សំណើសុំវិនិយោគក្នុងខេត្តទាំងបួននៅភូមិភាគឦសាន នៃប្រទេសកម្ពុជា មានការកើនឡើងជាបន្តបន្ទាប់ ហើយតម្រូវការដីធ្លីសក្តានុពលក្នុងខេត្តទាំងបួននេះ ក៏មានចំនួនច្រើនដែរ។ នេះបើតាមការឱ្យដឹងពីទំព័រហ្វេសប៊ុក កម្មវិធីពិសេជំរុញការវិនិយោគក្នុងខេត្តទាំងបួននៅភូមិភាគឦសាន (ក.វ.ឦសាន)។
Million Times 
ចាប់ពីថ្ងៃទី១៦ ដល់ថ្ងៃទី១៩ ខែធ្នូ ឯកឧត្តម ម៉ៅ បូរាណ នាយករងវិទ្យាស្ថានសេដ្ឋ-កិច្ចនិងហិរញ្ញវត្ថុ និងជាទីប្រឹក្សា ក.វ.ឦសាន បានដឹកនាំក្រុមការងារចុះត្រួតពិនិត្យ និងវាយតម្លៃគម្រោងវិនិយោគ ដែលបានស្នើសុំគោលការណ៍លើកទឹកចិត្តពិសេស ជូនក្រុមហ៊ុន/សហគ្រាសចំនួន ៧។
ឯកឧត្តម ម៉ៅ បូរាណ បានលើកឡើងថា កម្មវិធីពិសេសជំរុញការវិនិយោគក្នុងខេត្តទាំងបួននៅភូមិភាគឦសាន មានគោលដៅជំរុញការវិនិយោគ តាមរយៈការផ្តល់លើកទឹកចិត្តពិសសេស ការអនុគ្រោះ និងការសម្របសម្រួលនីតិវិធី ដែលមានសក្តានុពលលើវិស័យកសិកម្ម, កសិ-ឧស្សាហកម្ម, និងវិស័យទេសចរណ៍ ជាពិសេសការដោះស្រាយបញ្ហាប្រឈមជាកញ្ចប់នៅហ្នឹងកន្លែង តាមរយៈការអនុវត្តយន្តការ «ច្រកចេញចូលតែមួយ» និង ស្របតាមអភិក្រម “ជវភាព នៃប្រព័ន្ធតួអង្គតែមួយ”។
លោកបានបន្ថែមថា ការចុះត្រួតពិនិត្យ និងវាយតម្លៃចំនួន ៧គម្រោងវិនិយោគ ក្រោមទុនវិនិយោគប្រមាណ ១៣៤,៥០ លានដុល្លារអាមេរិក ដែលអាចបង្កើតការងារជូនប្រជាពលរដ្ឋប្រមាណ ១៨៥០កន្លែងនេះ គឺជាសកម្មភាពដ៏សំខាន់មួយរបស់ ក.វ.ឦសាន ដើម្បីផ្តល់ភាពកក់ក្តៅដល់វិនិយោគិនដែលមានស្រាប់ ប្រយោជន៍ដើម្បីលើកទឹកចិត្តវិនិយោគិនឱ្យបន្ត ឬពង្រីកបន្ថែមគម្រោងវិនិយោគរបស់ខ្លួន។
ម្យ៉ាងទៀត ក៏ដើម្បីជំរុញវិនិយោគិនបង្កើនតម្លៃបន្ថែម នៃខ្សែច្រវាក់ផលិតកម្មរបស់ខ្លួន ឆ្ពោះទៅរកឧស្សាហកម្មកែច្នៃ ដោយប្រើប្រាស់វត្ថុធាតុដើមក្នុងស្រុក, លើកទឹកចិត្តឱ្យមានការបណ្តុះបណ្តាល និងផ្ទេរជំនាញដល់កម្មករខ្មែរ, ក៏ដូចជាផ្សព្វផ្សាយបន្តនូវសក្តានុពល និង កាលានុវត្តភាពវិនិយោគ នៃតំបន់ភូមិភាគឦសាន។
បើតាមក.វ.ឦសាន មានការកើនឡើងជាបន្តបន្ទាប់លើការស្នើគម្រោងវិនិយោគ និងការផ្តល់គោលការណ៍វិនិយោគ ស្ថិតក្នុងក្របខណ្ឌកម្មវិធីពិសេសជំរុញការវិនិយោគក្នុងភូមិភាគឦសាន។ វិនិយោគិន ក៏មានសំណើមានតម្រូវការដីធ្លីសក្តានុពលក្នុងខេត្តទាំងបួននៅភូមិភាគឦសាន សម្រាប់គម្រោងវិនិយោគដើម្បីបង្កើតតំបន់បណ្តុំសហគ្រាសធុនតូច និងមធ្យម ឬ ហៅថា SME Cluster, ការដាំដុះដំណាំកសិកម្ម ការបង្កើតរោងចក្រ តំបន់សេដ្ឋកិច្ចពិសេស និងការបង្កើតតំបន់ទេសចរណ៍ ដែលនឹងបង្កើតការងារ ការផ្ទេរចំណេះ-ជំនាញ និងបច្ចេកវិទ្យាជាដើម៕
អត្ថបទ៖ វីរៈ រូបភាព៖ ក.វ.ឦសាន