ក្រុមហ៊ុនបច្ចេកវិទ្យា OpenAI ទទួលបានកិច្ចព្រមព្រៀងមួយ ពីរដ្ឋាភិបាលអាមេរិកក្នុងការសាងសង់ឧបករណ៍បច្ចេកវិទ្យាបញ្ញាសិប្បនិមិត្ត សម្រាប់ក្រសួងការពារជាតិ សរុបតម្លៃជាង ២០០លានដុល្លារ។

ទីភ្នាក់ងារព័ត៌មាន Reuters បានចុះផ្សាយថា ក្រុមហ៊ុន OpenAI នឹងចាប់ផ្ដើមការងារនៅក្នុង ឬជិតសេតវិមាន ដោយគ្រោងបញ្ចប់ការផលិតឧបករណ៍ AI នៅត្រឹមខែកក្កដា ឆ្នាំ២០២៦ខាងមុខ។

មន្ទីរបញ្ចកោណបានអះអាងថា ឧបករណ៍ AI ដែលក្រុមហ៊ុន OpenAI គ្រោងផលិតជូនក្រសួងការពារជាតិ គឺមានសមត្ថភាពក្នុងការជូនដំណឹងមុន ពីភាពប្រកាសអាសន្ន និងបញ្ហាប្រឈមផ្នែកសន្តិសុខជាតិ ដើម្បីអាចឲ្យពួកគេត្រៀមខ្លួន ឬអាចបញ្ជៀសបញ្ហាទាំងនោះបាន។

គួរជម្រាបដែរថា Open AI គឺជាក្រុមហ៊ុនឈានមុខគេមួយនៅក្នុងវិស័យបច្ចេកវិទ្យាទំនើប ពោលពួកគេគឺជាអ្នកបង្កើតកម្មវិធី ChatGPT ដែលជួយសម្រួលការងារបានយ៉ាងច្រើន សឹងតែគ្រប់វិស័យ៕

អត្ថបទ៖ Luffy រូបភាព៖ Reuters