តាមដានជាមួយយើង៖ Million Times

ក្រុមហ៊ុន អិលអេសវី អ៊ិនដាសស្រ្ទី ជា​រោងចក្រ​​ខ្មែរ​ធំ​ជាង​គេផលិត​​​សាប៊ូ​បោក​សម្លៀកបំពាក់​ម៉ាក​អូកា ដែល​ទទួល​បាន​ការ​គាំទ្រ​ខ្លាំង។ ពិសេស​ថ្មី​ៗ​នេះ​លោក​ស្រី នុត សម្ផស្ស បាន​កែច្នៃ​កសិផល​ក្នុង​ស្រុក ធ្វើ​ជា​សាប៊ូ​កក់​សក់ សាប៊ូ​ដុស​ខ្លួន និង​សាប៊ូ​លាង​មុខ ដែល​ផលិត​ពី​ស្ពៃ​ក្រញាញ់​ធម្មជាតិ ព្រម​ទាំង​កែច្នៃ​ស្លឹក​គ្រៃ និង​ម្នាស់ ផលិត​ជា​ទឹក​លាង​ចាន ទទួល​បាន​ការ​គាំទ្រ​យ៉ាង​ពេញ​ទំហឹង​ទូទាំង​ប្រទេស។

ទម្រាំ​សម្រេច​បង្កើត​បាន​ជា​រោងចក្រ​ផលិត​សាប៊ូ​ខ្មែរ លោកស្រី​បាន​ជម្នះ​ឧបសគ្គ​រាប់​ពាន់ ទម្រាំ​សាងបាន​កេរ្តិ៍ឈ្មោះ និង​ឈរ​ជើង​មក​ដល់​ពេលនេះ។ អគ្គ​នាយិកា នុត សម្ផស្ស ពុះពារ​រាល់​ពាក្យ​ទិតៀន​​នៅ​ជុំវិញ​ខ្លួន ដោយ​ចំណាយ​ពេល​ជាង១០ ឆ្នាំ ដើម្បី​សិក្សា ស្រាវជ្រាវ អភិវឌ្ឍ​សមត្ថភាព​វិជ្ជាជីវៈ​របស់​ខ្លួន​ពី​អាជីវកម្ម​គ្រួសារ រហូត​ក្លាយ​ជា​​ក្រុមហ៊ុន​បែប​ឧស្សាហកម្ម​ក្នុង​ស្រុក។

រោងចក្រ អិលអេសវី អ៊ិនដាស្ទ្រី ត្រូវ​ទទួល​ស្គាល់​ជា​បន្តបន្ទាប់​ពី​ក្រសួង​ស្ថាប័ន​ជំនាញ​ពាក់ព័ន្ធ​នានា​ព្រមទាំង​កំណើន​ទំនុក​ចិត្ត​ពីសំណាក់​បណ្ដា​អតិថិជន​ប្រើប្រាស់​ទាំង​នៅ​ក្នុង​រាជធានី​និង​នៅ​តាម​បណ្ដា​ខេត្ត។

បើ​ទោះ​ជា​រោងចក្រ​របស់​លោកស្រី សម្ផស្ស មាន​កេរ្តិ៍ឈ្មោះ​ហើយក៏​ពិត​មែន តែ​នៅ​ទទួល​រង​ការ​រិះគន់​មិន​ឈប់ឈរ សូម្បីតែ​ការ​រស់នៅ​ប្រចាំថ្ងៃ ក៏​នៅតែ​មាន​អ្នក​យាយី​ដោយ​ពាក្យ​សម្ដី​មិន​ឈប់។ ក្នុង​នោះ​មាន​ទាំង​បញ្ហា​តម្លៃ​ផលិតផល​ថា​មាន​តម្លៃ​ថោក គឺ​សម្រាប់​តែ​លក់​ឲ្យ​ប្រជាជន​ក្រីក្រ និង​មិន​មាន​គុណភាព ហើយ​តម្លៃ​ផលិតផល​ខ្លះ បែរ​ជា​ថា​ថ្លៃ មិន​សម​តម្លៃ​ដែល​ជា​ផលិតផល​ក្នុង​ស្រុក។

មិន​តែ​ប៉ុណ្ណោះ មតិ​អ្នក​លេង​បណ្ដាញ​សង្គម​មួយ​ចំនួន រិះគន់​អគ្គ​នាយិកា នុត សម្ផស្ស ថា​រូបរាង និង​មុខមាត់​មិន​ស័ក្ដិសម​ជា​អ្នក​មាន​តួនាទី​ខ្ពស់​ឡើយ ហើយ​ក៏​មិនមែន​ជា​កូន​អ្នក​មាន​ទ្រព្យ​ធន​ទៀត​ផង ដែល​សម្ដី​អស់​នោះ សុទ្ធតែ​បាន​វាយ​ប្រហារ​ផ្លូវ​ចិត្ត​លោកស្រី​ដូចគ្នា។ ក្រៅពី​ជនជាតិ​ខ្មែរ​ខ្លះ​ដែល​មិន​ជឿជាក់​ហើយ លោកស្រី​ក៏​ធ្លាប់​ត្រូវ​មជ្ឈដ្ឋាន​បរទេស​មិន​ជឿ​ថា​ខ្មែរ​មាន​សមត្ថភាព​អាច​បង្កើត​ផលិតផល​ឧស្សាហកម្ម​ដោយខ្លួនឯង​បាន​ដែរ។

ឆ្លងកាត់​រឿងរ៉ាវ​ជាច្រើន លោកស្រី​បាន​​រៀបចំផែនការ​ហិរញ្ញវត្ថុ ផែនការ​អភិវឌ្ឍ​គុណភាព​ផលិតផល​ ​ផែនការ​ទី​ផ្សារ ផែនការ​គ្រប់គ្រង​ធនធានមនុស្ស ការ​អភិវឌ្ឍ​ផ្នែក​បច្ចេកវិទ្យា​ឧស្សាហកម្ម និង​ចំណេះ​ជំនាញ​បន្ថែម​ជាច្រើន​ ​ទៀត ដើម្បី​ឆ្លើយតប​នឹង​សន្ទុះ​រីក​ចម្រើន​នៃ​សង្គមជាតិ​ក៏ដូចជា​បម្រែបម្រួល​តម្រូវ​ការ​អ្នកប្រើប្រាស់​ជាក់ស្ដែង ឥឡូវ​ធ្វើឲ្យ​ក្រុមហ៊ុន​អាច​ឈរ​ជើង​បាន​លើ​ទីផ្សារ​ហើយ៕

អត្ថបទ៖ មេរ៉ា, រូបភាព៖ Nut Samphois

The post ទម្រាំផលិតចេញរូបរាងសាប៊ូស្នាដៃខ្មែរ លោកស្រី នុត សម្ផស្ស ស្ថាបនិក LSV អ៊ិនដាស្ទ្រី រងការរិះគន់ទាំងអ្នកក្រៅ និងក្នុងស្រុក appeared first on Millions times.

ដោយសារតែមើលឃើញពីផលលំបាករបស់ប្រជាកសិករខ្មែរនៅខេត្តតាកែវដែលកំពុងរងនូវការខូចខាតពីការសល់ចោលនៃស្ពៃក្រញាញ់ ដូច្នេះក្នុងនាមជាខ្មែរដូចគ្នានិងចំនុចមួយទៀតស្ពៃក៏អាចផលិតជាសាប៊ូបាន អ្នកស្រីបានជួយទិញពីកសិករដោយក្នុងមួយថ្ងៃមួយតោន។ គោលបំណងធំគឺគ្រប់យ៉ាងដើម្បីជួយដល់ផលិតផលជាតិយើង និងចង់បញ្ជាក់ថាខ្មែរក៏អាចផលិតនូវផលិតផលមួយចំនួនបានដែរ។

តាមដានជាមួយយើង៖ Million Times

យ៉ាងណាក្តី នៅពេលដំណើរការផលិតខាងរោងចក្រអ្នកស្រីជួបប្រទះនូវបញ្ហាលំបាកខ្លះៗ ដោយសាររកឡសម្ងួតខ្នាតធំមិនបាន ដូច្នេះសាកល្បងសម្ងួតដោយប្រើកម្តៅថ្ងៃ។ ប៉ុន្តែក្នុងរដូវវស្សានេះ អាកាសធាតុមិនអំណោយផលទេជាហេតុនាំឲ្យដំណើរការផលិតមិនទាន់ពេលវេលា។ នៅពេលច្នៃស្ពៃស្រស់ធ្វើឲ្យដំណើរការផលិតប្រើពេលយូរនិងច្រើនដំណាក់ការ ដែលនាំឲ្យស្ពៃមួយចំនួនធំដែលប្រមូលពីប្រជាកសិករត្រូវរក្សាទុកក្នុងបន្ទប់ម៉ាស៊ីនត្រជាក់ដើម្បីរក្សាគុណភាព។ ចំណែកស្ពៃមួយចំនួនក៏ត្រូវខូចថែមទៀតដោយសារតែផលិតមិនទាន់ពេលវេលា។

ម្យ៉ាងទៀតក៏មានការគាំទ្រច្រើនសន្ធឹកសន្ថាប់ពីសំណាក់បងប្អូនដែលគាំទ្រការផលិតសាប៊ូពីស្ពៃក្រញាញ់ ប៉ុន្តែដោយសារការផលិតពីរោងចក្រមិនទាន់ ដូច្នេះទើបអ្នកស្រីសម្រេចចិត្តសុំឲ្យមានការពន្យាពេលទិញសាប៊ូពីបងប្អូនមួយរយៈពេលខ្លីសិនដើម្បីទុកពេលរៀបចំបញ្ជូនផលិតសម្រាប់បងប្អូនដែលបានបញ្ជាទិញរួចហើយ ។ ស្របពេលជាមួយគ្នាខាងរោងចក្រ ក៏កំពុងស្វែងរកដៃគូចែកចាយអោយបានច្រើនកន្លែងតាមដែលអាចធ្វើទៅបានផងដែរ។

អ្នកស្រី នុត សម្ផស្ស ដែលមានបទពិសោធន៍មិនក្រោមជាង១០ឆ្នាំលើការផលិតរូបនេះ បង្ហាញអារម្មណ៍ផ្ទាល់ខ្លួនថា ខ្មែរក៏មានលទ្ធភាពផលិតនូវផលិតផលមួយចំនួនដែរ ហើយរាល់ការផលិតគឺស្ថិតក្រោមការត្រូតពិនិត្យពីក្រសួងស្ថាប័នពាក់ព័ន្ធយ៉ាងច្បាស់លាស់បំផុត។  ដូច្នេះហើយរាល់ផលិតផលទាំងអស់អាចធានាបាននូវគុណភាព សុវត្ថិភាពផងដែរ ។

ក្នុងនាមជាអ្នកផលិតម្នាក់ គឺអ្នកស្រីយល់ពីអារម្មណ៍បេះដូងរបស់អ្នកផលិតដូចគ្នាគឺតែងតែចង់ផលិតនូវផលិតផលមួយដែលល្អសម្រាប់ជាតិសាសន៍ផ្ទាល់។ រាល់ការផលិតគឺចេញពីក្តីស្រលាញ់ ព្រោះបើមិនស្រលាញ់ទេប្រាកដជាមិនអាចធ្វើការងារទាំងអស់នេះបានទេនៅពេលដែលមានឧបសគ្គជាច្រើន។ អ្នកស្រីសម្ផស្សក៏បានអំពាវនាវសុំឲ្យបងប្អូនដែលបានគាំទ្រផលិតផលខ្មែរហើយសូមបន្តគាំទ្រទៀត ព្រោះជាកម្លាំងចិត្តធំមួយសម្រាប់អ្នកផលិតនិងកសិករក្នុងប្រទេស។ រីឯ បងប្អូនដែលមិនទាន់បានសាកល្បងប្រើ គួររួមគ្នាគាំទ្រ។ ប្រសិនបើឃើញចំនុចខ្វះខាតត្រង់ណា បងប្អូនអាចជួយផ្តល់ជាយោបល់បានក្នុងរូបភាពរិះគន់ក្នុងន័យស្ថាបនា៕

អត្ថបទ៖ នារតី រូបភាព៖ ផ្តល់ឲ្យ

The post ម្ចាស់ផលិតសាប៊ូស្ពៃក្រញាញ់៖ រាល់ផលិតផលគឺធ្វើចេញពីបេះដូង ផលិតដើម្បីជាតិសាសន៍យើង appeared first on Millions times.