អ៊ឹម សុគន្ធា Archives - Millions times

ក.អ.ក និង ស.អ.ថ ស្នើ MGI និង MGC បញ្ចប់វិវាទឲ្យបានលឿនបំផុត ព្រោះខ្លាចអាចជះឥទ្ធិពលមិនល្អដល់ទំនាក់ទំនងប្រទេសទាំង ២

Vin Chang — Fri, 11 Oct 2024 09:54:27 +0000

ក្រោយបញ្ហាជម្លោះរវាងស្ថាប័នប្រកួតប្រជែងសម្រស់ដ៏ធំ កើតមានប៉ុន្មានថ្ងៃមកនេះ សឹងតែមិនអាចរកផ្លូវចេញបាន ថ្ងៃនេះ ក្លឹបអ្នកកាសែតកម្ពុជា (ក.អ.ក) និងសមាគមអ្នកកាសែតថៃ (ស.អ.ថ) បានចេញសេចក្ដីប្រកាសមួយ ស្នើឲ្យម្ចាស់ស្ថាប័នMGI និង MGC បញ្ចប់វិវាទឲ្យបានលឿនបំផុតតាមដែលអាចធ្វើទៅបាន។

តាមដានជាមួយយើង៖ Million Times

ដើម្បីចៀសវាងកុំឲ្យស្ថានការណ៍កាន់តែរីកដុះដាលធំៗ ក្លឹបអ្នកកាសែតកម្ពុជា (ក.អ.ក) និងសមាគមអ្នកកាសែតថៃ (ស.អ.ថ) បានស្នើដល់ស្ថាប័ន Miss Grand International (MGI) និង Miss Grand Cambodia (MGC) បញ្ឈប់នូវវិវាទរបស់ពួកគេឱ្យបានឆាបរហ័សបំផុតតាមដែលអាចធ្វើទៅបាន។

ក្រោយកើតមានវិវាទរវាងស្ថាប័ន Miss Grand International និង Miss Grand Cambodia បានធ្វើឱ្យប្រព័ន្ធផ្សព្វផ្សាយមួយចំនួន ជាពិសេសអ្នកប្រើប្រាស់បណ្ដាញសង្គមផលិតផ្សព្វផ្សាយ និងចែកចាយព័ត៌មានទាក់ទិននឹងភាពតានតឹងរវាងក្រុមហ៊ុនទាំងពីរ។ ចំពោះបញ្ហានេះដែរបានធ្វើឱ្យក្លឹបអ្នកកាសែតកម្ពុជា (ក.អ.ក) និងសមាគមអ្នកកាសែតថៃ (ស.អ.ថ) បើកការប្រជុំបន្ទាន់តាមអនឡាញនាថ្ងៃទី១០ ខែតុលា ឆ្នាំ២០២៤ ដើម្បីផ្លាស់ប្ដូរព័ត៌មានអំពីហេតុការណ៍ខាងលើ និងបានដាក់ស្នើនូវសំណូមពរមួយចំនួនដូចខាងក្រោម៖

១. សំណូមពរឱ្យក្រុមហ៊ុនឯកជនទាំងពីរដោះស្រាយវិវាទរបស់ខ្លួនឱ្យបានលឿនតាមដែលអាចធ្វើទៅបាន ដើម្បីកុំឱ្យស្ថានការណ៍កាន់តែរីកធំ។

២. សូមអំពាវនាវដល់ប្រព័ន្ធផ្សព្វផ្សាយនៅក្នុងប្រទេសទាំងពីរគួរមានការប្រុងប្រយ័ត្ន ហើយមិនគួរប្រើជម្លោះរវាងក្រុមហ៊ុនឯកជនទាំងពីរ ដើម្បីផលប្រយោជន៍ផ្ទាល់ខ្លួន ឬក្រុមហ៊ុនផ្សព្វផ្សាយរបស់ខ្លួនឡើយ។

៣. ក.អ.ក និង ស.អ.ថ ក៏សូមអំពាវនាវដល់អ្នកប្រើប្រាស់ប្រព័ន្ធផ្សព្វផ្សាយសង្គមនៅក្នុងប្រទេសទាំងពីរ មុនពេលចែករំលែកព័ត៌មានទាក់ទងនឹងជម្លោះខាងលើមេត្តាពិចារណាអំពីផលវិបាកដែលអាចកើតមានដោយសារតែការចែកចាយព័ត៌មាននោះ៕

The post ក.អ.ក និង ស.អ.ថ ស្នើ MGI និង MGC បញ្ចប់វិវាទឲ្យបានលឿនបំផុត ព្រោះខ្លាចអាចជះឥទ្ធិពលមិនល្អដល់ទំនាក់ទំនងប្រទេសទាំង ២ appeared first on Millions times.

អ្នកស្រី អ៊ឹម សុគន្ធា ប្រវត្តិជំនួញអ្វីខ្លះ ទើបអាចទិញសិទ្ធិកម្មវិធីប្រកួតប្រជែងសម្រស់ជាច្រើន?

Vin Chang — Thu, 10 Oct 2024 08:46:09 +0000

ម្ចាស់ក្រុមហ៊ុន HK7 Co,Ltd អ្នកស្រី អ៊ឹម សុគន្ធា ត្រូវបានគេដឹងថា ជាអ្នករៀបចំកម្មវិធីប្រកួតប្រជែងសម្រស់កញ្ញាឯកដ៏អស្ចារ្យ ឆ្នាំ ២០២៣ និង ២០២៤ ដែលបញ្ចប់ទៅមិនសូវជាល្អថ្មីៗនេះ។

បើនិយាយដល់ការទិញសិទ្ធិរៀបចំការប្រឡងកម្មវិធីសម្រស់នោះ អ្នកស្រី អ៊ឹម សុគន្ធា ធ្លាប់បានឲ្យដឹងថា អ្នកស្រីចូលចិត្តកម្មវិធីបែបនោះ។ បើងាកទៅមើលប្រវត្តិវិញ ក៏ឃើញថាអគ្គនាយិការូបនេះក៏ជាអតីតតារាបង្ហាញម៉ូដផងដែរ។

តាមដានជាមួយយើង៖ Million Times

បងថ្លៃអតីតតារាចម្រៀង ផាន់ ម៉ូនីកា រូបនេះកាលពីអំឡុងឆ្នាំ ២០០៧ ធ្លាប់ធ្វើជាតារាសម្ដែង តារាបង្ហាញម៉ូដ និងជាពិធីការិនី ដែលពេលនោះទទួលបានការគាំទ្រខ្លាំងពីបណ្ដាលអ្នកគាំទ្រ ព្រោះរូបសម្រស់ដ៏ស្រស់ស្អាត និងសមត្ថភាពរបស់អ្នកស្រី។ ក្រោយមកអ្នកនាង ក៏មានឱកាសបានសម្ដែងក្នុង MV របស់ផលិតកម្មសាន់ដេ និងចាប់ដៃគូជាមួយ លោក គង់ រ៉ាយុទ្ធ ដែលជាថៅកែហាងលក់សម្លៀកបំពាក់ និងជាតារាសម្ដែងដ៏ល្បីនាជំនាន់នោះ ព្រមទាំងបានភ្ជាប់ពាក្យស្ងាត់ៗ និងទៅរស់នៅអាមេរិកមួយរយៈ។

រហូតមកដល់ឆ្នាំ ២០១២ អ៊ឹម សុគន្ធា និងលោក គង់ រ៉ាយុទ្ធ បានសម្រេចចិត្តចូលរោងការ នៅថ្ងៃ ១២ ខែមករា ក្រោយទាក់ទងគ្នាអស់រយៈពេលជាច្រើនឆ្នាំ ហើយអ្នកទាំងពីរក៏បានបន្សល់ទុកចំណងដៃកូនប្រុសម្នាក់ និងស្រីម្នាក់មកដល់ពេលនេះ។

ក្រោយរៀបការចូលក្នុងគ្រួសារអ្នកជំនួញដ៏មានមុខមាត់លំដាប់សេដ្ឋីហើយនោះ តារាបង្ហាញម៉ូដ អ៊ឹម សុគន្ធា បានផ្អាកសកម្មភាពសិល្បៈនានា ងាកមកពង្រឹងចំណេះដឹងផ្នែកជំនួញ ព្រមទាំងបានហក់ចូលក្នុងអាជីវកម្មដូចបងថ្លៃស្រី និងជាមិត្តរួមអាជីព អ្នកនាង ផាន់ ម៉ូនីកា។

បើនិយាយទៅដល់មិត្តរួមអាជីព និងក្លាយជាគ្រួសារ គឺមានអ្នកនាង អ៊ឹម សុគន្ធា អ្នកនាង ផាន់ ម៉ូនីកា និង អេនជី សុទ្ធតែបានរៀបការចូលគ្រួសារអ្នកជំនួញ អ្នកស្រី នូ សុគន្ធា ដែលមានហាងសម្លៀកបំពាក់ និងអាហារជាច្រើនកន្លែងនៅភ្នំពេញ។

អំឡុងឆ្នាំ ២០២០ អ្នកស្រី អ៊ឹម សុគន្ធា បានបង្កើតអាជីវកម្មអនឡាញ ដោយមានឈ្មោះថា HK7 ហើយកាន់តែជោគជ័យពីមួយថ្ងៃ និងមានផលិតផលថែរក្សាសម្រស់ច្រើនប្រភេទ រហូតមានការជំរុញឲ្យទិញកម្មវិធីប្រកួតប្រជែងសម្រស់ Miss Grand Cambodia បាន ២ ឆ្នាំ គឺ ២០២៣ និង ២០២៤។

ក្រៅពីកម្មវិធី Miss Grand Cambodia អ្នកស្រី សុគន្ធា ក៏ជាម្ចាស់ Miss Cosmo Cambodia ដូចគ្នាដែរ ហើយកាលពីពេលថ្មីៗនេះ ក្រុមហ៊ុនអ្នកស្រីក៏បានបញ្ជូន អ៊ិន លក្ខិណា ទៅប្រកួត Miss Cosmo នៅវៀតណាម និងទទួលចូលទៅក្នុង Top 10 នៃកម្មវិធីថែមទៀតផង៕

The post អ្នកស្រី អ៊ឹម សុគន្ធា ប្រវត្តិជំនួញអ្វីខ្លះ ទើបអាចទិញសិទ្ធិកម្មវិធីប្រកួតប្រជែងសម្រស់ជាច្រើន? appeared first on Millions times.