លោក សុខ សប្បាយណា សមាជិកគណ:កម្មាការរៀបចំព្រឹត្តិការណ៍ «សាទរកម្ពុជា» បានលើកឡើងថា ព្រឹត្តិការណ៍ «សាទរកម្ពុជា» គឺជាការសាទរគុណតម្លៃរួមគ្នា ដើម្បីបង្ហាញមោទនភាព ចំពោះសមិទ្ធផលនៃការអភិវឌ្ឍនសង្គមសេដ្ឋកិច្ចកម្ពុជា ជាមួយការរក្សាបាននូវអត្តសញ្ញាណនៃប្រជាជាតិ និងប្រជាជន ក៏ដូចជាការអបអរសាទរដល់ការរួមរស់ជាមួយមហាគ្រួសារខ្មែរតែមួយ។

ក្នុងសន្និសីទសារព័ត៌មានស្តីពីការត្រៀមរៀបចំព្រឹត្តិការណ៍ «សាទរកម្ពុជា» កាលថ្ងៃទី១៩ ខែធ្នូ ឆ្នាំ២០២៤ នៅមជ្ឍមណ្ឌលម៉ានី នៃអាគារ The Kampus លោក សុខ សប្បាយណា បានលើកឡើងថា «សាទរកម្ពុជា» គឺដើម្បីផ្សារភ្ជាប់ប្រជាជនទៅសង្គមជាតិទាំងមូលក្នុងគោលបំណងបង្ហាញក្នុងនាមជាប្រជាជាតិដែលមានអាយុកាលដ៏យូរលង់ នៅថ្ងៃនេះកម្ពុជាកំពុងឈរដោយមោទនភាព ពោរពេញ ដោយក្តីសង្ឃឹម និងមានភាពជឿជាក់ រួមគ្នាឆ្ពោះទៅកាន់អនាគតដ៏រុងរឿងរបស់ជាតិយើង។ 

លោកបន្តថា «សាទរកម្ពុជា» ក៏ផ្តល់ជាវេទិកា និងឱកាសដល់គ្រប់កោសិកា គ្រប់សហគមន៍ និងមជ្ឈដ្ឋានផ្សេងៗនៃសង្គម បង្ហាញនូវមោទនភាព ចំពោះអត្តសញ្ញាណរបស់ខ្លួន និងជាពិសេសចំពោះអត្តសញ្ញាណជាតិជារួម ដែលជាអ្វីធ្វើឱ្យខ្លួនយើងមានមោទនភាព ក្នុងនាមជាខ្មែរ ក្រោមទង់នៃ «ព្រះរាជាណាចក្រកម្ពុជា» ដោយការរួបរួម សាមគ្គី ឯកភាព ទៅជាកម្លាំងជាតិតែមួយ និង បង្កើនមនោសញ្ចេតនារវាងប្រជាជននៃប្រជាជាតិកម្ពុជា ទោះនៅក្នុងប្រទេស ឬនៅឯនាយសមុទ្រ ក្នុងការអបអរសាទរក្នុងនាមជាមហាគ្រួសារខ្មែរតែមួយ នៅក្រោមទង់ជាតិតែមួយហើយដែលមានអនាគតតែមួយដើម្បីកម្ពុជា។

លោកថ្លែងថា «ដោយសារតែកើតចេញពីការស្រមៃថា នៅថ្ងៃណាមួយរូបភាពពីរាជធានីភ្នំពេញ នឹងមានវត្តមានប្រកួតប្រជែងជាមួយទីក្រុងដទៃទៀត នូវព្រឹត្តិការណ៍ដែលរៀបចំនូវវេលាឆ្លងឆ្នាំសកល ហើយដែលពិភពលោកនឹងស្គាល់ជាខេមរភាសារថា សាទរកម្ពុជា ឬ Celebrating cambodia ខណៈដែលប្រសិនបើយើងក្រឡេកមើលរូបភាពទាំងឡាយ ដែលមាននៅលើបណ្តាញសង្គម ឬសាព័ត៍មានស្តីពីពិធីឆ្លងឆ្នាំសកលនៅទូរទាំងពិភពលោក យើងនឹងឃើញរូបភាពស្អាតៗពីបណ្តាទីក្រុងល្បីៗរួមជាមួយភាពប្លែកៗគ្នានៃការរៀបចំព្រឹត្តិការណ៍»។

ព្រឹត្តិការណ៍ «សាទរកម្ពុជា» នឹងមានក្បួនដង្ហែដ៏ធំមានទាំងនូវផែនល្ខោងបាសាក់ តួយក្សចំនួន ២០០នាក់ ទីងមោងជិត១០០ ស្គរទម្ងន់ ៣តោន គោមយក្ស និងតុក្កតាយក្សផងដែរ ដែលគ្រោងនឹងប្រព្រឹត្តិនៅថ្ងៃទី៣១ ខែធ្នូ ឆ្នាំ២០២៤ នៅបរិវេណសួនមុខព្រះបរមរាជវាំង តាមបណ្តោយមហាវិថីព្រះសុីសុវត្ថិ ចំពោះកម្មវិធីនឹងចាប់ផ្តើមនៅម៉ោង ៣៖០០នាទីរសៀលរហូតដល់ម៉ោង ១៖០០ នាទីទៀបភ្លឺ។

សូមជម្រាបថា សហភាពសហព័ន្ធយុវជនកម្ពុជា បានផ្តួចផ្តើមរៀបចំព្រឹត្តិការណ៍ «សាទរកម្ពុជា» ដើម្បីផ្តល់ឱកាសនៃការជួបជុំប្រជាពលរដ្ឋខ្មែរដើម្បីសាទរនូវ សមិទ្ធផលទាំងឡាយដែលប្រទេសជាតិយើងសម្រេចបានជាច្រើនក្នុងដំណាក់កាលចុងក្រោយនៃប្រវត្តិសាស្រ្ត។ ព្រឹត្តិការណ៍នេះនឹងនាំមកនូវស្នាមញញឹម ភាពសប្បាយរីករាយ ការជួបជុំគ្នាជាលក្ខណៈមហាគ្រួសារខ្មែរនៅក្រោមទង់ជាតិតែមួយ៕

អត្ថបទ៖ សាងតេជៈ រូបភាព៖ សសយក