លោកស្រី ជា សិរី Archives - Millions times

បណ្ឌិត ជា សិរី៖ អត្រាដាក់ប្រាក់សន្សំ និងកម្ចីប្រាក់រៀលពីធនាគារនៅកម្ពុជា មានកម្រិតទាប បើធៀបនឹងដុល្លារ

Vin Chang — Fri, 28 Mar 2025 07:30:01 +0000

ទេសាភិបាលធនាគារជាតិនៃកម្ពុជា លោកជំទាវបណ្ឌិត ជា សិរី បានឲ្យដឹងថា ការដាក់ប្រាក់រៀលសន្សំក្នុងធនាគាររបស់ប្រជាជនខ្មែរ មានត្រឹមតែ ១១ ភាគរយប៉ុណ្ណោះ ក្រៅពីនេះគឺជាប្រាក់ដុល្លារអាមេរិកទាំងអស់។

តាមដានជាមួយយើង៖ Million Times

សម្រាប់ឥណទាន ដែលប្រជាជនកម្ពុជាខ្ចីជាប្រាក់រៀលពីគ្រឹះស្ថានធនាគារ និងហិរញ្ញវត្ថុ ក៏មានចំនួនតិចតួចដែរ ដែលក្នុងនោះមានតែ ១៣% ប៉ុណ្ណោះ ជាប្រាក់រៀល ហើយសល់ពីនេះសុទ្ធសឹងជាប្រាក់ដុល្លារអាមេរិក។ លោកជំទាវ បញ្ជាក់ថា កំណើនចរាចរប្រាក់រៀល ក៏បានកើនឡើង ទន្ទឹមគ្នានឹងការចរាចរប្រាក់ដុល្លារ ដែលធ្វើឲ្យកម្រិតដុល្លាររូបនីយកម្មនៅទ្រឹង ក្នុងរយៈពេលជាងមួយទសវត្សរ៍ចុងក្រោយនេះ។

លោកជំទាវបណ្ឌិត ជា សិរី បានលើកឡើងនៅសិក្ខាសាលាផ្សព្វផ្សាយ ស្ដីពីប្រាក់រៀល ប្រព័ន្ធទូទាត់បាគង និងខេអេចឃ្យូអរ និងក្នុងឱកាសអបអរសាទរខួបលើកទី៤៥ នៃការដាក់ឲ្យចរាចរប្រាក់រៀលឡើងវិញ នៅវិមានរដ្ឋសភា កាលពីថ្ងៃ២០ ខែមីនា ឆ្នាំ ២០២៥ កន្លងទៅ។

សិក្ខាសាលានោះធ្វើឡើងក្នុងគោលបំណងលើកកម្ពស់ការយល់ដឹងក្នុងការគាំទ្រប្រាក់រៀល ក៏ដូចជាជំរុញឲ្យមានការប្រើប្រាស់ប្រាក់រៀលទូលំទូលាយពីគ្រប់ភាគីពាក់ព័ន្ធទាំងអស់ ដើម្បីរក្សាអធិបតេយ្យជាតិ ធ្វើឲ្យសេរីភាពនៃសេដ្ឋកិច្ចកាន់តែមានភាពប្រសើរឡើង និងពង្រឹង អត្តសញ្ញាណជាតិ និងភាពធន់។

កាលឆ្នាំ ២០២៤ កន្លងទៅ ចំនួនប្រតិបត្តិការទូទាត់ជាប្រាក់រៀលតាមរយៈប្រព័ន្ធបាគង បានកើនឡើង ៤,៣ ដង ហើយទំហំទឹកប្រាក់បានកើនឡើង ២,២ ដង ធៀបនឹងឆ្នាំ ២០២៣ ដែលច្រើនជាងកំណើននៃប្រតិបត្តិការ និងទំហំទូទាត់ជាប្រាក់ដុល្លារអាមេរិក ដែលបានកើនឡើង ២,៣ ដង និង ១,៩ ដងរៀងគ្នា។

ធនាគារជាតិនៃកម្ពុជា បានអះអាងថា ការប្រើប្រាស់លុយរៀលច្រើននឹងពង្រឹងអធិបតេយ្យ និងបង្កើនភាពម្ចាស់ការលើការគ្រប់គ្រងសេដ្ឋកិច្ច។ នេះដោយសារនៅពេលលុយរៀល អាចដើរតួនាទីសំខាន់ក្នុងការកំណត់ថ្លៃទំនិញ និងសេវា គឺកម្ពុជាអាចរក្សាស្ថិរភាពថ្លៃបានប្រសើរជាងមុន។

ជាមួយគ្នានេះ ធនាគារជាតិ អាចជួយសម្រាល ឬបន្ថយអត្រាការប្រាក់បានមួយកម្រិត តួយ៉ាងដូចជាការឲ្យខ្ចីបច្ចុប្បន្ន ភាគច្រើនជាដុល្លារអាមេរិក អត្រាការប្រាក់ត្រូវបានកំណត់ដោយប្រទេស ដែលបោះពុម្ពប្រាក់ដុល្លារអាមេរិក។ ដូចនេះអត្រាការប្រាក់ត្រូវប្រែប្រួលទៅតាមនយោបាយរូបិយវត្ថុនៅសហរដ្ឋអាមេរិក៕

អត្ថបទ៖ រូបភាព៖ cpp

The post បណ្ឌិត ជា សិរី៖ អត្រាដាក់ប្រាក់សន្សំ និងកម្ចីប្រាក់រៀលពីធនាគារនៅកម្ពុជា មានកម្រិតទាប បើធៀបនឹងដុល្លារ appeared first on Millions times.

ទុនបម្រុងអន្តរជាតិកម្ពុជា កើនឡើងដល់ ២២.៥ ប៊ីលានដុល្លារ នៅឆ្នាំ ២០២៤

Vin Chang — Tue, 11 Feb 2025 04:12:20 +0000

កាលពីថ្មីៗកន្លងទៅនេះលោកស្រីបណ្ឌិត ជា សិរី ទេសាភិបាលធនាគារជាតិនៃកម្ពុជា បានរៀបចំសន្និបាតបូកសរុបលទ្ធផលការងារប្រចាំឆ្នាំ ២០២៤ និងទិសដៅការងារឆ្នាំ ២០២៥។ ក្នុងសន្និបាតបូកសរុបលទ្ធផលការងារ កាលពីថ្ងៃ៨ ខែកុម្ភៈកន្លងទៅនេះ អគ្គទេសាភិបាលធនាគារជាតិក៏បានបង្ហាញពីទុនបម្រុងអន្តរជាតិរបស់កម្ពុជាផងដែរ។

តាមដានជាមួយយើង៖ Million Times

លោកស្រីបណ្ឌិត ជា សិរី បានឲ្យដឹងថា ស្ថិតក្រោមស្ថិរភាពម៉ាក្រូសេដ្ឋកិច្ច និងការគ្រប់គ្រងទុនបម្រុងអន្តរជាតិប្រកបដោយប្រសិទ្ធភាពបានរួមចំណែកបង្កើនទុនបម្រុងអន្តរជាតិដល់ ២២.៥ ប៊ីលានដុល្លារក្នុងឆ្នាំ ២០២៤ ពោលគឺកើនឡើង ១២.៦ ភាគរយធៀបនឹងឆ្នាំ ២០២៣ ដែលមានត្រឹមប្រមាណ ២០ ប៊ីលានដុល្លារ។

កម្រិតទុនបម្រុងអន្តរជាតិរបស់កម្ពុជា ត្រូវបានចាត់ទុកថា មានកម្រិតខ្ពស់សមស្រប ដែលស្មើនឹងប្រមាណ ៧ខែ នៃការនាំចូលទំនិញ និងសេវាសម្រាប់គ្រាបន្ទាប់។

ចំពោះប្រព័ន្ធធនាគារ និងហិរញ្ញវត្ថុនៅកម្ពុជាវិញ ឥណទាននៅតែបន្តកើនឡើង ប៉ុន្តែក្នុងល្បឿនយឺតជាងមុន។ នេះជាការអះអាងរបស់បណ្ឌិត ជា សិរី ។ ចំពោះកត្តាតម្រូវការ គឺដោយសារការងើបឡើងយឺតនៃវិស័យមួយចំនួនដូចជា វិស័យសំណង់និងអចលនទ្រព្យ ទេសចរណ៍ និងលក់ដុំ និងរាយ នាំឲ្យអតិថិជនកាត់បន្ថយការខ្ចី ហើយចំពោះកត្តាផ្គត់ផ្គង់ គឺដោយសារគ្រឹះស្ថានធនាគារ និងហិរញ្ញវត្ថុ បង្កើនការប្រុងប្រយ័ត្នការផ្តល់ឥណទាន ក្នុងស្ថានភាពសេដ្ឋកិច្ចតំបន់ និងពិភពលោកមានភាពមិនប្រាកដប្រជាខ្ពស់។

សូមជម្រាបថា ទុនបម្រុងអន្តរជាតិ គឺជាសាច់ប្រាក់របស់ប្រទេសមួយ និងទ្រព្យសម្បត្តិផ្សេងទៀត ដែលកាន់កាប់ដោយធនាគារកណ្ដាលរបស់ខ្លួន។ ទុនបម្រុងទាំងនេះត្រូវបានប្រើ ដើម្បីមានឥទ្ធិពលលើតម្លៃរូបិយប័ណ្ណរបស់ប្រទេសមួយ បំពេញកាតព្វកិច្ចទូទាត់អន្តរជាតិ និងរក្សាទំនុកចិត្តទីផ្សារហិរញ្ញវត្ថុ។ ទុនបម្រុងអន្តរជាតិ ក្រោមការគ្រប់គ្រងរបស់ NBC រួមមានរូបិយប័ណ្ណបរទេស មាស និង SDR (Special Drawing Right)៕

អត្ថបទ៖ មេរ៉ា, រូបភាព៖ National Bank of Cambodia

The post ទុនបម្រុងអន្តរជាតិកម្ពុជា កើនឡើងដល់ ២២.៥ ប៊ីលានដុល្លារ នៅឆ្នាំ ២០២៤ appeared first on Millions times.

លោកស្រី ជា សិរី ទទួលពានរង្វាន់ពីសាកលវិទ្យាល័យអូស្រ្តាលី បញ្ជាក់ពីសមិទ្ធផលលេចធ្លោក្នុងការប្រើប្រាស់ចំណេះជំនាញពីការសិក្សា

Vin Chang — Fri, 29 Nov 2024 07:48:30 +0000

លោកស្រី ជា សិរី ទេសាភិបាលធនាគារជាតិនៃកម្ពុជា ទទួលបានពានរង្វាន់អតីតនិស្សិតកិត្តិយស ពីសាកលវិទ្យាល័យ Adelaide The University of Adelaide របស់ប្រទេសអូស្ត្រាលី ដែលបញ្ជាក់ពីការទទួលស្គាល់សមត្ថភាព និងកិច្ចខិតខំប្រឹងប្រែងរបស់លោកស្រីក្នុងការចូលរួមអភិវឌ្ឍប្រព័ន្ធធនាគារ និងសេដ្ឋកិច្ចកម្ពុជា។

តាមដានជាមួយយើង៖ Million Times

គណៈគ្រប់គ្រងនៃសាកលវិទ្យាល័យបានផ្ដល់ពានរង្វាន់នេះជូននិស្សិតអន្តរជាតិឆ្នើមដែលបានបញ្ចប់ការសិក្សាដោយជោគជ័យ និងសម្រេចសមិទ្ធផលលេចធ្លោក្នុងការប្រើប្រាស់ចំណេះជំនាញពីការសិក្សា ដើម្បីអភិវឌ្ឍសង្គមជាតិ ព្រមទាំងបានបង្ហាញគំរូវីរភាពល្អសម្រាប់បំផុសគំនិតវិជ្ជមាន ដល់យុវជនជំនាន់ក្រោយ។

ក្នុងឱកាសទទួលពានរង្វាន់នេះ លោកជំទាវបណ្ឌិតបានថ្លែងអំណរគុណដល់ថ្នាក់ដឹកនាំ ក៏ដូចជាគណៈគ្រប់គ្រងសាកលវិទ្យាល័យ Adelaide ដែលបានទទួលស្គាល់សមិទ្ធផលការងារលោកស្រី ព្រមទាំងថ្លែងអំណរគុណដល់សាស្ត្រាចារ្យណែនាំ បានចូលរួមផ្ដល់មូលដ្ឋានគ្រឹះដ៏រឹងមាំសម្រាប់ឲ្យទេសាភិបាលធនាគារជាតិកម្ពុជា អាចទទួលបានជោគជ័យក្នុងការសិក្សា និងការរីកចម្រើនក្នុងអាជីពវិជ្ជាជីវៈ។

លោកជំទាវបណ្ឌិត ជា សិរី បានសម្រេចស្នាដៃការងារលេចធ្លោជាច្រើន ហើយតែងបានទទួលការអញ្ជើញធ្វើជាវាគ្មិនចែករំលែកចំណេះដឹង និងបទពិសោធន៍លើឆាកអន្តរជាតិជាច្រើន។ បន្ថែមលើនេះ លោកស្រីតែងខិតខំយ៉ាងសកម្មក្នុងការបង្កើនភាពអង់អាចផ្នែកសេដ្ឋកិច្ច សម្រាប់ស្ត្រី ដើម្បីជំរុញការផ្លាស់ប្ដូរជាវិជ្ជមាននៅក្នុងប្រទេសកម្ពុជា និងជុំវិញពិភពលោក។

ទេសាភិបាលធនាគារជាតិនៃកម្ពុជារូបនេះ បានបញ្ចប់ការសិក្សា និងទទួលបានសញ្ញាប័ត្រថ្នាក់បណ្ឌិតទស្សនវិជ្ជាផ្នែកវិទ្យាសាស្ត្រសេដ្ឋកិច្ច (Doctor of Philosophy in Economics) ពីសាកលវិទ្យាល័យ Adelaide ក្នុងឆ្នាំ ២០២១ ដោយផ្ដោតលើការសិក្សាស្រាវជ្រាវពីឥទ្ធិពលនៃបរិយាបន្នហិរញ្ញវត្ថុ និងសេរីភាវូនីយកម្មលើដំណើរអភិវឌ្ឍន៍សេដ្ឋកិច្ចអាស៊ាន៕

អត្ថបទ៖ មេរ៉ា, រូបភាព៖ National Bank of Cambodia

The post លោកស្រី ជា សិរី ទទួលពានរង្វាន់ពីសាកលវិទ្យាល័យអូស្រ្តាលី បញ្ជាក់ពីសមិទ្ធផលលេចធ្លោក្នុងការប្រើប្រាស់ចំណេះជំនាញពីការសិក្សា appeared first on Millions times.

មេធនាគារជាតិ ប្រាប់ពលរដ្ឋឲ្យប្រុងប្រយ័ត្នចំពោះការផ្សព្វផ្សាយដាក់លុយវិនិយោគចំណេញ ៩៩ភាគរយ

Virak វីរៈ — Thu, 23 May 2024 12:15:47 +0000

លោកស្រី ជា សិរី ទេសាភិបាលធនាគារជាតិនៃកម្ពុជា (NBC) បានប្រាប់ឲ្យពលរដ្ឋប្រុងប្រយ័ត្ន កុំបាញ់បោកការផ្សព្វផ្សាយក្នុងគ្រុបតេលេក្រាមមួយចំនួន ដែលឲ្យដាក់លុយវិនិយោគដោយធានាបានលុយចំណេញរហូតដល់ ៩៩ភាគរយ។

ការណែនាំប្រាប់យ៉ាងដូច្នេះ គឺបន្ទាប់ពីមានការផ្សព្វផ្សាយជាហូហែរ តាមគ្រុបតេលេក្រាមពីជនខិលខូចមួយចំនួន ដោយអួសសទាញឲ្យមានការវិនិយោគ ដោយធានាផ្ដល់ប្រាក់ចំណេញរហូតដល់ ៩៩ភាគរយ។

តាមរយៈហ្វេសប៊ុកផ្ទាល់ខ្លួន នៅថ្ងៃទី ២៣ ខែឧសភានេះ លោកស្រី ជា សិរី ទេសាភិបាលធនាគារជាតិនៃកម្ពុជា បានបង្ហោះរូបភាពចំនួន ៤សន្លឹក ដែលជាការផ្សព្វផ្សាយបោកបញ្ឆោត ឲ្យពលរដ្ឋដាក់វិនិយោគដាក់លុយ ១ ០០០ដុល្លារ ដោយបានមកវិញដល់ ៧ ៥០០ដុល្លារ ស្មើនឹងចំណេញ ៩៩ភាគរយ។

មន្ត្រីជាន់ខ្ពស់ធនាគារជាតិរូបនេះ បានប្រាប់ពលរដ្ឋថា នេះជាការផ្សព្វផ្សាយបោកប្រាស់តាមគ្រុបតេលេក្រាម ហើយណែនាំឲ្យប្រុងប្រយ័ត្ន មុននឹងជឿការផ្សព្វផ្សាយទាំងនោះ។ លោកស្រីថា «បើងាយៗយ៉ាងនេះ លែងមានអ្នកធ្វើការ រកស៊ីអីទៀតហើយ»។

លោកស្រី ជា សិរី លើកឡើងដែរថា «ពួកគេប្រមូលរូបបង់លុយតាមប្រព័ន្ធធនាគារ ដើម្បីជានុយឲ្យឃើញថា មានគេវិនិយោគជាមួយពួកគេ។ តែបើពិនិត្យឲ្យច្បាស់អ្នកទទួលប្រាក់នីមួយៗមា នឈ្មោះខុសៗគ្នាទាំងអស់។ បានន័យ ថា លុយមិនចូលក្រុមហ៊ុនបោកប្រាស់នោះទេ គឺគ្រាន់តែលួចរូបគេមកប្រើ ដោយពេលខ្លះម្ចាស់ខ្លួនមិនទាំងដឹងខ្លួនផង»៕

អត្ថបទ៖ វីរៈ រូបភាព៖ លោកស្រី ជា សិរី

តាមដានជាមួយយើង៖ Million Times

The post មេធនាគារជាតិ ប្រាប់ពលរដ្ឋឲ្យប្រុងប្រយ័ត្នចំពោះការផ្សព្វផ្សាយដាក់លុយវិនិយោគចំណេញ ៩៩ភាគរយ appeared first on Millions times.