អ្នកជំនាញអចលនទ្រព្យដ៏ចំណាន និងជាប្រធានក្រុមប្រឹក្សាភិបាលសម្ព័ន្ធក្រុមហ៊ុនSAM SN Group អ្នកឧកញ៉ា សំ សុខនឿន បានលើកឡើងថា រដ្ឋាភិបាលគួរពន្យារពេលការយកពន្ធមូលធន លើអចលនទ្រព្យ ដោយរង់ចាំឲ្យទីផ្សារនេះ មានភាពល្អប្រសើរឡើងវិញ។
Million Times 
អ្នកឧកញ៉ា សំ សុខនឿន លើកឡើងបញ្ហានេះ ក្រោយពេលអគ្គនាយកដ្ឋានពន្ធដារ បានចេញ សេចក្ដីជូនដំណឹង ពាក់ព័ន្ធ ពន្ធលើចំណេញមូលធន ២០ ភាគរយ ដែលនឹងត្រូវអនុវត្តចាប់ពីដើមឆ្នាំ ២០២៦ ទៅ។
ពន្ធលើចំណេញមូលធន ២០ ភាគរយចំពោះទ្រព្យទាំង ៦ ប្រភេទរួមមាន ភតិសន្យា, ទ្រព្យវិនិយោគ កេរ្តិ៍ឈ្មោះអាជីវកម្ម, កម្មសិទ្ធិបញ្ញា, រូបិយប័ណ្ណបរទេស និងអចលនទ្រព្យ ដែលនឹងត្រូវចាប់ផ្តើមអនុវត្តដំណាលគ្នា ពីថ្ងៃទី១ ខែមករា ឆ្នាំ ២០២៦ ខាងមុខ ស្របតាមការសម្រេចរបស់រាជរដ្ឋាភិបាលកន្លងទៅ។ នេះបើតាមសេចក្ដីជូនដំណឹងពីអគ្គនាយកដ្ឋានពន្ធដារ កាលពីថ្ងៃ ៣០ ខែតុលា ឆ្នាំ ២០២៥។
ក្នុងនាមជាអ្នកជំនាញអចលនទ្រព្យដែលមានកេរ្តិ៍ឈ្មោះ និងបទពិសោធន៍ជោកជាំក្នុងវិស័យមួយនេះ មើលឃើញថា ការយកពន្ធលើចំណេញមូលធន ២០ ភាគរយចំពោះទ្រព្យទាំង ៦ នោះ គួរតែពន្យារពេលបន្តិចទៀតសិន។
អ្នកឧកញ៉ា បានថ្លែងមកកាន់ Million Times ថា “រាជរដ្ឋាភិបាលគួរពន្យារពេលលើការយកពន្ធមូលធនលើការទិញលក់អចលនទ្រព្យ ខណៈវិស័យអចលនវត្ថុនៅមិនទាន់មានភាពប្រាកដប្រជា ឬមិនទាន់ឡើងផុតពីភាពជាប់គាំងនៅឡើយ”៕
អត្ថបទ៖ ឆដា, រូបភាព៖ ផ្ដល់ឲ្យ