ក្រុមហ៊ុន ម៉ុង ឫទ្ធី គ្រោងដាំកូនដូងប្រេង១០ម៉ឺនដើម ដើម្បីជំនួសដើមដូងប្រេងចាស់ហួសអាយុ នៅលើផ្ទៃដី១ម៉ឺន ៦ពាន់ហិកតា។ នេះបើតាមការឱ្យដឹងពីអ្នកឧកញ៉ា ម៉ុង ឫទ្ធី អគ្គនាយកក្រុមហ៊ុន ម៉ុង ឫទ្ធី គ្រុប។
Million Times 
អ្នកឧកញ៉ា ម៉ុង ឫទ្ធី នៅថ្ងៃទី១៣ ខែវិច្ឆិកា ឆ្នាំ២០២៥ បានដឹកនាំក្រុមការងារកសិកម្ម និង កសិ-ឧស្សាហកម្ម ចុះពិនិត្យមើលដំណើរការសកម្មភាពរោងចក្រកៀបយកប្រេងគ្រាប់ក្នុងផ្លែដូងប្រេង ស្ថិតនៅតំបន់អន្លង់ក្រពើ ឃុំតានៃ ស្រុកព្រៃនប់ ខេត្តព្រះសីហនុ។
បើតាមអ្នកឧកញ៉ា រោងចក្រចម្រាញ់កៀបយកសាច់ក្រៅផ្លែដូងប្រេង មានកម្លាំងផលិត៦០តោនក្នុងមួយម៉ោង ហើយចំពោះតម្លៃប្រេងដូងឆៅឡើងចុះៗជាធម្មតា តែសម្រាប់តម្លៃបច្ចុប្បន្ននេះគឺល្អ។
បន្ទាប់មកអគ្គនាយកក្រុមហ៊ុន ម៉ុង ឫទ្ធី គ្រុប បានបន្តដឹកនាំក្រុមការងារចុះពិនិត្យមើលថ្នាលបណ្ដុះកូនដូងប្រេងចំនួន១០០ ០០០ដើម ហើយដែលគ្រោងនឹងយកទៅដាំ ជំនួសដើមដូងប្រេងចាស់ហួសអាយុ នៅដើមរដូវវស្សាខែឧសភា ឆ្នាំ២០២៦ខាងមុខនេះ។
អ្នកឧកញ៉ា ម៉ុង ឫទ្ធី លើកឡើងថា ការវិនិយោគទៅលើការដាំ និងរោងចក្រកែច្នៃនេះ បានផ្តល់ការងារមិនចេះរីងស្ងួតជូនបុគ្គលិក-កម្មករដោយផ្ទាល់ និងដោយប្រយោលប្រមាណជិត១ម៉ឺននាក់។
គេហទំព័រក្រុមហ៊ុន ម៉ុង ឫទ្ធី គ្រុប បានឱ្យដឹងថា ក្នុងឆ្នាំ១៩៩៧ ក្រុមហ៊ុន បានដាំដូងប្រេងបាន ៤៧៧ ហិកតា ហើយបច្ចុប្បន្នក្រុមហ៊ុនបានពង្រីកការដាំដុះលើផ្ទៃដី ១៦ ០០០ហិកតា និងបានក្លាយជាក្រុមហ៊ុនដាំដុះដូងប្រេងធំជាងគេនៅកម្ពុជា និងជាប់លំដាប់ទី ៤នៅអាស៊ីអាគ្នេយ៍។ ក្រុមហ៊ុននេះ នាំចេញដូងប្រេងឆៅទៅកាន់ប្រទេសក្នុងតំបន់អាស៊ីអាគ្នេយ៍ និង សហគមន៍អឺរ៉ុប៕
អត្ថបទ៖ វីរៈ រូបភាព៖ ម៉ុង ឫទ្ធី គ្រុប