មជ្ឈមណ្ឌលបច្ចេកវិទ្យាឌីជីថល (Digital Tech Center) នៅសាកលវិទ្យាល័យជាតិជាស៊ីមកំចាយមារ ខេត្តព្រៃវែង ត្រូវបានសម្ពោធដាក់ឱ្យដំណើរការក្នុងសប្ដាហ៍នេះ ក្រោមអធិបតីភាពឯកឧត្តម សូ វិសុទ្ធី រដ្ឋលេខាធិការក្រសួងប្រៃសណីយ៍ និងទូរគមនាគមន៍។
Million Times 
មជ្ឈមណ្ឌលនេះ គឺជាសមិទ្ធផលមួយនៃការអនុវត្តកិច្ចព្រមព្រៀង ស្តីពី កិច្ចសហប្រតិបត្តិការក្នុងការដាក់ឱ្យប្រើថ្នាលផ្ទៀងផ្ទាត់ឯកសារ Verify.gov.kh និងការរៀបចំប្រព័ន្ធគ្រប់គ្រងសាកលវិទ្យាល័យតាមបច្ចេកវិទ្យាឌីជីថល និងការរៀបចំហេដ្ឋារចនាសម្ព័ន្ធ និងការតភ្ជាប់អ៊ឹនធឺណិត ជាមួយសាកលវិទ្យាល័យជាតិជាស៊ឹមកំចាយមារ (ស.ជ.ជ.ក.) នៅខែឧសភា ឆ្នាំ២០២៣ រវាង ក.ប.ទ. និងសាកលវិទ្យាល័យជាតិជាស៊ីមកំចាយមារ។
ការរៀបចំឱ្យមាន Digital Tech Center នេះ គឺដើម្បីលើកកម្ពស់និងចូលរួមចំណែកដល់ការបណ្តុះបណ្តាលធនធានមនុស្ស និងផ្តល់ភាពងាយស្រួលក្នុងការស្រាវជ្រាវ ស្របតាមក្របខណ្ឌគោលនយោបាយសេដ្ឋកិច្ចនិងសង្គមឌីជីថលកម្ពុជា ២០២១-២០៣៥ និងគោលនយោបាយរដ្ឋាភិបាលឌីជីថលកម្ពុជា ២០២២-២០៣៥។
ឯកឧត្តម សូ វិសុទ្ធី មានប្រសាសន៍ថា បរិវត្តកម្មឌីជីថល មិនមែនជាជម្រើសទៀតទេ តែគឺជារបត់ដែល ត្រូវប្រកាន់យក ដើម្បីធ្វើការកែទម្រង់រដ្ឋបាលសាធារណៈ វិស័យអប់រំ ធុរកិច្ច និងវិស័យអាទិភាពផ្សេងៗ ប្រកបដោយប្រសិទ្ធភាព។
ឯកឧត្តមរដ្ឋលេខាធិការ បានបន្ថែមថា «ដើម្បីរត់ឱ្យទាន់បរិវត្តកម្មឌីជីថលនេះ យើងត្រូវពង្រឹងសមត្ថភាពលើជំនាញឌីជីថលឱ្យបានល្អប្រសើរជាងមុន ជាពិសេសការអភិវឌ្ឍមូលធនមនុស្សឌីជីថលនៅកម្ពុជាស្របតាមយុទ្ធសាស្ត្របញ្ចកោណ ដំណាក់កាលទី១ របស់រាជរដ្ឋាភិបាល ដែលបានកំណត់យកអាទិភាពគន្លឹះ ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យា ជាពិសេសបច្ចេកវិទ្យាឌីជីថល ដើម្បីរួមចំណែកក្នុងការកសាងសេដ្ឋកិច្ចនិងសង្គមឌីជីថល រដ្ឋាភិបាលឌីជីថល និងចូលរួមជំរុញពន្លឿនបរិវត្តកម្មឌីជីថលនៅកម្ពុជា»៕
អត្ថបទ៖ វីរៈ រូបភាព៖ ក្រសួងប្រៃសណីយ៍