ទីភ្នាក់ងារសារព័ត៌មាន Yonhap បានរាយការណ៍ថា យន្តហោះដឹកមនុស្ស ១៨១នាក់ បានធ្លាក់នៅអាកាសយានដ្ឋានក្នុងប្រទេសកូរ៉េខាងត្បូង ដោយបានសម្លាប់មនុស្សយ៉ាងហោចណាស់ ២៨នាក់។

ទីភ្នាក់ងារសារព័ត៌មានកូរ៉េខាងត្បូងបានរាយការណ៍ថា យន្តហោះបានធ្លាក់ចេញពីផ្លូវរត់ ហើយបានធ្លាក់ចូលទៅក្នុងជញ្ជាំងនៅអាកាសយានដ្ឋានអន្តរជាតិ Muan ភាគនិរតីនៃប្រទេស។ យន្តហោះ Jeju Air ដែលដឹកអ្នកដំណើរ ១៧៥នាក់ និងអ្នកបម្រើលើយន្តហោះ ៦នាក់ បានហោះត្រឡប់ពីទីក្រុងបាងកក ក្នុងប្រទេសថៃ ហើយគ្រោះថ្នាក់បានកើតឡើងខណៈពេលដែលពុងចុះចត។

មន្ត្រីពន្លត់អគ្គីភ័យម្នាក់បានប្រាប់ទីភ្នាក់ងារសារព័ត៌មាន រ៉យទ័រថា មនុស្សពីរនាក់ត្រូវបានរកឃើញនៅរស់ ហើយប្រតិបត្តិការជួយសង្គ្រោះកំពុងដំណើរការនៅឡើយ។ មន្ត្រីអាកាសយានដ្ឋានបាននិយាយថា សេវាសង្គ្រោះបន្ទាន់កំពុងព្យាយាមជួយសង្គ្រោះមនុស្សនៅក្នុងផ្នែកកន្ទុយនៃយន្តហោះ។

សារព័ត៌មាន Yonhap រាយការណ៍ថា មូលហេតុនៃការធ្លាក់យន្តហោះនេះ មិនទាន់ច្បាស់នៅឡើយទេ ប៉ុន្តែការវាយប្រហាររបស់បក្សីអាចបណ្តាលឱ្យឧបករណ៍ចុះចតមិនដំណើរការ។ វីដេអូដែលបានបង្ហោះចូលទៅក្នុងប្រព័ន្ធផ្សព្វផ្សាយសង្គមបង្ហាញថា យន្តហោះបានរអិលចេញពីផ្លូវរត់ ហើយធ្លាក់ចូលទៅក្នុងជញ្ជាំង មុនពេលដែលផ្នែករបស់វាផ្ទុះឆេះ។ វីដេអូផ្សេងទៀតបង្ហាញពីផ្សែងខ្មៅដ៏ធំមួយដែលហក់ឡើងលើមេឃ៕

អត្ថបទ៖ សារ៉ាយ រូបភាព៖ Yonhap