តាមដានជាមួយយើង៖ Million Times

ថ្លែងប្រាប់សារព័ត៌មាន CNBC លោកស្រី Maye បានឲ្យដឹងថា កាលពីឆ្នាំមុន លោកស្រីបានធ្វើដំណើរទៅប្រទេសចិនជាច្រើនលើក និងបានទៅកម្សាន្តនៅទីក្រុងចំនួន ១២ ដើម្បីចូលរួមសន្និសីទសារព័ត៌មាន និងកម្មវិធីពាក់ព័ន្ធនឹងការបង្ហាញម៉ូដនានា។

សារព័ត៌មានបរទេសចិនបានចុះផ្សាយថា ប្រជាប្រិយភាពរបស់តារាបង្ហាញម៉ូដវ័យ ៧៦ឆ្នាំរូបនេះ មានសន្ទុះយ៉ាងខ្លាំងនៅចិន ពោលមានចំនួនអ្នកតាមដានដល់ទៅ ៥៧៥ ០០០នាក់នៅលើកម្មវិធី Xiaohongshu និង ៣៥៥ ០០០នាក់នៅលើកម្មវិធី Douyin។

ម្ដាយរបស់ Elon Musk តែងតែបង្ហាញវត្តមាននៅក្នុងព្រឹត្តិការណ៍ធំៗនៅប្រទេសចិន តួយ៉ាងកាលពីខែធ្នូ លោកស្រីបានចូលរួមពិសារអាហារពេលល្ងាចនៅទីក្រុង Hangzhou ដើរម៉ូដសម្រាប់ម៉ាកយីហោគ្រឿងសំអាងមួយ នៅទីក្រុង Wuha និងបានបើកកម្មវិធីជួបជុំអ្នកគាំទ្រ សម្រាប់ការសម្ពោធលក់សៀវភៅ A Woman Makes a Plan ដែលបោះពុម្ពជាភាសាចិនថែមទៀត។

ប្រជាជនចិនស្រឡាញ់ និងកោតសរសើរម្ដាយរបស់ Elon Musk ចំពោះការតស៊ូក្នុងឆាកជីវិតរបស់លោកស្រី។ លោកស្រីបានកើតនៅប្រទេសកាណាដា តែធំធាត់ឡើងនៅប្រទេសអាហ្វ្រិកខាងត្បូង និងបានពុះពារឧបសគ្គជាច្រើន ធ្វើការសុទ្ធតែឆ្លងប្រទេស ទម្រាំទទួលបានភាពជោគជ័យដូចសព្វថ្ងៃ។

ប្រជាជនចិនបានដាក់រហស្សនាមឲ្យលោកស្រី Maye Musk ថា ជាបុគ្គលមានឥទ្ធិពលសក់ពណ៌ប្រាក់ ដ្បិតលោកស្រីមានវ័យចំណាស់ សក់ប្រែជាសពិតមែន តែរាងកាយ និងសុខភាពរបស់លោកស្រីនៅមាំទាំ និងសម្រស់ក្មេងជាងវ័យ៕

អត្ថបទ៖ Luffy រូបភាព៖ គណនីហ្វេសប៊ុករបស់លោកស្រី Maye Musk

The post ម្ដាយរបស់ Elon Musk កំពុងទទួលបានការគាំទ្រខ្លាំងនៅប្រទេសចិន appeared first on Millions times.