ប្រាក់រៀល Archives - Millions times

បណ្ឌិត ជា សិរី៖ អត្រាដាក់ប្រាក់សន្សំ និងកម្ចីប្រាក់រៀលពីធនាគារនៅកម្ពុជា មានកម្រិតទាប បើធៀបនឹងដុល្លារ

Vin Chang — Fri, 28 Mar 2025 07:30:01 +0000

ទេសាភិបាលធនាគារជាតិនៃកម្ពុជា លោកជំទាវបណ្ឌិត ជា សិរី បានឲ្យដឹងថា ការដាក់ប្រាក់រៀលសន្សំក្នុងធនាគាររបស់ប្រជាជនខ្មែរ មានត្រឹមតែ ១១ ភាគរយប៉ុណ្ណោះ ក្រៅពីនេះគឺជាប្រាក់ដុល្លារអាមេរិកទាំងអស់។

តាមដានជាមួយយើង៖ Million Times

សម្រាប់ឥណទាន ដែលប្រជាជនកម្ពុជាខ្ចីជាប្រាក់រៀលពីគ្រឹះស្ថានធនាគារ និងហិរញ្ញវត្ថុ ក៏មានចំនួនតិចតួចដែរ ដែលក្នុងនោះមានតែ ១៣% ប៉ុណ្ណោះ ជាប្រាក់រៀល ហើយសល់ពីនេះសុទ្ធសឹងជាប្រាក់ដុល្លារអាមេរិក។ លោកជំទាវ បញ្ជាក់ថា កំណើនចរាចរប្រាក់រៀល ក៏បានកើនឡើង ទន្ទឹមគ្នានឹងការចរាចរប្រាក់ដុល្លារ ដែលធ្វើឲ្យកម្រិតដុល្លាររូបនីយកម្មនៅទ្រឹង ក្នុងរយៈពេលជាងមួយទសវត្សរ៍ចុងក្រោយនេះ។

លោកជំទាវបណ្ឌិត ជា សិរី បានលើកឡើងនៅសិក្ខាសាលាផ្សព្វផ្សាយ ស្ដីពីប្រាក់រៀល ប្រព័ន្ធទូទាត់បាគង និងខេអេចឃ្យូអរ និងក្នុងឱកាសអបអរសាទរខួបលើកទី៤៥ នៃការដាក់ឲ្យចរាចរប្រាក់រៀលឡើងវិញ នៅវិមានរដ្ឋសភា កាលពីថ្ងៃ២០ ខែមីនា ឆ្នាំ ២០២៥ កន្លងទៅ។

សិក្ខាសាលានោះធ្វើឡើងក្នុងគោលបំណងលើកកម្ពស់ការយល់ដឹងក្នុងការគាំទ្រប្រាក់រៀល ក៏ដូចជាជំរុញឲ្យមានការប្រើប្រាស់ប្រាក់រៀលទូលំទូលាយពីគ្រប់ភាគីពាក់ព័ន្ធទាំងអស់ ដើម្បីរក្សាអធិបតេយ្យជាតិ ធ្វើឲ្យសេរីភាពនៃសេដ្ឋកិច្ចកាន់តែមានភាពប្រសើរឡើង និងពង្រឹង អត្តសញ្ញាណជាតិ និងភាពធន់។

កាលឆ្នាំ ២០២៤ កន្លងទៅ ចំនួនប្រតិបត្តិការទូទាត់ជាប្រាក់រៀលតាមរយៈប្រព័ន្ធបាគង បានកើនឡើង ៤,៣ ដង ហើយទំហំទឹកប្រាក់បានកើនឡើង ២,២ ដង ធៀបនឹងឆ្នាំ ២០២៣ ដែលច្រើនជាងកំណើននៃប្រតិបត្តិការ និងទំហំទូទាត់ជាប្រាក់ដុល្លារអាមេរិក ដែលបានកើនឡើង ២,៣ ដង និង ១,៩ ដងរៀងគ្នា។

ធនាគារជាតិនៃកម្ពុជា បានអះអាងថា ការប្រើប្រាស់លុយរៀលច្រើននឹងពង្រឹងអធិបតេយ្យ និងបង្កើនភាពម្ចាស់ការលើការគ្រប់គ្រងសេដ្ឋកិច្ច។ នេះដោយសារនៅពេលលុយរៀល អាចដើរតួនាទីសំខាន់ក្នុងការកំណត់ថ្លៃទំនិញ និងសេវា គឺកម្ពុជាអាចរក្សាស្ថិរភាពថ្លៃបានប្រសើរជាងមុន។

ជាមួយគ្នានេះ ធនាគារជាតិ អាចជួយសម្រាល ឬបន្ថយអត្រាការប្រាក់បានមួយកម្រិត តួយ៉ាងដូចជាការឲ្យខ្ចីបច្ចុប្បន្ន ភាគច្រើនជាដុល្លារអាមេរិក អត្រាការប្រាក់ត្រូវបានកំណត់ដោយប្រទេស ដែលបោះពុម្ពប្រាក់ដុល្លារអាមេរិក។ ដូចនេះអត្រាការប្រាក់ត្រូវប្រែប្រួលទៅតាមនយោបាយរូបិយវត្ថុនៅសហរដ្ឋអាមេរិក៕

អត្ថបទ៖ រូបភាព៖ cpp

The post បណ្ឌិត ជា សិរី៖ អត្រាដាក់ប្រាក់សន្សំ និងកម្ចីប្រាក់រៀលពីធនាគារនៅកម្ពុជា មានកម្រិតទាប បើធៀបនឹងដុល្លារ appeared first on Millions times.

នាយករដ្ឋមន្រ្តីអំពាវនាវអ្នកធ្វើធុរកិច្ច និងក្រុមឧកញ៉ាជំរុញការប្រើប្រាស់ប្រាក់រៀលឱ្យបានច្រើន

Vin Chang — Sat, 03 Aug 2024 01:40:43 +0000

ថ្លែងក្នុងពិធីសំណេះសំណាលជាមួយក្រុមឧកញ៉ា និងអ្នកអភិវឌ្ឍលំនៅឋាន កាលល្ងាចថ្ងៃទី២ ខែសីហា ប្រមុខរាជរដ្ឋាភិបាល បានលើកទឹកចិត្តប្រជាពលរដ្ឋ អ្នកធ្វើធុរកិច្ច និងឧកញ៉ាៗ ដែលជាម្ចាស់ក្រុមហ៊ុន ជួយជំរុញការប្រើប្រាស់ប្រាក់រៀលឱ្យបានច្រើន។

ការប្រកាសបែបនេះ ស្របពេលនឹងការប្រកាសដាក់យន្តការសម្រួលការចាយប្រាក់ដុល្លារចាស់ ទក់ ប្រឡាក់ ឬរហែកតិចតួចនៅទូទាំងប្រទេស។ សម្តេច ហ៊ុន ម៉ាណែត នាយករដ្ឋមន្រ្តី បានបញ្ជាក់ថា ការចាយវាយ ឬប្រើប្រាស់ប្រាក់រៀលរបស់ជាតិ គឺមិនបារម្ភលើការខាតបង់ដោយគេកាត់ទឹកនោះឡើយ ហើយថែមទាំងជួយលើកកម្ពស់អត្តសញ្ញាណជាតិ។

តាមដានជាមួយយើង៖ Million Times

សម្តេចថ្លែងថា៖ «ខ្ញុំសូមលើកទឹកចិត្ត ឱ្យមានការប្រើប្រាស់លុយរៀល ឱ្យបានច្រើន ព្រោះយើងចាយលុយរៀលអត់មានបញ្ហាទេ មួយទៀតក៏ជាអត្តសញ្ញាណរបស់យើងដែរ។ អីចឹងខ្ញុំលើកទឹកចិត្ត ហើយថ្ងៃនេះនៅទីនោះសុទ្ធតែឧកញ៉ា អ្នកដែលមានធុរកិច្ច សូមជួនលើកទឹកចិត្តប្រាក់រៀលឱ្យបានច្រើន»។

ជាមួយគ្នានោះដែរ សម្តេចនាយករដ្ឋមន្ត្រីបានគូសបញ្ជាក់ពីយន្តការនៃការប្រើប្រាស់ប្រព័ន្ធទូទាត់ឌីជីថល (QR Code) ក៏កំពុងរួមចំណែកបានយ៉ាងច្រើន ក្នុងការជំរុញការប្រើប្រាស់ប្រាក់រៀលជាតិ ហើយការទូទាត់តាមប្រព័ន្ធ QR Code ក៏នឹងផ្តល់ភាពងាយស្រួលដល់ភ្ញៀវទេសចរផងដែរ។

បើតាមលោកស្រី ជា សិរី ទេសាភិបាលធនាគារជាតិនៃកម្ពុជា បានឲ្យដឹងថា ការប្រើប្រាស់ប្រាក់រៀលតាមប្រព័ន្ធអេឡិចត្រូនិកបានកើនឡើងក្នុងអត្រាមួយខ្ពស់ ដោយក្នុងឆ្នាំ ២០២៣ ប្រតិបត្តិការទូទាត់ជាប្រាក់រៀលតាមប្រព័ន្ធអេឡិចត្រូនិកបានកើនឡើង ៤៤ ភាគរយ ធៀបនឹងឆ្នាំ ២០២២។

ក្នុងសិក្ខាសាលាខួបលើកទី៤៤ នៃការដាក់ឱ្យចរាចរប្រាក់រៀលឡើងវិញ ក្នុងដំណើរឆ្ពោះទៅមុខដើម្បីប្រាក់រៀល និងប្រព័ន្ធបាគង ពេលកន្លងទៅ លោកស្រី ជា សិរី បានថ្លែងថា៖ «ការប្រើប្រាស់ប្រាក់រៀលតាមប្រព័ន្ធអេឡិចត្រូនិកបានកើនឡើង ក្នុងអត្រាមួយខ្ពស់ ដោយក្នុងឆ្នាំ ២០២៣ ប្រតិបត្តិការទូទាត់ជាប្រាក់រៀលតាមប្រព័ន្ធអេឡិចត្រូនិកបានកើនឡើង ៤៤ ភាគរយ ធៀបនឹងឆ្នាំ ២០២២ និងខ្ពស់ជាងកំណើននៃប្រតិបត្តិការទូទាត់ អេឡិចត្រូនិកជាប្រាក់ដុល្លារអាមេរិកដែលកើនក្នុងអត្រា ៣,១ ភាគរយ»។

លើសពីនេះ បានបញ្ជាក់ថា ធនាគារជាតិនៃកម្ពុជា ក៏បានជំរុញការតភ្ជាប់ប្រព័ន្ធទូទាត់ជាមួយប្រទេសជិតខាង និងក្នុងតំបន់ដើម្បីឱ្យប្រជាពលរដ្ឋកម្ពុជា ដែលមានគណនីជាប្រាក់រៀលអាចទូទាត់បានតាមប្រព័ន្ធឃ្យូអរកូដ (QR code) បានងាយស្រួលនៅក្នុងប្រទេសទាំងនោះ។

លោកស្រីបានសង្កត់ធ្ងន់ថា ការតភ្ជាប់នេះក៏បានអនុញ្ញាតឱ្យទេសចរបរទេសអាចទូទាត់តាមរយៈ QR code នៅតាមហាងទំនិញនានានៅកម្ពុជា ដែលហាងទាំងនោះនឹងទទួលបានការទូទាត់នេះជាប្រាក់រៀល។ បច្ចុប្បន្ន កម្ពុជាបានតភ្ជាប់ប្រព័ន្ធទូទាត់ជាមួយប្រទេសថៃ វៀតណាម និងឡាវ ព្រមទាំងក្រុមហ៊ុនផ្តល់សេវាទូទាត់អន្តរជាតិមួយចំនួនជាមួយនឹងផែនការតភ្ជាប់ជាមួយប្រទេសផ្សេងទៀតក្នុងតំបន់ ដូចជា ចិន និងឥណ្ឌា ជាដើម៕

អត្ថបទ៖ សេដ្ឋានី រូបភាព៖ ក្រុមព័ត៌មានសម្តេចធិបតី និងធនាគារជាតិនៃកម្ពុជា

The post នាយករដ្ឋមន្រ្តីអំពាវនាវអ្នកធ្វើធុរកិច្ច និងក្រុមឧកញ៉ាជំរុញការប្រើប្រាស់ប្រាក់រៀលឱ្យបានច្រើន appeared first on Millions times.

ធនាគារជាតិនៃកម្ពុជា និងក្រសួងពាណិជ្ជកម្ម សហការគ្នាលើកកម្ពស់ការប្រើប្រាស់ប្រាក់រៀល កាន់តែទូលំទូលាយ

Virak វីរៈ — Wed, 22 May 2024 12:04:24 +0000

ធនាគារជាតិនៃកម្ពុជា និងក្រសួងពាណិជ្ជកម្ម រៀបចំកិច្ចសហប្រតិបត្តិការរដើម្បីលើកកម្ពស់ការប្រើប្រាស់ប្រាក់រៀល ឲ្យបានកាន់តែទូលំទូលាយ។

តាមដានជាមួយយើង៖ Million Times

កាលពីថ្ងៃទី ២១ ខែឧសភា លោកយឹម លាត ទេសាភិបាលរង ធនាគារជាតិនៃកម្ពុជា បានដឹកនាំកិច្ចប្រជុំពិភាក្សា ជាមួយគណៈប្រតិភូក្រសួងពាណិជ្ជកម្មកម្ពុជា ដឹកនាំដោយលោកស្រី សេរី បូរាពេជ្រ រដ្ឋលេខាធិការក្រសួងពាណិជ្ជកម្ម ក្នុងគោលបំណងរៀបចំកិច្ចសហប្រតិបត្តិការរវាងស្ថាប័នទាំងពីរ ដើម្បីលើកកម្ពស់ការប្រើប្រាស់ប្រាក់រៀល។

លោក យឹម លាត បានវាយតម្លៃខ្ពស់ចំពោះកិច្ចសហការ និងការខិតខំប្រឹងប្រែងរបស់ក្រសួងពាណិជ្ជកម្ម ដែលបានរួមចំណែកយ៉ាងសំខាន់ នៅក្នុងការលើកកម្ពស់ការប្រើប្រាស់ប្រាក់រៀលកន្លងមក ជាពិសេសការតម្រូវឲ្យមានបិទស្លាកតម្លៃទំនិញ នៅតាមហាងទំនិញនានា ជាប្រាក់រៀល។

លោក ក៏បានឲ្យដឹងដែរថា ធនាគារជាតិនៃកម្ពុជា ក៏បានដាក់ចេញនូវមធ្យោបាយទូទាត់តាមប្រព័ន្ធអេឡិចត្រូនិក ដែលជាការរួមចំណែកដល់ការលើកកម្ពស់ការប្រើប្រាស់ប្រាក់រៀលផង និងធ្វើឲ្យការទូទាត់នៅក្នុងពាណិជ្ជកម្មជារួមប្រព្រឹត្តទៅដោយប្រសិទ្ធភាពផង។

នៅកិច្ចប្រជុំនេះ ភាគីទាំងពីរ បានពិភាក្សាអំពីផែនការសកម្មភាពរបស់ធនាគារជាតិនៃកម្ពុជា ព្រមទាំងវិធានការ និងគោលនយោបាយ ដែលក្រសួងពាណិជ្ជកម្មអាចអនុវត្តបន្ថែមទៀត ដើម្បីចូលរួមលើកកម្ពស់ការប្រើប្រាស់ប្រាក់រៀល ឲ្យបានកាន់តែទូលំទូលាយ។

បើតាមធនាគារជាតិនៃកម្ពុជា ការលើកកម្ពស់ការប្រើប្រាស់ប្រាក់រៀល ទាមទារឲ្យមានកិច្ចសហការ និងសម្របម្រួលពីអាជ្ញាធរ និងគ្រប់ភាគីពាក់ព័ន្ធ ដោយក្នុងនោះក្រសួងពាណិជ្ជកម្ម គឺជាក្រសួងគន្លឹះមួយផងដែរ៕

អត្ថបទ៖ វីរៈ រូបភាព៖ ធនាគារជាតិនៃកម្ពុជា

The post ធនាគារជាតិនៃកម្ពុជា និងក្រសួងពាណិជ្ជកម្ម សហការគ្នាលើកកម្ពស់ការប្រើប្រាស់ប្រាក់រៀល កាន់តែទូលំទូលាយ appeared first on Millions times.