការនាំចេញវិស័យវាយនភ័ណ្ឌកាត់ដេរ ក្នុងបរិបទដែលពិភពលោកកំពុងតែមានភាពមិនប្រកដប្រជា និងក្នុងពេលដែលកម្ពុជាកំពុងត្រៀមខ្លួនក្នុងការចាកចេញពីចំណាត់ថ្នាក់ប្រទេសអភិវឌ្ឍតិចតួចនៅឆ្នាំ២០២៩ ខាងមុខនេះ។

ក្នុងឱកាសនោះ លោកប្រធានសមាគម បានថ្លែងអំណរគុណចំពោះលោកជំទាវរដ្ឋមន្រ្តី ក៏ដូចជាថ្នាក់ដឹកនាំក្រសួងពាណិជ្ជកម្ម ដែលតែងតែគាំទ្រ និងផ្តល់កិច្ចសហប្រតិបត្តិការក្នុងការបន្តធ្វើការរួមគ្នា ដើម្បីជំរុញកំណើននៃការនាំចេញ ក្នុងវិស័យឧស្សាហកម្មកាត់ដេរ សម្លៀកបំពាក់ ស្បែកជើង និងផលិតផលធ្វើដំណើរនិងកាបូប របស់កម្ពុជា៕

អត្ថបទ៖ឆដា, រូបភាព៖ ក្រសួងពាណិជ្ជកម្ម Ministry of Commerce

The post លោកស្រី ចម និម្មល អនុញ្ញាតគណៈប្រតិភូសមាគមវាយនភណ្ឌ ចូលជួបពិភាក្សាការងារ appeared first on Millions times.

ដំណឹងល្អសម្រាប់ប្រជាកសិករ និងអាជីវករ! ក្រសួងពាណិជ្ជ កម្ម ចាត់វិធានការ “សម្របសម្រួលទីផ្សារកសិផលក្នុងស្រុក”

Vin Chang — Fri, 13 Mar 2026 08:29:23 +0000

ជាដំណឹងគួរឲ្យរីករាយសម្រាប់ប្រជាកសិករ និងអាជីវករដឹងថា ក្រសួងពាណិជ្ជកម្ម កំពុងចាត់វិធានវិធានការយ៉ាងសកម្មក្នុងការ “សម្របសម្រួលទីផ្សារកសិផលក្នុងស្រុក” ដើម្បីដោះស្រាយបញ្ហាការ កកស្ទះកសិផលដែលបងប្អូនកំពុងជួបប្រទះ ដែលបណ្ដាលមកពីការមិនអាចជ្រាបចូលទៅទីផ្សារបានទាន់ពេលវេលា អំឡុងពេលប្រមូលផលនេះ។

តាមដានជាមួយយើង៖ Million Times

ការធ្វើបែបនេះគឺដើម្បីធានាស្ថិរភាពទីផ្សារ ក៏ដូចជាការពារផលប្រយោជន៍ ជូនប្រជាកសិករខ្មែរទាំងអស់ ពិសេសអំឡុងពេលប្រមូលផលនេះ។

ថ្មីៗនេះក្រុមការងារមន្ទីរពាណិជ្ជកម្មបានចុះសម្របសម្រួលការទិញ លក់ និងស្វែងរកទីផ្សារ ដោយសហការជាមួយវិស័យឯកជនប្រមូលទិញបន្លែគ្រប់ប្រភេទដែលមានការកកស្ទះទីផ្សារនីៅខេត្តបាត់ដំបង ក្នុងតម្លៃសមរម្យ និងបានបន្តសម្របសម្រួលដោះស្រាយបញ្ហាទីផ្សារជាបន្តបន្ទាប់ទៀតតាមទីតាំងផលិតកម្ម តាមបណ្ដាខេត្តនានា និងរាជធានី។

ក្រសួងពាណិជ្ជកម្មតាមរយៈមន្ទីរពាណិជ្ជកម្មរាជធានី-ខេត្ត កំពុងបន្តតាមដានយ៉ាងសកម្មលើសកម្មភាពទីផ្សារកសិផល ដើម្បីចុះជួយសម្រួលការកកស្ទះ បានទាន់ពេលវេលា៕

អត្ថបទ៖ ឆដា, រូបភាព៖ ក្រសួងពាណិជ្ជកម្ម

The post ដំណឹងល្អសម្រាប់ប្រជាកសិករ និងអាជីវករ! ក្រសួងពាណិជ្ជ កម្ម ចាត់វិធានការ “សម្របសម្រួលទីផ្សារកសិផលក្នុងស្រុក” appeared first on Millions times.

កម្ពុជានឹងនាំគ្រាប់ស្វាយចន្ទីទាំងសំបកទៅចិន ក្នុងតម្លៃ ៣៥ លានដុល្លារដំណាក់កាលដំបូង ហើយអនាគតអាចពង្រីកដល់ប្រមាណ ៤០០ លានដុល្លារ

Vin Chang — Thu, 12 Mar 2026 07:42:29 +0000

កម្ពុជានឹងនាំចេញគ្រាប់ស្វាយចន្ទីទាំងសំបក (ប្រភេទ M23) ដែលមានតម្លៃប្រមាណ ៣៥ លានដុល្លារអាមេរិក ក្នុងដំណាក់កាលដំបូង ហើយមានផែនការពង្រីកការនាំចេញឈានទៅដល់ប្រមាណ ៤០០ លានដុល្លារ នាពេលអនាគត។ នេះបើតាមការប្រកាសពីក្រសួងពាណិជ្ជកម្ម។

តាមដានជាមួយយើង៖ Million Times

នៅថ្ងៃ ១១ ខែមីនា ឆ្នាំ ២០២៦ នៅទីស្ដីការក្រសួងពាណិជ្ជកម្មលោក សំហេង បូរ៉ា រដ្ឋលេខាធិការក្រសួងពាណិជ្ជកម្ម និងជាប្រធានក្រុមការងារជំរុញការនាំចេញ (EPTF) បានអនុញ្ញាតឲ្យលោក Jiang Xiaofei នាយកនៃគណៈកម្មាធិការការងារពង្រីកសហគ្រាសនៅក្រៅប្រទេស នៃវិទ្យាស្ថានចិនសម្រាប់យុទ្ធសាស្រ្តនវានុវត្តន៍ និងអភិវឌ្ឍន៍ (China Institute for Innovation and Development Strategy – CIIDS) ដឹកនាំគណៈប្រតិភូក្រុមហ៊ុន China Bonded Port Group Co., Ltd. និងតំណាងក្រុមហ៊ុន Men Sarun MDR Co., Ltd. ជួបសម្ដែងការគួរសម និងពិភាក្សាការងារ។

ជំនួបនេះត្រូវបានរៀបចំឡើងក្នុងគោលបំណងពង្រឹង និងពង្រីកកិច្ចសហប្រតិបត្តិការសេដ្ឋកិច្ច ពាណិជ្ជកម្ម និងវិនិយោគទ្វេភាគីកម្ពុជា-ចិន ព្រមទាំងស្វែងយល់ពីសក្ដានុពលក្នុងការជំរុញការនាំចេញកសិផលកម្ពុជា។

លោក សំហេង បូរ៉ា ក៏ជាសាក្សីក្នុងពិធីចុះហត្ថលេខាលើអនុស្សរណៈនៃការយោគយល់គ្នា ស្ដីពី “កិច្ចសន្យាផ្គត់ផ្គង់គ្រាប់ស្វាយចន្ទីកម្ពុជា” រវាងក្រុមហ៊ុន China Bonded Port Group Co., Ltd. និងក្រុមហ៊ុន Men Sarun MDR Co., Ltd.។ តាមរយៈកិច្ចព្រមព្រៀងនេះ កម្ពុជានឹងចាប់ផ្ដើមនាំចេញគ្រាប់ស្វាយចន្ទីទាំងសំបក (ប្រភេទ M23) ក្នុងជំហានដំបូងដែលមានទំហំទឹកប្រាក់ប្រមាណ ៣៥ លានដុល្លារ ដោយភាគីទាំងពីរមានចក្ខុវិស័យយុទ្ធសាស្ត្រក្នុងការជំរុញទំហំនាំចេញបន្ថែមទៀត ដែលរំពឹងថានឹងអាចកើនឡើងដល់សក្ដានុពលទឹកប្រាក់ប្រមាណ ៤០០ លានដុល្លារ នាពេលអនាគត។

គួរបញ្ជាក់ថាគ្រាប់ស្វាយចន្ទី M23 ជាពូជយុទ្ធសាស្រ្តរបស់កម្ពុជា ដែលមានគ្រាប់ធំ រសជាតិឆ្ងាញ់ និងសារធាតុចិញ្ចឹមខ្ពស់។ កាលពីឆ្នាំ២០២៥ កម្ពុជាបាននាំចេញគ្រាប់ស្វាយចន្ទីឆៅ ១ លានតោន ទៅកាន់ទីផ្សារអន្តរជាតិ ដោយទទួលបានចំណូលមកវិញប្រមាណ ១,៥ពាន់លានដុល្លារ៕

អត្ថបទ៖ ឆដា, រូបភាព៖ ក្រសួងពាណិជ្ជកម្ម

The post កម្ពុជានឹងនាំគ្រាប់ស្វាយចន្ទីទាំងសំបកទៅចិន ក្នុងតម្លៃ ៣៥ លានដុល្លារដំណាក់កាលដំបូង ហើយអនាគតអាចពង្រីកដល់ប្រមាណ ៤០០ លានដុល្លារ appeared first on Millions times.

ក្រសួងពាណិជ្ជកម្ម៖ ប្រេងឥន្ធនៈត្រូវលក់ ផ្តល់អាទិភាពជូនសេវាសាធារណៈ និងកសិករ

Vin Chang — Tue, 10 Mar 2026 03:50:35 +0000

នៅព្រឹកនេះ ក្រសួងពាណិជ្ជកម្មបានគូសបញ្ជាក់ពីការលក់ប្រេងឥន្ធនៈត្រូវផ្ដល់អាទិភាពដល់សេវាសាធារណៈជាការចាំបាច់ និងកសិករ បុគ្គលពាក់ព័ន្ធក្នុងខ្សែច្រវាក់ផលិត កម្ម និងភស្តុភាកម្ម។ យោងតាមសេចក្ដីណែនាំស្ដីពីការពង្រឹងអនុលោមភាពក្នុងការទិញ-លក់ប្រេងឥន្ធនៈ។

តាមដានជាមួយយើង៖ Million Times

ក្នុងសេចក្ដីណែនាំស្ដីពីការពង្រឹងអនុលោមភាពក្នុងការទិញ-លក់ប្រេងឥន្ធនៈ នៅតាមបណ្ដាស្ថានីយ និងដេប៉ូរបស់ក្រសួងពាណិជ្ជកម្មនៅថ្ងៃ ៩ ខែមីនា ឆ្នាំ ២០២៦ បានលើកឡើងថា ដើម្បីធានាបានតម្លាភាពនៃការផ្គត់ផ្គង់ និងការទិញ-លក់ប្រេងឥន្ធនៈនៅតាមស្ថានីយ និងដេប៉ូ ក្រសួងពាណិជ្ជកម្ម ដោយធ្វើការណែនាំដល់ក្រុមហ៊ុនចែកចាយ និងផ្គត់ផ្គង់ប្រេងឥន្ធនៈនៅតាមបណ្ដារាជធានី-ខេត្ត ត្រូវធ្វើការណែនាំដល់ស្ថានីយ និងដេប៉ូ នៅក្នុងបណ្ដាញចែកចាយរបស់ខ្លួន ឲ្យអនុវត្តយ៉ាងម៉ឺងម៉ាត់ក្នុងការគ្រប់គ្រងការទិញ-លក់ប្រេងឥន្ធនៈបានត្រឹមត្រូវទៅតាមបទដ្ឋាន បច្ចេកទេស និងបទបញ្ជាផ្ទៃក្នុងរបស់ក្រុមហ៊ុន ។

ក្រសួងពាណិជ្ជកម្មបានគូសបញ្ជាក់ និងណែនាំឲ្យស្ថានីយ និងដេប៉ូ ផ្តល់អាទិភាពផ្គត់ផ្គង់ប្រេងឥន្ធនៈដល់រថយន្តសង្គ្រោះបន្ទាន់ រថយន្តពន្លត់អគ្គិភ័យ និងរថយន្តបម្រើសេវាសាធារណៈ ជាដើម ព្រមទាំដល់ប្រជាកសិករ និងបុគ្គលពាក់ព័ន្ធក្នុងខ្សែច្រវាក់ផលិតកម្ម និងភស្តុភារកម្ម។

គួរបញ្ជាក់ផងដែរថា ជាង១ សប្ដាហ៍មកនេះ តម្លៃប្រេងនៅលើពិភពលោកបានហក់ឡើងថ្លៃ ដោយសារសង្គ្រាមនៅអ៊ីរ៉ង់ ជាមួយអាមេរិក និងអ៊ីស្រាអែល។ តែនៅព្រឹកនេះតម្លៃប្រេងចុះក្រោម ៩០ ដុល្លារ/បារ៉ែល បន្ទាប់លោកប្រធានាធិបតីអាមេរិក ដូណាល់ ត្រាំ ប្រកាសថា សង្គ្រាមនៅអ៊ីរ៉ង់ជិតបញ្ចប់ហើយ៕

អត្ថបទ៖ ឆដា, រូបភាព៖ ក្រសួងពាណិជ្ជកម្ម

The post ក្រសួងពាណិជ្ជកម្ម៖ ប្រេងឥន្ធនៈត្រូវលក់ ផ្តល់អាទិភាពជូនសេវាសាធារណៈ និងកសិករ appeared first on Millions times.

ក្រសួងអំពាវនាវអ្នកប្រើប្រាស់ និងម្ចាស់ស្ថានីយអនុវត្តតាមស្តង់ដាបច្ចេកទេសលក់ និងស្តុកទុកប្រេង

Virak វីរៈ — Fri, 06 Mar 2026 12:14:44 +0000

ក្រសួងពាណិជ្ជកម្ម បានអំពាវនាវដល់អ្នកប្រើប្រាស់ និងម្ចាស់ស្ថានីយលក់ប្រេងឥន្ធនៈទាំងអស់ ត្រូវអនុវត្តតាមលក្ខណៈស្តង់ដាបច្ចេកទេសនៃការលក់ ការស្តុកទុកប្រេងឥន្ធនៈ។

តាមដានជាមួយយើង៖ Million Times

តាមរយៈសេចក្ដីជូនដំណឹងរបស់ក្រសួងពាណិជ្ជកម្ម នៅល្ងាចថ្ងៃទី៦ ខែមីនានេះ បានឱ្យដឹងថា ដើម្បីធានាបាននូវការគ្រប់គ្រងហានិភ័យនៃការទិញ-លក់ និងសន្តិសុខ-សុវត្ថិភាពរបស់អ្នកប្រើប្រាស់ ដែលអាចកើតឡើងពីការស្តុកប្រេងឥន្ធនៈ ដោយមិនសមស្របតាមលក្ខណៈស្តង់ដាបច្ចេកទេស ហើយធានាបាននូវនិរន្តរភាពនៃការផ្គត់ផ្គង់ប្រេងឥន្ធនៈនៅតាមស្ថានីយ ក្រសួងពាណិជ្ជកម្ម បានអំពាវនាវដល់អ្នកប្រើប្រាស់ និងម្ចាស់ស្ថានីយលក់ប្រេងឥន្ធនៈទាំងអស់ ត្រូវអនុវត្តតាមលក្ខណៈស្តង់ដាបច្ចេកទេសនៃការលក់ ការស្តុកទុក និងការអនុវត្តឱ្យល្អស្របតាមស្តង់ដា និងក្រមប្រតិបត្តិដែលស្ថានីយលក់ប្រេងឥន្ធនៈជាទូទៅបានអនុវត្ត និងគ្រប់គ្រងហានិភ័យល្អកន្លងមក។

ក្រសួងពាណិជ្ជកម្ម ក៏បានលើកទឹកចិត្តដល់ប្រជាពលរដ្ឋទាំងអស់ចូលរួមអនុវត្ត និងយោគយល់ចំពោះស្ថានីយលក់ប្រេងឥន្ធនៈ ដែលបានខិតខំប្រឹងប្រែងគ្រប់គ្រងហានិភ័យ និងចូលរួមសន្សំសំចៃក្នុងការប្រើប្រាស់ប្រេងឥន្ធនៈ ព្រមទាំងចៀសវាងការសម្រុកទិញប្រេងឥន្ធនៈស្តុកទុកលើសពីតម្រូវការចាំបាច់ ដែលអាចបង្កឱ្យមានហានិភ័យឆាបឆេះ និងប៉ះពាល់ដល់ទ្រព្យសម្បត្តិ និងការរស់នៅរបស់ប្រជាពលរដ្ឋនៅក្នុងមូលដ្ឋាន។

ក្រសួងពាណិជ្ជកម្ម បានបញ្ជាក់ថា មន្ត្រីជំនាញរបស់អគ្គនាយកដ្ឋានកិច្ចការពារអ្នកប្រើប្រាស់ និងការប្រកួតប្រជែង នៃក្រសួងពាណិជ្ជកម្ម និងមន្ទីរពាណិជ្ជកម្ម រួមទាំងមន្ទីររ៉ែ និងថាមពល រាជធានី-ខេត្ត បាននឹងកំពុងបន្តចុះតាមដាន-ត្រួតពិនិត្យការលក់ជាប្រចាំ ដើម្បីធានាការលក់និងជំរុញឱ្យស្ថានីយប្រេងឥន្ធនៈអនុវត្តឱ្យបានគត់មត់តាមលក្ខណៈស្តង់ដាបច្ចេកទេស និងបង្ការការឆ្លៀតឱកាសដំឡើងថ្លៃប្រេងឥន្ធនៈខុសប្រក្រតីជាដើម៕

អត្ថបទ៖ វីរៈ រូបភាព៖ បណ្ដាញសង្គម

The post ក្រសួងអំពាវនាវអ្នកប្រើប្រាស់ និងម្ចាស់ស្ថានីយអនុវត្តតាមស្តង់ដាបច្ចេកទេសលក់ និងស្តុកទុកប្រេង appeared first on Millions times.

រដ្ឋមន្ត្រីពាណិជ្ជកម្ម៖ ដំឡូងមីនៅតែជាដំណាំយុទ្ធសាស្ត្រមួយប្រកបដោយសក្តានុពលខ្ពស់

Virak វីរៈ — Sat, 28 Feb 2026 06:51:08 +0000

លោកជំទាវ ចម និម្មល រដ្ឋមន្ត្រីក្រសួងពាណិជ្ជកម្ម បានលើកឡើងថា ដំឡូងមីនៅតែជាដំណាំយុទ្ធសាស្ត្រមួយប្រកបដោយសក្តានុពលខ្ពស់ ដែលចូលរួមចំណែកក្នុងការជំរុញកំណើនសេដ្ឋកិច្ចជាតិ។

តាមដានជាមួយយើង៖ Million Times

ការលើកឡើងនេះ ស្របពេលលោកជំទាវរដ្ឋមន្ត្រីពាណិជ្ជកម្ម បានអញ្ជើញជាអធិបតីក្នុងពិធីដាក់ឱ្យអនុវត្ត និងផ្សព្វផ្សាយសេចក្តីណែនាំស្តីពីការទិញ-លក់ដំទ្បូងមីស្រស់ និងចំណិតក្រៀម កាលពីថ្ងៃទី២៦ ខែកុម្ភៈ។

នៅក្នុងឱកាសនោះ លោកជំទាវ ចម និម្មល បានលើកឡើងថា ដំឡូងមីនៅតែជាដំណាំយុទ្ធសាស្ត្រមួយប្រកបដោយសក្តានុពលខ្ពស់ ដែលបានចូលរួមចំណែកយ៉ាងសំខាន់ ក្នុងការជំរុញកំណើនសេដ្ឋកិច្ចជាតិ ដែលកន្លងទៅរាជរដ្ឋាភិបាល បានប្រកាសដាក់ឱ្យប្រើប្រាស់គោលនយោបាយជាតិ ស្តីពី ដំឡូងមី ២០២០-២០២៥។

កាលពីពេលថ្មីៗនេះ រាជរដ្ឋាភិបាល ក៏បានផ្តល់ការឯកភាពជាគោលការណ៍អនុញ្ញាតឱ្យក្រសួងពាណិជ្ជកម្ម បន្តដឹកនាំរៀបចំគោលនយោបាយជាតិ ស្តីពី ដំទ្បូងមីដំណាក់កាលទី២ សម្រាប់រយៈពេល ៥ឆ្នាំបន្ត ក្នុងគោលបំណងធ្វើឱ្យកម្ពុជា ក្លាយជាអ្នកផ្គត់ផ្គង់ផលិតផលដំទ្បូងមីដែលអាចជឿទុកចិត្តបាន សម្រាប់ទីផ្សារពិភពលោក ក្នុងចំណោមគោលបំណងសំខាន់ៗដទៃទៀត។

ជាមួយគ្នានេះដែរ លោកជំទាវរដ្ឋមន្រ្តី ក៏បានជម្រាបជូនអំពីកិច្ចខិតខំប្រឹងប្រែងរបស់រាជរដ្ឋាភិបាល ជាពិសេសក្រសួងពាណិជ្ជកម្ម ក្នុងការជំរុញការនាំចេញដំទ្បូងមី តាមរយៈការដាក់ចេញនិងអនុវត្តនូវវិធានការសំខាន់ៗ ដូចជា៖ ការសម្របសម្រួលបង្កើតសហព័ន្ធដំឡូងមីកម្ពុជា និងសមាគមសម្ព័ន្ធដំឡូងមីកម្ពុជា-ចិន ដើម្បីប្រមូលផ្តុំលទ្ធភាពផ្គត់ផ្គង់និងជំរុញការទិញ-លក់ដំឡូងមី និងអភិវឌ្ឍសមត្ថភាពវិស័យឯកជន។

លោកជំទាវ ចម និម្មល បានបន្ថែមទៀតថា រាជរដ្ឋាភិបាល ដែលមានក្រសួងពាណិជ្ជកម្មជាសេនាធិការ ក៏បានដាក់ឱ្យប្រើប្រាស់ថ្នាលព័ត៌មានកិច្ចព្រមព្រៀងពាណិជ្ជកម្មសេរី, ការបង្កើតក្រុមការងារជំរុញការនាំចេញ និងការសម្របសម្រួលចុះអនុស្សរណៈ នៃការយោគយល់គ្នានិងកិច្ចសន្យាទិញ-លក់ដំឡូងមី ដើម្បីនាំចេញទៅទីផ្សារក្រៅប្រទេស, ការបង្កើតក្រុមការងារកិច្ចសម្រួលពាណិជ្ជកម្មលើការទិញ-លក់ដំទ្បូងមី ក៏ដូចជាការដាក់ឱ្យអនុវត្តនូវ “សេចក្តីណែនាំស្តីពីការទិញ-លក់ដំឡូងមីស្រស់និងចំណិតក្រៀម” នេះ ជាដើម៕

អត្ថបទ៖ វីរៈ រូបភាព៖ ក្រសួងពាណិជ្ជកម្ម

The post រដ្ឋមន្ត្រីពាណិជ្ជកម្ម៖ ដំឡូងមីនៅតែជាដំណាំយុទ្ធសាស្ត្រមួយប្រកបដោយសក្តានុពលខ្ពស់ appeared first on Millions times.

ពិព័រណ៍ផលិតផលខ្មែរ និងបន្លែផ្លែឈើលើកទី១៩ ធ្វើឡើងនៅខេត្តសៀមរាប ដោយមានស្តង់ចំនួន ១១០

Virak វីរៈ — Fri, 27 Feb 2026 04:03:41 +0000

ពិព័រណ៍ផលិតផលខ្មែរ និងបន្លែផ្លែឈើលើកទី១៩ ឆ្នាំ២០២៦ ក្រោមមូលបទ «ជំរុញ និងគាំទ្រផលិតផលជាតិ» ត្រូវបានរៀបចំឡើងនៅខេត្តសៀមរាប ដោយមានស្តង់ដាក់តាំងបង្ហាញផលិតផល និងបន្លែផ្លែឈើជាង ១១០ស្តង់។ ពិធីបើកដំណើរការពិព័រណ៍នេះ បានធ្វើឡើងកាលពីរសៀលថ្ងៃទី២៦ ខែកុម្ភៈ ក្រោមអធិបតីភាពឯកឧត្តម សំហេង បូរ៉ា រដ្ឋលេខាធិការក្រសួងពាណិជ្ជកម្ម។

តាមដានជាមួយយើង៖ Million Times

ឯកឧត្តម សំហេង បូរ៉ា បានលើកឡើងថា ការរៀបចំព្រឹត្តិការណ៍ពិព័រណ៍នេះ គឺពិតជាមានសារៈសំខាន់ណាស់ក្នុងការចូលរួមលើកកម្ពស់ផលិតជាតិ #MadeInCambodia ឱ្យមានការប្រើប្រាស់កាន់តែច្រើនឡើង ព្រមទាំងបង្កើនការទាក់ទាញភ្ញៀវទេសចរជាតិ និងអន្តរជាតិឱ្យបានស្គាល់កាន់តែច្បាស់ពីផលិតផលខ្មែរ។

ម្យ៉ាងទៀត ពិព័រណ៍នេះ បានផ្តល់ជាវេទិកាសម្រាប់អាជីវករ ពាណិជ្ជករ ប្រតិបត្តិករ សេវាករ អ្នកនាំចេញ-នាំចូល អ្នកដាំដុះបន្លែផ្លែឈើ ម្ចាស់កសិដ្ឋានទាំងអស់ អាចដាក់តាំងបង្ហាញ ផ្សព្វផ្សាយ និងលក់នូវផលិតផលខ្មែរ ផលិតដោយកូនខ្មែរ ប្រកបដោយគុណភាព សោភ័ណភាព និងអនាម័យ ទៅកាន់សាធារណជន ផងដែរ។

ឯកឧត្តមរដ្ឋលេខាធិការ បានឱ្យដឹងដែរថា ដើម្បីលើកកម្ពស់ និងជំរុញការគាំទ្រ និងប្រើប្រាស់ផលិតផលជាតិ កាលពីថ្ងៃទី១៤ ខែកុម្ភៈ ឆ្នាំ២០២៦កន្លងទៅនេះ ក្រសួងពាណិជ្ជកម្ម បានផ្តួចផ្តើម និងសម្ពោធ “យុទ្ធនាការផលិតផលជាតិ #MadeInCambodia” ទូទាំងប្រទេស ដែលយុទ្ធនាការនេះនឹងប្រព្រឹត្តទៅក្នុងរយៈពេល ១សប្តាហ៍ ក្នុង១ខែ មានរយៈពេលមួយឆ្នាំពេញ ដោយផ្សារទំនើប ម៉ល ម៉ាត និងមីនីម៉ាតនៅទូទាំងរាជធានី-ខេត្ត នឹងចូលរួមរៀបចំតុបតែងធ្នើរដាក់តាំងលក់ផលិតផលជាតិឱ្យកាន់តែមានភាពទាក់ទាញ និងលេចធ្លោផងដែរ។

បើតាមឯកឧត្តមរដ្ឋលេខាធិការ ក្នុងនាមជាសេនាធិការរបស់រាជរដ្ឋាភិបាលកម្ពុជា ក្រសួងពាណិជ្ជកម្ម បានបន្តខិតខំប្រឹងប្រែងអនុវត្តនូវតួនាទីភារកិច្ច និងបេសកកម្មរបស់ខ្លួនយ៉ាងយកចិត្តទុកដាក់ ដើម្បីធ្វើឱ្យប្រសើរឡើងនូវបរិយាកាសធុរកិច្ចដល់ធុរជន និងវិនិយោគិននៅកម្ពុជា សំដៅជំរុញកំណើនសេដ្ឋកិច្ចជាតិ ស្របតាមចក្ខុវិស័យកម្ពុជាឆ្នាំ២០៥០ របស់រាជរដ្ឋាភិបាលនីតិកាលទី៧ នៃរដ្ឋសភា។

សូមជម្រាបថា ពិព័រណ៍នេះមានក្រុមហ៊ុន សហគ្រាស អាជីវករ ផលិតផលករ សហគមន៍ អ្នកដាំដុះ ចូលរួមចំនួន ៩២ និងមានស្តង់ចំនួន ១១០ស្តង់ ដោយចាប់ផ្ដើមដំណើរការចាប់ពីថ្ងៃទី២៦ ខែកុម្ភៈ ដល់ថ្ងៃទី១ ខែមីនា ឆ្នាំ២០២៦៕

អត្ថបទ៖ វីរៈ រូបភាព៖ ក្រសួងពាណិជ្ជកម្ម

The post ពិព័រណ៍ផលិតផលខ្មែរ និងបន្លែផ្លែឈើលើកទី១៩ ធ្វើឡើងនៅខេត្តសៀមរាប ដោយមានស្តង់ចំនួន ១១០ appeared first on Millions times.

ក្រសួងពាណិជ្ជកម្ម Archives - Millions times

ក្នុងត្រីមាសទី១ ឆ្នាំ ២០២៦ ពាណិជ្ជកម្មកម្ពុជា-សិង្ហបុរី កើនជិត ២០០%

សិង្ហបុរីចាត់ទុកកម្ពុជា ជាដៃគូយុទ្ធសាស្ត្រក្នុងការធ្វើពិពិធកម្មប្រភពផ្គត់ផ្គង់កសិ-ចំណីអាហារ

ឆ្នាំ ២០២០-២០២៥ ដំណាំដំឡូងមី មានការកើនឡើងយ៉ាងខ្លាំង

លោកស្រី ចម និម្មល អនុញ្ញាតគណៈប្រតិភូសមាគមវាយនភណ្ឌ ​ចូលជួបពិភាក្សាការងារ

ក្រសួងពាណិជ្ជកម្ម៖ ប្រេងឥន្ធនៈត្រូវលក់ ផ្តល់អាទិភាពជូនសេវាសាធារណៈ និងកសិករ

ក្រសួងអំពាវនាវអ្នកប្រើប្រាស់ និងម្ចាស់ស្ថានីយអនុវត្តតាមស្តង់ដាបច្ចេកទេសលក់ និងស្តុកទុកប្រេង

រដ្ឋមន្ត្រីពាណិជ្ជកម្ម៖ ដំឡូងមីនៅតែជាដំណាំយុទ្ធសាស្ត្រមួយប្រកបដោយសក្តានុពលខ្ពស់

ពិព័រណ៍ផលិតផលខ្មែរ និងបន្លែផ្លែឈើលើកទី១៩ ធ្វើឡើងនៅខេត្តសៀមរាប ដោយមានស្តង់ចំនួន ១១០

លោកស្រី ចម និម្មល អនុញ្ញាតគណៈប្រតិភូសមាគមវាយនភណ្ឌ ចូលជួបពិភាក្សាការងារ