វិស័យទេសចរណ៍ Archives - Millions times

រដ្ឋមន្ត្រីទេសចរណ៍ កោតសរសើរសមត្ថកិច្ចទប់ស្កាត់សកម្មភាពអវិជ្ជមាន ប៉ះពាល់វិស័យទេសចរណ៍

Virak វីរៈ — Mon, 20 Apr 2026 09:13:45 +0000

ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានថ្លែងអំណរគុណ និងកោតសរសើរចំពោះសមត្ថកិច្ច ដែលបានចាត់វិធានការទប់ស្កាត់សកម្មភាពអវិជ្ជមាន ដែលប៉ះពាល់ដល់វិស័យទេសចរណ៍។

តាមដានជាមួយយើង៖ Million Times

ការថ្លែងអំណរគុណ និងកោតសរសើរបែបនេះ បន្ទាប់ពីសមត្ថកិច្ចខណ្ឌដូនពេញ ចំណុះឱ្យស្នងការដ្ឋាននគរបាលរាជធានីភ្នំពេញ បានចុះស្រាវជ្រាវបន្ទាន់ និងបានសាកសួរពលរដ្ឋ នៅក្បែរទីតាំងកើតហេតុ ក្រោយមានការផ្សព្វផ្សាយវីដេអូ នៅលើបណ្ដាញសង្គមថា មានបុរសម្នាក់បានប្រើសម្ដីមិនសមរម្យ និងគំរាមរកវាយទៅលើជនបរទេសម្នាក់ ជាអ្នកទេសចរ។

តាមរយៈទំព័រហ្វេសប៊ុកក្រសួងទេសចរណ៍ នៅរសៀលថ្ងៃទី២០ ខែមេសានេះ ឯកឧត្តម ហួត ហាក់ ក្នុងនាមរដ្ឋមន្ត្រី បានសម្តែងការកោតសរសើរ និងថ្លែងអំណរគុណចំពោះការចង្អុលបង្ហាញរបស់ឯកឧត្តមនាយឧត្តមសេនីយ៍ ស ថេត អគ្គស្នងការនគរបាលជាតិ និងឯកឧត្តម ឃួង ស្រេង អភិបាលរាជធានីភ្នំពេញ ព្រមជាមួយចំណាត់ការទាន់ពេលវេលារបស់ឯកឧត្តម ឧត្តមសេនីយ៍ឯក ជួន ណារិន្ទ អគ្គស្នងការរងនគរបាលជាតិ និងជាស្នងការនគរបាលរាជធានីភ្នំពេញ ដែលបានចាត់វិធានការទប់ស្កាត់សកម្មភាពអវិជ្ជមាន ដែលប៉ះពាល់ដល់វិស័យទេសចរណ៍។

ជាមួយគ្នានេះ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ ក៏បានអរគុណដល់ប្រជាពលរដ្ឋខ្មែរទាំងអស់ ដែលបានចូលរួមយ៉ាងសកម្ម និងពិតជាបានឆ្លុះបញ្ចាំងពីការគំាទ្រ និងអនុវត្តយ៉ាងត្រឹមត្រូវតាមអនុសាសន៍ដឹកនាំរបស់សម្តេចតេជោ ហ៊ុន សែន ប្រមុខរដ្ឋស្តីទី និងជាប្រធានព្រឹទ្ធសភាគឺ៖ «ទេសចរណ៍ដើម្បីទាំងអស់គ្នា ទាំងអស់គ្នាដើម្បីទេសចរណ៍»។

ស្នងការដ្ឋាននគរបាលរាជធានីភ្នំពេញ បានឱ្យដឹងថា ក្រោយមានការផ្សព្វផ្សាយតាមបណ្ដាញសង្គមជាសាធារណៈ ដោយមានបុរសម្នាក់បានប្រើសម្ដីមិនសមរម្យ និងគំរាមរកវាយទៅលើជនបរទេសម្នាក់ ជាអ្នកទេសចរ ខណៈជនបរទេសនោះឡាយវីដេអូ ហើយគ្រាន់និយាយសួរនាំសុខទុកធម្មតាទៅលើបុរសម្នាក់ នៅក្បែររបងវត្តឧណ្ណាលោមរួចមក, នៅថ្ងៃទី១៩ ខែមេសា ឆ្នាំ២០២៦ នគរបាលខណ្ឌដូនពេញ បានចុះស្រាវជ្រាវបន្ទាន់ និងបានសាកសួរពលរដ្ឋ និងអ្នករត់ម៉ូតូកង់បី នៅក្បែរទីតាំងកើតហេតុ។

បើតាមសមត្ថកិច្ច ហេតុការណ៍នេះ បានកើតឡើងកាលពីថ្ងៃទី៩ ខែមេសា ឆ្នាំ២០២៦មកម្លេះ ស្ថិតនៅក្បែររបងវត្តឧណ្ណាលោម នៅមូលដ្ឋានសង្កាត់ជ័យជំនះ ខណ្ឌដូនពេញ រាជធានីភ្នំពេញ ហើយបុរសម្នាក់បានប្រើសម្ដីមិនសមរម្យ និងគំរាមរកវាយទៅលើជនបរទេសម្នាក់នោះ ជាជនអនាថា គ្មានទីលំនៅច្បាស់លាស់ ដើរគ្រប់ទីកន្លែង និងដេកតាមទីសាធារណៈ។ ករណីនេះកម្លាំងនគរបាល និងបន្តស្រាវជ្រាវរកបុរសនោះ នាំមកសួរនាំ ដើម្បីអនុវត្តតាមជំនាញ៕

អត្ថបទ៖ វីរៈ រូបភាព៖ ក្រសួងទេសចរណ៍

The post រដ្ឋមន្ត្រីទេសចរណ៍ កោតសរសើរសមត្ថកិច្ចទប់ស្កាត់សកម្មភាពអវិជ្ជមាន ប៉ះពាល់វិស័យទេសចរណ៍ appeared first on Millions times.

កើនឡើងខ្លាំង! កម្ពុជាទទួលភ្ញៀវទេសចរចិនជាង១លាននាក់ក្នុងឆ្នាំ២០២៥ កើនជាង៤០ភាគរយ

Vin Chang — Tue, 03 Feb 2026 09:29:19 +0000

ក្រោមយុទ្ធនាការជំរុញទីផ្សារយ៉ាងសកម្មរបស់កម្ពុជា ឃើញថាក្នុងឆ្នាំ២០២៥កន្លងទៅទទួលបានលទ្ធផលល្អប្រសើរមែនទែន ដោយកម្ពុជាទទួលបានភ្ញៀវទេសចរចិន១,៥លាននាក់ កើនឡើងដល់ទៅជាង៤០ភាគរយ។ នេះបើតាមរបាយការណ៍ក្រសួងទេសចរណ៍បង្ហាញពេញមួយឆ្នាំ២០២៥។

តាមដានជាមួយយើង៖ Million Times

ក្នុងពិធីបើកសន្និបាតបូកសរុបលទ្ធផលការងារវិស័យទេសចរណ៍ឆ្នាំ២០២៥ និងលើកទិសដៅការងារឆ្នាំ ២០២៦ រដ្ឋមន្ត្រីក្រសួងទេសចរណ៍ លោក ហួត ហាក់ មានប្រសាសន៍ថា ក្នុងឆ្នាំ២០២៥ កម្ពុជាទទួលបានទេសចរអន្តរជាតិសរុប ៥ ៥៦៩ ៧៥២នាក់ ថយចុះ ១៦,៩ភាគរយ បើធៀបនឹងឆ្នាំ២០២៤។ ប៉ុន្តែ ភ្ញៀវចិនដែលមកកម្សាន្តកម្ពុជា បែរជាមានកំណើនរហូតដល់ ៤១,៥ភាគរយ។

កាលឆ្នាំ២០២៥ កម្ពុជា ទទួលបានភ្ញៀវទេសចរចិន ១ ២០១ ៦៨១នាក់។ ដើម្បីទាក់ទាញភ្ញៀវទេសចរចិន ក្រសួងទេសចរណ៍បានដាក់ចេញយុទ្ធនាការ “ឆ្នាំទេសចរណ៍ កម្ពុជា-ចិន ២០២៥” ពិធីបិទ “ឆ្នាំនៃការផ្លាស់ប្ដូរប្រជាជន និងប្រជាជន កម្ពុជា-ចិន” ពិធីបើកជាផ្លូវការ “ឆ្នាំទេសចរណ៍ កម្ពុជា-ចិន ២០២៥” អមដោយការសម្ដែងសិល្បៈពិសេស “សម្រស់កម្ពុជា-ជាំងស៊ី” ការរៀបចំវេទិកាទេសចរណ៍កម្ពុជា-ចិន និងមហោស្រពតន្ត្រីទេសចរណ៍អន្តរជាតិនៅខេត្តសៀមរាប។ ចូលរួមព្រឹត្តិការណ៍នៅតាមបណ្ដាខេត្តរបស់ចិនដូចជា សានទុង, យូណាន, សានស៊ី (Shanxi) និងក្វាងស៊ី និងបង្កើតព្រឹត្តិការណ៍ជាច្រើនទៀត។

ដោយឡែក លោកស្រី ឆាយ ស៊ីវលីន ប្រធានសមាគមទេសចរណ៍កម្ពុជាបានឱ្យដឹងថា ការកើនឡើងនៃចំនួនភ្ញៀវទេសចរចិននេះ ដោយសារតែកម្ពុជាមានសកម្មភាពច្រើនទាំងរដ្ឋ និងឯកជនបានធ្វើការស្រុះគ្នា ក្នុងការផ្សព្វផ្សាយ ការចូលរួមពិព័រណ៍អន្តរជាតិនានានៅប្រទេសចិន។

យោងតាមរបាយការណ៍ធនាគារជាតិ នៃកម្ពុជាបានឱ្យដឹងថា ចំណូលទេសចរណ៍អន្តរជាតិឆ្នាំ២០២៥ ត្រូវបានប៉ាន់ស្មានថា អាចមានប្រមាណ ៣,៧ ពាន់លានដុល្លារ ដោយកើនឡើង ៣ភាគរយបើធៀបនឹងឆ្នាំ២០២៤។ ដែលប្រាក់ចំណូលពីវិស័យទេសចរអន្តរជាតិកើនឡើង ប៉ុន្តែចំនួនភ្ញៀវទេសចរអន្តរជាតិធ្លាក់ចុះ គឺអាចដោយសារតែជម្លោះប្រដាប់អាវុធនៅតាមព្រំដែនថៃ និងសភាពការណ៍ពិភពលោកមានការប្រែប្រួល៕

អត្ថបទ៖ ឆដា,រូបភាព៖ ក្រសួងទេសចរណ៍ និង អ៊ីនធឺណេត

The post កើនឡើងខ្លាំង! កម្ពុជាទទួលភ្ញៀវទេសចរចិនជាង១លាននាក់ក្នុងឆ្នាំ២០២៥ កើនជាង៤០ភាគរយ appeared first on Millions times.

ក្រុមហ៊ុនទេសចរណ៍ចិនធំមកពី ១៤ ខេត្ត ក្រុង និងរដ្ឋធានី ចាប់អាម្មរណ៍លើសក្តានុពលទេសចរណ៍កម្ពុជា

Vin Chang — Tue, 23 Dec 2025 07:58:14 +0000

ក្រុមហ៊ុនទេសចរណ៍ចិនធំៗ មកពី១៤ ខេត្ត ក្រុង និង រដ្ឋធានី ប៉េកាំង បានចាប់អារម្មណ៍លើសក្តានុពលទេសចរណ៍ និងកាលានុវត្តភាពវិនិយោគទេសចរណ៍ដ៏ទាក់ទាញរបស់ប្រទេសកម្ពុជា។ នេះបើតាមការឲ្យដឹងពីក្រសួងទេសចរណ៍កាលពីពេលថ្មីៗនេះ។

តាមដានជាមួយយើង៖ Million Times

រដ្ឋមន្ត្រីក្រសួងទេសចរណ៍លោក ហួត ហាក់ បានអញ្ជើញបើក «វេទិកាជំនួបផ្គូផ្គងធុរកិច្ចទេសចរណ៍អន្តរជាតិ កម្ពុជា-ចិន» ដោយមានការចូលរួមពីលោក Jiang Chao តំណាងស្ថានទូតសាធារណរដ្ឋប្រជាមានិតចិនប្រចាំកម្ពុជា ឯកឧត្ដម-ថ្នាក់ដឹកនាំតំណាងក្រសួង ស្ថាប័ន អភិបាលរងរាជធានីភ្នំពេញ ក្រុមប្រឹក្សាភិបាលសិក្សាទីផ្សារ និងផ្សព្វផ្សាយទេសចរណ៍កម្ពុជា (CTB) សមាគមពាណិជ្ជកម្មចិន និងកម្ពុជា ក្រុមហ៊ុនទេសចរណ៍ និងធុរជនកម្ពុជា-ចិន ព្រមទាំងភ្ញៀវកិត្តិយសជាតិ និងអន្តរជាតិសរុបជាង ៥០០ នាក់ នៅសណ្ឋាគារសុខា រ៉េស៊ីដង់ រាជធានីភ្នំពេញ។

អ្នករៀបចំកម្មវិធីវេទិកាធុរកិច្ចចិន និងកម្ពុជា បានរាយការណ៍ជូនអំពីការចូលរួមក្នុងជំនួបផ្គូផ្គងដែលមានអ្នកទិញ ៦៣ ក្រុមហ៊ុនទេសចរណ៍ធំៗ ពីខេត្តក្រុង១៤ និងរដ្ឋធានីប៉េកាំងនៃប្រទេសចិន ប្រទេសម៉ាឡេស៊ី និងវៀតណាម ហើយអ្នកលក់ជាការីទេសចរណ៍កម្ពុជាធំៗ ៧៥ក្រុមហ៊ុន ដែលមានចាប់អារម្មណ៍ពីក្រុមហ៊ុនអាកាសចរណ៍ជាតិ Air Cambodia និងសណ្ឋាគារម៉ាកអន្តរជាតិល្បីៗ ជាច្រើនជាមួយនឹងការរំពឹងទុកលើលទ្ធផលចុះកិច្ចសន្យាទិញកញ្ចប់ទស្សនកិច្ចចាប់ពី ៧៥% ឡើងទៅ។

អ្នករៀបចំកម្មវិធី ក៏បានរៀបចំជូនអ្នកទិញដំណើរទស្សនកិច្ចស្វែងយល់ពីសក្ដានុពលទេសចរណ៍ទៅជាច្រើនគោលដៅទេសចរណ៍របស់កម្ពុជាដូចជារាជធានីភ្នំពេញ ខេត្តព្រះសីហនុ ខេត្តសៀមរាប។

ឆ្លៀតក្នុងឱកាស «វេទិកាជំនួបផ្គូផ្គងធុរកិច្ចទេសចរណ៍អន្តរជាតិ កម្ពុជា-ចិន» រដ្ឋមន្ត្រីក្រសួងទេសចរណ៍ បានកោតសរសើរ និងវាយតម្លៃខ្ពស់ ព្រមទាំងអំណរគុណ ចំពោះការអញ្ជើញមករបស់ធុរជនចិន ដែលពិតជាបានពិនិត្យមើលជាក់ស្ដែងពីសក្ដានុពលទេសចរណ៍ និងកាលានុវត្តវិនិយោគកម្ពុជា នាពេលនេះ ជាពិសេសប្រទេសកម្ពុជា គឺជាគោលដៅទេសចរណ៍អន្តរជាតិ ប្រកបដោយសុខសុវត្ថិភាព មិត្តភាព បដិសណ្ឋារកិច្ចកក់ក្ដៅ និងមានភាពទាក់ទាញ។

លោកក៏បានស្នើគ្រប់ភាគីទាំងអស់ ត្រូវបន្តជួយផ្សព្វផ្សាយ សក្ដានុពលទេសចរណ៍កម្ពុជា ពិសេសការលើកលែង ទិដ្ឋាការដល់ប្រជាជនចិននាឆ្នាំ២០២៦ ខាងមុខនេះឲ្យបានទូលំទូលាយ និងដល់ភ្ញៀវរបស់ក្រុមហ៊ុន ដើម្បីបង្កើនចំនួនភ្ញៀវចិន មកទស្សនាកម្ពុជាកាន់តែច្រើនឡើងបន្ថែមទៀត។

យោងតាមរយៈស្ថិតិទេសចរណ៍ រយៈពេល ១១ខែ ឆ្នាំ ២០២៥ នេះ កម្ពុជា ទទួលបានភ្ញៀវទេសចរអន្តរជាតិសរុបជិត ៥,២ លាននាក់ ដែលក្នុងនោះ ភ្ញៀវមកពីចិន មានចំនួនច្រើនជាង ១,១លាននាក់ កើនឡើងជិត ៤៤% ធៀបនឹងរយៈពេលដូចគ្នា កាលឆ្នាំ ២០២៤៕

អត្ថបទ៖ ឆដា, រូបភាព៖ ក្រសួងទេសចរណ៍

The post ក្រុមហ៊ុនទេសចរណ៍ចិនធំមកពី ១៤ ខេត្ត ក្រុង និងរដ្ឋធានី ចាប់អាម្មរណ៍លើសក្តានុពលទេសចរណ៍កម្ពុជា appeared first on Millions times.

នាវាទេសចរណ៍ VIKING VENUS ដឹកភ្ញៀវចម្រុះជាតិសាសន៍ជិត ១ ពាន់នាក់មកចតនៅកំពង់សោម

Vin Chang — Thu, 30 Oct 2025 02:59:56 +0000

កំពង់ផែក្រុងព្រះសីហនុបានទទួលស្វាគមន៍នាវាទេសចរណ៍ VIKING VENUS សញ្ជាតិន័រវែស ដែលបានដឹកភ្ញៀវទេសចរសរុប ៨០៨ នាក់ នាវិក ៤៦៣នាក់ នៅព្រឹកថ្ងៃ ៣០ ខែតុលា ឆ្នាំ ២០២៥ នេះ។

តាមដានជាមួយយើង៖ Million Times

មន្ទីរទេសចរណ៍ខេត្តព្រះសីហនុបានបានឲ្យដឹងនៅព្រឹកថ្ងៃនេះថា ក្រុមការងារមន្ទីរទេសចរណ៍បានចូលរួមសហការជាមួយអាជ្ញាធរ និងវិស័យឯកជនទទួលស្វាគមន៍ដំណើរមកដល់នាវាទេសចរណ៍ VIKING VENUS សញ្ជាតិន័រវែសដែលមានបណ្ដោយប្រវែង ២២៨.៣០ ម៉ែត្រ និងទទឹងប្រវែង ២៨.៨០ ម៉ែត្រ ជម្រៅ ៦.៦៥ម៉ែត្រ ធ្វើដំណើរមកពីប្រទេសវៀតណាម និងបានចូលចតនៅកំពង់ផែក្រុងព្រះសីហនុ នៅម៉ោង ៧៖ ០០ នាទីព្រឹក និងត្រូវចាកចេញទៅប្រទេសថៃបន្តនៅវេលាម៉ោង ១៤៖ ០០ ថ្ងៃ៣១ ខែតុលា ឆ្នាំ២០២៥។

ក្នុងចំណោមភ្ញៀវទេសចរសរុប ៨០៨ នាក់ ស្រី ៤២៣ នាក់ មាន ២០ សញ្ជាតិ នាវិក ៤៦៣ នាក់ ដោយមានស្រី ១១០ នាក់ ទាំងអស់មាន ៤០ សញ្ជាតិ។ ភ្ញៀវទេសចរភាគច្រើនជនជាតិអាមេរិក ៦៧១ នាក់ កាណាដា ៥៨ នាក់។ គោលដៅភ្ញៀវទេសចរទៅទស្សនា រួមមានរមណីយដ្ឋានឆ្នេរក្នុងក្រុង វត្តអារាម និងផ្សារលើជាដើម៕

អត្ថបទ៖ ឆដា, រូបភាព៖ មន្ទីរទេសចរណ៍ខេត្តព្រះសីហនុ

The post នាវាទេសចរណ៍ VIKING VENUS ដឹកភ្ញៀវចម្រុះជាតិសាសន៍ជិត ១ ពាន់នាក់មកចតនៅកំពង់សោម appeared first on Millions times.

ឧកញ៉ា ឌិន សុមេធារិទ្ធ ទៅធុរកិច្ចនៅម៉ាឡេស៊ី និងជួបតារាចិន ព្រមទាំងណែនាំពីព្រលានថ្មីដល់ Fan Bingbing

Vin Chang — Tue, 30 Sep 2025 07:56:39 +0000

ឧកញ៉ា ឌិន សុមេធារិទ្ធ សហស្ថាបនិក និងជានាយកប្រតិបត្តិនៅ The Frangipani Hotel Group បានធ្វើដំណើរអមរដ្ឋមន្ត្រីក្រសួងទេសចរណ៍ លោក ហួត ហាក់ ក្នុងកម្មវិធី ទិវាទេសចរណ៍ពិភពលោក នាទីក្រុងម៉ាឡាកា ប្រទេសម៉ាឡេស៊ី ដែលទើបបញ្ចប់កាលពីពេលថ្មីៗនេះ។

តាមដានជាមួយយើង៖ Million Times

សហស្ថាបនិក និងជានាយកប្រតិបត្តិនៅ The Frangipani Hotel Group ឧកញ៉ា ឌិន សុមេធារិទ្ធ ក៏ជា ប្រធានសហព័ន្ធទេសចរណ៍កម្ពុជាផងដែរ។ នាឱកាសចេញទៅចូលរួមWorld Tourism Day 2025 ឧកញ៉ា សុមេធារិទ្ធ និងគណៈប្រតិភូកម្ពុជាជាច្រើនរូបបានជួបពិភាក្សាតូចមួយ ជាមួយកំពូលតារាសម្ដែងចិន Fan Bingbing នៅទីនោះផងដែរ។

Fan Bingbing បេសកជនទេសចរណ៍របស់ទីក្រុងម៉ាឡាកា ហើយក្នុងជំនួបក្រៅផ្លូវការរវាងថ្នាក់ដឹកនាំក្រសួងទេសចរណ៍កម្ពុជា និងកំពូលតារាចិនមានគម្រោង និងសម្រេចបានផ្លែផ្កាយ៉ាងណានោះ ប្រធានសហព័ន្ធទេសចរណ៍កម្ពុជា មិនបានបញ្ជាក់ឡើយ។

មិនត្រឹមតែជួបពិភាក្សាគ្នាធម្មតាឡើយ ឧកញ៉ា ឌិន សុមេធារិទ្ធ ក៏ឆ្លៀតប្រម៉ូតប្រាប់ Fan Bingbing ពីព្រលានយន្តហោះថ្មី ដែលកម្ពុជាទើបដំណើរការនៅក្នុងខែនេះ។ នាយកប្រតិបត្តិនៅ The Frangipani Hotel Group បានបង្ហោះវីដេអូជាមួយតារាចិន ហើយក៏ជាអ្នកជំនួញគ្រឿងថែរក្សាសម្រស់ដ៏ល្បីរបស់ចិន ភ្ជាប់នឹងសំណេរថា «អួតពីព្រលានយន្តហោះអន្តរជាតិតេជោ ដល់តារាចិនដ៏ល្បីល្បាញ Fan Bing Bing ដើម្បីឲ្យគាត់មកលេងស្រុកខ្មែរ និងជួយផ្សព្វផ្សាយទេសចរណ៍កម្ពុជា ព្រោះគាត់មាន followers ជាងមួយពាន់លាននាក់»។

គណៈប្រតិភូកម្ពុជាដែលជាបុគ្គលសំខាន់ៗមានដូចជាលោក ហួត ហាក់ រដ្ឋមន្ត្រីក្រសួងទេសចរណ៍, ឧកញ៉ា ឌិន សុមេធារិទ្ធ ប្រធានសហព័ន្ធទេសចរណ៍កម្ពុជា ,លោកបណ្ឌិត ធួន ស៊ីណាន ប្រធានសមាគមទេសចរណ៍អាស៊ីប៉ាស៊ីហ្វិចប្រចាំប្រទេសកម្ពុជា, លោកស្រី ឆាយ ស៊ីវលីន ប្រធានសមាគមទីភ្នាក់ងារទេសចរណ៍កម្ពុជាសុទ្ធតែបានជួប និងថតរូបជាមួយ Fan Bingbing៕

អត្ថបទ៖ ឆដា, រូបភាព៖ Sivlin Chhay, Somethearith Din, Thourn Sinan

The post ឧកញ៉ា ឌិន សុមេធារិទ្ធ ទៅធុរកិច្ចនៅម៉ាឡេស៊ី និងជួបតារាចិន ព្រមទាំងណែនាំពីព្រលានថ្មីដល់ Fan Bingbing appeared first on Millions times.

ព្រឹត្តិការណ៍សមរាត្រីថ្ងៃទី២ ភ្ញៀវទេសចរជិត ៤ ម៉ឺននាក់ សម្រុកចូលរួមទស្សនាកកកុញ

Vin Chang — Sat, 22 Mar 2025 06:59:17 +0000

ឆ្នាំ ២០២៥ នេះ ព្រឹត្តិការណ៍សមរាត្រីក្នុងខេត្តសៀមរាប នាប្រាសាទអង្គរវត្តនៅតែទទួលបានភ្ញៀវទេសចរច្រើនកុះករចូលទៅទស្សនា ហេតុការណ៍ក្នុងលោកនេះ។

តាមដានជាមួយយើង៖ Million Times

តាមរបាយការបានបញ្ជាក់ថា ថ្ងៃទី២នៃព្រឹត្តិការណ៍សមរាត្រីមានភ្ញៀវទេសចរជិត ៤ ម៉ឺននាក់ មកទស្សនាទិដ្ឋភាពថ្ងៃរះចំកំពូលប្រាសាទអង្គរវត្ត នៅព្រឹកថ្ងៃ ២២ ខែមីនា ឆ្នាំ២០២៥ នេះ ដែលក្នុងនោះភ្ញៀវទេសចរជាតិ និងអន្តរជាតិ កាន់តែច្រើនជាងថ្ងៃទី១ ពោលកាលពីថ្ងៃ ២១ ម្សិលមិញនេះភ្ញៀវទេសចរជាង ២ ម៉ឺននាក់ប៉ុណ្ណោះ តែមកដល់ថ្ងៃនេះអ្នកទេសចរសម្រុកមកមើលទិដ្ឋភាពដ៏អស្ចារ្យកាន់តែច្រើន។

ក្នុងនោះភ្ញៀវទេសចរសរុបមាន ៣៧ ០០៣ នាក់ ដោយក្នុងនោះភ្ញៀវទេសចរជាតិចំនួន: ៣៣ ៥០០ នាក់ និងភ្ញៀវទេសចរបរទេស ៣ ៥០៣ នាក់។ សម្រាប់អ្នកមិនទាន់បានទៅទស្សនាប្រញាប់រួសរាន់ឡើង ព្រោះព្រឹត្តិការណ៍សមរាត្រីនៅមានពេល ១ ថ្ងៃស្អែកទី ២៣ ទៀតតែប៉ុណ្ណោះ បើអាក់ខានត្រូវចាំរហូតដល់ ៥ខែទៀត ទើបអាចកើតឡើងម្ដងទៀត។

សមរាត្រី ជាព្រឹត្តិការណ៍ព្រះអាទិត្យរះចំកំពូលកណ្ដាលនៃប្រាសាទអង្គរវត្ត ដែលកើតមានឡើងតែ២ ដងប៉ុណ្ណោះក្នុង១ឆ្នាំ លើកទី១ គឺនៅក្នុងខែមីនា ចាប់ពីថ្ងៃទី ២១ដល់ ២៣ ត្រូវបានហៅថា សមរាត្រី រដូវប្រាំង (Vernal Equinox) និងលើកទី២ សមរាត្រីរដូវវស្សា (Autumnal Equinox) កើតទ្បើងនៅខែកញ្ញា ចាប់ពីថ្ងៃ ២១ដល់ ២៣ ដូចគ្នា។

ព្រឹត្តិការណ៍ដ៏អស្ចារ្យនេះ ស្តែងឲ្យឃើញពីអច្ឆរិយភាពនៃប្រាសាទអង្គរវត្ត ដែលបុព្វបុរសខ្មែរយើងបានកសាងឡើងដោយមានការគិតគូរពីស្ថាបត្យកម្ម និងការផ្សារភ្ជាប់ជាមួយធម្មជាតិរវាងភពផែនដី និងព្រះអាទិត្យ យ៉ាងច្បាស់លាស់គួរស្ញប់ស្ញែង៕

អត្ថបទ៖ មេរ៉ា, រូបភាព៖ Roma Lim

The post ព្រឹត្តិការណ៍សមរាត្រីថ្ងៃទី២ ភ្ញៀវទេសចរជិត ៤ ម៉ឺននាក់ សម្រុកចូលរួមទស្សនាកកកុញ appeared first on Millions times.

វិស័យទេសចរណ៍ឆ្នាំមុន បានរួមចំណែកដល់ផលិផលក្នុងស្រុកជាង ៩%

Vin Chang — Mon, 24 Feb 2025 09:50:33 +0000

ក្រសួងទេសចរណ៍ បានបង្ហាញសូចនាករទេសចរណ៍ និងស្ថិតិទេសចរណ៍ផ្លូវការ កាលពីឆ្នាំ ២០២៤ នឹងការលើកឡើងថា វិស័យនេះបានរួមចំណែកផលិតផលក្នុងស្រុកប្រមាណ ៩,៤% ដោយក្នុងនោះ អ្នកដែលមានមុខរបរ និងការងារជាប់ពាក់ព័ន្ធនឹងវិស័យទេសចរណ៍សរុបជាង ៥១ម៉ឺននាក់។

តាមដានជាមួយយើង៖ Million Times

របាយការណ៍របស់ក្រសួងទេសចរណ៍បានបញ្ជាក់ថា កាល ២០២៤ កម្ពុជាទទួលបានភ្ញៀវទេសចរអន្តរជាតិ ៦.៧០ លាននាក់ កើនឡើងប្រមាណ ២២.៩ ភាគរយ និងបានដាក់បញ្ចូលថវិកាទៅក្នុងសេដ្ឋកិច្ចជាតិប្រមាណ ៣ ៦៣៧ លានដុល្លារអាមេរិក កើនឡើង ១៨% បើប្រៀបធៀបទៅនឹងឆ្នាំ ២០២៣។

តាមរយៈសូចនាករទេសចរណ៍ និងស្ថិតិទេសចរណ៍ផ្លូវការឆ្នាំមុន ការរីកចម្រើននៃវិស័យទេសចរណ៍កម្ពុជា អាចវាស់វែងបានពីចំណុចសំខាន់ៗមួយចំនួនដូចជា ទេសចរអន្តរជាតិ ៦.៧០ លាននាក់ កើនឡើង ២២.៩%, ទេសចរជាតិ ២២.៥២ លាននាក់ កើនឡើង ២០.១%, ទេសចរជាតិចេញក្រៅ ១.៨៥ លាននាក់ កើនឡើង ១.៤% ,មូលដ្ឋានអាជីវកម្មទេសចរណ៍ ១៣.៨៧៦ អាជ្ញាប័ណ្ណ, សេវាកម្មស្នាក់នៅ ៨៣ ៧៨៧ បន្ទប់,ចំណូលទេសចរណ៍អន្តរជាតិ ៣.៦៣៧ លានដុល្លារកើនឡើង១៨%,មុខរបរ និងការងារទេសចរណ៍ ៥១ ម៉ឺននាក់ ហើយវិស័យទេសចរណ៍បានរួមចំណែកដល់ផលិតផលក្នុងស្រុកប្រមាណ ៩.៤%។

ក្នុងរយៈពេល ១២ ខែឆ្នាំ ២០២៤ កន្លងទៅ កម្ពុជាទទួលបានជើងហោះហើរ ចេញ-ចូល (ទ្វេទិស) ជិត ៦ ម៉ឺនជើង ទទួលបានអ្នកដំណើរ ចេញ-ចូល ជាង ៦ លាននាក់ និងទទួលដឹកជញ្ជូនទំនិញចេញ-ចូល បានជិត ៨ ម៉ឺនតោន។ នេះជាចំនួនកើនឡើងបើធៀបនឹងឆ្នាំ ២០២៣ សម្រាប់អាកាសយានដ្ឋានអន្តរជាតិទាំង ៣ នៅកម្ពុជា រួមមានអាកាសយានដ្ឋានអន្តរជាតិ-ភ្នំពេញ, អាកាសយានដ្ឋានអន្តរជាតិ សៀមរាបអង្គរ- អាកាសយានដ្ឋានអន្តរជាតិកងកេង ក្រុងព្រះសីហនុ៕

អត្ថបទ៖ មេរ៉ា,រូបភាព៖ Huot Hak

The post វិស័យទេសចរណ៍ឆ្នាំមុន បានរួមចំណែកដល់ផលិផលក្នុងស្រុកជាង ៩% appeared first on Millions times.

វិស័យទេសចរណ៍ Archives - Millions times

រដ្ឋមន្ត្រីទេសចរណ៍ កោតសរសើរសមត្ថកិច្ចទប់ស្កាត់សកម្មភាពអវិជ្ជមាន ប៉ះពាល់វិស័យទេសចរណ៍

កើន​ឡើងខ្លាំង! ​កម្ពុជា​ទទួល​ភ្ញៀវ​ទេសចរ​ចិន​ជាង​១​លាន​នាក់​ក្នុង​ឆ្នាំ​២០២៥ ​កើន​ជាង​៤០​ភាគរយ

ក្រុមហ៊ុនទេសចរណ៍ចិនធំមកពី ១៤ ខេត្ត ក្រុង និងរដ្ឋធានី ចាប់អាម្មរណ៍លើសក្តានុពលទេសចរណ៍កម្ពុជា

នាវាទេសចរណ៍ VIKING VENUS ដឹកភ្ញៀវចម្រុះជាតិសាសន៍ជិត ១ ពាន់នាក់មកចតនៅកំពង់សោម

ឧកញ៉ា ឌិន សុមេធារិទ្ធ ទៅធុរកិច្ចនៅម៉ាឡេស៊ី និងជួបតារាចិន ព្រមទាំងណែនាំពីព្រលានថ្មីដល់ Fan Bingbing

ព្រឹត្តិការណ៍សមរាត្រីថ្ងៃទី២ ភ្ញៀវទេសចរជិត ៤ ម៉ឺននាក់ សម្រុកចូលរួមទស្សនាកកកុញ

វិស័យទេសចរណ៍ឆ្នាំមុន បានរួមចំណែកដល់ផលិផលក្នុងស្រុកជាង ៩%

កើនឡើងខ្លាំង! កម្ពុជាទទួលភ្ញៀវទេសចរចិនជាង១លាននាក់ក្នុងឆ្នាំ២០២៥ កើនជាង៤០ភាគរយ