អនុស្សរណៈនៃការយោគយល់គ្នា MoU ចំនួន២ ត្រូវបានចុះហត្ថលេខារវាងក្រុមប្រឹក្សាអភិវឌ្ឍន៍កម្ពុជា ជាមួយក្រុមអ្នកវិនិយោគហុងកុង នាព្រឹកថ្ងៃទី៣១ ខែកក្ដដា ឆ្នាំ២០២៤ ដែលចូលរួមធ្វើជាសាក្សីពីនាយករដ្ឋមន្រ្តីនៃកម្ពុជា និងប្រធានតំបន់រដ្ឋបាលពិសេសហុងកុង។
អនុស្សរណៈនៃការយោគយល់ចំនួន២ ដែលចុះហត្ថលេខារួមគ្នារវាងកម្ពុជា និងក្រុមអ្នកមាននៅហុងកុង រួមមាន៖ ១. កិច្ចសហប្រតិបត្តិការរវាងវិនិយោគហុងកុងនៃតំបន់រដ្ឋបាលពិសេសហុងកុង និងក្រុមប្រឹក្សាអភិវឌ្ឍន៍កម្ពុជា (CDC)។ ២. អនុស្សរណៈនៃការយោគយល់គ្នារវាងក្រុមប្រឹក្សាអភិវឌ្ឍន៍ពាណិជ្ជកម្មហុងកុង និងក្រុមប្រឹក្សាអភិវឌ្ឍន៍កម្ពុជា។
Million Times 
អនុស្សរណៈនៃការយោគយល់គ្នា ធ្វើឡើងក្នុងឪកាសដំណើរទស្សនកិច្ចរបស់លោក John Lee ប្រធានប្រតិបត្តិតំបន់រដ្ឋបាលពិសេសហុងកុង រយៈពេល ២ថ្ងៃ ចាប់ពីថ្ងៃទី៣០ ដល់ថ្ងៃទី៣១ ខែកក្កដា ឆ្នាំ២០២៤ ដើម្បីពង្រឹងទំនាក់ទំនង និងកិច្ចសហប្រតិបត្តិការនានា ជាពិសេសការធ្វើពាណិជ្ជកម្ម និងវិនិយោគ។
យោងតាមរបាយការណ៍គយ និងរដ្ឋករ ចិនគឺជាដៃគូពាណិជ្ជកម្មដ៏សំខាន់របស់កម្ពុជានៅឆ្នាំ២០២៣ ដោយទំហំពាណិជ្ជកម្មកម្ពុជា-ចិន មានជាង ១២ពាន់លានដុល្លារ ពោលកើនឡើង៥% ធៀបនឹងឆ្នាំ២០២២។ អាមេរិក ជាដៃគូសំខាន់ទី២ ដែលមានទំហំពាណិជ្ជកម្មជាង ៩ពាន់លានដុល្លារ ពោលធ្លាក់ចុះ ១,៤% ធៀបនឹងឆ្នាំ២០២២។
ក្រៅពីនេះ មានវៀតណាម ថៃ ជប៉ុន ឥណ្ឌូនេស៊ី អាល្លឺម៉ង់ កាណាដា និងប្រទេសមួយចំនួនទៀតសរុប២០ប្រទេស ដែលជាដៃគូពាណិជ្ជកម្មដ៏សំខាន់របស់កម្ពុជា ក្នុងនោះ មានការធ្លាក់ចុះខ្លាំងជាមួយប្រទេសជិតខាងថៃដល់ទៅ១៧% តែកើនជាមួយវៀតណាមជាង៧% ធៀបនឹងឆ្នាំ ២០២២៕
អត្ថបទ៖ សេដ្ឋានី រូបភាព៖ ក្រុមព័ត៌មានសម្តេចធិបតី