សម្តេច ហ៊ុន សែន ប្រធានព្រឹទ្ធសភា បានប្រកាសជាសាធារណៈនូវបច្ចេកវិទ្យាបញ្ញាសិប្បនិម្មិត AI ដែលបង្កើតដោយកូនខ្មែរហើយប្រើប្រាស់ជាភាសាខ្មែរបានយ៉ាងទូលំទូលាយ ដោយសម្តេចបានស្នើឲ្យប្រជាពលរដ្ឋនាំគ្នាប្រើប្រាស់ដើម្បីលើកទឹកចិត្តស្នាដៃខ្មែរ។

សម្តេច ហ៊ុន សែន បានគូសរំលេចពីការប្រើប្រាស់កម្មវិធី Fresh AI ដែលជាកម្មវិធី AI ព័ត៌មានឆ្លាតវៃរបស់ខ្មែរលើកដំបូង គឺងាយស្រួល គ្រាន់តែចុចសួរនាំអ្វីៗជាភាសាខ្មែរ ពាក់ព័ន្ធព័ត៌មានជុំវិញពិភពលោក និងព័ត៌មានចំណេះដឹងផ្សេងៗ វានឹងឆ្លើយតបលឿនរហ័ស ដោយសង្ខេបព័ត៌មាន និងលីងព័ត៌មានពាក់ព័ន្ធជាច្រើន។

បើតាមការបញ្ជាក់របស់សម្តេចលើបណ្តាញសង្គម Facebook កម្មវិធីនេះដើរតួនាទីជា AI ផងនិងដូច Google នៅពេលត្រូវការរកព័ត៌មាន យើងអាចចូលស្វែងរកក្នុង App នេះបាន។ Fresh AI មានទិន្នន័យផ្ទាល់ខ្លួនជាង៤០០លានពាក្យ (400,000,000) ស្មើជាង៥០ម៉ឺនអត្តបទ និងបន្ថែមបញ្ចូលជារៀងរាល់ថ្ងៃ ធ្វើឱ្យព័ត៌មានកាន់តែច្រើនឡើង និងធ្វើឲ្យកាន់តែឆ្លាតវៃក្នុងការរកព័ត៌មាន។

សូមជម្រាបថា កម្មវិធី Fresh AI ជាមោទនភាពរបស់ខ្មែរយើងដែលមានកម្មវិធី AI ព័ត៌មានលើកដំបូងបង្កើតឡើងដោយ អង្គភាពព័ត៌មាន Fresh News។ ជាមួយគ្នានេះ សម្តេចប្រធានព្រឹទ្ធសភា ក៏បានស្នើសូមបងប្អូនប្រជាពលរដ្ឋខ្មែរទាំងអស់ នាំគ្នាប្រើប្រាស់កម្មវិធីខ្មែរ AI ដើម្បីលើកទឹកចិត្តស្នាដៃខ្មែរ។