តាមដានជាមួយយើង៖ Million Times

ADB Cambodia បានបង្ហោះឱ្យដឹងនៅថ្ងៃទី ៩ ខែតុលានេះថា លោក Anthony Gill នាយកស្ដីទីនៃធនាគារអភិវឌ្ឍន៍អាស៊ី (ADB) ប្រចាំកម្ពុជា បាននិយាយថា ក្នុងរយៈពេលវែង កម្ពុជាទំនងជាមិនពឹងផ្អែកខ្លាំងលើវិស័យកាត់ដេរ ដើម្បីជំរុញកំណើនសេដ្ឋកិច្ចទេ បើទោះបីជាវិស័យនេះនឹងនៅតែជាសសរស្ដម្ភដ៏សំខាន់មួយ សម្រាប់កំណើនក៏ដោយ។

លោកលើកឡើងថា​ «ដើម្បីធានាបាននូវកំណើនប្រកបដោយបរិយាប័ន្ន និងធន់ កម្ពុជា ត្រូវតែពង្រីកការវិនិយោគលើហេដ្ឋារចនាសម្ព័ន្ធ និងកិច្ចការពារសង្គម។ កិច្ចការនេះ អាចធ្វើទៅបានលុះត្រាតែមានការកៀរគរធនធានក្នុងស្រុកកាន់តែមានប្រសិទ្ធភាព»។

កាលពីថ្ងៃទី ៣០ ខែកញ្ញាកន្លងទៅនេះ ធនាគារអភិវឌ្ឍន៍អាស៊ី (ADB) បានបន្ថយការព្យាករកំណើនសេដ្ឋកិច្ចសម្រាប់កម្ពុជាពី ៦,១% មក ៤,៩% សម្រាប់ឆ្នាំ ២០២៥ ដោយឆ្លុះបញ្ចាំងពីបញ្ហាប្រឈមសេដ្ឋកិច្ច ទាក់ទងនឹងភាពតានតឹងភូមិសាស្ត្រនយោបាយជាមួយប្រទេសថៃ និងភាពមិនច្បាស់លាស់ជុំវិញទីផ្សារនាំចេញទៅសហរដ្ឋអាមេរិក។

ទោះជាយ៉ាងណា របាយការណ៍របស់ ADB មានការរំពឹងទុកអំពីកំណើនរឹងមាំដល់ឆ្នាំ ២០២៦ ដែលជំរុញដោយការបន្តលូតលាស់នៃវិស័យឧស្សាហកម្ម និងលំហូរចូលជាបន្តបន្ទាប់នៃការវិនិយោគផ្ទាល់ពីបរទេស។

បើតាម ADB ដដែល វិស័យឧស្សាហកម្មនឹងនៅតែជាម៉ាស៊ីនសេដ្ឋកិច្ចនាំមុខគេ។ ការនាំចេញសម្លៀកបំពាក់ ស្បែកជើង និងទំនិញធ្វើដំណើរ បានកើនឡើង ២២,២% ឆ្នាំលើឆ្នាំ សម្រាប់ឆមាសទីមួយឆ្នាំ ២០២៥ ដែលមួយផ្នែកបានជំរុញដោយអ្នកទិញរបស់អាមេរិក ដែលបានបង្កើនការទិញទុកជាមុន ដោយក្តីបារម្ភពីការដំឡើងពន្ធលើការនាំចូលផលិតផលពីកម្ពុជា។

ទោះជាមានការប្រុងប្រយ័ត្នពីសំណាក់អ្នកនាំចូលរបស់អាមេរិក ដោយសារភាពមិនច្បាស់លាស់នៃគោលនយោបាយពាណិជ្ជកម្មក៏ដោយ ក៏ផលិតកម្មក្នុងវិស័យកាត់ដេរ និងក្រៅពីវិស័យកាត់ ដេរ ត្រូវបានរំពឹងថានឹងនៅតែរឹងមាំ ដោយសារភាពអំណោយផលនៃការបន្ថយពន្ធគយមក ១៩% របស់អាមេរិកលើការនាំចូលពីកម្ពុជា៕

អត្ថបទ៖ វីរៈ រូបភាព៖ បណ្ដាញសង្គម

The post នាយកស្ដីទី ADB ប្រចាំកម្ពុជា៖ ក្នុងរយៈពេលវែង កម្ពុជាទំនងជាមិនពឹងផ្អែកខ្លាំងលើវិស័យកាត់ដេរ ដើម្បីជំរុញកំណើនសេដ្ឋកិច្ចទេ appeared first on Millions times.

តាមដានជាមួយយើង៖ Million Times

សេចក្ដីប្រកាសព័ត៌មានរបស់ CDC បានឲ្យដឹងថា ក្នុងខែមេសា ឆ្នាំ២០២៥ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគសរុបចំនួន៥៩គម្រោង ដែលមានទុនវិនិយោគសរុប ប្រមាណ៨៦០លានដុល្លារអាម៉េរិក និងអាចបង្កើតការងារបានប្រមាណ៣៩ពាន់ កន្លែង។ ក្នុងចំណោមគម្រោងវិនិយោគសរុប គម្រោងវិនិយោគដែលមានទីតាំងស្ថិតនៅក្រៅតំបន់សេដ្ឋកិច្ច ពិសេសមានចំនួន៣២គម្រោង និងគម្រោងវិនិយោគ ដែលមានទីតាំងស្ថិតនៅក្នុងតំបន់សេដ្ឋកិច្ចពិសេសមាន ចំនួន២៧គម្រោង។

ជារួម បើតាម CDC ការអនុម័តគម្រោងវិនិយោគមានការកើនឡើងចំនួន ៣៧គម្រោង ស្មើនឹងប្រមាណ ១៦៨% ខណៈទុនវិនិយោគមានការកើនឡើងប្រមាណជាង៥៥០លានដុល្លារអាម៉េរិក ស្មើនឹងប្រមាណ ១៧៨% ធៀបនឹងរយៈពេលដូចគ្នាក្នុងឆ្នាំ២០២៤។

សូមជម្រាបថា ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងវិនិយោគចំនួន ២៣១គម្រោង ក្នុងទុនវិនិយោគមានប្រមាណ ៣.៤ពាន់លានដុល្លារអាម៉េរិក នៅក្នុងរយៈពេល៤ខែនៃឆ្នាំ២០២៥នេះ បើប្រៀបធៀបនឹងរយៈពេលដូចគ្នាក្នុងឆ្នាំ២០២៤ ចំនួនគម្រោងបានកើនឡើងចំនួន ១០៣គម្រោង ស្មើនឹងប្រមាណ៨០% ខណៈទុនវិនិយោគបានកើនឡើងប្រមាណជាង ៨៥៦ លានដុល្លារអាម៉េរិក ស្មើនឹងប្រមាណ ៣៤%៕

អត្ថបទ៖ សាងតេជៈ រូបភាព៖ បណ្តាញសង្គម

The post ៥៩ គម្រោងវិនិយោគ មានទំហំទុន ៨៦០លានដុល្លារអាម៉េរិក ក្រុមប្រឹក្សាអភិវឌ្ឍន៍កម្ពុជា អនុម័តក្នុងខែមេសា ឆ្នាំ២០២៥ appeared first on Millions times.

ការវាយតម្លៃពីអង្គការ WTO ធ្វើឡើងក្នុងជំនួបរវាងលោកស្រី ចម និម្មល រដ្ឋមន្ត្រីក្រសួងពាណិជ្ជកម្ម និងលោកស្រី Ngozi Okonjo-Iweala អគ្គនាយិកាអង្គការពាណិជ្ជកម្មពិភពលោក អំឡុងពេលទៅចូលរួមកិច្ចប្រជុំស្តីពីការត្រួតពិនិត្យឡើងវិញគោលនយោបាយពាណិជ្ជកម្មលើកទី៣ នៅទីស្នាក់ការ WTO នៅទីក្រុងហ្សឺណែវ ប្រទេសស្វ៊ីស កាលពីថ្ងៃទី២៧ ខែមីនា ឆ្នាំ២០២៥។

តាមដានជាមួយយើង៖ Million Times

នៅក្នុងជំនួបពិភាក្សានេះ ភាគីទាំងពីរបានផ្លាស់ប្តូរយោបល់លើតួនាទីនៃប្រព័ន្ធពាណិជ្ជកម្មពហុភាគីក្នុងការគាំទ្រដល់ការអភិវឌ្ឍសង្គម សេដ្ឋកិច្ចរបស់ប្រទេសសមាជិកអភិវឌ្ឍន៍តិចតួច និងសារៈសំខាន់នៃយន្តការត្រួតពិនិត្យគោលនយោបាយពាណិជ្ជកម្មក្នុងការពង្រឹងគោលការណ៍តម្លាភាពរបស់ WTO។ 

ទន្ទឹមគ្នានេះ លោកស្រី Ngozi Okonjo-Iweala បានសម្តែងនូវការកោតសរសើរចំពោះការចូលរួមយ៉ាងសកម្មរបស់កម្ពុជាក្នុងកិច្ចការងាររបស់ WTO ជាពិសេសតួនាទីរបស់កម្ពុជាក្នុងនាមជាអ្នកសម្របសម្រួលក្រុមប្រទេស LDC និងការបំពេញកាតព្វកិច្ចនានា ដូចជាការអនុវត្តបាន ១០០% នៃកិច្ចព្រមព្រៀងកិច្ចសម្រួលពាណិជ្ជកម្ម និងការផ្តល់សច្ចាប័នលើកិច្ចព្រមព្រៀងឧបត្ថម្ភធនជលផលជាដើម។ លោកស្រីនាយិកា ក៏បានកោតសរសើរដល់កម្ពុជាចំពោះការសម្រេចបាននូវម៉ាក្រូសេដ្ឋកិច្ចដ៏រឹងមាំ និងការខិតខំប្រឹងប្រែងរបស់ខ្លួនក្នុងការធ្វើពិពិធកម្ម។

ក្នុងជំនួបដដែលនេះ លោកស្រី ចម និម្មល បានគូសបញ្ជាក់អំពីការគាំទ្ររបស់កម្ពុជាចំពោះប្រព័ន្ធពាណិជ្ជកម្មពហុភាគីដែលបើកចំហ និងផ្អែកលើវិធានច្បាប់ ដែលបានផ្ដល់អត្ថប្រយោជន៍ជាច្រើនដល់កម្ពុជា ហើយនឹងបានចាត់ទុកការត្រួតពិនិត្យគោលនយោបាយពាណិជ្ជកម្មជាយន្តការដ៏សំខាន់មួយសម្រាប់សមាជិកក្នុងការយល់ដឹងអំពីគោលនយោបាយ និងការអនុវត្តពាណិជ្ជកម្មរបស់កម្ពុជា និងសម្រាប់កម្ពុជាក្នុងការឆ្លុះបញ្ចាំងអំពីការអនុវត្តរបស់ខ្លួនផងដែរ។ 

លោកស្រីរដ្ឋមន្ត្រី ក៏បានសម្តែងនូវសេចក្តីសោមនស្សរីករាយចំពោះការចូលរួមរបស់សមាជិក ដែលបានបង្ហាញចំណាប់អារម្មណ៍មកលើគោលនយោបាយ និងការអនុវត្តពាណិជ្ជកម្មរបស់កម្ពុជា៕

អត្ថបទ៖ សាងតេជៈ រូបភាព៖ ក្រសួងពាណិជ្ជកម្ម

The post អង្គការពាណិជ្ជកម្មពិភពលោក កោតសរសើរកម្ពុជាសម្រេចបាននូវម៉ាក្រូសេដ្ឋកិច្ចដ៏រឹងមាំ appeared first on Millions times.

ក្នុងជំនួបនារសៀលថ្ងៃទី២៥ ខែមីនា ឆ្នាំ២០២៥ ចំពោះមុខសម្ដេច ហ៊ុន ម៉ាណែត នាយករដ្ឋមន្ត្រី លោកស្រី Mariam J. Sherman នាយិកាគ្រប់គ្រងនៃធនាគារពិភពលោក ប្រចាំកម្ពុជា វៀតណាម និងឡាវ បានកោតសរសើរចំពោះការអភិវឌ្ឍរីកចម្រើនយ៉ាងឆាប់រហ័សលើគ្រប់វិស័យរបស់កម្ពុជា ព្រមទាំងបានគូសបញ្ជាក់អំពីភាពជាដៃគូដ៏រឹងមាំរវាងធនាគារពិភពលោក ជាមួយនឹងរាជរដ្ឋាភិបាល នៅក្នុងកិច្ចដំណើរការនៃការអភិវឌ្ឍសង្គម-សេដ្ឋកិច្ចកម្ពុជា។ 

តាមដានជាមួយយើង៖ Million Times

ទន្ទឹមនឹងនេះ លោកស្រីក៏បានជម្រាបជូនសម្ដេចនាយករដ្ឋមន្រ្តីអំពីការអនុម័តលេីឯកសារស្តីពី​ ≪ក្របខណ្ឌភាពជាដៃគូរបស់ធនាគារពិភពលោកប្រចាំកម្ពុជា សម្រាប់ឆ្នាំ២០២៥-២០២៩≫ និងបានគូសបញ្ជាក់អំពីការបេ្ដជ្ញាចិត្តរបស់ធនាគារពិភពលោកក្នុងការបន្តកិច្ចសហប្រតិបត្តិការ និងគាំទ្រទៅដល់កម្ពុជា ដើម្បីរួមចំណែកក្នុងដំណើរឆ្ពោះទៅសម្រេចចក្ខុវិស័យកម្ពុជា ឆ្នាំ២០៥០ ។ 

ជាការឆ្លើយតប សម្ដេច ហ៊ុន ម៉ាណែត បានគូសបញ្ជាក់អំពីការដាក់ចេញនូវគោលនយោបាយ និងវិធានការនានារបស់រាជរដ្ឋាភិបាលក្នុងការធ្វើពិពិធកម្ម​ សំដៅដល់ការជំរុញ​កំណេីន​ និងការអភិវឌ្ឍ​ ដោយផ្តោតលេី​វិស័យជាច្រេីន ព្រមទាំងវិធានការគន្លឹះក្នុងការធានានូវបវិយាកាសអំណោយផលដល់ការវិនិយោគនៅកម្ពុជា ជាពិសេសការបង្កលក្ខណៈអំណោយផលដល់វិស័យឯកជនក្នុងការធ្វើសមាហរណកម្ម និងពង្រឹងភាពធន់របស់ខ្លួន។

ក្នុងជំនួបដដែលនោះ សម្ដេចនាយករដ្ឋមន្រ្តី និងលោកស្រីនាយិកា World Bank ក៏បានពិភាក្សាគ្នាអំពីកិច្ចសហប្រតិបត្តិការនៅក្នុងការកសាងមូលធនមនុស្សនៅកម្ពុជា ដោយក្នុងនោះ សម្ដេចក៏បានគូសបញ្ជាក់អំពីការដាក់ចេញនូវវិធានការចាំបាច់របស់រាជរដ្ឋាភិបាលនៅក្នុងការអភិវឌ្ឍមូលធនមនុស្សនៅកម្ពុជា តាមរយៈការពង្រឹងការអប់រំជាមូលដ្ឋាន​,​ ការបណ្តុះបណ្តាលជំនាញវិជ្ជាជីវៈ, ការពង្រឹងវិស័យសុខាភិបាល, ព្រមទាំង​ ការបង្កើតឱកាសការងារសម្រាប់ប្រជាពលរដ្ឋកម្ពុជា។ 

លោកស្រីនាយិកាបានសម្ដែងនូវការគាំទ្រចំពោះការដាក់ចេញនូវវិធានការទាំងនេះ​ និងបានគូសបញ្ជាក់ថា ធនាគារពិភពលោកបានត្រៀមខ្លួនរួចជាស្រេចនៅក្នុងការបន្តកិច្ចសហប្រតិបត្តិការ និងគាំទ្រដល់កម្ពុជានៅក្នុងការអភិវឌ្ឍមូលធនមនុស្ស ដែលជាកត្តាចាំបាច់នៅក្នុងការជំរុញភាពជោគជ័យនៃចក្ខុវិស័យកម្ពុជា ឆ្នាំ២០៥០ ។

កាលពី​ថ្ងៃទី​ ២៤ ខែសីហា ឆ្នាំ​ ២០២៣ រាជរដ្ឋាភិបាល បាន​ដាក់ចេញ​យុទ្ធសាស្ត្រ​បញ្ច​កោណ​ដំណាក់​កាល​ទី​១ រយៈពេល​ ៥ ​ឆ្នាំ សំដៅ​ប្រែក្លាយ​កម្ពុជា​ទៅជា​ប្រទេស​មាន​ចំណូល​មធ្យម​កម្រិត​ខ្ពស់​ត្រឹម​ឆ្នាំ​ ២០៣០ និង​ជា​ប្រទេស​ចំណូល​ខ្ពស់​ត្រឹម​ឆ្នាំ ២០៥០​។ យុទ្ធសាស្ត្រ​នេះ​សម្រាប់​រដ្ឋា​ភិ​បាល​ នីតិកាល​ទី​៧ គឺ​ផ្តោតលើ​វិស័យ​សំខាន់ៗ​៥ រួមមាន ការអភិវឌ្ឍ​ធនធានមនុស្ស​, ការ​ធ្វើ​ពិពិធ​កម្ម​សេដ្ឋកិច្ច និង​លើកកម្ពស់​សមត្ថភាព​ប្រកួតប្រជែង​, ការអភិវឌ្ឍ​វិស័យ​ឯកជន និង​ឱកាស​ការងារ ការលើកកម្ពស់​ភាព​ធ​ន់ និរន្តរភាព​, និង​ការ​​អភិវឌ្ឍ​ប្រកបដោយ​បរិ​យាប​ន្ន និង​ការពង្រឹង​សេដ្ឋកិច្ច​ឌីជីថល និង​សង្គម​។​ យុទ្ធសាស្ត្រ​នេះ មាន ៥​ ដំណាក់កាល​។ ដំណាក់កាល​ទី​១ មាន​អាទិភាព​ចំនួន ៥ គឺ​ផ្លូវថ្នល់ មនុស្ស ទឹក ភ្លើង និង​បច្ចេកវិទ្យា​៕

អត្ថបទ៖ សាងតេជៈ រូបភាព៖ ក្រុមព័ត៌មានសម្តេចធិបតី

The post ធនាគារពិភពលោក ប្តេជ្ញាបន្តគាំទ្រកម្ពុជា ក្នុងដំណើរឆ្ពោះទៅសម្រេចមហិច្ឆតាប្រទេសកំណូលខ្ពស់ ឆ្នាំ២០៥០ appeared first on Millions times.

ក្នុងឱកាសចូលរួមបើក «កិច្ចប្រជុំកំពូលធុរកិច្ចអាស៊ាន-កម្ពុជា ឆ្នាំ២០២៥» នៅថ្ងៃទី៦ ខែមីនានេះ សម្តេច ហ៊ុន ម៉ាណែត មានប្រសាសន៍ថា «តំបន់អាស៊ានបានវិវត្តខ្លួនទៅជានិមិត្តរូបនៃស្ថិរភាព និងវិបុលភាពដោយមានសក្ដានុពលដ៏សម្បើមដែលអាចឆ្លុះបញ្ចាំង តាមរយៈឋានៈជាសេដ្ឋកិច្ចធំជាងគេលំដាប់ទី៥ ក្នុងពិភពលោក។ តំបន់អាស៊ានមានបរិយាកាសវិនិយោគដ៏គួរឱ្យទាក់ទាញជាមួយនឹងជវភាពសេដ្ឋកិច្ចដ៏រឹងមាំ និងការប្តេជ្ញាចិត្តយ៉ាងមុតមាំចំពោះភាពជាដៃគូសេដ្ឋកិច្ច និងសមាហរណកម្មក្នុងតំបន់»។

តាមដានជាមួយយើង៖ Million Times

សម្តេចនាយករដ្ឋមន្ត្រីថ្លែងថា ដំណើរប្រកបដោយជោគជ័យរបស់តំបន់អាស៊ាន លើទិដ្ឋភាពភាពជាដៃគូសេដ្ឋកិច្ច បានស្តែងឡើងតាមរយៈបណ្តាញគ្រប់ជ្រុងជ្រោយ នៃកិច្ចព្រមព្រៀងពាណិជ្ជកម្មសេរី (FTAs) ជាមួយនឹងប្រទេសមានអំណាចសេដ្ឋកិច្ចសំខាន់ៗ។ សម្តេចបានបញ្ជាក់ថា ការផ្តល់សច្ចាប័នលើកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយក្នុងតំបន់ (RCEP) បានពង្រឹងបន្ថែមទៀតនូវការប្តេជ្ញាចិត្តឥតងាករេ របស់តំបន់អាស៊ាន ក្នុងការពង្រឹងសមាហរណកម្មក្នុងតំបន់ឱ្យកាន់តែស៊ីជម្រៅ និងជំរុញទំនាក់ទំនងសេដ្ឋកិច្ច ដែលផ្តល់ផលប្រយោជន៍ឱ្យគ្នាទៅវិញទៅមក។

«វឌ្ឍនភាពរបស់យើង ដែលត្រូវបានគាំទ្រដោយពាណិជ្ជកម្មដ៏រឹងមាំ ទាំងក្នុង និងក្រៅតំបន់អាស៊ាន និងបរិយាកាសអំណោយផលដល់ការវិនិយោគ, បានធ្វើឱ្យតំបន់នេះក្លាយជាមជ្ឈមណ្ឌលជាយុទ្ធសាស្ត្រសម្រាប់រំហូរមូលធនពិភពលោក។ សមិទ្ធផលទាំងនេះបានប្រែក្លាយជាកាលានុវត្តភាពជាក់ស្តែងសម្រាប់វិនិយោគិន ដែលស្វែងរកកំណើន និងស្ថិរភាពយូរអង្វែង»។ នេះជាការលើកឡើងបន្ថែមរបស់សម្តេច ហ៊ុន ម៉ាណែត។

ទន្ទឹមនឹងនេះដែរ សម្តេចបានបន្តរំលេចពីតម្លៃ និងភាពជោគជ័យរបស់តំបន់អាស៊ាន គឺផ្អែកលើពហុភាគីនិយម និងកុងសង់ស៊ីស (Consensus)។ ជាមួយនឹងបាវចនា «ចក្ខុវិស័យមួយ អត្តសញ្ញាណមួយ សហគមន៍មួយ» រដ្ឋជាសមាជិកទាំងអស់ បូករួមទាំងកម្ពុជា បានប្តេជ្ញាចិត្តក្នុងការសម្រេចឱ្យបាននូវចក្ខុវិស័យសហគមន៍អាស៊ាន ដើម្បីនាំមកនូវវឌ្ឍនភាពសង្គម-សេដ្ឋកិច្ច ពិតប្រាកដ សម្រាប់សហគមន៍អាស៊ានទាំងមូល។ កិច្ចខិតខំប្រឹងប្រែងរួមនេះ អនុញ្ញាតឱ្យអាស៊ាន ឆ្លងផុតបញ្ហាប្រឈមសេដ្ឋកិច្ចតំបន់ និងសកល និងភាពមិនប្រាកដប្រជាខ្ពស់។ ជាក់ស្តែង ទោះបីជាមានស្លាកស្នាមនៃជំងឺរាតត្បាត និងភាពស្មុគស្មាញផ្នែកភូមិសាស្ត្រនយោបាយ ក៏ដោយ ក៏គន្លងសេដ្ឋកិច្ចអាស៊ាននៅតែមានភាពរឹងមាំ និងភាពធន់ ហើយត្រូវបានព្យាករណ៍ថានឹងសម្រេចបានកំណើនក្នុងអត្រា ៤,៨% ក្នុងឆ្នាំ ២០២៥(AMRO, ខែ មករា ឆ្នាំ២០២៥)។

សម្តេចបានគូសបញ្ជាក់ថា ស្របពេលដែលយើងរៀបចំផែនការ ក្រោយឆ្នាំ២០២៥ តំបន់អាស៊ានកំពុងបន្តផ្តល់អាទិភាពដល់គំនិតផ្តួចផ្តើមជាយុទ្ធសាស្រ្ត ដើម្បីទាញយកប្រយោជន៍ពីកាលានុវត្តភាព ដែលកំពុងលេចឡើងថ្មីៗ និងដោះស្រាយបញ្ហាប្រឈមនាអនាគត។ មូលដ្ឋានគ្រឹះនៃកិច្ចខិតខំប្រឹងប្រែងនេះ គឺការបង្កើនការតភ្ជាប់អាស៊ាន, ដូចមានគូសរំលេចនៅក្នុងផែនការមេស្តីពីការតភ្ជាប់អាស៊ាន ឆ្នាំ២០២៥ ដោយសង្កត់ធ្ងន់លើការតភ្ជាប់ដោយរលូន ទាំងការដឹកជញ្ជូន, ពាណិជ្ជកម្ម, ការអប់រំ និងវប្បធម៌ ដែលនឹងជួយបង្កើនភាពប្រកួតប្រជែង, លើកកម្ពស់បរិយាប័ន្ន និងពង្រឹងជំហររបស់អាស៊ាន ជាមហាអំណាចសេដ្ឋកិច្ច ដែលមានការរួបរួម។

សម្តេចនាយករដ្ឋមន្រ្តីបានបន្ថែមថា អាស៊ាន ផ្តោតការយកចិត្តទុកដាក់លើការកសាងសេដ្ឋកិច្ចឌីជីថល និងការតភ្ជាប់ឌីជីថលដ៏រស់រវើក ដើម្បីពន្លឿនការអភិវឌ្ឍ ប្រកបដោយចីរភាព, ពង្រឹងភាពធន់ទៅនឹងហានិភ័យអវិជ្ជមាន ដែលមិនអាចប៉ាន់ប្រមាណបាន និងផ្តល់សិទ្ធិអំណាចដល់សហគ្រាសធុនតូច និងមធ្យម។ គំនិតផ្តួចផ្តើមទាំងនេះនឹងជំរុញឱ្យតំបន់អាស៊ានកាន់តែមានជវភាព, មានការតភ្ជាប់, ភាពធន់ និងបរិយាប័ន្នដែលផ្តល់ឱ្យនូវឱកាសដ៏ធំធេងសម្រាប់វិនិយោគ ប្រកបដោយចីរភាព ដល់ដៃគូពិភពលោករបស់យើង៕

អត្ថបទ៖ សាងតេជៈ រូបភាព៖ ក្រុមព័ត៌មាននាយករដ្ឋមន្រ្តី

The post សម្តេច ហ៊ុន ម៉ាណែត៖ អាស៊ានមានបរិយាកាសវិនិយោគដ៏គួរឱ្យទាក់ទាញជាមួយនឹងជវភាពសេដ្ឋកិច្ចដ៏រឹងមាំ appeared first on Millions times.

លោក តាន់ ហ្សង់ហ្រ្វង់ស័រ រដ្ឋមន្ត្រីប្រតិភូអមនាយករដ្ឋមន្ត្រី ទទួលបន្ទុកកិច្ចការបរទេសបានថ្លែងថា ជាទូទៅសេដ្ឋកិច្ចសកលមិនទាន់ចេញរួចនៅឡើយ ដោយកាលពីឆ្នាំ២០២៤ ដែលទើបកន្លងផុតទៅនេះ សេដ្ឋកិច្ចសកលកើនឡើងក្នុងអត្រាប្រហាក់ប្រហែលទៅនឹងឆ្នាំ២០២៣ ដដែល គឺក្នុងរង្វង់ត្រឹមប្រមាណ ៣,២ភាគរយប៉ុណ្ណោះជាមធ្យមភាគ ក្នុងនោះសេដ្ឋកិច្ចនៃបណ្តាប្រទេសអភិវឌ្ឍន៍កើនឡើងបានត្រឹមតែ ១,៧ភាគរយ។ ជាមួយគ្នានេះ សេដ្ឋកិច្ចនៃបណ្តាប្រទេសកំពុងអភិវឌ្ឍន៍កើនបានត្រឹម ៤,២ភាគរយ ខណៈដែលសេដ្ឋកិច្ចនៅតំបន់អាស៊ានឯណេះវិញកើនបានប្រមាណ ៤,៦ភាគរយ។ 

តាមដានជាមួយយើង៖ Million Times

លោកបានអះអាងថា ការណ៍ដែលសេដ្ឋកិច្ចសកលបន្តស្ថិតក្នុងវិបត្តិរ៉ាំរ៉ៃបែបនេះតទៅទៀតនោះ គឺមកតែពីពិភពលោកភាពតានតឹងខាងផ្នែកភូមិសាស្ត្រនយោបាយនៅពុំទាន់ធូរស្រាលនៅឡើយ សង្គ្រាមធំៗនៅតែបន្ត ខណៈដែល សង្គ្រាមពាណិជ្ជកម្មដែលបង្ករឡើងដោយរដ្ឋបាលថ្មី របស់អាម៉េរិកផ្តើមលេចធ្លោឡើង។

លោក តាន់ ហ្សង់ហ្រ្វង់ស័រ បានថ្លែងគូសបញ្ជាក់ថា «នៅក្នុងបរិបទបែបនេះនៅឆ្នាំ២០២៤ ដែលទើបកន្លងផុតទៅសេដ្ឋកិច្ចកម្ពុជា កើនបានប្រមាណ ៦ភាគរយ បានន័យថា សេដ្ឋកិច្ចនៃប្រទេសយើងបាន និងកំពុងបន្តវិលមករកស្ថានភាពដើមឡើងវិញ គឺស្ថានភាពមុនការផ្ទុះឡើងនៃជំងឺកូវីដ១៩ ពោលគឺមុនឆ្នាំ២០២០ ដែលកាលនោះជាច្រើនឆ្នាំជាប់ៗគ្នាគិតជាមធ្យមភាគកំណើនសេដ្ឋកិច្ចកម្ពុជាមានប្រហែល ៧ភាគរយ ហើយតួលេខនេះយើងមិនគួរឆាប់ភ្លេចពេកទេ វាបានធ្លាក់មកនៅក្រោមសូន្យភាគរយនៅឆ្នាំ២០២០ ដែលជាឆ្នាំទី១នៃការរាតត្បាតខ្លាំងពីសំណាក់ជំងឺកូវីដ១៩ មុននឹងងើបឡើងវិញជាបណ្តើរៗគឺប្រមាណ ៣,១ភាគរយនៅឆ្នាំ២០២១ ៥,១ភាគរយនៅឆ្នាំ២០២២ ៥ភាគរយនៅឆ្នាំ ២០២៣ ហើយនៅឆ្នាំ២០២៤ កន្លងទៅនេះកើនបានប្រមាណ ៦ភាគរយ»។

លោកលើកឡើងបន្ថែមថា ដែលជារួមស្ថានភាព ម៉ាក្រូសេដ្ឋកិច្ចរបស់កម្ពុជាបើប្រៀបធៀបទៅនឹងស្ថានភាពម៉ាក្រូសេដ្ឋកិច្ចសកលគឺមិនអាក្រក់នោះទេ ផ្ទុយទៅវិញគឺវាមានសន្ទុះខ្លាំង និងមានកម្ពស់ខ្ពស់។ លោក តាន់ ហ្សង់ហ្រ្វង់ស័រ បានបញ្ជាក់បន្ថែមទៀតថា ការដែលលោកលើកឡើងបែបនេះ តាងនាមឱ្យរាជរដ្ឋាភិបាលកម្ពុជា និងតាងនាមឱ្យសម្តេចនាយករដ្ឋមន្ត្រី ដោយលោកសូមលើកទឹកចិត្តឱ្យខ្មែរយើងមានសុទិដ្ឋិនិយម ពីព្រោះតួលេខនៃម៉ាក្រូសេដ្ឋកិច្ចដែលបានលើកឡើងនេះគឺសុទ្ធតែចេញមកពីស្ថាប័នហិរញ្ញវត្ថុអន្តរជាតិដូចជា ធនាគារពិភពលោក(World Bank) និងអង្គការមូលនិធិរូបិយវត្ថុអន្តរជាតិ (IMF) ជាដើម។ ម្យ៉ាងវិញទៀត ប្រសិនបើគ្មានភាពចៃដន្យនៃភាពតានតឹងខាងភូមិសាស្ត្រនយោបាយក្នុងកម្រិតខ្ពស់ស្រួចស្រាវជាងសព្វថ្ងៃនៅក្នុងតំបន់ និងនៅទីកន្លែងផ្សេងនៅក្នុងពិភពលោកទេនោះ នៅក្នុងឆ្នាំ ២០២៥នេះ សេដ្ឋកិច្ចកម្ពុជា នឹងបន្តមានសន្ទុះឡើងវិញ ដោយនឹងបន្តកើនឡើងជាលំដាប់តទៅទៀត ដែលអាចនឹងកើនឡើងដល់ ៦,៣ភាគរយ នេះបើតាមការព្យាករណ៍។

ការលើកឡើងពីស្ថានភាពសេដ្ឋកិច្ចរបស់ លោក តាន់ ហ្សង់ហ្រ្វង់ស័រ ក្នុងវេទិកាសារព័ត៌មានស្តីពីសមិទ្ធផលរបស់រាជរដ្ឋាភិបាល នីតិកាលទី៧ នៃរដ្ឋសភា ក្នុងរយៈពេលប៉ុន្មានខែចុងក្រោយនេះ នៅទីស្តីការគណៈរដ្ឋមន្ត្រី នារសៀលថ្ងៃទី២៦ ខែកុម្ភៈ ឆ្នាំ២០២៥៕

អត្ថបទ និងរូបភាព៖ សាងតេជៈ 

The post លោក តាន់ ហ្សង់ហ្រ្វង់ស័រ៖ សេដ្ឋកិច្ចកម្ពុជា បាននិងកំពុងបន្តវិលមករកស្ថានភាពដើមឡើងវិញ មុនឆ្នាំ២០២០ appeared first on Millions times.

ក្នុងពេលប្រកាសបើកកម្មវិធី «សប្តាហ៍ គាំពារសង្គមកម្ពុជាឆ្នាំ២០២៥» និងប្រកាសដាក់ឱ្យអនុវត្តជាផ្លូវការនូវ «ក្របខណ្ឌ គោលនយោបាយជាតិគាំពារសង្គម ឆ្នាំ២០២៤-២០៣៥» នៅព្រឹកថ្ងៃទី២០ ខែកុម្ភៈម្សិលមិញសម្ដេច ហ៊ុន ម៉ាណែត បានអះអាងថា ការកើនឡើងនៃផលិតផលក្នុងស្រុកសម្រាប់មនុស្សម្នាក់នេះ បានធ្វើឲ្យអត្រានៃភាពក្រីក្ររបស់កម្ពុជាធ្លាក់ចុះជាបន្ដបន្ទាប់ គួរឲ្យកត់សម្គាល់។

តាមដានជាមួយយើង៖ Million Times

សម្ដេចមានថ្លែងថា «ផលិតផលក្នុងស្រុកសម្រាប់មនុស្សម្នាក់ បានកើនឡើងជិត៩ដង ពីប្រមាណ៣១០ដុល្លារអាមេរិក ក្នុងឆ្នាំ២០០០រហូតដល់ប្រមាណ២,៧១៣ដុល្លារ នៅឆ្នាំ២០២៤ ស្របពេលដែលអត្រានៃភាពក្រីក្រធ្លាក់ចុះជាបន្ដបន្ទាប់ គួរឲ្យកត់សម្គាល់»។

គួរឲ្យដឹងថា​ ផ.ស.ស សម្រាប់​មនុស្ស​ម្នាក់នៅ​កម្ពុជាក្នុង​ឆ្នាំ​២០២៥នេះ ត្រូវបានរាជរដ្ឋាភិបាលកម្ពុជាព្យាកររំពឹងថា​នឹងកើនដល់ ២,៩២៤ដុល្លារ ដែល​ចំនួន​នេះ​មានការ​​កើន​ឡើង​ប្រមាណ ៧,៨​ភាគរយ​បើ​ធៀប​នឹង​ឆ្នាំ​២០២៤ ខណៈដែលសេដ្ឋកិច្ចកម្ពុជានៅឆ្នាំ២០២៥ ត្រូវបានព្យាករថា ស្ថិតក្នុងអត្រាកំណើន ៦.៣%។

បើតាមលទ្ធផលកិច្ចប្រជុំពេញអង្គគណៈរដ្ឋមន្ត្រី នៅថ្ងៃទី២៥ ខែតុលា ឆ្នាំ២០២៤ បានឲ្យដឹងថា យោងលើការវាយតម្លៃនៃក្របខ័ណ្ឌហិរញ្ញវត្ថុសាធារណៈ រយៈពេលមធ្យមរបស់រាជរដ្ឋាភិបាល ចំពោះសេដ្ឋកិច្ចកម្ពុជានៅឆ្នាំ២០២៥ ត្រូវបានព្យាករថា ស្ថិតក្នុងអត្រាកំណើន ៦.៣% ដែលធ្វើឱ្យ ផ.ស.ស. ថ្លៃបច្ចុប្បន្នស្ថិតក្នុងរង្វង់ ២០៩ ១៦៣ពាន់លានរៀល សមមូលនឹងប្រមាណ ៥១ ៣៩៨លានដុល្លារ ខណៈដែល ផ.ស.ស. សម្រាប់មនុស្សម្នាក់ត្រូវបានរំពឹងថា នឹងកើនដល់ ២,៩២៤ដុល្លារអាមេរិក។

សម្ដេចប្រមុខរាជរដ្ឋាភិបាល គូសបញ្ជាក់ដែរថា អាទិភាពគោលនយោបាយចម្បងរបស់រាជរដ្ឋាភិបាលកម្ពុជាក្នុងគ្រប់នីតិកាល គឺការរក្សាឲ្យខាងតែបាននូវសុខសន្តិភាព និងស្ថិរភាពនយោបាយពេញលេញ ដែលជាបុរេលក្ខខណ្ឌសម្រាប់កំណើនសេដ្ឋកិច្ច និងការអភិវឌ្ឍប្រទេស។

ជាក់ស្ដែង កម្ពុជាបាន និងកំពុងទទួលផ្លែផ្កាពីសុខសន្តិភាព ស្ថិរភាពនយោបាយ និងស្ថិរភាពម៉ាក្រូសេដ្ឋកិច្ច ដែលធ្វើឲ្យកម្ពុជារក្សាបាននូវកំណើនសេដ្ឋកិច្ច ជាមធ្យមក្នុងរង្វង់ប្រមាណ៦ភាគរយ ក្នុងរយៈពេលជាង មួយទសវត្សរ៍ចុងក្រោយនេះ ទោះបីជាកម្ពុជាបានរងកម្មវិបាកអវិជ្ជមានពី វិបត្តិនៃជំងឺកូវីដ-១៩ និងវិបត្តិផ្សេងទៀត នាពេលកន្លងទៅក៏ដោយ។ ការរក្សាបាននូវកំណើនក្នុងកម្រិតនេះ បានប្រែក្លាយកម្ពុជា ជាប្រទេសមានចំណូលមធ្យមកម្រិតទាប តាំងពីឆ្នាំ២០១៥មក។

សម្ដេចនាយករដ្ឋមន្ដ្រីមានប្រសាសន៍ថា ផ្លែផ្កានៃកំណើនសេដ្ឋកិច្ច សុខសន្តិ ភាពពេញបរិបូរណ៍ និងស្ថិរភាពនយោបាយ គឺជាបុរេលក្ខខណ្ឌដ៏ចាំបាច់ មិនអាចខ្វះ បាន ដែលអនុញ្ញាតឲ្យរាជរដ្ឋាភិបាលដាក់ចេញនូវគោលនយោបាយ និងយុទ្ធសាស្ត្រ ក៏ដូចជាការអនុវត្តនូវការងារកែទម្រង់សំខាន់ៗ ដើម្បីស្តារ និងអភិវឌ្ឍប្រទេសជាតិ ដោយសម្រេចបាននូវលទ្ធផលគួរជាទីមោទនៈ។

បន្ថែមទៀតនោះសម្ដេចបានកត់សម្គាល់ថា ផ្លែផ្កានៃកំណើនសេដ្ឋកិច្ចនេះ ត្រូវបានបែងចែកប្រកបដោយ សមធម៌ តាមរយៈការវិនិយោគលើវិស័យសុខាភិបាល វិស័យអប់រំ និងជាពិសេសលើប្រព័ន្ធគាំពារសង្គម ដោយរាជរដ្ឋាភិបាល ទទួលស្គាល់ថា ការវិនិយោគនេះ រួមចំណែកយ៉ាងសំខាន់ ក្នុងការកសាងសង្គមមួយប្រកបដោយ សមធម៌ ភាពសុខដុម និងជាមូលដ្ឋានគ្រឹះសម្រាប់ការអភិវឌ្ឍប្រទេសជាតិ៕

អត្ថបទ៖ សាងតេជៈ រូបភាព៖ ក្រុមព័ត៌មានសម្តេចធិបតី

The post ផ.ស.ស កើនឡើងជិត ៩ដងពីឆ្នាំ២០០០ ដល់ឆ្នាំ២០២៤ ធ្វើឲ្យអត្រានៃភាពក្រីក្ររបស់កម្ពុជាធ្លាក់ចុះ appeared first on Millions times.

នៅក្នុងឱកាសបើកសន្និបាតបូកសរុបលទ្ធផលការងារប្រចាំឆ្នាំ ២០២៤ និងទិសដៅការងារឆ្នាំ ២០២៥ របស់ធនាគារជាតិនៃកម្ពុជា នៅថ្ងៃទី៨ ខែមករានេះ លោក ស្រី ជា សិរី បានលើកឡើងថា សេដ្ឋកិច្ចរបស់ប្រទេសកម្ពុជា បានបន្តងើបឡើង ក្នុងអត្រា ៦% នៅឆ្នាំ២០២៤ ដែលគាំទ្រជាចម្បងដោយកំណើនខ្ពស់នៃការនាំចេញ ជាពិសេសផលិតផលកាត់ដេរ និងការបន្តងើបឡើងជាលំដាប់នៃវិស័យទេសចរណ៍ ទោះបីវិស័យសំណង់ និងអចលនទ្រព្យ និងកសិកម្មបន្តមានកំណើនទាបក៏ដោយ។

តាមដានជាមួយយើង៖ Million Times

ការរក្សាបានអត្រាកំណើននេះ លោកស្រីគូសបញ្ជាក់ថា អាចចាត់ទុកថា កម្ពុជា ជាប្រទេសមួយមានកំណើនសេដ្ឋកិច្ចខ្ពស់គួរឲ្យកត់សម្គាល់បើធៀបជាមួយបណ្តាប្រទេសមួយចំនួននៅក្នុងតំបន់ និងពិភពលោក ខណៈដែលនៅឆ្នាំ២០២៤ សេដ្ឋកិច្ចសកលត្រូវបានវាយតម្លៃថាសម្រេចបានអត្រាកំណើនទាបជាងឆ្នាំ ២០២៣បន្តិច ដោយសារប្រឈមនឹងឧបសគ្គជាច្រើន។

បើតាមលោកស្រី ការអនុវត្តដោយប្រសិទ្ធភាពនូវយុទ្ធសាស្រ្តបញ្ចកោណ-ដំណាក់កាលទី១ បានជួយជំរុញសេដ្ឋកិច្ចកម្ពុជាឱ្យបន្តងើបឡើង ក្នុងអត្រា ៦% នាឆ្នាំ ២០២៤ ជាមួយអតិផរណាជាមធ្យមមានកម្រិតត្រឹម ០,៨% នាឆ្នាំ ២០២៤ ដោយសារការធ្លាក់ថ្លៃប្រេងឥន្ធនៈ ម្ហូបអាហារ ស្របពេលដែលទំនិញ និងសេវាផ្សេងៗទៀតឡើងថ្លៃយឺត ដោយផ្គួបផ្សំ នឹងការរក្សាបានស្ថិរភាពតម្លៃប្រាក់រៀលនៅលើទីផ្សារផងដែរ។ 

លោកស្រីបន្ថែមថា ស្ថិរភាពម៉ាក្រូសេដ្ឋកិច្ច និងការគ្រប់គ្រងទុនបម្រុងអន្តរជាតិប្រកបដោយប្រសិទ្ធភាព បានរួមចំណែកបង្កើនទុនបម្រុងអន្តរជាតិ ដល់ ២២,៥ ប៊ីលានដុល្លារអាមេរិក ពោលគឺកើនឡើង ១២,៦% ធៀបនឹងឆ្នាំ ២០២៣។ ហើយកម្រិតទុនបម្រុងអន្តរជាតិរបស់កម្ពុជា ត្រូវបានបន្តចាត់ទុកថាមានកម្រិតខ្ពស់សមស្រប ដែលស្មើនឹងប្រមាណ ៧ខែ នៃការនាំចូលទំនិញ និងសេវាសម្រាប់គ្រាបន្ទាប់។

គណបក្សប្រជាជនកម្ពុជា ដែលកំពុងដឹកនាំរាជរដ្ឋាភិបាលនាពេលថ្មីៗនេះ បានកត់សម្គាល់ចំពោះសមិទ្ធផលនៃការអភិវឌ្ឍសេដ្ឋកិច្ច សង្គម ដែលបានឆ្លុះបញ្ចាំងនូវភាពធន់នៃសេដ្ឋកិច្ចកម្ពុជា ក្នុងបរិការណ៍ដែលត្រូវប្រឈមនឹងការវិវត្តដ៏ស្មុគស្មាញនៃសភាពការណ៍ អន្តរជាតិ និងកត្តាអវិជ្ជមានជាច្រើនទៀត។

សម្រាប់ធនាគារពិភពលោកបានព្យាករណ៍ថា កំណើនសេដ្ឋកិច្ចរបស់កម្ពុជានឹងឈានដល់ ៥,៥% ក្នុងឆ្នាំ២០២៥ និង ២០២៦ បន្ទាប់ពីការព្យាករណ៍កំណើន ៥,៣% សម្រាប់ឆ្នាំ ២០២៤ និង ៥% សម្រាប់ឆ្នាំ២០២៣។ កំណើននេះត្រូវបានជំរុញយ៉ាងខ្លាំងដោយការកើនឡើងនៃការនាំចេញផ្នែកផលិតកម្ម ជាពិសេសសម្លៀកបំពាក់ ទំនិញធ្វើដំណើរ និងស្បែកជើង ដែលទាំងអស់នេះត្រូវបានជំរុញឡើងដោយការស្ទុះងើបឡើងវិញនៃវិស័យទេសចរណ៍។ នេះបើយោងតាមការចុះផ្សាយរបស់ fibre2fashion នៅថ្ងៃទី២១ ខែធ្នូ ឆ្នំា២០២៤៕

អត្ថបទ៖ សាងតេជៈ រូបភាព៖ NBC

The post លោកស្រី ជា សិរី៖ អត្រាកំណើនកើន ៦%នៅឆ្នាំ២០២៤ អាចចាត់ទុកថា កម្ពុជា ជាប្រទេសមានកំណើនសេដ្ឋកិច្ចខ្ពស់ appeared first on Millions times.

អង្គសន្និបាតគណបក្សប្រជាជនកម្ពុជា CPP ដែលប្រើពេលអស់ ២ថ្ងៃពេញ បានកត់សម្គាល់ប្រកបដោយមោទនភាពចំពោះសមិទ្ធផលនៃការអភិវឌ្ឍសេដ្ឋកិច្ចសង្គម ដែលបានឆ្លុះបញ្ចាំងនូវភាពធន់នៃសេដ្ឋកិច្ចកម្ពុជា ក្នុងបរិការណ៍ដែលត្រូវប្រឈមនឹងការវិវត្តដ៏ស្មុគស្មាញនៃសភាពការណ៍ អន្តរជាតិ និងកត្តាអវិជ្ជមានជាច្រើនទៀត។

តាមដានជាមួយយើង៖ Million Times

លទ្ធផលនៃសន្និបាតគណៈកម្មាធិការកណ្តាល លើកទី៤៥ អាណត្តិទី៥ របស់គណបក្សប្រជាជនកម្ពុជា ដែលផ្សព្វផ្សាយនៅល្ងាចថ្ងៃទី២៦ ខែមករានេះ បានគូសបញ្ជាក់ថា ក្នុងឆ្នាំ២០២៤ សេដ្ឋកិច្ចកម្ពុជាងើបឡើងក្នុងអត្រាកំណើន ៦,០% អតិផរណាមានអត្រាទាប ០,៨% អត្រាប្តូរប្រាក់រៀលមានស្ថិរភាពស្ថិតក្នុងរង្វង់ ៤ ០៧១រៀល ឯទុនបម្រុងអន្តរជាតិបានកើនឡើងដល់ $២២ ៥១១លានដុល្លារអាមេរិក ដែលអាចធានាការនាំចូលបានប្រមាណ៧ខែ ក្នុងឆ្នាំ២០២៤ ជាមួយនេះ ស្ថានភាពការងារក៏មានស្ថិរភាព។

អង្គសន្និបាតបញ្ជាក់បន្ថែមថា លើមូលដ្ឋាននេះ ជីវភាពរបស់ប្រជាពលរដ្ឋកាន់តែមានភាពប្រសើរឡើងដែលឆ្លុះបញ្ចាំងតាមរយៈការបន្តកើនឡើងនៃផលិតផលសរុបក្នុងស្រុកជាមធ្យមក្នុងមនុស្សម្នាក់ពី $២ ៥២០ដុល្លារ ក្នុងឆ្នាំ២០២៣ ដល់ប្រមាណ $២ ៧១៣ដុល្លារក្នុងឆ្នាំ២០២៤។ លើមូលដ្ឋានការរីកចម្រើនក្នុងឆ្នាំ២០២៤ ជាមួយនឹងការងើបឡើងវិញជាបណ្តើរៗនៃសេដ្ឋកិច្ចសកល សេដ្ឋកិច្ចកម្ពុជាក្នុងឆ្នាំ២០២៥ ត្រូវបាន រំពឹងថានឹងបន្តងើបក្នុងអត្រាកំណើន ៦,៣%។ ឆ្លងតាមការវិវឌ្ឍនេះ ឆ្លុះបញ្ចាំងថា សេដ្ឋកិច្ចជាតិកំពុងត្រឡប់មករក ស្ថានភាពកំណើនដូចពេលមុនមានវិបត្តិកូវីដ-១៩វិញ។

ស្ថាប័ន​រូបិយប័ណ្ណ​ពិភពលោក ឬ IMF បាន​ព្យាករណ៍​ថា សម្រាប់​ឆ្នាំ​២០២៥ សេដ្ឋកិច្ច​កម្ពុជា រំពឹង​ថា នឹង​មាន​កំណើន​ក្នុង​រង្វង់​ ៥,៧៥% ដែល​បន្ត​គាំទ្រ​ដោយ​វិស័យ​បម្រើ​ដល់​ការ​នាំ​ចេញ និង​ការ​បន្ត​រក្សា​បាន​កំណើន​ល្អ​នៃ​វិស័យ​ទេសចរណ៍ និង​កសិកម្ម ។

ចំណែក​ធនាគារ​អភិវឌ្ឍ​អាស៊ី (ADB) បាន​រក្សា​ការ​ព្យាករ​កំណើនសេដ្ឋកិច្ច​របស់​ខ្លួន​សម្រាប់​កម្ពុជា នៅ​កម្រិត​៥,៨% សម្រាប់​ឆ្នាំ​២០២៤ និង​៦% សម្រាប់​ឆ្នាំ​២០២៥៕

អត្ថបទ៖ សាងតេជៈ រូបភាព៖ CPP

The post បក្សកាន់អំណាច៖ សេដ្ឋកិច្ចកម្ពុជាកំពុងត្រឡប់មករកស្ថានភាពកំណើនដូចពេលមុនមានវិបត្តិកូវីដ-១៩ appeared first on Millions times.

លោកស្រី ចម និម្មល រដ្ឋមន្រ្តីក្រសួងពាណិជ្ជកម្ម លើកឡើងថា ការចុះ MoU នេះជាជំហានយ៉ាងសំខាន់ក្នុងការជំរុញការធ្វើពាណិជ្ជកម្មតាមប្រព័ន្ធអេឡិចត្រូនិក និងឆ្លុះបញ្ចាំងពីកិច្ចខិតខំប្រឹងប្រែងរបស់រាជរដ្ឋាភិបាល ក្នុងការគាំទ្រដល់ការធ្វើបរិវត្តកម្មឌីជីថល ការបង្កើតបរិយាកាសអំណោយផលសម្រាប់ការធ្វើពាណិជ្ជកម្មនិងវិនិយោគនៅកម្ពុជា ជាពិសេសសម្រាប់សហគ្រាសធុនតូច និងមធ្យមក្នុងស្រុក និងអាជីវកម្មតាមគ្រួសារខ្នាតតូច។ 

តាមដានជាមួយយើង៖ Million Times

លើសពីនេះ ការធ្វើពិពិធកម្មសេដ្ឋកិច្ចតាមថ្នាលឌីជីថល បានផ្តល់នូវកាលានុវត្តភាពធំធេងសម្រាប់ធុរកិច្ចក្នុងការពង្រឹងនិងចាប់យកឱកាសទីផ្សារបន្ថែមពីលើទីផ្សាររូបវ័ន្តជាលក្ខណៈប្រពៃណី និងអាចចូលរួមបង្កើនភាពប្រកួតប្រជែងលើទីផ្សារអន្តរជាតិ ផងដែរ។ លោកស្រីបន្ថែម។

លោកស្រីបញ្ជាក់ថា អនុស្សរណៈនៃការយោគយល់គ្នាជាមួយក្រុមហ៊ុន Alibaba Cloud (Singapore) Private Limited មានគោលបំណងចម្បងសំខាន់ចំនួន ២ រួមមាន៖

(១). ការតភ្ជាប់ផលិតផលកម្ពុជាទៅកាន់ទីផ្សារឌីជីថល៖ ការតភ្ជាប់នេះនឹងបង្កើតជាឱកាសធុរកិច្ចធំធេងសម្រាប់អាជីវករកម្ពុជា ផ្សព្វផ្សាយផ្ទាល់ដល់អតិថិជនរាប់លាននាក់ ដែលមានចំណាប់អារម្មណ៍ចំពោះផលិតផលសក្តានុពលកម្ពុជា និងអនុញ្ញាតឱ្យពួកគេពង្រីកវិសាលភាពនៃប្រតិបត្តិការអាជីវកម្មខ្លួន ព្រមទាំងឆ្លើយតបទៅនឹងបញ្ហាប្រឈមក្នុងការចូលទៅកាន់ ទីផ្សារថ្មីៗ។

(២). ការបង្កើនអានុភាពជូនដល់អាជីវករ និងផលិតករកម្ពុជា៖ គោលគំនិតស្នូលនេះ នឹងអាចបង្កើតនូវបរិយាកាសធុរកិច្ចឌីជីថលថ្មីបន្ថែមទៀត ជំរុញដល់ការចូលរួមប្រកបដោយបរិយាប័ន្ន ការផ្តល់កាលានុវត្តភាព និងការបង្កើនអានុភាពសម្រាប់ធុរជន និងបណ្តាអាជីវកម្មក្នុងស្រុក ជាពិសេសអាជីវករបែបគ្រួសារខ្នាតតូច អាជីវករនៃសេដ្ឋកិច្ចក្រៅប្រព័ន្ធ ឬបណ្តាអាជីវកម្មផ្សេងទៀត នឹងមានឱកាសស្មើៗគ្នាក្នុងការតាំងបង្ហាញ ដាក់លក់ផលិតផល និងទេពកោសល្យរបស់ខ្លួនទៅកាន់អតិថិជននៅក្នុងស្រុក និងអភិវឌ្ឍនអាជីវកម្មខ្លួនទៅកាន់ទូទាំងពិភពលោក។

លោកស្រីរដ្ឋមន្ត្រី បានលើកទឹកចិត្តដល់ក្រុមការងារបច្ចេកទេសរបស់ក្រសួងទាំងពីរ និងក្រុមហ៊ុន Alibaba Cloud (Singapore) Private Limited បន្តសហការចែករំលែកចំណេះដឹង បទពិសោធន៍ និងការវិវត្តថ្មីៗនៃបច្ចេកវិទ្យាឌីជីថល ដោយប្រកាន់ខ្ជាប់នូវសា្មរតីបុរេសកម្ម និងការទទួលខុសត្រូវខ្ពស់ ក្នុងការអភិវឌ្ឍ និងបង្កើតថ្នាលឌីជីថលនេះ ដោយកំណត់ឱ្យបានជាមុននូវបញ្ហាប្រឈមនិងសំណើដំណោះស្រាយនានា មុននឹងដាក់ឱ្យដំណើរការក្នុងពេលខាងមុខ ដើម្បីអាចឆ្លើយតបទៅនឹងតម្រូវការ និងបង្កលក្ខណៈងាយស្រួលដល់អ្នកប្រើប្រាស់ សំដៅអាចធានាបាននូវប្រសិទ្ធភាព ភាពជោគជ័យ និងនិរន្តរភាព៕

អត្ថបទ៖ សាងតេជៈ រូបភាព៖ ក្រសួងប្រៃសណីយ៍

The post គោលបំណងចម្បងសំខាន់ចំនួន ២ កម្ពុជាសម្រេចចុះ MoU ជាមួយក្រុមហ៊ុន Alibaba  appeared first on Millions times.