តាមដានជាមួយយើង៖ Million Times

បើយោតាមទំព័រហ្វេសប៊ុកផ្លូវការរបស់ បុរី មេគង្គ លែន បានឱ្យដឹងថា នៅព្រឹកថ្ងៃទី២៧ ខែកុម្ភៈ ឆ្នាំ២០២៦ អ្នកឧកញ៉ា ជាម ឃុនណាត ស្ថាបនិក និងអគ្គនាយក នៃ បុរី មេគង្គ លែន និងលោកជំទាវ ហេង ចិន្ដា ព្រមទាំងគណៈគ្រប់គ្រង បុរី មេគង្គ លែន ដោយមានការចូលរួមពីភ្ញៀវកិត្តិយសជាច្រើនរូប បានប្រារព្ធ «ពិធីបញ្ចុះបឋមសិលាបើកការដ្ឋានសាងសង់ជាផ្លូវការនៃឧទ្យាន The Mekong Park ៥ហិកតា និងសម្ពោធបុកគ្រឹះប្លុកគេហដ្ឋានថ្មី» ក្នុងគម្រោង «មេគង្គ ស៊ីធី» ដែលស្ថិតនៅក្នុងតំបន់ជ្រោយចង្វារ តាមបណ្ដោយផ្លូវជាតិ ៦A។

ទំព័រហ្វេសប៊ុកផ្លូវការរបស់ បុរី មេគង្គ លែន បានឱ្យដឹងបន្តថា ការសម្ពោធបុកគ្រឹះប្លុកគេហដ្ឋានថ្មីនេះ មានជាប្រភេទវីឡាប្រណិតជាច្រើនប្រភេទ ដែលមានស្ថាបត្យកម្មរចនាបថម៉ូដក្លាស៊ីកបែបអឺរ៉ុប មានអាយុកាលយូរអង្វែង និងជាមរតកសម្រាប់កូនចៅតគ្រប់ជំនាន់ នៅក្នុងគម្រោង «មេគង្គ ស៊ីធី»។

គួរឱ្យដឹងថា គម្រោង «មេគង្គ ស៊ីធី» មានទីតាំងភូមិសាស្រ្ដល្អបំផុតចម្ងាយ ១៥នាទី ពីស្ពានជ្រោយចង្វារ និងជាទីតាំងមានសក្ដានុពលខ្លាំង មានទន្លេអមសងខាង និងផ្ដល់ខ្យល់អាកាសបរិសុទ្ធ៕

អត្ថបទ៖ វីរៈ រូបភាព៖ ហ្វេសប៊ុក Mekong Land  

The post ដើមឆ្នាំ! អ្នកឧកញ៉ា ជាម ឃុនណាត បើកការដ្ឋានសាងសង់ឧទ្យាន The Mekong Park ៥ហិកតា និងបុកគ្រឹះប្លុកគេហដ្ឋានថ្មី appeared first on Millions times.

តាមដានជាមួយយើង៖ Million Times

សេចក្ដីប្រកាសព័ត៌មានរបស់ក្រសួងរៀបចំដែនដី ផ្សព្វផ្សាយនៅថ្ងៃទី២៤ ខែកុម្ភៈនេះ បានឱ្យដឹងថា បន្ទាប់ពីបានទទួលពាក្យ និងផ្ទៀងផ្ទាត់ឯកសារសម្រាប់បន្តនីតិវិធី ចុះបញ្ជីផ្ទេរបណ្ណកម្មសិទ្ធិរបស់អតិថិជន ដែលបានទិញផ្ទះពីគម្រោងអភិវឌ្ឍន៍បុរី ផ្ទះល្វែង និងដីឡូត៍ ក្នុងភូមិសាស្ត្ររាជធានីភ្នំពេញ, ក្រុមការងារក្រសួងរៀបចំដែនដី បានសម្រេចចេញបណ្ណកម្មសិទ្ធិចំនួន ៤ ២៤៨បណ្ណជូនអតិថិជនដែលបានបង់ប្រាក់គ្រប់ ១០០% បានបំពេញគ្រប់លក្ខខណ្ឌ និងមិនជាប់ពាក់ព័ន្ធជាមួយតតិយជន។

គម្រោងទាំងនោះ រួមមាន៖ ១. បុរីសន្តិភាព២ ភូមិដំណាក់ត្រយឹង សង្កាត់ចោមចៅទី២ ខណ្ឌពោធិ៍សែនជ័យ ចំនួន ២ ៧០៥បណ្ណ, ២. បុរីរុងរឿងទួលពង្រ ភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យចំនួន ៥៦០បណ្ណ, ៣. បុរីម៉ន ដានី គម្រោងទី ១០, ១៤, ១៦, ១៧, ១៨, ១៩, ២០, ២១, ២២, ២៤, ២៥ និងគម្រោងទី២៦ ក្នុងភូមិសាស្ត្រខណ្ឌកំបូល និងខណ្ឌពោធិ៍សែនជ័យចំនួន ៤៦៨បណ្ណ, ៤. បុរីនាគរាជសិទ្ធី ភូមិទួលពឡាំង សង្កាត់ពន្សោង ខណ្ឌព្រែកព្នៅ ចំនួន ១១៦បណ្ណ។

៥. បុរីចាវ សុជាតិ គម្រោង៦ ភូមិត្នោតខ្ពស់ សង្កាត់ពន្សោង ខណ្ឌព្រែកព្នៅ ចំនួន ៩៩បណ្ណ, ៦. បុរីចាន់ នន់វិទ្យា ភូមិត្រពាំងក្រសាំង សង្កាត់ត្រពាំងក្រសាំង ខណ្ឌពោធិ៍សែនជ័យ ចំនួន ១០៩បណ្ណ, ៧. គម្រោងផ្ទះល្វែងវេង ឡុង ភូមិព្រែកតាពៅ សង្កាត់ព្រែកប្រា ខណ្ឌច្បារអំពៅ ចំនួន ៩៦បណ្ណ, ៨. បុរីវី អាយ ភី ភូមិម៉ឺនត្រា, ភូមិគោកឪឡឹក និងភូមិហារ សង្កាត់ស្ពានថ្ម ខណ្ឌដង្កោចំនួន ៦៧បណ្ណ និង៩. បុរីសុខ សាន្ត ភូមិព្រៃព្រីងត្បូង២ សង្កាត់ចោមចៅទី៣ ខណ្ឌពោធិ៍សែនជ័យ ចំនួន ២៨បណ្ណ។

តាមរយៈសេចក្ដីប្រកាសព័ត៌មាននេះ ក្រសួងរៀបចំដែនដី នគរូបនីយកម្ម និងសំណង់ បានអញ្ជើញអតិថិជនរបស់គម្រោងអភិវឌ្ឍន៍បុរី ផ្ទះល្វែង និងដីឡូត៍ទាំង ៩ក្រុមហ៊ុនខាងលើ ទៅទទួលយកបណ្ណកម្មសិទ្ធិ នៅសាលសន្និបាត២០២១ ជាន់ទី២ នាទីស្តីការក្រសួង ដ.ន.ស. ចាប់ថ្ងៃទី២ ដល់ទី៦ ខែមីនា ឆ្នាំ២០២៦ នៅរៀងរាល់ម៉ោងធ្វើការ។

ដោយឡែក សម្រាប់អតិថិជនដែលខកខានមិនបានមកទទួលយកបណ្ណកម្មសិទ្ធិ តាមកាលបរិច្ឆេទកំណត់ខាងលើ អាចទាក់ទងទៅកាន់ការិយាល័យរៀបចំដែនដី នគរូបនីយកម្ម សំណង់ និងភូមិបាលតាមបណ្តាខណ្ឌ នៃទីតាំងដី។ រីឯអតិថិជនដែលមិនទាន់បានបំពេញគ្រប់លក្ខខណ្ឌ ក្រសួងរៀបចំដែនដី នឹងបន្តជួបពិភាក្សាដោះស្រាយបញ្ចប់ ដើម្បីរៀបចំនីតិវិធីចុះបញ្ជីផ្ទេរកម្មសិទ្ធិជូន ជាបន្តបន្ទាប់ទៀត៕

អត្ថបទ៖ វីរៈ រូបភាព៖ ក្រសួងរៀបចំដែនដី

The post ក្រសួងរៀបចំដែនដី សម្រេចចេញបណ្ណកម្មសិទ្ធិជាង ៤ពាន់បណ្ណ​ ជូនអតិថិជនទិញពីគម្រោងអភិវឌ្ឍន៍ចំនួន ៩ក្រុមហ៊ុន   appeared first on Millions times.

ទន្ទឹមនេះ អ្នកឧកញ៉ា បណ្ឌិត សំ សុខនឿន ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP បានលើកឡើងជាសំនួរថា តើវិស័យអចលនវត្ថុពិតជាជាប់គាំងទាំងស្រុងមែនទេ?

អ្នកឧកញ៉ា បណ្ឌិត សំ សុខនឿន  បានរៀបរាប់ថា បងប្អូនស្ទើរតែគ្រប់ៗគ្នា ទាំងអ្នកវិនិយោគជាជនជាតិខ្មែរ ទាំងវិនិយោគជាជនជាតិបរទេសដែលកំពុងរកស៊ី ឬវិនិយោគ និងអភិវឌ្ឍអចលនវត្ថុ នៅក្នុងប្រទេសកម្ពុជា ជាពិសេសអ្នកដែលមិនប្រឡូកក្នុងវិស័យនេះ តែងនិយាយជាអួររួមថា «វិស័យអចលនវត្ថុនៅកម្ពុជាកំពុងជាប់គាំង»។

តាមដានជាមួយយើង៖ Million Times

អ្នកឧកញ៉ា ប្រធានក្រុមប្រឹក្សាភិបាលនៃសម្ព័ន្ធក្រុមហ៊ុន SAM SN GROUP បានបញ្ជាក់ដូច្នេះថា ៖ «ក្នុងនាមខ្ញុំជាអ្នកប្រឡូកផ្ទាល់ ឬវិនិយោគផ្ទាល់ក្នុងវិស័យនេះ ជាច្រើនឆ្នាំ និងជាអ្នកប្រឡូកជារៀងរាល់ថ្ងៃ ខ្ញុំនឹងធ្វើការចែករំលែកជូនបងប្អូនយើងឱ្យជ្រាបច្បាស់នៅក្នុងវិស័យនេះដូចខាងក្រោម ៖

1. លំនៅដ្ឋានផ្ទះ ឬខុនដូ តម្លៃសមរម្យ ($17,000 -$49,000) ក្នុងទីក្រុងភ្នំពេញ កំពុងមានតម្រូវការខ្ពស់សម្រាប់ប្រជាជនកម្ពុជា។

2. វីឡាប្រណិតសម្រាប់រស់នៅផ្ទាល់ខ្លួនក្នុងទីក្រុងភ្នំពេញ នៅតែមានតម្រូវការសម្រាប់ មន្រ្តីរាជការកំរិតខ្ពស់ អ្នកជំនួញធំៗ ជាលក្ខណៈភ្លៀងរលឹម (មួយៗ) តែមិនមែនជាតម្រូវការខ្ពស់ដូចមុនឆ្នាំ២០១៩ ដែលនាំគ្នាទិញទុកចំណេញនោះទេ។

3. ដីធ្លីក្នុងទីក្រុងភ្នំពេញ ទីតាំងល្អៗ លើផ្លូវធំ រូបរាងដីល្អៗ ហើយលក់ក្នុងតម្លៃ ពី 30% ទៅ 50% ក្រោមតម្លៃទីផ្សារមុនឆ្នាំ2019 នៅតែមានតម្រូវការ ឬនៅតែមានអ្នកទិញ តែជាតម្រូវការភ្លៀងរលឹម (មួយៗ) និង Slow ដោយសារអ្នកទិញមានជំរើសច្រើន និងមានអំណាចក្នុងការចចារ។

4. ដីធ្លីសម្រាប់រោងចក្រ ឃ្លាំង សួនឧស្សាហកម្ម តំបន់សេដ្ឋកិច្ចពិសេស ជាពិសេសខេត្តជាប់ទីក្រុងភ្នំពេញ មានតម្រូវការជាហូរហែរ តែតម្លៃដែលត្រូវការគឺមិនលើពី $10/m2 និងប្រភេទដីទំហំធំ ដែលអ្នកទិញទិញសម្រាប់ការពង្រីកបន្ថែមរោងចក្រនោពេលអនាគត។ ទោះជាយ៉ាងណាតម្រូវការនេះ មានមួយៗ និងប្រើពេលយូរ (slow) ក្នុងការបង្កើតប្រតិបត្តិការទិញលក់។

5. តម្រូវការដីកសិកម្ម ដីកសិ-ឧស្សាហកម្ម មានតម្រូវការទិញតិចតួច នោះដោយសារ តែអ្នកវិនោយោគដីធ្លីធំៗបានចាប់ដៃគូវិនិយោគក្រៅប្រទេស និងបានបង្វែរដីដែលធ្លាប់ទិញទុកចោល ទៅជាដីកសិកម្ម ដីកសិ-ឧស្សាហកម្មវិញ ហើយតម្រូវការដីកសិកម្ម ឬដីកសិ-ឧស្សាហកម្មនេះជាប្រភេទដីធំៗ និងត្រូវតែជាដីដែលមានតម្លៃធូរថ្លៃ មិនលើសពី $3/m2 នោះទេ។

6. ខុនដូក្នុងទីតាំងពិសេស ដូចជាក្នុងតំបន់បឹងកេងកង1 ដូនពេញ -ល- ជាប្រភេទខុនដូមានតម្លៃខ្ពស់បែប Premium នៅតែមានអ្នកទិញមួយៗ តែមិនច្រើននោះដែរ ហើយតម្រូវការនេះមានកំណត់។

7. គ្រប់គម្រោងអភិវឌ្ឍន៍ត្រូវតែជាគម្រោងដែលមានការគាំទ្រពីធនាគារដល់អ្នកទិញក្នុងអត្រាការប្រាក់សមរម្យ និងមានភាពរឹងមាំផ្នែកហិរញ្ញវត្ថុសម្រាប់គម្រោងរបស់ខ្លួន ដែលអាចនាំឱ្យមានទំនុកចិត្តសម្រាប់អ្នកទិញ ទើបជាជំរើសសម្រាប់អ្នកទិញ»៕

អត្ថបទ៖ ប៊ី, ប្រភព៖ អ្នកឧកញ៉ា បណ្ឌិត សំ សុខនឿន

The post អ្នកឧកញ៉ា បណ្ឌិត សំ សុខនឿន ចែករំលែក ៧ ចំណុច ទាក់ទងស្ថានភាពវិស័យអចលនទ្រព្យបច្ចុប្បន្ន appeared first on Millions times.

ដើម្បីចុះបញ្ជី បង់ពន្ធលើអចលនទ្រព្យ អ្នកជាប់ពន្ធដែលជាម្ចាស់អចលនទ្រព្យត្រូវរៀបចំឯកសារសំខាន់ៗមួយចំនួនដូចជា៖

តាមដានជាមួយយើង៖ Million Times

• អត្តសញ្ញាណប័ណ្ណសញ្ជាតិខ្មែរ ឬសំបុត្របញ្ជាក់កំណើត ឬលិខិតឆ្លងដែនសម្រាប់ជនបរទេស ឬសៀវភៅគ្រួសារ ឬសៀវភៅស្នាក់នៅ ឬលិខិតបញ្ជាក់ទីលំនៅ (ច្បាប់ថតចម្លង)
• បណ្ណសម្គាល់សិទ្ធិ ឬបណ្ណសម្គាល់សិទ្ធិកាន់កាប់អចលនវត្ថុ ឬវិញ្ញាបនបត្រសម្គាល់ម្ចាស់អចលនវត្ថុ ឬឯកសារពាក់ព័ន្ធនឹងការកាន់កាប់ អចលនទ្រព្យដែលបញ្ជាក់ដោយអាជ្ញាធរឃុំ/សង្កាត់ឡើងទៅ (ច្បាប់ថតចម្លង)
• ទីតាំងអចលនទ្រព្យ (និយាមកា ដែលមានរយៈទទឹង និងរយៈបណ្តោយ)
• រូបថតអចលនទ្រព្យ
• បំពេញទម្រង់ Form PT01
• វិក្កយបត្រអគ្គិសនី ឬវិក្កយបត្រទឹក (ប្រសិនបើមាន)
• ឯកសារពាក់ព័ន្ធផ្សេងទៀតរួមមាន លិខិតអនុញ្ញាតសាងសង់ លិខិតបើកការដ្ឋានសាងសង់ លិខិតបិទការដ្ឋានសាងសង់ លិខិតបញ្ជាក់ ពីអាជ្ញាធរមានសមត្ថកិច្ច (ក្នុងករណីសំណង់ទើបសាងសង់ ឬមានការប្រែប្រួល)។

អ្នកជាប់ពន្ធត្រូវផ្តល់ព័ត៌មានជូនរដ្ឋបាលសារពើពន្ធ (បច្ចុប្បន្នភាពព័ត៌មានអចលនទ្រព្យ) ដោយត្រូវភ្ជាប់មកជាមួយនូវឯកសារដូចបានបញ្ជាក់ ខាងលើ រួមជាមួយបង្កាន់ដៃបញ្ជាក់ការបង់ប្រាក់ពន្ធនាឆ្នាំកន្លងមក ឬលេខអត្តសញ្ញាណកម្មអចលនទ្រព្យ (PIN) ឬប័ណ្ណសម្គាល់ការបង់ពន្ធ លើអចលនទ្រព្យ ចំពោះអចលនទ្រព្យដែល៖

• មូលដ្ឋានគិតពន្ធត្រូវបានប្រែប្រួល ដូចជាដីត្រូវបានយកទៅសាងសង់ផ្ទះ អគារ និង/ឬសំណង់ផ្សេងៗ ឬផ្ទះ អគារ និងសំណង់ផ្សេង ត្រូវបានសាងសង់បន្ថែម ឬបន្ថយ ឬរំលាយចោល
• អចលនទ្រព្យត្រូវបានផ្លាស់ប្តូរកម្មសិទ្ធិករ អ្នកកាន់កាប់ ឬអ្នកទទួលប្រយោជន៍ចុងក្រោយនៃអចលនទ្រព្យ៕

អត្ថបទ៖ ប៊ី

The post តើឯកសារសំខាន់ៗអ្វីខ្លះ ដែលម្ចាស់អចលនទ្រព្យត្រូវមាន សម្រាប់ការចុះបញ្ជី ឬធ្វើបច្ចុប្បន្នភាពព័ត៌មានអចលនទ្រព្យ? appeared first on Millions times.

របាយការណ៍ បានឱ្យដឹងថា សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួន ក៏បានបន្តកើនឡើង​ជាលំដាប់ក្នុងកម្រិត +១,២២% គិតត្រឹមពីខែកញ្ញា ឆ្នាំ២០២៥​។ នៅចុងត្រីមាសនេះ សមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានចំនួន ១៦,១៧ ពាន់លានដុល្លារអាមេរិក (ស្មើនឹងប្រមាណ ៧,៩៩ ពាន់លានដុល្លារ)។

បើទោះបីជា​ ចំនួនគណនី​​នៃកម្ចី​អចលនទ្រព្យមាន​​ត្រឹមតែ​ ៨,៩៦% នៃ​ចំនួន​គណនី​សរុបក៏ដោយ កម្ចីអចលនទ្រព្យនៅតែមានលើសពីពាក់កណ្តាលនៃសមតុល្យឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនសរុប ៤៩,៤៣% ចំណែកឯសមតុល្យឥណទានប្រើប្រាស់ផ្ទាល់ខ្លួនមានចំណែក ៨៣,១៣% និងសមតុល្យឥណទានប្រើប្រាស់ផ្ទាល់ខ្លួន មានចំណែក ៤៨,៨៩%។ 

តាមដានជាមួយយើង៖ Million Times

សមតុល្យប័ណ្ណឥណទានមានចំណែកតូចគឺត្រឹមតែ ១,៦៨% តែប៉ុណ្ណោះ។ និយាយជារួម សមតុល្យឥណទានមានការកើន​ឡើងជាវិជ្ជមាននៅតំបន់​ដូចជា +៣,៧% នៅតំបន់ខ្ពង់រាប +០,៨% នៅតំបន់ទំនាប +៣,៤% នៅតំបន់ឆ្នេរ និង +២,២% នៅតំបន់ទន្លេសាប។

លោក អឿ សុធារ័ត្ន ប្រធាននាយកប្រតិបត្តិនៃក្រុមហ៊ុនក្រេឌីត ប្យួរ៉ូ ខេមបូឌា ខូ អិលធីឌី បានមានប្រសាសន៍ថា ៖«តម្រូវការពាក្យស្នើសុំឥណទានលក្ខណៈបុគ្គលសម្រាប់ប្រើប្រាស់ផ្ទាល់ខ្លួនមានការកើនឡើង ជាមួយនឹងសមិទ្ធផលឥណទានសម្រាប់ប្រើប្រាស់ផ្ទាល់ខ្លួននៅតែវិជ្ជាមាន ជាមួយនឹងចំនួនគណនី និងសមតុល្យកម្ចីក្នុងត្រីមាសទីបីនេះ បើប្រៀបធៀបនឹងត្រីមាសមុន»។

លោកបានបន្ថែមទៀតថា គុណភាពឥណទានមានការធ្លាក់ចុះតិចតួចបើធៀបនឹងត្រីមាសមុន ជាមួយនឹងការធ្លាក់ចុះនៃអនុបាតនៃគណនីប្រាក់កម្ចីជាមួយនឹងការសងយឺត ៩០ថ្ងៃហួសកាលបរិច្ឆេទកំណត់ពី ៥,៤១% ក្នុងត្រីមាសទីពីរក្នុងឆ្នាំ២០២៥ មក ៥,៦៩% ក្នុងត្រីមាសនេះ៕

អត្ថបទ៖ ប៊ី

The post កម្ចីអចលនទ្រព្យ កើនដល់ជិត ៨ ពាន់លានដុល្លារ គិតត្រឹមត្រីមាសទី ៣ ឆ្នាំ ២០២៥ appeared first on Millions times.

កម្មសិទ្ធិករ ឬសិទ្ធិវន្ត ឬអ្នកតំណាង ដែលមានសិទ្ធិ ត្រូវដាក់លិខិតប្រកាស និងបង់ប្រាក់ពន្ធលើថ្លៃឈ្នួលអចលនទ្រព្យជូនរដ្ឋបាលសារពើពន្ធ ដែលអចលនទ្រព្យនោះស្ថិតនៅ ជារៀងរាល់ខែយ៉ាងយឺតបំផុតត្រឹមថ្ងៃទី ២០ នៃខែបន្ទាប់ ប្រសិនបើកិច្ចសន្យាតម្រូវឱ្យបង់ថ្លៃឈ្នួលប្រចាំខែ ឬយ៉ាងយឺតបំផុតត្រឹមថ្ងៃទី ២០ នៃខែបន្ទាប់ (គិតពីខែដែលធ្វើការទូទាត់ថ្លៃឈ្នួលសរុប) ប្រសិនបើកិច្ចសន្យាតម្រូវឱ្យមានការបង់ថ្លៃឈ្នួលសម្រាប់រយៈពេលច្រើនខែ។

អគ្គនាយកដ្ឋានពន្ធដារ បានបញ្ជាក់ថា យ៉ាងណាមិញ ពន្ធលើថ្លៃឈ្នួលអចលនទ្រព្យ ក៏មានការលើកលែងផងដែរចំពោះថ្លៃឈ្នួលពីការជួលអចលនទ្រព្យចំពោះគ្រប់ករណីទាំងឡាយ ដែលសរុបប្រាក់ឈ្នួលប្រចាំខែក្រោម ៥០០ ០០០ (ប្រាំសែន) រៀល។

តាមដានជាមួយយើង៖ Million Times

ទន្ទឹមនឹងនេះ ពន្ធនេះក៏ត្រូវបានលើកលែងផងដែរចំពោះ៖

– ថ្លៃឈ្នួលពីការជួលអចលនទ្រព្យរបស់រាជរដ្ឋាភិបាល ឬក្រសួង ស្ថាប័នរាជរដ្ឋាភិបាល

– ថ្លៃឈ្នួលពីការជួលអចលនទ្រព្យរបស់បេសកកម្មការទូត ឬកុងស៊ុលបរទេស អង្គការអន្តរជាតិ និងទីភ្នាក់ងារសហប្រតិបត្តិការបច្ចេកទេសរបស់រដ្ឋាភិបាលដទៃទៀត

– ថ្លៃឈ្នួលពីការជួលអចលនទ្រព្យរបស់អង្គការ ឬសមាគមណាមួយ ដែលត្រូវបានរៀបចំឡើង និងដំណើរការសម្រាប់គោលដៅសុទ្ធសាធ ខាងសាសនា សប្បុរសធម៌ វិទ្យាសាស្ត្រ អក្សរសាស្ត្រ ឬអប់រំ ហើយគ្មានចំណែកណាមួយនៃថ្លៃឈ្នួល ត្រូវបានប្រើប្រាស់ជាប្រយោជន៍ឯកជន

– ប្រាក់ដែលអ្នកជួលបានតម្កល់ទុកជាប្រាក់ធានា ដែលកម្មសិទ្ធិករ ឬសិទ្ធិវន្តត្រូវប្រគល់គ្រប់ចំនួនឱ្យអ្នកជួលវិញនៅពេលចប់កិច្ចសន្យា

– ថ្លៃឈ្នួលដែលបានកាត់ទុកប្រាក់ពន្ធរួចហើយ ដោយសហគ្រាសជាអ្នកជាប់ពន្ធតាមរបបស្វ័យប្រកាស ស្របតាមមាត្រា ២៥ និងមាត្រា ២៦ នៃច្បាប់ស្តីពីសារពើពន្ធ

-ថ្លៃឈ្នួលពីការជួលអចលនទ្រព្យរបស់សហគ្រាសជាអ្នកជាប់ពន្ធតាមរបបស្វ័យប្រកាស ដែលបានគិតបញ្ចូលក្នុងប្រាក់ចំណូលជាប់ពន្ធ របស់សហគ្រាសរួចហើយ៕

អត្ថបទ៖ ប៊ី

The post ការជួលអចលនទ្រព្យតម្លៃក្រោម ៥ សែនរៀល ត្រូវបានលើកលែងពន្ធលើថ្លៃឈ្នួលអចលនទ្រព្យ appeared first on Millions times.

អគ្គនាយកដ្ឋានពន្ធដារ បានឱ្យដឹងថា សម្រាប់ម្ចាស់អចលនទ្រព្យទាំងអស់នៅភ្នំពេញ និងបណ្តាខេត្តទាំងអស់ អគ្គនាយកដ្ឋានពន្ធដារបានពិនិត្យឃើញថា រហូតមកទល់ពេលនេះ មានម្ចាស់អចលនទ្រព្យជាច្រើនបានមកប្រកាសបង់ប្រាក់ពន្ធលើអចលនទ្រព្យ សម្រាប់ឆ្នាំ២០២៥ ហើយក៏នៅមានម្ចាស់អចលនទ្រព្យមួយចំនួនទៀត នៅមិនទាន់បានបំពេញកាតព្វកិច្ចប្រកាសបង់ប្រាក់ពន្ធនេះនៅឡើយ។

អគ្គនាយកដ្ឋានពន្ធដារ បានឱ្យដឹងទៀតថា អនុវត្តតាមច្បាប់នឹងបទប្បញ្ញត្តិជាធរមាន ម្ចាស់អចលនទ្រព្យត្រូវមានកាតព្វកិច្ចប្រកាសបង់ពន្ធលើអចលនទ្រព្យយ៉ាងយឺត បំផុតត្រឹមថ្ងៃទី៣០ ខែកញ្ញា នៃឆ្នាំជាប់ពន្ធនីមួយៗ ផុតរយៈពេលនេះ ម្ចាស់អចលនទ្រព្យនឹងត្រូវទទួលរងទណ្ឌកម្មរដ្ឋបាល (ពន្ធបន្ថែម និងការប្រាក់) ស្របតាមច្បាប់ស្តីពីសារពើពន្ធជាធរមាន។

ដើម្បីផ្តល់លទ្ធភាពជូនម្ចាស់អចលនទ្រព្យ ដែលមានឆន្ទៈក្នុងការបំពេញកាតព្វកិច្ចប្រកាសបង់ពន្ធលើអចលនទ្រព្យ រាជរដ្ឋាភិបាលបានសម្រេចបន្តការលើកលែងទណ្ឌកម្មរដ្ឋបាល (ពន្ធបន្ថែម និងការប្រាក់) ចំពោះពន្ធលើអចលនទ្រព្យ ដូចតទៅ “ចំពោះអចលនទ្រព្យ (មានបណ្ណកម្មសិទ្ធិ ឬគ្មានបណ្ណកម្មសិទ្ធិ) ដែលពុំធ្លាប់បានចុះបញ្ជី និងប្រកាសបង់ពន្ធលើអចលនទ្រព្យកន្លងមក បន្តអនុញ្ញាតឱ្យចុះបញ្ជី និងប្រកាសបង់ពន្ធ ចាប់ពីឆ្នាំកាន់កាប់ ឬទទួលប្រយោជន៍ចុងក្រោយ និងចំពោះអចលនទ្រព្យ ដែលបានចុះបញ្ជី និងប្រកាសបង់ពន្ធកន្លងមក ប៉ុន្តែខកខានពុំបានប្រកាសបង់ពន្ធក្នុងឆ្នាំខ្លះ អនុញ្ញាតបន្តការលើកលែងទណ្ឌកម្មរដ្ឋបាល (ពន្ធបន្ថែម និងការប្រាក់) រហូតដល់ដំណាច់ឆ្នាំ ២០២៥។ ការលើកលែងនេះ ពុំមានអានុភាពប្រតិសកម្មចំពោះទណ្ឌកម្មរដ្ឋបាល (ពន្ធបន្ថែម និងការប្រាក់) ដែលបានបង់រួចហើយនោះទេ។”។

តាមដានជាមួយយើង៖ Million Times

អគ្គនាយកដ្ឋានពន្ធដារ សូមជម្រាបជូនដល់ម្ចាស់អចលនទ្រព្យទាំងអស់ ដែលមិនទាន់បានបំពេញកាតព្វកិច្ចចុះបញ្ជីអចលនទ្រព្យ ឬធ្វើបច្ចុប្បន្នភាពព័ត៌មានអចលនទ្រព្យ និងប្រកាសបង់ប្រាក់ពន្ធនៅឡើយ សូមអញ្ជើញទៅចុះបញ្ជីអចលនទ្រព្យ ឬធ្វើបច្ចុប្បន្នភាពព័ត៌មានអចលនទ្រព្យរបស់ខ្លួន នៅសាខាពន្ធដារខេត្ត-ខណ្ឌ ដែលអចលនទ្រព្យស្ថិតនៅ។

ចំពោះម្ចាស់អចលនទ្រព្យ ដែលបានចុះបញ្ជី និងធ្វើបច្ចុប្បន្នភាពព័ត៌មានអចលនទ្រព្យរួចរាល់ក្នុងប្រព័ន្ធគ្រប់គ្រងទិន្នន័យអចលនទ្រព្យរបស់អគ្គនាយកដ្ឋានពន្ធដារ និងមានបណ្ណសម្គាល់ការបង់ពន្ធអចលនទ្រព្យ មេត្តាអញ្ជើញមកប្រកាសបង់ប្រាក់ពន្ធ ឱ្យបានទាន់ពេលវេលាត្រឹមថ្ងៃទី ៣១ ខែធ្នូ ឆ្នាំ ២០២៥ នៅអគ្គនាយកដ្ឋានពន្ធដារ ឬសាខាពន្ធដារខេត្ត-ខណ្ឌដែលអចលន ទ្រព្យស្ថិតនៅ ឬនៅគ្រប់សាខាធនាគារពាណិជ្ជ ដែលបានចុះអនុស្សរណៈនៃការយោគយល់គ្នាជាមួយក្រសួងសេដ្ឋកិច្ច និងហិរញ្ញវត្ថុ ឬបង់ពន្ធតាមរយៈកម្មវិធីទូរសព្ទដៃអ្នកជាប់ពន្ធ (GDT Taxpayer App) ដែលអាចទាញយកមកប្រើប្រាស់ពី App Store ឬ Play Store សម្រាប់អចលនទ្រព្យ ដែលធ្លាប់បានប្រកាសបង់ពន្ធលើអចលនទ្រព្យកន្លងមក។

សម្រាប់ព័ត៌មានបន្ថែម សូមធ្វើការទាក់ទងមក GDT Call Center (១២៧៧) ឬ GDT Live Chat រៀងរាល់ថ្ងៃនិងម៉ោងធ្វើការ។

អគ្គនាយកដ្ឋានពន្ធដារសង្ឃឹមយ៉ាងមុតមាំថា បន្ទាប់ពីទទួលបានសេចក្តីជូនដំណឹងនេះ ម្ចាស់អចលនទ្រព្យ ទាំងអស់ពិតជានឹងយកចិត្តទុកដាក់ និងអញ្ជើញមកបំពេញកាតព្វកិច្ចសារពើពន្ធឱ្យបានទាន់ពេលវេលាកំណត់ខាងលើជាពុំខាន៕

អត្ថបទ៖ ប៊ី

The post ពន្ធដារប្រកាសពន្យារពេលបង់ពន្ធលើអចលនទ្រព្យដល់ចុងឆ្នាំ ២០២៥ នេះ appeared first on Millions times.

តាមដានជាមួយយើង៖ Million Times

ការអនុម័តនេះ ធ្វើឡើងក្នុងកិច្ចប្រជុំក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ លើកទី ២៦ អាណតិ្តទី១ ក្រោមអធិបតីភាពឯកឧត្តម អូន ព័ន្ធមុនីរ័ត្ន ឧបនាយករដ្ឋមន្រ្តី រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងជាប្រធានក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ កាលពីថ្ងៃទី ៣ ខែតុលា ឆ្នាំ ២០២៥។

ក្នុងកិច្ចប្រជុំនេះ ក្រុមប្រឹក្សាអាជ្ញាធរសេវាហិរញ្ញវត្ថុមិនមែនធនាគារ បានអនុម័តលើការស្នើសុំបោះផ្សាយលក់មូលបត្រកម្មសិទ្ធិជាសាធារណៈលើកដំបូងរបស់ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន ម.ក នៅក្នុងទីផ្សារកំណើននៃក្រុមហ៊ុនផ្សារមូលបត្រកម្ពុជា។

ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន ម.ក គឺជាក្រុមហ៊ុនដែលមានអាជីវកម្មចម្បងខាងអភិវឌ្ឍអចលនទ្រព្យប្រណីតនៅកម្ពុជា ដោយផ្តោតលើការអភិវឌ្ឍអគារសម្រាប់លំនៅដ្ឋាន ពាណិជ្ជកម្ម និងការប្រើប្រាស់ចម្រុះ ហើយអតិថិជនគោលដៅ គឺផ្តោតលើប្រជាជនដែលមានចំណូលខ្ពស់។

ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន ម.ក បានស្នើសុំបោះផ្សាយលក់មូលបត្រកម្មសិទ្ធិជាសាធារណៈលើកដំបូង ដែលជាប្រភេទមូលបត្រកម្មសិទ្ធិដែលមានសិទ្ធិបោះឆ្នោតចំនួន ១០.០០០.០០០ ឯកតាមូលបត្រកម្មសិទ្ធិ សមមូលនឹង ២០% នៃចំនួនមូលបត្រកម្មសិទ្ធិសរុបរបស់ក្រុមហ៊ុន និងមានថ្លៃលក់ ៤.៨០០ (បួនពាន់ប្រាំបីរយ) រៀល ក្នុងមួយឯកតាមូលបត្រកម្មសិទ្ធិ ដោយក្នុងនោះក្រុមហ៊ុននឹងផ្តល់ទិន្នផលភាគលាភដែលមានការធានាប្រចាំឆ្នាំ ៧% សម្រាប់រយៈពេល ៥ ឆ្នាំ។

ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន ម.ក គឺជាក្រុមហ៊ុនបោះផ្សាយទី៣ ដែលបានអនុញ្ញាតឱ្យបោះផ្សាយលក់មូលបត្រកម្មសិទ្ធិជាសាធារណៈ នៅលើទីផ្សារកំណើននៃក្រុមហ៊ុនផ្សារមូលបត្រកម្ពុជា។

ការអនុម័តលើ ការស្នើសុំបោះផ្សាយលក់មូលបត្រកម្មសិទ្ធិជាសាធារណៈលើកដំបូងរបស់ក្រុមហ៊ុន ពីកាសូ ស៊ីធី ហ្គាដិន ឌីវេឡុបមិន ម.ក និងសេចក្តីព្រាងប្រកាសស្តីពី“ការបោះផ្សាយលក់មូលបត្របំណុលជាឯកជន របស់ ន.ម.ក.” បានចូលរួមចំណែកអនុវត្តគោលនយោបាយរបស់រាជរដ្ឋាភិបាល ក្នុងការជំរុញកំណើនសេដ្ឋកិច្ចជាតិ ជាពិសេសបង្កើនចំនួនក្រុមហ៊ុនបោះផ្សាយលក់មូលបត្រជាសាធារណៈ ព្រមទាំងស្របតាមតម្រូវការចាំបាច់ចំពោះមុខ សម្រាប់ការបន្តអភិវឌ្ឍទីផ្សារមូលបត្រកម្ពុជា៕

អត្ថបទ៖ វីរៈ រូបភាព៖ និយ័តករមូលបត្រកម្ពុជា  

The post ក្រុមហ៊ុនអភិវឌ្ឍអចលនទ្រព្យប្រណីតមួយ ទទួលបានការអនុម័តបោះផ្សាយលក់មូលបត្រកម្មសិទ្ធិជាសាធារណៈលើកដំបូង appeared first on Millions times.

ក្នុងចំណោមគម្រោងវិនិយោគសរុប គម្រោងវិនិយោគដែលមានទីតាំងស្ថិតនៅក្រៅតំបន់ សេដ្ឋកិច្ចពិសេសមានចំនួន ២១៦គម្រោង និងគម្រោងវិនិយោគដែលមានទីតាំងស្ថិតនៅក្នុងតំបន់សេដ្ឋកិច្ច ពិសេសមានចំនួន ១៥៧គម្រោង។ 

ដោយឡែក គម្រោងវិនិយោគក្នុងខែមិថុនា ឆ្នាំ២០២៥ នេះសរុបចំនួន៨៣គម្រោង (៣៦គម្រោងមានទីតាំងស្ថិតនៅក្នុងតំបន់សេដ្ឋកិច្ច ពិសេស និង៤៧គម្រោងទៀត ស្ថិតនៅក្រៅតំបន់សេដ្ឋកិច្ចពិសេស) ព្រមទាំងទុនវិនិយោគសរុបប្រមាណ ១,៦ប៊ីលានដុល្លារអាម៉េរិក និងអាចបង្កើតការងារបានប្រមាណ ៥២ពាន់កន្លែងផងដែរ។ 

គួរបញ្ជាក់ថា ក្នុងឆមាសទី១ ឆ្នាំ២០២៥នេះ ការអនុម័តគម្រោងវិនិយោគមានការ កើនឡើងចំនួន ១៨៣គម្រោង ខណៈទុនវិនិយោគមានការកើនឡើងប្រមាណ ២,៥ប៊ីលានដុល្លារអាម៉េរិក ស្មើនឹង ប្រមាណ ៧៧% ធៀបនឹងរយៈពេលដូចគ្នាក្នុងឆ្នាំ២០២៤៕

The post ឆមាសទី១ ឆ្នាំ២០២៥ ទទួលបាន ៣៧៣ គម្រោងថ្មីតម្លៃ ៥,៨ប៊ីលានដុល្លារអាម៉េរិក appeared first on Millions times.

តាមដានជាមួយយើង៖ Million Times

សម្តេច ហ៊ុន ម៉ាណែត បានបង្ហាញរបាយការណ៍ពីក្រុមប្រឹក្សាអភិវឌ្ឍន៍កម្ពុជា ឲ្យដឹងថា ក្នុងរយៈពេល ៥ ខែ នៃឆ្នាំ ២០២៥នេះ គម្រោងវិនិយោគចំនួន ២៩០ គម្រោង ត្រូវបានអនុម័ត ក្នុងទុនវិនិយោគប្រមាណ ៤,២ពាន់លានដុល្លារអាមេរិក។ បើប្រៀបធៀបនឹងរយៈពេលដូចគ្នាក្នុងឆ្នាំ២០២៤ ចំនួនគម្រោងបានកើនឡើងចំនួន ១៣៧គម្រោង ស្មើនឹងប្រមាណ ៩០% ខណៈទុនវិនិយោគបានកើនឡើងប្រមាណជាង ១,៤ ពាន់លានដុល្លារអាមេរិក ស្មើនឹងប្រមាណ ៥២%។

សម្តេច ហ៊ុន ម៉ាណែត បានថ្លែងថា រាជរដ្ឋាភិបាលកម្ពុជា ប្តេជ្ញាបន្តថែរក្សា ការពារសន្តិភាព និង ស្ថិរភាពពេញលេញទោះក្នុងតម្លៃណាក៏ដោយ។ ទន្ទឹមនឹងការរក្សាបាននូវសន្តិភាព និង ស្ថិរភាព រាជរដ្ឋាភិបាលបន្តគិតគូរ និងយកចិត្តទុកដាក់ខ្ពស់ លើការអភិវឌ្ឍហេដ្ឋារចនាសម្ព័ន្ធ ជាមួយនឹងការអភិវឌ្ឍធនធានពលកម្មវ័យក្មេង ប្រកបដោយភាពប្រកួតប្រជែងខ្ពស់ ដែលនឹងជួយគាំទ្រដល់ផលិតកម្មនានាបានយ៉ាងសកម្ម និងមានប្រសិទ្ធភាព។

សម្តេចក៏បានថ្លែងលើកទឹកចិត្តខ្ពស់ និងសូមឲ្យអ្នកវិនិយោគជ្រើសរើសកម្ពុជា ដើម្បីធ្វើការវិនិយោគកិច្ចការផ្សេងនៅកម្ពុជា។ សម្តេចបន្ថែមថា លោកអ្នកបានយល់ដឹងពីស្ថេរភាព និងស្ថានភាពនៅកម្ពុជា រាជរដ្ឋាភិបាលប្តេជ្ញាក្នុងការរក្សាលំនឹងដល់អ្នកវិនិយោគបន្តវិនិយោគនៅកម្ពុជា៕

អត្ថបទ៖ សាងតេជៈ រូបភាព៖ បណ្តាញសង្គមសម្តេចធិបតី

The post រយៈពេល ៥ខែឆ្នាំ២០២៥ គម្រោងវិនិយោគចំនួន ២៩០ គម្រោង ត្រូវបានអនុម័ត appeared first on Millions times.