ឯកឧត្តម ឃួន ផុនរតនៈ ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង បានអនុញ្ញាតឱ្យលោក Park Hee Soo ប្រធានក្រុមប្រឹក្សាភិបាលក្រុមហ៊ុន Saemyeong Energy Tech ចូលជួបសម្ដែងការគួរសម និងពិភាក្សាការងារ នៅថ្ងៃទី៧ ខែមេសានេះ។
Million Times 
ក្នុងជំនួបនេះ លោក Park បានឱ្យដឹងថា លោកមានគម្រោងនាំយកបច្ចេកវិទ្យាផលិតជីសរីរាង្គឈានមុខគេរបស់កូរ៉េ ទៅចែករំលែកជូនដល់ប្រជាកសិករកម្ពុជា ដែលកំពុងប្រកបរបរដាំដុះដំណាំស្រូវ ពោត សណ្តែក និងដំណាំបន្លែ ផ្លែឈើផ្សេងៗទៀត។
លោក Park ចង់ឃើញផលិតផលកសិកម្មរបស់កម្ពុជា ក្លាយជាកសិផលសរីរាង្គលំដាប់ថ្នាក់អន្តរជាតិ ដើម្បីជួយបង្កើនជីវភាពរស់នៅរបស់ប្រជាជន ពិសេសប្រជាកសិករកម្ពុជា។
ជាការឆ្លើយតប ឯកឧត្តមឯកអគ្គរាជទូត បានស្វាគមន៍ចំពោះគំនិតផ្តួចផ្តើមរបស់លោក Park និងបាន អំណរគុណចំពោះទឹកចិត្តរបស់លោក ក្នុងបំណងលើកស្ទួយជីវភាពរបស់ប្រជាពលករកម្ពុជា ព្រោះវិស័យកសិកម្មជាវិស័យសំខាន់ និងបានចូលរួមចំណែកក្នុងការអភិវឌ្ឍសេដ្ឋកិច្ចកម្ពុជា។
ឯកឧត្តម ឃួន ផុនរតនៈ ក៏បានលើកទឹកចិត្តលោក Park ឱ្យចាប់ផ្តើមរៀបចំរោងចក្រ ឬកន្លែងស្រាវជ្រាវធ្វើជីសរីរាង្គនៅប្រទេសកម្ពុជា និងអញ្ជើញលោកទៅទស្សនកិច្ចនៅកម្ពុជា ដើម្បីភ្ជាប់ទំនាក់ទំនងជាមួយអ្នកវិស័យឯកជនផ្នែកកសិកម្ម និងក្រសួង-ស្ថាប័នពាក់ព័ន្ធ។
បន្ថែមពីនេះ ឯកឧត្តមឯកអគ្គរាជទូត ក៏បានសំណូមពរក្រុមហ៊ុនឱ្យជ្រើសរើសនិស្សិត ឬពលករខ្មែរដែលកំពុងសិក្សា និងបម្រើការងារនៅកូរ៉េនេះ ដើម្បីផ្តល់ឱកាសឲ្យពួកគេទទួលបាននូវបទពិសោធ និងជំនាញបច្ចេកទេស ក្នុងការផលិតជីសរីរាង្គនេះ ដូច្នេះក្រោយពេលពួកគេត្រឡប់ទៅកម្ពុជាវិញ ពួកគេនឹងមានជំនាញក្នុងការផលិតជីសរីរាង្គ និងអាចជួយដល់ការអភិវឌ្ឍវិស័យកសិកម្មនៅកម្ពុជា៕
អត្ថបទ៖ វីរៈ រូបភាព៖ ទូតកម្ពុជានៅកូរ៉េ
