តម្លៃប្រេងលើពិភពលោក បានធ្លាក់ចុះមកក្រោម ៩០ ដុល្លារអាមេរិក ក្នុងមួយបារ៉ែល កាលពីយប់ថ្ងៃចន្ទ បន្ទាប់ពីប្រធានាធិបតីអាមេរិក លោក ដូណាល់ ត្រាំ បាននិយាយថា លោកគិតថា “សង្គ្រាមនៅអ៊ីរ៉ង់ ជិតបញ្ចប់ហើយ”។ នេះបើយោងតាមការចេញផ្សាយរបស់សារព័ត៌មាន CNA នៅថ្ងៃទី១០ ខែមីនា ឆ្នាំ២០២៦។
សង្គ្រាមដែលកំពុងរីករាលដាលនៅអ៊ីរ៉ង់ បានធ្វើឱ្យផលិតកម្មប្រេង និងការដឹកជញ្ជូននៅទូទាំងមជ្ឈិមបូព៌ាជួបបញ្ហា និងបង្កឱ្យការផ្គត់ផ្គង់ថាមពលទូទាំងពិភពលោកជួយផលលំបាក។
ការរំខានទាំងនោះបានបណ្តាលឱ្យប្រេងឡើងថ្លៃ នៅថ្ងៃចន្ទ (ថ្ងៃទី ៩ ខែមីនា) ប៉ុន្តែវាបានធ្លាក់ចុះយ៉ាងឆាប់រហ័ស បន្ទាប់ពីប្រធានាធិបតី ដូណាល់ ត្រាំ បានថ្លែងថា សង្គ្រាមអាចនឹងជិតដល់ទីបញ្ចប់។
Million Times 
តម្លៃប្រេងឆៅប្រភេទ Brent បានកើនឡើងដល់ ១១៩.៥០ ដុល្លារអាមេរិកក្នុងមួយបារ៉ែលនៅថ្ងៃចន្ទ ដែលជាកម្រិតខ្ពស់បំផុត បន្ទាប់ពីរុស្ស៊ីបានឈ្លានពានអ៊ុយក្រែនក្នុងឆ្នាំ ២០២២។ ប្រេងប្រភេទ West Texas Intermediate ដែលផលិតនៅសហរដ្ឋអាមេរិក ក៏បានកើនឡើងដល់ ១១៩.៤៨ ដុល្លារអាមេរិកក្នុងមួយបារ៉ែលនៅចំណុចមួយ។
ប៉ុន្តែតម្លៃទាំងនោះបានធ្លាក់ចុះមកក្រោម ៩០ ដុល្លារអាមេរិកនៅយប់ថ្ងៃចន្ទ ខណៈដែលទីផ្សារបានធ្វើឱ្យមានការផ្លាស់ប្តូរគួរឱ្យកត់សម្គាល់ បន្ទាប់ពីលោក Trump បានប្រាប់ CBS News ថា លោកគិតថា “សង្គ្រាមជិតបញ្ចប់ហើយ”។
យ៉ាងណាក៏ដោយ តម្លៃនេះខ្ពស់ជាងតម្លៃប្រេងឆៅប្រហែល ៧០ ដុល្លារក្នុងមួយបារ៉ែលដែលលក់បានមុនពេលសហរដ្ឋអាមេរិក និងអ៊ីស្រាអែលចាប់ផ្តើមសង្គ្រាមប្រឆាំងនឹងអ៊ីរ៉ង់នៅថ្ងៃទី ២៨ ខែកុម្ភៈ។
សង្គ្រាមនេះបានឈានដល់សប្តាហ៍ទីពីររបស់ខ្លួន កំពុងធ្វើឱ្យហេដ្ឋារចនាសម្ព័ន្ធសំខាន់ៗនៃការផលិត និងការដឹកជញ្ជូនប្រេង និងឧស្ម័នទូទាំងពិភពលោកជាប់គាំង ហើយកាលពីថ្ងៃចន្ទ អ៊ីរ៉ង់បានតែងតាំងលោក Ayatollah Mojtaba Khamenei ឱ្យឡើងជំនួសឪពុករបស់គាត់ជាមេដឹកនាំកំពូល ខណៈដែលសហរដ្ឋអាមេរិក និងអ៊ីស្រាអែលបន្តការទម្លាក់គ្រាប់បែកយ៉ាងខ្លាំង៕
អត្ថបទ៖ ប៊ី