តាមដានជាមួយយើង៖ Million Times

ការប្រកាសផ្ដល់ជូននេះ ស្របពេលដែលឯកឧត្ដមបណ្ឌិតសភាចារ្យ ហង់ជួន ណារ៉ុន ឧបនាយករដ្ឋមន្ត្រី រដ្ឋមន្ត្រីក្រសួងអប់រំ យុវជន និងកីឡា បានអញ្ជើញទស្សនកិច្ចនៅមជ្ឈមណ្ឌលបណ្តុះធុរកិច្ច (Smart Startup Space) របស់ក្រុមហ៊ុន ស្មាត អាស្យាតា ខូ អិលធីឌី កាលពីថ្ងៃទី១​ ខែតុលា ឆ្នាំ២០២៥។

ឯកឧត្ដមរដ្ឋមន្ត្រីអប់រំ បានឱ្យដឹងថា ក្នុងឱកាសនោះ ក្រុមហ៊ុនស្មាត អាស៊ាតា បានប្រកាសផ្តល់សេវាអ៊ីនធើណេតដោយឥតគិតថ្លៃរយៈពេល១២ខែ ជូនដល់សិស្សានុសិស្សដែលបានប្រឡងបាក់ឌុប ជាប់និទ្ទេស A ទូទាំងប្រទេសកម្ពុជាចំនួន ៣០០៣នាក់។

បើតាមឯកឧត្ដម ហង់ជួន ណារ៉ុន ចំពោះការផ្ដល់នេះ គឺដើម្បីជាការលើកទឹកចិត្ត ដល់ការខិតខំប្រឹងប្រែងរបស់ សិស្សានុសិស្សទាំងនោះ ក៏ដូចជាជំរុញការប្រើប្រាស់បច្ចេកវិទ្យាឌីជីថល សម្រាប់ការសិក្សាឱ្យកាន់តែប្រសើរឡើងថែមទៀត។

ដោយឡែកក្រុមហ៊ុន ស្មាត អាស្យាតា បានឱ្យដឹងដែរថា ក្នុងអំឡុងពេលនៃដំណើរទស្សនកិច្ចរបស់ឯកឧត្ដមរដ្ឋមន្ត្រីអប់រំ គឺបានស្វែងយល់ពីកម្មវិធីបណ្ដុះធុរកិច្ចថ្មី (entrepreneurship incubation program) របស់ក្រុមហ៊ុន និងបានជួបសំណេះសំណាលជាមួយសិស្សានុសិស្ស និងអតីតនិស្សិតដែលទទួលបានអត្ថប្រយោជន៍ក្រោមគំនិតផ្តួចផ្តើមនានា ទាក់ទងនឹងការអប់រំរបស់ស្មាត។

ដំណើរទស្សនកិច្ចនេះ ក៏បានគូសបញ្ជាក់ពីកិច្ចខិតខំប្រឹងប្រែងជាបន្តបន្ទាប់របស់ក្រុមហ៊ុន ស្មាត អាស្យាតា ក្នុងការផ្តល់លើកកម្ពស់យុវជនកម្ពុជា តាមរយៈអាហារូបករណ៍ កម្មវិធីអក្ខកម្មឌីជីថល ការអប់រំឌីជីថល និងឱកាសនានាក្នុងផ្នែកនវានុវត្តន៍ជាច្រើនទៀត ផងដែរ។​

ជាមួយគ្នានេះ ក្រុមហ៊ុន ស្មាត អាស្យាតា បានបញ្ជាក់ថា ខ្លួននៅតែបន្តប្តេជ្ញាចិត្តគាំទ្រអ្នកដឹក​នាំជំនាន់ក្រោមរបស់ព្រះរាជាណាចក្រកម្ពុជា និងជំរុញឧត្តមភាពអប់រំ តាមរយៈភាពជាដៃគូ និងគំនិតផ្តួចផ្តើមប្រកបវឌ្ឍនភាព៕​

អត្ថបទ៖ វីរៈ រូបភាព៖ ហ្វេសប៊ុកឯកឧត្ដមរដ្ឋមន្ត្រីអប់រំ

The post ល្អណាស់! ក្រុមហ៊ុនទូរស័ព្ទដ៏ធំមួយ ផ្ដល់អ៊ីនធើណេតពេញមួយឆ្នាំឥតគិតថ្លៃ ដល់សិស្សប្រឡងជាប់និទ្ទេស A ចំនួន ៣០០៣នាក់ appeared first on Millions times.

តាមដានជាមួយយើង៖ Million Times

ការថ្លែងយ៉ាងដូច្នេះរបស់មហាសេដ្ឋី លី យ៉ុងផាត់ ធ្វើឡើងក្នុងពិធីសំណេះសំណាល និងចែកអំណោយសប្បុរសធម៌ប្រចាំឆ្នាំ២០២៥ របស់សមាគមឧកញ៉ាកម្ពុជា ក្រោមប្រធានបទ «ទាំងអស់គ្នាដើម្បីការអប់រំ» កាលពីថ្ងៃទី១៧ កុម្ភៈនៅវិទ្យាល័យទ្រៀល ស្ថិតក្នុងភូមិថ្មី ឃុំទ្រៀល ស្រុកតាំងគោក ខេត្តកំពង់ធំ។

លោកអ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា បានមានប្រសាសន៍ផ្តាំផ្ញើ និងក្រើនរំលឹកដល់សិស្សានុសិស្សទាំងអស់ឱ្យខិតខំប្រឹងប្រែងរៀនសូត្រឱ្យបានខ្លាំងក្លាជាទីបំផុតដើម្បីអនាគតភ្លឺស្វាង សម្រាប់ខ្លួនឯង គ្រួសារ និងសង្គមជាតិ ពោលគឺត្រូវធ្វើជាសិស្សល្អ ពលរដ្ឋល្អ យុវជនល្អ និងមានសុខភាពល្អដែលជាធនធានមនុស្សដ៏មានគុណតម្លៃ ជាពិសេសត្រូវជៀសឱ្យឆ្ងាយពីគ្រឿងញៀន និងអំពើអបាយមុខទាំងអស់ដើម្បីក្លាយជាយុវជនបន្តវេនប្រកបដោយថាមពលក្នុងការចូលរួមថែរក្សាឱ្យខាងតែបាននូវសុខសន្តិភាព និងការឯកភាពជាតិ។

ជាមួយគ្នានេះដែរ លោក វង្សី វិស្សុត ឧបនាយករដ្ឋមន្ត្រីប្រចាំការ រដ្ឋមន្ត្រីទទួលបន្ទុកទីស្តីការគណៈរដ្ឋមន្ត្រី បានគូសបញ្ជាក់ថា ដើម្បីលើកកម្ពស់គុណភាពការអប់រំ គឺត្រូវមានការចូលរួមពីតួអង្គចំនួន៦ រួមមាន៖ កត្តាសិស្សខ្លួនឯង, កត្តាគ្រូបង្រៀន, កត្តាសាលារៀន, កត្តាមាតាបិតា និងអាណាព្យាបាលសិស្ស, កត្តាគាំទ្រពីសហគមន៍ និងអាជ្ញាធរនៅនឹងកន្លែង, និងការចូលរួមពីវិស័យឯកជន ដែលនេះគឺជាការចូលរួមទាំងអស់គ្នា ក្រោមទិសស្លោក «ទាំងអស់គ្នាដើម្បីការអប់រំ»។ 

លោកបានបញ្ជាក់ថា ប្រទេសជាតិមួយដែលខ្លាំងទាល់តែមានធនធានមនុស្សខ្លាំង ជាពិសេសនៅក្នុងបរិការណ៍មួយដែលពិភពលោកកំពុងស្ថិតនៅក្នុងភាពបែកបាក់ ទាំងនយោបាយ សេដ្ឋកិច្ច និងពាណិជ្ជកម្ម។ ដូច្នេះ ការអប់រំគឺជាមូលដ្ឋានគន្លឹះក្នុងការបង្កើតមូលធនមនុស្សដ៏មានតម្លៃសម្រាប់ប្រទេសជាតិ ជាមនុស្សដែលមានចំណេះដឹង មានជំនាញច្បាស់លាស់ មានអត្តចរិត គុណធម៌ សីលធម៌ និងសុខភាពរឹងមាំ ព្រមទាំងត្រូវមានការទទួលខុសត្រូវខាងសង្គមផងដែរ។

ទន្ទឹមនេះ ក៏ត្រូវរៀបចំកម្មវិធីអប់រំឱ្យស្របនិងទាន់ការវិវត្តន៍នៃបច្ចេកវិទ្យា និងឱ្យចំតម្រូវការនៃសង្គម បើមិនដូច្នោះទេ យើងនឹងត្រូវខាតធនធាន និងខាតពេលវេលា៕

អត្ថបទ៖ សាងតេជៈ រូបភាព៖ ទីស្តីការគណៈរដ្ឋមន្រ្តី

The post មហាសេដ្ឋី លី យ៉ុងផាត់ ក្រើនរំលឹកសិស្សានុសិស្សឱ្យខិតខំប្រឹងប្រែងរៀនសូត្រឱ្យបានខ្លាំងក្លាជាទីបំផុត appeared first on Millions times.

ដើម្បីចូលរួមចំណែកកាត់បន្ថយការលំបាក ការចំណាយ និងកាត់បន្ថយហានិភ័យផ្សេងៗដែលអាចកើតឡើងចំពោះសិស្សានុសិស្សដែលត្រូវធ្វើដំណើរទៅមកដោយទោចក្រយានក្នុងគោលបំណងបន្តការសិក្សានៅតាមវិទ្យាល័យ ឬសាកលវិទ្យាល័យនានាក្នុងខេត្តបាត់ដំបង រដ្ឋបាលខេត្តប៉ៃលិននឹងរៀបចំដាក់ឲ្យដំណើរការរថយន្តក្រុងសម្រាប់ធ្វើការដឹកជញ្ចូនសិស្សនិស្សិត ជារៀងរាល់សប្តាហ៍ដោយឥតគិតថ្លៃ តាមទីតាំងនិងពេលវេលា ដូចខាងក្រោម៖

*ថ្ងៃសុក្រ៖ ចេញដំណើរពីខេត្តប៉ៃលិនទៅខេត្តបាត់ដំបង វេលាម៉ោង ៥:៣០ នាទីល្ងាច
-ចំណតរថយន្ត នៅសួនច្បារសួនកុមារ ទល់មុខវិមានឯករាជ្យខេត្តប៉ៃលិន។

*ថ្ងៃអាទិត្យ៖ ចេញដំណើរពីខេត្តបាត់ដំបង មកខេត្តប៉ៃលិននៅម៉ោង ៦:០០ ល្ងាច
-ចំណតរថយន្ត នៅមុខសកលវិទ្យាល័យគ្រប់គ្រងនិងសេដ្ឋកិច្ច (UME) ខេត្តបាត់ដំបង។

បន្ថែមពីនេះ រដ្ឋបាលខេត្តប៉ៃលិនក៏បានបញ្ជាក់ថា សម្រាប់សិស្ស និស្សិតដែលមានបំណងចង់ធ្វើដំណើរតាមរថយន្តក្រុងរបស់រដ្ឋបាលខេត្ត សូមធ្វើការទំនាក់ទំនងមកទីចាត់ការរដ្ឋបាលសាលាឋេត្តប៉ៃលិន៕

អត្ថបទ៖ នារតី  រូបភាព៖ រដ្ឋបាលខេត្តប៉ៃលិន

តាមដានជាមួយយើង៖ Million Times

The post សិស្សនិស្សិតខេត្តប៉ៃលិន ជិះរថយន្តក្រុងដោយមិនគិតថ្លៃសម្រាប់ទៅបន្តការសិក្សានៅខេត្តបាត់ដំបង appeared first on Millions times.