ក្រោយដើរចេញពីជួររដ្ឋបាលប្រធានាធិបតី Donald Trump មហាសេដ្ឋី Elon Musk បានបង្ហោះសារលើបណ្ដាញសង្គម រិះគន់ចំពោះផែនការពន្ធគយរបស់រដ្ឋាភិបាល និងបានបង្កជាជម្លោះពាក្យសម្ដីលើបណ្ដាញអ៊ីនធឺណិត រវាងមេដឹកនាំអាមេរិក និងកំពូលមហាសេដ្ឋីរូបនេះ។
ជម្លោះរវាងលោក Trump និងលោក Musk បានធ្វើឲ្យក្រុមហ៊ុន Tesla រងការខាតបង់ជាទម្ងន់ ដោយនៅថ្ងៃទី០៥ ខែមិថុនា តម្លៃហ៊ុនរបស់ Tesla បានធ្លាក់រហូតដល់ ១៤% និងធ្វើឲ្យក្រុមហ៊ុនបាត់បង់មូលធនទីផ្សារដល់ទៅ ១៥០ពាន់លានដុល្លារឯណោះ។ នេះបើតាមការចុះផ្សាយពីសារព័ត៌មាន Reuters។
Million Times 
មហាសេដ្ឋី Elon Musk បានរិះគន់យ៉ាងខ្លាំងចំពោះផែនការពន្ធគយរបស់លោក Trump ជាពិសេសគឺកញ្ចប់ចំណាយ ដែលប្រធានាធិបតីអាមេរិក កំពុងស្នើសុំការអនុញ្ញាតពីសភា។ មេធំ Tesla អះអាងថា ការចំណាយរបស់រដ្ឋបាលលោក Trump មានចំនួនច្រើនលើសលុប និងមិនខ្វល់ពីកិច្ចខិតខំប្រឹងប្រែងរបស់ខ្លួន ដែលព្យាយាមជួយសន្សំសំចៃគ្រប់បែបយ៉ាង។
លោក Donald Trump ក៏បានសរសេរសារឆ្លើយតបវិញថា ការរិះគន់របស់ Elon Musk កើតឡើងដោយសារផែនការពន្ធគយរបស់លោក នឹងធ្វើឲ្យក្រុមហ៊ុនរថយន្តអគ្គិសនីខាតបង់ផលប្រយោជន៍មួយចំនួនធំ ដូច្នេះហើយទើប Elon Musk មិនឯកភាព និងរិះគន់ខ្លាំងចំពោះរដ្ឋបាលខ្លួន៕
អត្ថបទ៖ Luffy រូបភាព៖ NBC