អ្នកឧកញ៉ា ម៉ៅ ចំណាន ប្រធានសមាគមសិល្បករខ្មែរ ជាស្ត្រីខ្មែរដំបូងទី១ ដែលទទួលបានការតែងតាំងជា «អភិបាលកិត្តិយស» ក្នុងព្រឹត្តិការណ៍មហោស្រពភាពយន្តអន្តរជាតិ CIFF ដ៏ធំបំផុតប្រចាំឆ្នាំរបស់កម្ពុជា។
Million Times 
ប្រធានសមាគមសិល្បករខ្មែរអ្នកឧកញ៉ា ម៉ៅ ចំណាន បានទទួលយកតួនាទីជាអភិបាលកិត្តិយសនៃមហោស្រពភាពយន្ត។ ក្នុងនាមជាអភិបាលកិត្តិយសអនុប្រធានក្រុមប្រឹក្សាភិបាលក្រុមហ៊ុន រ៉ូយ៉ាល់ គ្រុប សេដ្ឋិនី ម៉ៅ ចំណាន ដើរតួជាអ្នកលើកស្ទួយសិល្បៈឈានមុខមួយរូប ដើម្បីជំរុញការរីកចម្រើននៃឧស្សាហកម្មភាពយន្តដ៏រឹងមាំ និងប្រកបដោយចីរភាពនៅកម្ពុជាដោយលើកកម្ពស់វិស័យសិល្បៈថាជាផ្នែកមួយ ដ៏សំខាន់សម្រាប់ការអភិវឌ្ឍសេដ្ឋកិច្ចរយៈពេលវែងនិងអត្តសញ្ញាណជាតិ របស់ព្រះរាជាណាចក្រកម្ពុជា។
មិនធ្លាប់មានឡើយក្នុងការផ្ដល់តំណែងជា «អភិបាលកិត្តិយស» ជូនដល់ប្រធានសមាគមសិល្បករខ្មែរ លោកជំទាវអ្នកឧកញ៉ា ម៉ៅ ចំណាន ក្នុងព្រឹត្តិការណ៍មហោស្រពភាពយន្តអន្តរជាតិកម្ពុជា លើកទី១៥ ក្នុងឆ្នាំ ២០២៦ នេះ។
ដ្បិតថាតួនាទីជា អភិបាលកិត្តិយស នេះមានសារៈសំខាន់ខ្លាំងក្នុងការរួមចំណែកដល់ការលើកកម្ពស់វិស័យវប្បធម៌ និងឧស្សាហកម្មច្នៃប្រតិដ្ឋរបស់កម្ពុជា ជាមួយគ្នា បង្ហាញឱ្យឃើញពីការរួមចំណែកយ៉ាងសំខាន់នៃវិស័យទាំងនេះចំពោះការអភិវឌ្ឍសេដ្ឋកិច្ចរបស់កម្ពុជានាពេលខាងមុខ។
មហោស្រពភាពយន្តអន្តរជាតិកម្ពុជា លើកទី១៥ ជាព្រឹត្តិការណ៍ដ៏ធំសម្បើមរបស់កម្ពុជា លើវិស័យភាពយន្ត ទាំងក្នុងនិងក្រៅស្រុក ហើយលើកនេះ នឹងមានការប្រមូលផ្ដុំភាពយន្តជាតិនិងអន្តរជាតិ ប្រមាណ ១៥០ រឿង មកពី ៤០ ប្រទេសផ្សេងគ្នាពីជុំវិញពិភពលោក ព្រឹត្តិការណ៍ភាពយន្តប្រចាំឆ្នាំនាលើកនេះ ត្រៀមរៀបចំនៅរាជធានីភ្នំពេញ ចាប់ពីថ្ងៃទី ២៤ ដល់ ២៩ ខែ មីនា ឆ្នាំ ២០២៦៕
អត្ថបទ៖ ឆដា, រូបភាព៖ Royal Group of Companies, សមាគមសិល្បករខ្មែរ