ត្រឹមដំណាច់ឆ្នាំ ២០២៤ កម្ចីទិញផ្ទះកើនជិតដល់ ៨ ពាន់​លាន​ដុល្លារ

តាម​របាយការណ៍​របស់​ក្រុមហ៊ុន​ការិយាល័យ​ឥណទាន​កម្ពុជា ហៅ​កាត់​ថា (CBC ) ចេញ​ផ្សាយ​នៅ​ថ្ងៃ ៣០ ខែ​មករា ឆ្នាំ ២០២៥ កម្ចី​ទិញ​ផ្ទះ​តាម​ប្រព័ន្ធ​ធនាគារ និង​ហិរញ្ញវត្ថុ​បាន​កើន​ឡើង​ជិត​ដល់ ៨​ពាន់​លាន​ដុល្លារ នៅ​ត្រឹម​ដំណាច់​ឆ្នាំ ២០២៤។

តាមដានជាមួយយើង៖ Million Times

នៅ​ដំណាច់​ឆ្នាំ ២០២៤ កន្លង​ទៅ​ ទំហំ​ឥណទាន​ដែល​គ្រឹះស្ថាន​ធនាគារ និង​ហិរញ្ញវត្ថុ​បាន​ផ្ដល់​ជូន​អតិថិជន​​របស់​ខ្លួន​ជា​ឥណទាន​លក្ខណៈ​បុគ្គល សម្រាប់​ប្រើប្រាស់​ផ្ទាល់​ខ្លួន​មាន ១៥,៥៣ ពាន់​លាន​ដុល្លារ ក្នុង​នោះ​ឥណទាន​ទិញ​ផ្ទះ​មាន​ប្រមាណ ៥១,២៥ ភាគរយ ឬ​ប្រមាណ ៧,៩៥ ពាន់​លាន​ដុល្លារ។ ក្រៅពីនោះ​នៅ​មាន​កម្ចី​សម្រាប់​ប្រើ​ប្រាស់​ផ្ទាល់ខ្លួន ៤៧,៣៦ ភាគរយ ប្រមាណ​ជា ៧,២២ ពាន់​លានដុល្លារ។

តាម​របាយការណ៍​ដដែល​នោះ ក៏​បាន​ឲ្យ​ដឹង​ផង​​បន្ត​ទៀត​​ថា នៅ​ដំណាច់​ឆ្នាំ ២០២៤​ ចំនួន​គណនី​ឥណទាន​លក្ខណៈ​បុគ្គល​មាន ២,០៤ លាន​គណនី ហើយ​ក្នុង​នោះ​ឥណទាន ប្រើ​សម្រាប់​ទិញ​ផ្ទះ​មាន ១០,០១ ភាគរយ​ ដែល​ស្មើនឹង​ប្រមាណ​ជាង ២០ ម៉ឺន​គណនី។ ដោយឡែក​ឥណទាន​សម្រាប់​ប្រើប្រាស់​ផ្ទាល់​ខ្លួន​មាន​រហូត​ដល់ ៨១,៩៣ ភាគ​រយ ឬ​ប្រមាណ ១,៦៧ លាន​គណនី។

កាលពី​ដើម​ខែ​មករា ឆ្នាំ ២០២៥ កន្លង​ទៅ​ថ្មី​ៗ​នេះ លោក សាយ​សំអាល់ រដ្ឋមន្ត្រី​ក្រសួង​រៀបចំ​ដែន​ដី នគរូប​នីយកម្ម និង​សំណង់ បាន​ប្រជុំ​ជាមួយ​អគ្គ​ទេសាភិបាល​ធនាគារ​ជាតិ​នៃ​កម្ពុជា​លោកស្រី ជា សិរី ព្រម​ជាមួយ​អ្នក​មកពី​ខាង​វិស័យ​អចលនទ្រព្យ និង​តំណាង​គ្រឹះស្ថាន​ធនាគារ និង​ហិរញ្ញវត្ថុ ដើម្បីឲ្យ​អ្នក​ខ្ចីប្រាក់​​ពី​បុរី​ក្នុង​អាត្រាការ​ប្រាក់​ខ្ពស់ អាច​ផ្ទេរ​បំណុល​ទៅ​គ្រឹះស្ថាន​ធនាគារ​វិញ​ក្នុង​អាត្រា​ការ​ប្រាក់​ទាប៕

អត្ថបទ៖ មេរ៉ា៖ រូបភាព៖ Internet