សេចក្តីប្រកាស​ព័ត៌មាន​របស់​ក្រុមការងារ​ចំពោះ​កិច្ច​គ្រប់គ្រង​មូលនិធិ​កសាង​ហេដ្ឋារចនាសម្ព័ន្ធ​តាមព្រំដែន​ នៅថ្ងៃទី១ ខែមេសាបានឲ្យដឹងថា គិត​ចាប់​ពី​ខែធ្នូ ឆ្នាំ២០២៤ ដល់​ដំណាច់​ខែ​មីនា ឆ្នាំ២០២៥នេះ ដំណើរការ​កសាង​ផ្លូវក្រវាត់​ព្រំដែន​ជាមួយ​ឡាវ និង​វៀតណាម​សម្រេច​បាន​ប្រមាណ ៣៩.៩២ភាគរយ​នៃផែនការ ក្នុង​នោះ ខេត្តមណ្ឌលគិរី​សម្រេច​បាន​ប្រវែង ៤៤.៩០គីឡូម៉ែត្រ ស្មើនឹង ៤២.៤៥ភាគរយ និងខេត្តរតនគិរី​សម្រេច​បាន​ប្រវែង ៣០.៣០គីឡូម៉ែត្រ ស្មើ​នឹង ៣៤.២៦ភាគរយ។

តាមដានជាមួយយើង៖ Million Times

ជាមួយគ្នានេះ ការងារ​បោសសម្អាតមីន និងយុទ្ធភណ្ឌ​មិនទាន់ផ្ទុះ​សម្រេច​បាន​លើ​ផ្ទៃដី​ទំហំ ២ ៧៥២ ៥០០ ម៉ែត្រការ៉េ ស្មើនឹង ៤៤ភាគរយ​នៃ​ផ្ទៃដី​សរុប​ដែល​គ្រោង​រាវ​ទំហំ ៦ ២៥០ ០០០ម៉ែត្រការ៉េ។ បើតាមសេចក្តីប្រកាសព័ត៌មានដដែល គិតត្រឹមពេលនេះ ការងាររុករកគ្រាប់មីន និងយុទ្ធភណ្ឌមិនទាន់ផ្ទុះតាមផ្លូវក្រវាត់ព្រំដែនបានរកឃើញគ្រាប់គ្រប់ប្រភេទចំនួន ៧៩គ្រាប់ ក្នុងនោះ ៣៥គ្រាប់ ជាគ្រាប់បែកចង្កោម។

បើទោះបីជួបឧបសគ្គយ៉ាងណា ក្រុមការងារកសាងហេដ្ឋារចនាសម្ព័ន្ធតាមព្រំដែន បានប្តេជ្ញាសម្រេចការកសាងផ្លូវក្រវាត់ព្រំដែនទៅតាមផែនការ ដែលបានគ្រោងទុក ពោលគឺត្រូវបញ្ចប់ការសាងសង់ជាស្ថាពរនៅមុនពេលភ្លៀងធ្លាក់ជោគជាំនារដូវវស្សាខាងមុខ។ ក្នុងន័យនេះ ក្រុមការងារបានអះអាងពីការបន្តជំរុញការងារបោសសម្អាតមីន និងយុទ្ធភណ្ឌមិនទាន់ផ្ទុះ ព្រមទាំងត្រូវបន្តជំរុញល្បឿនកសាងផ្លូវក្នុងរដូវប្រាំងដោយធានាគុណភាព បច្ចេកទេស និងភាពធន់នឹងអាកាសធាតុ។

គួររំលឹកថា បន្ទាប់​ពី​បើកយុទ្ធនាការ​ឲ្យប្រជាពលរដ្ឋមានឱកាសចូលរួមចំណែកជាថវិកាដល់ដំណើរកសាងផ្លូវខ្សែក្រវាត់ព្រំដែន ​អស់​រយៈពេល ៦៦ថ្ងៃ នៅថ្ងៃទី៣១ ខែតុលា ឆ្នាំ២០២៤ រាជរដ្ឋាភិបាលបានប្រកាសបិទបញ្ចប់​មូលនិធិ​កសាង​ហេដ្ឋារចនាសម្ព័ន្ធព្រំដែន​ដោយ​ទទួល​បាន​ថវិកា​សរុប​ជិត ២៧លានដុល្លារ។

សម្តេច ហ៊ុន ម៉ាណែត នាយករដ្ឋមន្ត្រី បានអះអាងថា សម្តេចនឹងយក​ថវិកា​ទាំងនេះ​ទៅ​ប្រើប្រាស់​ក្នុង​ការ​កសាង​ផ្លូវក្រវាត់​ព្រំដែនប្រវែង​ប្រមាណ ២៥០គីឡូម៉ែត្រ ស្មើ​នឹង​ជាង១៨% នៃផ្លូវខ្សែក្រវាត់ព្រំដែន ដែល​នៅសល់​មិន​ទាន់​សាងសង់​ប្រមាណ ៥២% ប្រកប​ដោយ​តម្លាភាព៕

អត្ថបទ៖ សាងតេជៈ រូបភាព៖ ផេកមូលនិធិ​កសាង​ហេដ្ឋារចនាសម្ព័ន្ធព្រំដែន

The post ដំណើរការកសាងផ្លូវតាមខ្សែក្រវ៉ាត់ព្រំដែនកម្ពុជាជាមួយឡាវ និងវៀតណាម សម្រេចបានជិត ៤០% appeared first on Millions times.

 លោកស្រី ម៉ៅ ចំណាន បានលើកឡើងថា ទស្សនកិច្ចនេះគឺធ្វើឡើងតាមគោលបំណងរបស់សិល្បករ -សិល្បការិនី ដែលតែងទទូចចង់មកទស្សនាផ្ទាល់ ពីដែនអធិបតេយ្យ បូរណភាពដែនដីរបស់ខ្លួន នៅតាមបណ្តោយផ្លូវក្រវាត់ព្រំដែន ពិសេសក្នុងខេត្តមណ្ឌលគិរីនេះតែម្តង។

តាមដានជាមួយយើង៖ Million Times

ជាមួយគ្នានេះក៏មកស្វែងយល់ និងផ្សព្វផ្សាយបន្តពី កិច្ចខិតខំប្រឹងប្រែង ការលះបង់ពុះពារក្នុងកិច្ចការពារបរណភាពទឹកដីរបស់រាជរដ្ឋាភិបាលកម្ពុជា​ដែលគ្រប់នីតិកាលកន្លងមក បានយកចិត្តទុកខ្ពស់ចំពោះបញ្ហាព្រំដែន ហើយបានកែប្រែតំបន់ព្រំដែនដែលធ្លាប់តែប្រឈមមុខដាក់គ្នា ទៅជាព្រំដែនសន្តិភាព និងអភិវឌ្ឍន៍។

លោកស្រីបន្តថា អ្នកចូលរួមទាំងអស់ ក៏បានស្វែងយល់ពីការលំបាករបស់កងកម្លាំងរបស់យើង ដែលបានពុះពារគ្រប់ឧបសគ្គ ប្រឈមនឹងគ្រាប់មីន និងយុទ្ធភណ្ឌមិនទាន់ផ្ទុះ អាកាសធាតុ និងបញ្ហាប្រឈមជាច្រើនទៀត ដូចជាទីតាំងភូមិសាស្ត្រលំបាក។

 លើសពីនេះ ការចុះមកទស្សនាផ្ទាល់នៅពេលនេះ លោកស្រីអ្នកឧកញ៉ា ម៉ៅ ចំណាន ក៏បានលើកឡើងថា ធ្វើឡើងគឺដើម្បីរួមចំណែក តបតាមការអំពាវនាវរបស់ប្រមុខរាជរដ្ឋាភិបាលនាពេលកន្លងមក សមាគមសិល្បករខ្មែរ បានកៀរគរសិល្បករ-សិល្បការិនីចូលរួមបរិច្ចាគថវិកាតាមលទ្ធភាពជាមួយនឹង«មូលនិធិកសាងហេដ្ឋារចនាសម្ព័ន្ធព្រំដែន»។ ដូច្នេះសមាគមបាននាំបងប្អូនសិល្បៈមួយចំនួនមកទស្សនានូវសមិទ្ធផលដែលកើតចេញពីការចូលរួមរបស់ពួកគាត់ រួមគ្នាជាមួយបងប្អូនប្រជាពលរដ្ឋទូទាំងប្រទេស។​

លោកស្រីបានថ្លែងបញ្ជាក់ថា «ខ្ញុំក៏ដូចជាបងប្អូនទាំងអស់ បានមើលឃើញយ៉ាងជាក់ច្បាស់ ពីភាពរឹងមាំនៃដែនអធិបតេយ្យរបស់កម្ពុជាយើង នាពេលនេះ និងតទៅអនាគត។​​ ទី១.ការចរចាបោះបង្គោលព្រំដែនឱ្យបានច្បាស់លាស់ និងត្រឹមត្រូវបំផុតតាមនិយាមការអន្តរជាតិជារបង។ ទី២. ការកសាងហេដ្ឋារចនាសម្ព័ន្ធ និងការអភិវឌ្ឍ ផ្លូវក្រវាត់ព្រំដែន។ និងទី៣. ជំរុញការអភិវឌ្ឍ និងប្រជាជនមក រស់នៅតាមបណ្តោយព្រំដែនឱ្យកកាន់តែច្រើន ដើម្បីបង្កើតរបង ខឿនការពារជាតិ»។

សូមជម្រាបថា ការអនុវត្តគម្រោងកសាងផ្លូវខ្សែក្រវាត់ព្រំដែន ប្រាស់ថវិកាមូលនិធិព្រំដែន ដោយការឈូសផ្លូវទទឹង ៥ បើកមុខសម្រាប់រកខ្សែផ្លូវដំបូង សម្រេចបានប្រវែង ៩៥,៧០គ.ម ក្នុងនោះខេត្តមណ្ឌលគិរី សម្រេចបានប្រវែង ៦០,៧០គ.ម ខេត្តរតនគិរី សម្រេចបានប្រវែង ៣៥គ.ម។

ការឈូសផ្លូវទទឹង ២០ម. សម្រាប់រកអ័ក្សផ្លូវ សម្រេចបានប្រវែង ៨២,៧០គ.ម​ ខេត្តមណ្ឌលគិរីសម្រេចបានប្រវែង ៥៣,៣០គ.ម និងខេត្តរតនគិរី សម្រេចបានប្រវែង ៣៥គ.ម។​

ចំពោះការងារលុបជ្រលង ចិតជញ្ជាំងភ្នំ និងបន្ទាបចំណោទភ្នំ សម្រេចបានប្រវែង ៧១,៦០គ.ម ហើយខេត្តមណ្ឌលគិរី សម្រេចបានប្រវែង ៤២,២០គ.ម ខេត្តរតនគិរី សម្រេចបានប្រវែង ២៩,៤០គ.ម៕

The post លោកស្រី ម៉ៅ ចំណាន នាំសិល្បករឲ្យឃើញផ្ទាល់ពីភាពរឹងមាំនៃដែនអធិបតេយ្យរបស់កម្ពុជានាពេលនេះ និងតទៅអនាគត appeared first on Millions times.

នាយឧត្តមសេនីយ៍ ខ្វាន់ ស៊ាម អគ្គមេបញ្ជាការរងនៃកងយោធពលខេមរភូមិន្ទ មេបញ្ជាការ បញ្ជាការដ្ឋានវិស្វកម្មបានឲ្យដឹងថា គម្រោងកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន និងផ្លូវតភ្ជាប់ចូលផ្លូវព្រំដែនមានប្រវែងផ្លូវសរុបប្រមាណ២៥០ គីឡូម៉ែត្រ ក្នុងនោះខេត្តមណ្ឌលគិរី ប្រវែងប្រមាណ១៤៧,៥២ គ.ម និងខេត្តរតនគិរី ប្រវែងប្រមាណ ១០២.៤៨ គ.ម ដែលការកសាងនេះប្រើរយៈពេលប្រមាណ ៣០ខែ នឹងសម្រេចជាស្ថាពរក្នុងអំឡុង ខែឧសភា ឆ្នាំ២០២៧។

តាមដានជាមួយយើង៖ Million Times

នាយឧត្តមសេនីយ៍ ខ្វាន់ ស៊ាម បានលើកឡើងថា រយៈពេលនៃការ​សាងសង់​ប្រមាណ ៣០ខែ​ដោយប្រើប្រាស់កម្លាំងសរុបចំនួន ៦ កងឯកភាព ក្នុងនេះខេត្តមណ្ឌលគិរីចំនួន ៤ កងឯកភាព និងខេត្តរតនគិរីចំនួន ២ កងឯកភាព។ 

លោកបន្តថា ការស្ថាបនាផ្លូវក្រវាត់ព្រំដែន ត្រូវអនុវត្តតាមបទដ្ឋានបច្ចេកទេសរបស់បញ្ជាការដ្ឋានវិស្វកម្ម​ អគ្គបញ្ជាការ ដែលក្នុងនោះរួមមាន៖ បច្ចេកទេសការងារបោសសម្អាតមីន-យុទ្ធភណ្ឌមិនទាន់ផ្ទុះ។ បទដ្ឋានបច្ចេកទេស ការងារសាងសង់ផ្លូវថ្នល់ និងបទដ្ឋានបច្ចេកទេស និងការងារសាងសង់សំណង់សិល្បការ្យ។

លោក ខ្វាន់ ស៊ាម បានបញ្ជាក់ថា កងកម្លាំងវិស្វកម្ម ជម្នះរាល់ឧបសគ្គ ដើម្បីសម្រេចបេសកកម្មកសាងផ្លូវក្រវាត់ព្រំដែនជូនជាតិ ទោះបីត្រូវប្រឈមការលំបាកពីស្ថានភាពភូមិសាស្រ្តយ៉ាងណាក៏ដោយ។ លើសពីនេះ កត្តាប្រឈមក្នុងការ​កសាង​ផ្លូវ​ក្រវាត់ព្រំដែន​ គឺ​ក្នុងរដូវភ្លៀង​ តំបន់ភ្នំ​ និង​តំបន់មាន​គ្រាប់យុទ្ធភ័ណ្ឌមិនទាន់ផ្ទុះនៅសេសសល់។ លោកសង្កត់ធ្ងន់ថា ការស្ថាបនាផ្លូវក្រវាត់ព្រំដែន ជំហានដំបូងគឺផ្តោតលើការបោសសម្អាតយុទ្ធភ័ណ្ឌមិនទាន់ផ្ទុះដែលបង្កគ្រោះថ្នាក់ដល់ដំណើរការកសាង។

ក្រុមការងារចំពោះកិច្ចសម្រាប់គ្រប់គ្រង «មូលនិធិកសាងហេដ្ឋារចនាសម័្ពន្ធតាមព្រំដែន» បានអះអាងថា ថវិកា «មូលនិធិកសាងហេដ្ឋារចនាសម្ព័ន្ធតាមព្រំដែនដោយ ផ្តោតលើផ្លូវក្រវាត់ព្រំដែន» ទទួលបានជិត ២៧លានដុល្លារ បានពីការចូលរួមដោយស្ម័គ្រចិត្តរបស់ប្រជាពលរដ្ឋគ្រប់មជ្ឈដ្ឋាន និងគ្រប់ ស្រទាប់ វណ្ណៈ នឹងត្រូវយកទៅប្រើប្រាស់សម្រាប់សាងសង់ផ្លូវក្រវាត់ព្រំដែនប្រវែងសរុបប្រមាណ ២៥០គីឡូ ម៉ែត្រក្នុងភូមិសាស្ត្រខេត្តមណ្ឌលគិរី និងរតនគិរី៕

អត្ថបទ៖ សាងតេជៈ រូបភាព៖ FBID

The post លោក ខ្វាន់ ស៊ាម បញ្ជាក់ពីការចាប់ផ្តើមចល័តគ្រឿងចក្រទៅចូលគោលដៅតាមព្រំដែនដើម្បីដំណើរការសាងសង់ appeared first on Millions times.

សេចក្តីជូនដំណឹងបិទបញ្ចប់កសាងហេដ្ឋារចនាសម្ព័ន្ធតាមព្រំដែន របស់ខុទ្ធកាល័យនាយករដ្ឋមន្រ្តីនៅថ្ងៃអាទិត្យនេះ បានឲ្យដឹងថា មូលនិធិកសាងហេដ្ឋារចនាសម្ព័ន្ធតាមព្រំដែន នឹងត្រូវបិទបញ្ចប់ ដោយឈប់ទទួលការចូលរួមបរិច្ចាគវិភាគទានស្ម័គ្រចិត្ត ចាប់ពីថ្ងៃទី៣១ ខែតុលាឆ្នាំ២០២៤ ខាងមុខនេះតទៅ។

តាមដានជាមួយយើង៖ Million Times

ខុទ្ទកាល័យនាយករដ្ឋមន្រ្តី បញ្ជាក់ថា គិតត្រឹមព្រឹកថ្ងៃទី២០ ខែតុលា ឆ្នាំ២០២៤នេះ មានបងប្អូនជនរួមជាតិប្រមាណជិត៧០ម៉ឺនអង្គ/នាក់ បានចូលរួមបរិច្ចាគវិភាគទានស្ម័គ្រចិត្តយ៉ាងផុលផុសដោយសរុបជាទឹកប្រាក់ ចំនួន ២៦,៣៣២,៨៨៣.០០ដុល្លារ (ម្ភៃប្រាំមួយលានសាមសិបបីម៉ឺនពីរពាន់ប្រាំបីរយប៉ែតសិបបីដុល្លារអាមេរិក)។ ខុទ្ទកាល័យនាយករដ្ឋមន្រ្តីបញ្ជាក់បន្ថែមថា វិភាគទានស្ម័គ្រចិត្តដែលទទួលបាននេះ នឹងត្រូវយកទៅប្រើប្រាស់ក្នុងការកសាងហេដ្ឋារចនាសម្ព័ន្ធតាមព្រំដែន ដោយផ្តោតលើការកសាងផ្លូវក្រវាត់ព្រំដែន។

ជាមួយគ្នានេះដែរ ខុទ្ទកាល័យនាយករដ្ឋមន្រ្តី បានប្រាប់ជនរួមជាតិទាំងក្នុង និងក្រៅប្រទេស ដែលមានបំណងចូលរួមបរិច្ចាគវិភាគទានស្ម័គ្រចិត្តក្នុងមូលនិធិកសាងហេដ្ឋារចនាសម្ព័ន្ធតាមព្រំដែន សូមបន្តទាក់ទងក្រុមការងារមូលនិធិ និងធ្វើការបរិច្ចាគទៅកាន់គណនីធនាគាររបស់មូលនិធិឱ្យបានរួសរាន់នៅមុនថ្ងៃទី៣១ ខែតុលាឆ្នាំ២០២៤ ខាងមុខនេះ។

ពាក់ព័ន្ធនឹងមូលនិធិកសាងហេដ្ឋារចនាសម្ព័ន្ធតាមព្រំដែននេះដែរ សម្តេច ហ៊ុន ម៉ាណែត ធ្លាប់បានលើកឡើងក្នុងវេទិកាសាធារណៈថា ការកសាងផ្លូវក្រវាត់តាមព្រំដែន រាជរដ្ឋាភិបាល នឹងបង្កើតគណៈកម្មការដើម្បីរៀបចំការចំណាយថវិកា ក្នុងការសាងសង់ឲ្យមានភាពច្បាស់លាស់ និងត្រឹមត្រូវ និងធ្វើបច្ចុប្បន្នភាពលម្អិតអំពីការចំណាយ។ បន្ថែមពី​នោះទៀត សម្តេចនាយករដ្ឋមន្រ្តីបានគូសបញ្ជាក់ថា រាជរដ្ឋាភិបាល សូមធ្វើការធានាជូននូវតម្លាភាព និងការប្រើប្រាស់ ឲ្យចំគោលដៅនៃថវិកា សម្រាប់ធ្វើផ្លូវក្រវាត់តាមព្រំដែន ហើយការងារនេះ នឹងធ្វើជាជំហានៗ។

បើតាមសម្តេច ហ៊ុន ម៉ាណែត កិច្ចការដែលរាជរដ្ឋាភិបាល ត្រូវធ្វើដើម្បីការពារទឹកដី រួមមាន៖ បន្តបោះបង្គោលព្រំដែន ជាមួយប្រទេសជិតខាងឲ្យចប់សព្វគ្រប់, អភិវឌ្ឍន៍តំបន់ព្រំដែន, ជំរុញកំណើនប្រជាជន និងការធ្វើហេដ្ឋារចនាសម្ព័ន្ធតភ្ជាប់។ សម្តេចបញ្ជាក់បន្ថែមថា ផ្លូវក្រវាត់ព្រំដែននៅសល់ប្រវែងប្រមាណ១,៣០០គីឡូម៉ែត្រទៀត។ កាលពីចុងខែកក្កដា សម្តេចបានចុះហត្ថលេខាលើផែនការសាងសង់បញ្ចប់ផ្លូវនេះ ដោយប្រើរយៈពេល១០ឆ្នាំ ជាមួយថវិកា ជាង២០០លានដុល្លារ៕

អត្ថបទ៖ សាងតេជៈ រូបភាព៖ បណ្តាញសង្គម

The post មូលនិធិកសាងហេដ្ឋារចនាសម្ព័ន្ធតាមព្រំដែន ប្រមូលថវិកាបានជាង ២៦លានដុល្លារត្រឹមថ្ងៃទី២០ខែតុលានេះ appeared first on Millions times.

សម្តេចមហាបវរធិបតី ហ៊ុន ម៉ាណែត នាយករដ្ឋមន្ត្រី នៃព្រះរាជាណាចក្រកម្ពុជា បាន​ប្រកាស​ពី​ផេក​ផ្លូវការ មូលនិធិកសាងហេដ្ឋារចនាសម្ព័ន្ធតាមព្រំដែន ដែល​ផ្តោត​ការ​កសាង​ផ្លូវ​ក្រវ៉ាត់​ព្រំដែន​ បាន​បង្កើត​ផេក​មូល​និធិ​ផ្លូវការ​ដែល​មាន​ឈ្មោះ​ថា ​«មូលនិធិ​កសាង​ហេដ្ឋា​រចនាសម្ព័ន្ធ​តាម​ព្រំដែន​- FBID» ​ទទួល​បាន​​សញ្ញា​ធីក​ពណ៌​ខៀវ​ (Verify) ​ពី​ហ្វេសប៊ុក ​ដើម្បី​ផ្តល់​ជូន​នូវ​ព័ត៌មាន និង​វឌ្ឍន​ភាព​ការងារ​របស់​មូល​និធិ​ចែក​ជូន​ដល់​សាធារណជន​ បងប្អូន អ៊ំពូមីង តាយាយ កាន់តែទូលំទូលាយបន្ថែមទៀត​។

តាមដានជាមួយយើង៖ Million Times

​

សម្តេចធិបតី ហ៊ុន ម៉ាណែត ​នាយករដ្ឋ​មន្រ្តី​នៃ​កម្ពុជា ​សម្រេច​បង្កើត​ «មូល​និធិ​កសាង​ហេដ្ឋា​រចនា​សម្ព័ន្ធ​តាម​ព្រំដែន» ​ក្នុង​គោល​បំណង​ដើម្បី​កៀរ​គរ​ថវិកា​បន្ថែម​ សម្រាប់​កសាង​ហេដ្ឋា​រចនា​សម្ព័ន្ធ​តាម​បណ្ដោយ​ព្រំដែន ​ដោយ​ផ្ដោត​លើ​ការ​កសាង​ផ្លូវ​ក្រវាត់​ព្រំដែន ព្រម​ទាំង​បាន​ផ្តល់​ឱកាស​ឱ្យ​ប្រជាពលរដ្ឋ​ខ្មែរ​គ្រប់​មជ្ឈដ្ឋាន​ទាំង​ក្នុង​ និង​ក្រៅ​ប្រទេស ​បាន​ចូលរួម​ចំណែក​ដោយ​ផ្ទាល់​ជាមួយ រាជ​រដ្ឋាភិបាលនៅ​ក្នុង​បុព្វហេតុការពារ ​និង​អភិវឌ្ឍជាតិ ​ក្នុង​ស្មារតី​មហាសាមគ្គីជាតិ​ខ្មែរ​ ដើម្បី​ថែរក្សា​ សុខ​សន្តិភាព ​អធិបតេយ្យ ​និង​បូរណភាព​ទឹកដី ​ក៏​ដូច​ជា​ការ​ជំរុញ​ការ​អភិវឌ្ឍ នៅ​តាម​តំបន់​ព្រំដែន​ឱ្យ​បាន​កាន់​តែ​រឹងមាំ ​និង​ប្រកប​ដោយចីរភាព។

​ខណៈ​ដែល​មក​ដល់​ពេល​នេះ​មាន​ សាធារណជន​ បងប្អូន អ៊ំពូមីង តាយាយ ​ចូល​រួម​បរិច្ចាក​ជា​ប្រាក់​យ៉ាង​ច្រើន​សន្ធឹកសន្ធាប់​ហើយ។ នេះ​ជា​សញ្ញា​បង្ហាញ​ឱ្យ​ឃើញ​ថា​ប្រជាជន​កម្ពុជា​ពិត​ជា​ស្រលាញ់​ទឹក​ដី ​និង​សាមគ្គី​គ្នា​បាន​យ៉ាង​ល្អ។ ជាមួយ​គ្នា​នេះ​ដែរ​សម្តេច​ធិបតី​​​ ហ៊ុន ម៉ាណែត នាយក​រដ្ឋ​មន្រ្តី​នៃ​កម្ពុជា ​ក៏​បាន​ធ្វើ​លិខិត​ថ្លែង​អំណរ​គុណ​ដល់​បរិច្ចាគថវិកាចូលរួមក្នុង “មូលនិធិកសាង​ហេដ្ឋា​រចនា​សម្ព័ន្ធ​តាម​ព្រំដែន” ​គ្រប់​ៗ​គ្នា​ផង​ដែរ៕

The post “មូលនិធិកសាងហេដ្ឋារចនាសម្ព័ន្ធតាមព្រំដែន-FBID” ​ប្រកាស​ផេក​ផ្លូវ​ការ មាន​សញ្ញាធីកពណ៌ខៀវ (Verify) ពីហ្វេសប៊ុក appeared first on Millions times.